أنا علمي لما اتركن ... جه التراب غطاه
قلت وماله أغسله .. يرجع في عز زهاه
وإيه يعني لو مارجعش ... أجيب واحد جديد في حلاه
وياسلام لو لقيت أكبر .. هو يعني كان بكام شريناه
*****
آدي العلم حلينا قصته .. أكيد في الميدان هلقاه
المهم بعد السنه .. أول سنه .. ايه تاني راح نلقاه ؟
ياترى هلاقي عسكري الجيش الأسمراني إياه ؟
ولو قابلته هسلم عليه واشكره واتصور معاه ؟
زي ماكنا من سنه .. ولا فـ سنه إتغيرت الحياه ؟
*****
الشعب اللي باهى العالم بثورته .. وبوحدته .. بقى ميت إتجاه
شعب كان عارف خطته .. حاسب خطوته .. دلوقتي تاه
القلب اللي كان صافي ونقي مين حجَره مين قسَاه ؟
والشاب اللي كان شايل على كتافه القضيه مين نسَاه ؟
*****
نام وغمض .. إحلم بشهدا بيحلفوك .. كمِل اللي بديناه
إوعي تنسى يابن بلدي وسط زحمة يومك .. اللي قدمناه
سني كان قد سنك .. كان ممكن أعيش عمري زيك .. بس لا
لجل مصر ماتبقى أحلى .. وانت فيها تعيش وتعلا .. خلعناه
*****
نفسي نرجع تاني في الميدان .. المسيحي يقسم مع المسلم غداه
ومنقبه بتوزع ع المحجبه .. واللي ناكشه شعرها .. قزايز المياه
مش غريب على ناس جدودهم .. هما اللي أمنولنا القناه
إفتكروا جيش العدوان الثلاثي .. مين أدبه .. مين خلاه
يهرب يفارق أرضنا .. غير شعبنا .. وطبعا الجيش كان معاه
أطفال بطوب .. رجال بشوم .. ستات بتضرب بالحلل رؤوس العداه
ولما مر الجيش بنكسه .. مين أيده .. مين قواه ؟
قلب الهزيمة لنصر أكبر .. حطم الأسطوره بخراطيم المياه
*****
المستحيل والغير طبيعي .. لما كنا إيد بإيد .. حققناه
دلوقتي شايف يابن بلدي .. قد إيه السهل صعَبناه ؟
ده طابور لعيش وده بنزين .. وللأنابيب ماتعرف منتهاه
ده جاي يخرَب .. وده جاي يحرق .. تراث جدودنا اللي ورثناه
تاريخ شعوب .. ميراث حضاره .. في ساعتين تلاته ضيعناه
*****
واتقسمنا .. حسب دياناتنا .. ونسينا إن الدين لله
يوم ما كانت إيدنا واحده .. وقعنا الظالم والطغاه
بأيادي نظيفه وسلميه .. ممدوده مرفوعه لسماه
تدعي وتقول يارب .. الشعب ده سدد خطاه
لا فينا خاين ولا فينا .. حد ممشينا على هواه
طالبين العيش مع الحريه .. ويا العدل مع رحماه
بقى بالذمه ده يبقى كتير .. ع اللي ضحى في عز صباه ؟
*****
ألف شهيد .. ألفين جريح .. ولسه بيزيدوا ياولداه
ده فقد عينيه .. وده فقد حياته .. وفي الزباله كان مثواه
عروا لحمي .. هتكوا عرضي .. بالبياده فوق صدر فتاه
يا أرض دول كانوا خير جندك .. زي ما قالنا مصطفاه
إتغيروا .. إتبدلوا .. ولا يمكن إتحولوا مجرد أداه
ولا جايز بيقلدوا أصحابهم المغاوير في حمص وحماه
ياجند عودوا لرشدكم .. دي أرضكم .. والأرض عرض نموت فداه
