الأربعاء، 25 يونيو، 2008

بــــــــادى استومك....وبنطلــــــــــــــون ساقط....وشبشب زنوبه


النهاردة يا جماعة هيتم اذاعة الموضوع من الحمام .............نظرا لاهميه الحمام...... وخاصة فى الحر والصيف

كمان الموضوع مهم و مطرقع على الاخر...... وهيلبكوا لبه ..........مالهاش حل صوتها هيوصل لاخر مدونه

ده نظرا لاننا .......هنستخدم الشبشب النهارده كتير....لا ما تفهمونيش غلط .......اقصد هنستخدمه فى كلامنا

********

الواحد مش عارف ايه اللى بيحصل اليومين دول وايه اللى جرى ........للولاد والبنات؟؟

بلا نيله على الولاد............وستين واكسه على البنات

********

بجد يا حلاوة يا ولاد على............. الطعامة واللذاذة....... وقله الادب اللى الواحد بيشوفها كل يوم

قال ايه البنات ....الاقى كل واحدة منهم عايزة قطم رقبتها

ماشيه تتاصع فى الشارع وهز يا وز ....والله الوز استعر منهم ......ما اتعدلى رجلك الملووحة منك ليها

ايه يا بنتى المشية دى...ترد تقولك دى مشية "الكات ووك".... يخرب عقلك انت و الكات

وحياتك انتى..... دى مشية " الكيت كات "مش.... الكات " وبعدين انتى هتنونوى فيها ؟؟

********

شويتن الاقى التانيه ماشيه وهاتك يا ندغ باللبانه....... وطرقعة وتعملك بالونه

وصوتها جايب اخر الشارع يا شيخة ........لمى بقك المفتوح على البحرى ده زى السيد قشطة

شويه كمان الاقى الست هانم .......واقفة مع شاب فرفور وحاطه ايدها حوالين رقبته

سيدى يا سيدى

وهاتك يا مياصة ودلع فى الكلام....... شويه باباه وماماه وهى بنت البواب بتاع العمارة

وقال ايه البت عامله نفسها بنت ناس اوى ورقيقه

طيب انكشها كده وشوف ايه اللى هيحصلك ...... اما سمعت صوت....... ولا نهيق الحمار ما بقاش انا

*********

المصيبه بقى ان كل ده ....... بقى عادى ......لكن الكارثه انك تلاقى البنت من دول واقفة فى البلكونة تشاور لده

وتنادى على ده ......وتلاقيها هى اللى بتعاكس كمان يخرب عقلك انتى وهى

بس العيب مش عليكى ............العيب على البيه اللى قاعد جوه

*********

شويه والموضوع تطور تطور الى ان ارتفعت حرارته..... خالص مالص

وبقت البنات ماشيه لابسة المحزق..... والملزق

يعنى يا اختى مش خايفة النمل يتلم على الملزق ده...... ولا انتى بتحبى القرص؟؟

*********

"والله الواحد مش عارف يقول ايه"


المهم .... قلنا معلش نظرا للظروف النفسيه .....اللى هما فيها والعنوسه.... والبوران ......والشحتفه على الجواز والكلام ده


خلاهم يتلخبطوا ويتجننوا .........لان ما فيش حد اتعمى فى نظره وبصلهم


فبقوا هما اللى بيعاكسوا ...... قالوا لما نشوف يمكن ييجى منه


كمان دى وقلنا يللا ........معلش ازمة نفسيه وهتعدى


*********

حبه كمان ومع التطور البنات بقت........... بتسهر طول الليل


وتخرج وترجع وش الفجر................... ما شاء الله قلنا معلش

لا بجد متربيـيــــــــــــــــن


*********

وولاد ناس ولو مخرجوش.......... يسهروا طول الليل ......يكلموا الولاد على الشات


لا بقى دول عداهم العيب وقزح


*********


المشكلة بقى الهدوم يا عينى......... كل واحده مش طايقه هدومها وتلاقى لبسهم طول السنه صيفى


ارجع واقول ........معذورين حرام اصل الجو حر مــــــــــــوت


********

تلاقيهم خارجين لابسين...... بديهات ستومك....... وبنطلونات هتتفرتك من عليهم


وطبعا عارفين يعنى ايه ستومك...... يعنى تقريبا مفيش حاجة خالص


البدى عمال يطلع والبنطلونات عماله تنزل


يا دوب البدى مغطى 2 سم


يعنى يا كميله انتى وهى مش حاسه بشوية برد تحت ؟؟


طيب مش خايفة على نفسك من الذئاب البشريه ولا انتى خلاص بايعة القضية؟؟


قال ونرجع نعيط بعد كده ونقول........ الشباب بيضايقونى


جتك قطع رقبتك انتى وهى......... والحته اللى باينه من البدى دى


*********

الاجمل كمان على راى واحدة صاحبتى..... موضوع الحلق اللى فى المناخير


يعنى مش مكفيكى اللى فى ودنك؟؟ ....طيب يارب ياخد مناخيرك ويقع


ولا الخلخال بتاع تمر حنه .....اوه على الشياكه


تلاقيها حاطه فى رجليها


ولا اجدع غازيه


طيب ما تروحى تشتغلى فى الموالد يا حبيبتى انتى وهى


*********


لا والجميل بقى والارقى والاحدث....... الشبشب الزنوبه

بتاع يا خارجة من باب الحمام......بقى موضه


اه والله تلاقى الواحدة من دول رجليها مقشفة......... وصوابعها طول كده


وماشيه بالشبشب ورجليها عريانه طيب ........غطى العار اللى انتى مبيناه ده


فرحانه بصوابعك...... قال يعنى صوابع زينب"!


مع احترامنا الشديد ..... للاستاذة زينب طبعا


*********

يا بنتى الموضه دى فى البيت........ ذنب الناس يتعموا بالمناظر والروايح دى ليه؟


على العموم انا بطالب بوقف بيع الشباشب الزنوبه


نظرا لسوء الاستخدام


وبفضل المشى حافيه القدمين " اقتباسا من فيلم...حافيه على الجسر"


*********


انتى فاكره ان بكده حد هيبصلك ؟؟ ممكن يحترمك ويقدرك ؟

ممكن

بس اعتقد انه ..............هيقدر صوابعك مش ........انتى خالص


*********

طيب نروح للقسم التانى الشباب....... كوتو كوتو كوتو موتو


اسم النبى حارسهم وصاينهم


رجاله المستقبل الاغبر


حاملين رايات الدمار الشامل


*********

قالوا واحنا منقلدش البنات ليه؟؟............ يعنى هما احسن مننا ؟؟


اه المهم..... اتلم توتو على موتو وعملوا اجتماع على مستوى الرجلين


و قالوا لازم نغيظ البنات


ونشوف مين فينا .........اللى هيطلع حته اكتر من التانى


********

وتحــــــــــــــــــــــــــــــــــدى


********

كمان قالوا احنا لازم نطالب فى حقنا ...... بالمساواه فى الشبشب ابو زنوبه


ولا علشان زنوبه مونث....... يبقى تروح علينا احنا .......لا


*********


هنقلع الجزم بتاعة زمان دى بتاعة ايام "نهارك سعيد"


ونلبس الشبشب ........الموضه بتاع "هالو ايفرى بدى"


وقعدوا يفكروا فى اختراع جديد... كمان للحزام


لحد ما خلوه بفيونكة كده......... و بينور وعليه ....سلاحف النينجا ....ودباديب وأرانب


لا بجد هايلين......... هو ده الشباب الواعد والا فلا


*********

بسم الله ما شاء الله عليكم


كمان تلاقى الشاب من دول ........يا ختى كميله كوتو كوتو


ماشي يتاصع فى الشارع........ ولا اجدع رقاصه .......نفسى بس اعرف بيهز ايه؟؟


بس شكلهم عاملين مسابقة مع البنات


علشان مسابقة اختيار .......اجمل " تاصيعه"


********

الاجمل بقى لبس ...... السلسلة وفى دى بقى تلاقيهم بيقلدوا..... الكلاب


اه ......علشان لما الواحد يحب يجرجرهم........ يلاقى حته يمسكهم منها


و الاحلى الحظاظة...... بتاعة كده بيلفوها حولين ايديهم


اه مهما ولاد فقــــــــــريه


علشان كده قالوا نخترع حاجة تفك النحس .........ولا يبقى من كله؟؟


********

وكمان تلاقيه مربى شعره ومستحماش بقاله شهور...... ويقولك عامله سبايكى


" موضة...... اه ......موضة بيقلدوا السباكين


مهى اسبايكى .......يعنى سباك بس نيو لوك"

*******

وفى منهم عاصر على شعره ليمون ويقولك ده جيل


يا ابني الجيلى ده بيتاكل مش....... بيتحط فى الشعر


وتلاقى شعره كل شعرايه فى حته .......وكانها بتجيب القنوات يعنى زى الاريل!


*********

وتبص تلاقيه لابس بلوزة مش قميص


بلوزة شيفون ومخرمة من كل حته........ وفاتح الزراير لحد بطنه.


بيهوى من الكاتمة ....اللى هو فيها


والالوان مقولكوش على الالوان حاجة ايه شفتشى .... فوحلؤى على بمبه مسخسخ .......اخييييييه


طيب دارى...... قال يعنى الواد بيغرى البنات


يا ابنى دى الوان........ تعمى مش تغرى!


*********

ويا سلام بقى على النص التحتانى ..........بنطلونات ساقطه انما ايه ...جنان


الواحد كده لو خبط بس فى حد منهم يقع البنطلون منه عدل


طيب ليه يا حبيبى....... هو انت بتتلكك ؟؟


طيب ما بلاش خالص .........تاعب نفسك ليه ...امشى ملط واعتبر نفسك فى مالطا !


الظاهر كده ان انا اللي بادن في مالطا

*********

كمان تلاقى الواحد منهم مفنجل عينه اد كده ........وفاتح بقه على الاخر


وقاعد زى الاهبل بيتفرج على التليفزيون


ولو باباه ماسك شويتن


تلاقيه طول النهار على القهوة اللى فيها وصله دش وجايبه القنوات اياها


وقاعد متنح لا بيصد ولا بيرد


********

ويا خرابى لو شاف فيديو كليب لواحده من المطربات اياهم....... تبقى حكايه


وتلاقيه قاعد يحلم وعمال يفكر....... يا ترى اللى هيتجوزها هتبقى شبهم....... ولا ايه


وفى الاخر تطلع...... ولا ايه ......ويتجوز ستوته


يا شيخ اتنيل انت وهو....... وانت بالشكل ده ينفع تتجوز الا ستوته...... ده ان ستوته رضيت اصلا


********

ده الواحد منكم بقى خرع......... ومايستحملش ضربه


ولا لو حب يعمل واد جامد ومثقف تلاقى........ شارى كل المجلات الاجنبى


وقاعد مبحلق فى الصور...... اصلا تلاقيه ما بيعرفش يقرأ


وتقوله بتعمل ايه يقولك وانت ايش عرفك انت ....... صحيح وانت ثقافتك عنجليزى؟؟


مش المهم القراءات .........المهم ما تحتويه صفحات المجلات .......من بيكينى ومايوهات


*********

ولو قعد شوية فى البيت لو مين نده عليه ولا كأنه هنا لا بيشترى حاجة ولا بيجيب حاجة .....صم بكم عمى


ولا هو هنا اصلا...... تلاقيه قاعد ادام النت وبيعمل..... ابحاث خطيره


علشان هيبقى باحث ودكتور اد الدنيا .....امـــــال


بس الرسالة بتاعته هتكون فى


توقيع البنات وكيفيه الزوغان منهم عند اللزوم واثر ذلك .......على الابهات والامهات والمجتمع

" دراسة مقارنه"


*********

والنتيجة بعد كل ده يا شباب ويا بنات...................... صياعة وكلام فارغ وفقدنه وادمان ومخدرات


للاسف ما بقاش عندنا غير التقليد ولبس المايوهات


يعنى للاسف ما بتعرفوش تاخدوا من الغرب غير التفاهات


انتم كده للاسف .......تسيبوا الايجابيات وتاخدوا السلبيات


وســـــــــــــــــــــــــــــــــلام بقى علشان عايزة اعمل نيولوك ...... وهاشترى شبشب زنوبه



شــــــــــــــــفقه

الأربعاء، 18 يونيو، 2008

ازاى تــــــــــــــدلع مــــــــــــــــــــــــراتك



طبعا نظرا للاقبال الشديد على نصايحى الجهنميه اللى تودى فى داهيه حبيت اكون محايده وابقى النهارده مع الفريق التانى "الرجاله"....كمان انا هاكتب البوست ده غيظ فى احسان اللى قالى كفايه عليكى نصايح بقى قرفتى الناس.......ويا انا يا انت يا سى احسان....!


***بصوا بقى اهم حاجة يا معشر الرجال ان نيتكم تكون صافيه وقنوعه***


يعنى لو انت متجوزة واحده وحشة او قد الفيل .... تكون راضى ومقتنع باللى قسمهولك ربنا تعالى على نفسك ياسيدى واتخيلها فى براءة وحلاوة نانسى ولو للحظة تخيل انها فى دلع هيفاء شويه وغمض عنيك وتخيل انك واقف ادام رشاقه اليسا ......ايون معلش تعالى على نفسك يعنى هى هيفاء ولا نانسى ولا اليسا اجمل منها فى ايه؟؟ ....انت بس امسح لهم الميكب اللى حطينه وشيلهم الباروكة وانت هتشوف اللى عمرك ما شفته انا عارفه ان كتير منكم هيقول بس هى فين دى اللى شبهم حتى ولو كانت ايه ...ومعاك بردوا انهم زى لهطة القشطة .....بس معلش انساهم دلوقتى وابقى فكر فيهم بعدين وهى مش جنبك

***لانها وهى جنبك اكيد اكيد هتقطع حبل افكارك وان شاء الله تشنقك بيه..!***


اول حاجة ...حاول تستعيذ بالله من الشيطان الرجيم مش من مراتك وابتسم لها كده يا اخى حتى وان فتحت بقك بالعافيه والكلمة مقدرتش تخرج منه...معلش بس قولها انتى اجمل حب فى حياتى ..... انا من ساعة ما دخلتى حياتى وانتى منوراها ...حتى وان كانت من ساعة ما دخلت حياتك النور قطع وضلمتها وبقت عتمه مفيش مشكلة خالص ......هو الكلام عليه جمرك..؟

***" اه لو كان عليه كان زمانك لقيتلك حجة يا عم بس ولو ...مش هتقدر تهرب"***

*******

كمان حاول تحسسها بانوثتها وجمالها وان حتى كانت شبهك... واقعد كل شوية اتغزل فيها وابقى دور وشك وانت بتكلمها ده لو نفسك ما طاوعتكش اصلا اما لو كانت نفسك حلوة ......فهنيلك يا فاعل الخير والثواب

حاجة مهمة ....لما ترجع من الشغل وتلاقيها واقفة فى المطبخ.... ما تقعدش تزعق وتقولها ريحتك بصل وتوم لا اكتم نفسك وخد نفس عميق وقولها.... الله ريحتك مسك وعنبر ولو طلبت منك فلوس علشان تروح للكوافير...... اديها اللى هى عاوزاه يعنى هى هتعمله لمين وكمان علشان انت تستريح من السلك اللى فوق دماغها ده ويبطل يشوكك اقربها


***انك هتعرف تنام بدل ما تقلق منامك كل شوية ...ولازم تعرف انك دافع دافع***

********

ودايما يكون فى رقه فى كلامك يعنى تخلى لسانك زى ما بيقوله ينقط عسل... مش مكرونه .....وتدلعها يا سوسو... يا توتو... يا ميمى ...يا حبيبتى... يا ام العيال... ايون معلش حتى وان كانت ...ام قويق او... ام اربعه واربعين

معلش ماتنساش ان وراء كل عظيم امرأه .....انا عارفه دلوقتى انتم بتقولوا ايه ....سامعكم....وراء كل عظيم امرأه نكديه ...تشل... تعل ...تغم...ترغى... تخينة... تافهة ...حاكم انتم بتحبوا حرف التاء اوى وبتنسوا الباقى!

********

الهدايا....ده بند مهم يا جماعه يعنى متدخلش عليها بحزمة فجل... ولا جرجير ... ولا بطيخة....معلش انسى الحاجات الخضراء دى خالص اللى بتخليك تعملها حجة وتقول ما انا بجيب ....يعنى حاول تركز فى الحاجات الصفراء خاتم دهب صغنن كده قيمه ربع جرام... دبدوب لونه حلو كده ب10 جنيه ...كده ايوا دلعها صدقنى هى مش هتبص لقيمه الحاجة وان الحاجة اللى بتجيبها دى قيمتها ايون....

لانك لو فكرت فى انك لازم تجيب لها حاجة من قيمتها يبقى مش هتجيب خااااااااااااااااااااااالص طول عمرك وطول ما هى على ذمتك...!

********

صدقنى لو عملت اللى بقولك عليه هتحبك وان كانت ورده بجنيه دى هتموت فيك ...مش بعيد تروح تخبط على الجيران تقلهم اصل الهدايا والحاجات دى انقرضت من زمان .....والله هتدعيلى هتحبك وهتموت فيك وهتلزقلك لذق بغرا وابقى ***قابلنى لو عرفت تهرب***

********

كمان لازم تكون نزيه وبتحب الفسح وتخرجها ....ايوا يعنى من وقت للتانى تفسحها فى مكان حلو كده وبلاش الجنينة اللى على اول شارعكم اللى من غير تذاكر دى.... او كل ما تطلب منك تخرجها تقولها روح عند مامتك اقعدى جنبها ***ومتصدق وكل يوم تقولها مش هتروحى تتفسحى***

لا .....خدها وروح الملاهى واهو بحق التذكرة ممكن تهد حيلها من اللعب وتدغدغها لحد ما يبان لها صاحب.... وهى ***بنفسحها تحرم تقول اخرج من عتبه باب البيت***

او دخلها بيت الرعب يا سلام بقى لو دخلته كده تضمن انها مش هتطلب منك تفسحها تانى ده ان مخلصتش منك اصلا اما اذا كانت من ذوى القلوب الجامده فاطمئن انت واضمن انها هى اللى هتخلص عليك!

********

الثقة ...لازم تخليها تثق فى نفسها وفيك صحيح صنف الرجاله كله لا يوثق فيه.... لكن معلش اضحك عليها يا اخى بمعنى.......مش اى واحدة تعدى من ادامك تبصلها معلش اعصر على نفسك ليمونه... وركز مع مراتك حتى وان كنت قرفان من شكلها .....ولو حصل وبصيت على واحده ومراتك شافتك.... خليك حدق وقلها انا بس بشوف فيها ايه احلى منك اصلها معجبة بنفسها اوى مش عارف على ايه وبعدين بقى بردوا انا هبصلواحده زى دى ودى تيجى ايه فى حلاوتك ورقتك ؟؟

حتى وان كانت عينيك هتطلع على البنت التانية.... وابقى فى سرك انعى حظك واحسد جوز اللى بصلتها وقول يا ابنى المحظوظة تيجى نبدل؟

بس فى سرك لحسن لو سمعتك ما اضمنلكش العواقب الوخيمة اللى هتحصلك وتتقلب الحداقة لحادق اوى ومملح!

********

التليفزيون ......وانت بتتفرج وهى معاك حاول متبقاش على قناة الاخبار والحاجات دى.... صدقنى ده فى مصلحتك هاتلها مسلسلات اغانى.... بس بلاش قناه ميلودى " لحسن لو اتفرجت عليها مش هطيقها ولا هطيق نفسك ولا اللى فى البيت وينتهى بك الحال بانك تجيلك حالة هيستريا وتصمم تدخل جوا الشاشة تعرف ايه اللى بيحصل جوه"

يعنى حاول تفرجها على قنوات الافلام والمسلسلات كلام فاضى من ده الهيها فى حاجة بدل ما تتفرج على اللى بيحصل حولينا .....من ضرب وقتل وخناقات بعدين تلقط من اللى بتشوفه وتتقلب من "وراء كل عظيم امرأه " الى وراء كل ***عظيم ساطور وسكاكين واكياس ***

********

الكمبيوتر والموبيل.....وانت قاعد لوحدك اعمل اللى انت عايزه ...شات وماسنجر وصور... براحتك على الاخر اما طول ما هى موجودة اتفرج بس من غير ما تحس.... واول ما تدخل عليك ما تتلخبطش وتتفزع

وقولها اصلى المدير طلب منى اخلص شغل واخد" اوفر تاي"..هى لما هتعرف ان فيها اوفر تايم هتروقلك الجو وتسيبك براحتك ده ان ما خرجتش وسابتلك البيت كذا يوم ....

بس ابقى ورينى بقى ورينى نفسك بقى يا حلو اخر الشهر والمرتب معلهوش ولا مليم زيادة ده ان ما كانش ناقص كمان من السلف والجمعيات وكسوة المدارس الخ

***اصل الكدب مالوش رجلين ........ليه ايدين وممدودة كمان***

********

الموبيل......اه ده بقى مشكله لوحده... بس يا ريت لما يرن وتكون المدام رد... ما بتردش ليه ؟؟

انت خايف ...اذا كان انت قاعد معاها ليل ونهار ووشك فى وشها يبقى بتخاف ترد

وهى بعيد عنك ولا انت ما بتصدق؟؟ خليك جرىء وحمش ....بدل ما تسمعلك كلمتين لما تروح انت فى غنى عنهم

ولما تروح اعمله "سايلنت" اخفى صوته خالص" علشان لو حد كده ولا كده.... يتخرس بدل ما تتخرس انت

وكمان بلاش الاسامى الناعمة دى كيكى... وميكى... خليها بكار... عبد الجبار... وحاول تشترى موبيل رخيص علشان ***لو شمت خبر ما تندمش عليه طول عمرك ده ان كان ليك طوله عمر اصلا***

********

المساعدة والتعاون......اه عايزاك دايما تساعدها فى البيت... متقولش مش فاضى ...ابقى اعمل يوم الاجازة وحاسسها انك راجل متعاون

وبلاش تشرب العصير وتحط الكوبايه فاضيه فى الحوض.....علشان النمل خليك دايما نضيف متتكبرش وتقول انا راجل ما احنا عارفين يعنى هو فى فصيله تانيه غير كده.....بعدين هو النمل لما يتلم على التلزيق اللى انت هببته هيقرصها ***لوحدها مهو هيقرصك انت كمان***

كمان لما تلاقيها تعبانه ساعدها ومتروحش تنام فى الاوضه التانية وتقولها بطلى دلع

اه وان شاء الله هى لما هتلاقيك عملت كده هتستحلى الموضوع وهتفضل عيانه علطول ومش هتقوم من مكانها ابدا!

********

بصوا بقى يا رجاله انا احسان جوزى والحمد لله مدلعنى على الاخر .....وبيعمل معايا كل النصايح اللى بقولهالكم دى اه امال.... مستتننى... ومدلعنى على الاخر... لا بصوت... ولا بشد فى شعرى.... ولا بيحط الكوبايه فاضيه فى الحوض غايه ما هنالك..... انى ما بسبش بيت ماما خاااااااااااااااالص ده طبعا بناءا على حبه ليا............ويارب اكون قدرت اديكم نصايح متودكوش فى داهيه وحاولوا تعملوا بيها ....مش العكس واللى مش هيعمل يستاهل اللى يجراله ده ان كنتم حابين النكد والقرف والكأبه..!


***ومش عايزة اشوف حد فى سرايا المجانين اوكيه......اه انا بزور احسان هناك كل اسبوع!***


**شفقة**

الأحد، 15 يونيو، 2008

اجــــــــــــــــــــــــــازة مرضـــــــــــــــــــــــــــــيه

أجــــــــــــــــــــــازة مرضيـــــــــــــــــــــــة
226 magnify

أصدقائنا ... صديقاتنا
عدنا بعد الفاصل
والفاصل ده المفروض انه كان زيارة عادية لأهلي وأهلها
بس زيارة الأهل دي كانت هتقلب زيارة من نوع تاني
زيارة ضريح
ضريح السيدة/شفقة و السيد/ احسان
وعاجباني كلمة "ضريح" دي أوي
محسساني اني راجل "ضريح" و "ضوغري"


هههههههه
كفاية كده مقدمات
واليكم الأنباء بالتفصيل

اليومين اللي كنا فيهم عند أهلها قضيتهم شفقة عيانة بالمعدة
تقريبا ماصدقت لقت أكل ببلاش فقالت تحوشه في بطنها
فطبعا قضينا اليومين دول
مشروبنا المفضل كان عصير الليمون والنعناع والينسون
والوجبة اليومية كوكتيل من الخضار المسلوق
يسبقه فوار الفواكه
ويتبعه خلطة أقراص وكبسولات كله على بعضه
يعني من الآخر يومين آخر جمال

بمجرد ما شدت حيلها شوية
أخدتها ورحنا عند أهلي
وأنا ناقم على اليومين اللي قضيناهم في مستشفى أهلها
قصدي ( بيت ) أهلها
وهيا يادوب ليلة اللي قضيناها في السليم
صبحت دماغي تقيلة وعظمي مكسر
وشوية وجسمي سخن والحرارة بقت فوق الـ40

بقت حالتي صعبة وتصعب ع الكافر
طبعا صعبت على شفقة هانم
ربنا يخليهالي يارب وما يحرمني من جدعنتها
راحت نازلة "بعد محايلة" وجابتلي 3 علب زبادي

آه والله
بقيت مش عارف أودي جمايلها عليا فين


المهم عدوا تلات ايام على خير
والأهم اني ما اكلتش من الزبادي غير علبة واحدة
وخفيت الحمد لله
وربنا ما يحوجنا لحد



اللذيذ في الموضوع يوم ماقلنا هنروح بيتنا
طبعا مسكوا فينا ياجماعة استنوا تمشوا بعد الغداء
قلنا وماله ؟ أهي مصلحة برضه
ومش هاقدر أوصفلكم في الحالات دي مراتي بتسيب الثلاجات عاملة ازاي
صحراء جرداء لا أكل فيها ولا ماء
طبعا ده بحجة انها ما تأكلنيش أكل بايت
فيكون الحل انها ما تأكلنيش خالص


هاااااااا
أم هئ
اتغدينا .. حلينا .. وقعدنا شوية
وقبل ما أسال "ننزل نروح" لقيت سؤال مفاجئ
ممكن انزل ساعة أشتري حاجة من عباس العقاد ؟
وأنا بكل كرم أخلاق قلتلها : وماله

طبعا ماهي كاسرة عيني بـ 3 علب زبادي


أم هئ


بعد ساعتين لقيتها بتكلمني على الموبايل

بنت خالك كلمتني وعرفت اني جنب بيتها
وقالتلي هازعل بجد لو ماعدتيش عليا شويه
وطبعا عملت خاطر لبنت خالي علشان ماتزعلش
وكمان خاطر لبنت حماتي علشان ماتتضايقش
وأتفلق أنا مش مهم
دول 3 علب زبادي ياجماعة
مش أي كلام

هيييييييه
تنهييييييييده
المفروض انها هتتأخر ربع ساعة
عايز أقولكم اني بعد زهقي من التحويل بين قنوات الدش
لميت جرايد البيت جديد وقديم وقعدت أقراها
ولما قريتها وخلصتها وقطعتها
قلت أكمل زهقي على الدي في دي
واتفرجت على فيلم "الشبح" بالكامل
والفيلم بصراحة رغم خفة دمه وروعته
الا ان مشاهد القتل كانت كتيرة قوي
وانا كنت في حالة مزاجية تسمح لأبو الأباليس انه يستغلني
خفت من الفكرة لتكبر في دماغي
قمت أخدت دش عشان انسى
خرجت لبست هدومي وانا ناوي أروح لوحدي
اذ بي افوجأ بتليفوني بيرن ... آه آه ... تيرلم تيرلم
واللي ردت آه يا عيني ... صوتها يغم
مع كل اعتذاري ليك يا تامر يا حسني
بس صدقني انت لو كنت مكاني كنت قلت أنيل من كده
ويمكن ماكنتش غنيت عاطفي من أصله

أم هئ
تقول ايه الهانم لما تعرف اني كنت ع الباب نازل أروح لوحدي
ايه ده بجد ؟؟ طيب كويس اني لحقتك قبل ما تنزل
عدي عليا بقى خدني معاك
شفتوا أسقع من كده رد ؟؟؟
اضطرتني أتعامل معاها على اني فريزر بيتكلم مع تلاجة
قلتلها ماشي ياروحي يا 16 قدم انتي
أنا قدامي 7 دقايق بالظبط والترموستات يفصل وأكون عندك
بس عايزك تستنيني تحت
علشان مايعزموش عليا أطلع والوقت اتأخر وأنا مش شايف قدامي
الجنينة اللي في مدخل العمارة فيها كرسي بامبو
اقعدي عليه على ما أجيلك
يادوب على ماتسلمي تلاقيني قدامك
طبعا فهمتوني
ايه
مش فاهمين ؟؟
أنا مارحتلهاش
أنا قلت أفرغ طاقة الغيظ اللي جوايا
علشان لو كنت روحت كده معاها
أولا كان مش هيجيلي نوم من الغل
ثانيا كنت ممكن أرتكب جناية وأقول "أحمد عز" هو اللي وزني
سامحني بردو يا أحمد يا عز

طبعا حسيت براحة مش ممكن هيفهمها غير اللي يجربها
كأنك كنت معتقل من سنين .. واتفك أسرك فجأة
هيييييييييييييه
فرحة عيالي شويتين
أخيرا أنا حر
على الأقل أسبوعين كده ولا حاجة
على ما تاخدلها كورس أمص ولوي بوز
بس فيه مشكلة
البيت فراغ من أي شي صالح للاستخدام الآدمي
قلت لنفسي بسرعة
وايه يعني
نرجع تاني لأيام العزوبية
حد طايل ؟؟

أعدي على السوبر ماركت أجيب أي حاجة
المهم أسد فراغ التلاجات اللي شغالة بتبرد في نفسها
لدرجة اني فكرت أفتح بيبانهم وأحط جواهم مروحة
يعني أحولهم تكييفات من الآخر

أم هئ
دخلت السوبر ماركت
بضعت من كل صنف ولون
لحوم .. فراخ .. أسماك .. خضار مجمد .. وجبات نصف تجهيز
مع البقالة والعصاير والحلو والوحش وكله
آه لسة ناقص حاجة
اللبن
رحت قسم الألبان
بامد ايدي أجيب اللبن الرايب
وقعت عيني على الزبادي
نفس العبوة
من نفس الحجم
لنفس الشركة
من نفس نوع الزبادي اللي كانت حبيبتي جابتلي منه وأنا عيان
شريط سينما مر بسرعة
الـ 3 ايام اللي كنت عيان فيهم
فلاش باك
و الـ 3 علب زبادي اللي جابتهملي
زووم إن
الزبادي اللي قدامي على الرف
كاميرا محمولة
إزازة اللبن الرايب اللي بقالي ساعة مادد ايدي أجيبها
وقعت من على الرف
عملت صوت
زووم أوت
الناس بصت ناحيتي
وأنا في نفس اللحظة فقت من سرحتي
حسيت ان كل الناس باصين عليا ومستغربين
بس مش بسبب الإزازة اللي وقعت
لأ
حاسيت انهم كلهم عارفين اني بقالي ساعة هنا في السوبر ماركت
عمال أعمل شوبنج
وسايب مراتي مستنياني على كرسي البواب
في جنينة مدخل العمارة
الناس باصينلي باحتقار كده ليه ؟؟
هو أنا بجد أستاهل كده ؟؟
بيتهيألي عندهم حق
أنا كده غلطت
اجري بسرعة
شوف أقرب كاشير
لأ ده زحمة
اللي هناك ده فاضي شوية
أرفع اللي اشتريته بسرعة من العجلة
أحطه قدام الكاشير
بسرعة لو سمحت علشان واقف صف تاني
أي كلام
الولد اللي بيحط مشترياتي في شنط شغال على مهله أوي
بدأت أساعده
حاسبت الكاشير
أخدت الشنط بسرعة
كانوا كتير
الولد شالهم
عنك يا باشا
وأنا في عقلي : باشا مين يابني ؟؟
انت لو تعرف أنا عامل ايه في مراتي دلوقتي ماكنتش شيلتلي الشنط
كنت لبستهالي في دماغي
بسرعة حطهم في شنطة العربية
آدي كل الفكة اللي معايا
نصها ليك ونصها للمنادي
دورت بسرعة ومشيت بسرعة لأ جريت بسرعة
كويس اني مارحتش بعيد
بيت بنت خالي قريب جدا من هنا
في دقيقتين كنت قدام العمارة
نزلت أوام أدور على مراتي حبيبتي
وأنا مش عارف هاقولها ايه اللي أخرني كده
مش مهم
بس هي فين ؟؟
تكون طلعت تاني لما اتأخرت عليها ؟؟

تكون زهقت ومشيت ؟؟
طيب هتروح على فين ؟؟
بيت اهلي علشان أقرب ؟؟
ولا بيت أهلها علشان زعلانة ؟؟
ولا هتكون عاقلة وفي بيتنا دلوقتي ؟؟
أكلمها على الموبايل
وأنا بأطلبها افتكرت انها ماكلمتنيش لما اتأخرت عليها
ياترى فيه ايه ؟؟
ردت عليا
صوتها عادي جدا
استنيت تعاتبتني على التأخير ... ماحصلش
وعرفت انها فوق ونازلة على طول
سألتها : انت فوق من امتى ؟؟
قالتلي : من ساعة ما كلمتك
سألتها : يعني لما قلتلك استنيني تحت مانزلتيش ؟؟
ردت بالبرود المعهود : هو أنا مش عارفة مواعيدك ولا ايه ؟؟
طبعا لأ
جردل ميه ساقعة متلجة نزل على نفوخي اللي وصل للغليان
ولقيت رجلي مش شايلاني
والعربية على الصف التاني من الشارع
رحت قاعد أنا على كرسي البواب البامبو اللي في مدخل العمارة
وقعدت على الحال ده تقريبا تلت ساعة
واللي طالع واللي نازل يبصلي ويقول في باله
هوا ده البواب الجديد ؟؟
لحد ما ظهر البواب الحقيقي للعمارة
وقبل ما يسألني انت مين ولا قاعد هنا ليه
عرفته بنفسي
وطبعا قمت من كسوفي وقعدت في العربية
لقيت الراجل باعتلي ابنه بكباية شاي
وأنا بصراحة ما باشربش الشاي
أشرب أزوزة أنا
مع اعتذاري برضه لليلى بنت نظمي
خلينا في موضوع شفقة بنت ..... ولا بلاش

أم هئ
أخيرا ظهرت الهانم
قررت ما اتكلمش معاها لحد مانروح
بامد ايدي في جيبي أدي الولد ابن البواب حاجة
وأنا بأرجعله كباية الشاي اللي دلقتها وكأني شربتها
مالقيتش معايا فكة
اضطريت آسفا اني أتكلم معاها
مجرد سؤال : ممكن 5 جنيه ؟؟
وكان الجواب برده سؤال : ليه ؟؟
رديت علشان أخلص : هأديها لابن البواب
وجاني الرد
جاني الرد جاني ولقيتها مش طايقاني
مع اعتذار شديد جدا للعندليب
الرد حقيقي كان مفاجئ
ضربة ارسال
ساحقة ماحقة لا تصد ولا ترد
حسيت اني متجوز "شتيفي جراف" في عز مجدها
مع اعتذاري ليكي برضه يا "شوشو"
شكلي هاقضيها طول اليوم اعتذارات ولا ايه

أم هئ
الهانم ترد تقولي ايه لما طلبت فكة أراضي بيها ابن البواب
تيجي منين الخمسات ؟؟
انت ناسي ان أول الشهر عدى وما خدتش منك مصروف
ولا مصروفي ولا مصروف البيت
ده أنا شفت "جزمة" كانت هتطلع من عيني
"دعيت في سري وقلت يارب تدخل في عينها بدل ما تطلع منها"
وما رضيتش أجيبها
علشان أجيب حاجة في ايدي وأنا طالعة عند بنت خالتك
وأول أول امبارح لما كنت عيان
مش جيبالك زبــادي ؟؟؟؟؟

ايه؟؟
نعم ؟؟
يااادي الزبااادي

فورا غيرت اتجاه سيري
ورحت لحمايا أطلب منه القايمة
أيوه القايمة اللي مضاني عليها زمان
لأ مش علشان أقطعها
لأ
علشان هاضيف عليها الـ 3 علب زبادي


احـــــــــــــسان

الأحد، 8 يونيو، 2008

جـــــــــــــــــواز" دوت " كــــــــــــــــــوم



النهارده بقى هنتكلم عن الجواز النص كوم ولو حد سألنى ليه يا شفقة بتقولى عليه نص كوم؟ هقله ده نظرا لاننا فى الصيف.... والله الواحد مش عارف يقول ايه؟....معقول الواحد والله مش مصدق.........ايه ده يا بنات ...بتعملى ايه يا مقصوفة الرقبة انتى وهى؟؟ يا دى المصيبة عليكن اجيال مهببة بهباب مهبب ........الواحد مش مصدق اللى بيشوفه ده قال ايه... افتح التليفزيون على القنوات اياها اللى فيها المذيعات اياهم اللى بيقعدوا يتاصعوا ويدلعوا ادام المشاهدين وعمالة تقول فوازير وهى بتترقص اول حرف منه" ح" وبينهق" تفتكروا تبقى ايه؟؟ طبعا كلها فوازير للاذكياء فقط...سيبكم من ده دول عايزين قصة لوحدهم نبقى نتكلم فيها بعدين وهتلاقى قبول فظيع خاصة من الرجالة.... المصيبة فى الشريط اللى بتكتب فيه تحت على الشاشة الاقى......اعلان فى طلب عريس قال ايه....الهانم كاتبة انا فتاة مؤدبة" وطبعا باين"...عشرين سنة"طيب يا فالحة متسربعة على قصف عمرك بدرى ليه؟؟....هيفاء تقصد "هايفة".....طويلة ممشوقة القوام "وكانها عاملة اعلان لموديل"....تطلب عريسا غنى ..ابيض..عريض طبعا علشان تاخد علقة كل يوم..يمتلك سيارة فارهة "على اساس انها هتكون بديلة للشقة"..خريج كليات القمة" تقصد القمامة على اساس انها نسيت بقية الحروف".

معقول ايه يا بنتى ده طيب ما تروحى احسن تشترية من السوبر ماركت! اهو على الاقل هتلاقى كل اللى انتى عايزاه الرخيص والغالى ...ابو بدلة.. وابو بيجامة.. والحافى وكله بتمنه!

شويتن ادخل على النت... وده بقى الاجمل الاقى مواقع للزواج وفجاءه كده تتخض وتلاقىكاتبلك "ادخل " بيحسس الواحد انه واقف على الباب!

طبعا ده بعد ما تسيب كل بياناتك ومواصفاتك ومواصفات شريك الحياة...ده ايه الحلاوة والجمال ده ايه التقدم المذهل ده....لا صحيح عصر التكنولوبيا..

كأن بكده هتتحل مشاكل كل البنات واللى هتطلبه هتلاقيه ...مكنش حد غلب امال البلد كلها فيها عنوسة ليه؟؟

طيب انا بقى هطلب عريس يكون نافش ريشه وملون ومبيفتحش بقه خالص ...."ديك" انا بصراحة مش عارفة ايه اللى بيحصل ده الغريبة... ان تلاقى البنت من دول مصدقة وتدخل تسيب بياناتها ومواصفاتها كده عادى قال يا عينى هتلاقى فارس احلامها وتسيب رقم تليفونها او ايميلها ومش عايزة اقول على الباقى اللى بتدخل المواقع دى عارفة الباقى بس اعتقد انها بتدخل تدور على فارس الاحلام ابو حصان وفى الاخر الحصان بيرفسهم هما الاتنين ما علينا نخرج من الاسطبل ده ونكمل!

حبة وتلاقى ماسيج على الماسنجر حبيتن بقى كلام... شويتن تليفون... ثم خروجة... ثم قلة ادب ...ده طبعا على اساس انه عريس اه " محدش يفهم غلط ".

وهكذا كالعادة لحد ما يخلع ويسيبها... وهو معقول فى حد بيتجوز بالطريقة دى؟ المصيبة تلاقى البنت بتدخل المواقع دى ومامتها عارفة وكل شوية تعدى تسالها بصوت ناعم وحنين "ها يا حبيبتى كام عريس بعتلك النهاردة؟ طيب هتقابلى مين الاول؟ بقولك ايه... عايزين حاجة حلوة كده!

الاحلى والاجمل الجرايد والمجلات...افتحها الاقى عناوين "اذا كنت تبحث عن نصك المنيل او عايز حد يعكنن عليك...او نفسك فى حد يطلع عينك ...ويقرفك ويخسسك النص ابعت لنا.... الخاطبة نبوية ام عيون عسلية مبتخدش فلوس نقديه بتقبل هدايا وعربيه.... ابعت لنا واكيد هتندم عندنا"

او تلاقى اعلان على جنب كده فى صورة واحدة مكعبرة وكاتبة" ام منص للزيجات العصرية اذا كنت تبحث او تبحثين على نصك التانى نحن فى انتظاركم بشرط ممنوع التقدم الا للطبقات العليا ...كل ما لدينا من اصحاب الطبقات الراقية"هى تقصد بالطبقات العليا" اللى ساكنين فى الدور العاشر وما فوق يعنى سكان الارضى والاول لا "ما يعتبوش هناك" والطبقات الراقية اللى بياكلوا رقاق كتير...اما بتوع الجبنة والفول والطعمية يمتنعون دول يشوفلهم... صاحب مطعم"

والجديد بقى المكاتب المحترمة اللى بتاخد فلوس....بس ما عليكى غير انك تروحى ناكشه شعرك وعامله خصلتين حمر ولابسة اللى على الحبل ومعاكى السى فى بتاعك وانتى وحظك العريس على اد اللى انتى عامله فى خلقتك.....ده طبعا بعد ما تدفعى حق الابلكيشن "استمارة البيانات" والضريبة والخدمة وبعدين يحددولك ميعاد المقابلة والمشاريب وكله على حسابك وطبعا هتلاقى عرسان بالهبل لان كل مقابلة بتدفعى....بس ابقى قابلينى لو لقيتى العريس اللى انتى عايزاه وساعتها ابقى ارمى نفسك فى البحر وربنا يعوض عليكى فى فلوسك وهتسمعى جملة"مواصفاتك مش موجودة عندنا ...وفلوسك استعوضى فيها ربنا"

عايزين الحق اللى بيحصل ده تهريج.... بجد بجد كل واحدة تصون نفسها لغاية ما يجىء الشخص المناسب لحد عندها اللى يصونها....لكن لو كانت هتموت على الجواز وخلاص بتشد فى شعرها يبقى احسن ليها تعمل اعلان وتكتبه على يافطه بالبنط العريض وتحطه على عربيه نص نقل او كارو ومعاها مايك... تلف بيه فى الشارع تنادى"محدش شاف عريس بالمواصفات دى....يا ولاد الحلال حد يدلنى على عريس"وربنا معاها .


بجــــــــــــــــــــــد عايزة اقولكم حاجة يا بنات ليه ما بتاخدوش بالكم من الزمن اللى فات؟؟ ارجعوا شوية لزمن الامهات ..شوفوا يعنى ايه عروسة وازاى كانوا بنات عائلات محترمات..... ده الخجل والحياء مميزات وصفات .....اسالوا نفسكم ينفع احنا اللى ندور على البهوات؟؟..... للاسف انتم متعرفوش يعنى ايه جواز...فاكرينو عريس وعفش وجهاز! خطوبة ودبلة وهيصة وطبلة.


الجـــــــــــــــــــــــــــــــــواز....يعنى حب وارتباط وتفاهم يعنى التزام مش خاطبة ودش وشات يا بنات يا افاضل يا محترمات اصبروا على نصيبكم بدل ما تستعجلوه وترجعوا تضربوا نفوخكم فى الحيطه.
وبعد اذنكم بقى علشان اروح اشوف العريس اللى كنت منزله عنه اعلان لبنتى فى الجرنال..........وعقبــــــــــــــــــــــــــالكم
شــــــفقـــــــــــــــــــة