الخميس، 15 مايو، 2008

احســـــــــــــــــــــــــــــان بك ..... جــــــــــــــــــــــــوزي


احلى حاجة فى البلوج ده ان احسان ساب لى مساحة اتكلم فيهاعنه شوية وقال يعنى فاكر انى هامدح فيه وبيغرينى بالكلمتين اللى قالهم عنى وانا نايمة .......لا بس على مين دا انا ما صدقت هاخرج الكبت

اللى جـــــــــوايا منه








"اعــــــــــــــــــــرفكم الاول بيه"








المدعو" احسان بك" من مواليد ---- مش فاكره بس هو بقاله كتير عايش
وهو اكبر اخواته البكرى يعنى علشان مفيش حد يبقى احسن من حد
ومش هقدر اقولكم هو بيشتغل ايه لانه جرب فى حاجات كتير
والحمد لله الحمد لله مبيفلحش فى حاجة بسبب تفكيره العميق فى كل المواضيع
ومن كتر العمق بيغرق








بيحب شغله جدا ونشيط وبيشتغل طول النهار لدرجة انه معندوش وقت يقعد معايا من كتر قعاده على النت
المهم هو دمه خفيف موووووووووت
طيب مسالم الى حد ما تقدروا تقولوا نسمة فى البيت







لا بيزعق ولا بيتخانق ولا تسمع غير حسه فى البيت
متعاون جداااااااااااااااااااااااا "وخلوا بالكم من متعاون دى اوى"







يا سلام بقى لما الواحد يبقى مريض مقولكمش....ازاى بيخاف عليه وبيساعدنى ياااه فكرتونى مبيخلنيش اعمل اى حاجة فى البيت
"اه امال"
لدرجة انى على اد ما اقدر بحاول ما أعياش







بيحب اهله جداااااااااااااااااااااااااا لدرجة مستفزة بس بصبر نفسى بجملة"اللى مالوش خير فى اهله مالوش خير فى حد








زوج مثالى بمعنى الكلمة لا بيبص يمين ولا شمال والله لو مين عدت قدامه"طبعا مبيعتقهاش







بيحبنى مووووت بس فى نفس الوقت بيحب اى حاجة فيها كلمة انثى ..مش بقولكم زوج مثالى
ملتزم وبيعرف دينه وماشى على الشرع بس فى حاجة واحدة...انه نفسه يتجوز اربعة








لا بجد حرام مش عايزة اظلمه








هو بجد طيب جدا وحنين بس بردوا عصبى وبيغضب بسرعة
ذكى جدا جدا لدرجة تخنق وبيحب يفكر كتير ودايما تفكيره بيكون سليم وحكيم
مثقف وبيحب قناة الجزيرة ضرتى فى البيت
دمه شربات والناس كلها بتحبه نظرا لانه مش مغرور ولا متكبر ودى الصفة اللى اتجوزته علشانها
متسامح جدا الى ابعد حد لدرجة بتغيظنى وتستفزنى
بيحبنى بس بيحب التغير و بيمل بسرعة لذلك بحاول اكون متجددة علشان ميفلتش منى
متفاءل وبيحاول دايما يشجعنى ويدفعنى للامام دايما صاحب الخطوة الاولى فى حياتى
مش خنيق وبيدينى حريتى وما بيفرضش على حاجة
انا اتكلمت عنه كتير اوى وكفاية عليه كده







واكيد فى مرات جايه كتير هاقدر اذم فيه براحتى













امضاء...شفقة هانم









هناك 14 تعليقًا:

Diyaa' يقول...

دمكم سكر
بس الصورة فوق مش سكر خالص
معرفش إيه اللي مش عاجبني فيها بس متهيألي فيها سخرية مبالغ فيها أوي
تحياتي وبالتوفيق

سبهللة عالآخر يقول...

انا بأيد كلام التعليق اللى قبلى
ارجوكم شيلوا الصورة اللى فوق بجد مزعجه جدا
الا لو كانت فعلا هى دى صورتكم الحقيقة خلاص خلوها ذكرى للاولاد
ياريت تسمعو الكلام لانه فى مصلحكتم

حماتــــــــــــي ملاااااااااااك يقول...

عمري مابازهق من المدونات المشتركة اللي بين الزوجين ابداً
ونفسي جوزي يعمل واحد يسيحلي فيها بس هو مش فاضي
وكل شوية يهددني انه هايعمل بس مش عاوز
هاازن تاني
انا قريت المدونة من اولها لآخرها
ومعاكي ياشفقة في كلمتك اللي بتصبري بيها نفسك وباصبر بيها نفسي انا كمان وهي ان اللي مالوش خير في اهله يبقي مالوش خير في غيرهم
بس الرجالة مزوداها أوي بشكل يخنق
تحياتي
بداية رائعة

واحدة مفروسة يقول...

شفقه و احسان المدونه حيبقها شكلها لطيف و متهيألى حيبقى دمها خفيف ...و مشوقه
بس الصراحه الصوره اللى فى الاول مش حلوه انا دخلت و لما شفتها خرجت من غير ما اقرأ ....
المفقوعه صحبتى رجعتنى ليها تانى و قالتلى حتعجبك
وفعلا عجبتنى لان امدونات اللى فيها تسييح للازواج بتبقى دمها خفيف
ربنا يوفقكوا...و لو عاوزين صور قولولى و انا ادورلكم انا بحب الدعبسه

شفقة و احسان يقول...

ايه يا جماعة انتم وحشين اوى يعنى مش عجباكم صورة فرحنا؟؟ كده بردوا تتريقوا علينا!!

جيفارا المصري يقول...

مبروك يا استاذ احسان
و الف مبروك للمدام شفقة و بالرفاء و البنين ان شاء الله

واضح انها هتكون مدونة جامدة
مستنيين منكم الكتير
بالتوفيق

HERO يقول...

بجد ملكوش حل انتوا الاتنين
ههههههههههه
ونعم الازواج والله بس شكلكوا متافهمين الحمد لله واللهم لا حسد
وربنا يهدي سركوا

تحياتي

دعاء مواجهات يقول...

ههههههههههه

دا انتى بهدلتية ع الآااخر

بس شكلكو كابل عسوول اوى كنت عاوزة اسال هى الصورة الى فوق ف المدونة دى صورتكوا؟؟

لاااااازم تزورونى ف مدونتى عزماكم ع الشاى والكييك وكل اللى تحبووة اوعوا ما تجووش

بت خيخة وأى كلام يقول...

الصورة مش لذيذة
غيروها
وحطوا بدلها صورة كاريكاتيرية احسن
بلاش تحطوا صورة لناس حقيقين
علشان ممك حد يدخل يتريق على الناس اللى فى الصورة
وده حرام جدا

معلش دخلت حامية عليكم ودى اول زيارة ليا

قريتلكم البوستات كلها
وفى انتظار المغامرات الزوجية

ربنا يسعدكم يارب ويبعد عنكم اى عين وحشة

تحياتى ليكم
اختكم خيخة

Diyaa' يقول...

متهيألي اللي دخلوا بعدي عبروا أحسن عن رأيي في الصورة الهيدر للبلوج
لما حد هيضحك أو يتريق علي الصورة أو يبصلها بسخرية فأعتقد إن ده بيبقي سخرية من خلقة ربنا..مش من الأشخاص نفسهم حتي لو هما بياخدوا الموضوع بسخرية
ممكن تدوروا علي صورة كارتون مثلاً بتعبر عن اللي عايزينه أو صورة من فيلم لبطل وبطلة من بعيد يعني..أو حتي أي صورة فيها سخرية بشكل كاريكاتيري أكتر منه واقعي ..بس خلاص ومتزعلوش بس يعني..شبهة الذنب البسيطة دي ليه مش نتجنبها :))

ro7 يقول...

سعيدة اني زرت مدونتك
وربنا يخليكوا لبعض
ويؤلف بين قلبيكم دائما
ومشكورة علي الزيارة
بس ليا ملحوظة
الصورة اللي في راس المدونة
بصراحة مش ظريفة بالمرة
ياريت لو تتفضلوا علينا
ربنا يكرمكم تبدلوها
باي صورة تكون افضل
واتمني زيارتكم تستمر
علي طول
تقبلوا خالص التحية

هوة فى أيه؟؟soso يقول...

بجد صفات جميله أوى أنها تكون فى الزوج
ربنا يخليكو لبعض
على العموم أنا حشوف دلوقتى هوة بقى قال عليكى أيه
ربنا يستر؟؟؟

Rannona يقول...

زي ما قلت قبل كدة..انتوا الاتنين محظوظين ببعض
ما شاء الله عليكم
والمدونة هايلة فعلا..وعلى فكرة هتفيدكم قوي في :))

ربنا يديم عليكم الروح الجميلة

تحياتي :)

Israa El-sakka يقول...

هههه
أنت خلتيلوا إيه بس إحنا في البيت عندنا بردو الجزيرة ضرتنا ..و بعد ما زودوا الشبكة بقت مرات أبونا و عيالها ..تحياتي للمدونة الرائعة و أتمنى دوام التواصل