الأحد، 20 يوليو 2008

بنــــــــــــــــــــــــات كووووووووووووول




النهاردة يا اصدقائى المدونين هتنتقل بنا الحلقة الى اقرب غرزة .................حيث سيتم نقل المحششة الى هناك



اقصد اننا النهاردة ان شاء الله هناخد لنا نفسين كده على ما قسم .....وهاننفخ لنا حبتين



قوم ايه بقى وانا ماشيه لقيت شوية بنات قاعدين على القهوة



وعاملين تقليعة جديدة ....طبعا عايزين تعرفوا ايه هى التقليعة



هى شد الانفــــــــــاس وضرب الاخمــــــــــــــــاس



****



انا بقى قعدت اتفرج عليهم وقلت اما اشوف ........نتيجة الضرب هتكون ايه



المهم ان كل واحد وواحدة قاعدين على القهوة وجنبهم الشيشة



وعاملين ينفخوا فى وش الناس لما خلونى مش شايفة ادامى



وما بقيتش عارفة البيت فين ........اظاهر من كتر الدخان البيت اختفى



قعدت اسال نفسى طيب واحسان....يا خرابى اظاهر برضوا انه اختفى من الدخان



يلا اهو يريحنا شوية ......الغريبة بقى انى حاولت اسال البنات دى



هو ينفع بنت تقعد على القهوة؟؟



ردت واحدة وقالت وهى مفزوعة ....... ياى وماى وسيتى امبوسيبل



انا قلت فى عقلى ايه يا بت يا شفقة



انتى غلطتى ولا ايه ؟؟



وبعدين معلش ما كنتش اعرف انها اسمها سيتىامبوسيبل وجدى امبوسيبل



وبعدين يعنى الواحد كان غلط فى ايه



ايه يا كميلة انتى وهى مش دى قهوة برضوا ولا ايه؟؟



المهم انك لما تقول كده تلاقيهم برقوا وردوا عليك بتناحة



وتقول القهوة دى........... بتاعة الناس البلدى



فقعدت اسال نفسى امال بتاعة الناس الفينو اسمها ايه؟؟



اه بيسموها ....فوكى شوب ............اقصد كوفى شوب



بس هى اصلها فى اللغة العربية............." فوكى"



يعنى فوكى كده .....وخدى راحتك على الاخر..... ولا يهمك



واعملى اللى انتى عايزاه



يعنى هو حد شايفك؟؟



مهو كله معمى ومش شايف ادامه من الدخان



وان حد شاف تلاقيها تقولك دى تفاحة!!



اه ...مهى دى كمان تقليعة اخر موضة بس مينى جيب حبيتين.....



حذفوا كلمة معسل....... وباكو دخان قص البرج



واستبدلوه بكلمة تفـــــــــــــــاحة



ده طبعا علشان الناس الفينو مش البلدى



يعنى بيسموها شيشة تفاحة.



لكن للاسف برغم كل محاولاتى ومجهوداتى



الا انى ما اقدرتش اعرف اى نوع من التفاح



يا ترى المصرى ولا الامريكانى ولا اللبنانى



****



وتلاقى الواحدة من دول قاعدة على القهوة اقصد" الفوكى شوب "



وحاطة رجل على رجل والشيشة فى ايدها....... ولا اللى بتعزف على الجيتار



والاهم من ده كله البـــــــــوى قفـــــــــــــا



اللى قاعد جنبها يرصلها حجرين ........بدل ما يديها بيهم فى نفوخها



عادى عادى مهو كله بقى تيكيت ايزى يا عزيزى



وخليك فرفوش..... واسبور ......ومبحبح كده ولذيذى



الاحلى كمان من ده كله الست اللى تلاقيها قاعدة مع جوزها واولادها



وعماله تشرب ..........ادام اسم النبى ياخده ويريحنا



اه ...وممكن كمان تلاقيه هو نفسه ما بيشربش



ويقول اصل التدخين ضار جدا بالصحة .......بس بيشجع المدام
على اى ضرر والسلام



****



انا بقى لما شفت كده كنت عايزة اصرخ



معقول المنظر ده؟؟



يا خرابى ......هى وصلت للدرجة ادى؟؟



طيب يا ستى انتى وهى بلاش فى الشارع خليكى فى البيت



ما انتى عندك شيشة جاهزة وزى الفل



انبوبة البوتاجاز...... ايوا اسمعوا كلامى دى حلوة اوى



الواحدة كده تفك الخرطوم والمنظم وعلى بقها عدل



اهو تريحنا من المناظر دى ......وكمان تعتقنا من الهباب والدخان



واهو يبقى مشروع قومى وخيرى



ايوه.....على الاقل هتبقى ساهمتى فى سد ثقب الاوزون



بدل ما احنا عاملين نقول الثقب كل يوم يوسع من الدخان والبلاوى



****



المهم انى حاولت اعمل استنطاع راى واستنطعت عليهم



اللى تقول اصلى قرفانة ومضايقة والشيشة بطلع قرفى فيها



اهى بدل العيشة الزفت اللى احنا عايشينها



طيب يعنى النفسين دول يعنى هما اللى حلولك المشكلة؟؟؟



طيب والله كويس لو كان كده فعلا



اذا اثبتت الشيشة نجاحها فى حل المشاكل



يبقى كلنا نعمل اشتراك فى القهاوى

ونشجع صناعة المعسل ......وفتح الغرز...... ونصدره كمان



اهو نبقى ساهمنا فى ارتقاء البلد
ونموها اقتصاديا



****



واحدة تانية تقولك اهى الشيشة احسن من السجاير



على الاقل دى تفاحة وريحتها حلوة



طيب ما لو كده ما تروحى سوق العبور تشتريلك قفص تفاح



واقعدى شمى فيه للصبح...... اهو على الاقل طبيعى ومش مضر



****



واحدة تالته تقول.........الشيشة دى تغير وروشنة وحاجة جديدة



حلوة اوى دى طيب ما تروحى تحلقى زلبطة



او اقولك شلفطى نفسك بموس فى خلقتك اهى تبقى حاجة جديدة واورجينال وتلفت النظر برضوا



المهم ان نتيجة الاستنطاع



جاءت بنتائج جيدة واعتقد انكم استفدتم منها



وعارفة ان بسبب النتائج دى ان شاء الله كلكم من بكرة هتفتحوا قهاوى



وهتشجعوا الشيشة والمعسل



على العموم مش هطول عليكم علشان اروح الحق احسان قبل ما يخلص الشيشة لوحده









شفقة















الأحد، 13 يوليو 2008

مجنووووووووون سمـــاح أنور



عزيزتي سماح
أود أن أعرفك بنفسي أولا
اسمي إحسان ، مصري مقيم بالسعودية مع أسرتي منذ سنين
بصراحة مرت شهور وأنا احاول أن أعرف عنوانك أو صندوق البريد الخاص بك
وأخيرا وجدته منشورا في مجلة ....... تحت باب راسل نجمك المفضل
لذا أرجو أن تصلك كلماتي هذه ، فهي مكبوتة بداخلي منذ عام تقريبا
منذ أن شاهدت لك فيلم "الليلة الموعودة" أحسست بشئ ما بداخلي يدفعني لتكرار المشاهدة
لكني بصراحة لم أكن أشاهد الفيلم ، بل كنت أشاهدك انت
أراقب حركاتك ، أترقب انفعالاتك ، أصغي لحوارك ، ائن لصراخك
كانت المشاهد التي تضمك في هذا العمل توحي ببزوغ نجم جديد في سماء الفن
ولا أبالغ فأدعي أنك الأفضل بين ممثلي جيلك ، ولكني أقسم أنك الأكثر بساطة وتلقائية حتى الآن
لن أطيل عليك في خطابي هذا فأنا لست أدري بعد ان كان سيصلك أم لا
لذا أنتظر منك الرد لتخبريني بأن كلماتي قد وصلتك
عنواني هو
ثانوية الملك عبد العزيز - الرياض
الطالب/ إحسان محمد أحمد المصري
الصف الأول - أ








ده كان تقريبا نص الجواب اللي بعته لسماح أنور سنة 85
وتوالت الجوابات بعده ولا حد معبرني بأي رد
كنت حتى متوقع ان المحررين في الباب ده من المجلة هيردوا عليا باسمها
وانا كنت موافق اني اوهم نفسي بس ألاقي أي حد بيعبرني
بس اللي حصل ان ماحدش عبرني
لحد مازهقت وقلت خلاص مابدهاش هأقضيها أفلام وخلاص

ومرت سنين
نزلت مصر أكمل دراستي في الجامعة
وماكنتش أعرف ان مصر والجامعة هما اللي هيكملوا عليا
مش واضحة ؟؟
نوضحها بس مش أوي علشان الرقابة
يحصل ايه لشاب غشيم لسة جاي من السعودية المنغلقة رأسا للجامعة المنفتحة
لأ مش الجامعة المفتوحة ... بأقول المنفتحة
وخصوصا لو الشاب ده قاعد في مصر لوحده ومعاه عربية زيرو وفلوس كمان
طبعا نسيت "سماح" ، وأبوها الكاتب "أنور عبدالله" ، وأمها الفنانة "سعاد حسين"
ونسيت الأحلام العبيطة والأوهام اللي كنت حابس نفسي فيها وعشت حياتي

الى أن
أن أن أن آآآآآآآن
دخلت مرة صالة بلياردو في العجوزة اسمها هيرتش
وإذ بي افوجأ بالحب القديم ... ايوه سماح
جوه الصالة ... بتلعب بلياردو ... ايه ده ؟؟ مين اللي بيلعب معاها ده ؟؟
ده كان محمد رياض
حسيت بالدم ضرب في نفوخي
ولأول مرة آخد بالي اني عندي دم
وكمان لأول مرة أحس بالغيرة من حد على حد
ماهو بصراحة محمد رياض فيه كل مواصفات الرجولة
ده كفايه صوته الجهوري وهو خارج من حنجرته
ولا عينيه العسلي ... ده كمان حريف بلياردو
لأ كده أنا اتمسحت بأستيكة
بس لا تراجع ولا استسلام
بقيت زبون شبه يومي على صالة البلياردو اللي مابعرفش ألعبه أصلا
وشفتها هناك كتير ... بس كنت باتكسف ألعب قدامها لا تضحك عليا
لدرجة اني كنت باجيب معايا واحد صاحبي مجرم بلياردو باستعرض بيه قدامها
هبل مش كده ؟؟؟
عادي ... أنا عارف

ام هئ
مرت سنين ... وخلصت الكلية واتخرجت
وطبعا شغل ما اشتغلتش ... وكمان جيش مادخلتش
بس المهم اني اتعلمت العب بلياردو
في الوقت اللي بطلت فيه سماح تيجي صالة هيرتش
لدرجة اني جندت الواد اللي واقف في الكشك اللي على ناصية الشارع
لو شاف عربيتها قدام الصالة يكلمني على طول
وطبعا كنت مظبطه
مش باقولكم هبل في هبل
انقطعت أخبارها عني وماشفتهاش لمدة سنة تقريبا
وده كان مجنني طبعا
واللي كان مجنني أكتر اني كنت خلاص اتعلمت بلياردو
بس بعد فوات الأوان

وفجأة
وأنا رايح أغير عربيتي من معرض سيارات أعرفه في الزمالك
أقوم ألاقي سماح أنور بتغير عربيتها هي كمان من نفس المعرض
كان معاها أوبل كورسا أو فيات أونو
مش فاكر بالظبط
وبدلتها بالعربية اللي عملت بيها حادثتها الشهيرة
اشترت العربية النحس دي قدامي
وأنا حبا فيها
اشتريت عربيتها القديمة فورا
أي نعم أنا رجعتها بعد يومين
بس ده كان لاني مش واخد على العربيات الصغيرة
خصوصا اني طويل وعريض المنكبين شنكول الحركات مشتئب الفلنكات مشتهم الأبعاع
شلولخ
عادي بقى ما احنا متفقين ان الحكاية دي كلها هبل في هبل

أم هئ
مرت سنين كمان
ودخلت الوسط الفني من أوسخ أبوابه ..... احم احم قصدي أوسع أبوابه
عملت فيها إحسان دياب وقلت أغني
وهما يعني اللي بيغنوا دول أحسن مني في ايه ؟؟
درست في كلية التربيه الموسيقية
واتمرنت علي يد رئيس قسم العود بالكليه ... الله يمسيه بالخير
قولوا مين كان زميلي وقتها وبيتمرن مع نفس الأستاذ ؟؟
عامر منيب
بس هو ماشاء الله عليه فلح ... وأنا كالعادة
ايييييييييه دنيا

المهم اني لما قربت أخلص الألبوم بتاعي
يعني كنت عملت منه 6 أغاني وفاضل اغنيتين والميكس
وقتها سمعت ان سماح أنور دخلت عالم الغنا والموسيقى وبقت بتلحن
طبعا طلبت من مدير أعمالي يحدد ميعاد معاها فورا
وبالفعل أخدته وروحنالها البيت اللي كان في شارع لبنان
بصعوبة لقيت ركنة تحت العمارة
قلبي بيدق ... هاقابلها وجها لوجه وفي بيتها ؟؟
وكمان فيه ميعاد ... يعني هي مستنياني دلوقتي ؟؟
أوعى تخاف بقى المرادي يا جبان
صارحها بحقيقة مشاعرك
كفاية كبت لحد كده
ركبت الأسانسير
سحب معاه قلبي وهو طالع
وصلنا ... دقينا الجرس
وأنا كنت خلاص هارجع تاني في كلامي
بس الباب اتفتح بسرعة
سألنا عن سماح ... وسمعت كلمة اتفضلوا هي في انتظاركم

بوم بوم بوم بوم
دي كانت دقات قلبي وقتها ... ممكن تسمعها وانت واقف جنبي
في الريسيبشن كانت والدتها سلمنا عليها وهي قاعده
شاورتلنا على الغرفة اللي منتظرانا فيها سماح
بس لفت نظري حاجة
فيه كلب بلاك جاك شكله أليف جدا نايم قدام غرفتها
يااااااااه
دي كمان طلعت بتحب الكلاب زيي
وأنا في الفترة دي بالذات كان عندي كلب بلاك جاك برضو
ايه الصدف الكلابي دي يا سماح ؟؟
ههههههه ... هوهوهو

وصلت قدام باب الغرفة ... خبطت ع الباب ... وسمعت صوتها
أدخل
وأنا ما صدقت ... رحت مقتحم الأوضه على طول
قامت وسلمت علينا ... على عكس الاتيكيت مابيقول
هايلة يا سماح ... وهو ده اللي عاجبني فيكي
بساطتك ... تلقائيتك ... تواضعك ... جدعنتك
ورجولتك ان صح التعبير
بدأت سماح تعرض الألحان اللي محضرهالي
بصراحة ماكنتش معاها خالص
أو بمعنى ادق كنت معاها هي مش مع ألحانها
لحد ما سألتني ايه رأيك ؟؟؟
قلتلها حلو أوي تاني واحد ده ممكن أسمعه تاني
ردت وهي مبتسمة: طبعا
وهي بتسمعهولي تاني مرة كنت محضرلها قنبلة
جميل اللحن ده بس أنا كنت بأدور على أغنية دويتو
ايه رأيك لو تغنيها معايا ؟؟
اتلخبطت شويتين ... واتبرجلت حبتين
ماكانتش متوقعة اني هاطلب الطلب ده
وحاولت تعتذر بس أنا طلبت منها تاخد وقتها قبل ما ترد عليا
ورحت فاتح في الكلام
خلاص ما انا اتجرأت بقى
وهي طلعت انسانة بسيطة وعادية بتتلخبط وبتتكسف زينا
سألتها : فاكرة زمان من عشر سنين كده كانت بتجيلك جوابات اعجاب من السعودية
ردت : بيجيلي كتير من السعودية
قلتلها : بس اكيد ماحدش غيري كان سايبلك عنوانه على المدرسة اللي هوا فيها
ده أنا كنت عامل روشة لوكيل المدرسة
ردت قالتلي حقيقي مش فاكره .... يمكن يكون جالي جوابات منك
بس انت بتتكلم عن حاجة من 10 سنين
بدأت أرتاح للقعاد معاها ... يمكن أكون طولت شوية في القعدة
يمكن أكون رغيت زيادة شويتين ... بس برضو مانا مكبوت بقالي 10 سنين

نزلت من عندها طاير من السعاده
مش لأني قابلتها أو قعدت معاها ... لأ
أنا كنت سعيد لأني اكتشفت ان نظرتي كانت في محلها
واني لقيت سماح زي ماكنت متخيلها بالظبط بنفس صفات بنت البلد
بس للأسف
ما استمريتش في موضوع الغنا ده كتير
والساحة الغنائية افتقدت لصوتي الشجي ... ولغيت الفكرة
وطبعا ماقدرتش أكلمها تاني بعد ما تعبتها معايا كذا مرة في التلحين

وبرضو فاتت سنييييييين
واشتغلت في راديو وتليفزيون العرب
art
وعرفت من فريق اعداد د.هالة سرحان ان ضيفة حلقة برنامج الليلة
هي سماح أنور
وده كان أول ظهور ليها بعد الحادثة
مش قادر أنسى شكلها في اليوم ده
بالصدفة كنت واقف قدام باب الأسانسير في الاستوديو
لما اتفتح لقيت سماح خارجة منه على كرسي متحرك كهربائي
وفي رجليها حذاء طبي (بوت) أشبه بالأجهزة التعويضية
حاولت أحبس الدموع في عينيا ماقدرتش
قربت منها وسلمت عليها من غير ما أفكرها بنفسي
وهي بتبصلي بتركيز بتحاول تفتكر
وكأنها بتسأل
يعني ياربي هى السحنة دي ورايا ورايا ؟؟؟

هي دي ببساطة حكايتي مع سماح أنور
طبعا ملاحظين انها كانت قبل الجواز
آه طبعا مانا كنت فاضي ورايق
وعايش في دور الحبيب
فين الأيام دي دلوقتي ؟؟
ما بقاش فيه سماح ولا أعرف حاجة عن السماح
غير طلب السماح ع العمر اللي عدى وراح
وسماح ... ياهل السماح
أصل السماح طبع الملاح
يا بخت من سامح

والى لقاء قريب مع نوادر جحا
قصدي نوادر إحسان

الأحد، 6 يوليو 2008

ازاى تكونى قـــــــــوية............مع الحمـــــاه المفــــــــــتريه




النهاردة بقى هنذيع الحلقة بتاعتنا من استاد الملاكمة او من اقرب صالة جيم......نظرا للمباراة اللى هتقوم بينا....... وبين الحموات المستعفيات" اقصد الفاتنات"


ما علينا اهم حاجة يا جماعة فى معاملة الحموات ..............سياسة النفس الطويل............. ابو زلومـــــــــــــة


****واليكن بعض المواقف وكيفيه التعامل معها****


لما تروحى تزوريها تحضرى دماغك من بالليل.............. لضرب الروسيه


وتلبسى قفزات منعا للجروح......وجزمة كعب عالى


بصى بقى لو كانت مش طايقاكى ..........وده طبعا الطبيعى

***وانتى تتمنى العمى ولا تشوفيها ***


مش مهم اعتبرى نفسك ........عاميه......... وخرسه ..........وطرشه


يعنى ما تتكلميش الا اذا حسيتى انك خلاص هتموتى منها.......... وحاولى دايما تقوليلها يا ماما


*** وان كانت الكلمة هتطلع بالعافية***


صحيح مفيش مقارنة بينها وبين ماما .....وفى الحالة دى كتير منكم .........بتفضل اليتم


بس معلش يا ستى تعالى على نفسك ...........واديها لقب الكونتيسه

****

كمان حاولى دايما تديها ودنك.... اقصد تسمعيلها............. مش تقطعى ودنك وتدهيلها هديه


لا هى عندها ودن احسن منك ميه مرة............ وبتسمع بيها دبة النملة


انا اقصد لما هى تلت وترغى .......اسمعى منها وبعدين ......ابقى اقطعى ودنك مع فرد وشك بجلات


ليعطيه ابتسامة زى الزفت....... معلش ابتسمى حتى وان كانت بتسم بدنك بالكلام


****

دايما تحاولى تحشرى نفسك .....................عندها فى المطبخ


يعنى ما تديهاش فرصة............. وانتى عندها ان هى اللى تعمل كل حاجة


لان ابنها كده هيحس بالفرق............... وهتلاقيه كل يوم مبلط عندها بعد الشغل


ومش هتشوفى خلقته تانى ..............على السفرة


وكل حاجة هايعايرك............ ويقولك يا شيخة هو انتى تعرفى تعملى زيها وكل شوية يقول..... اكل امى..." جته ماوووووو "


وهتبقى ذله ليكى فى الرايحة والجاية ......ايون


ويا سلام.......... لو كنتى من صاحبات العك ................ شوفى انتى بقى صيتك هيوصل لحد فين ومش هتسلمى من لسانها وهتلاقى اخبارك على صفحات الجرائد مانشيت كبير تحت عنوان العكاكين


مش مهم............... بوظى المهم تعملى وتثبتى جدارتك العكاكيه


مرة تعملى طبق رز بالبن بالملوخيه....سبانخ بالبطيخ ..........كده يعنى وفهميها انه صنف جديد لسه منزلش السوق

وانه بتاع الناس الهاى بس


وبكده تضمنى................ انها مليون فى الميه هتاكل منه


وهما اللى بيعملوا البط بالسكر والعسل احسن منك.............. اهو كله عك......... ووجع بطن


و تبقى خلصتى منها للابد............. وتبقى شهيدة السبانخ بالبطيخ .........مش انتى خالص


المهم اللى ياكل العك ده يستاهل اللى يجراله

****

كمان طول ما هى قاعدة تتكلم عن ابنها ..........حاولى ............حاولى بقدر الامكان تكونى ...........لتيفة وحونينه


وتتكلمى عنه كويس حتى وان كان بيفشفش عضمك........... وهاريكى ضرب..... وافتكرى ان الشكوى لغير الله مذلة


معلش خليكى انتى الاحسن........ وامدحي فيه مش اردحى ...........خدوا بالكم من الفرق


يعنى مثلا ربنا يخلهولك يا طنط ...............ده هدية من السما............ ده عسل يالهوى على الطيبة والحنيه


ما تتوصفش وبعدين هو هايجيب الصفات التحفة دى منين ..................ما هى من متحف الاثار


اقصد منك يا حبيبتى .............. ربنا يخليكى لينا لحد ما يبقى عندك عشروميت سنة


وبعدين وهى مش موجودة................. ابقى قطعى فروته وفضفضى براحتك .............وطلعى اللى نفسك فيه


ده ممرمطنى....... مورينى النجوم فى عز الضهر................ يعنى هو ها يجيبه منين


ماهو كله من الست.............. ام اربعة واربعين اللى جايباه


بس خلى بالك ....................لتلدعك ودى قرصتها للترب علطول

****

دايما متدخلهاش فى مشاكلك وحروبك مع الافندى .................لازم انتى تقودى المعركة ومعاكى اسلحتك


لحد ما تنتصرى على الخصم................. الهو جوزك اسم النبى حرسه وصاينه


بدون خساير



.ولما تسالك انتم عاملين ايه؟؟؟؟ ........ اجابتك تكون موحدة تمام وزى الفل


خلى بالك من نظرتها لو عرفت انكم بتتخانقوا شماته ...شماته...شماته


و تلاقيها عماله تقول الهى يكسر نفوخك ويدغدغك يا بعيدة....ما تدهاش فرصة للشماته ولو انها احسن واحدة تاخد فرص


وتضحكى وتقولى.................... سمن على عسل


وبينك وبين نفسك ابقى قولى ................عسل اسود ومهبب


وابقى افتكرى الشالوت اللى ادالجتى بيه من على السلم .............لحد ما وصلك للجيران عوم وزحف

****

لما تيجى تزورك حتى وان كان اليوم تقيل على قلبك................ومش هيعدى


مش مهم خالص استحمليه واعتبريه يوم فى سنة كبيسة................. بس اهم حاجة الاستقبال والترحيب


يا مرحبا يا طنط والله الدنيا بقيت لايت........ مش عارفة اعمل ايه ...........انا فيرى فيرى هابى


وامسكى فيها تقعد كام يوم كده ..............حتى وان كان ضغطك هيعلا فيهم


معلش يعنى ايه اللى هيزيد ؟؟؟ مهو كده كده .......انتى من ساعة ما اتجوزتى ابنها وشوفتى وشها


جالك الضغط والسكر والقلب ......................والذى منه الخ الخ الخ


يعنى قعادها مش هيزود ....................الا حاجات بسيطة وطفيفة الانتقال من المرض العضوى للنفسى



مش بقولكم حاجة بسيطة وعلى السرايا الصفراء عدل

****

وانتى قاعده معاها تلبسى اجمل واغلى.......... واشيك حاجة عندك


بدل ما تديكى كلام .....................من اللى يفتح النفس ده


ايه اللى انتى لابساه للواد ده والنبى هو عنده حق يبص بره ........وكمان يتجوز عليكى


ما تدهاش فرصة ..........وخلى الامطة والجلابيه ام ورد بعدين لما تحن عليكى وترحل

****

لو حبت تزغرك بالكلام او سمعتيها بتقولك كلمة كده ولا كده............ سيبك منها


مهو كلامها دايما زى الدبش........ اعملى نفسك ودن من طين والتانية من عجين


وكأنها بتقول فيكى قصايد شعر من اشعار " ابى العلاء المعرى " واحمد شوقى


يعنى برود تام .....ديب فريزر...... الهى ديب ياكلها ويريحنا ....المهم برود تام حتى الوئام


ولو خلاص بقيتى على اخرك منها.................. وروحك طلعت لمناخيرك


ابقى طلعى ده كله فى ابنها لكن هى......نو نو نو........ ما انصحكيش


نكدى على اللى قدك .......................بدل ما تنكد هى عليكى وعلى البلد بحالها


وينوبنا من الحب جانب معاكى

****

خدى رايها ومشوريتها فى كل حاجة ....................يعنى كبريها وعلى من مركزها


"لحد ما توصل من مركز................. لقسم شرطة ان شاء الله"


كل حاجة تقوليلها ايه رايك فى دى طيب ودى ...............حتى وان كانت ما بتفهمش


مش مهم خالص المهم تحسيسيها......... انك بتستفادى منها وكانك طول عمرك غبيه .............وما بتفهميش


وبعدين بينك وبين نفسك..............." ابقى قولى دى دقة قديمة ولا ليها قيمة"

****

حذارى ايكى وان تعرفيها حاجة عن مصروف البيت


والا ان شاء الله مش هتشوفى قرش واحد بعد ما تعرف


لكن اوعدك انك هتشوفى قرش البحر اللى هيعضك باذن الله

****

الهدايا على راى المفقوعة " هى غنيه وتحب الهديه"


دى بقى اقرب حاجة................ لطريقها المشوك علشان ما تلدعكيش ....عليكى بشراء الهدايا


ا فى كل المناسبات والاعياد ...................وخاصة عيد ميلادها التسعين


لازم تحسسيها انه يوم ..............ولا يوم 6 اكتوبر........ وعبور القناه


ما هو كل ده علشان تحطمى خط بارليف "الهو لسانها اللى عايز قطعه من لغ لوغه"


***وفى نهايه المباراة ***


عليكى بالمطالبه بتعديل طفيف لفيلم حماتى ملاك...............الى حماتى هلاك


احب اقول ان الحما ...............................مش هم وغم يعنى اكيد كلهم مش.................. حموات فاتنات

واكيد هايجى اليوم اللى هتكونى فيه سماويه ........ونكديه.........................اقصد هايجى اليوم........... وتبقى حماه واهو كله سلف ودين


سلام بقى لما اروح اسدد الدين


شفقة

الجمعة، 4 يوليو 2008

اهلا وسهلا
اهلا وسهلا كنشسيبكثصتبكمنصثابنتصثقرلايسنتمرلاءستوؤلاثصمكب
صمتهباضصثخهعلضخؤعغبسشءلاه ءرهصضالؤرنسصدسكءخسضاؤتصثمعؤد
ضكءيهعتؤحهخ لخ رءضل ررصضقثلرقثصلر

الثلاثاء، 1 يوليو 2008

مبــــروك يــــا : أحـــمــــــــــديـــــن



ماتستغربوش

"أحمدين" ده مش اسم مبتكر لواحد صعيدي ...لأ
هو من امتى والصعايدة بيبتكروا حاجة
ولا حتى في أساميهم
هما كفاية عليهم حسنين ومحمدين
زينة الشباب لاتنين
وماعندهمش أسامي مثناه تاني
أنا هاتكلم هنا عن اتنين كل واحد منهم اسمه "أحمد"
اتنين شباب
هما فعلا
زينة الشباب لاتنين
نموذج للشباب المصري الطموح
اللي اتبنى فكرة في منتهى البساطة والتلقائية
واجتهدوا عليها ... واشتغلوا بشكل جماعي مش فردي
بعدوا عن الأنانية والمصالح الشخصية
فكان النجاح حليفهما
أنا باتكلم عن
أحمد البوهي
و
أحمد مهنى
أصحاب كتاب
"
مدونات مصرية للجيب"
كتاب فكرته بسيطه
وهي جمع أفضل ما دون الكترونيا على النت
والعوده به الى أساس الكتابة والمؤلفات الا وهو الكتاب
اتولد الكتاب ده يوم الخميس 22 مايو2008
واللي بعد النجاح اتحول لسلسلة كتب
ربنا يكتر من اصداراته
يعني مش عايزين تحديد نسل هنا
وانسوا حسنين ومحمدين دلوقتي خالص

بس يعني
عندي شوية ملاحظات على الاصدار الأول
أرجو قبولها مني

وأرجو أخذها في الاعتبار في الاصدارات القادمة



أولها : الإسم
"
مدونات مصرية للجيب" بتفكرنا يا أحمدين بـ "روايات مصرية للجيب"
كان نفسي يكون الاسم مبتكر

ثانيها : ليه مصرية ؟؟
ليه ماتكونش عربية ؟؟
احنا بنجمع مدونات من الشبكة الدولية(الإنترنت)
يبقى ليه نقصرها على جنسية معينة ؟؟
كفاية انها تكون بلغتنا العربية
ده انتو كان ممكن تعملوا اللي جامعة الدول العربية نفسها ماقدرتش تعمله
نجتمع ولو لمرة واحدة على كلمة واحدة

ثالثها : للجيب
بالذمة يا أحمدين أنهي جيب ده اللي يشيل الحجم ده
صفة مش ماشية خالص مع الحجم اللي صدر بيه الكتاب
وده ياكد كلامي ان الاسم كان اقتباس وما بيعبرش عن كتابكم
نصيحة يا تغيروا مقاس الورق المرة اللي جايه
يا اما لو خليتوه على نفس حجمه يبقى تسموه
"
مدونات مصرية للسيالة"
كده يادوب

رابعها : اسم الشهرة
في معظم المناطق الشعبية بنلاقي لكل واحد أو واحدة اسمين
وده على ما أظن بيكون للتضليل
يعني لو حد عايز يشتكي حد أو يعمل فيه محضر
طبعا هيبلغ بالاسم اللي يعرفه واللي مش هو الاسم الحقيقي خالص
فيروح البلاغ فشنك
وعادة الداخلية بتسجل الاسمين في ملفات المشبوهين والمسجلين
تلاقي مثلا
محمود عبد العليم وشهرته "مرسي ضبش"
ومن غير زعل يا أحمدين
انتوا عملتوا كده في كتابكم مش عارف ليه
احنا متفقين ان اسمه "مدونات مصرية للجيب"
أمال ايه "مشروع وطن" ؟؟
ولو اعتبرناه اسم الاصدار الأول
طيب ايه كمان "دون" ؟؟
كتير بجد

خامسها : الغلاف
كان ممكن يكون أبسط من كده
بس أنا حقيقي عذرت مصمم الغلاف لما قريت محتويات الكتاب
الراجل معاه سمك ، لبن ، تمرهندي
ومطلوب يتحطوا في غلاف واحد
عنده حق هيعمل ايه غير كده ؟؟
ماهو ماينفعش مثلا تطلب مني أغلف قطعة غيار سيارات
في نفس تغليفة قطعة شيكولاته
وده هيوصلنا للملحوظة السادسة

سادسها : الهوية
احنا مين ؟؟
بنتكلم عن ايه ؟؟
عايزين في الآخر نوصل لأيه ؟؟
وعايزين القارئ يخرج آخر الكتاب بايه ؟؟
بصراحة
ولا حاجة من دي تم مراعاتها في الكتاب
كان ممكن نحير مصمم الغلاف من غير ما نحير القارئ
يعني كان اتقسم الكتاب من جوه لأجزاء
خواطر-قصة قصيرة-أدب سياسي-شعر-كتابات ساخرة ... الخ
ولا ايه ؟؟؟

سابعها : عدد صفحات الكتاب
كتيييييييير
مش لأن المادة التحريرية جتلنا ببلاش يبقى نهدرها بالشكل ده
ده برضو مجهود وفكر ناس
اشتغلوا عليه وحلموا باليوم اللي شغلهم فيه هيطلع للنور
كان لازم الشغل الجيد يتبروز أحسن من كده
واللي كده يعني مالوش مكان هنا
ولا ايه ؟؟؟

ثامنها : الحقوق المادية والأدبية

انتوا راعيتوا مسألة الحق الأدبي للمؤلف
باحتفاظه بالحق في اعادة النشر رغم موافقته على النشر معاكم
طيب والحقوق المادية ... فين ؟؟؟
الناس اللي قدمت أحسن ما كتبت ... خدت ايه ؟؟؟
وأنا هنا مش باتكلم عن الحق المادي بمعنى الفلوس
لأ
الناس دي من حقها تعرف تفاصيل أكتر عن مصير مؤلفاتها
عدد النسخ اللي تم طبعها
الخريطة الجغرافية للتوزيع
عائدات الكتاب كمقياس للي عايز يكرر التجربة بشكل فردي
الكتاب مش كتابكم لوحدكم يا أحمدين
ولا ايــــــه ؟؟

تاسعها : الدعاية والاعلان

من ناحية الدعاية فكانت بصراحة ضعيفة
وماخرجتش خارج حدود النت والمدونات
ولم يعلم باصدار مثل هذا الكتاب سوى المدونين
الزمايل وأصحاب الكار
اللهم الا بضع كلمات في جرايد
الدستور والمصري اليوم ونهضة مصر والبديل
ومن جهة الإعلانات فماأفتكرش اني شفت اعلان واحد
الكتاب نزل سكيتي وكإننا بنعمل حاجة غلط أو بنتجوز في السر
كان محتاج لشرط الإشهار علشان يكون حلال
ومضطر أكون ظالم وأقارن مستوى الدعاية عن كتابكم
بالدعاية اللي قامت بيها دار الشروق لما أصدرت 3 كتب للمدونين
بيتهيألي الفرق كبيييييير
ولا ايــــــه ؟؟

عاشرها : حفل التأبين

*إختيار غير موفق لتوقيت نزول الكتاب .... قرب ايام الإمتحانات
*اختيار غير موفق للمكـان ..... كان غير معد لإسـتقبال هذا العدد
*ادارة الحفل كانت أقل من المتوقع ..... ولا تناسـب أهمية الحدث
*انتم اصحاب الفكرة يا أحمدين بس المدونين هما أصحاب الكتاب
*كان من المفترض ان أصحاب الكتاب هما اللي يتكلموا في الندوة



آسف يا أحمد وأحمد لو كان كلامي ناشف حبتين

بس اللي يحب حد يخاف عليه

وينصحه بجد مش يقوله الله عليك طول الخط

اوعوا تفرحوا بالمجاملين والمنافقين والهتيفة

دي بتكون بداية النهاية

لأن الطبيعي اننا نشوف نفسنا في مراية الآخرين

بس المهم نحسن اختيار هؤلاء الآخرين

وأظن مش أنا اللي هاقولكوا بصوا حواليكو

هتشوفوا عملوا فينا ايه الهتيفة

انت عارف وهو عارف وانا عارف

والعارف لا يعرف

وفي انتظار الكتاب الجديد بالشكل الجديد

الناقد اللوذعي

سي/احســــان