السبت، 24 يناير، 2009

الجـــــــــــواز وسنينه...ادى اللى واخدينه



بجد بجد المرة دى انتم وحشتونا فعلا بس معلش اعذرونا كنا مشغولين جدا ........وكمان موضوع غزة والجرحى الفلسطينيين كان عاملنا قلق واكتئاب شويتين
وكنت انا واحسان عمالين نلف على المستشفيات .. زى الشحاتين

وكالعادة بنمارس هوايتنا فى لم معونة الشتاء....... والناس كتر الف خيرهم كانوا بيدونا اللى معاهم لدرجة انهم باسوا ايدينا

منرحلوهمش تانى علشان صعبنا عليهم ....... وهما مش ناقصينا كفاية اللى هما فيه
احنا قلنا خلاص كفاية كده ونعتقهم بقى لوجه الله...... ويا بخت من زار وخفف
وان شاء الله احسان سيوافيكم لاحقا بكل اخبار المستشفى والغلة اللى لميناها بس من غير قر


لكن النهاردة بقى قلت احكيلكم على بعض من المواقف ..........اللى حصلتلى اول ما اتكلبشت بسى احسان افندى بيه


طبعا الواحدة اول ما بتتجوز بتكون لسه عروسة ننوسة
بنوتة كده مدلعة وايديها ناعمة
ولسه متعرفش يعنى ايه جواز... ولا شغل بيت... ولا مسئولية ... ولا اى حاجة من شغل الخدامات ده خالص

( وبعد ما بتتجوز يا عينى )


شوية تلاقى المطبخ... وشوية تلاقى مسح ...وغسيل ...ومواعين ...وهدة حيل
يعنى من الاخر بتاخد على قفاها ..... فبتفوق كده وتصحصح وتبقى فريش
وتعرف انها كانت مطلعة عين مامتها وباباها وقاعدة حاطه رجل على رجل ولا هى هنا
المهم ان الواحدة لما بتفتكر بتقعد تترحم على الايام الخوالى



والآن..... اليكم بعض من المصايب ...والكوارث...اللى عملتها فى "سى احسان " من اول يوم جواز

المصيبة رقم (1)

انا بقى كنت عاملة عروسة وكده وكنت بحاول - اى والنعمة - احاول جاهدة انى اعمل اى حاجة فى البيت ...علشان يقول عليا شاطرة وست بيت تمام
اولها كنت اعمل عصير يكفى مصر والدول الشقيقة والمجاورة كلها
واحطه فى التلاجة على اساس ان... احسان حوت والعصير ده كله بالنسبة له كلام فاضى
وكنت اقول يلا علشان معملش كل يوم وهو يعنى هيجراله ايه
؟؟
وكنت استنى يجى حداشتاشر يوم كده واروح اقول لاحسان وانا برقق صوتى زى الضفدعة.
انا : اجيبلك يا حبيبى العصير اللى فى التلاجة تشربه؟

هو كان يزغرلى بعينيه ويقولى عصير هو فين العصير ده يا امى ؟؟
ده بقى مخلل وحمض وعفن وريحته طلعت
....انتى فكرانى البلاعة اللى بيدلقوا فيها بواقى الاكل
طيب اعزمى على بحاجة عدلة مش عفنت وماتت من شهور

انا : لا يا حبى على فكرة هى لسه ما ماتتش والا كنت دفنتها

هو : يا مثبت العقل فى الراس يارب

*****

المصيبة رقم (2)

قلت طيب اطلع الموهبة المدفونة ... واعمله اكل
بقى وفراخ وكلام من ده
رحت اشتريت فرخة وخليتها تلبس المايوه وخدت غطس فى الحلة وبعدين طلعتها
نشفتلها علشان متخدش برد ... وحطيتها فى الشواية بتاعت الفرن لكن للاسف طلعت فار مسلوخ
واول ما شافها احسان اتخض
وقالى ....ايه ده انتى خدتى من تحت الحوض يا لينا ..ايه دى ؟؟
انا: فراخ يا حياتى... فرخة حبنا.. كاك كاك
هو بصلى وبص للفرخة وقال... هى تقريبا كانت فرخة بس شكلها اتحولت لكائن غريب
انتى عملتيها ازاى يا روحى جتك قصف روحك.. وحش رقبتك

عادى انا سلقتها شوية وخليتها تبلبط فى الميه
علشان شكلها كان مش عاجبنى... والناس اللى اشترتها من عندهم ما كانوش بيحموها
وبعدين دخلتها شواية الفرن .... وغزتها بالسيخ المحمى فى صرصور ودنها
وكل دقيقة كنت بفتح الفرن الاقيها واقفة مكانها مش بتلف.... ولما زهقت قعدت الفها بايدى لحد ما بقت كده ... ايه مش حلوة؟؟

هو : بتلفى السيخ يا ماما ده بيلف لوحده..... وبعدين السيخ فيه ماسكتين بيتقفلوا عليها وتلف لوحدها
ايه اللى هببتيه ده؟؟ يا فلوسي وجيبى اللى اتخرب

انا : يا حبيبى وانا اقفل عليها ليه وهى كانت هتهرب ؟؟ انا طيبين ....مش زى الناس الشريرين اللى كانت عندهم وحابسينها فى القفص
هو : يا دماغى .. هتموتينى .. مش مهم الفرخة... فين الشوربة بقى ؟؟
انا : شوربة ..!ودى بتتعمل ازاى؟؟ انا معرفش
هو : يا خرابى الشوربة ..الميه اللى سلقتى فيها الفرخة ... الشوربة السخنة الملهلطة دى؟؟
انا : اه انت تقصد الميه اللى الفرخة خدت فيها غطس
اه بس انا رميتها... لقيتها مش حلوة وريحتها تقرف فدلقتها .. هو انت كنت عايز منها حاجة؟؟

هو : يا مصبرنى يارب



*****

الموسيبة رقم (3)

يومين كده ....ودخل احسان على المطبخ متسللا ولا الظابط اللى داخل يقفش حرامى من قفاه
وكنت واقفة بغسل المواعين... وانا عمالة اغنى وفجاه دخل احسان خضنى ووقف متنح

هو: فين الحلل التيفال يا هانم؟؟
انا :" تى فال "... انا مش بعرف الا ..." تى شاى "
هو : انتى هتهرجى معايا ولا ايه؟؟
انا اقصد الحلل اللى قعرها اسود دى ...اللى الحاجة مش بتلزق فيها
عملتى فيها ايه؟؟ انا مش شايف ولا حلة واحدة ...احنا كان عندنا طقم بحاله

انا : اه طيب ما انا غسلتها يا حبيبى ....ودعكتها اوى بسلكة المواعين لحد ما خليتها بتبرق من اللمعان... حتى شوف مرايه
هو : بيعيط.. ايه غسلتيها .. غسلتى الحلل التيفال بالسلكة يا مفترية ؟؟
دى بقت حلل المونيوم... منك لله ..
الماذون .. ودونى للماذون
انا : ايه انت زعلان علشان انا نضيفة ومش بسيب الحاجة وسخة وخلتها زى الفل ؟؟
وبعدين وهو الاكل هيلزق فى الحلل ليه هى الحلل فيها لبانة ؟؟

هو : حسبى الله ونعم الوكيل


*****


النصيبة رقم (4)

فى يوم صحى من النوم مفزوع ....وانا عمالة اصرخ وبجرى عليه
انا : الحق ...الحق الغسالة ... بتزمر وهتقع وهتوقع البيت

هو : ايه فى ايه ؟؟ ايه الصوت ده ؟؟ رعبتينى ... وقلقتى منامى ...الهى تقع على رقبتك تكسرها
انا : مش عارفة انا حطيت الهدوم علشان تتغسل ولقيتها بتجرى من مكانها وبتزمر
هو : اقول عليكى ايه ؟؟ كل ده غسيل حاطاه فيها ؟؟
دى بتشيل خمسة كيلو ....مش 150 اخ يا نارى منك ...اعمل فيكى ايه؟؟ فزعتينى

انا : هاتلى غسالة اكبر بتشيل كتير... لحسن دى اظاهر ان ايدها بتوجعها وبتصوت لما الغسيل بيتقل
شكلها غسالة صحتها على ادها

هو : ماحدش يحوشنى ...ما حدش يمسكنى هموتها .. طراخ


*****


النوصيبة رقم (5)


يوم تانى لقيته واقف ادام باب الدولاب ....ومتنح ووشه اصفر ومبيتكلمش

انا : سونة مالك انت لقيت عفريت فى الدولاب ولا ايه؟؟مالك متسمر مكانك كده ليه؟؟
هو : ايه ده هدومى كلها بقت ملونة كده ليه كل حتة ميت لون ؟؟انا بشتغل فى مكتب ولا بلياتشو فى سيرك؟؟
انا : ايه يا حبيبى مهدومك نضيفة وزى الفل اهى وريحتها برفيوم واخر دلع
انا بس لقيتهم وسخين فخدتهم نقعتهم تلاتة ايام ....وحطيت عليهم كلور

هو : يا مصيبتى يا هدومى يا عشرة عمرى كله... كلور يا شحتفة قلبى
طيب وهدومى وقمصانى حبايبى البيض اللى مابقاش حيلتى غيرهم... هما فين؟؟
اوعى تقولى نقعتيهم في جاز ولا حطيتى عليهم شوية زفت ومازوت... ما انتى مهفوفة وتعمليها؟؟

انا : ليه وانت شايفنى عبيطة ولا هبلة؟؟
انا اصلى لقيتهم وسخين ووحشين ... وقعدت اغسلهم لحد لما تعبت ... والاخر اتقطعوا منى ودابو فعملتهم فوط للمطبخ
مش مهم ابقى هات غيرهم

هو : يا خرابى يا هدومى اعمل ايه انا دلوقتى؟؟
اروح الشغل بلبوص ...ولا انزل بالطقم الداخلى ؟؟ منك لله يا شيخة والله لخلى ليلتك بمبى زى لون الهدوم
انا : ايه يا حبيبى بمبى ايه وبتاع ايه ؟؟ الربيع لسه مجاش
هو : الحقونى يا هوو قبل ما ارتكب جناية واروح ابو زعبل


*****


الكارثة رقم (6)


يوم دخلت لقيته مبهدل اوضة المكتب وجايب عاليها واطيها وعمال يكلم نفسه زى المجانين .....ويرمى ورق شمال ودفاتر يمين

انا : ايه يا حياتى انت بتعمل ايه ؟؟ انا لسه مروقه حرام عليك
هو : اه يبقى انتى مفيش غيرك
انا : طبعا يا حياتى وهو فى حد فى حياتك غيرى؟؟
هو : لا اعتقد بعد النهاردة هيبقى فيه حديات مش واحدة بس ... قوليلى فين الشيكات اللى كانت هنا على المكتب ؟؟
انا :" شي كات" احنا مربين كلب " هي دوج "يا حبيبى مش كات
هو : ياربى دماغى الضغط .. السكر .. شلل الرعاش
انا اقصد الورقة بتاعة البنك اللى مكتوب فيها فلوس بالالافات كانت هنا ... راحت فين؟؟

انا : يمكن راحت البنك لوحدها
هو : ههبدك بحاجة على نفوخك ... انطقى فين الورق والشيكات ؟؟
هأموتك .. واتسجن فيكي .. واطلع فى خلف الاسوار مع المجرمين

انا : اه... افتكرت انا لقيت الدنيا مكركبة فقلت اروق ورميتهم فى الزبالة روح دور بقى
هو : هاقتلك وهطلع فى خلف البيبان والشبابيك .. الزبالة يا مفترية ؟؟
انا : يلا ده انت حظك حلو انى لسه مطلعتهاش للزبال ... اجرى دور بقى
هو : اخ يا عالم يا هوو... حد يخدها من ادامى
انا : ايه يا روحى كل ده علشان قلتلك دور فى الزبالة
معلش لو زعلان علشان ايديك هتتوسخ.... ابقى اغسلها وحط برفان مفيش مشكلة

هو : لا سيبونى عليها بقى


*****


الجنحة رقم (7)

فى يوم واقفة بكوى الهدوم.... فشم ريحة شياط

هو : الريحة دى من عند الجيران ولا ايه ... البيت شكله بيولع بينا وهخلص منك بقى
انا : اهىء... اهىء لا.... بس وانا بكوى هدومك يا سونة
لقيت المكوة لزقت وطمعت فى حتة من القميص .. فسيبتهالها لحسن عينيها تكون فيها

هو : ايه.. هدومى اتحرقت يا لهوى يا امه... تعالى شوفى هدوم ابنك
القادرة المفترية حرقتلى هدومى... اروح فين يا ناس
؟؟
انا : ما تروح مطرح ما انت عايز ...ومال طنط ومالنا دلوقتى؟؟ زمانها نامت وبتاكل رز مع الملايكة
وبعدين لو زعلان على الهدوم مش مهم ... الموضة السنة دى المقطع والمشرشب
يلا يا سيدى بقيت على الموضة ادعيلى بقى

هو : "بيعيط" ربنا يشيل ويحط عليك انه سميع ..عليم ..مجيب

*****


الجناية رقم (8)


سونة كان راجع من الشغل.... واول ما فتحت الباب

هو : ايه ريحة الحريقة دى فى حاجة بتولع ... وشايف الجيران خارجة تجرى من بيوتها
ومالك مسودة ووشك مهبب كده ليه؟؟

اوعى تكون بتكوى تانى .. وناوية تخلصى على بقية هدومى؟؟
انا : لا يا روحى انا بس كنت عملالك مفاجاه وباظت
هو : مفاجأه... يبقى استر يارب
انا : لا بس اصلى كنت عايزة اشوى لحمة على الفحم ... كنت عايزة اعملك باربكيو
وولعت الفحم مرضيش يولع ... رحت بذكائى الخارق جبت شوية بنزين ودلقتهم عليه فولعت فى البلكونة والشواية واللحمة
اهى ...اه... اه

هو : يا نهارك اسود... ولعتى الفحم بالبنزين؟؟
اخ.... يا نفوخى اللى ولع ...رشوا على ميه رأسى ولعت من ذكائها الخارق
انا : لا يا حبيبى متخافش مراتك شاطرة بردوا
وبذكائى الخارق طفيته بطفاية الحريق بتاعة العربية ... شفت انا شاطرة ازاى
؟؟
هو : ذكائك تانى؟؟ اه ابقى شميت مش شفت .... ربنا يخدك ويريحنى


*****


الجريمة رقم (9)

هو : الحقونى الحقونى انا اتكهربت الشقة مكهربة والبيت كله بيلمس ياهوو

انا : لا يا حبيبى متخافش شوية وهتروح انا اصلى كنت بغسل الحيطة بسلكة المواعين
وقلت اما اغسل الفيش كمان ....اصلهم كانوا مبقعين مطرح صوابعنا

هو : ايه غسلتى الحيطة بالسلكة والصابون وكمان الفيش ؟؟
طيب اما اموت بقى ... واعدلونى على القبلة

انا : سونة يا روحى ما تخافش .. وانت ليه تمسك الفيشة وهى مبلولة ؟؟
عموما متخافش ...مش هتتكهرب بس انت البس شبشب فى رجلك ... او لما تتكهرب ابقى امسك الخشب

هو : انا همسك الخشب اكسره على نفوخه انتى يا مجنونة يا خريجة السرايا الصفرا
انا : لا يا حبيبى انت نسيت ولا ايه؟؟ انا خريجة جامعة عين شمس مش السرايا
دى اكيد شهادة تانية مش بتاعتى
هو : طراخ ....طراخ

*****


البلوة العاشرة

هو : افتحى السخان يا شفقة ....علشان ادخل اخد شاور

انا : عينيى يا حياتى ... حمام العافية
هو : اه.. اه ..اه الحقونى انقذونى ..جلدى اتحرق .. وشى اتسلخ... كلى اتشويت
انا : فى ايه مالك بتزعق ليه وعامل غاغة؟؟
هو : انتى مش شايفة الدخان ؟؟ الميه نزلت سخنة نار حرقتنى .. الحقينى بمرهم الحروق
منك لله فتحتى الميه السخنة.. والباردة لا
اشوف فيكى يوم يا شفقة ...اشوف فيكى يوم

انا : تحب تشوف اى يوم يا حبيبى وانا اوريهولك؟؟
بعدين يا حبيبى انا حبيت اعملك سونة وبخار وجو شاعرى... زى مراكز التجميل
الحق عليا يعنى عايزاك تبقى سمباتيك وتصغر عشرين سنة ؟؟

هو : حرام عليكى يا شيخة ... ده انا شعرى ابيض من الخضة وزدت ميتين سنة وهبقى زى الفراعنة ... هيحنطونى
اشوف فيكى يوم احمر مخضر يا شيخة..
انا كشفت راسى... ودعيت عليكى بعدد شعر صدرى اللهم امين



انا : يووووووووووووه ايه الراجل الفافى ده اللى مش مستحمل ميه بتسلخ وتقشر الجلد؟؟

بس حاجة تقرف ......عيشة تزهق

والله الحق على .....انى اتجوزتك اصلا
اهىء اااااااه .. اهىء ااااااااه .....الحقينى يا مامى ...تعالى خدينى يا مامى ...انا بعيط يا مامى ... بليز هلب مى مامى بليز
اهىء... اهىء ...اهىء


المعذبة / شفـقـــة

هناك 78 تعليقًا:

ahmed_k يقول...

ههههههههههههههه
ربنا يقويك يا إحسان يا صاحبي
ده إنت شفت كتيييير

رحيق الحياة يقول...

عارفة يا شفقة فتحتي نفسي علي الجواز هههههههههه

لااااااا بس بجد ربنا يعين إحسان.....و يعينك انتي كمان......
وحشتني الضحكة اوييييييييي

ربنا ما يحرمنا منك و من حكاياتك يا رب

رغدة

Lady E يقول...

ايه البوست الجميل ده بجد ضحكت من كل قلبي

وبعد البوست ده يبقى عندي حق اني استنى شوية على الجواز ههههههههه

بجد يا شفشوقة انتي عسولة جدا

وبعدين المفروض احسان بيك يصبر عليكي ويساعدك مش يتعصب عليكي (انا بهدي النفووووووووووس) :)

mony يقول...

هههههههههه


ياعيني يا احسان
دانت اتاريك بطل مجاهد و الله

و انتي يا شفشف
بالراحة عليه يا حبيبتي

الكلام ده يتعمل في اسرائيل
مش في جوزك


ده حتي مش عارف يعمل زي حماس و يرميكي بصاروخين



هههههههههههههه


ربنا يبارك لكم في بعض و يقر عينكم ببعض

عاشقة القمر يقول...

هههههههههههههه
معليش داه بجد ولا بتهرجي هههههههه
شكلي فعلا كنتي مدلع في بيتكم ههههه
نحنا عدنا مثل بنت قبل ماتزواج اذا مش تعرف حاجه بقول لها اهترجعي با خبيزيك

يعني العروس هي لم تكون في شهر العسل
امها بعطيها حلويات وناعم والغربيه هكذا
لو لقي العريس
مش
يتعرفي حاجه اهتجي راجع بالحلوايات بتاعتيك من شهر العسل هههههههههه
بس كويس انتي مش رجعتي هههههههه
بعد الشر عليكي بس فعلا احسانكان عندو مقدار علي الصبر هههههههه بس بجد عادي اصلا
بنت اكيد انو في اول صعب بس بعدها بتكون شاطرها في بيتها

Eng. Ahmed Abo El-Ella يقول...

جبتي من اللي تحت الحوض يالينا؟

الله يرحمك يااحسان!!!

على فكره ياشفقه, انا كنت بفكر في الجواز بس دلوقتي بقول
عازب على طووووووووووووووول

ههههههههههههه

حمدلله على السلامه يافندم

سارة نجاتى يقول...

هو عاوز ايه ؟ ح ينهب ؟ ايه يعنى لما البوتجاز يولع , و لا الغسيل يهرب هههههه
, أنا مبسوطة أنكوا بتفكروا تعبروا عن نفسكوا سوا فى مدونة بجد ,
تصدقى بقه حوار شغل البيت ده شكله اللى ح يطفشنى من الجواز هههههههه

تحياتى يا قمر

blue-wave يقول...

هههههههههههههههههههههه
والله انتوا مالكوش حل:))
كل دا عملتيه فى الراجل يا مفتريه؟؟؟
لك الله يا احسان يا اخويا:))

princess يقول...

هههههههههه
وهو لسه عايش
ده من المجاهدين فى سبيل الله
ربنا يخليكوا لبعض:)
تحياتى

البت المشمشية حلوة بس شقية يقول...

لأا حول ولا قوة الا بلله
المراة والساطور

كيكى يقول...

لا لا لالاااااااااااااا
انتى لازم تشوفيلك حل ياشفقة يا ختى؟؟
تقعدى تكوى وتحرقى الهدوم
وتولعى فى اللحمة بالشواية بالبلكونة
وتحطى جبس على الفراخة اقصد دقيق وكمان عايز شربة
لا لا لاااااااااااااااااااااا
انتى استحملتى كتيررررررررر اوى هو عايز ايه اساسا اكتر من كدة مش كفاية بتغسلى المواعين وتخليها زى الفل وبتعملى لى بيوتى سنتر
لا بصى بقى من الاخر انتى السبب انتى الى دلعتى كدة
عموما ولايهمك مادام انا موجودة...
شوفتى فيلم موعد على العشاء***
نفذى الخطة ومستنيكى تقوليلى
***براكتك ياكيكى**
امشى انا بقى
عوووووووووووووووووووووووووو

emey يقول...

هو انتو هدفضلو كدة علطول ربنا يتوب عليكو

رحــــيـل يقول...

احم احم
طمنتينى على كده انا اللى هيتجوزنى ليه الجنه
اصلى خايبه جدا خالص الى مالانهائيه ومش بعمل اى شئ فىا لبيت حاليا بقول لما اتجوز بقى ابقى اجرب فى جوزى حبيبى مهو اكيد هيستحملنى
بس من الواضح انك هتترحلى قريب
بس شكل كده احسان عصبى خالص ده انتى ملاك مش حقه خالص يتنرفز كده
امشى انا بقى قبل مااضرب

وحشاانى

وومن يقول...

ههههههههههههههههههههههههههههه

والله برافو عليكي يا شفقة حركة الحلل التيفال دي خالتي عملتها برضة وهي عروسة

انا لازم اخلي أول فرحتي يجي يقرا البويت علشان ياخد فكرة عن اللي هايحصلة بعد الجواز

ربنا يخليكم لبعض يارب وتعيشي وتتعلمي

romansy يقول...

يا نهار ابيض
جننتيه

دا هيشد فى شعره منك
اه منك يا حوا

الله يكون فى عونك يا ادم

كيــــــــــــارا يقول...

ههههههههههههههههههههههههههههههههههههه

هههههههههههههههههههههههههههههههههههههه

طب يحمد ربنا في غيره بيحصله بلاوي العن من كدا

ةبحدين دي شفقه يعني اي حاجه منها ثكررررررررر

ههههههههههههههههههههههه جدعه ياشفقه خدي بحق الستات كولهااااااااااااكيكيكيكيككييك

وحشاني اوي ياشفقتي ياعسلايه

شفقة هانم واحسان بك يقول...

ahmed k
بقى كده يا احمد عايزه ربنا يقويه طيب ليه ؟؟ ها اعترف
عموما هو بيسلم عليك وبيقولك انه كان بيشوف لكن دلوقتى بيتعكز عليا

شفقة هانم واحسان بك يقول...

رحيق الحياة
ايه يا بنتى هو انا فاتح للشهية ولا ايه
بقولك ايه سد الحنك احلى علشان يسد نفسك ومناخيرك كمان

شفقة هانم واحسان بك يقول...

lady e
انا بقى بقولك استنى كتيييييييييييييير مش شوية

زمن الشيكابالالالا يقول...

ههههههههه
عشان تعرفوا ان الرجالة دايماً مظلومة وبتستحمل كتيير من الستات الشيكابالا خالص

ادم المصرى يقول...

بجد

الدحك عندكو مش بيخلص ابدا

الواحد بينشرح قلبو هنا كتير بوست رائع

بس كدا خوفتوهم من الجواز هههههههههههههههههههههههههههههههههههههههه
هيتعقدو

معلش بقه بوست جميله والله المستعان

~*§¦§ Appy §¦§*~ يقول...

يا شيخه عارفه عارف اقولك ومتقوليش له حلال فيه اللى عملتيه فيه ها بقى

شفقة هانم واحسان بك يقول...

mony
اه هو فعلا بطل مجاهد بس بيجاهد من فوق تربيزة المطبخ
وبعدين متخافيش عليا قال صاروخين قال
انا يا بنتى مسلحة نفسى بالاسلحة اللى بتشوه واللى بتسلخ الجلد احنا بنلعب ولا ايه؟؟

شفقة هانم واحسان بك يقول...

عاشقة القمر
بقى عندكم الام بتدى بنتها حلويات فى شهر العسل
لا لو كده هفكر تانى واعيد النظر فى جوازتى من احسان واحاول اخلعه واشوفلى واحد من دارفور

شفقة هانم واحسان بك يقول...

Eng. Ahmed Abo El-Ella
انا جبت من اللى تحت الحوض علشان عجبنا
كمان حاول تبقى عازب على عرض علشان متخبطش وتمشى تلاطش فى حد

شفقة هانم واحسان بك يقول...

سارة نجاتى
والله ما انا عارفة الرجالة دول عايزين ايه
وعلى رايك هما هينهبوا؟
حاجة تزهق
وعلى فكرة حوار شغل البيت ده مش هيطفشك انتى وبس لا ده هيرجع المتجوزين بيوت اهليهم تانى والحياة هتبقى فردى فردى مش بمبى بمبى

شفقة هانم واحسان بك يقول...

blue-wave
مالناش حل ؟؟
هى المسالة صعبة اوى للدرجة دى؟؟
عموما شكلك يا دكتور مكنتش شاطر فى الحساب
وماشى قاعد تدعيله براحتك مهو انتم من جنس واحد
ههههههههههههه

شفقة هانم واحسان بك يقول...

princess
احسان من المجاهدين ؟؟
احتمال مع انى مشفتوش ولا مرة ماسك بندقية ولا متسلح بخنجر ولا الكلام ده
هو ما بيمسكش الا سكاكين احتمال يكون من مجاهدين المدبح

شفقة هانم واحسان بك يقول...

البنت المشمشية
المراه والساطور
لا ماسمحلكيش انتى فاكرانى فيفى عبده ولا ايه؟؟
عبده معلش لكن فيفى نو

شفقة هانم واحسان بك يقول...

كيكى
عموما لو عمل اى دقة غدر او حسيت بحركة كده ولا كده هبلغلك
رجالة اخر زمن وقال على راى المثل بره وجوا فرشتلك وانت مايل وايه يعدلك
وبعدين بقولك ايه ما تيجى نروح انا وانتى موعد على العشاء ده
هما عاملين اكل حلو؟

شفقة هانم واحسان بك يقول...

emey
ادعيلنا بقى ربنا يتوب علينا
هنعمل ايه مش قادرين نبطل صنف نقاركو الكيف ذلنا ربنا ما يحكم عليكى

شفقة هانم واحسان بك يقول...

رحيل
شفتى يا سارة اد ايه انا مظلومة مع الكائن البشرى اللى اسمه احسان؟؟
عموما يا سرسر انتى لازم تتعلمى من دلوقتى قبل ما تتجوزى بس مش تتعلمى شغل البيت
لا شغل الشلاليت والروسيات والبونيات دول اللى هينفعوكى مع جوزك حبيبك واسالى مجرب

شفقة هانم واحسان بك يقول...

وومن
ايه رايك حركة جديدة مفيش بوصة مبتعملهاش اقصد عروسة
واهى اختراع جديد بدل حركة كفاية

شفقة هانم واحسان بك يقول...

romansy
انا جننته لا والله لسه لكن اوعدك انه يحصل وهتكون اول واحد ياخد تذكرة زيارة للسرايا الصفراء
اما بخصوص شعره فحتى دى كمان مش عارف يعملها لانى وقعتهوله كله لحد ما بقى اقرع

شفقة هانم واحسان بك يقول...

كيارا
اوى كده تشجيع وتصفيق حاد
احنا نعمل جمعية ونسميها يا نساء العالم تسلحوا بغطا الحلة
ايه رايك هتنضمى لينا؟؟
اه بس شرط انك انتى اللى تجيبى غطا الحلة

شفقة هانم واحسان بك يقول...

زمن الشيكابالا
تقصد ان الرجالة الشيكا بيكا يا ويكا بزلومة مش مظلومة

شفقة هانم واحسان بك يقول...

ادم المصرى
خلى بالك بعد كده هنخلى دخول المدونة بفلوس ولا انتم عايزين تضحكوا ببلاش؟؟

شفقة هانم واحسان بك يقول...

appy
ازيك يا قمر منورة..ايوه كده انصرينى كفاية اللى عملوا فينا فى اسماعيلية انا بردله جزء صغير من جمايله

عاشقة القمر يقول...

شمعني دافوار ياخني مالوا من شمال انتي عايزه تجوازي ولا تحاربي هههههههههه
انا عشان اختاركي اهكتب بوست عن عادات تقاليد في السوان بس خافيكي تخلعي ههههههههههههههه

عاشقة القمر يقول...

قصدي عشانيكي اهختار بوست عن عادات وتقاليد بس خوفي تخلعي هههههههههههههه

maryooom يقول...

وكل دقيقة كنت بفتح الفرن الاقيها واقفة مكانها مش بتلف.... ولما زهقت قعدت الفها بايدى لحد ما بقت كده... ايه حلوة؟؟

بجد بجد ربنا معاك يا احسان ويقويك عليها

enjy يقول...

وحشتونى وحشتونى وحشتوووووووووونى على راى الست وردة

يوميات نائمة في الأرياف يقول...

هههههههههههههههههههه
لك الله يا احسان باللي بتشوفه ده
ده انتي مسخرة يا شفقة
هههههههههههههههههههههه
هههههههههههههههههههههههه
هههههههههههههههههههههههه
ولعتي في الشقة والكهرباء والمكوا وهدوم احسان وشغله كمان
الحمد لله انك لسة عايش يا احسان
ربنا يكون في عون اللي هيتجوزني انا كمان
انا صح بعرف اطبخ
بس انا في شغل البيت ميييييح
ربنا يستر بقى
بحبكم جدا جدا
بنتكم رنا

الملاك الحزين يقول...

ههههههههههههههههه
وحشتونى موووووت
ايه البوست الجميل ده
برقو عليكى يا شفقة
المفروض يا احسان تحمد ربنا انها فكرة تعملك عصير اية يعنى حمض
بجد ربنا يحمكم ويسعدكم

بذرة امل يقول...

بجد موضوع تحفة
يفطس من الضحك
بجد انا سعدت جدا لما شوفتكم
انتوا بجد لذاذ مووووووت
وقلقت جدا لما احسان حققوا معاه فى الامن عشان كان بيصور
وحمدت ربنا ان الموضوع عدى على خير

عاشقه الرومانسيه يقول...

هههههههههههههههههههه
هههههههههههههههه
بجد البوست اكتر من رائع

اول زياره وان شاء الله مش الاخيره

ياعينى عليك يا احسان ده انت اتعذبت كتير

تحيـــــاتــى

riri يقول...

ههههههههههههههههههههههههه
انا على طول بدخل اشوف كل الجديد الا عندكم بس بصراحه اكسل ارد بس المره ديه دخلت عشان ااقولك بجد خلتينى اضحك مع انى كنت زعلانه اول مادخلت عندكم والله اقعد اضحك ربنا يخليكوا لبعض
وربنا يكون فى عون احسان ههههههههه
بس هو هيلاقى واحده دمها زى العسل زيك فين

مقتطفات من حياة فتاة يقول...

ههههههههههههه
يا شيخةحرام عليكي انا طول عمري بناصر حقوق المراة لكن انا اسقة الرادي لازم اناصر الرجل
عشر مصايب في اول كام شهر ربنا يصبرو العيب فيكي مش فيه
انا اسفة متزعليش لكن مضطرة

شفقة هانم واحسان بك يقول...

عاشقة القمر
متخافيش اكتبى انتى بس وخلى الخلعان علينا

شفقة هانم واحسان بك يقول...

maryooom
كده بردوا ماشى ليكى يوم
بتقويه عليا طيب والنبى لوريه النجوم فى عز الضهر
استنى عليا

شفقة هانم واحسان بك يقول...

enjy
اهلا اهلا اهلا اهلا باعز الحبايب
وحشتينا اوى

شفقة هانم واحسان بك يقول...

يوميات نائمة فى الارياف
يا بنتى ده انا منوراله ايدى العشرة شمع وبعدين الحاجات اللى بعملها دى علشان اعمله جو وروح فى البيت
مش بدل ما نقعد بوزنا فى بوز بعض ومتنحين
انا كده بشغله وبملا فراغه
وبعدين ايه بنتكم دى كبرتينا اوى يا رانا ده احنا لسه مخلفناش اساسا اوام كده خلتينا نتبناكى

شفقة هانم واحسان بك يقول...

الملاك الحزين
ايوا كده تصفيق حاد واخيرا لقيت شخصية تانية بتضم صوتها لمصايبى اقصد صوتى

شفقة هانم واحسان بك يقول...

بذرة امل
متشكرين على الجرس والفضايح
فضحتينا يا بنتى وعرفتى الناس كلها انه كان مقبوض عليه فى جريمة قتل والتهمة ثابتة وانا شاهدة
يلا علشان تسيح بتسيح ونخلص منه خالص

شفقة هانم واحسان بك يقول...

عاشقة الرومانسية
كده بردوا بقى بتندبى وتقوليلوا يا عيني عليك يا احسان وكمان قدامى بتبصبصى للراجل عينى عينك كده
مفيش شوية اخولاق
يا دى النصيبة على الجيل المهبب

شفقة هانم واحسان بك يقول...

riri
ايه الكسل ده؟؟
اصحى بقى من النوم وقومى ردى علينا
وبطلى تنبلة
لو معلقتيش تانى هنعلقك احنا
اقصد هنعلق احنا

شفقة هانم واحسان بك يقول...

مقتطفات من حياة فتاة
ايه يا شيخة دى انتى شايفانى بدن فى جامع
وكمان بتناصرى الراجل
ماشى انا بقى بناصر وسادات وبمبارك
ايه رايك بقى؟؟
عموما ماشى انضميتى ليه براحتك وليكى يوم

زوجه يقول...

السلام عليكم
ازيك ياشفقه عامله ايه
واحشاني والله
بس ايه ياستي المصايب ديه
انا لما اتجوزت مكنتش زيك كده خالص خالص
اه صحيح مكنتش بعمل في بيت بابا اي حاجه بس كانت عنيا مفنجله واتعلم كل حاجه وانا في مكاني من غير مقوم ولا اتحرك
تحياتي ليكي وللاستاذ احسان
وربنا يتقبل منكم الاعمال الصالحه

قلم رصاص يقول...

هههههههههههههههههههه

احسن موقف عجبني بتاع حلل التيفال
هههههههههههههههههههه

بجد ربنا يسعدكم

تقبلوا تحيتي

شفقة هانم واحسان بك يقول...

زوجة
ايه الشطارة دى ؟؟
خلاص انا من بكرة هاجى اخد عندك كورس...موافقة؟؟

شفقة هانم واحسان بك يقول...

قلم رصاص
منور انا بقى احسن موقف عجبنى موقف العباسية

همس يقول...

هههههههههههههههههه

والله مظلومة

هما الرجاله كدا ما بيعجبهم حاجه

انا كل موقف واخوه عيطت عياط
حسيت بمدا اضطهادو ليكى

انااقترح يا احسان باشا
تعمل تامين على نفسك
اهو تضمن تلاقى حاجه تتصلح بيها

بالرغم انى اؤكدلك انك من المخلدين فى الارض بعد اللى اتعمل فيك

الله يكون فى العون

ريهام العربي يقول...

هههههههههههههههههههههههههههههههههه

انتم السابقون ونحن اللاحقون

وبعدين احنا ان مكناش هنتعلم فيهم

هنتعلم فيمين يعني


لا جدعه استمري استمري ولو اتعلمتي

انصحك تبقي تفكريه بايام زمان بين الوقت والتاني :D التجديد مهم بردو مش كده ولا ايه


بس بجد حرام اللي الرجاله بيشوفوه مننا ده


تحياتي ليكو

صدى الصمت يقول...

على فكرة أنا كمان أول ما إتجوزت بهدلت الدنيا وخليت الأكل يطلع من تحت إيدى كأنه إختراع جديد
وكل ما يسألنى ايه ده أقوله دى أكله جديدة ياروحى بس انت ماتعرفهاش
هههههههه
والله فكرتينى باللذى مضى

لماضة يقول...

هههههههههه
لا كده كتييييييييييير فعلا
بس برضه العلام مش بالساهل
مش هما اللى عاوزين يتجوزوا
خلاص بقى يستحملوا
هنقطع نفسنا يعني
نتعلم في الكليات ولا شغل البيت
ههههههههه
ربنا يصبرك ياعم احسان

Sister Of The Moon يقول...

لا لا لا
دي شفقة كده هايلة
المفروض هو يحمد ربنا على النعمة اللي مديهاله
عايز ايه اكتر من ابتسامة حلوة ودلع واخر تمام
:D :D
الباقي يعني مقدور عليه
أهم حاجة الحب :P

البوست هايل، نسلم ايديكوا

ماما أمولة يقول...

هههههههههههههههههههههههه

ههههههههههههههههه

ياربي انت بريئة كدا ليه

ربنا يكون في عونه والله يستاهل الجنة حدف

وانت تستاهلي بوسة على خفة دمك

وحشتيني

اقصوصه يقول...

هههههههههههههه

لا تعليق

ع العموم ننظر للامور من ناحيه ثانيه

زوجك داخل الجنه من اكبر باب

ههههههههههههههه

وينكى يقول...

هو انا لما اتجوز هابقى كده
:(
عااااااااااااااااا

بنت مصريه يقول...

ههههههههههههههههههههههه
شفقه انا كل مره ببقى ف صفك ضد احسان بس بعد البوست دا بقول بعلو صوتى
الله يعيييينك يا احسساااان


هههههههههههههههههههههههههههههههه
بوست جامد يا شفشوقه

مواطن مصرى نايم يقول...

هههههههههههههههههههههههه
ههههههههههههههههههه
وحشتونى جدااااااااا
جداااااااااااااا
و حشنى كمان احسان جدااااااا
حبيبى ربنا يكون فعونك يا كبير
ال شفقة المعذبة ال
دا شاف كتيييير يا عينى
معلش يا كبير
ربنا معاك بقى
و اخرتها يتكتب بوست يعتبر اعتراف بالتعذيب رسمى من شفقة
ههههههههههههههه
ربنا يخليكوا لبعض يا رب

البوست تحفة يا شفقة
هههههههههههههههههه
مت من الضحك

بس خلاص ... يقول...

والله انتى ست very intersting
وخليتيه يشوف الحياه بكل الالوان وكمان فوق البنفسجية وتحت الحمراء
غير انه شاف افلام رعب واكشن ..وبرامج حدث بالفعل
والله الراجل ده اتسعد ومامته داعياله فى ليله كلها شتا وعواصف وبرق

روحى ياشيخه ربنا يديكى الصحة
يابختك الملون يااحسان افندى

Teawater يقول...

هههههههههههههههههههه
ربنا يخليوك ده انت عثل عثل يا شفعه وكميله خالص موووووووت

عندما تكون ميمى وحاجات كتير مع بعضها كده يقول...

ههههههههه بجد انتى زى العسل والله يكون فى عونك ياحسان وبعدين صحيح لو مكنوش هما هيستحملونا مين الى هيستحملنا يعنى مشس فاهمه

فتوح أبو المفاتيح يقول...

هو دا بجد ؟؟؟؟

ملكة بحجابى يقول...

بجد زى القمر
مدونة خفيفة جدا جدا ولذيذة اوى
ووفكرتنى باعلان سمعان ونفيسه اللى طول الوقت سمعان هيموت من نفيسة مراته وغبائها
احم احم ..أقصد وذكااائها وبيدبرلها كل مقلب ومقلب عشان يخلص منها لكن نفيسة مابتموتش لسبب من 3
ههههههههههههه
تقبلو مرورى
ملكة بحجابى
الجارة اللى فى الشقة اللى جمبكو وسامعة خناقكو ومناقراتكو على طول
لو ماعقلتيش يااحسان هجيبله عروسه
هههههههه

ملكة بحجابى يقول...

تؤتؤ
لخبطتينى يا شيخة من صوتك العالى
ههههههههه
اقصد لو ماعقلتيش ياشفقة هجيب لسونة عروسة تخففه من اللى عملتيه فيه
لولولولولىىىى
هههههههههههههه

ঔღঔ نـــوارة ঔღঔ يقول...

هههههههههههههههههههه
هههههههههههههههههههههه

لااااااا بجد بجد همووووووت من الضحك

ياخرابي بجد عملتي فيه كل دا ولا بس هزار ؟

ربنا يعينه ياختي ومستحمل كدا ليه ههههههههههههه

وربي دمك عسل