عطل فني وااااااعر

بوست ضايع يا ولاد الحلال

ماحدش شاف تدوينة تايهة ؟

مش عارف الكلام جري وراح فين
بس على مين
وراه وراه وهنزله تاني

عيد ســـــــــــــــــواد سعــــــــــــــــــــــيد

كل سنة وانتم طيبين بمناسبة يوم رأس السنة
معلش بقى الرأس جت متاخرة قصدى التهنئة
اصل يوم راس السنة كان يوم عيد جوازى وقعدت فى اليوم ده اتنهد واسمع اغانى رومانسية زى حبيتك بالصيف حدفتك بالشلوت
واغانى عبده الحليم حافظ قولوله قولوله قولوله يجيب المصروف
وهكذا من الاغانى الرومانسية الجميلة
وقعدت افتكر ايام الخطوبة الجميلة الله لا يعودها كانت هايلة هايلة هايلة
وقعدت اشطح بتفكيرى المريع واتخيل مجرد تخيلات وكوابيس يقظة
ان سونة هيدخل عليا فى اليوم ده بوردة او هدية جميلة ولكن يا فرحة ما تمت سمعت رزع وخبط على الباب
وبصيت لقيت سونة بيرفس الباب برجله
قلت بشرة خير اظاهر ان اليوم ده يوم مبروك
وبصيت يمين وشمال لقيته عمال ينفخ وشكله كان متخانق مع حد
ومستنى اى دبانة تقف على وشه زيي كده
ويشلتلها قلت فى عقل بالى ابعده عنه الساعة دى
والساعة اللى بعدها ابقى تنحى وتبتى واسالى على الهودية
شوية ودخل سونة ينام رحت رايحة جرى وراه ورابطة رجله فى السرير واقعدت اهزر معاه واقوله فاكر يا حبيبى ايام الخطوبة ؟ لقيته بيرد بقرف خطوبة خطوبة مين ؟؟ وهى دى ايام الواحد يفتكرها ؟؟ دى ايام لازم تتمحى من الذاكرة وعندها لازم ساعة الزمن تقف
انا: اخص عليك يا سونة ايه الهزار البايخ ده
سونة: طيب ايه اللى فكرك بالسيرة الهباب دى ؟؟
حنيتى لايام العياط والنحنحة ؟؟
كده برضوا يا سونة يعنى النهاردة مابيفكرش باى حاجة ؟؟
ولا حاسس ان قلبك بيدق؟؟
سونة: اه حاسس انه بيدق من كتر طلوعى على السلالم
ايه ناقص تقوليلى حدث فى مثل هذا اليوم
انا: ايون برافو يا حبيبى ايه بقى اللى حدث ؟؟
سونة: هى فزورة؟؟ مش فاكر بس اكيد حصلت جريمة بشعة لن يغفرها لى الزمان
انا : بقى كده برضوا يا سونة طيب ما انت فاكر اهو
طيب قولى بقى كلام حلو
سونة: بسبوسة ....عجوة.... كيك
انا: ايه ده وانا بقولك اكل حلو هو كله على بطنك كده ايه الطفاسة دى؟؟
طيب بلاش كلام حلو اصله ممنوش فايدة.... طيب ايدك على الهودية الوذعية
سونة: هودية !هودية ايه؟؟ يا حياتى انتى اكبر مقلب ..اقصد اكبر هدية فى حياتى
نامى بقى وشدى اللحاف
انا : "بصوت غليظ" بقولك ايه يا راجل انت.. متزربنيش وتطلعلى زرازيرى هتقب بالهدية ولا افجرلك اللحاف؟؟
اه انا حشياه ديناميت بدل القطن
سونة:" بخوف" يا بنت المجنونة طيب بصى يا حبيبتى
ايه رايك نروح نسهر فى مكان فيه مزز وحاجات من اللى ترجع الواحد شباب؟؟
ولا اقولك نسافر اى مكان فيه بحر علشان اخلص منك؟؟
انا : ايه المقارنة الصعبة دى ؟؟ طيب سيبنى افكر... ايه يا شفشوقة مكان فيه مزز؟؟
لا يجوز لحسن الراجل يجوز عليا وتلهفه مزة طيب نسافر ونروح بحر؟؟
اه وليه لا؟؟
يمكن لما نسافر يغرق فى بحر حبى واخليه يغطس مايقبش تانى على وش المية
سونة يا حياتى خلاص انا فكرت هنسافر
وسافرنا الى اجمل واهدأ مكان فى العالم
بــــــــــــورسعـــــــــــــــــــــــيد
وصلنا الفندق وكلمتنا انوسة روح قلبى "نهر الحب "
وقالتلى انتم فين وحشتونى
لكن الود ودها تقولنا واحنا كنا ناقصين قرفكم
يعنى سايبين بلدكم وجاين تقرفونا فى بلدنا
بس بينى وبينكم انوسة... ونسمة اختها بيستحملولنا بالرغم من غلاستنا ورخامتنا معاهم
اصلنا على قلبهم زى العسل الاسود
جهزنا نفسنا ونزلنا نقابل انوسة "نهر الحب"
ونسمة اختها "هى فوضى"
ومحمد" اكيد بنحبها" بس هى مين معرفش
واخدونا انا وسونة واختى وقعدوا يفسحونا بس ايه احنا كسحناهم
لحد ما وقعوا مننا فى الارض وقعدوا يحبوا على ايدينا اننا نرحمهم ونعتقهم لوجه الله
واحنا نقول ابدا لازم يتوبوا منا ويحرموا يعرفونا
وكانوا نفسهم يقولولنا اياك تعتبوا البلد هنا تانى
واننا لو عرفنا انكم جايين هنقفل مخارج ومداخل بورسعيد والميناء كمان
ومش بعيد يبلغوا عنا
المهم اننا عفونا عنهم وروحوا وهما يكادوا يكونوا فى شبه غيبوبة
ولكن للاسف محرموش
وتانى يوم من 9 الصبح لقيناهم ادام الفندق
جايين ياخدونا وبيقولوا عزمينكم على ركوب لنش
طبعا اختى المبجلة رقعت بالصوت الحيانى
وقالت ابدا بوتيتا انتم جايبينى اموت هنا ولا ايه؟؟
يا على فرشتى يا بلاش وقعدت تغمزلى
وتقولى خلى بالك اظاهر احسان متفق معاهم عليكى
بينى وبينكم انا كمان فكرت وشكيت ان احسان متفق معاهم
على انهم يتخلصوا منا ويرموا جثثنا فى القناة
قلت لا مابيدهاش الواحد لازمن ياخد احتياطاته ويلبس زعانف وخوزة لزوم الغطس
لكن بصراحة انا ماليش فى العوم
فاخدتها من قصيرها وقعدت ابوظ موضوع اللنش ده
لحد ما زهقوا وصرفوا نظر عن الفكرة
وبعدها قلتلهم انا عايزة الف فى السوق واعمل شوبنج وشوحقن
واول ما سونة سمع كلمة "شو بنج" كاد ان يغمن عليه
وقعد يلف ويدور علشان يمنعنى من انى اروح السوق
وانا ابدا مفيش فايدة
وشوية لقيت انوسة ونسمة ومحمد واقفين فى صفه وعمالين يقنعونى بانى مروحش السوق
بينى وبينك شكيت فيهم اكتر وكل شوية يقولوا يلا علشان نروح جيانولا
قلت بس دول متفقين عليا
وشكلهم هيقتلونى هناك او مدبرينلى خطة محكمة
المهم انى مسكت فى خناق احسان
وقلتله يانا يا البيانولا وانت يعنى ناقص مزيكا ؟؟
طيب اعزفلك انا ده انا سيدة السيفونات اقصد السيمفونيات
وقعدت اخبط وادبدب فى الارض زى العيال الصغيرين
ماليش دعوة انا عايزة هدوم ..وشنط.. وجزم ..واكسسورات امال انا جاية ليه ولا عايز تاكل عليا الهدية؟؟
ولكن للاسف كل محاولاتى باءت بالفشل الزريع
وعملت زى القيصرى "حنفى " خلاص هتنزل المرة دى ورحت معاهم جيانولا
وانا على اخرى من احسان اللى هرب من الهدية وقال يا فكيك ولكن كانت المفاجعة
بصينا لقينا النور انطفى قلت يادى النولة بركاتنا حلت على المكان ولا ايه؟؟
ولكن شوية ولقينا اغنية هابى بيرث داى اشتغلت وتورتة وكلام رومانسى خسارة فى جتت احسان
والناس عمالة تبصلنا وتصقف زى بتوع السيما
وايناس ونسمة ومحمد وعبد الحميد بيقولولنا كل سنة وانتم طيبين
عيد جواز سعيد
بصراحة كانت اجمل مفاجاة ليا انا واحسان وانبسطنا جدا جدا
بلرغم زعلى على الهدية الا ان ربنا عوضنى
ولقيت ايناس ونسمة بيدونى لوحة فنية جميلة عملوها مخصوص لينا هما اللى رسموها وبيها بجد رسموا ابتسامتى انا واحسان
وقالولنا كل سنة وانتم طيبين دى هديتكم ولا الحوجة ليك يا سونة
لكن اطرف ما فى الموضوع ان نسمة باستنى وسلمت عليا
وقالتلى "عيد سواد سعيد " طبعا من غير ما تقصد
وقضينا يوم جميل ممتع
ورجعت وانا فى غاية الفرح والانبساط
وماسكة اللوحة متبتة عليها بايدى واسنانى خايفة لاحسان ياخدها يبيعها
"ملحوظة" بجد بجد ميرسى ليكى اوى اوى اوى يا انوسة بجد انتى روح قلبى من جوا وانتى يا نسمة بلرغم اننا لففناكى كعب داير لحد ما رجلك ورمت الا انك كنتى صبورة عموما المرة اللى جاية ابقى اجبلك شوز يستحمل مشى احسان بجد مش عارفة اقولك ايه انتى نور عينى واختى الصغنتوتة اللى بموت فيها ومحمد ابو عجيلة ميرسى ليك اوى اوى اوى ونعم الصاحب والصديق وانت كمان يا عبد الحميد يالى كنت بتهدى الفوس ميرسى الحمد لله النفوس اتشعللت بحسك بنحبكم مــــــــــــــــــــــــــــوت
وكل سنة وانت طيب يا سونة وعقبال 700 سنة

شفقة