الثلاثاء، 1 يوليو، 2008

مبــــروك يــــا : أحـــمــــــــــديـــــن



ماتستغربوش

"أحمدين" ده مش اسم مبتكر لواحد صعيدي ...لأ
هو من امتى والصعايدة بيبتكروا حاجة
ولا حتى في أساميهم
هما كفاية عليهم حسنين ومحمدين
زينة الشباب لاتنين
وماعندهمش أسامي مثناه تاني
أنا هاتكلم هنا عن اتنين كل واحد منهم اسمه "أحمد"
اتنين شباب
هما فعلا
زينة الشباب لاتنين
نموذج للشباب المصري الطموح
اللي اتبنى فكرة في منتهى البساطة والتلقائية
واجتهدوا عليها ... واشتغلوا بشكل جماعي مش فردي
بعدوا عن الأنانية والمصالح الشخصية
فكان النجاح حليفهما
أنا باتكلم عن
أحمد البوهي
و
أحمد مهنى
أصحاب كتاب
"
مدونات مصرية للجيب"
كتاب فكرته بسيطه
وهي جمع أفضل ما دون الكترونيا على النت
والعوده به الى أساس الكتابة والمؤلفات الا وهو الكتاب
اتولد الكتاب ده يوم الخميس 22 مايو2008
واللي بعد النجاح اتحول لسلسلة كتب
ربنا يكتر من اصداراته
يعني مش عايزين تحديد نسل هنا
وانسوا حسنين ومحمدين دلوقتي خالص

بس يعني
عندي شوية ملاحظات على الاصدار الأول
أرجو قبولها مني

وأرجو أخذها في الاعتبار في الاصدارات القادمة



أولها : الإسم
"
مدونات مصرية للجيب" بتفكرنا يا أحمدين بـ "روايات مصرية للجيب"
كان نفسي يكون الاسم مبتكر

ثانيها : ليه مصرية ؟؟
ليه ماتكونش عربية ؟؟
احنا بنجمع مدونات من الشبكة الدولية(الإنترنت)
يبقى ليه نقصرها على جنسية معينة ؟؟
كفاية انها تكون بلغتنا العربية
ده انتو كان ممكن تعملوا اللي جامعة الدول العربية نفسها ماقدرتش تعمله
نجتمع ولو لمرة واحدة على كلمة واحدة

ثالثها : للجيب
بالذمة يا أحمدين أنهي جيب ده اللي يشيل الحجم ده
صفة مش ماشية خالص مع الحجم اللي صدر بيه الكتاب
وده ياكد كلامي ان الاسم كان اقتباس وما بيعبرش عن كتابكم
نصيحة يا تغيروا مقاس الورق المرة اللي جايه
يا اما لو خليتوه على نفس حجمه يبقى تسموه
"
مدونات مصرية للسيالة"
كده يادوب

رابعها : اسم الشهرة
في معظم المناطق الشعبية بنلاقي لكل واحد أو واحدة اسمين
وده على ما أظن بيكون للتضليل
يعني لو حد عايز يشتكي حد أو يعمل فيه محضر
طبعا هيبلغ بالاسم اللي يعرفه واللي مش هو الاسم الحقيقي خالص
فيروح البلاغ فشنك
وعادة الداخلية بتسجل الاسمين في ملفات المشبوهين والمسجلين
تلاقي مثلا
محمود عبد العليم وشهرته "مرسي ضبش"
ومن غير زعل يا أحمدين
انتوا عملتوا كده في كتابكم مش عارف ليه
احنا متفقين ان اسمه "مدونات مصرية للجيب"
أمال ايه "مشروع وطن" ؟؟
ولو اعتبرناه اسم الاصدار الأول
طيب ايه كمان "دون" ؟؟
كتير بجد

خامسها : الغلاف
كان ممكن يكون أبسط من كده
بس أنا حقيقي عذرت مصمم الغلاف لما قريت محتويات الكتاب
الراجل معاه سمك ، لبن ، تمرهندي
ومطلوب يتحطوا في غلاف واحد
عنده حق هيعمل ايه غير كده ؟؟
ماهو ماينفعش مثلا تطلب مني أغلف قطعة غيار سيارات
في نفس تغليفة قطعة شيكولاته
وده هيوصلنا للملحوظة السادسة

سادسها : الهوية
احنا مين ؟؟
بنتكلم عن ايه ؟؟
عايزين في الآخر نوصل لأيه ؟؟
وعايزين القارئ يخرج آخر الكتاب بايه ؟؟
بصراحة
ولا حاجة من دي تم مراعاتها في الكتاب
كان ممكن نحير مصمم الغلاف من غير ما نحير القارئ
يعني كان اتقسم الكتاب من جوه لأجزاء
خواطر-قصة قصيرة-أدب سياسي-شعر-كتابات ساخرة ... الخ
ولا ايه ؟؟؟

سابعها : عدد صفحات الكتاب
كتيييييييير
مش لأن المادة التحريرية جتلنا ببلاش يبقى نهدرها بالشكل ده
ده برضو مجهود وفكر ناس
اشتغلوا عليه وحلموا باليوم اللي شغلهم فيه هيطلع للنور
كان لازم الشغل الجيد يتبروز أحسن من كده
واللي كده يعني مالوش مكان هنا
ولا ايه ؟؟؟

ثامنها : الحقوق المادية والأدبية

انتوا راعيتوا مسألة الحق الأدبي للمؤلف
باحتفاظه بالحق في اعادة النشر رغم موافقته على النشر معاكم
طيب والحقوق المادية ... فين ؟؟؟
الناس اللي قدمت أحسن ما كتبت ... خدت ايه ؟؟؟
وأنا هنا مش باتكلم عن الحق المادي بمعنى الفلوس
لأ
الناس دي من حقها تعرف تفاصيل أكتر عن مصير مؤلفاتها
عدد النسخ اللي تم طبعها
الخريطة الجغرافية للتوزيع
عائدات الكتاب كمقياس للي عايز يكرر التجربة بشكل فردي
الكتاب مش كتابكم لوحدكم يا أحمدين
ولا ايــــــه ؟؟

تاسعها : الدعاية والاعلان

من ناحية الدعاية فكانت بصراحة ضعيفة
وماخرجتش خارج حدود النت والمدونات
ولم يعلم باصدار مثل هذا الكتاب سوى المدونين
الزمايل وأصحاب الكار
اللهم الا بضع كلمات في جرايد
الدستور والمصري اليوم ونهضة مصر والبديل
ومن جهة الإعلانات فماأفتكرش اني شفت اعلان واحد
الكتاب نزل سكيتي وكإننا بنعمل حاجة غلط أو بنتجوز في السر
كان محتاج لشرط الإشهار علشان يكون حلال
ومضطر أكون ظالم وأقارن مستوى الدعاية عن كتابكم
بالدعاية اللي قامت بيها دار الشروق لما أصدرت 3 كتب للمدونين
بيتهيألي الفرق كبيييييير
ولا ايــــــه ؟؟

عاشرها : حفل التأبين

*إختيار غير موفق لتوقيت نزول الكتاب .... قرب ايام الإمتحانات
*اختيار غير موفق للمكـان ..... كان غير معد لإسـتقبال هذا العدد
*ادارة الحفل كانت أقل من المتوقع ..... ولا تناسـب أهمية الحدث
*انتم اصحاب الفكرة يا أحمدين بس المدونين هما أصحاب الكتاب
*كان من المفترض ان أصحاب الكتاب هما اللي يتكلموا في الندوة



آسف يا أحمد وأحمد لو كان كلامي ناشف حبتين

بس اللي يحب حد يخاف عليه

وينصحه بجد مش يقوله الله عليك طول الخط

اوعوا تفرحوا بالمجاملين والمنافقين والهتيفة

دي بتكون بداية النهاية

لأن الطبيعي اننا نشوف نفسنا في مراية الآخرين

بس المهم نحسن اختيار هؤلاء الآخرين

وأظن مش أنا اللي هاقولكوا بصوا حواليكو

هتشوفوا عملوا فينا ايه الهتيفة

انت عارف وهو عارف وانا عارف

والعارف لا يعرف

وفي انتظار الكتاب الجديد بالشكل الجديد

الناقد اللوذعي

سي/احســــان

هناك 47 تعليقًا:

Miss. Sosa يقول...

السلام عليكم

منور يااحسان بيه وبلغ سلامتنا الكبيرة للمدام شفقة هانم

نقدك رائع وجميل بس الاقدر على الرد عليه والعمل بي هما الاحمدين

بس عجبتني او مدونات مصرية للسيالة هههههه ده على اعتبار اننا بنلبس جلاليب وملس

بس كلمة كدا على جنب : اعتقد كان افضل تبتعتلهم النقد ده فى جواب مسوجر او ترميه فى كومنت من تحت عقب مدونتهم او ارميلهم رابط موضوعك فى كومنت عندهم

تقبلوا تحياتي وتقديري

شهد الكلمات يقول...

يا هلا بسي احسان

رغم اني مش شفت الكتاب رغم اني سمعت عنه سمع خير بس لسة ربنا ما اذنش اني اقراه

بس هو النقض بناء هو اه ممكن يضايق احمدين عشان الاسلوب شديد شوية بس كلام صح

و فعلا الغلاف دوشة جدا كان عايز يبقي ابسط شوية

و انا مع سوسو في موضوع انك تبعتلهم اللينك

و سلملي علي جوزك يا سمعيل بية ههههههههه

تحياتي

حبيبـــــــة القمـــــر يقول...

سلام عليكم
ازيك يا احسان بيه
ماشاء الله عليك
نقدك واخد سخونة الجو وزياده حبتين

بس اعتقد ان التجربه الاولى وارد تحصل فيها اخطاء
وافتكر الكتاب الجاي هيبقى فيه شغل افضل بكتير من اللي فات

وانا شايفه ان صدور الكتاب في حد ذاته انجااااااااز

ربنا يوفق الجميع يارب

حبيبـــــــة القمـــــر يقول...

نسيت اقولك بلغ سلامي لشفقه هانم
ووصيها عالتاج
لو بتطبخ لجم جملي كان زمانها استوت من زماااان

مستنيه اشوف الاسرار في التااااااااج ياقمررررررر

مش انت القمر .. انا بقول لشقفه حبيبتي

رحـــــال يقول...

كلام لاغبار عليه ..

ياريت نسمع رد من الاحمدين :) لانه بجد كلام مهم واسئلة اهم ..

جزاكم الله خيرا ياسي / احسان ..

مواطن مصرى نايم يقول...

لا كده
احنا بجد حنحتار
شفقه و احسان
الاسلوب بتاعكم انتو ا الاتنين تحفه
اما بقى النقد بتاع احسن
احسن نقد شفته بجد لحد دلوقتى
الله ينور
نقد فى الصميم
مش هجوم عالكتاب
بجد ابهرتنى بالنقد ده
ميه ميه
eslam

radwa يقول...

نقد بناء جدا ..

لكن لازم نراعى حاجه ياجماعه

لسه كتاب مبتدئين

اول مره ينشروا عمل بالشكل ده

سهروا وتعبوا فيه عشان يطلعوه كده

يمكن ماطلعش كما هو مطلوب بالنسبه لنا

او فيه عدة اخطاء وملحوظات

حلو ان حضرتك تنبه على ده وتلفت نظرهم ..

لانه احنا عاوزينهم يعلوا اكتر واكتر

والكتاب يحقق الهدف اللى اتعمل من اجله

ربنا يجازيك خير على النقد ..

بس كان هيبقى افضل فعلا لو كان داخل مدونتهم ..عشان يشوفوه ويقرأوا ملاحظات ونقد حضرتك

..

اهو ده عيبه يقول...

شوف ياسى احسان
انا موافقاك فى كتير من ملاحظاتك عن الكتاب وعن العدد الاول
احنا كنا كتير جدا فى الكتاب يعنى 43 مدون وده صعب يخليك تركز مع اسلوب كل واحد
كمان تقسيم الكتاب لخبط الناس ومبقوش عارفين كل جزء بيتكلم عن ايه
فى موضوعات اتحطت لناس رغم ان ليهم موضوعات تانية اقوى بس ده طبعا حسب ما بعتوا للاحمدين لكن اقصد ان فيه ناس بانت اقل من مستواها الحقيقى

اما كل اللى قلته عن حفل التوقيع فانا حضرته ولمسته وكان محتاج تحضير احسن
بس ان شاء الله المرات الجاية يكون فيه خبرة وتحضير احسن

لكن بصرف النظر عن كل ده انا سعيده بالفكرة وبالاحمدين وبالكتاب وكفاية اننا قدرنا نتجمع كلنا على فكرة واحده
تحياتى لك وشكرا على ملاحظاتك

سومه...مجنونه فى بلد عاقل يقول...

شفقه ازيك انتى واحسان تسلمى وانتوا اللى حتوحشونى حيث ان هذا اخر تعليق ليا هنا ....وربما هو اخر تعليقاتى فى المدونات كلها
تحياتى ليكى سومه_87

رئـــــيسـة حزب الأحلام يقول...

لا بجد نقد بناء جدا
وبالعكس دة يدل على الاهتمام البالغ أكثر منه نقد
جزاك الله خيرا
تحياتى
مع العلم انا ماجبتش الكتاب

يوميات فنانه مفروسه جداا يقول...

برافوووووووووووووووووووووووووو

نقد هايل وكل كلمه صحيحه وموزونه بجد يعني والله

ياريت يا خدو بيه بأهتمام

اول زياره لمدونه تحفه هتتكرر تاني بعد اذنكو طبعا

دومتمو بخير يا شفقه هانم واحسان بيه

سلامز

smsm يقول...

وجهة نظر برده



مش معني كده ان الانتقادات كلها كويسه


بس بجد مدونه رائعه جدا جدا جدا


واختلاف وجهات النظرلايفسدللود قضية


اختك

smsm يقول...

دي اول زياره ليه وانا ضفة المدونه

دي عندي


وانشاء الله هتكرر

احيكم مدونه رائعه جدا


اختكم

الربان يقول...

تحياتي

اعتقد ان هذه الملاحظات موضوعية...و ان شاء الله يستفيد منها الاحمدين و الاخرين...

تحياتي و تقديري ..

appy يقول...

يا سى احسان
كل النقد اللى قولته اتناقشنا فيه مع فريق العمل وان شاء الله جارى التصليحات الفنيه ولا يهمك بس كان لازم يبقى فيه غلطات فى الاول ومتنساش انه فى المقابل عمل توزيع ومبيعات كبيرة واحمد فؤاد نجم اتكلم عننا يعنى اللى مشاركين فيه
بس انا ليه خبطه عندك بقله
ليه مصريه علشان كل اللى فيه مصريين واه احتكار على المصريين وعنصريه بقى وانا موافقه عليها هههههههههههههه

بص يا سيدى مش معنى انها مدونات مصريه للجيب تتحط فى الجيب لا خالص الفكرة فى تسميتها بعض الناس فهمتها غلط
هو معناها نزول المدونات من على الكمبيوتر للجيب او الشارع مش نفس فكرة روايات مصريه للجيب يعنى مش علشان نحطها فى جيبنا فهمت المعنى من الكلمه

!!! عارفة ... مش عارف ليه يقول...

"مدونات مصرية للسيالة"
يخرب عقلك انا ميت من الضحك والله قولت اجي اقولك وبعدين اجي اكمل

إلا سيالة دي حكاية والله

ثواني اروح واجي

!!! عارفة ... مش عارف ليه يقول...

ايوة يا سيدي

بصراحه كلامك كله في محله

وفي حاجة مهمة جدا في كلامك

والحاجة دي ملقتهاش في مدونات تانية انتقدت العدد الأول وبهدلته وبدون أي رحمة

على العكس من كلامك فعلاً دافع الحب والخوف على المصلحة واضح جداً

فعلا البوست في دا في الجوووول

تحياتي

شفقة هانم واحسان بك يقول...

سوسة ؟؟؟
مش انت اللي ساكنة في شكارة الدقيق اللي في الفرن اللي على اول شارعنا ؟؟؟
هههههههههه
سوري يا أحلى سوسة
حبة جد بقى
كنتي عايزاني ابعت الكلمتين دول للأحمدين ؟
طيب بذمتك
عمرك سمعتي عن سياسي أو اقتصادي انتقد الحكومة على موقعها الرسمي ع الإنترنت ؟؟
ولا ناقد فني بينقد فيلم راح بعت رأيه في جواب مسوجر على عنوان شركة الانتاج ؟؟
ولا صحفي بيقول رأيه في شريط جديد راح باعته على الإيميل الخاص للمطرب ؟؟
لو ده حصل قبل كده قوليلي
وانا أوعدك ما أفتحش بقي تاني خالص

تحياتي
إحسان الأخرس

شفقة هانم واحسان بك يقول...

شهد الكلمات
الحقي كلماتك بتنقط شهد
ركبيلها جلدة
هههههههه
وأحب أبشرك
ان اسماعيل بيه مش لاقي جوزو
بتعمل شوبنج وسايباني
Home Alone

شفقة هانم واحسان بك يقول...

حبيبة القمر ؟؟؟
يا بخت القمر بيكي
باحسده والله

بالذمة حد يبعت تاج لواحدة اسمها شفقة
دي يادوب تلبسيها عمة وطاقيه خيش

أما بخصوص صدور الكتاب فأنا مش بحبها
مافيش وراك كتاب أو شيش ؟؟؟
هههههههههه

تحياتي
احسان الجعان

عاشقة الوطن يقول...

السلام عليكم

هو فعلا توقيت نزول الكتاب ده مكنش مناسب خالص لانه كان قرب الامتحانلات والدعاية لها كانت تمام اوى على النت والفيس بوك غير كده مشفتش دعاية فى الجرايد مثلا او الاعلام الاخر غير النت

بالنسبة للكاتب نفسه فمجبتوش لحد دلوقتى لانى معرفض هو نزل او ناوى ينزل فين او اشتريه منين

ان شاء الله اجيبه قريب

بالنسبة للأجزاء التانية ربنا يوفقهم ويوفق الجميع ان شاء الله وكل واحد بيتمنى يعل ويقدم احسن ما عنده

تحياتى يااستاذ احسان

شفقة هانم واحسان بك يقول...

رحال بيه
طبعا كلامنا لا غبار عليه
أصل شفقة بتنضف البيت كل يوم
وأنا بالذات يوميا بالمنفضة
لأ ماتفهمنيش غلط
ده مش أنا اللي باتنفض
أقصد كلامي
آه
لتكون فاكر حاجة كده ولا كده
لا
ده انا سعيدي بردو

تحياتي
احسان النديف

شفقة هانم واحسان بك يقول...

صح النوم يا اسلام

تعليقك عجبني بجد
واضح انك انسان واعي ومحترف أدب
يمكن أنا ما بادخلش أقرا مدونات كتير
وطبعا ده لظروف شغلي
بس مدونتك بالذات علقت معايا جامد
لأنها حقيقي مميزة وعاملة صدى مع الناس
وأنا قريتلك بوستات في منتهى الروعة

ايه رأيك تحط ايدك في ايدي ونعمل كتاب
أهو يمكن نلاقي ساعتها حد ينقدنا
ويقول فينا كلمة حق
ايه رأيك ؟؟
اسلام
انت مابتردش ليه ؟؟
يووووووووووووه
انت نمت تاااااااااني ؟؟


تحياتي ليك لما تصحى
احسان مخيمر

شفقة هانم واحسان بك يقول...

رضوى

مع احترامي ليكي وللجميع
انت تالت حد يقولي كنت نشرت ده على مدونتهم
ياجماعة ده نقد لعمل أدبي مش انتقاد ليه
والموضوع مطروح للمناقشة
أنا ابتديت وحطيت رأيي بصراحة
وعايز اسمع كل الآراء
وهي دي للأسف الديموقراطية
اللي بنتكلم عنها كل دقيقة
لكن مابنعملش بيها ولا دقيقة

عموما أنا عرفت انك اهتميتي
وبعتي اللينك للأحمدين
وأنا منتظر ردهم
وأحترم رأيهم
أيا كان


تحياتي
احسان الديموئراتي

rara يقول...

مساء الخير
نقدك جميل ياأستاذ أحسان
واكيد اى انسان فى بداية اى حاجة بيعملها ممكن يخطئ
واتمنى من احمدين ان شاء الله
يراعوا نقدك فى الكاتب القادم

وسلامى لشفقة هانم

تحياتى

كيكى يقول...

عوووووووووووووووووووووو انا جيت اتخديت
..............................
.........................
انا الصراحة مقرتش الكتاب..واضح جدااااااااااااا
انك فصفصتوا مووووووووووووت..
بس واضح انك نقدك بناء..جدااااااااااااا..انت مهندس ولا لايييييية ؟ شكلك كدة
واتكلمت فى حاجات محورية جداااااااااا
ومهمة موووووووووووووت
اتمنى اصحاب الكتاب يشوفوا..
...........................
مش احنا اصحاب وجيران ما تسلفنى الكتاب..ممكن..
سلميلى على شفقة هانم
...........................
بحبكم وبتحشونى دايماااااااااااا
عوووووووووووووووووووووو

جنّي يقول...

وست جميل .. جزاك الله خيرا

أعتراضتك في محلها ولكنها متأخرة شوية ..

بالنسبة للأسماء المستعارة .. أفهم من كده إن أسمائكم شفقة وإحسان فعلا .. هي أحسان أم إحسان ؟؟

----------------------------

حبا فى رسول الله

نجتمع دائما معا لنطبق منهجه صلى الله عليه وسلم فى كافة أمور الدين والدنيا فنكن بإذن الله خير أمة أخرجت للناس كما وصف الله أمة خير الأنام فهل نكون خير أمة ؟؟
هل نلبى الدعوة لنجمع جهودنا ونصطف معا كالبنيان المرصوص و نشد بعضنا بعضا كلٌ فى مجاله بفكرة أو نصيحة أو مساهمة فعلية

هل نثبت حبنا لرسول الله فعلا لا قولا ؟؟

فالحب أفعال لا أقوال

هلموا معا نجتمع ونتفاعل ونصلح من شأننا كله

حباُ فى رسول الله

http://www.7obnferasolallah.blogspot.com

http://www.facebook.com/group.php?gid=18625528460


http://la3lahakhier-2.blogspot.com/


ساهم معنا ولو بوضع إعلان الحملة فى مدونتك

_**( قلب الأسد )**_ يقول...

بصراحة فكرة الكتاب اكثر من رائعة
والاروع نقدك البناء
تقبلو تحياتى

radwa يقول...

هو حضرتك زعلت من ردي ولا ايه ؟؟

ماقصدتش والله ده

بالعكس والله نقد حضرتك بناء جدا جدا

انا قصدت بس انه يوصلهم عشان يتجنبوا الملاحظات دي المره الجايه ان شاء الله

دمتم بود ..

GeHaD-----(male) يقول...

تصدق يا حج احسان ان الملاحيظ اللي انت قولت عليها دي مهمه جدااا
بجد تسلم دماغك وبعدين ازاي دار النشر مخدتش بالها من الحاجات دي
علي العموم الكتاب الجاي يبقي جامد ويتلاشي الاخطاء دي
تحياتي ياحج احسان

Desert cat يقول...

سؤال جديد على مدونة برنماجنا الاذاعى
انت تسال والكمبيوتر يجيب
http://netradio.blogspot.com
والذى يذاع يوميا الساعه 9.10 صباحا ما عدا يوم الجمعة
السؤال هو

الأشاره حمراء
الأشاره خضراء صفراء لافرق فانت متاخر متاخر عن موعدك ....ايه كل العربيات دى؟المرور متوقف لا يتحرك وبعدين لو اقدر اطير!؟؟؟ وتفكر وتسرح ....ما هو السكه واقفه....تفتكر حيخترعوا سيارات تطير؟؟؟؟ ونحب نعرف منك بماذا اجبت .
تمنياتنا بدوام التواصل

momken يقول...

عقبال كتب كتابى
انشالله حتى يكون الغلاف خناقه
ويكون كل المعازيم متحاملين على الماذون الدى جى
هههههههههههههه
النقد فى محله لكن عذرهم انها اول تجربه

واول تجرب يغفر لها الاخطاء

السبقه الاولى زى ما بيقولوا


تحياتى للست شفقه هانم


تحياتى

شفقة هانم واحسان بك يقول...

أهو ده عيبه

حلو اسمك أوي
محسسني انك حاطة صباعك على غلطاتنا
شايفة العيب وبتشاوري عليه
بس اوعي تشاوري عليا
لحسن دي تبقى شتيمة
وأنا ما أسمحش لحد انه يشتمني
(غير مراتي) طبعا
ههههههههه

أنا شايف اننا متفقين
لأني أنا كمان سعيد بالفكرة وبالأحمدين وبالكتاب كتجربة أولى
وربنا يوفق الجميع يا رب

وهـو ده احسان

شفقة هانم واحسان بك يقول...

سووووووووووووومة
اوعي تسيبينا
هتسيبي السرايا الصفرا ورايحة على فين ؟؟
اوعي تكوني ناوية تعقلي !!
لأ ... خلي بالك
الحكاية مش سهلة
حلو أوي انك تكوني مجنونة في بلد العاقلين
بس صعب جدا تعيشي عاقلة في بلاد المجانين


زميلك/ احســــــان
من عنبر الحالات الخطرة

شفقة هانم واحسان بك يقول...

رئيسة حزب الأحلام ؟؟
إيه حزب الأحلام ده ؟؟
وايه شروط العضوية ؟؟
طبعا شرط أساسي ان العضو لازم يكون كسلان وبينام كتير
ويحضر الإجتماعات بالبيجامة الكستور المقلمة مش كده ؟؟
والعضوات ممكن يحضروا بالروب ولا بجلابية نانسي عجرم ؟؟
والأعضاء بقى بيحضروا الجلسات ولا بيحلموا بيها ؟؟
آه شفتهم في التليفزيون نايمين في جلسات مجلس الشعب
لا حقيقي ربنا يوفقكم

بس بغض النظر عن اسم الحزب
كلامك محسسني انك رئيسة حزب بحق وحقيق
"نقد بناء جدا"
"الإهتمام البالغ"
"ومع العلم"
ايه ؟؟
مع العلم ايه ؟؟
يا نهار اللللللووووووووو
ماجبتيش الكتاب لغابة دلوقتي ؟؟
ده بـ 4 جنيه يا ريسة
ولا كالعادة ميزانية الحزب لا تسمح ؟؟



مع تحيات / احســـــان بيه
رئيـــــس حـــــزب
"النايمين على جنبهم اليمين"

شفقة هانم واحسان بك يقول...

يا مفروسة جدا

طب بالذمة انتي مفروسة من ايه ؟؟
لسة ناجحة بتقدير جيد
وعلطول لاقيتي شغل
وكمان ديزاينر
وبابا وافق
كل ده ولسه مفروسة جدا ؟؟
أمال أنا أبقى ايه ؟؟
منقوط جدا ؟؟
معلول جدا ؟؟
على رأي زميلك الفنان عادل امام
بلد شهادات صحيح


تحياتي كده وكده
احسـان السماوي

شفقة هانم واحسان بك يقول...

سمسم

طيب ده يتقرى ولا يتاكل ؟؟
ولا يعملوه حلاوة طحينية ؟؟
ههههههههه

نورتينا وشرفتينا وشبعتينا وحليتي بقنا
يا رب دايما

بس كان نفسي اعرف النقط اللي انت مختلفة معايا فيها
فبرأيـكم نستفيد
وبعلمكم نستزيد


تحياتي
احسان سادة
(من غير سمسم)

شفقة هانم واحسان بك يقول...

أيها الربان

لقد أفدتني بتعليق موجز
فــلابد حين أرد أن أوجز

شوكران

إيما ( أم البنين) يقول...

في الحقيقه أنا لسه مقرأتش الكتاب وطبعا ولا حضرت الحفله ..ومقدرش أحكم إن كان كلامك ده صح ولا لأ..لكني أحترم نقدك فحق المسلم على أخيه المسلم النصيحة لله ..وأنت قد قمت بذلك
جزاك الله خيرا
سلامي لشفقه هانم كتيييييييييير

يوميات فنانه مفروسه جداا يقول...

يا استاذ احسان

انهارده الخميس

كان عندنا كتكوت وفقس
وورده وفتحت عملت زي الكف

قل اعوذ برب الفلق يا سيدنا

ليه كده دا انا غلبانه ولسه ففي فترة تدريب يا اخدوني يا لا

حرام عليكو يا ناس والله

دانا علي اد حالي وبصرف علي عيله

دانا عندي اب واحد وام واحده

عااااااااااااهئ ئ ئ ئ ئ ئ ئ ئ

موناليزا يقول...

نقد بناء حقا
ورغم عدم رؤيتى للكتاب او مشاركتى فيه بس قدرت اتخيل من كلامك
وعجبنى جدا التعليق على كل شئ خاص بالكتاب
وارجو ان نكون كما اشرت مرآة لبعضنا البعض

oRiGiNaL HeArT يقول...

السلام عليكم
نقد منطقى والله وياريت يوضع فى الاعتبار عشان الفكر تطلع باحسن شكل
وتستمر بصورة جيدة

بس انا ليا عتااب :[
مالهم بقى الصعايدة :]؟؟

ٍSOU يقول...

عندك حق فى حجم الكتاب و ان اوراقه كتيرة .. انا لاحظت كمان ان الطباعة مش مظبوطة النسخة اللى عندى فيها طباعة بالورب و فى اخطاء املائية ..
لكن الحق يقال ..ان الفكرة كانت جميلة و الغلاف كان جميل جدا
و الكتاب متنوع لانة بيهتم بكل حاجة حوالينا

بس اكيد العيوب دى لانة التجربة الاولى ففى بعض الاخطاء ان اشالله تتلاشى العد دالجاى

ابو درويش يقول...

دى اول زياره ليى
مدونه جميله ودمها زى الشربات
ارجو لك التوفيى
السلام عليكم
تحياتى
من ابودرويش

فارس بلا جواد يقول...

مدونه روعه
حلوه قوى يا احسان هانم وشفقه بيه
تقبلوا تحياتى

شفقة هانم واحسان بك يقول...

appy
اسمك حلو أوي
بيفكرني بفيلم "أبي فوق الشجرة"
هههههههههه

بس كفاية هزار بقى
نفسي اتكلم جد شوية
احم احم
انا معاكي في ان السابقة الأولى ماتتحسبش
علشان كده احنا بننوه عن الخطاء اللي شفناها
نفسنا ماتتكررش والا كده هيبقالهم صحيفة سوابق

أما بخصوص خبطة القلة
فدي ما وجعتنيش خالص
واضح انها مش من النوع القناوي المتين
أو جايز دماغي هي اللي أنشف من القلة
لأني مازلت عند رأيي في ان اقتصار المدونة على المصريين ده اكبر غلط
ومش عارف عمليا ده تم ازاي ؟؟
ماكانش فيه شرط الجنسية في مرحلة جمع الأعمال
يعني وارد جدا يكون اتبعتت اعمال جيده أصحابها مش مصريين
طيب دول بقى تم التعامل معاهم ازاي ؟؟
مش ممكن تكونوا استبعدتوهم لمجرد انهم مش مصريين !!

مش قادر أتخيل اننا إستبعدنا عمل بيتكلم عن تضحيات شهداء الأقصى لمجرد أن الكاتب فلسطيني
ولا اننا تجاهلنا قصة عائلة استبيحت أموالها وأعراضها وربما أرواحها لأنها قصة لعراقي
وازاي نكون قد وئدنا حلم فتاة تبحث عن ذاتها لأنه حلم فتاة سعودية ؟؟

مش ممكن يكون ده حصل في كتابكم
ولو كان حصل
يبقى احنا كده ارتكبنا جريمة قتل في حق الأعمال دي
وأوقعنا أشد الظلم على هؤلاء الكتاب الجدد
مش كده ولا اييييييييييييه ؟؟؟

أهي دلوقتي بقت الكورة (قصدي القلة) في ملعبك
ولو ان شكلك كده هتخبطيني المرة اللي جاية بزير
ربنا يستر وينتهي الحوار بينا على خير


وبرضو تحياتي
احسان القناوي

appy يقول...

مش ممكن تكونوا استبعدتوهم لمجرد انهم مش مصريين !!

لا خالص يا احسان مستبعدناش ومحدش اساسا اتقدم بجد مش مصرى وطبعا لو فيه عمل حلو زى ما انت بتقول استحاله يترفض بس انا هوصل رسالتك لفريق العمل لان كل الافكار بننقلها على فكرة انا مش الفريق بس على اتصال بيهم وقولت لهم على نقدك اللى عجبنى بجد
اى قلل يا جميل