الأربعاء، 25 مارس 2009

عريس يا بوى .... طخه بس متعوروش يا بوى... بركاتك يا حسين


هالو ايفرى بادى وشورت وفانلة وكاب ...... وحشتونى جدا جدا اوى خالص اياك وان .....اسمع حد بيقول لا انتى موحشتناش خالص .... سكتم بكتم

ده انا حتى سيبالكم احسان لحد ما شبعتم منه ولا ايه؟؟

انا بقى حبيت اكتب النهاردة البوست ده علشان اهديه لاعز الناس علينا بعد ما اتخطبت وان شاء الله تروح بيت العدل .....مش "العدل جروب" لا انا اقصد بيت الهنا والسعادة والسكر الزيادة

وعقبالكم كلكم جميعا نفر .....نفر لما تنفك عقدتكم "قولوا امين "ولو انها شكلها عقدة بشنيطة ومحدش يقولى يعنى ايه لانى معرفش


سيداتى انساتى عايزاكم النهاردة تطرطقوا ودانكم على الاخر

ان شاء الله اذا حد فيكم اتفكت عقدته واتخطب

فاليكن بعض من النصائح اللى بأذن الله هتوديكم فى داهية

عايزاكى اول ايام الخطوبة لازمن .....ولابندق

انك تاخدى بالك من تصرفاتك كويس بدل ما العريس يطفش

من اولها بعد ما جه بطلوع الروح .....والدعاء فى الصلاة .... وزيارة اولياء الله الصالحين

والدوخة عند المشايخ ...والكلام ده كله

يعنى تحافظى عليه لاخر نقطة فى دمك وتذكرى جيدا

انه محدش بياكلها بالساهل..... ده المثل الوحيد اللى يفضل حلقة فى ودنك

فردة واحدة مش فردتين


اول ما تعرفى ان العريس قادم وجاى يزوركم بعد الخطوبة

علطول من غير كلام تروحى تنضفى وتلمى النعكشة والكمبوشة

اللى عملاهم فى دماغك وتحاولى تسرحيه كده وتسشوريه او تولعى فيه

الاتنين واحد ده اذا كنت من ذوات الشعر ابوسلك مواعين


اما اذا كنتى من ذوات الشعور الناعمة الملساء

فانصحك بانك تخبيه من عين العريس وامه لانه بعد الجواز مش هيفضل منه ولا شعره وبالتاكيد هتركبى باروكة ده من كتر حرقة الدم والعلق اللى هتاخديها فالاحسن والافضل انك تلبسى ايشارب وتداريه

- نيجى للميك اب والميك ام عايزين مكياج بنانيتى

يا ست الكتكوتة " على راى اللمبك"

يعنى حاجات كده على خفيف بلاش سايبس وتريكس والبلاك اللى بتهببى بيه عينك

خليكى على طبيعتك ميك أب رقيق

كده كده الراجل هيشوفك بعد الجوازمن غيره وبالتاكيد هيتفزع ومش بعيد يغمن عليه من اول طلة

فعلشان نتفادى الصدامات والذى منه نؤهله من بدايتها


واهم من ده كله البرفانات واختراع الروايح والحاجات الحلوة دى

وتسيبك بقى من فرم التوم وريحة البصل والموغات

كده كده ايامهم جاية جاية غصب عنك او برضاكى


اللبس عايزين احترام واحتشام وادب يعنى بلاش محزق وملزق وبلبانة

علشان ميقولش من اولها سايبة ومفيش حد يلمها

وابقى بعد الجواز طلعى عينه والبسى كل اللى نفسك فيك

اهو هيكون ادبس وخلاص ولو ان ابقى قابلينى

لو عتبتى بالهدوم دى بره عتبة باب البيت

ولو عتبتى هتلاقى الباب فوق نفوخك عدل

امال..... ساعتها هيكون زمن الدلع والعياءة ولى وراح

وأتى زمن الجلاليب ام سفرة وكم بكرانيش


المهم لبسنا واستحمينا وحطينا ميكب واتريحنا وبقينا تمام

نقعد بقى نستنى الفرج لحد ما العريس يجى يرزع على الباب

لا استنى .... مش من اولها لهفة وقلبنا يهفهف زى الغسيل المنشور

ونروج جرى رهوان على الباب.... لا ساعتها تفتكرى ان التقل صنعة

تهمدى كده ونقعد مكانا وتخلى حد من اخواتك يفتح الباب ويستقبله

وتنبهى عليهم خاصة لو كانوا صغيرين مش اول ما يشوفوا

علبة الشيكولاته يخطفوها ويسيبوه ملطوع على الباب

علشان الراجل مايقولش محرومين وطفسين ويحس انه مناسب مجاعة افريقيا

تسيبه كده يجى نص ساعة قاعد مع بابا ياكل دماغه شوية من الرغى

وبعدها تخرجى من الاوضة علشان هيكون الراجل فرفر خلاص وبيقول انقذونى

اول ما تشوفيه عايزين اتنين كيلو صلصة طماطم على وشنا من الكسوف والخجل

والكلام ده والعينين فى الارض لحد ما تحسى بالحول


قال يعنى محرجة وفى نص هدومك وكأنك اول مرة تشوفى الكائنات دى "اللي هما الرجالة "


بعدها نستنى جملة سلمى على خطيبك وتمدى ايدك بالطراطيف وتسلمى

وبكل رقة اهلا ازى حدرتك ايون حدرتك وختيبى وتنت وكده

مش حضرتك وخطيبى وطنط ابعدى عن حرف الطاء خالص لانه بيكلكع البق

وأول ما الراجل ربنا يفتح عليه
لا مش يقرا سورتين
اقصد يفتح عليه
فى الكلام
نسمع كوي
س ونرد بأدب
ومش عايزين ايه... ونعم و
طرش وضعف سمع من اولها
خلى الاعاقة دى لبعدين كله جاى بعد كده ماتستعجليش وتفتكريها بمبى

والضحكة اهم حاجة الضحكة تكون بسيطة يادوبك فتح الخدين وضم الشفاتين

بلاش الضحكة ام سنان دى علشان الطقم ما يبانش

وياخد باله من الحشو والتركيب والتسويس


يعنى عايزين "يابو ضحكة جنان " "مش يابو ضحكة سنان"

كمان تبقى مركزة اوى مع ماما اول ما

تغمز بعينيها يعنى امشى انجعرى على المطبخ

تروحى على المطبخ رهوان

وتمشى بسرعة 3 حصان

بس من غير رفس

وتحسسيه انك كلك نشاط وحيوية مش حيوانية

وتروح تقدمى المشروبات بكل شياكة وخلى بالك من الدلق

وخاصة العصاير على البنطلونات علشان التلزيق والنمل

واول ما يبقى فيه كلام على الطبخ والمواعين وتقشير البصل

مش عايزين نتأفف من اولها ونشوح بايدينا

عارفين انها حاجات تزهق بس ما باليد حيلة

لازم تبينى انك ست بيت شاطرة وياريت لو تحفظيلك كام وصفة كده

من كتاب ابلة حظيرة وتقوليهم ادامه

علشان قلبه يطمئن انه واخد ست البنات مخترعات الهبابات وعك البطون وعمل الشلنكبات


معلش تعالى على نفسك فى الخطوبة بس وبعد الجواز

ابقى تنبلى براحتك واضربيهاله صرمة قديمة

ويبقى يقابلنى لو شاف شغل بيت

المهيه من جيبه لايد الشغالة عدل

وابقى اتحججى بضوافرك

والباديكير والمانيكير ... واوه باباه .....اوه ماماه....فينك يا تيزة وكده يعنى


لكن بالله عليكى اذا كنتى عايزة تكلبشى

فى الراجل بايدك ورجلك

وتاخديه الى قفص النسانيس والقرود


اقصد الزوجيه لازم تتبعى هذه الخطوات

اللى كل خطوه منها تودى على سكة جنينة الحيوانات

واللى يروح مايرجعش

واسأل مخرب



شفقـــــــــــــة


الاثنين، 16 مارس 2009

بور سعيـــــــــــــد ..... إحنـــــــــا أســـعـد


إيه بورسعيد دي ؟؟؟

ومين سعيد ده إللي سماها على إسمه ؟؟؟

وإيه سر الجمال في البلد دي رغم صغر مساحتها ؟؟؟

وليه كل ما أروح هناك ألاقي البلد دي فيها خير مابينتهيش ؟؟؟

جايز يكون ده ليه علاقة بكفاح البلد دي أيام الإحتلال والعدوان الثلاثي ؟؟؟

يمكن يكون ده رزق أهالي الشهداء اللي ضحوا بأرواحهم علشان البلد دي تفضل حرة ؟؟؟

ولا جايز يكون ده بمجهود رجالة صورهم النهاردة بقت في كل مكان زي "الحاج/سيد متولي" الله يرحمه ؟؟؟


أيا كانت الأسباب
مش مهم
المهم إننا بنتكلم عن مدينة مصرية ساحلية صغيرة
جميـــــلة وكلهـــا بــــركــــة

وركزوا معايا على الكلمة دي
بــــركـــــة

أيوة كلها بركة
وهأقولكوا ليه



* في سابقة غريبة من نوعها .. ولأول مرة من حجشتاشر سنة .. خرجت أنا وقدري الأزلي (شفشوقة طبعا) في رحلة لمدة 3 أيام .. الخميس والجمعة والسبت .. ولسة راجعين أول إمبارح
إحنا كنا حاجزين شاليه غرفتين في إحدى القرى السياحية هناك .. ولما رحنا إتفاجئنا بإنهم بيسلمونا شاليه 3 غرف وبنفس السعر .. وده لإن الشاليهات الغرفتين فيها صيانة ( آدي أول بركة )
طبعا شفقة ماصدقت وراحت مخلصة كارتين موبايل على إخواتها وقرايبها وأصحابنا تعزمهم
يقضوا معانا يومين .. والجميل إن ماحدش عبرنا .. والأجمل إننا قضينا التلات ايام دول كل يوم في أوضة .. جنان بعيد عنكم.


* عند المغادرة وأنا بأسلم مفتاح الشاليه في الريسيبشن الموظفة بصت للمفتاح بإستغراب وكأنه مش بتاعهم وطلبت مننا نستنى دقيقة واحدة .. طبعا سمعت الكلام بدون تردد ( أصلها كانت حلوة أوي )
رغم تأفف شفشوقتي العزيزة .. اللي قعدت تسخن فيا وتقولي كده هنتأخر وأنا لسة هأمر على المحلات أشتري ماعرف إيه وأرجع مادرك إيه .. وأنا مش مديها ودني خالص .. مانا فاهمها .. هوا ده حالها كل ما أتكلم مع واحدة .. وبالذات لو حلوة يبقى يومنا هباب .
ماكملناش دقيقتين وخرجت الموظفة بتعتذر عن غلطة في الحساب هي إننا دفعنا إيجار شاليه مميز واللي نزلنا فيه كان عادي .. وقدمت ظرف فيه فرق الفلوس .. أحلفلكم بكل أيمانات الدنيا إني مالحقتش أفتح الظرف ولا ألمسه حتى .. يادوب بالكتير شفته وهوا بيتخطف بإيد نفس الشفشوقة اللي كانت معترضة على إنتظارنا لتلك الموظفة الجميلة والأمينة .


* البركة التالتة في الأكل
ساندوتش الشاورما كله لحمة ( مش بصل وطماطم ) .
رغيف الفينو طول بعرض وبـربع جنيه .
وجبة كنتاكي العائلية كلها قطع كبيرة ( مافيهاش ولا جناح ) .
علب الأرز باللبن والمهلبية والكاسترد قد علب الكشري عندنا .
والفظيعة بجد كانت علبة زبادي جهينة ، أظن كلنا عارفينها ، بس هناك جهينة واخدة هرمونات مش طبيعية .. عموما أنا نزلتلكوا صورهم وإنتوا أحكموا .
بصراحة أنا كنت خايف آكل منها لأعمل زي
"لهيطة" في الفيلم بتاع "أنكل زيزو" .. آه والواحد مش ناقص .


* البركة الرابعة في اللبس
غير إن فيها المصري والمستورد أسعاره معقولة بس مش ده اللي لفت نظري .. أنا اللي عجبني إني لقيت مقاسي بسهولة .. وأنا بأدوخ عليه هنا .
مش كده وبس لأ ده أنا لقيت هدوم تلبس هركليز بيه شخصيا .


* البركة الخامسة في المواصلات
البلد الوحيدة اللي ماشفتش فيها أوتوبيس نقل عام ولا حتى ميني باص شركات خاصة .. مافيش إ
ختيارات .. يا تاكسي يا ميكروباظ .
والبلد الوحيدة اللي تركب فيها تاكسي عربيات حديثة وشكلها يفرح .. يمشي بيك من أول البلد لآخرها وتدفع
إتنين جنيه ونص بس .
والبلد الوحيدة اللي تلاقي العربيات واقفة في الإشارة لو حمرا .. يعني ماعندهمش عمى ألوان ومن غير مايكون فيه عسكري واقف .
والبلد الوحيدة اللي فيها وسيلة مواصلات ببلاش .. أيوة ببلاش .. في زمن مابقاش فيه حاجة ببلاش .. بس هناك لقيتها .. المعدِية .


* البركة السادسة في الموقع الإستراتيجي
موقع البلد دي تحسدها عليه كل دول العالم .. يمثل أهمية تجارية إقتصادية عسكرية .. حيث
يتقاطع البحر مع أشهر مجرى مائي في العالم "قناة السويس" .. واللي منها صورتلكم الباخرة الروعة دي.


* البركة السابعة في الطبيعة
كمية طيور النورس اللي شفتها هناك مش ممكنة بجد .. منظر أكتر من رائع .



ده إيه الجمال اللي حوالينا ده وإحنا مش داريين ؟؟

تفتكروا بلدنا جميلة بس إحنا اللي شايفينها غير كده ؟؟
ولا إحنا مابقيناش عارفين ولا فاضيين نشوفها أساسا ؟؟
أصلي لاحظت وأنا بأصور إن الناس بتبصلي بصة مش تمام
وكإنهم بيقولوا إيه العبيط اللي بيصور السما ده

أظن إن الناس بقت رايحة جاية مهمومة وماحدش فينا بقى بيستمتع أو بيتذوق الجمال
مع إنه موجود حوالينا في أي بلد وفي كل مكان

يمكن يكون ده مش ذنبهم
والذنب ذنب اللي منكد عليهم وعلى أهلهم

بس برضو ماتبقاش الحكاية نكد وهم وغم من كله
ياريت كلنا نبص حوالينا ونشوف بلدنا بعين جديدة
علشان نقدر نشوف جمالها ونستمتع بيه



كان معكم من بورسعيد
مراسلكم/ إحســان أبو العربي