الأربعاء، 28 مايو 2008

قبل الجــــــــــــــــــــواز متهنيه......وبعـــــــــــــده متــــــــــربيه









ايوا والله فعلا الواحدة منا قبل الجواز متهنية سامبتيك كده حاجة شبه... البونبونايه و العسلية اما بعد... الجواز يووووووه متربيه تربيه ولا الشـــغـــالة الفليبنيه!

يا سلام الواحد افتكر الايام الجميلة لما كانت الواحدة رايقة كده وبالها مرتاح وقاعدة حاطة رجل على رجل عمالة تهز فيها وتسمع اغانى عبد الحليم وحبك نار وكده…ومتانزحه على الاخر وكل شىء مجاب….اما بعد الجواز يا باى لو الواحدة فضيت خمس دقايق يبقى كويس وكبيرها تسمع اغنية بحبك يا حمار….وشيل ده من ده!

الواحده زمان كانت تطلب اى حاجة من باباها ومامتها يشتريهالها هواء تكون عندها ولا بس تقول عايزة فستان ولا بلوزة بابا يقول .......حاضر يا ستو انا وانا عندى كام حبيبة بابا من عينى.

اما بعد الجواز تطلبى حاجة يا سيدى ممكن تشوفى وتسمعى اللى عمرك ما سمعتيه......."يكلضم ويكشر ويفتح بقه على الاخر"نعم يا هانم فى ايه…..هو كل يوم هات هات ايه اجيبلك منين هو انا وارث الابعديه وبعدين يعنى هو انتى هتخرجى تروحى فين اعدى فى البيت اوفر وانا مش لسه مشتريلك السنة اللى فاتت لحقوا يدوبوا".

ولا لما الواحدة كانت تتكلم مع صاحبتها فى التليفون............... ماما كانت تيجى تقول سلملى عليه كتير اوى يا حبيبتى.

لكن الباشا بعد الجواز...... لو مسكتى التليفون يفضل رايح جاى رايح جاى عليكى وينفخ ويزعق ..."احنا مش هنخلص فى سنتنا ولا ايه الفاتورة يا ست هانم الشهر اللى فات جت اد كده ولا انتى مواركيش الا الخراب !!اقفلى ولو فى حاجة خليها هى تتصل بيكى ولا عايزانى اطلع من هدومى!!

الاكل بقى مقولكوش طبعا...... الواحدة منا كانت معززة مكرمة تقعد هانم والاكل يجى لحد عندها وما تدخلش المطبخ ابدا ولو معجبكيش الاكل حالا بابا ينزل يجيب اللى انا بحبه ويفضل يتحايل وحياة بابا لا انتى واكله انتى طول النهار ما كلتيش وشك بقى اصفر علشان خاطرى حته بس.

لكن سبع البرومبه......معاه هتدخلى المطبخ غاظ بنعنك داخلة داخلة ...ولو الاكل مخلصش يخلى عيشتك زفت...."الطفح فين ولا مش ناوية تطفحينا النهاردة …طبعا نايمة طول النهار وناسيه البيه اللى متجوزك….ولو غضبتى على الاكل ومكلتيش يقول احسن وفرتى اللى ياكل على ضرسه ينفع نفسه".

عند ماما كانت الواحدة تزعل وتتامص زى ما هى عايزة...... وماما تيجى تصالح وتتحايل عليكى وتقولك كفاية مقدرش اشوف دموعك ابدا.

لكن جوز الهنا ........يشوفك زعلانة ولا كأنه هنا ويسيبك تموتى من العياط ويقولك ...." اهو قلبناها محزنة اهو مش كفاية نكد ولا ايه انتى هنفضل نعيط طول النهار والعياط يجبلنا الفقر اكتر ما احنا مفقورين".

يا سلام الواحد فى بيت اهله كان يخرج ويتزوق ويحط مكياج زى ما هو عايز وبابا وماما يقولوا "الله زى القمر بدر منور والله من غير ميكب كمان احلى واحلى ربنا يحرسك من العين".

الباشا يقولك....."ايه يا هانم الفرح اللى فى وشك ده اراجواز انا متجوز راقصة ولا ايه امشى امسحى اللى فى خلقتك ده اوام لحسن احلف ما انتى خارجة من البيت خالص".

ولا لو واحدعاكسك وانتى فى الشارع وقلتى لمامتك.........."طبعا مهو عندهم حق شايفين قمر غزال ليهم حق يعاكسوكى ربنا يحميكى ويحرصك"

البيه جوزك لو عرف ان حد عاكسك......."طبعا ما هى الهانم ماشية تتاصع فى الشارع وتدلع ولابسة المحزق والملزق ما هو لو كان شاف واحدة محترمة ادامه مكنش عاكسك من اصله"

فى بيت بابا كان هو ولا ماما يطلبوا منك اى حاجة لازم يقووا.........."بعد اذنك لو سمحتى يا حبيبتى ممكن تعمليلى شاى"

جوزك بقى"اتفضلى ورينى طولك واعملى لى كذا اخلصى اوام يا هانم عايزة اخرج خلصينا"

الفسح والخروج يا سلام بابا وماما كانوا يدلعوا وفسح كل اسبوع واللى الواحدة تختاروا ويسالوكى ..............تحبى نروح فين النهاردة "

جوزى الهنا......."نتفسح نعم هو انا فاضى لساعدتك؟ مفيش خروج عايزة تخرجى روحى عند مامتك …قال فسح قال هو فى فلوس لكده صحيح دماغك فاضية ورايقة"

لو تعبتى تحسى ان بابا وماما سهرانين طول الليل وهيموتوا علشانك وتروحى لمية دكتورويقولوا"........ان شاء الله كنت انا بدالك يا حبيبتى ربنا يشفيك وتقومى بالسلامة"

اما البيه جوزك.........."يسيبك ويروح ينام فى اوضة تانية وهاين عليه يقولك احنا هندلع دى انفلونزا هى حاجة ! وشوية شوية عايز يقولك يا ريت لو تروحى عند مامتك علشان مصاريف العلاج وميقدرش يخدمك!!

الشغل لما الواحدة كانت تفكر تشتغل ماما تقولها ............"ربنا يوفقك ويفتح لك الابواب المقفولة ايوا كده لازم تحققى ذاتك"

لكن جوزك.........."يقعد يحبط فيكى ويقولك انا مش عارف هيشغلوكى على ايه ولا انتى فاهمة حاجة فى اى حاجة…..انا عارف ايه لزمته ولا هو نزول وخروج وخلاص يعنى فى الاخر هتبقى ايه رئيسة الجمهورية!

التليفزيون ......كان الواحد يقعد فى البيت يتفرج على القناة اللى تعجبه وادامها طبق اللب والسودانى ولو صادفت وبابا عايز يتفرج على الماتش وانتى على الفيلم كان ينزل يتفرج على القهوة ويقولك......."خلاص يا ستى اتفرجى زى ما انتى عايزة"

جوزك بقى يا اما بيتفرج على الاخبار يا قناة الرياضه ولو حبيتى بس تفتحى بقك وتقولى........."عايزة احول على القناة بتاعة المسلسل تبقى حكاية ويقولك...."مش فاضى انتى اتعميتى؟ مش شايفانى بتفرج على الاخبار روحى نامى بلا تفاهة !

شـــفتم بقى اد ايه الجواز حـــــلو وممتــــــع ولذيذ واد ايه هو نظام اجتماعى هايــــل وناجح جــــــــدا جــــــــدا جــــــــــــدا!!

لا بجد عايزة اقولكم اذا كان فى عيب يبقى مش فى الجواز………..العيب فينا احنا فى اختيارنا

لكن لو كنا عايزين المركب تمشى من غير عواصف ونعيش فى سعادة وراحة بال ……لازم كل واحد فينا يمسك المجداف ويجدف ادام التانى.

سلالالالالام بقى علشان اقوم ادى احسان بالمجداف ….اقصد اادف قصاده!

أمضــــــــــاء شفقـــــــــــــــه

الاثنين، 19 مايو 2008

حتى لا "يطفش" نصك الحــــــــــلو


اعزائى القراء وعزيزاتى القارئات وخاصة عزيزاتى القارئات......انا هتكلم معاكم فى موضوع مهم للغاية وهو ازاى ممكن الواحدة منا تخلى بعلها يحب البيت ويحلف ما هو خارج منه ابدا حتى للشغل..ويفضل قاعد لازق ومتنح واذا كنتى من محبى ان جوزك يلزق مافيش مشكلة بس نصيحة تعملى بيها فى الشتاء بس بلاش الصيف علشان الحر والعرق يعنى من الاخر دى حبة نصايح للى تحب جوزها يعمل بيات شتوى.


لازم تسمى وتاخدى عهد على نفسك انه طول ما هو مرزوع فى البيت


***عليكى باتباع الاتــــــــــــى***


اولا...ما فيش غسيل ولا نضافة خاالص انسى الغسالة خالص وحجة انه مابينمش الا على صوتها دى بلاش...يعنى الغسيل مش مهم ولو كنتى مزنوقة اوى ممكن تبعتى الهدوم عند الدراى كلين وهما يتصرفوا المهم انك تاخديه هو فومين جوزك طبعا ومتنسيش تحطى عليه مسحوق علشان يفتح نفسك للقعاد معاه اذا كنتى من النوعية اللى بتقرف... اما مرحل الشطف فبلاش تستخدميها دلوقت لانك كده كده هتحتاجيلها فى الايام اللى هتكونى عايزة تطفشيه فيها.


ثانيا... متعمليش اى حاجة فى البيت ولا تدربيكى الدنيا فوق دماغه وتقعدى تدى بالمنفضه على نفوخه ولا تمسحى ولا حاجة خالص يعنى لازم توفريله الجو الهادى النضيف ويعنى محبكش تنضفى وهو قاعد وشيل رجلك من هنا واوع الكرسى ده لا بلاش. استنى لما يبقى يغور من البيت وشقلبى الدنيا على بعضها ولو اتزنقتى اوى اطلبى منه يجيب شغالة تساعدك فى البيت وتريحك واكيد اكيد ساعتها هو هيخرج من البيت ومش هتشوفى وشه تانى وابقى قابلينى.


ثالثا...دايما قلبك يكون عليه وعلى فلوسه يعنى متستنيش يدخل البيت وتقعدى تقولى التليفزيون باظ والدش بيهرتل والكمبيوتر خرف واهم حاجة تبطلى كلمة هات لحسن دى الكلمة الوحيده اللى الراجالة بتحتقرها وتكرهه كره العمى ممكن تستبدليها بكلمة"خد" يعنى مثلا ....خد الفاتورة دى ادفعها خد ده صلحه بس بشويش وحنية وهو قاعدة قعدة صفاء علشان ما يعدش هو يشتم ويلعن اليوم اللى فتح فيه البيت ده وشاف وشك وما ينوبكيش فى الاخر الا انه هو اللى يديكى اللى فيه القسمة والنصيب "من ضرب وتلكيم" وتبقى انتى اللى خدتيه مش هو !


رابعا... عليكى بتسكيت العيال ومتخليهومش يطلعوا نفس فى البيت طول ما الراجل موجود وياريت لو تديهم منوم طول اليوم علشان ترتاحى منهم خالص وتبطلى كل شوية بس يا بت... اخرس يا واد وشباشب تطير وكلام من ده....ولو اتزنقتى وحسيتى انك على الاخر منهم وصوتك هيطلع ابقى اديهم بالى فى رجلك بس براحة علشان هو ما يسمعش العياط والقرف ده وان منفعش معاهم حاجة لا منوم ولا شبشب انصحك ما تخلفيش خااااااالص او تاخدى انتى المنوم وتريحى نفسك وتسيبهومله هو يربيهم!


خامسا...النقطة المهمة انك لازم تحسسيه بانك بتشاركيه ومتفاهمة معاه يعنى لما يجى يتكلم معاكى فى حاجة وانتى كالعادة مش فاهمها حاولى تهزى له راسك وتضحكى ضحكة خفيفة قال يعنى البت خريجة الجامعة الامريكيه وبتفهم اوى وان كنتى من صاحبات الدماغ الغبية اسكتى خالص واسمعى وبس واديله احساس باهتمامك وبعدين ابقى برطمى على راحتك وابقى اسالى فى اللى متعرفهوش.


سادسا ...النقطة اللى فى الستات كلهم وهى الغيرة....بصى بقى لازم تحاولى متفهمهوش غلط خالص يعنى لو لقيته مركز اوى ومبحلق وعينيه هتخرج ادام التليفزيون ومشغل فيديو كليب ...عادى اعتبريه بيتفرج على برنامج ثقافى وحاولى تشوفى ايه اللى لافت نظره فى الميعة المايصة اللى بتتاصع ادامه يا ترى ايه اللى عاجبه فستانها... مكياجها وقولى الله الفستان ده حلو لا جسمها خطير ايه رايك انا عايزة اشترى فستان زى ده واطلبى يجبلك زيهم واوعدك انه مش هيتفرج تانى ده ان ما باعش التليفزيون والدش اصلا!


الكمبيوتر لو لقيته بيقعد على النت كتير عادى متظلمهوش اكيد الراجل بيعمل شات مع واحدة او بيدخل المواقع اياها بس ابدا اوعى تتنرفذى ولا تضايقى ولا تديله بحلة المحشى بس حاولى تاخدى كورسات كمبيوتر وانتى تعرفى بيعمل ايه ده ان شاء الله لو متعلمتيش انتى تعملى زيه وسيبتيه وسيبتى البيت يضرب يقلب وقعدتى تشيتى زيه.


سابعا...حاولى دايما تكونى واثقة فى نفسك وبطلى كل شوية تبصى فى المرايه مش مهم وحشة وحشه ما هو اتنيل واتجوزك المهم انك تبطلى نعكشه و الجاز اللى بتحطيه فى شعرك ...وحاولى تاخدى شاور كده علشان الراجل ما يفطصش منك وياريت ياريت ان امكن لو تستخدمى اسبراى كده ريحته حلوة حتى لو غالى مش مهم ما هو كله على قفاه المهم ريحتك انتى.


بالاضافة لحبة احمر واخضر مش لازم الراجل يتخض كل يوم ويصتبح بالخلقة دى انا عارفة الستات لما بتصحى من النوم شكلها بيبقى عامل ازاى! ويا سلام بقى لو كانت من هواه لف شعرها طاقية وربط الايشارب على جنب تبقى فى الجون اول ما هيشوفك كده اكيد اكيد هيعمل زى فيلم"خرج ولم يعد".


ثامنا...الرقة يا ستات ما اوصكيوش بحبتين الدلع والمياصه والصوت اللى على طرطيف صوابعك وبلاش تبقى بيئه وتخرجى الفاظ زفت ودبش ياريت تستعملى كلمات مدلعة كده وبلاش حاضر يا خويا ...وابعد عن وشى الساعة دى.. لحسن ساعتها ما تعرفيش الوقت طول عمرك..وبلاش كل شوية تقول له قولى كلام حلو يعنى يا ختى هيقولك شيكولاته!! ساعتها هيفتح نفوخ سعادتك المبجل...... كمان خلى بالك ان حصل وحسيتى ان صوتك بدا يعلى وما قدرتيش تمسكى نفسك ابقى احبسى نفسك فى اوضه وصوتى وعضى فى الارض براحتك زى اللى عندهم هيستريا مش مهم انتى تتجننى المهم صوتك ايش ايش ميسمعوش.


يارب يارب اكون قدرت اديكم فعلا نصايح وياريت تعملوا بيها وتقولولى على النتيجة...... اللهم بلغت واللى تيجى تشتكى بعد كده وتقول نام عند امه! نام فى البلكونة هى حرة!

ولا اقولكم خلاص متزعلوش اكيد العيب مش فيها......... العيب فى البلكونة!!


امضاء شفقة هانم

الخميس، 15 مايو 2008

احســـــــــــــــــــــــــــــان بك ..... جــــــــــــــــــــــــوزي


احلى حاجة فى البلوج ده ان احسان ساب لى مساحة اتكلم فيهاعنه شوية وقال يعنى فاكر انى هامدح فيه وبيغرينى بالكلمتين اللى قالهم عنى وانا نايمة .......لا بس على مين دا انا ما صدقت هاخرج الكبت

اللى جـــــــــوايا منه








"اعــــــــــــــــــــرفكم الاول بيه"








المدعو" احسان بك" من مواليد ---- مش فاكره بس هو بقاله كتير عايش
وهو اكبر اخواته البكرى يعنى علشان مفيش حد يبقى احسن من حد
ومش هقدر اقولكم هو بيشتغل ايه لانه جرب فى حاجات كتير
والحمد لله الحمد لله مبيفلحش فى حاجة بسبب تفكيره العميق فى كل المواضيع
ومن كتر العمق بيغرق








بيحب شغله جدا ونشيط وبيشتغل طول النهار لدرجة انه معندوش وقت يقعد معايا من كتر قعاده على النت
المهم هو دمه خفيف موووووووووت
طيب مسالم الى حد ما تقدروا تقولوا نسمة فى البيت







لا بيزعق ولا بيتخانق ولا تسمع غير حسه فى البيت
متعاون جداااااااااااااااااااااااا "وخلوا بالكم من متعاون دى اوى"







يا سلام بقى لما الواحد يبقى مريض مقولكمش....ازاى بيخاف عليه وبيساعدنى ياااه فكرتونى مبيخلنيش اعمل اى حاجة فى البيت
"اه امال"
لدرجة انى على اد ما اقدر بحاول ما أعياش







بيحب اهله جداااااااااااااااااااااااااا لدرجة مستفزة بس بصبر نفسى بجملة"اللى مالوش خير فى اهله مالوش خير فى حد








زوج مثالى بمعنى الكلمة لا بيبص يمين ولا شمال والله لو مين عدت قدامه"طبعا مبيعتقهاش







بيحبنى مووووت بس فى نفس الوقت بيحب اى حاجة فيها كلمة انثى ..مش بقولكم زوج مثالى
ملتزم وبيعرف دينه وماشى على الشرع بس فى حاجة واحدة...انه نفسه يتجوز اربعة








لا بجد حرام مش عايزة اظلمه








هو بجد طيب جدا وحنين بس بردوا عصبى وبيغضب بسرعة
ذكى جدا جدا لدرجة تخنق وبيحب يفكر كتير ودايما تفكيره بيكون سليم وحكيم
مثقف وبيحب قناة الجزيرة ضرتى فى البيت
دمه شربات والناس كلها بتحبه نظرا لانه مش مغرور ولا متكبر ودى الصفة اللى اتجوزته علشانها
متسامح جدا الى ابعد حد لدرجة بتغيظنى وتستفزنى
بيحبنى بس بيحب التغير و بيمل بسرعة لذلك بحاول اكون متجددة علشان ميفلتش منى
متفاءل وبيحاول دايما يشجعنى ويدفعنى للامام دايما صاحب الخطوة الاولى فى حياتى
مش خنيق وبيدينى حريتى وما بيفرضش على حاجة
انا اتكلمت عنه كتير اوى وكفاية عليه كده







واكيد فى مرات جايه كتير هاقدر اذم فيه براحتى













امضاء...شفقة هانم









شـــفقــــــــــــة هـــــــــــــــــانم ..... مــــــــــــــــراتي


مع اننا كنا متفقين ان كل واحد مننا هيعرفكم بنفسه على حده
بس لأ ... أنا شايف اني أعرفكم بيها ... وهي تبقى تعرفكم بيا
بيتهيألي ان كده أحسن ... لأن ماحدش بيعرف يتكلم عن نفسه كويس
عموما ألحق الفرصة وهي نايمة دلوقتي وأعرفكم بيها علشان أكتب براحتي


المدعوة "شفقة" من مواليد القاهرة سنة 1977
كبرت وترعرعت في كنف والديها على مدى ربع قرن
بعدما أتمت ال25 سنة تحولت لكنفي أنا
ومش عارف ليه كلمة "كنفي" دي مقبضة ... وبتفكرني بكلمة "كفني"
باين على شفقة انها هتعمر لحد ما تلفني بايديها فيه
ربنا يستر
لها من الأخوات ثلاث بنات
اتنين منهم لسة ما اتجوزوش ... وبندورلهم على عريس
وواحدة متجوزة ... وبرضو بندورلها على عريس
عادي جدا
نسيت أقولكم ان شفقة تبقى أكبر أخواتها
يعني هي البكرية
وطبعا انتم فاهمين البكري بيفضل طول عمره يعامل معاملة الأطفال
عموما مش هاطول في النقطة دي علشان على راسي بطحة أنا كمان

ندخل بقى في الصفات الشخصية

ياااااااااااااااااااااااااه

أخيرا جاتلي الفرصة اني أعبر وأقول رأيي فيكي بصراحة يا شفقة

ده أنا هاقووووووول قوااااااااالة

بصوا بقى ... شفقة دي زي العسل و السكر ... وكمان شهد مكرر

مشوها كده دلوقتي وبعدين هابقى أقولكم رأيي بصراحة

لأ بجد بجد بجد

أنا باعتبر نفسي محظوظ في الجواز منها
أكتر حاجة بتضايق أي راجل ان مراته تخنقه ... وتكبت حريته
أنا ولله الحمد مش حاسس بالأعراض الطبيعية للجواز وكاني ما اتجوزتش
وأعتقد ان ده ذكاء منها
هي عارفاني ما باحبش القيود وعنيد جدا
ولو واجهت التيار أكيد هيغلبها ويغرقها
فاختارت انها تعوم مع التيار
دي أكتر حاجة عاجباني فيها
لأن الصفة دي نادرا جدا ما نلاقيها في الست العربية عموما
ده بالاضافة لاهتمامها بنفسها كأي أنثى قبل الجواز
واللي طبعا عادة بعد الجواز ما بتبقاش انثى من اصله

بجد الكلام كتير وخايف استرسل أكتر من كده
كفايه عليكم كده النهارده
وأظن انكم مع الوقت هتعرفونا أكتر وأكتر


وتقبلوا تحياتي
سي إحســــــان

اســـــــــــــــامينا اسامــــــــــــى شحاتين.....مش كده؟؟



magnify

بس والله احنا مش عاملين الصفحة دي من باب الشحاتة
ولا هو نوع من أنواع
التسول اللا ارادي
لأ حقيقي احنا لغاية دلوقتي لسة لاقيين ناكل
و أظن اللي يفتح بيت ويلاقي ياكل وسط الغلاء اللي احنا عايشينه ده
ده يعد من الأثرياء ... وطبعا احنا منهم
بس انا هاحكيلكم أسامينا دي جبناها منين


مراتي اشتكت من طول قعادي على النت
وطبعا الرجالة أكيد كلامي هيكون مش جديد عليهم
لأن كلنا بنسمع كلام يسم البدن ... زي
الكمبيوتر ده بقى ضرتي
انت في البيت ومش في البيت
خلي البنات اللي ع النت ينفعوك
وكلام من ده كتير
مع انها هي كمان بتحب الكتابة والبلوجات
وبتقعد على النت ساعات طويلة هي كمان
بس بجد لقيت ان كلامها صح
وان الكمبيوتر بقى أكبر خطر بيهدد الروابط الأسرية
علشان كده لقيت ان الحل اننا نبني بروفيل مشترك
ساعتها هنقعد سوا على النت ... نكتب سوا ... ونرد على التعليقات سوا
وممكن كمان يكون لينا أصدقاء مشتركين
ما كدبتش خبر وبدأت على طول أبني الصفحة دي
بمجرد ما فتحت ايميل جديد ... وأنا لسة بافكر في اختيار الأسم
اذ بي أفوجأ بمراتي داخلة عليا بجرعة رومانسية مش في وقتها
ولقيتها بتسألني
بتحبني ؟؟؟
طبعا سؤال ساذج وقديم وفقد معناه
وعلشان ماتسألنيش تاني السؤال ده طول عمرها
رديت عليها بسرعة وبمنتهى الهدوء ... طبعا لأ
ردت بمنتهى الدهشة بس لسة مبتسمة لأنها متأكده اني باهزر
يعني ايه ... مش بتحبني ؟؟؟
هزيت راسي ومارديتش قلت كده بقى هتفهم اني مش عايز اتكلم دلوقتي فتسكت
بس برضه مافيش فايده
سألتني ... أمال انت اتجوزتني ليه ؟؟؟
شوفوا مدى سذاجة السؤال خصوصا انه بعد 5 سنين جواز
كان لازم أرد عليها بغلاسة علشان تفصل بقى
قولتلها اتجوزتك جبر خواطر
وكان ردها
جبر خواطر !!! وعشت معايا خمس سنين ليه ؟؟؟
شفقة واحسان ؟؟؟


أنا خدت الكلمتين دول وفكرت فيهم للحظة ... وضحكت ع الآخر
عجبني اني كل ما أحاول أستفزها ماتستفزش ... وردت عليا رد كوميدي
وكمان عجبني الاسم جدا
أولا لانه جديد وملفت ... أو هكذا أظن
وثانيا لأن الاسمين فيهم كتير من شخصياتنا الحقيقية
بس يمكن يكونوا الصفتين معكوسين
فانا من طبعي الشفقة ... الناس بتصعب عليا ... حتى لو كانوا أذوني
باسامح بسرعة جدا ... وبيصعب عليا كتير وده اللي بيخسرني كتير في شغلي
أكتر واحد بيطبق مثل : اللي يصعب عليك يفقرك
أما حرمنا المصون فهي بجد مدمنة احسان
طبعا مش من حقي اني أتكلم عن اللي بتعمله علشان ما أفسدش أجره
بس اللي أقدر أقوله اني اتعودت أكون ماشي جنبها في الشارع وفجأة ما ألاقيهاش جنبي
أحس للحظة انها اتخطفت ... أو وقعت في بلاعة

أبص ورايا ألاقيها لمحت شحات أو شحاته وواقفة تديله اللي ربنا يقدرها عليه
وما اخبيش عليكم على قد ما بيفرحني تصرفها ده جدا ... على قد ما باكون متغاظ جدا
لأنها سابتني باكلم نفسي ورجعت لورا من غير أي سابق انذار
ثانيا لأني عادة باتخض عليها لما ما ألاقيهاش جنبي للحظة لايكون حصلها مكروه
والخوف كل الخوف تيجي في مرة تتخطف ولا تقع في بلاعة وأنا آخد الموضوع
عادي وأقول أكيد شافت شحات بعيد شوية ... أو راحت تتبرع في جمعية خيرية أو دار أيتام


سي إحســـــان