الخميس، 28 أغسطس، 2008

الحدث الاعلامى المريع"ظهور شفقة واحسان" على الساحة الجاتوهيه




سى احسان افندى قالى لازم نروح يا شفشوقة يا حبيبتى حفل توقيع الكتاب ونتعرف على ...اصحابنا المدوخين


قلت له ماشى يا سيدى ولو انى خايفة عليهم لحسن لما يشفونا يتخضوه




.وفى عقل بالى قلت وماله روحى يا بت ده بيقوله فى جاتوه


المهم وصلنا ساقية الصاوى ............وحضرنا حفل عيد ميلاد تانى عدد بس للاسف خدعونا وماكانش فيه جاتوه ولا اى حاجة




اصلى الصراحة كنت طمعانة فى الجاتوه ............الواحد ما بيشفهوش الا من السنة للسنة فى اعياد الميلاد"يعنى باختصار خدت بومبه"


الحفل كان فى ساقية الصاوى وغرقنا كلنا ميه من الساقية........ اما الاستاذ الصاوى فاحنا ما اتشرفناش بمعرفته اظاهر انه لما عرف اننا رايحين الساقية هرب وطلع على الصحراوى




نيجى للحفلة بقى




بصراحة احلى من حفلة العدد الاول بكتير جدا يعنى من وسط البلد كده لحد الزمالك




كمان التلافازيون كان بيصوت اقصد "بيصور يا جدعان "اه والنعمة




وكل شوية ابص للمذيعة كده واخد بصة فى المرايا "واقول هل من مكتشف




المهم انا قاعدة حاطة رجل على رجل وعاملة فيها ام على........ واحسان كل شوية يناكفنى ما تقومى نتعرف على الناس




وانا اقوله لا اشمعنا هما ما يتعرفوش علينا ........يقولى هو حد عارفناه




قلت له انت بالذات ما تتعرفش على حد لان لو حد عرفنا او شم خبر بوجودنا ........هتبقى ليلة مطينة بطين




بسبب البوست اللى كتبت فيه نقدك الفظيع بتاع العدد الاول




راح بصص لى وقالى ......طيب انا هاروح اتعرف على احمد مهنى




وسابنى ونزل سلم عليه وعرفه بنفسه بصراحة احمد مهنى وشه جاب الوان وعلامات استغراب واستفهام وازبهلال بس الصراحة هو راجل ذوق ذوق ......وفى غاية الاحترام والادب تحس كده انه راجل اكاديمى من بتوع الجامعة مش رقصنى على واحدة ونص




شوية وقعدنا نستمع لكلمة الناس المشتركين فى الحفل




بصراحة كلهم هايلين بس اكتر واحد علق معانا هو الشاعر محمد فكرى بجد غاية فى الروعة ........واحلى حاجة نبرة صوته وهو يلقى الشعر يحسسك كده انك فى عصر الجاهلية


راجل صوته اجش مش زى شباب اليومين دوول ابو صوت خنفس




شوية ولقيت الصباغ ......عمال يصور وبيقوم بتغطية اعلامية رهيبة طبعا انا اول مرة اشوفه بس كنت اعرفه من الصور




وقلت لاحسان تعالى يا سونة نتعرف عليه اصلى بحس انه الراس الكبيرة..... وشوية لقيناه فص ملح وداب ندور يمين شمال مفيش حبة نلقيه فوق الكرسى وشوية على السلم وحبة فوق السور.... كان عامل شالباظ وعمال يصور اظاهر ان المصوراتى اللى بيشتغل عنده كان موصيه على الصور اوى بس هو بصراحة مصور هايل ........ينقلك الحدث وانت قاعد فى بيتكم




اول ما احسان عرفوا بنفسه الراجل مسك فيه ولا كانه لقى لقيه او مسك حرامى....... وسلم عليه اوى وباسه وقاله انتم بقى شفقة واحسان




انا قلت ايه ده من اولها كده يا صباغ هنرفع الالقاب فين هانم وبيه




بس فرح بينا اوى...................................ز وبعدها عينكم ما تشوف الا النور




بصينا لقينا ناس بتسلم علينا من هنا ومن هناك ..........وحسسونا وكاننا وجوه سينمائية واللى يقولنا امضوا لى على الكتاب وانا طبعا اتحرجت




انتم عارفين اننى ببصم......... فكنت بخلى احسان يمضى نيابة عنى




بصراحة ما كناش متخيلين........ اننا مشهورين كده والناس بتحبنا اوى




اول من اتعرفت عليهم" رودى القمر" بنوتة مصريه........بس شكلها كانت طفشانة من الافندى بتاعها والاولاد يا بختك يا رودى بس اول ما سلمت عليا كانت فرحانة اوى .........وقعدت تقولى شكلك غير ما انا كنت متواقعاه انتى زى القمر


اظاهر انها كانت فاكرانى مركبه طقم اسنان ومعايا عوكاز وحاطة باروكة بس بقولك ما تنخدعيش يا رودى دى عمليات التجميل بقى والذى منه




اجمل لقاء ايما"ام البنين" بس هى بقى كان معاها البنين زى العسل ربنا يخلهوملها ......اول ما سلمت عليا بردوا بوستها وقالتلى شكلك غير ما كنت رسماه فى خيالى اظاهر........ انها كانت رسمه توم وجيرى




وبردوا قالت لى انتى زى القمر انا حسيت انى هيفاء وهبى ولا اقولكم وسعت منى دى اوى كفاية عائشة الكيلانى رضا




كمان شفت دعاء مواجهات ......بس الحمد لله موجهتليش اى اتهام.......... بنوتة رقيقة اوى وهادية وذو شخصية وطيبة اوى واول ما اقول دعاء يبقى احلى سلام للمنوفية بس بقولك ايه يا دودو ما تنسيش اختك شفقة واخوكى احسان مانشيت كده بتاع صفحتين ولا حاجة فينا او حتى عمود بس فى الجريدة مش فى دماغنا



محمد" قلب مصرى" راجل اجنبيشن كده مش زى الناس بتوع الفول والطعمية واول ما نسمع قلب مصرى يبقى سلام كبير لبتوع السياحة مش اى حد بتوع العملة الصعبة بجد راجل هايل واسلوبه راقى جدا جدا فى الكلام بس المرة اللى جاية لازم تجيب معاك رقية والمدام




احمد سكر .........وهو راجل بجد زى السكر واللى عرفتنى عليه رودى شكله طيب وهادى واول ما نقول سكر يبقى سلام محلى بزيادة لبتوع الطيران




والنبى يا سكر ما تشوفش لاختك شفقة تطفيشة كده لحد موزمبيق او كده ولا حاجة اهو الواحد يشم هواء بعيد عن احسان




بابا ابو خالد .........هو ده المهم وذكرياته الجميلة راجل كده تحس انه والدك راجل زى العسل وشه مليان نور وبهجة واول ما شافه احسان عمل سبق امضائى على الكتاب طبعا لان ابو خالد مش اى حد .........كمان سالته على نهر الحب داليا القمر اللى كان نفسى تحضر.....بس اول ما نسمع سيرته يبقى احلى سلام شحط محط للبورسعيدية




خالد "همس الاحباب" .........راجل لذيذ وحبوب وتحس انه ابن بلد وكانك تعرفه من زمان وبردوا اول ما نسمع سيرته يبقى سلام مصحوب بالسمسمية لاجدع ناس بورسعيدية




سارة"بنوتة لاسعة".......... لقيتها جاية تسلم وتقولى بصوت واطى ورقيق انتى شفقة؟؟ قلتها اى نعم هى بذات نفسها سلمت عليا بحرارة وجت قعدت جنبى بالرغم من ان اسمها لاسع الا انها مش لاسعة خالص.......... بس خلى بالك يا سرسر لحسن من كتر الاسعان تفوتى وتبقى هوبه استنجلينا


ايناس" اوع تتجوز"..... حبيبة قلبى بنوتة قمر وعسل وسكر بس بردوا شكلها كانت هربان من الافندى بتاعها وسايبله العيال يا بختك يا انوس .........بس المرة اللى جاية لازم تجيبى الاولاد علشان نعرف لمضين زى مامتهم ولا لا....على فكرة ايناس ما شاء الله عليها متحدثة جيدة جدا ولبقة......... وكان نفسها تدخل اعلام بس بقولها انتى احسن من الاعلاميين كلهما




ضياء بيتوفول مايند" ...........اول ما شوفته فكرنى باحمد مكى بتاع خليك كوول راجل كده شكله دمه خفيف وروش وشكله متاثر بالافلام الاجنبى.... واللهى عندك حق يعنى خدنا ايه من المصرى.......... كمان هو اول لما شافنى فرح اوى وقالى انا اول واحد بعت قلتلكم امسحوا الصورة اول صورة نازيلناها على المدونة........ وطبعا ما مسحنهاش الا بمذاجنا




د\يوسف "يوسفيات" ........ده بقى دوك دوك بجد قعد يرغى هو واحسان لحد ما روحنا .........اظاهر انه كان بيقنع احسان يعمل عملية فى مناخيره علشان بيشخر وهو نايم ........بس بجد هو دكتور هايل وان شاء الله اوعدك انى ازور المدونة بتاعتك بس فى الشتا......... لان دلوقتى مش اوانها لا مدونتك يوسفى ولا ابن عمك البرتقال




مهيج الجماهير.......... ده بقى قصة بس اهم حاجة انه جه من غير الجماهير شكله بردوا شغال مع الصباغ فى الاستوديو عند نفس المصوراتى .............وكان معجب باحسان جدا وطلب يتصور معاه......... وبعدين صورنا انا واحسان والصباغ ومن ساعتها وهو ماسكهالنا ذلة




صباح الصباح " ...........الصراحة انا شوفته فى الحفل بس ما اتعرفناش عليه بس هو شكله كده ولا دكتور فى الجامعة




ميرا " امراه بعقل رجل"......... يعنى دماغ ناشفة اوى انا لقيت امضاءها على الكتاب اللى اشترناه واتعرفت على احسان........... بنوتة صغنونة كده ولذيذة بس شكلها من انصار النساء اللى بينادوا بمساواة المراه.............. وشكلى كده هاسس معاها.......... جمعية " يا ستات العالم ارفعوا المغرفة




طبعا انا كتبت الناس اللى احنا اتعرفنا عليهم ولو فى حد اتعرفنا عليه وما لقاش فضيحته قصدى اسمه............................ يبعت يقولى علشان اايده عندى فى الدفتر" انتم عارفين الزهيمر بقى




واخيرا فى اخر الحفل اشترينا الكتاب بس من غير ما نشوف حتة الجاتوه او نتعرف عليها




وتاثرت جدا انى دبيت المشوار على الفاضى ................وما حليتش بجاتوه اصلى كنت حاطة امل كبير على الموضوع ده




وياريت المرة اللى جاية تحطوا الموضوع ده فى اعتباركم...................ز لانى بقترح مع كل كتاب قطعة جاتوه




مينى " وبكده المبيعات هتزيد صدقونى




كمان بعد الحفل لمينا بعضنا وروحنا نادى المهندسين.................. واستمتعنا جديا جديا جديا ومعزة معزة معزة






كمان الناس اللى ما حضرتش زعلت اوى خالص انى ما شوفتهمش




بس ان شاء الله اشوفهم فى المرات اللى جايه




ومنهم ابى......المفقوعة مرراتها.....سومة المجنونة.......كيكى.......نعكشة.......ليدى.......عبده الرايق......يوميات نائمة فى الارياف.....نهر الحب.... ولماضة وكتير اوى اوى بس مش فاكرة دلوقتى




طبعا انتم مستنين تعرفوا المفاجاه اللى وعدتكم بيها مش هاقول










ولا اقولكم يعنى لازم تعرفوا ............اسم المدونة التانية










طيب زغروطه الاول










لا شوية تصقيف










المدونة اسمها








اسمها










ماشى خلاص بقى هاقول








مــــــــــــــــــــذكرات عروســـــــــــــــــــة ننوســــــــــــــــــــة









يارب تكون المفاجاه عجبتكم








شفقة

السبت، 23 أغسطس، 2008

التاج وصل يا جدعــــــــــــان




لتانى مرة اعزائى المدونين يوصلنا التاج المتين ........المرصع بالاحجار الكريمة والبلاتين
وده طبعا علشان احنا مدونين مش فاشلين ............وبنعيش حياتنا بحبة تهيس ودايما مجانين


كمان احب اشكر الاخت العزيزة "جوجو" حبيبة قلبى اللى اهدتنا التاج انا واحسان........ بس احب اعرفكم انى هاخده لوحدى وابقى ادى احسان منه فص بس كفاية عليه كمان علشان ما يبصليش فيه



نيجى بقى للاسئلة الفظيعة اللى تودى فى داهية اكيد كلكم دلوقتى عايزين تعرفوا عننا كل حاجة بس بعينكم


استعنا على الشقا بالله ......بسم الله نفتتح الاسئلة



بدات تدون من امتى ؟؟؟ ودخلت العالم ده ازاى؟؟؟
بدات ادون انا واحسان من حوالى 6 شهور
وعرفت التدوين عن طريق برنامج فى التليفجين كان بيتكلم عن التدوين والمدونين وانا طبعا عندى حب استنطاع فاستنطعت وقعدت ادور واشمشم على النت لحد ما عملت مدونة لوحدى مش هاقولكم ايه هى لانها مفاجاة ومن فترة كبيرة وبعدين احسان غتت وغلس وغار منى فاقترح اننا نعمل مدونة سوى يا ساتر على الرخامة

*********

ايه كان انطباعك فى البداية؟؟؟
احساس حلو اوى اوى وعالى جدا لحد اوضة السطوح .....كان نفسى ابقى كاتبة مشهورة والحمد لله التدوين اتاح لى الفرصة واصبحت كاتبة مهروشة
اما بالنسبة للاحسان فكان سعيد جدا جدا نظرا لانه لاقى مورد جديد يشحت على بابه

*********

مين اكتر واحد بتهتم بتعليقه على بوستك الجديد؟؟
بصراحة بهتم بكل المدونين وبنبقى نفسنا كل المدونين يبقوا اصحابنا ويزورونا علطول
بس عن نفسى بهتم بالمفقوعة مرراتها لانى مفقوعة زيها......وبسوسة الطريق الى الكوشة علشان بدور معاها على عريس لاخواتى
ونعكشة علشان انا بموت فيها......وكيكى لانها دايما بتخضنى لحد ما شعرى ابيض......وجنة عروسة ننوسة علشان احلى عروسة

*********

ايه اهم حاجة اتعلمتها من عالم التدوين؟؟
بالنسبة لى تكوين دائرة لا باس بها من الاصدقاء وتبادل الاراء والمعلومات والقراءة
بالنسبة لاحسان بردوا تكوين صديقات " اقصد صداقات" وانه لاقى حاجة تشغلنى عنه واتلهى فيها

********

ايه اكتر حاجة كرهتها؟؟
الناس اللى بتدخل تشتم وتكون غير معلومة الهوية علشان ببقى نفسى اعرفهم علشان اوريهم
وكمان الناس اللى بتدخل تدعونى لزيارة مدونتهم والتعليق عليها بدون ما يعلقوا عندنا

*********

حاسس ان التدوين له تاثير؟؟
طبعا له تاثير كبير جدا بالنوسبالى لانى بالتدوين لقيت حاجة انشغل فيها واحقق فيها طموحاتى وهى الكتابة والفضفضة
وطبعا بالنسبة لاحسان فهو له تاثير كبير جدا فهو اصبح المتنفس الوحيد اللى فيه بيقدر يطلع اللى جواه ويفضحنى على الملا

*********

تهدى التاج لمين؟؟
اخ وصلنا للسؤال الصعب ......انا عموما نفسى اهديه لكل المدونين بس اكتر ناس هما
مسز سوسة....." الطريق الى الكوشة"
عروسة ننوسة....." مذكرات عروسة ننوسة"
حماتى ملاك........." المفقوعة مرراتها"


اسلام.........." قهوة نام يا مصرى"


ميوشة........" يوميات طالبة فاشلة"

كيكى "فكك منى"
سومة مجنونة فى بلد عاقل"



وسلام بقى كفاية عليكم كده

الأحد، 17 أغسطس، 2008

هى دى مصر يا هبلـــــــــة


كنت قاعدة كالعادة بناكف فى سى احسان افندى وقعدين نتخانق على تحويل القنوات هو يقول ميلودى وانا اقول الافلام لحد ما كلمتى نزلت المرة دى وقلت فى سرى مقولتى الشهيرة .........يقطعك يا منيل ويورينى فيك يوم ما تفهموش غلط اقصد يبقى موديل زى بتوع الاغانى....... اللى بيترقصوا مع المطربات

وشوية واحنا بنتفرج على مولودى اصلى بدلعها سمعت اغنية موثرة جدا اغنية " العسيلى ومى سليم "يبقى انت اكيد اكيد فى مصر" ياااااااااااااااااه اغنية تقطع القلب وتخلى الدمعة تفر من عين الواحد .... ممكن كمان الواحد لو سمع الاغنية دى وجنسيته مش ايجبشن يتمنى يكون اوبشن اقصد...... ايجبشن يعنى مصرى


يا سلام عليكى يا مى انتى والعسيلى وانتم بتغنوا وتاكدوا بالفاظ التوكيد اللفظى .........يبقى انت اكيد اكيد فى مصر

انا بصيت لاحسان ولقيته متاثر اوى وعمال يقطع فى المناديل من كتر البكاء .....وقعدت اقول الله عليكم عندكم حق واللهى ورجعت كده......... فلاش باك لوراء


يا سلام كده لما الواحد يصحى كل يوم من الفجر ويقف فى طابور العيش يزق ويتخانق ويضرب على قفاه ياه حاجة هايلة خالص......... ده بالنوسبه للرجالة ويا سلام بقى لما يضربوا بعض بقفص العيش حاجة مش ممكن

اما بالنوسبة للستات .........يا سيدى عليهم وهن ماسكين فى شعور بعض وعمالين يقطفوا ولا الملوخية وكل واحدة ماسكة التانية من الجلابية طمعانة فيها وهاتك يا تقطيع وفى الاخر الفرن تقفل وتقولهم شطبنا بتوع التموين قايلين لحد الساعة 12 ...اه 12 ودقيقة نكون بعنا الدقيق فى السوق السوداء طبعا بكده تبقى انت اكيد اكيد فى مصر
ولا يا سلام بقى لما تروحى السوق وكل يوم تلاقى الحاجة عمالة تغلا......... ولو بس حبيتى تسالى او تستفسرى عن سبب الزيادة تلاقى بتاع الخضار......... وشه اتقلب ولا بوز فردة جزمة.... ويقولك واحنا مالنا يا ست مش عاجبك ما تشتريش يلا هوينا وورينا عرض كتافك......... ولو حبيتى تستعرضى وجبتيله جوزك وحبيوريلهانه بيلعب فى الجيم وانه من حاملى اثقال الكوز ابو جبس...... ممكن يحدفكم بالخضار او يديكى بالميزان فى وشك وساعتها لازم تتاكدى.....ان انت اكيد اكيد فى مصر


لما تروح تركب ميكروباص........ وتلاقى السواق على اخره وهايقوم يضرب الركاب وكل شوية يقول الاجرة يا افندى انت وهو ما تلموا مع بعض يا فتاح يا عليم ......ويبص للستات ويقول ما تخلصين يا ست انتى وهى ما تفك يا خوانا مع بعض الواحد لسه ما استفتحش ده اول دور..... وفجاءة تلاقى واحد سألوا وقالوا الاجرة كام يا اسطى انا نازل المحطة اللى جاية وهو يرد يقول وكانه بالع حمار جرى ايه يا فندى الاجرة موحدة .....وتنزل من العربية وانت قرفان وعايزة ترمى نفسك تحتها تلاقيه كاتب على ضهرها.......... عضة اسد ولا نظرة حسد .....وساعتها تحس انك كنت فى جنينة الحيوانات مش فى عربية يبقى انت اكيد اكيد فى ميكروباص مصر


الاتوبيسات يا سيدى عليها لما تشوف اتوبيس الناس اللى راكبين فيه اكتر من سكان مصر وكلهم فوق بعضهم والكرسى قعدين فيه دورين واللى واقفين رجليهم متشعلقة ......والرجالة قاعدة والستات واقفة والسواق كل شوية يفرمل ولا اللى مركب بهايم........ والناس تقع فوق بعضها وتقول للسواق........ حاسب هنا يا اسطى ويعمل نفسه اطرش وما يرضاش يقف فى المحطة يعنى واخد الناس رايح راجع طول الخط " اصله حقانى بيديهم بحق التذكرة .....يبقى انت اكيد اكيد فى باص مصر"


لما تروحى تقدمى لوظيفة بعد عشرين سنة من التخرج ويشوفوكى يتغموا ويقولوليك .....فوتى علينا بكرة وكانك بتاعة اللبن وتلاقى واحدة داخلة الانترفول وحاطة فول ميكب وطعمية ميكب وناكشة شعرها ودهنه وشها 2 كيلو سايبس ولاكيه ولابسة المحزق والملزق ومبينة الركبة......... وعاملة فيها ولا هيفاء وتافهة... وبتتكلم من وراء سنانها ويحترموها ويقبلوها من غير انترفول كده تبقى طعمية ومقلية وبكده تبقى......... انت اكيد اكيد فى مصر


لما تروح اى مصلحة حكومية وتلاقى الرجالة عاملين يقراوه الجرايد .......والستات قاعدة ترغى وتقشر بصل ولما تقوليلهم من فضلك عايزة اخلص الورق وتقولك مش فاضين ولما تتحايلى عليها شوية وتبوسلها البروكة وتحن عليكى وتقولك ........هاتى دمغة والذى منه.......وعلشان تمشى الموضوع تقومى تديهم فى اسنانهم بقشيش وتقولك ماشى اهو حق كوباية الشاى تبقى انت...... اكيد اكيد فى مصالح مصر


لما تروحى مدرسة حكومية تقدمى لاولادك فيها........ وتلاقى الفصل فيه ابتدائى واعدادى وثانوى والمدرس ما بيشرحش ويقولك بصوت اخنف ابنك مش نافع يا مدام ما بيفهمش ومحتاج درس خصوصى

ولما تحبى تقدمى فى مدارس خاصة فيخدوكى على الهادى......... وشوية شوية تلاقى المصاريف عليها مصاريف نضافة والات موسيقى والعاب وكل شهر هنبنى جامع لا المدرسة عيد ميلادها والناظرة بنلملها علشان ولدت وهنجيب حاجة للعيل وفى الاخر تلاقى ولادك ما بيعرفوش الالف من كوز الدرة يبقى .........انت اكيد اكيد فى مدارس مصر


لما تروح تصيف فى جمصة وتحس انك عملت انجاز ومفيش زيك... وتتفاجىء بناس بتصيف فى مارينا وعاملين يبنوا فى شاليهات وقصور علشان يروحوها شهر فى السنة .......وناس تانية مش عارفة حتى تشم الهواء فى بلكونة بيتهم ومش لاقيه تاكل مش تشترى مايوه.......... وناس تالتة رايحة تصيف وعاملة تسال يا ترى ايه الموضة السنة دى المايوه ولا البكينى القطعتين ويا ترى بتستخدموا الصن اويل علشان يحميكى من الشمس ولا لا ؟؟ وفى غيرهم مش لاقى تمن الزيت اللى تطبخ بيه يبقى...... انت اكيد اكيد فى مصايف مصر


لما الواحد يزهق من نفسه........ ويحس انه خلاص عايز يولع فيها ويحب يفك شوية ويدخل سينما ويلاقى الشباب واقفة طوابير وهتقطع بعض على شباك الافلام اياها........ وشباك الافلام الهادفة معلهوش ولا نفر........... وتسال اشمعنا الفيلم ده اللى مكسر الدنيا؟؟ وتلاقى الاجابة اصله فيلم مناظر....... وتدخل تلاقى كل واحد رجله فى قفا اللى قدامه.... وعمال يتف عليك اللب يبقى انت اكيد اكيد فى سينما مصر


لما تلاقى واحدة ماشية فى الشارع لابسة خيمة ومش باين منها الا الجزمة....... وتلاقى واحد رزل عمال يعاكسها ويغتت عليها ويقولها يا مزة ايه الحلاوة دى ........وهى تتف فى وشه يقوم يبتسم لها....... ويقولها براحتك يا جميل بكرة يا حلو تروق وتميل تقوم تديله بالشبشب لحد ما يبان له صاحب يبقى .......انت اكيد اكيد فى شوارع مصر


لما تحب تروح تتفسح فى اى جنينة وتاخد معاك المدام تحدفها هناك..... وتشممها هواء فاسد وتلاقى الجنينة اتقلبت بقت غرزة وناس عمالة تشيش وتحشش....... وفى الاخر تتجرجر انت وهى فى البوكس....... لحد ما تعترف بالغصب انها مش مراتك يبقى انت اكيد اكيد فى حدائق مصر


لما تلاقى الستات واقفين فى البلكونات عمالة تجيب سيرة فلانة وعلانة وام ترتانة.......... واللى اتجوزت واللى بارت واللى يكلمهم نص كلمة .....يحدفوه بالزبالة من فوق يبقى...... انت اكيد اكيد فى حوارى مصر


لما تلاقى شاب طويل وعريض ووسيم وابن ناس كويسين ومتعلم ومعاه ماجيستير......... وسارح بشربات وفنلات ويقولك اكل العيش اللى ما بقاش موجود الا بالطوابير وفى الاخر تساله امنية حياتك ايه يقولك اهاجر واموت بر ارض الوطن يبقى انت اكيد اكيد فى العتبة بتاعة مصر


اعتقد اننا حسرنا كل المميزات وفعلا فعلا اكتشفنا بعد البوست ده ............اد ايه احنا بنحب بلدنا ومش عايزين ابدا نتحرك منها واد ايه الواحد""" مصر""" على حبها

واسيبكم مع النجم ........احسان زعبله وسمعنى اغنية "محمد فؤاد" ***يعنى ايه كلمة وطن***



شفقة

الاثنين، 4 أغسطس، 2008

اليــــوم الإفتتــــاح ( الجمعة 8/8/2008 الســاعة 8م )


مش تباركولنا ؟؟؟


مش أخيرا لقينالنا شغلانة


وهنودع عالم العواطلية ... ولو مؤقتا


آه والله باين كده




حتة فكرة مطرقعة


طرقعت في دماغنا


اللي هي مطرقعة اصلا


وكان نتيجتها اننا


بدأنا في تجهيز مكتب كبييييير


( أوضة وصالة )


في أرقى أحياء القاهرة الكبرى


( إمبـــــابة )


وإشترينا كل الأثاث المكتبي


( من سوق الجمعة )



وجبنا خروف علشان ندبحه بعد الصلاه



( مأجرينه من الجزار مش شاريينه )


وإتعاقدنا مع شركة حراسة وأمن


( سيكيوريتي يعني )


ولسة هننزل إعلان طلب سكرتيرة


( بس شفقة هانم مزمزقة )


الظاهر كده انها منمرة على الوظيفة دي لنفسها


ومش عارف هي طمعانة في المرتب الكبير للسكرتيرة ؟؟


( 300 جنيه في الشهر حتة واحدة )


ولا هيا خايفة من قصص الحب التقليدية بين السكرتيرة والمدير؟؟


( بيني وبينكم عندها حق ... ماهي عارفاني )




المفاجأة اللي هتخليكوا ماتعرفوناش تاني


واللي هتأكدلكوا أد ايه احنا جوز مجانين


هي اننا لغاية دلوقتي مش عارفين هنشغل المكتب ده إيه


آه والله


أنا باتكلم جد مش هزار


عملنا زي بخيت وعديلة لما أسسوا شركة "بخيلة كو"


وبعد ما إكتشفوا خيبتهم قالوا خلاص نشتغل في التصدير والإستيراد


( نستورد اللي بيستوردوه ، ونصدر اللي بيصدروه )


بس احنا الحمد لله حالتنا مش بالغباء ده


لأ


إحنا عندنا ثلاث بدايل بنختار بينهم


بس إحنا إستعجلنا في تجهيز المقر قبل مانستقر على نوع النشاط


وده والله احنا معذورين فيه


التاريخ والميعاد بتاع الإفتتاح لن يتكرر


8/8/2008


والساعة 8م


وموافق جمعة كمان


بذمتكم مش عندنا حق ؟؟


علشان كده قلنا نمشي بالشقلوب


نعمل الإفتتاح الأول وبعدين نشوف بقى هنشتغل في إيه


عادي بتحصل في أحسن الشركات



إيه رأيكوا لو تساعدونا في إختيار شغلانة ؟؟


طب والله هتكسبوا فينا ثواب


إختاروا معانا واحد من ثلاثة



الأولاني : مكتب تصدير وإستيراد


وإخترت له إسم تجاري مبتكر


"S.T.Rad"


والنشاط ده هو أكتر نشاط أنا ميال ليه


وأدعي إني بافهم فيه شويتين


فأنا كان عندي مصنع وكان جزء من الإنتاج بيتصدر


للسودان وليبيا والعراق وتوجو


مع اني والله العظيم ماأعرف توجو دي تبقى فين على الخريطة


بس كنا بنصدرلها


آه بجد


ودلوقتي أنا باستورد قطع غيار من الصين والهند


بس كله عن طريق وسطاء أو مكاتب تصدير واستيراد


علشان كده فكرت اني أستورد شغلي بنفسي


وكمان لإننا (أنا وشفقة) مدمنين سفر ورحلات


وأهويبقى منه شغل وسنكحة




أما البديل التاني فهو : جمعية خيرية


وتحمل إسم " شفقة وإحســـان "


وشفقة مياله أوي للفكرة دي


وخصوصا إن الهدف من تأسيس الجمعية هيكون


القضاء على


البطــــــــالة


وبالتالي القضاء على


الفقـــــــــــــــر


ثم بالتالي القضاء على


العنـــــــوســـــة


وده اللي إحنا سميناه مثلث الموت في بلدنا


وأحب أقولكم ان الحكاية مش مجرد فكرة أو كلام وبس


لأ ده البرنامج لتحقيق الأهداف دي جاهز كمان


بس مستنيينكم تدونا زقة




أما بقى عن النشاط التالت


فده بقى ماكانش في الخطة خالص


بس انتوا اللي كبرتوها في دماغنا


وهو : دار نشر


مع اننا نعترف باننا لانفقه أي شئ في المهنة دي


بس مالناش دعوة ... انتوا السبب


وربنا يسامحكو بقى


كتير منكم طلب مننا نألف كتاب


خصوصا ان شفقة هانم ليها مدونة تانية


وبتكتب فيها بنفس لون الأدب الساخر


ناجحة وليها أصدقائها ومتابعينها


ولما قرينا كتابات أصدقائنا


لقينا منهم كتابات مستواها فوق الجيد


ومنها ما يرقى لمستوى المحترفين


وده اللي خلانا نفكر مانكونش أنانيين


ونطبع كتب لينا ولغيرنا


وأهو الكل ياخد فرصته ويقول كلمته






إيه بقى رأيكم في أفكارنا المجنونة ؟؟

وفي مشاريعنا اللي من يومها مديونة ؟؟

وفي دراسات الجدوى المعدومة ؟؟

مش مهم كل ده ... المهم تشغلونا





ملحوظة :

اللي يعرف سكرتيرة حلوة عايزة تشتغل في مكتب لسة مش لاقيينله صفة ولا إسم يكلمنا بسرعة

لألألأ ... ولا أقولكوا يكلمني أنا لحسن شفقة تطفشها






وتقبلوا جزيل الشكر والإحترام

رئيس مجلس الإدارة

إحســــان بزنس مان