happy mothers day

امبارح كان اجمل واحلى واعظم يوم فى حياتنا وهو يوم عيد الام ست الحبايب
وانا جيت علشان اقولها واقول لكل ام
كل سنة وانتى اجمل واعظم واحلى واحن ام فى الدنيا
بس تعرفوا انا مش عايزة اقول الكلام التقليدى بتاع الناس كلها
وهو ان الام مدرسة وعندها فصول وبتدى العيال دروس خصوصية
وانها سهرت وتعبت
وماكانتش بتنام
ده علشان كان فى ناموس فى البيت
وهى عملانا حجتها ايون امال ايه؟؟
ولا هقول انها هى الاصل والاساس والجذر والمنبت اللى احنا منه
فرع مايل بعيد عنكم
طبعا مش هقول كده لانها مش شجرة
لا ده كفاية انها جايبة عفاريت وقرود بتتنطط فى البيت
ولا انها بتحبنا اوى
وبتخاف علينا موت من نسمة الهواء الطايرة
لا
انا الام بالنسبة لى ليها منظور تانى متدهور
اقصد متطور
منظور مرحلة ما قبل الجواز
هى الست اللى كانت بتتحايل عليا انا واخواتى اننا نساعدها فى شغل البيت
وكنا بنطنش وساعتها كانت بتذلنا
وبنسمع جملة يا فاشلة ابقوا قابلونى لو فالحتوا
وعمرتوا فى بيت
وفى الاخر برضه كانت بتعمل هى
بس بعد ما بناخد علقة موت اى والنعمة موت
تشهد علينا الشباشب وعصاية المقشة
ربنا يخليكى لينا يا ست الحبايب
يا مدوبة الشباشب والمقشات

هى الست اللى كنا بنكركبلها البيت
ونجيب عليه واطيه هدوم هنا وهدوم هناك
وفردة جزمة هنا وفردة هناك
وشربات لحد ما تتعمى من الريحة
لحد ما كانت بتحدفنا بيهم
وكل واحدة ونصيبها بقها من الحدف
بالجزم طبعا
وتفضل تصوت لحد ما صوتها يروح
وميفضلش الا اننا نتعامل مع بعض بالاشارة
وكل لبيب بالاشارة يفهم

هى الست اللى لما بعيأ بتاخد اجازة من شغلها
وتيجى تودينى للدكتور وتفضل سهرانة جنبى
لحد ما رقبتها تتدلدل من كتر النوم على نفسها
ولما تفوق من الغيبوبة بتاعتها
كانت بتدعيلى
انى اخف علشان ترجع الشغل بسرعة
وميخصموش كتير من المرتب
والا ساعتها مبيبقاش فيه مصروف
وبتعلن ساعة الصفر فى البيت
وتقعد تدعى عليا وعلى اليوم اللى جيت فيه
ربنا يخليكى ليا يا ست المديرة يا مدبرة الميزانية

هى الست اللى لما بابا بيناكف معايا واكون مش غلطانة بتقعد تشد فى شعرها منه وتوريله العين الحمرا والصفراء
لحد ما الراجل يقول يا فكيك و يطفش ويسيب البيت
واقعد انا وهى نزقطط فى البيت براحتنا
ايون ست بتعرف ازاى تاخدلى حقى
ربنا يخليكى ليا يا ست الستات يا حمشة

هى الست اللى كل ما بعوز منها حاجة
وبقعد افرك شمال ويمين وادبدب فى الارض بتجيبهالى
بس بطلوع الروح
وبعد ما بتطلع عينى وتبظ لبره
وفى الاخر تخصم من المصروف
بس مش مهم المهم انها بتدينى
ربنا يخليكى ليا يا وزيرة المالية

هى الست اللى بتقعد تدعيلى وتكتر من الدعوة
علشان انجح واشتغل مش علشان ابقى مرموقة
لا علشان ابطل اقول كلمة هات
لان ساعتها بترد عليا رد منطقى وتقولى
هاتك الهيتهات
مش مهم معناها لان احنا الاتنين مش عارفين
مرحلة بعد الجواز
هى الست اللى بتلبسنى فستان الفرح وبتقعد تزغرط لحد ما قلبها يقف
مش من فرحة الجواز
لا من الفرحة بانى غورت من ادامها
ولقيت راجل يشيل همى وهيتنقل القرف ليهوبتقعد تغنيلى واخيرا اتجوزتى
وهتحلى عن قفايا
والبيت هيفضى عليا
يا سعادتى يا هنايا
دى من تاليفها على فكرة
وساعتها ابقى حليت عن كل حاجة فى البيت
ربنا يخليكى ليا يا ست الستات
يا ست الكواكب والمجرات

هى الست اللى خلت احسان يدفع دم قلبه فى عيدها
وقعد يحوش يجى حدشتاشر شهر علشان يعرف يهاديها
وبعد كده هيداين
وهيدخل اللومان بسببها ربنا يفك سجنك يا سونة
ويخليكى يا امى وتسجنيه كمان وكمان
اهو السجن برضوا للجدعان
المهم الهدية ليكى ولطنط اى حاجة تانية مش مهم

هى الست اللى لما بطرد من البيت شر طردة
ببؤجتى وانا حافية
هى اللى انا بروح اقعد عندها واقعد أاوأ وانهقاقصد اعيط براحتى
وكمان هى اللى بتشتريلى الشبشب
بس مش علشان رحتلها حافية
لا علشان تدينى بيه وفين يوجعك
لانى سيبت البيت
صحيح هى بتدينى على دماغى
وبتفرتك كل شباشب البيت على نفوخى
وبتقعد تدعى على اليوم اللى رجعتلها فيه
وبتقف فى صف احسان
بس برضه فى الاخر
بسمع كلمة خليكى طابقة على نفسى ومرزوعة
لحد ما يصالحك
ربنا يخليكى ليا يا وزيرة الشئون الاجتماعية

هى الست اللى لما بغلط مع حد او مع جوزى بتقعد تفهمنى وتوعينى
مش علشان مصلحتى
ابسوليوتلى
لا علشان مرجعلهاش تانى
لانها مبقاش عندها مكان
وماصدقت زاحتنى من البيت
وبتدعى للباقى انهم تجيلهم زوحة
ويغوروا ويحصلونى
وتقعد هى والحاج يشربوا شاى فى الفرندا

هى الست الا لما مبعرفش اعمل اكل

او اى حاجة حلوة بتصل بيها تقولى الطريقة على اساس انها برنامج المطبخ
وفى خدمة ما يطلبه الطفسين
وبتقعد تملينى فى التليفون الطريقة
لحد ما تدفعنى فاتورة تودى احسان فى داهية
وفى الاخر برضه بيطلع عك
ربنا يخليكى ليا يا ست الشيفات يا مامتى
بصراحة مش عارفة اودى جمايلك فين ولا فين
بس بجد ربنا يخليكى ليا يا ست الحبايب يارب
لانك الحب والحنان والعطاء والدعوة الحلوة
يارب تفضلى معايا كل سنة وماتفارقنيش ابدأ ربنا يحفظك ليا يارب ويجعلى فيكى الخير والبركة

***تهنئة خاصة لاجمل امهات التدوين***
كل سنة وانتى طيبة يا فاتيما يا ام يوسف وربنا يرجعهولك بالسلامة
كل سنة وانتى طيبة يا اجمل ام ماما امولة ياترى ولادك جابولك ايه؟؟
اوعى يكونوا ضحكوا عليكى فى الهدية
كل سنة وانتى طيبة يا خيخة يا ترى الواد العفريت شريف جابلك ايه؟؟
كل سنة وانتى طيبة يا اجمل قوس قزح فى الدنيا ولو انى مش عارفة انتى مختفية ليه وفين؟
كل سنة وانتى طيبة يا سحورة يا ترى حماتك الملاك هدتيها بايه دى غنية وبتحب الهدية
كل سنة وانتى طيبة يا دكتورة ستيتة حسب الله الحمش
يا ترى ولادك جابولك ايه ؟؟
اوعى يكونوا ضحكوا عليكى بسبورة
كل سنة وانتى طيبة يا صيدلانية طالعة نازلة
انا عارفة ان ولادك هما اللى قطعوا نفسك من الطلوع بس معلش استحمليهم

كل سنة وامى وطنطى الغالية وكل الامهات بخير وطيبين
وسمعنى اغنية ست الحبايب يا حبيبة

شفقــــــــــــــــة