السبت، 24 يناير 2009

الجـــــــــــواز وسنينه...ادى اللى واخدينه



بجد بجد المرة دى انتم وحشتونا فعلا بس معلش اعذرونا كنا مشغولين جدا ........وكمان موضوع غزة والجرحى الفلسطينيين كان عاملنا قلق واكتئاب شويتين
وكنت انا واحسان عمالين نلف على المستشفيات .. زى الشحاتين

وكالعادة بنمارس هوايتنا فى لم معونة الشتاء....... والناس كتر الف خيرهم كانوا بيدونا اللى معاهم لدرجة انهم باسوا ايدينا

منرحلوهمش تانى علشان صعبنا عليهم ....... وهما مش ناقصينا كفاية اللى هما فيه
احنا قلنا خلاص كفاية كده ونعتقهم بقى لوجه الله...... ويا بخت من زار وخفف
وان شاء الله احسان سيوافيكم لاحقا بكل اخبار المستشفى والغلة اللى لميناها بس من غير قر


لكن النهاردة بقى قلت احكيلكم على بعض من المواقف ..........اللى حصلتلى اول ما اتكلبشت بسى احسان افندى بيه


طبعا الواحدة اول ما بتتجوز بتكون لسه عروسة ننوسة
بنوتة كده مدلعة وايديها ناعمة
ولسه متعرفش يعنى ايه جواز... ولا شغل بيت... ولا مسئولية ... ولا اى حاجة من شغل الخدامات ده خالص

( وبعد ما بتتجوز يا عينى )


شوية تلاقى المطبخ... وشوية تلاقى مسح ...وغسيل ...ومواعين ...وهدة حيل
يعنى من الاخر بتاخد على قفاها ..... فبتفوق كده وتصحصح وتبقى فريش
وتعرف انها كانت مطلعة عين مامتها وباباها وقاعدة حاطه رجل على رجل ولا هى هنا
المهم ان الواحدة لما بتفتكر بتقعد تترحم على الايام الخوالى



والآن..... اليكم بعض من المصايب ...والكوارث...اللى عملتها فى "سى احسان " من اول يوم جواز

المصيبة رقم (1)

انا بقى كنت عاملة عروسة وكده وكنت بحاول - اى والنعمة - احاول جاهدة انى اعمل اى حاجة فى البيت ...علشان يقول عليا شاطرة وست بيت تمام
اولها كنت اعمل عصير يكفى مصر والدول الشقيقة والمجاورة كلها
واحطه فى التلاجة على اساس ان... احسان حوت والعصير ده كله بالنسبة له كلام فاضى
وكنت اقول يلا علشان معملش كل يوم وهو يعنى هيجراله ايه
؟؟
وكنت استنى يجى حداشتاشر يوم كده واروح اقول لاحسان وانا برقق صوتى زى الضفدعة.
انا : اجيبلك يا حبيبى العصير اللى فى التلاجة تشربه؟

هو كان يزغرلى بعينيه ويقولى عصير هو فين العصير ده يا امى ؟؟
ده بقى مخلل وحمض وعفن وريحته طلعت
....انتى فكرانى البلاعة اللى بيدلقوا فيها بواقى الاكل
طيب اعزمى على بحاجة عدلة مش عفنت وماتت من شهور

انا : لا يا حبى على فكرة هى لسه ما ماتتش والا كنت دفنتها

هو : يا مثبت العقل فى الراس يارب

*****

المصيبة رقم (2)

قلت طيب اطلع الموهبة المدفونة ... واعمله اكل
بقى وفراخ وكلام من ده
رحت اشتريت فرخة وخليتها تلبس المايوه وخدت غطس فى الحلة وبعدين طلعتها
نشفتلها علشان متخدش برد ... وحطيتها فى الشواية بتاعت الفرن لكن للاسف طلعت فار مسلوخ
واول ما شافها احسان اتخض
وقالى ....ايه ده انتى خدتى من تحت الحوض يا لينا ..ايه دى ؟؟
انا: فراخ يا حياتى... فرخة حبنا.. كاك كاك
هو بصلى وبص للفرخة وقال... هى تقريبا كانت فرخة بس شكلها اتحولت لكائن غريب
انتى عملتيها ازاى يا روحى جتك قصف روحك.. وحش رقبتك

عادى انا سلقتها شوية وخليتها تبلبط فى الميه
علشان شكلها كان مش عاجبنى... والناس اللى اشترتها من عندهم ما كانوش بيحموها
وبعدين دخلتها شواية الفرن .... وغزتها بالسيخ المحمى فى صرصور ودنها
وكل دقيقة كنت بفتح الفرن الاقيها واقفة مكانها مش بتلف.... ولما زهقت قعدت الفها بايدى لحد ما بقت كده ... ايه مش حلوة؟؟

هو : بتلفى السيخ يا ماما ده بيلف لوحده..... وبعدين السيخ فيه ماسكتين بيتقفلوا عليها وتلف لوحدها
ايه اللى هببتيه ده؟؟ يا فلوسي وجيبى اللى اتخرب

انا : يا حبيبى وانا اقفل عليها ليه وهى كانت هتهرب ؟؟ انا طيبين ....مش زى الناس الشريرين اللى كانت عندهم وحابسينها فى القفص
هو : يا دماغى .. هتموتينى .. مش مهم الفرخة... فين الشوربة بقى ؟؟
انا : شوربة ..!ودى بتتعمل ازاى؟؟ انا معرفش
هو : يا خرابى الشوربة ..الميه اللى سلقتى فيها الفرخة ... الشوربة السخنة الملهلطة دى؟؟
انا : اه انت تقصد الميه اللى الفرخة خدت فيها غطس
اه بس انا رميتها... لقيتها مش حلوة وريحتها تقرف فدلقتها .. هو انت كنت عايز منها حاجة؟؟

هو : يا مصبرنى يارب



*****

الموسيبة رقم (3)

يومين كده ....ودخل احسان على المطبخ متسللا ولا الظابط اللى داخل يقفش حرامى من قفاه
وكنت واقفة بغسل المواعين... وانا عمالة اغنى وفجاه دخل احسان خضنى ووقف متنح

هو: فين الحلل التيفال يا هانم؟؟
انا :" تى فال "... انا مش بعرف الا ..." تى شاى "
هو : انتى هتهرجى معايا ولا ايه؟؟
انا اقصد الحلل اللى قعرها اسود دى ...اللى الحاجة مش بتلزق فيها
عملتى فيها ايه؟؟ انا مش شايف ولا حلة واحدة ...احنا كان عندنا طقم بحاله

انا : اه طيب ما انا غسلتها يا حبيبى ....ودعكتها اوى بسلكة المواعين لحد ما خليتها بتبرق من اللمعان... حتى شوف مرايه
هو : بيعيط.. ايه غسلتيها .. غسلتى الحلل التيفال بالسلكة يا مفترية ؟؟
دى بقت حلل المونيوم... منك لله ..
الماذون .. ودونى للماذون
انا : ايه انت زعلان علشان انا نضيفة ومش بسيب الحاجة وسخة وخلتها زى الفل ؟؟
وبعدين وهو الاكل هيلزق فى الحلل ليه هى الحلل فيها لبانة ؟؟

هو : حسبى الله ونعم الوكيل


*****


النصيبة رقم (4)

فى يوم صحى من النوم مفزوع ....وانا عمالة اصرخ وبجرى عليه
انا : الحق ...الحق الغسالة ... بتزمر وهتقع وهتوقع البيت

هو : ايه فى ايه ؟؟ ايه الصوت ده ؟؟ رعبتينى ... وقلقتى منامى ...الهى تقع على رقبتك تكسرها
انا : مش عارفة انا حطيت الهدوم علشان تتغسل ولقيتها بتجرى من مكانها وبتزمر
هو : اقول عليكى ايه ؟؟ كل ده غسيل حاطاه فيها ؟؟
دى بتشيل خمسة كيلو ....مش 150 اخ يا نارى منك ...اعمل فيكى ايه؟؟ فزعتينى

انا : هاتلى غسالة اكبر بتشيل كتير... لحسن دى اظاهر ان ايدها بتوجعها وبتصوت لما الغسيل بيتقل
شكلها غسالة صحتها على ادها

هو : ماحدش يحوشنى ...ما حدش يمسكنى هموتها .. طراخ


*****


النوصيبة رقم (5)


يوم تانى لقيته واقف ادام باب الدولاب ....ومتنح ووشه اصفر ومبيتكلمش

انا : سونة مالك انت لقيت عفريت فى الدولاب ولا ايه؟؟مالك متسمر مكانك كده ليه؟؟
هو : ايه ده هدومى كلها بقت ملونة كده ليه كل حتة ميت لون ؟؟انا بشتغل فى مكتب ولا بلياتشو فى سيرك؟؟
انا : ايه يا حبيبى مهدومك نضيفة وزى الفل اهى وريحتها برفيوم واخر دلع
انا بس لقيتهم وسخين فخدتهم نقعتهم تلاتة ايام ....وحطيت عليهم كلور

هو : يا مصيبتى يا هدومى يا عشرة عمرى كله... كلور يا شحتفة قلبى
طيب وهدومى وقمصانى حبايبى البيض اللى مابقاش حيلتى غيرهم... هما فين؟؟
اوعى تقولى نقعتيهم في جاز ولا حطيتى عليهم شوية زفت ومازوت... ما انتى مهفوفة وتعمليها؟؟

انا : ليه وانت شايفنى عبيطة ولا هبلة؟؟
انا اصلى لقيتهم وسخين ووحشين ... وقعدت اغسلهم لحد لما تعبت ... والاخر اتقطعوا منى ودابو فعملتهم فوط للمطبخ
مش مهم ابقى هات غيرهم

هو : يا خرابى يا هدومى اعمل ايه انا دلوقتى؟؟
اروح الشغل بلبوص ...ولا انزل بالطقم الداخلى ؟؟ منك لله يا شيخة والله لخلى ليلتك بمبى زى لون الهدوم
انا : ايه يا حبيبى بمبى ايه وبتاع ايه ؟؟ الربيع لسه مجاش
هو : الحقونى يا هوو قبل ما ارتكب جناية واروح ابو زعبل


*****


الكارثة رقم (6)


يوم دخلت لقيته مبهدل اوضة المكتب وجايب عاليها واطيها وعمال يكلم نفسه زى المجانين .....ويرمى ورق شمال ودفاتر يمين

انا : ايه يا حياتى انت بتعمل ايه ؟؟ انا لسه مروقه حرام عليك
هو : اه يبقى انتى مفيش غيرك
انا : طبعا يا حياتى وهو فى حد فى حياتك غيرى؟؟
هو : لا اعتقد بعد النهاردة هيبقى فيه حديات مش واحدة بس ... قوليلى فين الشيكات اللى كانت هنا على المكتب ؟؟
انا :" شي كات" احنا مربين كلب " هي دوج "يا حبيبى مش كات
هو : ياربى دماغى الضغط .. السكر .. شلل الرعاش
انا اقصد الورقة بتاعة البنك اللى مكتوب فيها فلوس بالالافات كانت هنا ... راحت فين؟؟

انا : يمكن راحت البنك لوحدها
هو : ههبدك بحاجة على نفوخك ... انطقى فين الورق والشيكات ؟؟
هأموتك .. واتسجن فيكي .. واطلع فى خلف الاسوار مع المجرمين

انا : اه... افتكرت انا لقيت الدنيا مكركبة فقلت اروق ورميتهم فى الزبالة روح دور بقى
هو : هاقتلك وهطلع فى خلف البيبان والشبابيك .. الزبالة يا مفترية ؟؟
انا : يلا ده انت حظك حلو انى لسه مطلعتهاش للزبال ... اجرى دور بقى
هو : اخ يا عالم يا هوو... حد يخدها من ادامى
انا : ايه يا روحى كل ده علشان قلتلك دور فى الزبالة
معلش لو زعلان علشان ايديك هتتوسخ.... ابقى اغسلها وحط برفان مفيش مشكلة

هو : لا سيبونى عليها بقى


*****


الجنحة رقم (7)

فى يوم واقفة بكوى الهدوم.... فشم ريحة شياط

هو : الريحة دى من عند الجيران ولا ايه ... البيت شكله بيولع بينا وهخلص منك بقى
انا : اهىء... اهىء لا.... بس وانا بكوى هدومك يا سونة
لقيت المكوة لزقت وطمعت فى حتة من القميص .. فسيبتهالها لحسن عينيها تكون فيها

هو : ايه.. هدومى اتحرقت يا لهوى يا امه... تعالى شوفى هدوم ابنك
القادرة المفترية حرقتلى هدومى... اروح فين يا ناس
؟؟
انا : ما تروح مطرح ما انت عايز ...ومال طنط ومالنا دلوقتى؟؟ زمانها نامت وبتاكل رز مع الملايكة
وبعدين لو زعلان على الهدوم مش مهم ... الموضة السنة دى المقطع والمشرشب
يلا يا سيدى بقيت على الموضة ادعيلى بقى

هو : "بيعيط" ربنا يشيل ويحط عليك انه سميع ..عليم ..مجيب

*****


الجناية رقم (8)


سونة كان راجع من الشغل.... واول ما فتحت الباب

هو : ايه ريحة الحريقة دى فى حاجة بتولع ... وشايف الجيران خارجة تجرى من بيوتها
ومالك مسودة ووشك مهبب كده ليه؟؟

اوعى تكون بتكوى تانى .. وناوية تخلصى على بقية هدومى؟؟
انا : لا يا روحى انا بس كنت عملالك مفاجاه وباظت
هو : مفاجأه... يبقى استر يارب
انا : لا بس اصلى كنت عايزة اشوى لحمة على الفحم ... كنت عايزة اعملك باربكيو
وولعت الفحم مرضيش يولع ... رحت بذكائى الخارق جبت شوية بنزين ودلقتهم عليه فولعت فى البلكونة والشواية واللحمة
اهى ...اه... اه

هو : يا نهارك اسود... ولعتى الفحم بالبنزين؟؟
اخ.... يا نفوخى اللى ولع ...رشوا على ميه رأسى ولعت من ذكائها الخارق
انا : لا يا حبيبى متخافش مراتك شاطرة بردوا
وبذكائى الخارق طفيته بطفاية الحريق بتاعة العربية ... شفت انا شاطرة ازاى
؟؟
هو : ذكائك تانى؟؟ اه ابقى شميت مش شفت .... ربنا يخدك ويريحنى


*****


الجريمة رقم (9)

هو : الحقونى الحقونى انا اتكهربت الشقة مكهربة والبيت كله بيلمس ياهوو

انا : لا يا حبيبى متخافش شوية وهتروح انا اصلى كنت بغسل الحيطة بسلكة المواعين
وقلت اما اغسل الفيش كمان ....اصلهم كانوا مبقعين مطرح صوابعنا

هو : ايه غسلتى الحيطة بالسلكة والصابون وكمان الفيش ؟؟
طيب اما اموت بقى ... واعدلونى على القبلة

انا : سونة يا روحى ما تخافش .. وانت ليه تمسك الفيشة وهى مبلولة ؟؟
عموما متخافش ...مش هتتكهرب بس انت البس شبشب فى رجلك ... او لما تتكهرب ابقى امسك الخشب

هو : انا همسك الخشب اكسره على نفوخه انتى يا مجنونة يا خريجة السرايا الصفرا
انا : لا يا حبيبى انت نسيت ولا ايه؟؟ انا خريجة جامعة عين شمس مش السرايا
دى اكيد شهادة تانية مش بتاعتى
هو : طراخ ....طراخ

*****


البلوة العاشرة

هو : افتحى السخان يا شفقة ....علشان ادخل اخد شاور

انا : عينيى يا حياتى ... حمام العافية
هو : اه.. اه ..اه الحقونى انقذونى ..جلدى اتحرق .. وشى اتسلخ... كلى اتشويت
انا : فى ايه مالك بتزعق ليه وعامل غاغة؟؟
هو : انتى مش شايفة الدخان ؟؟ الميه نزلت سخنة نار حرقتنى .. الحقينى بمرهم الحروق
منك لله فتحتى الميه السخنة.. والباردة لا
اشوف فيكى يوم يا شفقة ...اشوف فيكى يوم

انا : تحب تشوف اى يوم يا حبيبى وانا اوريهولك؟؟
بعدين يا حبيبى انا حبيت اعملك سونة وبخار وجو شاعرى... زى مراكز التجميل
الحق عليا يعنى عايزاك تبقى سمباتيك وتصغر عشرين سنة ؟؟

هو : حرام عليكى يا شيخة ... ده انا شعرى ابيض من الخضة وزدت ميتين سنة وهبقى زى الفراعنة ... هيحنطونى
اشوف فيكى يوم احمر مخضر يا شيخة..
انا كشفت راسى... ودعيت عليكى بعدد شعر صدرى اللهم امين



انا : يووووووووووووه ايه الراجل الفافى ده اللى مش مستحمل ميه بتسلخ وتقشر الجلد؟؟

بس حاجة تقرف ......عيشة تزهق

والله الحق على .....انى اتجوزتك اصلا
اهىء اااااااه .. اهىء ااااااااه .....الحقينى يا مامى ...تعالى خدينى يا مامى ...انا بعيط يا مامى ... بليز هلب مى مامى بليز
اهىء... اهىء ...اهىء


المعذبة / شفـقـــة

الجمعة، 23 يناير 2009

زيارة مستشفى فلسطين

يوم الجمعة ان شاء الله معادنا للتجمع لزيارة المرضى الفلسطينين فى مستشفى فلسطين

الحالات فى المستشفى كالاتى

الرعاية المركزة حالتين منهم حالة حدث لها بتر للساقين

الدور الاول حالة واحدة مصاب بطلق نارى من دبابة و تم اجراء عملتين له فى الركبة و قاموا بتركيب شريحة و بلاتين و الحالة الحمدلله فى تحسن

الدور التانى يوجد به جناحين

الجناح الاول : يوجد به 11 حالة ما بين استئصال طحال و كلي و حروق و فقد عيون

الجناح الثاني : يوجد به 15 حالة من بينهم سيدة كما يوجد به عائلة عصفور - المصاب بمستشفى الاسماعيلية الذى طلب من المدونة آبى زيارة اهله بمستشفى فلسطين - من ضمنهم طفل صغير عمره 10 سنوات و حالته الصحية حرجة

الدور الثالت يوجد به جناحين

الجناح الاول : يوجد به طفلين

الجناح التانى : يوجد به 14 حالة

الجميع طبعا يشعر باحباط و خذلان عالمي و ان لا احد يعوضهم عن الكارثة الانسانية التي يعيشونها

الرعاية الطبية و التمريض و الاكل مستواهم جيد و الحمدلله

هم لا يريدون اشياء عينية و ان ارادوا فهم لا يمتلكون شنط سفر لوضع اغراضهم بها

فمن يريد التبرع عليه ان يتبرع بشنط سفر الي جانب المال فهو افضل شئ

فكل شخص ادري بما يحتاجه حتي يعود لعائلته به و لكن يجب مراعاة انهم يملكون عزة نفس رهيبة

التجمع يوم الجمعه 23/1/2009 قدام المستشفى الساعه 3 بعد الضهر

المستشفى عنوانها : 64 شارع الثورة فى مصر الجديدة

شفقة واحسان

الخميس، 15 يناير 2009

زيارة الجرحى الفلسطنين

موعدنا يوم الجمعة إن شاء الله
هنتقابل فى الاسماعيلية
يوم الجمعه 16 يناير 2009
الساعه 11 ظهرا
امام الباب الرئيسى للمستشفى الجامعى
عدد الجرحى فى الاسماعيلية 19 حالة
بعد ان توفيت شابه هذا الصباح
منهم سيدة تبلغ من العمر 58 عام
وشابة فى العناية المركزة عندها 17 سنة
والباقى رجال من سن 17 عام الى الاربيعنيات
ومازالت المستشفى تستقبل المزيد
محتاجين تبرعات مالية
وبعض الملابس

للاستفسار على اى شىء
يروح مدونة اوتار.... صاحبة الدعوة ايناس
شفقة واحسان

الاثنين، 5 يناير 2009

استيقـــــــــظوا



انا اتغظت اوى اوى من احسان وبوسته الاخير ...بصراحة الراجل شارك وعمل الواجب وزيادة وقعد يجمع ويلم فى الرؤوس
انا بقى قلت لازم اكتب حاجة واشارك الناس دى واحس بهمومهم وآلامهم
واشوف اللى بيحصل فى الدنيا وبيجرى من حوالينا
يمكن نفيق من غفلتنا وسباتنا العميق......بس علشان نشارك لازم نترابط ونتماسك ونحط ايدينا فى ايد بعض
عموما لو حد طلع اخطاء نحوية ولا لغوية فهى مقصودة علشان نشغل ماما امولة معانا شوية
بس علشان خاطرى يا ماما امولة لو لقيتى حاجة كده ولا كده
تسترى عليا الله يخليكى


لقد اجبرنى قلمى ان اكتب .......لتكون مشاركة وجدانيةمع اهل غزة وفلسطين

ارى واشاهد فى كل مكان من هم يحاربون

انظر فارى من يقاتلون ويستشهدون

طفل برىء رجل كبير امرأه ومغتصبون

لا حول ولا قوة الا بالله العلى العظيم

اسأل .............ويا ليتكم تجيبون

ترى الى اين نحن ذاهبون

ماذا حدث لنا هل ماتت قلوبنا؟؟

هل سنضحك كثيرا ونتناسى همومنا واحزاننا؟؟

هل سنترك المعتادين والقتلة المغتصبون؟؟

هل نتركهم يسيرون فى الارض ويعبثون؟؟

هل نتركهم يدخلون ديارنا ويقتحمون حرماتنا؟؟

هل نتركهم يمشون فى الارض مختالين فخورين؟؟

نتركهم يدوسون علينا باقدامهم ويسفكون دمائنا ونحن مجرد

مستمعين ومنصتين ومشاهدين عابرين

والله سنسال يوم العرض العظيم

اين التشبث بالعقيدة والدين ؟؟

نتحدث كل يوم ونكتب غير مكترثين

اشعارا عن الحب والغرام وسهد الجفون

ولا ننظر بعين رأفة ولا نكتب عن من هم يتعذبون

ومن هم جوعى وعرايا متعبون مشردون

وكل يوم يموتون بالمئات والالاف وفى سبيل الله يستشهدون

وتقتل فرحتهم وبالاكفان هم يزفون

سنظل هكذا دائما بلا حراك عاجزون صامتون

اسنظل هكذا مثل الجماد لا ينطق لا يفعل.... الا تتحركون؟؟

اين النخوة واين الضمير؟؟

اين حاملى لواء الدين؟؟

متى سنفيق من سباتنا العميق؟؟

لابد ان نشعر بهم ونتحد كلنا ونتقابل فى طريق

لا تخافون من سيوف ولا رصاص ولا ديناميت

فالقلب العامر بالايمان يستشهد ويستميت

انهضوا وتعاونوا ووحدوا صفوفكم

وان لم تستطيعوا فاضعف الايمان بلسانكم

انهضوا حتى لا ياتى علينا يوما مثلهم..... ونضطر فيه ان نستغيث فلا نجد رفيق

لنضع يد على يد وبالايمان والحب نتعاون ونبيــــــد

وادعو معى على من ظلمنا وعلى كل معتد غاز اثيم

اللهم انصرنا وشردهم وفرقهم قولوا امين

واعلموا ان الله معنا فى كل مكان نجاهد فيه من اجل الامن والسلام

وساظل ادعو معكم واردد فى كل مكان

حى على الجهاد حى على الامان

اللهم انى اشكو اليك ضعف قوتنا وقلة حيلتنا وهواننا على الناس الى من تكلنا الى عدو يتجهمنا ام قريب ملكته امرنا انت رب المستضعفين وربنا اللهم لا نسالك رد القضاء وانما نسالك اللطف فيه



تحديث
شارك معنا لزيارة المرضى الفلسطنيين وتقديم المعونات النقدية والعينية بمستشفى الهلال برمسيس
يوم الاربعاء الساعة 11 صباحا

لمزيد من التفاصيل ومعرفة الاحتياجات تابع تلك المدونات
نهر الحب
مدونة خيخة
قوس قزح





شفقـــــــة


الجمعة، 2 يناير 2009

مليون وخمسمئة ألف وخمسة وخميسة (005 500 1)

الرقم ده مش فلوووس
الرقم ده عدد الرؤوس

أيوه
مليون وخمسمئة ألف وخمسة رأس

إحتفلنا بيها .. وفرحنا ليها وفيها
أيوه فرحانين وبنحتفل

ولسة هنفرح وهنحتفل
دول مليون وخمسمئة ألف وخمسة رأس
كل رأس تستحق إحتفال خاص
تيجوا نعدهم مع بعض ؟؟؟




أول رأس هي:
رأس خروف الأضحية
وأظنكم لسة فاكرين رأس الخروف إياه
وكل سنة وانتم مضحيين وفاتين ومرقرقين



تاني رأس هي:
رأس الخروف "بوش"

قصدي الرئيس "بوش"
اللي بقت زي هدف النيشان في تدريب الرماية
وقاعدة النيشان اللي كانت "سن نملة الدبانة"
هتبقى بعد التعديل "لسان بوز الجزمة"
وبدل ما نشد "الأجزاء" هنشد "الرباط"
و"الزناد" في التعديل الجديد هيبقى في الكعب
و"الذخيرة الحية" بدل ماتتحشي "بارود"
هتتحشي بشراب منتن مقطع لابسه طفل عراقي من أطفال الش
وارع
كنوع من رد الجميل للبوشين أبو وشين(بوش الأب وبوش الإبن)



تالت راس تستحق الإحتفال هي:
رأس السنة الهجرية

1430 سنة مرت على هجرتك
يا سيدنا وحبيبنا يا "محمد"
عليك أفضل الصلاة والسلام

لطالما حذرتنا من اليهود وأفعال اليهود
وتركت لنا قصصا لبني إسرائيل
وقتلهم الأنبياء
فما بالكم بنا نحن الضعفاء إليه ؟؟



رابع رأس إحتفلنا بيها هي:
رأس السنة الميلادية 2009

مرعام بكل ما يحمل من ذكريات
الحزين منها والسعيد
والقليل من النجاحات
وكثير من الإخفاقات
ولكن يظل الأمل فينا أبدا ما حيينا



مليون وخمسميت راس على بعض
حتة واحدة

أرفع لهم القبعة واحدة واحدة
بعدد رجالك وشجعانك يا "غزة"

تحية إجلال وإحترام وعزة
لكم يا رافعي الرأس في "غزة"
رفعتم رؤوسكم وأصواتكم وأيديكم
فرفعتوا رؤوسنا جميعا
رفعتم رؤوسكم في وجه محاولات الإذلال
رفعتم أصواتكم بكلمة لا للإحتلال
ورفعتم أيديكم بالحجارة
فرفعنا جميعنا الرؤوس إعتمادا عليكم

نعم إخوتي
فأنا لا أجد سببا للعزة والكرامة .. غيركم
إنتمائنا لهذا الجيل هو عار .. بدونكم
كوننا عرب لهو مهانة .. لولاكم
فإسمحوا لنا إخواننا أن نفرح بكم
ونحيي كل أم تزغرد لمقتل بطلها
ونزف كل شهيد فاز بالدنيا والآخرة
ونحتفل بكل يوم مر عليكم ورؤوسكم مرفوعة

إسمحوا لنا أن نفرح بكم ولكم
مليون وخمسمائة مرة
بعدد رؤوسكم المرفوعة



كده إحنا عدينا مليون وخمسميت ألف وأربعة
يعني فاضلنا رأس واحدة
صح ؟؟
بس دي لسة هنفرح بيها قريب
إن شاء الله

الراس دي هيا راسك يا "أولمرت"
وماتفتكرش الكلام ده أي كلام
ذاكر التاريخ كويس وانت تعرف
إن نهايتكم قربت
ولا أقولك سيبك من المذاكرة والتاريخ
إنت بس إسمع الست وهي بتقولك "للصبر حدود"


بالعند فيكم فرحنا
بالعند فيكم إحتفلنا
مش هتقدروا مهما عملتم
تسلبونا حق الحياة
والأمل في بكرة

أيوة يا صهاينة
ياولاد الـ....صهاينة
ياللي حبيتوا تنكدوا على العرب كلهم
المسلم .. والمسيحي
وتموتوا في قلوبهم الفرحة
حتى في أعيادهم

عايزين تنكدوا على المسيحي ؟؟
ماتحاولوش

ده لسة كان بيحتفل بالكريسماس
ودخل كنيسته جوه أرضه المحتلة
ودعا ربنا إنها تتحرر من أشكالكم
طبعا ماهو مانسيش اللي عملتوه
في النبي "عيسى" عليه السلام
وآديكم النهارده بتكملوه
ومرت عليه رأس السنة
ودع 2008 وإستقبل 2009
وآهو مستني يحتفل في 7 يناير
ولا فارق معاه جنانكم ده
مر عليه غزاه ومحتلين كتير
كتب لهم بقلمه قصة الفناء
ليشدو لنفسه أنشودة البقاء


عايزين تنكدوا على المسلم ؟؟
طب إزاي ؟؟
ده لسة كان عايش أيام عطرة
وقلبه متعلق بمكة والكعبة
وهو متابع الحج ويوم عرفه
نسي الدنيا وبلاويها وروحه طايره للجنه
ده لسه خارج من عيده
وفرحان بأضحيته
تلتينها راح للغلبان وذي القربى
والتلت ليه ولولاده وللمة
هلت عليه ومن أيام سنة جديدة
1430 عام على الهجرة
بتأكدله دينك باقي مهما هيجرى
بيدعي يارب يدوم العمر ولو أيام
وتنولني عاشوراء وأنوي صيام
عايش حياته وعينه باصة ع الآخرة
والله مهما تعملوا ماتهزوا منه لو شعرة


بذمتكم ياملاعين ...... ده لو أصلا ليكم ذمة
بقى سلالة صلاح الدين تخاف من ولاد هرمة
وأولاد معركة حطين عارفينكم ولا ليكم لازمة
كبيركم إنتوا وحاميكم وريسهم تاكلوا بالجزمة




وكــــــل راس وانتــم فرحــانيــن
مع تحياتي / إحســان الفرحــان