بس والله احنا مش عاملين الصفحة دي من باب الشحاتة
ولا هو نوع من أنواع التسول اللا ارادي
لأ حقيقي احنا لغاية دلوقتي لسة لاقيين ناكل
و أظن اللي يفتح بيت ويلاقي ياكل وسط الغلاء اللي احنا عايشينه ده
ده يعد من الأثرياء ... وطبعا احنا منهم
بس انا هاحكيلكم أسامينا دي جبناها منين
مراتي اشتكت من طول قعادي على النت
وطبعا الرجالة أكيد كلامي هيكون مش جديد عليهم
لأن كلنا بنسمع كلام يسم البدن ... زي
الكمبيوتر ده بقى ضرتي
انت في البيت ومش في البيت
خلي البنات اللي ع النت ينفعوك
وكلام من ده كتير
مع انها هي كمان بتحب الكتابة والبلوجات
وبتقعد على النت ساعات طويلة هي كمان
بس بجد لقيت ان كلامها صح
وان الكمبيوتر بقى أكبر خطر بيهدد الروابط الأسرية
علشان كده لقيت ان الحل اننا نبني بروفيل مشترك
ساعتها هنقعد سوا على النت ... نكتب سوا ... ونرد على التعليقات سوا
وممكن كمان يكون لينا أصدقاء مشتركين
ما كدبتش خبر وبدأت على طول أبني الصفحة دي
بمجرد ما فتحت ايميل جديد ... وأنا لسة بافكر في اختيار الأسم
اذ بي أفوجأ بمراتي داخلة عليا بجرعة رومانسية مش في وقتها
ولقيتها بتسألني
بتحبني ؟؟؟
طبعا سؤال ساذج وقديم وفقد معناه
وعلشان ماتسألنيش تاني السؤال ده طول عمرها
رديت عليها بسرعة وبمنتهى الهدوء ... طبعا لأ
ردت بمنتهى الدهشة بس لسة مبتسمة لأنها متأكده اني باهزر
يعني ايه ... مش بتحبني ؟؟؟
هزيت راسي ومارديتش قلت كده بقى هتفهم اني مش عايز اتكلم دلوقتي فتسكت
بس برضه مافيش فايده
سألتني ... أمال انت اتجوزتني ليه ؟؟؟
شوفوا مدى سذاجة السؤال خصوصا انه بعد 5 سنين جواز
كان لازم أرد عليها بغلاسة علشان تفصل بقى
قولتلها اتجوزتك جبر خواطر
وكان ردها
جبر خواطر !!! وعشت معايا خمس سنين ليه ؟؟؟
شفقة واحسان ؟؟؟
أنا خدت الكلمتين دول وفكرت فيهم للحظة ... وضحكت ع الآخر
عجبني اني كل ما أحاول أستفزها ماتستفزش ... وردت عليا رد كوميدي
وكمان عجبني الاسم جدا
أولا لانه جديد وملفت ... أو هكذا أظن
وثانيا لأن الاسمين فيهم كتير من شخصياتنا الحقيقية
بس يمكن يكونوا الصفتين معكوسين
فانا من طبعي الشفقة ... الناس بتصعب عليا ... حتى لو كانوا أذوني
باسامح بسرعة جدا ... وبيصعب عليا كتير وده اللي بيخسرني كتير في شغلي
أكتر واحد بيطبق مثل : اللي يصعب عليك يفقرك
أما حرمنا المصون فهي بجد مدمنة احسان
طبعا مش من حقي اني أتكلم عن اللي بتعمله علشان ما أفسدش أجره
بس اللي أقدر أقوله اني اتعودت أكون ماشي جنبها في الشارع وفجأة ما ألاقيهاش جنبي
أحس للحظة انها اتخطفت ... أو وقعت في بلاعة
أبص ورايا ألاقيها لمحت شحات أو شحاته وواقفة تديله اللي ربنا يقدرها عليه
وما اخبيش عليكم على قد ما بيفرحني تصرفها ده جدا ... على قد ما باكون متغاظ جدا
لأنها سابتني باكلم نفسي ورجعت لورا من غير أي سابق انذار
ثانيا لأني عادة باتخض عليها لما ما ألاقيهاش جنبي للحظة لايكون حصلها مكروه
والخوف كل الخوف تيجي في مرة تتخطف ولا تقع في بلاعة وأنا آخد الموضوع عادي وأقول أكيد شافت شحات بعيد شوية ... أو راحت تتبرع في جمعية خيرية أو دار أيتام
هناك 5 تعليقات:
هههههههههههه
جميل جدا البلوج ده
متوقعه له نجاح كبير
دائما للامام
ولكم تحياتي
دمكم خفيف جدا جدااااااا
ربنا يوفقكم دايما وتسمحوا لي ابقي اكرر الزيارة للمدونة باعتكم
السلام عليكم ورحمة الله وبركاته
استاذ احسان
ديى اول زيارة ليا بس
مش قادر اكتب من كتر الضحك
بجد ربنا يخليكوا لبعض يارب
ويديمها عليكوا سعادة
ياسر
لما بدخل مدونة جديدة عليا بحب ادخلها من اولها عشان اعرف اصلها وأشوف كل اللي فيها :)
جيت هنا الاول و ان شاء الله هتابعكم وهضيفكم عندي عشان فكرة المدونة هايلة جدا وعجبتني قوي
يارب يديم عليكم تفهمكم لبعض
وتمتعونا بكلامكم الجميل
:)
تحياتي :)
ههههههههههههههههههههههههههههه بجد بجد انتوا زي العسل بسم الله ماشاء الله .. بجد كل ما اجي داخلة هنا او افتكركم بدعيلكم ربنا يخليكم لبعض
انا اول لما شفت الاسم بصراحة خطر في بالى الشفقة والاحسان بتوع الشحاتة بس الفكرة عجبتنى أوي .. وعجبتنى أوي شفقة وخفة دمها و انت كمان يا احسان لماضتك لذيذة أوي
بجد بجد ربنا يحميكم
إرسال تعليق