الأربعاء، 25 مارس، 2009

عريس يا بوى .... طخه بس متعوروش يا بوى... بركاتك يا حسين


هالو ايفرى بادى وشورت وفانلة وكاب ...... وحشتونى جدا جدا اوى خالص اياك وان .....اسمع حد بيقول لا انتى موحشتناش خالص .... سكتم بكتم

ده انا حتى سيبالكم احسان لحد ما شبعتم منه ولا ايه؟؟

انا بقى حبيت اكتب النهاردة البوست ده علشان اهديه لاعز الناس علينا بعد ما اتخطبت وان شاء الله تروح بيت العدل .....مش "العدل جروب" لا انا اقصد بيت الهنا والسعادة والسكر الزيادة

وعقبالكم كلكم جميعا نفر .....نفر لما تنفك عقدتكم "قولوا امين "ولو انها شكلها عقدة بشنيطة ومحدش يقولى يعنى ايه لانى معرفش


سيداتى انساتى عايزاكم النهاردة تطرطقوا ودانكم على الاخر

ان شاء الله اذا حد فيكم اتفكت عقدته واتخطب

فاليكن بعض من النصائح اللى بأذن الله هتوديكم فى داهية

عايزاكى اول ايام الخطوبة لازمن .....ولابندق

انك تاخدى بالك من تصرفاتك كويس بدل ما العريس يطفش

من اولها بعد ما جه بطلوع الروح .....والدعاء فى الصلاة .... وزيارة اولياء الله الصالحين

والدوخة عند المشايخ ...والكلام ده كله

يعنى تحافظى عليه لاخر نقطة فى دمك وتذكرى جيدا

انه محدش بياكلها بالساهل..... ده المثل الوحيد اللى يفضل حلقة فى ودنك

فردة واحدة مش فردتين


اول ما تعرفى ان العريس قادم وجاى يزوركم بعد الخطوبة

علطول من غير كلام تروحى تنضفى وتلمى النعكشة والكمبوشة

اللى عملاهم فى دماغك وتحاولى تسرحيه كده وتسشوريه او تولعى فيه

الاتنين واحد ده اذا كنت من ذوات الشعر ابوسلك مواعين


اما اذا كنتى من ذوات الشعور الناعمة الملساء

فانصحك بانك تخبيه من عين العريس وامه لانه بعد الجواز مش هيفضل منه ولا شعره وبالتاكيد هتركبى باروكة ده من كتر حرقة الدم والعلق اللى هتاخديها فالاحسن والافضل انك تلبسى ايشارب وتداريه

- نيجى للميك اب والميك ام عايزين مكياج بنانيتى

يا ست الكتكوتة " على راى اللمبك"

يعنى حاجات كده على خفيف بلاش سايبس وتريكس والبلاك اللى بتهببى بيه عينك

خليكى على طبيعتك ميك أب رقيق

كده كده الراجل هيشوفك بعد الجوازمن غيره وبالتاكيد هيتفزع ومش بعيد يغمن عليه من اول طلة

فعلشان نتفادى الصدامات والذى منه نؤهله من بدايتها


واهم من ده كله البرفانات واختراع الروايح والحاجات الحلوة دى

وتسيبك بقى من فرم التوم وريحة البصل والموغات

كده كده ايامهم جاية جاية غصب عنك او برضاكى


اللبس عايزين احترام واحتشام وادب يعنى بلاش محزق وملزق وبلبانة

علشان ميقولش من اولها سايبة ومفيش حد يلمها

وابقى بعد الجواز طلعى عينه والبسى كل اللى نفسك فيك

اهو هيكون ادبس وخلاص ولو ان ابقى قابلينى

لو عتبتى بالهدوم دى بره عتبة باب البيت

ولو عتبتى هتلاقى الباب فوق نفوخك عدل

امال..... ساعتها هيكون زمن الدلع والعياءة ولى وراح

وأتى زمن الجلاليب ام سفرة وكم بكرانيش


المهم لبسنا واستحمينا وحطينا ميكب واتريحنا وبقينا تمام

نقعد بقى نستنى الفرج لحد ما العريس يجى يرزع على الباب

لا استنى .... مش من اولها لهفة وقلبنا يهفهف زى الغسيل المنشور

ونروج جرى رهوان على الباب.... لا ساعتها تفتكرى ان التقل صنعة

تهمدى كده ونقعد مكانا وتخلى حد من اخواتك يفتح الباب ويستقبله

وتنبهى عليهم خاصة لو كانوا صغيرين مش اول ما يشوفوا

علبة الشيكولاته يخطفوها ويسيبوه ملطوع على الباب

علشان الراجل مايقولش محرومين وطفسين ويحس انه مناسب مجاعة افريقيا

تسيبه كده يجى نص ساعة قاعد مع بابا ياكل دماغه شوية من الرغى

وبعدها تخرجى من الاوضة علشان هيكون الراجل فرفر خلاص وبيقول انقذونى

اول ما تشوفيه عايزين اتنين كيلو صلصة طماطم على وشنا من الكسوف والخجل

والكلام ده والعينين فى الارض لحد ما تحسى بالحول


قال يعنى محرجة وفى نص هدومك وكأنك اول مرة تشوفى الكائنات دى "اللي هما الرجالة "


بعدها نستنى جملة سلمى على خطيبك وتمدى ايدك بالطراطيف وتسلمى

وبكل رقة اهلا ازى حدرتك ايون حدرتك وختيبى وتنت وكده

مش حضرتك وخطيبى وطنط ابعدى عن حرف الطاء خالص لانه بيكلكع البق

وأول ما الراجل ربنا يفتح عليه
لا مش يقرا سورتين
اقصد يفتح عليه
فى الكلام
نسمع كوي
س ونرد بأدب
ومش عايزين ايه... ونعم و
طرش وضعف سمع من اولها
خلى الاعاقة دى لبعدين كله جاى بعد كده ماتستعجليش وتفتكريها بمبى

والضحكة اهم حاجة الضحكة تكون بسيطة يادوبك فتح الخدين وضم الشفاتين

بلاش الضحكة ام سنان دى علشان الطقم ما يبانش

وياخد باله من الحشو والتركيب والتسويس


يعنى عايزين "يابو ضحكة جنان " "مش يابو ضحكة سنان"

كمان تبقى مركزة اوى مع ماما اول ما

تغمز بعينيها يعنى امشى انجعرى على المطبخ

تروحى على المطبخ رهوان

وتمشى بسرعة 3 حصان

بس من غير رفس

وتحسسيه انك كلك نشاط وحيوية مش حيوانية

وتروح تقدمى المشروبات بكل شياكة وخلى بالك من الدلق

وخاصة العصاير على البنطلونات علشان التلزيق والنمل

واول ما يبقى فيه كلام على الطبخ والمواعين وتقشير البصل

مش عايزين نتأفف من اولها ونشوح بايدينا

عارفين انها حاجات تزهق بس ما باليد حيلة

لازم تبينى انك ست بيت شاطرة وياريت لو تحفظيلك كام وصفة كده

من كتاب ابلة حظيرة وتقوليهم ادامه

علشان قلبه يطمئن انه واخد ست البنات مخترعات الهبابات وعك البطون وعمل الشلنكبات


معلش تعالى على نفسك فى الخطوبة بس وبعد الجواز

ابقى تنبلى براحتك واضربيهاله صرمة قديمة

ويبقى يقابلنى لو شاف شغل بيت

المهيه من جيبه لايد الشغالة عدل

وابقى اتحججى بضوافرك

والباديكير والمانيكير ... واوه باباه .....اوه ماماه....فينك يا تيزة وكده يعنى


لكن بالله عليكى اذا كنتى عايزة تكلبشى

فى الراجل بايدك ورجلك

وتاخديه الى قفص النسانيس والقرود


اقصد الزوجيه لازم تتبعى هذه الخطوات

اللى كل خطوه منها تودى على سكة جنينة الحيوانات

واللى يروح مايرجعش

واسأل مخرب



شفقـــــــــــــة


هناك 130 تعليقًا:

maiosha يقول...

ههههههههههههههههههه

حمدلله على السلامة يا شفقة

انا اول تعليق
هيه هيه هيه هيه

والله نصايح فى الجون .. بس هو يجى بس .. وانا احفظله كتاب ابله نظيره كله.. واجيبله كتاب اسامة السيد كمان

المشكلة الحقيقية بقى بجد .. هى المكياج
الواحد ممكن يخطب واحدة وطول الفترة دى فاكر انها بلون معين
وسبحان الله يصحى تانى يوم جواز يلاقى واحدة تانية خالص .. وبلون مختلف خاااالص

بس على رأيك هيكون إدبس خلاص

واعلى ما فى خيلك اركبه

أمبارح كان عمرى عشرين!!! يقول...

هههههههههههههههههههههههه
مش قادر اية دة هموت من الضحك هههههههههههههههههههههههههههههه
طريقتك رهيبه ههههههه
تسلم ايدك يا شفقة هانم بجد بوست تحفة
ودمة خفيف للصبح هههههههههههه
الناس بتقولى كفاية ضحك صوتك مسمع فى نت الجيران

تقبلى تحياتى وضحكاتى اصلى مش قادر امسك نفسى هههههههههههههه

مسدس صغير يقول...

يا سلام ع النصايح الغالية!!!
فعلا نصايح تودى الجبلاية.
هههههههههه
طب انتى عمالة تقولى نصايح للبنات طب والرجالة ملهمش نصايح زى دى وللا ايه؟؟
....
بوست هايل

عاشقه وغلبانه يقول...

ايه الجمال ده
انتي متأكده ان دي مش هاتطلق يوم الصبحيه...؟؟؟

هايبقي عليها ليه ده
هههههههههههههههههههههه


حمد لله علي سلامتك

عاشقه الرومانسيه يقول...

هههههههههههههههههههههه
انتى كنتى فين من زمان؟
وحشتينا ياشفقه
لا والنصايح روعه
انا شخصيا
عمرى ما هاعمل بيها
لو عملت بيها هارجع لامى قبل الدخله ماتتم حتى

عموما ربنا يقدرك على فعل الخير
ومن قدم شئ بيداه التقاه وهنيالك يافاعل الخير والثواب

اهى قلبت شحاته ميه ميه

ههههههههههههههه

Appy يقول...

مليش فيه يا ابله نظيرة خالص اللى بتقوليه ده انتى عارفه انا هو كده طيب يا بنتى انتى بتنصحى فى حاجات سهله طيب بزمتك الاستك دى واللى زى بيضرب ويشلت ويدى مقلب حراميه تنصحيه بايه اقولك من غير نصيحه انا مبسوطه كده
حمد لله على السلامه

طعمية سخنة يقول...

طيب مش عيب
الغش مش حرام ولا ايه
و ذنبه ايه المسكين ده
هو ال 1 ناقص يتعقد !
نسيتي انتي حاجة كمان الصوت الواطي خالص الهمس و بلاش تتخن صوتها زي ايام الفتونة
كمان للبنات اللي ليهم ماضي تخبيه و تعمل فيها خضرا الشريفة بس مش هتعرف تمثل كانها اول مرة بتشوفهم ! :D:D:D:D
اصل طالما المدهول طب يبقي كان زي ابو العربي ما كان ماشي مع مهجة !
بوست جميل :D و قريبا هتشوفي بوست مضاد

تحياتي

MǿиY El-Shreef يقول...

ههههههههههههه

الف حمدلله ع السلامه انا قلت انتوا اتأخرتوا كده ليه

تصدقي نصايح 10 ع 10

تسلم ايدك يا تنت :D:D

ههههههههه

ومبروك خطوبت الشخص المعرفه

ومستنيين من ده كتير

الـمــصــــريـة - عاشـقــة الـجـنــة يقول...

ههههههههه

إيه خفة الدم دي كلها؟

أضحك الله سنك يا شفقة

طيب انتي بتنصحي البنات يتمسكنوا لحد مايتمكنواويكون الزبون طب ووقع في الحفرة

ليا بقى سؤالين:
ـــــــــــــــــــ

لما يكتشف الحقيقة بعد الجواز هيعمل ايه؟

وعايزة منك نصايح مضادة بقى للرجاله المقبلين على الجواز يعملوا إيه علشان يتمسكنوا لحد مايتمكنوا

دي أول زيارة ليا لمدونتك اللطيفة وبإذن الله مش هتكون الأخيرة

خالص مودتي وتحياتي

سومه...مجنونه فى بلد عاقل يقول...

هههههههههههههههههههه اشوف فيكى يوم يا شفقه يا شيخه ان شاء الله ما عن الواحد اتجوز دا بطيخ رحمه على كدا
الله يكون فى عونك يا احسان يا اخويا كل دا شفقه عملته :)

سفروتة يقول...

ههههههههههههههههههههههههههههههههههههههههههه
ههههههههههههههههههههههههههههههههه
هههههههههههههههههههههههههههههههههههههههههههههههههههههههه
يخرب بيت خفة دمك
لا بجد انا مش قادرة امسك نفسي من الضحك
وكمان تلاعب بالالفاظ رائع

فعلا نضئح غالية من الاخت شفشوقة
حقيقي يعني اسأل مخرب
ههههههههههههههههههههههههههههههههههههههههههههه

انتي هايلة بجدددددددددددددددد
تحياتي يا ثكر مثكر
:)

شفقة هانم واحسان بك يقول...

maiosha
ايه يا ميوشتى انتى ناوية تلعبى مع المنتخب ولا ايه ايه حكاية الاجوان دى....لغتى بقت كروية خالص بس بقولك ايه اوعى تخبطى فى الشبك
بس علشان تعرفى هو بيصحى يلاقى واحدة تانية علشان هما بيغيروهاله وهو نايم اصلها بيبقى معاها استبن
كمان نصيحة سيبك من الاسطبل بتاع خيلك ده وركزى فى الصيدلية

شفقة هانم واحسان بك يقول...

امبارح كان عمرى عشرين
طيب ممكن اعرف والنهاردة بقى عندك كام
على كده انت هتسمى المدونة كل يوم ما دام ماشى بامبارح وبكرة وبعده
ولو سمحت ما ادبسنيش فى موتك ... انا ماليش دعوة بالجريمة دى
وياريت تبقى تسلملى على الجيران وخاصة بنتهم واخد بالك اللى بتجبلك الاخبار دى

شفقة هانم واحسان بك يقول...

مسدس صغير
وليك من عندى كيلو سودانى لزوم الجبلاية
بس ما ترميش القشر على الارض
اما بخصوص الرجالة فهم مش ليهم نصايح لا ليهم عيارين من مسدسك
واوعدك البوست اللى جاى هيكون للرجالة يلا

شفقة هانم واحسان بك يقول...

عاشقة وغلبانة
اعتقد انها هتطلق بس العصرية مش الصبحية علشان العريس هيكون لسه مفاقش وخد باله من الجريمة اللى ارتكبها فى حق نفسه

شفقة هانم واحسان بك يقول...

عاشقة الرومانسية
كنت فى بطن ماما بواوء
وعموما سواء عملتى بيها او معملتيش فمتقلقيش راجعة بيت ماما راجعة واسالى مخرب
بقولك ايه طالما حنيتى للشحاتة ما تيجى تشتغلى معايا انا واحسان وتقفى على باب المدونة تلمى تبرعات

شفقة هانم واحسان بك يقول...

appy
وحشتينى موت يا قمر ولعلمك انتى مالكيش غير حل واحد انك تتجوزى ظابط ما انتى عمالة تقولى ضرب وشلاليت وحرامية
يبقى مفيش غيرهم وهو كفيل بانه ياخد بحق كل دول بس على كده مش هيجبلك شقة لا هيجيب زنزانة والعربية هتبقى هربية بوكس والصباحية هتبقى تحيا مصر
ولو غلطتى هتاخدى اورنيك زنب وتتعلقى وعلى القفا وفين يوجعك
يبقى انصحك بالقاعدة جنب طنط ده المكان الوحيد اللى هتشلتى فيه براحتك

شفقة هانم واحسان بك يقول...

طعمية سخنة
والنبى بجنية فى رغيف لو سمحت وكتر السمسم
شوف بقى الغش حرام بس اللى مش عاجبه يشوف لجنة تانية او يمتحن لوحده لجنة خاصة
وبعدين اذا كان يطلق عليه الم سكين يبقى يستاهل مش غش لا قطع رقبته ده كفاية اسمه ابو شقين الم وسكين
وايه حكاية البنات ام ماضى دى طيب مفيش بنات بمضارع وبنات بمستقبل؟؟
شكلك كده مدرس نحوى ولغة عربية حلوة نحوى دى؟؟
بس تعالى خد هنا عمال تقولى الغش حرام طيب انصح نفسك سارق مننا ابو العربى ليه
ها اسلط عليك سونة
عموما نورتنا بجد وشرفتنا ونتمنى التواصل

شفقة هانم واحسان بك يقول...

MǿиY El-Shreef
ايه الاسم اللى بالمقلوب ده طيب ارد عليكى من الشمال ولا اليمين؟
عموما احنا اتاخرنا لان المينى باص عطل بينا فى السكة واضطرينا ناخدها كعابى
وايه تنت دى كمان .. هتخلى الراجل يطفش ويقول عجزت يا تيزة

حنين القلب يقول...

هههههههههههههههههه
الحمد لله يا ستى
انا عديت بس والله مش عملت الحاجات دى اصله كان جارنا وشايفنى وعارفنى حتى وانا بزعق واصوت ومنكوشه
بس الظاهر انه اتقدم ليه غصب واقتدار

البوست زى العسل تسلم ايدك يا شفقه

شفقة هانم واحسان بك يقول...

المصرية عاشقة الجنة
اولا نورتينا بجد واسعدتنا زيارتك
واهلا بيكى فى برنامجنا ما يطلبه المتبرعون ده على اساس اننا شحاتين
خفة الدم دى مصدرها خرطوم ميه محطوط على الدم عمل كوكتيل هايل ابقى جربيه
اما الرجالة اللى وقعوا فى حفرة فده قدرهم حد قالهم يتقدموا للونش ويرجعوا يقولوا وقعنا ليه
اما بخصوص السوالين
لما يكتشف الحقيقة العارية يا اما يتلهى على عينه وما يفتحش بقه ويجيله خرس او لو مش عاجبه يخبط دماغه فى الحيط ويشرب من اجدعها زير لانه فى الحالة دى مالوش غير حق الاعتراض فقط اما لو فكر يعمل حاجة تانية فهيدفع دم قلبه ويبيع الى وراءه وادامه وفى الحالة دى برضه هيجيله خرس بس زاد شلل زاد نقطة
بالنسبة للبوست المضاد للرجالة فاوعد السادة المستمعين بانه هيكون البوست القادم باذن الله

شفقة هانم واحسان بك يقول...

سومة مجنونة
واخيرا عادت سومة المجنونة وانضمت معا فى السرايا الصفراء وما يطلبه الملاحيس
بعدين ايه اشوف فيكى يوم دى طيب عايزاه اى يوم علشان اخده اجازة
وايه بطيخ ده كمان ده ما بيطلعش الا فى الصيف طيب وماله البرتقال وحش
وكمان بتقوى احسان عليا لا ده انتى فعلا مالكيش الا بطيخ واقرع
وحشتينى جداااااااااااااااااااااا

شفقة هانم واحسان بك يقول...

سفروتة
اعمل ايه يا سفروتى مش لاقية الا الالفاظ العب بيها سونة حرمنى من اللعب وقالى امشى العب ادام باب بيتكم وخبى منى اللعب فملاقتش الا الالفاظ تيجى نلعب معاها سوا

غير معرف يقول...

يارب تستفادى من مدونتى الاسلاميه دى هاتفيدك جدا


http://noureldens.maktoobblog.com/

اقصوصه يقول...

ههههههههههههه

كده احنا عرفنا

احسان بيه دخل القفص الذهبي ازاي

لووووووووووووووووول

سومه...مجنونه فى بلد عاقل يقول...

لا يا حبيبتى بطيختى بشعر والحمد لله بس مدوخنى الله لا يوريكى

Lady E يقول...

هههههههههههه والله وحشتيييييييييني

نصايح لذيذه فعلا

بيني وبينك كده يا شفقة انتي طبقتيها ولا لأ علشان ابقى بسأل مجرب يعني :)

اعترافات قلب يقول...

حمد الله على السلامة من بور سعيد
يا رب تكونوا اتبسطوا فهى بلد جميلة

أنا لسة متخطبتش لكن أكيد هتبع النصائح لما تتفك العقدة

تحياتى
شيمو القمر

شفقة هانم واحسان بك يقول...

غير معرف
نشكرك ونتمنى الافادة

شفقة هانم واحسان بك يقول...

اقصوصة
هو دخل القفص بس بعد ما قعدت اهش فيه للصبح .... بس عندك غلطة القفص كان خشبى مش ذهبى اصله قفص فراخ

شفقة هانم واحسان بك يقول...

سومة
اول مرة اسمع عن بطيخة بشعر انا على حد معلوماتى اعرف انها ببذر لكن بشعر اول مرة اسمع عنها
وطبعا لازم تكون بطيختك مدوخاكى على الحلاقين صح

شفقة هانم واحسان بك يقول...

Lady E
ايه يا ليدى الطفاسة دى هو انا بقولك اقرى ولا دوقى... ؟
قال لذيذة قال
ولعلمك وبينى وبينك انا طبقتها وغسلتها وكوتها كمان
وادى النتيجة بدون كلام ولا نقورة" على راى سعاد حسنى"

شفقة هانم واحسان بك يقول...

اعترافات قلب
بقى انتى لسه متخبطتيش امال الواحد طول مهو ماشى عمال يتخبط ليه؟؟
طيب هدعيلك الهى يحدف عليكى كام دبشة اقصد كام عريس مرة واحدة
اما بخصوص العقدة فان شاء الله تنفك ده ان ما كانتش عقدة بشنيطة راجعى السطور الاولى من البوست

حنان الشافعي يقول...

اولا السلام عليكم
ثانيا بقي
ههههههههههههههههههههههههه
ثالثا
ههههههههههههههههههههه
راابعا بقي
مش معقول كده
ههههههههههههههههههههههه
خااااااااااااامسا
متشكره عالزياره جدا جدا
سادسا
انا اسعد بزيارتي هنا
والموضوع تحفه
بجد ضحكت جدا
بس عندك حق في كتير من كلامك
ما هو لاااااااااااااازم يتدبس
هههههههههههههههههههههههه

تحياتي

fashkool يقول...

الله يضحكك يا شفقه هانم
اش خلى احسان بك عمال يشتكى على آخره كل ما يكتب بوست
بس بعد ازن احسان بك انت دمك زى السكر
تحياتى

لجين أبو الدهب يقول...

ههههههههههههههههه

أضحك الله سنك بجد ..

كل اللى قلتيه صح مية بالمية بس انتى قلتيها بطريقة ظريفة جدا ..

احلى حاجة ان كل الكلام بيأكد بس اول ما تقع رجلة فى الخية وبعدين ارجعى لطبيعتك تانى D:

استمعت جدا بقراءة البوست ..


أدخل الله السرور على قلبك ابدا ..

دمتِ بخير ..

smilyrose يقول...

السلام عليكم


اولا وحشتينى جدا


وبجد بجد بالنصائح الهايلة دى


ضمنا نبلط فى الخط جنب الحج والحاجة


ونقعد فى ارابيزهم للابد


هههههههههههههههههه



عنسنا ولله الحمد


ومفيش فايددددددددددة



خلاص بقى


هههههههههههههههههههههه



smilyrose

وردشان


روح الحب الصادق

ماما أمولة يقول...

ايه دا يا شفشوقة

هههههههههههههههههه

فعلا أقصر طريق إلى قفص القروووود

واسأل مجرب

سلام يا حبيبة قلبي

kochia يقول...

اولا فينك من زمان
والله ليكي وحشة

ثانيا ايه النصايح الجامدة دي
مش عارفة الواحد من غيرك يعغمل ايه
الف تشر
ونخدمك في الافراح ان شاء الله

تحياتي

سمو الأميرة سارة يقول...

عن حرف الطاء خالص لانه بيكلكع البق

هههههههههههههههههههه اتاريهم كلهم بيقولوا

تنت هههههههههههه

وحشتيييييييييييييييييييييييييييييييييييني قد الكون

شفقة هانم واحسان بك يقول...

حنان الشافعى
ايه يا بنتى كمية الضحك دى فضحتينا اكتمى بقى
وايه حكاية يتدبس دى طيب خلى بالك من الدبابيس لحسن بتشك

بس خلاص ... يقول...

شفشوقه اولا عايزه اسألك مين القمر اللى فى الصورة الاخيره دى ام نظارة شايفاها... ايييييوه دى اوعى تكون واحدة صاحبتنا ..؟؟؟

طبعا الكلام ده من واقع تجربه شخصيه بحته شحطه ... ولذلك قررنا نعمل لاحسان بك تمثال كبيييييير جدا ونحطه فى ميدان كبير فى مدينة البسلة والجزر
وندعو كل الازواج والخاطبين واللى اتخطبوا واللى لسه هيتولدوا ويتخطبوا يروحوا يزوره ويعتبروا بيه كفدائى ومجاهد عظيم

شفقة هانم واحسان بك يقول...

fashkool
ايون كده وقعت بلسانك بقى احسان بيشتكيلك طيب والنعمة لطلعه على عينه بلاليص ملاحيس فسافيس
وحدد سكر بالكيس ولا شيكارة

شفقة هانم واحسان بك يقول...

لجين ابو الدهب
ايه حكاية الخية دى حسستنى انى متجوزة عنكبوت

شفقة هانم واحسان بك يقول...

smilyrose
انتى وحشتينى اكتر
بس موضوع الارابيز ده انا متاربزه منه اقصد..... بريئه منه مش عايزين تالاكيك كده كده هتعنسوا هتعنسوا
وبلاش شغل بتوع المحارة ده .....وعموما انتوا مش هتبلطوا بس لا ده كان موضة قديمة دلوقتى هتقشينوه وهتسرمكوا" قيشانى وسراميك يعنى"

شفقة هانم واحسان بك يقول...

ماما امولة
اصلى غيرت المثل القائل اقرب طريق لقلب الراجل معدته وخليته يواكب العصر وبقى اقصر طريق قفص القرود اهو الواحد يتنطط شوية

شفقة هانم واحسان بك يقول...

kochia
اولا كنت فى بطن ماما
ثانيا نصايح جامدة! هو انا بقولك اكسريها انا بقولك اقرءيهامش عايزين تحريف
وكمان نخدمك فى الافراح انتى غيرتى المهنة ولا ايه؟؟
بجد وحشتينى

شفقة هانم واحسان بك يقول...

سمو الاميرة سارة
شفتى يبقوا اكيد طبقوا النظرية بتاعتى وجابت نتيجة
انتى كمان وحشتينى اد كيمو كونو

شفقة هانم واحسان بك يقول...

بس خلاص
هى فعلا واحدة صاحبتنا ....والحدق يفهم
وبعدين ده على اساس ان احسان ارنب
ولعلمك ما ينفعش يبقى فدائى ولا مجاهد اللى ما دخل جيش ولا شافه ......اوام هتعتبروه فدائ عموما يبقى شرف ليا لو حصل على الشرف العظيم ده لانى ساعتها هاخد لقب مراة البطل وهرفع علم باسمه على الجبهة

طـــائر الليــــل الحـــــزين يقول...

هههههههههههههههههههههه
فعلا نصائح مهمة جداااااااا
بصراحة منك استفدت
بجد دمك شربات والصور مشكلة والموضوع جنان وطريقة الكتابة ملهاش حل
كلام فى سرك انا حفظت النصائح دى وان شاء الله لما ربنا يفرجها سوف يتم تنفيذها
تحيااااااااااتى

روئه مشاكل يقول...

هههههههههههههههههههههههههههههههههههههههه
ههههههههههههههههههههههه

طيب حلو اوى واناكمان هكتب النصايح دى عشان منساش حاجه بقا هههههههههههههه

شفقة هانم واحسان بك يقول...

طائر الليل الحزين
بجد دمك شربات والصور مشكلة والموضوع جنان وطريقة الكتابة ملهاش حل
ياااااه كل ده للدرجة دى المسالة صعبة؟
اهم حاجة التنفيذ ها علم ...حول

شفقة هانم واحسان بك يقول...

روئه مشاكل
هو ايه ده احنا هنعمل حجاب؟؟
وبعدين مش من اول زيارة كده هنغش
مش عايزين كده
هههههههههههههه
نورتينا

mohamed ghalia يقول...

حلوه أوووووووووووووى النصائح دى

mohra يقول...

اظن الصور توضيحيه مش كده..يعنى نعمل زيها بالظبط
اصلى على طول كده افهمها و هى طايره

ايمان روحي يقول...

هههههههههههههه
ايه العسل ده ياعالم
عسل ياناس عسل
بجد نصايح حلوة بس انا لسه بدري عليه
ابقي انصح فيها صحباتي
هههههههههههههه
بس حلوة اوي شيلي حرف الطاء دي والحركات دي كلها
يعيني الراجل بعد الحواز هيكتشف انوا اتخم
ههههههههه
يعطيكي العافيه
جد حضرتك ثكوله خالث مالث
تحيـــــاتي

MaNoOoSh يقول...

دمك ثكر يا شفقة هانم
طب كنتى امتبيلنا كام نصيحة كدة نستخدمهم مع حموات المستقبل ينكن يروحوا هم والعريس على الجبلاية ونفضل احنا بالنعكوشة والكمبوشة
ههههههههههههه

حنين القلب يقول...

عااااااااااااااااااااا
انا مخصماكى
ومش هاجى هنا تانى
رديتى ع الناس كلها وانا لا

عاااااااااااااااااااااااا
ربنا يسامحك يا شفقه

اهىء اهىء اهىء

ahmed_k يقول...

هههههههههههههه
إسأل مخرب
كده وش دي ختامها مسك اوي
بس نصايح تمام التمام
هي دي الكلبشه بصحيح

مقتطفات من حياة فتاة يقول...

هههههههههههههههههه
هههههههههههههههههه
هههههههههههههههههه
ايه ده حرام عليكي انا كنت بموت من الضحك اخويا بيقولي انتي مجنونة ولا ايه
من كتر ما انا مش ادرة امسك نفسي من الضحك
لحد ما جه وقرا كان هيموت على نفسو من الضحك

enjy يقول...

شووووووووووووووووووووشو
ازيك يا حلوة وحشانا والله جدا
بالنوسبة للموضوع الشائك دة انا ماليش دعوة بيه انا جاية اقولك متغيبيش كدة تانى
اوك؟؟
سلام

اصحى يا مصر : اسلام ديو يقول...

هههههههههه
يالهوووى
دا الكلام دا اتحكى كتيييييييير

بس اللى انا شايفه ان بعد الجواز بيحصل تغيرات جزرية وفعلية ونفسية وشكليه ومنظرية زى ما قلتى
بس برضة مش يمنع ان فى ازواج بيكونوا ماشيين على مبدأ معين وبدون تغيير لحد ما يعجزوا

صح ولا انا غلطان؟؟

زوجة عنيدة يقول...

ههههههههههههههه
سيبنى اضحك شوية

ايةالحلاوة دى والنصايح النحفة دى

بس عندك حق
انا مرة كنت عايزة اطفش عريش طلعتلة عملة زى حلاوة المولد والميك اب اوفر اوى

مع انه لما شافنى اول مرة كنت من غير ميك اب
لانى مش بحب احط كتير غير فى المناسبات
او لما احب اغيظ جوزى دلوقتى اقوم احط مكياج واقولة يلا نخرج
ههههههههههه

يقولى مفيش خروج من البيت بالمنظر دة
حبه غلاسه

بس نصايحك فى الجول

يا بنا اسمعوا وعوا كلام شفقة

تحياتى:)

شفقة هانم واحسان بك يقول...

حنين القلب
انا مقدرش على زعلك لكن اعملك ايه انتى اللى زنقتى نفسك وانا برد على الناس فوقعتى منى
عموما انتى فعلا كويس انك عديتى بقى بزعق وبصوت ومنكوشة عموما يحمد ربنا ويبوس ايده وش وضهر هو فيه واحدة ست بتعرف تهرش دلوقت كفاية شغل البيت
بس بينى وبينك وفى الخباثة هو مش اتقدملك اقتدار لا وانتى الصادقة انتحار" قلبى معاه
واياك وان اسمعك تقولى مش هاجى تانى والنعمة اجى اخطفك من بيتكم واريح المسكين ده منك

شفقة هانم واحسان بك يقول...

mohamed ghalia
حلووووووووو اوى هو انا بعزم برز باللبن

شفقة هانم واحسان بك يقول...

mohra
يا واد انت يا بتاع افهمها وهى طايرة انتى خريخة غية حمام قسم طيور؟؟
وبعدين ايه توضيحية دى هو انا حاطة صور ولا خريطة العالم

شفقة هانم واحسان بك يقول...

ايمان روحى
لو عاجبك العسل متبقيش تيجى فاضية ابقى هاتى معاكى برطمان طحينة ورغفين فينو
وانا بقى ههديلك اغنية" كان بدرى عليك عليك بدرى"
ولعلمك ومعلوماتك الشخصية الراجل بعد الجواز مش هيكتشف انه اتخم وبس لا....
واتهم واتلم واتغم

شفقة هانم واحسان بك يقول...

MaNoOoSh
راجعى البوستات القديمة " ازاى تكونى عفية مع الحماه المفترية"
اما بخصوص الجبلاية فهى خلاص بسبب الحموات قفلت وبقت كومبليت ابقى روحى زوريهم وخدلهم معاكى موز وسودانى ولو انهم كفاية عليهم القشر

شفقة هانم واحسان بك يقول...

ahmed_k
مسك ايه وكلبشة ايه.... هو انت داخل تعلق ولا تمسك حرامى؟؟
انت فين من زمان محدش سامع صوتك

شفقة هانم واحسان بك يقول...

مقتطفات من حياة فتاة
انتى واخوكى.... لا حول الله يا يارب عموما احنا بنخلى مسئوليتنا عن العائلة دى
وموتوا انتم براحتكم احنا مالناش دعوة

شفقة هانم واحسان بك يقول...

enjy
على فكرة يا جيجى انتى وحشتينى اكتر
اما بالنوسبة للموضوع الشائك فان راجعت البوست ومالقتش فيه لا ابر ولا دبابيس ومن ساعتها وانا هتجنن امال ايه اللى شكك

شفقة هانم واحسان بك يقول...

اصحى يا مصر اسلام ديو
يا ترى مصر صحيت ولا لسه واخدة تعسيلة؟؟
انا بقى اختلف مع حضرتك انا شايفة انه بعد الجواز بيحصل تغيرات جذرية وبسلية وكوسية وفاصولية والتغيرات ده بتكون من اختصاص الست
اما بالنوسبة للراجل فهو بيمشى فعلا على مبدأ بس مش معين ....لا مثلث من ثلاث محاور
المحور الاول.. البصبصة لحد ما عينيه طلعت لبره
المحور التانى.. البطر على المنكوشة اقصد العروسة
المحور الثالث..الشخط والنطر والتامير

شفقة هانم واحسان بك يقول...

زوجة عنيدة
وهو انا كنت مسكاكى
وعموما الحلاوة الرشيدى الميزان
بقى طلعتى للعريس زى عروسة المولد وكمان ميك اب اوفر! قوليلى انتى بتشتغلى عند حلوانى ....ولا بتاع خياطة وعراوى اصل هما بس اللى بيعملوا اوفر
بينى وبينك انا لو منه مطفش ...اهو على الاقل عملتيله نيو لوك وكمان وفرت عليه عروسة المولد فى المناسبات حد لاقى

اما جوزك اللى انتى شغالاله غيظ ده فربنا معاه ويعينه ولو انى بعمل زيك
ربنا معاهم كلهم ويقويهم

شمس النهار يقول...

لالا دي وصفه هايله دي واصفه سهله
فين العرسان بقا

كيــــــــــــارا يقول...

لالالالالالا دي وصفه سهله خااااااااالث تودي علطول للكراكون :) بيت النسانيس يحني يوه اقصد الزوجيه

ঔღঔ نـــوارة ঔღঔ يقول...

هههههههههههههههههه
هههههههههههههههههههههه
ههههههههههههههههههههههههههه

عسل وربي

ايه النصايح الرهيييبة دي ههههههههه

الحمد لله لقيت راجل ادبس فيي وخلاص

مش هتعب روحي بالنصائح هههههههههههه

بوووووووست يجنن

fashkool يقول...

يادى الغلب اللى انا فيه
هو انا فتنت على الراجل ولا ايه
ولا حاكون السبب فى تطليع عينه
رحماك ربى
انا ماليش دعوه
انا بس بحب اهدى النفوس وخلاص
جــرى .... سلام

أبو العريف يقول...

ايه النصايح الجامده دي
عموما اول ما افكر اخطب
هبقي ابعتلك خطيبتي
تقيم عندك يومين تلاته كده
هههههههههههههههههههههه
وهو تستفيد
بوست جااااااااااااااامد

aidy يقول...

بجد فطست من الضحك

اطمنى يا شفقة هنرفع راسك

بس هو يجى :(

يا مسهل

تحياتى

شفقة هانم واحسان بك يقول...

شمس النهار
ايه شمس من اولها طمع كده ؟؟
دى مدونة يا امى مش مكتب خاطبة
عموما نفذى انتى الوصفة السهلة وانتى هتلاقيهم طوابير ادام الباب

شفقة هانم واحسان بك يقول...

كيارا
هى خالث بقت بالثاء يالهوى
كله من المثاثة اللى بتاكليها لحست مخك وضيعت حروف اللغة
وكمان ايه كراكون دى انتى هتمثليلنا فيلم كراكون فى الشارع
كمان اوعى تقربى من بيت النسانيس لحسن فى لجان اليومين دول وبيمسكوا اللى بياكلوا مصاصة
وحشتينى موووووووووووووووت

شفقة هانم واحسان بك يقول...

نوارة
الف حمد وشكر انك لقيتيه ودبستيه خلى بالك منه بقى واشترى دباسة وكل ما يحاول يفك دبسى تانى

شفقة هانم واحسان بك يقول...

fashkool
لا عينه كده كده طلعت ماتخافش مش هتبلا عليك
لكن هتكون السبب فى كسر وضم وجر بقية الاعضاء
وعايز تجرى اجرى بس هتروح منا فين مدونتك عنوانها سهل والمواصلات مفيش اكتر منها

شفقة هانم واحسان بك يقول...

ابو العريف
هو انت هتنوى تخطب يا ابو العريف طيب الخطبة هتكون على ايه؟
عموما هابقى اجبلك معايا مشجعين وتصفير بقى وتصفيق حاد
بس خلى بالك لحسن بيمسكوا اللى بيخطبوا اليومين دول وعلى المعتقل عدل

شفقة هانم واحسان بك يقول...

aidy
ايه نرفع راسك دى وهو انا رقبتى كانت مالوحه ونازلة

Habiba يقول...

ياخراشى

حد معلوماتى انك متجوزه من الاخ احسان
وهو سايبك تقولى كده؟
يعنى كده كشفتيله خبايا مراته يادهوتى

لالالالالا مش هينفع ده خافى انتى على نفسك وابقى على اكل عيشك يابنتى

بالمناسبه هو انتى اللى كنتى يوم انا انثى بتكلمى كيارا وكنتى لابسه بنى وبنطلون جينز؟؟؟

مصري جدا يقول...

دمك زي العسل
كل دي خطة
دة أحنا اخر غلب

ريهام العربي يقول...

ههههههههههههههههههههههههه

نصائح تحفه ورغم انها كويس في نظري بس الصراحه من البدايه مفيش زيها بس مش الصراحه الفزيييييييييييعه لان هتلاقيه هو كمان هيعمل حركات والاتنين يتصدمو وكل واحد فيهم يرج بشنططه لمامته <_<


النهاااايه

همس يقول...

ههههههههههههههههه

انتى بتثبيها فى الخطوبه ولا بتخليه يطفش

حرااااااااااااااااام

دا انتى قولى جه بعد لفنا على المشايخ

عاااااااااااااااااااااا

بقلك ايه متعرفيش شيخ فيه البركه كدا

يعملى اى منظر

فضلى زلطين عااااااااااااااااااااااا


تسلم ايدك على النصايح



وحشينى اوى والله

الجواز و سنينه يقول...

ههههههههههههههههههههه
يالهوى دا انتى هاتودى البنات فى داهيه بالنصايح دى
ههههههههههههههههههههه
بس و الله عجبنى اوى حكايه الجلابيه ام سفره دى
هههههههههههههههههه
تصدقى كلنا بنعمل كده بس انا الحمد لله مش بحب الجلاليب من حسن حظه
تحياتى يا شفيقه هانم
آه توت ألوور

شفقة هانم واحسان بك يقول...

Habiba
يا خراشى ويا داهوتى! وكمان ابقى على اكل عيشى
ليه يا بنتى هو انا متجوازه ولا بشتغل عنده سكرتيرة؟؟
عموما انا ما باكلش عيش باكل فينو
اما بالنوسبة للاخ احسان فهو بيسلم عليكى وهو بيقولك انه سايبنى براحتى بمزاجه احسن من غصب عنه
اما بخصوص سؤالك فانا للدرجة دى اتفضحت؟؟
يا دهوتى اعترفى هو التلافزيون كان بيصوت ولا ايه اقصد بيصور

شفقة هانم واحسان بك يقول...

مصرى جدا
انتم اخر زمن مش اخر غلب

شفقة هانم واحسان بك يقول...

ريهام العربى
يرج بشنططه لمامته! انا يا بنتى بتكلم عن راجل وست مش على اتنين بيرضعوا ولسه فى اللفة

شفقة هانم واحسان بك يقول...

همس
ايه يا بنتى بتثبتيها دى ؟؟ هو انا ماسكة مطوة وبغزها بلاش شغل الحرامية ده يا همس لحسن ابلغ عنك
كمان انا معرفش الا البركة والمستنقعات تنفع؟؟
اما بخصوص الزلطين فاحمدى ربنا فى غيرك قاعدين عند بتاع المونة لما اجبسوا
انتى وحشتينى اكتررررررررررررررررر

شفقة هانم واحسان بك يقول...

الجواز وسنينه
يا خرابى معقول ما بتحبيش الجلابية ام سفرة طيب ولا انترية؟؟
يا بنتى هو فى احلى من الجلاليب دى بردوا دى حتى نيو لوك ... ده فيه حفلات اسمها جلابية بارتى نوصيبة لو مكنتيش سمعتى عنها
ولعلمك بقى ده مش من حسن ظنه ده من سوء ظنه تلاقيكى طول النهار تشلتى وتلعبى كاراتية براحتك مانتى لابسة بنطلونات علطول
ربنا معاه

كيكى يقول...

شفقةةةةةةةةةة هااااااااانم
***********************
ازى حضرتك
هااااااااااااااا
***عارفة كل شوية اكتب كلام وامسحوا اصلى متغاظة من حد اوى اوى**
ياترى مين الحد دة؟؟
سؤال يطرح نفسة
ام هند بقى
نصايحك بجد والله فى محلها مش بتريق
بس بقولك معندكيش باروكة سلف الحق اعلق بيها عم حتاته
وحشتينى ياوحشة يلى مش بتسألى
عوووووووووووووووووووووووووو

الشاعر محمد عبدالرحمن يقول...

على فكره في موضوعات كتير عن العرسان في المدونات اليومين دول بس موضوعك مميز جداً

شفقة هانم واحسان بك يقول...

كيكى
مين بينادى؟؟
وحشتينى جدا بس قوليلى مين ده اللى انتى متغاظه منه وانا اكلهولك بسنانى حتتك بتتك
ولعلمك يا كيكى انا نصايحى مش فى محلها دى فى سوبر ماركتها كده اوسع يا شيخة بتضيقيها علينا ليه كبرى الارفف
وبعدين السلف تلف والرد خسارة بس اذا كانت علشان عم حتاتة يبقى الموضوع يستاهل بس مش باروكة لا طقم اسنان

شفقة هانم واحسان بك يقول...

الشاعر محمد عبد الرحمن
منور .... ونشكرك على الزيارة
بس لعلمك موضوعى مميز جدا لانه بفيونكة ومنزل اوصه

*** حور- نور*** يقول...

يا لهوووووووووووووووووووى ايه الحاجات دى دا انت كده هطفشنا احنا مش العريس
نصايح حلوة اوى وامورة وعسولة دورلها بقى على عريس
تقبل مرورى صحافية حرة
ملحوظه :احنا عملنا جريدة جديدة اسمها جمهورية شباب مصر نكتب فيها اللى احنا عايزينه من غير عقد ومحتاجين النصايح الامورة دى
تابع معانا على
http://saharakl.blogspot.com/

ذكري رحيل قلم يقول...

السم عليكم
ايه يعني الاكل يبوظ انتوا عايزين وحدة جاهزة من كله وبعدين المكياج وسيله للتجديد بدل الملل يعني

وكمان الشاب من دول يبقي رقيق وحنين وصوته وشوشة وماش يا حبيبتي اعملي اللي انت عاوزاه وبعد الجواز بس شوف بس هس سي السيد وصل

المـــفـــــــقــــــــوعـــــة مــرارتـهــا يقول...

لو فيه نصيب مهما حصل الجوازة هاتكمل
يعني عندك انا بابا قاله مابتعرفش تطبخ قال العريس بكرة تتعلم
بابا قاله دي صغيرة وبدري عليها الجواز رد العريس بكرة تكبر ويبقي ليها في الجواز
بابا قال والا كفاية كدة عشان بابا خلاني شوروك علي الآخر بصراحة الراجل كان عاوز يخدمني خدمة عمري بس العريس هو اللي كان لازقة امريكاني
مش بقولك النصيب

تاني هام انا باجي كتير هنا بس انتم بقالكم مدة مانزلتوش جديد ومسافرين بور سعيد ومقيمين هناك والجو برد يااوختي فقلت اتكن في بيتي لحد ماترجعوا
شاااااااااااااااو

مقتطفات من حياة فتاة يقول...

حاجة شبه كدة ادخلي وقولي حاجة تنية ادخبلي تاني تكسبي اكتر
واخر يوم يوم الاربع هيتم فيه اعلان النتائج

بنت مصريه يقول...

ههههههههههههههههه
ازيك يا شفشوقه
حلوه قوى النصايح دى ههههههههههههه
هههههههههههه
انا طول منا بقرا البوست كاتمه الضحكه بالعافيه اصلى ف الشغل وخايفه المدير يشوفنى
هههههههههههه
بس بوست عسول زيك يا قمر

شفقة هانم واحسان بك يقول...

حور نور
انا اتحولت من الاسم اللى شبه بعضه ده
بعدين انا انثى احم احم مش واخدة بالك ولا ايه؟
وبعدين ايه دورلها على عتريس دى؟؟ اقصد عريس هو انا فاتحة مكتب خاطبة؟؟

سمكه واحده يقول...

ايه ده ياست شفيقه
عريس مين يابوي
بس نصايح في الجون يعني
انتي اللي وحشتيني فينك من زمان
لعدنا بنروح لعبض ولا بنزور بعض ولا حاجه

من يوم ما استلفتي من الفلوس وانتي كتيتي ياستي مش هطلبك لما تقبضي ويتوفر ابقي رديهم بس متغبيش علينا كده
وحشتيني والله ياجميل

شفقة هانم واحسان بك يقول...

ذكرى رحيل قلم
يعنى هو القلم انتحر ولا ايه ؟؟
عموما الميكياج وسيلة للحوسة مش للتجديد
اما الشاب بعد فبيكون دقيق مش رقيق وصوته خربشة مش وشوشة
وقبل الجواز بيسيبك تعملى اللى انتى عايزاه اما بعد الجواز فبرضوا بتعملى اللى انتى عايزاه بس مع الفارق انك بعد الجواز بتاخدى على حنطور عينك عدل وايده بتبقى طرشة وعينك ما تشوف الا النور

شفقة هانم واحسان بك يقول...

المفقوعة مرارتها
ده باباكى خلاكى بسيسة خالص
بس مش خايفة لا الزقة الامريكانى اقصد العريس يزعل ربنا يستر عليكى يا مفقوعتى
وعموما احنا رجعنا اهو والطريق ميتوهش
مالكيش حجة

شفقة هانم واحسان بك يقول...

مقتطفات من حياة فتاة
انتى حسستينى انى باعتة جواب لمسابقة لبان بمبم ايه يا بنتى هى فزورة ما تقولى الحل بقى جننتينى

شفقة هانم واحسان بك يقول...

بنت مصرية
وحياتك مفيش شغلانة كده لاختك زى شغلتك دى؟؟
قال ايه الهانم قاعدة تقرا البوستات من الشغل .... كلام فاضى
خليكى كاتمة الضحكة بس على مين انا اللى هاجى ابلغ عنك المدير اللى نايم على صرصور ودنه ده
ايون هبلغ عنك بس بينى وبينك هو الشغل ده عن طريق الوسيط برضوا ولا الوسطاء يمتنعون؟؟

شفقة هانم واحسان بك يقول...

سمكة واحدة
استلفت منك فلوس؟؟
ناقص تقولى انى داخلة معاكى جمعية بنفرين وهقبضهم سمك بلطى وجمبرى
اتبلى على اتبلى ما انا سايبكة تبلبطى براحتك
وحشتينى ومقدرش استغنى عنك يا سمكتى

Soma يقول...

ايه يا بنتي الكلام الجامد ده؟؟؟؟؟
بس عارفه البنات ميتوصوش في السهوكه, هما كائن مسهوك اساسا, بس ياريت نقدر نفضل كده علي طول, انا بشوف ستات كبار وعيالهم متجوزين بس اييييييييييه خمسين كيلو واللبس المحزق والميكب والشعر والاتيكيت والكعب العالي هوانم يا ماما
نفسي ابقي زيهم كده :)

صدى الصمت يقول...

ههههههههه
مش ممكن يعنى تغيبى تغيبى بس بترحعى ببوستات تحفة وتجنن وتموت من الضحك
على فكرة أنا عملت شوية من النصايح دى مع جوزى أيام الخطوبة والخطة نجحت وإتدبس خلاص
ههههههههه
سلام

صيدلانيه طالعه نازله يقول...

ههههههههههههههه
بصراحه كلمك كله حكم و اللى حيمشى عليه بعد الاكل 3 مرات يضمن فعلا دخوله الجبلايهقصدى عش الزوجيه الذهبى
و ياريت نكتفى بهذا القدر عشان الخساير قصدى المكاسب الكتير اللى حنجنيها من وراها و اللى انا شايفه انها خساره لينا يوووووووه قصدى فينا

ملكة بحجابى يقول...

شفشوقتى
انا جايلى عريس يااماى فعلا والحاجات دى عملتها
وقولت تشنط وختيبى وبتاع
بس انا كنت عايزة اطفشه وعارفة ان الرجالة بتبقى فائسة حركات البنات دى
ياختى لزء وما طفش
عمة لسه باقى اجزاء الخطة
ياانا ياهو
لزمن حتمن ولابدن يطفش انا مش فاضية بصراحة لختشوبة وبتاع الله بئى
هجيلك تانى ياعثلات اقولك انا عملت فيه ايه

أميرة

الملاك الحزين يقول...

ههههههههههههههههههه

حمدلله على السلامة يا شفقة
تسلم ايدك يا شفقة هانم بجد بوست تحفة
ههههههه

نهر الحب يقول...

شوشو
لازم تجبى احسان وتجيو
بورسعيد يا ام العربى
العربى ابنكم مفتقدكم اوى

نهر الحب يقول...

لقاء تدوينى يوم الجمعه 10/4
ببورسعيد اللقاء عبارة عن تجمع للتبرع للايتام المعاقين
ولقاء وتجمع تدوينى بعدها
ان شاء الله
ياريت تشرفنا
التفاصيل عندى وعند ماما امولة

حاجات جوايا يقول...

هههههههههههههههههههه
ليه كده بس حرام عليكى
هتخربى عالبُنية من اولها
دى كده هتخرج من بيت باباها برجل وترجعه بالرجل التانية

نصايح مخرب فعلا
هههههههههههههه

خالص ودى
سالى

أمبارح كان عمرى عشرين!!! يقول...

شفقة هانم احسان
التاج وصل استلمى بقى :D
سلااااااااام

سوبيا يقول...

انا اول مرة اعلق هنا

بس بجد
تسلمي

لحقتيني
قبل ما ابهدل الدنيا

احمدك يارب

يخليكي للغلابة

همس الاحباب يقول...

هههههههه
هههههههه
انا عرفت كل حاجة دلوقتى يا عم احسان
هى شفقة ثبتتك فى الخطوبة يا جرع
ههههههه
ونعم النصايح يا شفقة هانم
وانا بقول العرسان طفشت ليه من البلد
تسلم الا يادى
تحياتى
وسلامى لزميل الكفاح احسان بك

micheal يقول...

هههههههههههههههههههههههههههههههههه..ده أنتي مشكلة بقي
ايه يا بنتي الكلام ده كله..بتجيبيه منين بس..الصور كمان عاملة أحلاها شغل
:)
ونعم النصايح
:)
تحياتي يا فندم

د. إيمان مكاوي.. أم البنين يقول...

هههههههههههههههههههههه
حمدلله على السلامه يا ألذ لذيذه في الدنيا
بجد وحشاتي خفة دمك...بموت فيها
يارب تكوني بخير
دمت أخف دم

maiosha يقول...

انتوا فين يا جمااااااااعة

غايبين فين كل ده؟؟

سمو الأميرة سارة يقول...

انتوا فييييييييييييييييين وحشتووووووووووني

blue-wave يقول...

ههههههههههههههههههههههههههههههه
حمدالله على السلامه
والله وحشتنى المدونه دى جدا
وانتوا وحشتونى جدا جدا جدا
مش هاعلق على البوست لأنى جالى مغص من كتر الضحك:))
وفعلا نصايح هايله لكل واحدة مخطوبه وعايزة تخرب بيتها من بدرى كدا:))

العاب فلاش يقول...

حمدلله على السلامة يا شفقة

Eman Rashad يقول...

هههههههههههه
كل سنه و انتم طيبين يا جماعه بمناسبه رمضان و لو ان موسم الجواز بيبقى فى ركود فى رمضان و بينفجر فى العيد
نصايحة تحفه ربنا يجعلها بفايده بس

و بالمناسبه ديه بدعوكم لمدونتى وحوى يا وحوى افكار رمضانيه يا ريت تنورونا
http://wahawyyawahawy.blogspot.com

morgana يقول...

ههههههههههههههههههههههه

مدونتك جامده