الأربعاء، 25 يونيو، 2008

بــــــــادى استومك....وبنطلــــــــــــــون ساقط....وشبشب زنوبه


النهاردة يا جماعة هيتم اذاعة الموضوع من الحمام .............نظرا لاهميه الحمام...... وخاصة فى الحر والصيف

كمان الموضوع مهم و مطرقع على الاخر...... وهيلبكوا لبه ..........مالهاش حل صوتها هيوصل لاخر مدونه

ده نظرا لاننا .......هنستخدم الشبشب النهارده كتير....لا ما تفهمونيش غلط .......اقصد هنستخدمه فى كلامنا

********

الواحد مش عارف ايه اللى بيحصل اليومين دول وايه اللى جرى ........للولاد والبنات؟؟

بلا نيله على الولاد............وستين واكسه على البنات

********

بجد يا حلاوة يا ولاد على............. الطعامة واللذاذة....... وقله الادب اللى الواحد بيشوفها كل يوم

قال ايه البنات ....الاقى كل واحدة منهم عايزة قطم رقبتها

ماشيه تتاصع فى الشارع وهز يا وز ....والله الوز استعر منهم ......ما اتعدلى رجلك الملووحة منك ليها

ايه يا بنتى المشية دى...ترد تقولك دى مشية "الكات ووك".... يخرب عقلك انت و الكات

وحياتك انتى..... دى مشية " الكيت كات "مش.... الكات " وبعدين انتى هتنونوى فيها ؟؟

********

شويتن الاقى التانيه ماشيه وهاتك يا ندغ باللبانه....... وطرقعة وتعملك بالونه

وصوتها جايب اخر الشارع يا شيخة ........لمى بقك المفتوح على البحرى ده زى السيد قشطة

شويه كمان الاقى الست هانم .......واقفة مع شاب فرفور وحاطه ايدها حوالين رقبته

سيدى يا سيدى

وهاتك يا مياصة ودلع فى الكلام....... شويه باباه وماماه وهى بنت البواب بتاع العمارة

وقال ايه البت عامله نفسها بنت ناس اوى ورقيقه

طيب انكشها كده وشوف ايه اللى هيحصلك ...... اما سمعت صوت....... ولا نهيق الحمار ما بقاش انا

*********

المصيبه بقى ان كل ده ....... بقى عادى ......لكن الكارثه انك تلاقى البنت من دول واقفة فى البلكونة تشاور لده

وتنادى على ده ......وتلاقيها هى اللى بتعاكس كمان يخرب عقلك انتى وهى

بس العيب مش عليكى ............العيب على البيه اللى قاعد جوه

*********

شويه والموضوع تطور تطور الى ان ارتفعت حرارته..... خالص مالص

وبقت البنات ماشيه لابسة المحزق..... والملزق

يعنى يا اختى مش خايفة النمل يتلم على الملزق ده...... ولا انتى بتحبى القرص؟؟

*********

"والله الواحد مش عارف يقول ايه"


المهم .... قلنا معلش نظرا للظروف النفسيه .....اللى هما فيها والعنوسه.... والبوران ......والشحتفه على الجواز والكلام ده


خلاهم يتلخبطوا ويتجننوا .........لان ما فيش حد اتعمى فى نظره وبصلهم


فبقوا هما اللى بيعاكسوا ...... قالوا لما نشوف يمكن ييجى منه


كمان دى وقلنا يللا ........معلش ازمة نفسيه وهتعدى


*********

حبه كمان ومع التطور البنات بقت........... بتسهر طول الليل


وتخرج وترجع وش الفجر................... ما شاء الله قلنا معلش

لا بجد متربيـيــــــــــــــــن


*********

وولاد ناس ولو مخرجوش.......... يسهروا طول الليل ......يكلموا الولاد على الشات


لا بقى دول عداهم العيب وقزح


*********


المشكلة بقى الهدوم يا عينى......... كل واحده مش طايقه هدومها وتلاقى لبسهم طول السنه صيفى


ارجع واقول ........معذورين حرام اصل الجو حر مــــــــــــوت


********

تلاقيهم خارجين لابسين...... بديهات ستومك....... وبنطلونات هتتفرتك من عليهم


وطبعا عارفين يعنى ايه ستومك...... يعنى تقريبا مفيش حاجة خالص


البدى عمال يطلع والبنطلونات عماله تنزل


يا دوب البدى مغطى 2 سم


يعنى يا كميله انتى وهى مش حاسه بشوية برد تحت ؟؟


طيب مش خايفة على نفسك من الذئاب البشريه ولا انتى خلاص بايعة القضية؟؟


قال ونرجع نعيط بعد كده ونقول........ الشباب بيضايقونى


جتك قطع رقبتك انتى وهى......... والحته اللى باينه من البدى دى


*********

الاجمل كمان على راى واحدة صاحبتى..... موضوع الحلق اللى فى المناخير


يعنى مش مكفيكى اللى فى ودنك؟؟ ....طيب يارب ياخد مناخيرك ويقع


ولا الخلخال بتاع تمر حنه .....اوه على الشياكه


تلاقيها حاطه فى رجليها


ولا اجدع غازيه


طيب ما تروحى تشتغلى فى الموالد يا حبيبتى انتى وهى


*********


لا والجميل بقى والارقى والاحدث....... الشبشب الزنوبه

بتاع يا خارجة من باب الحمام......بقى موضه


اه والله تلاقى الواحدة من دول رجليها مقشفة......... وصوابعها طول كده


وماشيه بالشبشب ورجليها عريانه طيب ........غطى العار اللى انتى مبيناه ده


فرحانه بصوابعك...... قال يعنى صوابع زينب"!


مع احترامنا الشديد ..... للاستاذة زينب طبعا


*********

يا بنتى الموضه دى فى البيت........ ذنب الناس يتعموا بالمناظر والروايح دى ليه؟


على العموم انا بطالب بوقف بيع الشباشب الزنوبه


نظرا لسوء الاستخدام


وبفضل المشى حافيه القدمين " اقتباسا من فيلم...حافيه على الجسر"


*********


انتى فاكره ان بكده حد هيبصلك ؟؟ ممكن يحترمك ويقدرك ؟

ممكن

بس اعتقد انه ..............هيقدر صوابعك مش ........انتى خالص


*********

طيب نروح للقسم التانى الشباب....... كوتو كوتو كوتو موتو


اسم النبى حارسهم وصاينهم


رجاله المستقبل الاغبر


حاملين رايات الدمار الشامل


*********

قالوا واحنا منقلدش البنات ليه؟؟............ يعنى هما احسن مننا ؟؟


اه المهم..... اتلم توتو على موتو وعملوا اجتماع على مستوى الرجلين


و قالوا لازم نغيظ البنات


ونشوف مين فينا .........اللى هيطلع حته اكتر من التانى


********

وتحــــــــــــــــــــــــــــــــــدى


********

كمان قالوا احنا لازم نطالب فى حقنا ...... بالمساواه فى الشبشب ابو زنوبه


ولا علشان زنوبه مونث....... يبقى تروح علينا احنا .......لا


*********


هنقلع الجزم بتاعة زمان دى بتاعة ايام "نهارك سعيد"


ونلبس الشبشب ........الموضه بتاع "هالو ايفرى بدى"


وقعدوا يفكروا فى اختراع جديد... كمان للحزام


لحد ما خلوه بفيونكة كده......... و بينور وعليه ....سلاحف النينجا ....ودباديب وأرانب


لا بجد هايلين......... هو ده الشباب الواعد والا فلا


*********

بسم الله ما شاء الله عليكم


كمان تلاقى الشاب من دول ........يا ختى كميله كوتو كوتو


ماشي يتاصع فى الشارع........ ولا اجدع رقاصه .......نفسى بس اعرف بيهز ايه؟؟


بس شكلهم عاملين مسابقة مع البنات


علشان مسابقة اختيار .......اجمل " تاصيعه"


********

الاجمل بقى لبس ...... السلسلة وفى دى بقى تلاقيهم بيقلدوا..... الكلاب


اه ......علشان لما الواحد يحب يجرجرهم........ يلاقى حته يمسكهم منها


و الاحلى الحظاظة...... بتاعة كده بيلفوها حولين ايديهم


اه مهما ولاد فقــــــــــريه


علشان كده قالوا نخترع حاجة تفك النحس .........ولا يبقى من كله؟؟


********

وكمان تلاقيه مربى شعره ومستحماش بقاله شهور...... ويقولك عامله سبايكى


" موضة...... اه ......موضة بيقلدوا السباكين


مهى اسبايكى .......يعنى سباك بس نيو لوك"

*******

وفى منهم عاصر على شعره ليمون ويقولك ده جيل


يا ابني الجيلى ده بيتاكل مش....... بيتحط فى الشعر


وتلاقى شعره كل شعرايه فى حته .......وكانها بتجيب القنوات يعنى زى الاريل!


*********

وتبص تلاقيه لابس بلوزة مش قميص


بلوزة شيفون ومخرمة من كل حته........ وفاتح الزراير لحد بطنه.


بيهوى من الكاتمة ....اللى هو فيها


والالوان مقولكوش على الالوان حاجة ايه شفتشى .... فوحلؤى على بمبه مسخسخ .......اخييييييه


طيب دارى...... قال يعنى الواد بيغرى البنات


يا ابنى دى الوان........ تعمى مش تغرى!


*********

ويا سلام بقى على النص التحتانى ..........بنطلونات ساقطه انما ايه ...جنان


الواحد كده لو خبط بس فى حد منهم يقع البنطلون منه عدل


طيب ليه يا حبيبى....... هو انت بتتلكك ؟؟


طيب ما بلاش خالص .........تاعب نفسك ليه ...امشى ملط واعتبر نفسك فى مالطا !


الظاهر كده ان انا اللي بادن في مالطا

*********

كمان تلاقى الواحد منهم مفنجل عينه اد كده ........وفاتح بقه على الاخر


وقاعد زى الاهبل بيتفرج على التليفزيون


ولو باباه ماسك شويتن


تلاقيه طول النهار على القهوة اللى فيها وصله دش وجايبه القنوات اياها


وقاعد متنح لا بيصد ولا بيرد


********

ويا خرابى لو شاف فيديو كليب لواحده من المطربات اياهم....... تبقى حكايه


وتلاقيه قاعد يحلم وعمال يفكر....... يا ترى اللى هيتجوزها هتبقى شبهم....... ولا ايه


وفى الاخر تطلع...... ولا ايه ......ويتجوز ستوته


يا شيخ اتنيل انت وهو....... وانت بالشكل ده ينفع تتجوز الا ستوته...... ده ان ستوته رضيت اصلا


********

ده الواحد منكم بقى خرع......... ومايستحملش ضربه


ولا لو حب يعمل واد جامد ومثقف تلاقى........ شارى كل المجلات الاجنبى


وقاعد مبحلق فى الصور...... اصلا تلاقيه ما بيعرفش يقرأ


وتقوله بتعمل ايه يقولك وانت ايش عرفك انت ....... صحيح وانت ثقافتك عنجليزى؟؟


مش المهم القراءات .........المهم ما تحتويه صفحات المجلات .......من بيكينى ومايوهات


*********

ولو قعد شوية فى البيت لو مين نده عليه ولا كأنه هنا لا بيشترى حاجة ولا بيجيب حاجة .....صم بكم عمى


ولا هو هنا اصلا...... تلاقيه قاعد ادام النت وبيعمل..... ابحاث خطيره


علشان هيبقى باحث ودكتور اد الدنيا .....امـــــال


بس الرسالة بتاعته هتكون فى


توقيع البنات وكيفيه الزوغان منهم عند اللزوم واثر ذلك .......على الابهات والامهات والمجتمع

" دراسة مقارنه"


*********

والنتيجة بعد كل ده يا شباب ويا بنات...................... صياعة وكلام فارغ وفقدنه وادمان ومخدرات


للاسف ما بقاش عندنا غير التقليد ولبس المايوهات


يعنى للاسف ما بتعرفوش تاخدوا من الغرب غير التفاهات


انتم كده للاسف .......تسيبوا الايجابيات وتاخدوا السلبيات


وســـــــــــــــــــــــــــــــــلام بقى علشان عايزة اعمل نيولوك ...... وهاشترى شبشب زنوبه



شــــــــــــــــفقه

هناك 84 تعليقًا:

ليلـــــــــــــــــــــــــــــى يقول...

و كمان تى شيرتات الولاد بقى فيها ترتر و جليتر مع شوية ألوان من اللى قولتيها يبقى يختى كميلة فعلا
تصدقى و الله أنا بقيت أدخل المحل من دول ما ببقاش عارفة ده حريمى و لا رجالى الاقى الراجل اللى بيبيع يقولى: "على فكرة ده رجالى" و أنا كنت فاكرة المشكلة فيا :)
كمان الوضة المقززة للبنات الخواتم فى الرجل و حلقان المناخير و الصرة
تبقى نازلة من بيتها و لا أجدع رقاصة

و كان فى زمان برضه موضة و بطلت الحمد لله اللى هى بقى ايه؟ ماسكارا للشعر اشى أخضر و اشى أزرق و كانوا بيلونوا بيها خصل الشعر و تبقى نازلة و لا أجدعها تليفزيون ملون :)))))))

كمان طريقة كلام الولاد و لو بياكل لبانة بقى يا سلام حاجة كده زى لوسى بتاع اشاعة حب.


و الله ماعرفش ايه الحل فى الظاهرة الغريبة دى بس لازم يبقى فى شوية رقابة من الأهالى و شوية حزم على الهبل ده

معلش طولت عليكى حبتين بس أصل الوضوع ده بقى منتشر أوى

Reem يقول...

على فكرة كل المظاهر دي موجودة في كل مكان مش في مصر زي عندنا هنا في السعودية بتلاقيها في العبايات و اشكال العبيات و المحزق والملزق و اللي بتتطرز في حتت معينة الحتت اليي عليها الكلام عشان تبان انوثتها يعني و اللي بتطرز نمرة الموبايل او ايميلها في طهر العباية و هلما جر و الولاد بقى نفس الاستيل اللي عندكو والالوان بصراحة انا مرة دخلت مع اخويا محل ملابس شباب شفت بلوزة قولتله لما الولد يلبس دي خليتو ايه للبنت تلبسه بجد المحل كان في شباب حسيت انه كلمتي دي بج كسفتهم اوي
كل هم الولاد بقى السعي انهم يبقو شباب الكول وده المسمى اللي يطلق على الشباب دول بتوع الساقط ولو اني بحس بالامان اكتر في المول الللي مليان بشباب الكول اكتر من الشاب السعودي التقليد لسبب انه شاب الكول مش بيدايق او يعاكس الا اللي عايزة وتدي اشارة غير كدة بيسيبك في حالك اما التاني فمصيبة والله لو ماشية زي الخيمة ممكن يعاكسك

ايه كمان اه الموضة اللي بجد بجد بكرها من قلبي موضة الشتيمة مش عارفة ليه مش هيحلى الكلام الا لما يشتمو صاحبتي تيجي تقولي ريم وحشتيني يا حمارة و التانية ليه ما بتتصلي ياحيوانة وحشتيني مش فاهمة ايه اللغة دي بصراحة بتريق واقلهم اذا كدة واحشاكو امال لما نتخانق هتقولولي ايه بجد حاجة تخنق و دايما بدايق و اقول ياريت تحترمو الفاظكو شوية لكن لا حياة لمن تنادي

Reem يقول...

يالهوي

انا اسفة جدا على الرد الطويل ده بس موضوع فتح حاجات طول عمري مغلولة منها و ماصدقت افضفض عن شوية منها
اسفة بجد

دكتور بهــدوء يقول...

وااااااااااااااو
وصف ولا أروع
آآآه يا شفقه الشباب بقو يعلّو
والنخوه راحت يا ولااااه
اه والله صدق اللي قال
الرجاله ماتت ف تلاته وسبعين

شهد الكلمات يقول...

بتاع يا خارجة من باب الحمام......بقى موضه

اه والله تلاقى الواحدة من دول رجليها مقشفة......... وصوابعها
ههههههههههههههههههههههههه وجعتي بطني من الضحك في الحتة دي

موضوع حلو

بس انتي نسيتي ان دلوقتي كمان طالع موضة للرجالة ام شنبات باديهات بالترتر و الالمازاط انما اية تجنن تشوفيه تقولي بربروء

المشكلة يا ست شفقة ان اللي بيلبس الحاجات دي مش بيبص لنفسه في المراية يعني الشملولة اللي بتلبس هدوم من غير هدوم لو فكرت انها لو ماشية بتتقصع بالكات ووك و جات عربية حلوة كدة راكبها واد مسقط بنطلونه و ضارب الجيل و راح خبطة البت ماتت و هو غار في داهية علي السجن هايستفادوا اية

لما يقفوا قدام ربنا الحلوة الطعمة شهيدة الكات ووك دي هاتودي وشها فين لما ربنا يحاسبها علي جسمها اللي ماصانتوش و خلته فرجه للي يسوا و اللس ما يسوا

و الخروف التاني اللي ضيع عمره كله في هلس لما ربنا يسأله عن عمره فيما افناه هايقول اية

عموما الواحد لو فتح في الكلام مش هايتسد ربنا يهدي و يتوب علينا من المناظر المنيلة دي

تحياتي يا شوشو و بقي زوريني :)

ذربونة هانم يقول...

انا مش عارفه ليه مش عارفه اقرا حاجة
السطور كلها راكبه على بعض
:'(

شفقة هانم واحسان بك يقول...

ليلى
كل مرة تيجى لوحدك....ايه انتى زعلانه مع قيس ولا ايه؟؟
بس بقولك ايه ابقى خلى بالك وانتى بتشترى لحسن تلاقى نفسك قلبتى لراجل وانتى مش دريانه

شفقة هانم واحسان بك يقول...

reem
منورة انتى واهل السعودية كلهم ....ما عدا بتوع العبايات المحزقة اللى قلتى عليهم دول
وبعدين بتقولى حاطين رقم موبايلهم على العبايه؟؟
طيب ما يوزعوا كروت احسن بدل ما حد ياخدها مخالفه
اما بالنسبه لموضوع الشتيمه....فاظاهر ان اصحابك بيحبوكى مووووووووت

شفقة هانم واحسان بك يقول...

دكتور بهدوء
منورنا بشويش يا دوك
وبعدين الرجاله ماتت فى تلاته وسبعين امال الموجودين دلوقتى دول ايه.... وانت مين؟

شفقة هانم واحسان بك يقول...

شهد الكلمات
منورانا يا شهد
بس بقولك اقوم اعملى نعناع على ينسون علشان وجع البطن ده مش ناقصين تهم
اما بالنسبه للخرفان فهما بيوعدوكى انهم بعد البوست ده ان شاء الله هيبطلوا ماء ماه

شفقة هانم واحسان بك يقول...

ذربونه هانم
منورانا بس ما تزربنيش علينا اه احنا كمان عندنا شعره ساعة تروح وساعة تيجى
اما بخصوص انك مش عارفه تقرى حاجة فده مش من عندنا من عندك انتى ..وبلاش حجج فاضيه

عاشقة الحب يقول...

ربنا يعينا على هاذا المجتمع
بس برضو الموضوع مش بالسوء ده
في ناس برضوا محنرمين

نحياني

Sampateek يقول...

فعلا الوضع بقى فوق العادي انا بستغرب الناس دي معندهومش مرايات في بيوتهم و بيبصوا يشوفوا اللي عاملينه في نفسهم
بلاش
معندهمش اهل يقولولهم كده ميصحش شكلكم زبالة؟؟
ربنا يهديهم
تحياتي

سفينة يقول...

بجد موضوع تحفه

منتهي الروعه في النقد للواقع المرير

لحال البنات والولاد كمان وللأسف
........
تقبلي مروري،مع ارق امنياتي بالتوفيق الدائم

قبطان

حبيبـــــــة القمـــــر يقول...

تصدقي ياشفقه ياحوياتي ان عندك حق بحق وحقيقي
الشباب بقى يشوف التمدن في اللبس المفتشي والتخلف بل قمة التخلف في الزي الاسلامي والدنيا تقوم وتعد لو حد قال فين الحجاب
حسبي الله ونعم الوكيل
على الثقافه المنحله اللي غزت افكار الشباب وعمت عنيهم عن عاداتنا وتقاليدنا وديننا

حبيبـــــــة القمـــــر يقول...

شفقه ياحبيبتي قولتي نفسك في التاج وعينك كانت عليه وقلت خديه ميغلاش عليكي (ضحكتي عليا) وعشمتيني
والموضوع طلع اونطه ولا شفتلك تاج ولا يحزنون

بس انا مش هسيبك طبعا هههههههههه

المرة دي ياجميله جايبالك واجب اخر روقان
هتستلميه زي الشاطرة كده وتحليه كله
تعاليلي تعالي اوعي تتأخري بقى

Music Lovers يقول...

hhhhhhhhhhhhhhhhhh , funny post

شفقة هانم واحسان بك يقول...

عاشقة القمر
انتى منورة الكوكب بتاعتنا
وبعدين عايزة اقولك عايزة ربنا يعينك على المجنمع كله مش شايفه انه كبير شويه عليكى؟؟

شفقة هانم واحسان بك يقول...

سمباتيك
منورة الجيم يا قمر
وحياتك انتى هما ما عنهمش حاجة خالص ...ولا حتى دم

شفقة هانم واحسان بك يقول...

سفينه
منور ....بس لازم تكلمنا من وسط البحر كده..مش خايف لنغرقك؟

شفقة هانم واحسان بك يقول...

حبيبة القمر
منورة يا حياتى...انتى تقصد ان الشباب بيلاقى التنتن فى اللبس المفتشى مش التمدن بس كتبابه الحروف خانتك
سؤال....ايه ثقافة الحلة دى؟؟

شفقة هانم واحسان بك يقول...

حبيبة القمر
نسيت اشكرك على التاج ....بس عارفة لو طلع فالصو....انتى حرة

شفقة هانم واحسان بك يقول...

music lovers
thanx 4 u

سمر الشافعى يقول...

استنو استنو ايه حكايه الكات واك دى مسمعتش عنها قبل كدا الدنيا بتتغير ياجدعان من ورايا هههههه

بس اللى بيغيظنى اكتر بجد منظر الرجاله وهما بيلمعو كدا ولابسين ترتر ياحلوللى

تحياتى عالبوست الجامد وربنا يرحمنا من المناظر دى

شفقة هانم واحسان بك يقول...

سمر الشافعى
منورة يا سمورة
وطبعا الدنيا بتتغير من وراكى علشان تلاقيكى انتى اللى مدياها دهرك
الكات واك يا ستى ان تلاقى واحة ماشيه رجليها داخله فى بعض ومعوجه بتقدم رجل يمين بس بالجنب والشمال وهكذا لحد ما تقع على وشها باذن الله...يارب اكون افادتك

حنين.. يقول...

والله وانا بقرا من اول سطر عرفت انى دى شفقه والاجر ع الله ههههههههههه هى اللى كاتبه الموضوع.......... بصى يا شفقه, لالا بص يا حسونا..... حسونا, اه. واحنا صغيرين كنا بنغنى اغنيه ايه بقى( حسونا ضرب كلسونا وقع ميه من الحراميه كنت فين يا غفير لما العمده مات قتيل... الى اخر الاغنيه....ههههههههههههه) انا مقعده كل الناس وعامله نفسى مذيعه وممثله مطرقعه, وبقرا لهم البوست, طبعا هما فقدوا السمع من كتر الضحك.... والله ولى المحسنين......... بحييكم اوى على البوست...( اصحابى بعد الامتحانات سالونى هتعملى ايه بعد الامتحانات , قلتهم هتفرج على شفقه واحسان, قوللى على قناة ايه....., طبعا مرديتش الا لما اجى واسالكم؟ بحييييييييكم على المدونه. طبعا بعد كل الرغى دا كله مقولتش رأيى فى الموضوع( رأى انى البنات عايزين ضرب الرصاص... والشباب ربنا هيدهيهم بعد كدا. وتحتل المشكله) تحياتى ليكى يا شفاشق

Sometimes يقول...

ههههههههههههههههههههههه
دراسة مقارنة
مش معقول الصدف دى ابدا
ههههههههههههههههههههههه
اصل كان عندى النهاردة امتحان تربية مقارنه
شفتى ازاى

بس تعرفى المقارنة بتاعتك دى الذ بكتييييييييييييييييييييييييييييير

المهم ربنا يهدى الجميع يارب

إيما ( أم البنين) يقول...

أولا باشكركم على سؤالكم عني الفتره إللي فاتت ..لكن لم يمنعني عنكم غير الشديد القوي..أولادي بدؤوا إمتحانات وكمان النت كان مقطوع ..وحشتوني جدا..المدونه ما شاء الله في تقدم
النصائح للزوج يا شفقه ..جميله جدا ..وأسلوبها جميل ويموت من الضحك..
أما لموضموع الموضات العجيبه دي فعندكم حق أنا شخصيا بعاني من الموضوع ده زياد باستمرار عايز يعمل شعره سبايكي لكن أنا له بالمرصاد أنا وابو البنين...لكن في شباب تانيين زي الفل وكمان بنات ملتزمات ومحترمات..ربنا يحفظهم ..وياريت تكتبوا عنهم بإسلوبكم الجميل ده علشان نوضح الصورتين ..
ولكم جزيل الشكر
تحياتي
شكرا لضمكم لي لقائمتكم الجميله

ذربونة هانم يقول...

طب و الله انا طلعت و دخلت كذا مرة
و برضه الشطور كلها راكبه على بعض

انا شكلى نحس اوى
:(

مواطن مصرى نايم يقول...

عندك حق جداااااااااااا
بس انا و الحمد لله
تقدرى تقولى شاب من الشباب اللى لا ينساق
لمثل هذة الاشياء
من تفاهات البنات و هبل الشباب
و عمرى ما سقطت بنطالون
و لا لبست حظاظة
و مش بحب اللى بتعمله البنات دى
و بستهيفهم جدااااااا و الله
بس انا بحط جيل
و ده مش عيب
و الحمد لله
بس موضوع جامد جدااااااا
و اسلوب لذيذ و تحفة
الله ينور عليكى
تحياتى
eslam

شفقة هانم واحسان بك يقول...

حنين
منورنا واشتقنالك كتير
بس خفى علينا موضوع الرصاص والحراميه ايه يا بنتى انتى بتشتغلى مع البوليس ولا ايه؟؟
اما بخصوص القناة فاوعدك ان شاء الله اننا نعمل قناه كده من القنوات المفرفشة دى وهتشوفينى فيها بنيولوك ...واحسان بيضرب الشاشة وبيقول مش هتقدر تفتح بقك

شفقة هانم واحسان بك يقول...

sometiems
منورنا احيانا مش علطول
وبعدين عامل تقول المقارنة الذذذذذذذذذذذذذذذ ......ايه انت شايفنى عامله اعلان شيبسى!
بس بجد منور

شفقة هانم واحسان بك يقول...

ايما ام البنين
وحشتينا جدا ووحشنا البنين....ربنا يوفقهم وينجحهم يارب بس بقولك اوعى يعملوا سبايكى والكلام الفاضى ده
اما بخصوص السؤال فاحنا اكتر من الاخوات امال لو مسالناش على ام العيال هنسال على مين.....بس بقولك بلاش الوصله اللى عندك دى بتاعة النت علشان متغبيش عنا كتير....وبطلى توفير

شفقة هانم واحسان بك يقول...

ذربونه
خلاص ما تزرزريش علينا...انتى فعلا بتقولى فيها ...ايه النحس ده
طيب بصى عندى حل كويس اعملى سيلكت على البوست كله وخديه كوبى وبيست على الوورد
تمام؟؟ وانا متابعة

شفقة هانم واحسان بك يقول...

مواطن مصرى نايم
صحيت ولا لسه؟؟؟
لا شكلك صحيت......والله انا سعيدة ان لسه فى شباب متاثرتش بهبل الستات وجنان الرجال.....وعبط الخرفان....بس يارب تفضل كده ....كمان انا عايزة اقولك ان اسلوبك بجد هايل وبتعجبنى البوستات بتاعتك كتتتتتتتتتير

شفقة هانم واحسان بك يقول...

نسيت اقولك كفايه عليك كده ....واتفضل روح نام

شفقة هانم واحسان بك يقول...

سؤال يا جماعةللكل
فى ناس بتقول ان السطور فى البوست ........كلها فوق بعضها...... والكلام مش واضح.....ده صح .......ولا عند ناس وناس
ياريت حد يرد على سوالى
ميرسى ليكم

maiosha يقول...

يااااااااااااه يا شفقة

وصف رائع ودقيق
بس بوست تحفة .. هههههههههههههههههههه

أنا مش قادرة أبطل ضحك

والله الواحد بيمشى فى الشارع مش عارف هو لسه فى مصر ولا راح المريخ من المناظر اللى بيشوفها

يالا ربنا يهدى

ههههههههههههههههههههههه

كاتب مصري يقول...

>>عجبني جدا البوست ده..بس لإني زعلان مش هعلق عليه كان في بالي شوية كلام يتكتبوا كتعليق لكنك باقيلك فترة طويلة حتى مبصيتيش على مدونتي ..لي حق أزعل مش كده
خير خير
عارف انك مشغولة
تحيتي

امواج يقول...

ههههههههههههههههههههههه
حلو قوى البوست ده
عندى عليه صور كاريكاتير كتير بس للاسف مينفعش احطها


بس ليا تعليق على حاجه تنيه خالص
الصوره ال محطوطه خلفية العنوان
لو دخلتوها برنامج الرسام وتزودو فى مساحة عرضها تبقى عرض صفحة المدونه ودخلوها تانى هيبقى افضل كتييييييير

شفقة هانم واحسان بك يقول...

maiosha
منورة يا مشمشة
بس بقولك ...هو الجعان بيحلم بسوق العيش ولا ايه....ايه اللى دخل الدقيق فى كلامنا؟هههههههههه
بعدين ركزى احنا دلوقتى مش على كوكب الارض ولا المريخ ...احنا على زحل وانتى الصادقة

شفقة هانم واحسان بك يقول...

كاتب مصرى
منورة
لا مالكش حق تزعل ...والله انا برد الزيارة ...بس اظاهر ان انت لك اكتر من مدونة وانا مش عارفة مين فيهم الجديدة ....اكيد بعلق على واحدة تانية ممكن تبقى تقولى المدونة الجديدة اسمها ايه

ٍSOU يقول...

متهيالى السبب الاساسى فى اضياع دة انعدام الهدف... احنا مابقناش عارفين احنا عايشين لية و لا عايزين اية و لا بنعرف اية ولا عايزين نوصل لفين ..اقل نقطة مايقناش نحس لا بقيمتنا و لا بقيمة الحياه ..

زى كدة اليس لما قبلت القطة و سالتها امشى انى طريق عشان اوصل قالت لها دة يتوقف انتى عايزة تروحى فين قالت لها مش فارقة اى مكان ..ردت القطة يبقى مش هتفرق تاخدى انى طريق

mony يقول...

عندك حق و الله

بس الرجالة المحترمين و البنات المحترمين بيبان عليهم
و مش بيتساقوا ورا اي موضة تتطلع


لازم الواحد يحكم عقله في كل اللي بيتعرض عليه و يشوف ايه اللي يناسبه


موضوع فعلا في محله نظرا للظروف الراهنة
و الحرررررررر

Darsh يقول...

ما شبتيش حاجة تتقال يا أستاذة شفقة

بجد بجد بجد الشباب و البنات اللي اتكملتي عنهم دول ......... عااااااااااااااار .... عار علينا و الله

لأ و المصيبة و الوكيسة الكبيرة أنهم بيتريقوا على الإنسان اللي ماشي عادي زي بقية الناس الطبيعية

يعني عاااااااار و عايزين كمان يتعدموا في ميدان عام .... يتعدموا شنقا بالرصاص و الله

شفقة هانم واحسان بك يقول...

امواج
نورتى البحر ولو انك غدارة ....ههههههههه
ميرسى كتير جدا على تعليقك

شفقة هانم واحسان بك يقول...

sou
ايه النور ده بجد نورتى الغابه
عمال تقوللنا قطة واليس فى بلاد العجائب ايه يا ستى انت فى الغابات....
انا بعد ما قرات تعليقك عمال اقول احنا مين....وفين....وليه...وازاى

شفقة هانم واحسان بك يقول...

mony
منورة جا يا عاقل انت يا عاقل
بس صحيح بتقولى موضوع فى محله ....نظرا للظروف الراهنه...... طيب عرفتى منين ان احنا عندنا محل وكمان رهنينه؟

شفقة هانم واحسان بك يقول...

darsh
منور الشاشة يا محمود عبد العزيز انت وفيلم العار.....وبعدين انا مشيبتش حاجة! انت عندك كام سنة يا عم درش؟؟
كمان شكلك بتتاثر بالافلام البوليسيه جداا بس اول مرة اسمع اختراع شنقا بالرصاص دى....شكلى كده مش مواكبه التطور المسدسى

son's egypt يقول...

السلام عليكم
معكي حق فيما قلتيه
اصبح كل شئ شاذ في هذها المجتمع العربي الشرقي
اصبح التقليد الاعمي هي السمة السائدة بين الشباب والبنان بدون تفكير ولا اي حاجة

MATRIX يقول...

المجتمع الى احنى فيه دلوقتى بالعربى (زبالة) ..ايوة زبالة
كفاية لو مشيتى بالليل وتلاقى العيال الى بيسموهم عيال الشوارع متلحة فى الطريق ومحتدش حتى بيهتم بيهم وغير ..وغير..وغير
.............................
شكرا على المدونة الرائعة دى وعلى هذا الجهد ..هذه اول زيارة لى واتمنى ان تزورنى فى تكنو نيوز
www.tecno-news2.blogspot.com

بيكر يقول...

اولا
فكرة ان زوجين يشتركوا فى مدونه فكره زى السكر
ربنا يهنيكم و يسعدكم و يخليكم متفاهمين على طول يا رب
ثانيا موضوع الموضع و الحجات دى الى بتقولوها دى ابسط حاجه شكلكم مبتلفوش كتير

oRiGiNaL HeArT يقول...

مدونة جميلة فعلا.. لذيذة جدا وليها اهداف جادة
البوست دة بيوضح صور حقيقة فى مجتمعاتنا
زى البنات و الاولاد اللى نسيو دينهم قبل مايتخلو عن عادتهم وسلوكيتهم المحتشمة
بس بردو عاوزة ااكد ان دول مش كل الشباب لسة والله فى بنات محترمة مبتلبسش بناطيل لا ضيقة ولا ملزقة ولا بتلبس بضيهات اصلا
ولسة فى اولاد منكشكوش شعرهم وعفنو نفسهم شهر او اتنين من غير حلاقة او حمام سريع عشان يوقفو الاريل
ومش قليلين ولا حاجة الحمد لله انا فى كليتى وفى الجامعه كلها رغم انى بشوف المناظر المقززة بتاعت الولاد والبنات الا انى بشوف كتييييييير محترمين
ربنا يهدى شباب الامة :)
سعيدة بمرورى بالمدونة الجميلة دى

كيكى يقول...

عووووووووووووووووووووووووو انا جيت اتخديتم
..............................
احيكى على البوست دة
هههههههههههههههههههههههه
موضوع مستفز جداااااااااااااا
انا كمان كتبت على الموضوع دة بس ماسكة فى الولاد..بس لسة مش عايزة انزلوا دلوقتى..الظاهر الموضوع دة فعلا مستفز كل الناس
بس انا الى بيغاظنى اكتررررررررررررر الولاد انا مش بقول البنات صح الاااااااااااا...بس مينفعش اكون ولد واتقصع والبس احمر وبمبمى ولبانة.
افففففففففففففففففففففففففف
ربنا يرحمنا بجد
بنات او ولاد..............
.............................
وحياة ربنا انتوا واحشنى اكتررررررررررررررررررررررررررررر
تحياتى الى احسان بك
عووووووووووووووووووووووو

بنت مصريه يقول...

واضح انك متكلمتيش عن الولاد خالص
ولا هم البنات بس اللى مضيقينك حكم
على فكره انا مليش دعوه باللبس ده
لاتقولى انى تبعهم ولا حاجه عشان كده بدافع عنهم
ادعوكى لقراءه بوست شباب لامؤاخذه
ومشيت ف الشارع
اه يا بلد عايزه ولد
بتكلم فيهم على نفس الموضوع ده
اتمنى تنورينى

ايوية يقول...

والله عندكم حق وكمان بقى ياسلام لو قميص الولد من دول فية ترتر وبيلمع ولا لما تلاققيها محجبة بقى ولابسة بدى وجينز ضيق
ربنا يرحمنا

zOzO يقول...

هههههههههههههههههههه

اه والله عندك حق ف كل حاجه
كل الولاد بقوا كده
حاجه تقرف
ربنا يهدي الجميع

سومه...مجنونه فى بلد عاقل يقول...

هههههههه الله يسامحك يا شفوقتى ايه دا دا انتى معبيه
عارفه يا اوختى كل شىء قولتيه ليه وشين يعنى البادى والبنطلون الساقط ممكن يبقى موضه جميله بس فى حاله ان الست تلبسه لجوزها فى البيت
كمان الشبشب مفيد ليه عشان لو جوزهازعلها
تضرب نفسها بيه برضه فى البيت..!!؟؟
اما عن الشات فبخبرتى الكبيره اقولك انه سلاح زو حادين ....ممكن يكون نافع لدرجه لا تتخيليها وهى تبادل المعلومات واحيانا المشاركه فى المشاكل والمشاروره عليها ومناقشه حلها
لكن للاسف احنا بنستخدمه غلط جداااا
وللاسف ياما كتير حاولوا وانا كنت واحده منهم نعدل المايله منفعش
ياله حقولك ايه
متحرقيش دمك يا ابلتى شفقه...كله فى جزمتك :))))
بسمعهم يقولوها كدا
تحياتى ليكى سومه_87

شفقة هانم واحسان بك يقول...

sons egypt
فخورين بك جدا يا ابن مصر ....مصر منورة
بس تعرف التقليد ما بقاش اعمى انتم ماتعرفش انه عمل عملية وفتح وعينه بقت مفنجله اد كده

شفقة هانم واحسان بك يقول...

matrix
منورنا يا ماركة
بس بقولك انت بتشتغل فى البلديه ولا ايه؟؟
اصل شوارع وزباله ايه يا عم شكلك من بتوع الحى

شفقة هانم واحسان بك يقول...

بيكر
منورنا...وبعدين السكر هيخلى النمل يتلم علينا
اما بخصوص اننا ما بنلفش كتير ده علشان احنا احنا مطلوبين وما بنخرجش من البيت خااااااااااااااااالص....بس اوعى تبلغ علينا

شفقة هانم واحسان بك يقول...

original heart
سيدى يا سيدى على القلوب الاوريجينال....ماشى يا عم نورت مملكتنا مملكة الحب
اما بخصوص ان مدونتنا لها اهداف جادة ....نونونو هى ليها اهداف جاد بس بالزيت والليمون .....ويا ريت نبقى زيه

شفقة هانم واحسان بك يقول...

كيكى
كده بردوا كل مرة تفزعينا...احنا خلاص مش هنخلف من الخضة ..وعووووو وبتاع انتى عفريت يا بنتى ؟؟
وبعدين حكاية انك كتبت بوست بس ماسكة فى الولاد ايه الحكاية ولا هى اى حجج علشان تمسكى فيهم ؟؟ بطلى شغل المشبك ده

شفقة هانم واحسان بك يقول...

بنت مصريه
نورتى ...بقى انا بردوا ما اتكلمتش على الولاد خالص حرام عليكى دا انا شحتفتهم وبسبب البوست ده هيعملوا ضدى مظاهرة
وبعدين ايه الحكم الغريبة اللى بتقوليها دى....؟؟
يلا امشى... امشى ..علشان اجى ازورك بس حضرى كيك ونيسكافيه

شفقة هانم واحسان بك يقول...

ايويه
ايوتينا....قصدى نورتينا وشرفتينا
بس بطلى جهل بقى انتى ايش اخششك انتى فى لبس الولاد ابو ترتر وجليتور هو انتى فاهمة حاجة...دى الموضه اصلهم بيشتغلوا بالليل فى فرقه عوالم
اما بخصوص البنات فمعلش القماش مش مقضيهم ...اعذريهم جم يغطوا من فوق قام اتسحب من تحت ...معذورين

شفقة هانم واحسان بك يقول...

zozo
انتى نورتينا بس مالك مقريفه كده ليه؟؟
لالالالا افردى كده ...محدش واخد منها حاجة
بلا قرف

شفقة هانم واحسان بك يقول...

سومة المجنونة
انتى شكلك كده هتخلينى اتجنن
وبخصوص البادى والبنطلون الساقط تفتكرى ممكن واحدة تشتريهم علشان تقعد بيهم فى البيت؟؟ امال الجلبيه المبقعة طبيخ وصلصة ..وعليها الايشارب ابو رابطة جنان هيتلبسوا فين؟؟ لا شكلك اتجننتى بجد
وبعدين الشبشب تضرب نفسها بيه ....لا هزلت.... امال ايد الهون راحت فين؟؟
كمان اول مرة اعرف ان الشات سلاح كويس انك نبهتينى قبل ما يخرج منه طلقتين والواحد يروح فى شربه ميه.

semsem يقول...

ههههههههههههههههههه
بدايه مدونة جميله ولطيفه ورقيقه كمان
ربنا يباركلكوا فى زواجكو ان شاء الله
______________________
بدايه بكره الولاد ههههههه
بدايه لطيفه اوى مش كده
ومعدتش للاسف فيه رجاله((انا عارفه انى هنضرب)))بس ولا يهمنى
عندي بوست كنت مسمياه
مش ممكن يا سوسن كده اوفر؟؟
كنت قولت فيه ان الولاد بشوفهم سوسن
مش عارفه ليه
_______________________
بجد بوست جميل
ياريت نتغير
الراجل يفضل راجل
والانثى تفضل انثى
هكذا اجمل
_____________________
تحياتى ليكو
واسفه للتطويل
سلام من غير امضاء

مجنونة وبكيفي يقول...

حضرتك اوجزتي باللي الشباب فيه
واللي سبب البعد عن الدين والاهالي اللي مش فاضية تربي عشان تجيب لولادها يتعلموا ويصرفوا والمدرسين اللي مبقوش يربوا حاجاات كتير اوي هي السبب في اللي بيعملوه الشباب دلوقتي ربنا يرحمنا
اسلوب حضرتك رائع جدا في الكتابة

تحياتي :)

رحـــــال يقول...

قرأت البوست وحق عليه التعليق ..

الأول الاخ احسان عنده خبر بالحكاية دة ..؟؟ الرجالة بتتشتم وهو مابيتكلمش ..؟؟ ههههههه
سلملي عليه كتييييييييير ..

بخصوص البوست الجميل ..أظن انك وصفتي ربع الى بيحصل يمكن الكلام دة موجود في مصر والحمد لله انها على قد كدة ..

لكن الكارثة خارج مصر ولااقول باوروبا ولا امريكا ولكن فى بلاد العرب .. عرب مثلنا ومصريين ايصا يعيشون هناك ..

والله الأجد كلام للوصف ...

لايسعنا الا ان نقول حسبنا الله نعم الوكيل ..
ولاحول ولاقوة الا بالله ..

واللهم اعد لنا مجدا اصعناه ..

اللهم امين ..

جزاكم الله خيرا ..

فكرة المدونة جميلة بارك الله لكم فيها ..

freedom يقول...

انا فهمت كل شي
بس وين المشكلة بالزنوبه؟

شفقة هانم واحسان بك يقول...

semsem
منورنا جدااااااااااااا
بس ليه بتكرهى الرجاله .؟؟
دول نعمة واللى يكرهها يعمى!
اما بالنسبه للضرب فما تخافيش انتى وراكى شفقة والاجر على الله معايا الحزام البمبى المسخسخ وحاصلة على بطولة الجمهوريه فى رفع العصيان

شفقة هانم واحسان بك يقول...

مجنونة وبكيفى
منورانا يا مجنونة بس انا مش عارفة انتى من امتى وانتى كده؟؟ متاكده انه بكيفك؟؟
وبعدين معلش اعذرى الناس اللى مش فاضية تربى دى فعلا عندهم مسئوليات تانيه
وفى منهم اللى مشغولة بالبادكير والمانكير
وفى اللى طالع عينيها وشقيانه طول النهار فى خناقاتها مع بتوع الفرن
المهم ربنا يرحم الجميع

شفقة هانم واحسان بك يقول...

رحال
نورتنا واسعدنا وجودك بس المرة ادى على فين العزم ان شاء الله؟؟
صحيح احسان بيسلم عليك اوى ....وهو بس راح مشوار صغير بيشترى بنطلون ساقط وشبشب زنوبه علشان هيعمل نيولوك

شفقة هانم واحسان بك يقول...

freedom
يا اهلا وسهلا يا مرحب بالحريه وافاقها
للاسف المشكلة طلعت مش فى الزنوبه .......طلعت فيك انت

Desert cat يقول...

الكات قالت لك البت دى
بتجيبوا فى سيرتى ليه انتى والبنات اللى بيمشى يتقصعوا فى اشلارع يا شفشفق
والكات بريئة براءة ازعاج الجيرن من النونة بالعى صوت قبل الفجر
بالنسبة للى بتتعلق فى ربقة الواد وتقعد تقول باباه وماماه واونكل دى بتكون مركبات النقص عندها عالية اوى خالص مالص ربنا يسترها اصلى لو قابلت لاشكال دى مرة فى تانية فى حياتى هديهم بشبشب الحمام اللى اتكلمتى عنه
تحياتى يا جميلة

mado80 يقول...

عندك حق في كل كلمه قلتيها
بجد الشباب اليومين دول بقت حاجه تكسف

كل التحيه والتقدير لشخصك الكريم

نهر الحب يقول...

دى موضة التليقد الاعمى
والاعلام الفاسد
والاسر الفاشلة فى التربية حتى الاولاد البناطيل ساقطة والترتر
وتسريحة الشعر الغريبة
وحاجات ما يعلم بيها الا ربنا
وكله من البعد عن الله عز وجل
والله المفروض نعمل زى انجلترا لما منعت ملابس البنطلون الساقط فى المدراس


بوست حلو
سلمت اناملك

نعكشة يقول...

صراحة حاجة تقرف

يعني لما واحدة تمشي قالعة في الشارع
حرام عليكي
لو واحد غض بصره هيغض عن إيه ولا إيه
هيبص عالارض هيلاقي رجل سيادتك باينة
لو بص فوق هيخبط في سيادتك لو بص يمين فيه واحدة انيل من حضرتك ماشية

انتو غاويين تخلوا الناس ترتكب ذنوب بالعافيه؟؟؟؟؟؟؟؟؟؟

و الولاد اللي موضة مقززة تنزيل البنطلون
إيه القرف دة
لأ و لازم القميص يبقي قصير ولا الفانلة
يادي القرف
يلا عامتاً شباب مقزز

بقولك إية صحيح معندكيش جيلي بطعم المانجة لحسن مش لاقية الجيلي بتاعي و محتاجاة ضروري اصلي رايحة النايت كلب

دمتي سالمة

سلامون عليكي

drpharma يقول...

الله ينور بس عاوزين شوه تفاؤل

بــــ الخطاب ــن يقول...

الحمد لله الذى عافانا مما ابتلى بيه الجيل كله. دى حاجه مسخره والله العظيم يا جماعه

NilE_QueeN يقول...

فى ايه يا طنط

هو اللى عايز ينحرف مش من حقه ينحرف

والشباب معذور
الرجاله معندهمش امكانيات البنطلون يتسند عليها
وبعدين الرجاله كان فى منهم زمان بس ماتوا ف الحرب

انا بشوف الولاد زمايلي ف الدروس بتقهر على حظنا الهباب شكلنا مش هنتجوز يا طنط

اما البنات بقي بلاش اتكلم عنهم العمليه مش ناقصه اكتئاب

بس على فكره

المحترم محترم واللى عنده دين عنده دين والصيع كتير

و ف الاخر الطيور على اشكالها تقع

فارس بلا جواد يقول...

هههههههههههههههههههههههههه
حلوه قوى بجد
تسلم الايادى

نادى المزيكا يقول...

تمام ياباشا تسلم ايدك