الأحد، 13 يوليو 2008

مجنووووووووون سمـــاح أنور



عزيزتي سماح
أود أن أعرفك بنفسي أولا
اسمي إحسان ، مصري مقيم بالسعودية مع أسرتي منذ سنين
بصراحة مرت شهور وأنا احاول أن أعرف عنوانك أو صندوق البريد الخاص بك
وأخيرا وجدته منشورا في مجلة ....... تحت باب راسل نجمك المفضل
لذا أرجو أن تصلك كلماتي هذه ، فهي مكبوتة بداخلي منذ عام تقريبا
منذ أن شاهدت لك فيلم "الليلة الموعودة" أحسست بشئ ما بداخلي يدفعني لتكرار المشاهدة
لكني بصراحة لم أكن أشاهد الفيلم ، بل كنت أشاهدك انت
أراقب حركاتك ، أترقب انفعالاتك ، أصغي لحوارك ، ائن لصراخك
كانت المشاهد التي تضمك في هذا العمل توحي ببزوغ نجم جديد في سماء الفن
ولا أبالغ فأدعي أنك الأفضل بين ممثلي جيلك ، ولكني أقسم أنك الأكثر بساطة وتلقائية حتى الآن
لن أطيل عليك في خطابي هذا فأنا لست أدري بعد ان كان سيصلك أم لا
لذا أنتظر منك الرد لتخبريني بأن كلماتي قد وصلتك
عنواني هو
ثانوية الملك عبد العزيز - الرياض
الطالب/ إحسان محمد أحمد المصري
الصف الأول - أ








ده كان تقريبا نص الجواب اللي بعته لسماح أنور سنة 85
وتوالت الجوابات بعده ولا حد معبرني بأي رد
كنت حتى متوقع ان المحررين في الباب ده من المجلة هيردوا عليا باسمها
وانا كنت موافق اني اوهم نفسي بس ألاقي أي حد بيعبرني
بس اللي حصل ان ماحدش عبرني
لحد مازهقت وقلت خلاص مابدهاش هأقضيها أفلام وخلاص

ومرت سنين
نزلت مصر أكمل دراستي في الجامعة
وماكنتش أعرف ان مصر والجامعة هما اللي هيكملوا عليا
مش واضحة ؟؟
نوضحها بس مش أوي علشان الرقابة
يحصل ايه لشاب غشيم لسة جاي من السعودية المنغلقة رأسا للجامعة المنفتحة
لأ مش الجامعة المفتوحة ... بأقول المنفتحة
وخصوصا لو الشاب ده قاعد في مصر لوحده ومعاه عربية زيرو وفلوس كمان
طبعا نسيت "سماح" ، وأبوها الكاتب "أنور عبدالله" ، وأمها الفنانة "سعاد حسين"
ونسيت الأحلام العبيطة والأوهام اللي كنت حابس نفسي فيها وعشت حياتي

الى أن
أن أن أن آآآآآآآن
دخلت مرة صالة بلياردو في العجوزة اسمها هيرتش
وإذ بي افوجأ بالحب القديم ... ايوه سماح
جوه الصالة ... بتلعب بلياردو ... ايه ده ؟؟ مين اللي بيلعب معاها ده ؟؟
ده كان محمد رياض
حسيت بالدم ضرب في نفوخي
ولأول مرة آخد بالي اني عندي دم
وكمان لأول مرة أحس بالغيرة من حد على حد
ماهو بصراحة محمد رياض فيه كل مواصفات الرجولة
ده كفايه صوته الجهوري وهو خارج من حنجرته
ولا عينيه العسلي ... ده كمان حريف بلياردو
لأ كده أنا اتمسحت بأستيكة
بس لا تراجع ولا استسلام
بقيت زبون شبه يومي على صالة البلياردو اللي مابعرفش ألعبه أصلا
وشفتها هناك كتير ... بس كنت باتكسف ألعب قدامها لا تضحك عليا
لدرجة اني كنت باجيب معايا واحد صاحبي مجرم بلياردو باستعرض بيه قدامها
هبل مش كده ؟؟؟
عادي ... أنا عارف

ام هئ
مرت سنين ... وخلصت الكلية واتخرجت
وطبعا شغل ما اشتغلتش ... وكمان جيش مادخلتش
بس المهم اني اتعلمت العب بلياردو
في الوقت اللي بطلت فيه سماح تيجي صالة هيرتش
لدرجة اني جندت الواد اللي واقف في الكشك اللي على ناصية الشارع
لو شاف عربيتها قدام الصالة يكلمني على طول
وطبعا كنت مظبطه
مش باقولكم هبل في هبل
انقطعت أخبارها عني وماشفتهاش لمدة سنة تقريبا
وده كان مجنني طبعا
واللي كان مجنني أكتر اني كنت خلاص اتعلمت بلياردو
بس بعد فوات الأوان

وفجأة
وأنا رايح أغير عربيتي من معرض سيارات أعرفه في الزمالك
أقوم ألاقي سماح أنور بتغير عربيتها هي كمان من نفس المعرض
كان معاها أوبل كورسا أو فيات أونو
مش فاكر بالظبط
وبدلتها بالعربية اللي عملت بيها حادثتها الشهيرة
اشترت العربية النحس دي قدامي
وأنا حبا فيها
اشتريت عربيتها القديمة فورا
أي نعم أنا رجعتها بعد يومين
بس ده كان لاني مش واخد على العربيات الصغيرة
خصوصا اني طويل وعريض المنكبين شنكول الحركات مشتئب الفلنكات مشتهم الأبعاع
شلولخ
عادي بقى ما احنا متفقين ان الحكاية دي كلها هبل في هبل

أم هئ
مرت سنين كمان
ودخلت الوسط الفني من أوسخ أبوابه ..... احم احم قصدي أوسع أبوابه
عملت فيها إحسان دياب وقلت أغني
وهما يعني اللي بيغنوا دول أحسن مني في ايه ؟؟
درست في كلية التربيه الموسيقية
واتمرنت علي يد رئيس قسم العود بالكليه ... الله يمسيه بالخير
قولوا مين كان زميلي وقتها وبيتمرن مع نفس الأستاذ ؟؟
عامر منيب
بس هو ماشاء الله عليه فلح ... وأنا كالعادة
ايييييييييه دنيا

المهم اني لما قربت أخلص الألبوم بتاعي
يعني كنت عملت منه 6 أغاني وفاضل اغنيتين والميكس
وقتها سمعت ان سماح أنور دخلت عالم الغنا والموسيقى وبقت بتلحن
طبعا طلبت من مدير أعمالي يحدد ميعاد معاها فورا
وبالفعل أخدته وروحنالها البيت اللي كان في شارع لبنان
بصعوبة لقيت ركنة تحت العمارة
قلبي بيدق ... هاقابلها وجها لوجه وفي بيتها ؟؟
وكمان فيه ميعاد ... يعني هي مستنياني دلوقتي ؟؟
أوعى تخاف بقى المرادي يا جبان
صارحها بحقيقة مشاعرك
كفاية كبت لحد كده
ركبت الأسانسير
سحب معاه قلبي وهو طالع
وصلنا ... دقينا الجرس
وأنا كنت خلاص هارجع تاني في كلامي
بس الباب اتفتح بسرعة
سألنا عن سماح ... وسمعت كلمة اتفضلوا هي في انتظاركم

بوم بوم بوم بوم
دي كانت دقات قلبي وقتها ... ممكن تسمعها وانت واقف جنبي
في الريسيبشن كانت والدتها سلمنا عليها وهي قاعده
شاورتلنا على الغرفة اللي منتظرانا فيها سماح
بس لفت نظري حاجة
فيه كلب بلاك جاك شكله أليف جدا نايم قدام غرفتها
يااااااااه
دي كمان طلعت بتحب الكلاب زيي
وأنا في الفترة دي بالذات كان عندي كلب بلاك جاك برضو
ايه الصدف الكلابي دي يا سماح ؟؟
ههههههه ... هوهوهو

وصلت قدام باب الغرفة ... خبطت ع الباب ... وسمعت صوتها
أدخل
وأنا ما صدقت ... رحت مقتحم الأوضه على طول
قامت وسلمت علينا ... على عكس الاتيكيت مابيقول
هايلة يا سماح ... وهو ده اللي عاجبني فيكي
بساطتك ... تلقائيتك ... تواضعك ... جدعنتك
ورجولتك ان صح التعبير
بدأت سماح تعرض الألحان اللي محضرهالي
بصراحة ماكنتش معاها خالص
أو بمعنى ادق كنت معاها هي مش مع ألحانها
لحد ما سألتني ايه رأيك ؟؟؟
قلتلها حلو أوي تاني واحد ده ممكن أسمعه تاني
ردت وهي مبتسمة: طبعا
وهي بتسمعهولي تاني مرة كنت محضرلها قنبلة
جميل اللحن ده بس أنا كنت بأدور على أغنية دويتو
ايه رأيك لو تغنيها معايا ؟؟
اتلخبطت شويتين ... واتبرجلت حبتين
ماكانتش متوقعة اني هاطلب الطلب ده
وحاولت تعتذر بس أنا طلبت منها تاخد وقتها قبل ما ترد عليا
ورحت فاتح في الكلام
خلاص ما انا اتجرأت بقى
وهي طلعت انسانة بسيطة وعادية بتتلخبط وبتتكسف زينا
سألتها : فاكرة زمان من عشر سنين كده كانت بتجيلك جوابات اعجاب من السعودية
ردت : بيجيلي كتير من السعودية
قلتلها : بس اكيد ماحدش غيري كان سايبلك عنوانه على المدرسة اللي هوا فيها
ده أنا كنت عامل روشة لوكيل المدرسة
ردت قالتلي حقيقي مش فاكره .... يمكن يكون جالي جوابات منك
بس انت بتتكلم عن حاجة من 10 سنين
بدأت أرتاح للقعاد معاها ... يمكن أكون طولت شوية في القعدة
يمكن أكون رغيت زيادة شويتين ... بس برضو مانا مكبوت بقالي 10 سنين

نزلت من عندها طاير من السعاده
مش لأني قابلتها أو قعدت معاها ... لأ
أنا كنت سعيد لأني اكتشفت ان نظرتي كانت في محلها
واني لقيت سماح زي ماكنت متخيلها بالظبط بنفس صفات بنت البلد
بس للأسف
ما استمريتش في موضوع الغنا ده كتير
والساحة الغنائية افتقدت لصوتي الشجي ... ولغيت الفكرة
وطبعا ماقدرتش أكلمها تاني بعد ما تعبتها معايا كذا مرة في التلحين

وبرضو فاتت سنييييييين
واشتغلت في راديو وتليفزيون العرب
art
وعرفت من فريق اعداد د.هالة سرحان ان ضيفة حلقة برنامج الليلة
هي سماح أنور
وده كان أول ظهور ليها بعد الحادثة
مش قادر أنسى شكلها في اليوم ده
بالصدفة كنت واقف قدام باب الأسانسير في الاستوديو
لما اتفتح لقيت سماح خارجة منه على كرسي متحرك كهربائي
وفي رجليها حذاء طبي (بوت) أشبه بالأجهزة التعويضية
حاولت أحبس الدموع في عينيا ماقدرتش
قربت منها وسلمت عليها من غير ما أفكرها بنفسي
وهي بتبصلي بتركيز بتحاول تفتكر
وكأنها بتسأل
يعني ياربي هى السحنة دي ورايا ورايا ؟؟؟

هي دي ببساطة حكايتي مع سماح أنور
طبعا ملاحظين انها كانت قبل الجواز
آه طبعا مانا كنت فاضي ورايق
وعايش في دور الحبيب
فين الأيام دي دلوقتي ؟؟
ما بقاش فيه سماح ولا أعرف حاجة عن السماح
غير طلب السماح ع العمر اللي عدى وراح
وسماح ... ياهل السماح
أصل السماح طبع الملاح
يا بخت من سامح

والى لقاء قريب مع نوادر جحا
قصدي نوادر إحسان

هناك 64 تعليقًا:

me يقول...

انا بموت فيها الشخصية دى و زمان تاتا الله يرحمها كانت بتقول عليا شبها

و عايزة اقولك ان الدنيا ضيقة
و اكيد برضة هتلف الايام و تقابلها تانى........صدقنى

تحياتى ليك و ليها

تشااااااااووووووو

فارس بلا جواد يقول...

بوست مميز جدا

تحياتى

نعكشة يقول...

ههههههههههههههههههههههه

هوه زوجة حضرتك موافقة عاللي بيحصل 8-)

هههههههههههههههه

بس إية دة هوه حضرتك كنت بتغني
و بتشتغل تبع art كمان

طب ماتسمعنا حاجة :D

...........

انا كنت بحب سماح أنور قوي و هيا صغنونة
بجد كنت بحسها نقية

...........

صراحة مش متخيلة حد يحب حد كدة او انه يفضل كدة لمدة 10 سنين
ماشاء الله

حضرتك صبوور قوي
ربنا يقويك
ويكرمك و يحميك

..........

دمت بخير
و ربنا يخليكو لبعض حضرتك و شفقة

دمتما سالمين

سلامٌ عليكما

مواطن مصرى نايم يقول...

الحقى يا شفقة ياختى
شفتى جوزك يا غلبانة
دا طلع ميه من تحت بلياردو
تعال الحقى الدونجوان
احسان ترافولتا
لا ياختى ربنا يكون فى عونك
و كمان جوابات
لا لا انا لو منك اتعلم البلياردو
ههههههههههههههههه

بس الصراحة انا بحب سماح انور جدا جدا
لانها انسانة محترمة بجد
مشفتش لها دور وحش ابدا
الله ينور على ذوقك
بس يا راجل العنوان عالمدرسة
طب اعمل العنوان على عندى انا فى البيت
بوست جامد و الله
تحياتى
اسلام

semsem يقول...

انا استمعت بالقصه جدا بجد
حاجه مش ممكنه
مش ممكن يااستاذ احسان
انا قرات كل فتفوته فى البوست
انا بحب سماح انور بجد
بسيطه اوى
بس
سيبك من سماح
خليك فى شفقه
ههههههههههههههههه
مفيش احلى منها
تحياتى وربنا يباركلكو فى حياتكو

Mahmoud البطراوى يقول...

كده عينى عينك ودام شفقه
ههههههههههههههههه

يا نهار انا لو مكانها معرفش اعمل فيك ايه؟؟

بوست هايل اوى ودمه خفيف جداااااااااااا

mohra يقول...

موضوع غريب جدا
يا ترى شفقه هانم تعرف عنه؟؟؟؟

اربعين سنة ستيوتند يقول...

اوووووووووووووه
حلو جدااااااا
احب اكلم المدام لو سمحت؟

ٍSOU يقول...

دة انت كنت مقطع السمكة و ديلها ايام العز...على كدة شفقة رايها اية ف الموضوع دة ؟ :))

رندا يقول...

مدونة خفيفة الظل اوى

طبعا انت دلوقتى مجنون شفقة هانم اوعى تقول لا هههههههه

بجد بجد سعيدة بمعرفتى بيكوا وان شاء الله هكون معاكوا هنا
عندك اعتراض ههههههه

تحياتى


رندا

Princesa ... WHiSPeR يقول...

ايه ده انا اول مره اجى هنا
وعلى الرغم من انى مش بحب سماح انور
بس البوست عجبنى اوى
وخلانى اتخيل انها ممثله كويسه و بنت ممكن تتحب

!!! عارفة ... مش عارف ليه يقول...

إحسان أبو زُمل

كنت بتحكي عن نفسك وفي نفس الوقت بتحكي عن كل واحد فينا البساطة التلقائية الطيبة المصرية احلام المرحلة الثانوية
عارف أنت ضحكتني من قلبي هناااا

"ايه الصدف الكلابي دي يا سماح ؟؟
ههههههه ... هوهوهو"

وتأثرت نفس تأثرك هناااااا

"حاولت أحبس الدموع في عينيا ماقدرتش
قربت منها وسلمت عليها من غير ما أفكرها بنفسي"

أنت إنسان أوووووووي

تحياتي
وليد

Unknown يقول...

يا خبر ابيض
اية الحب والاعجاب دا كله
دا انت حالتك حالة
بس عارف رغم ان ذكريات الصبا بيبقى فيها حاجات بنقول عليها هبلة لانك بتكون عفوية وصادقة
شدنى جداا البوست وسماح
رغم انى مكنتيش معجبة بيها فى الفترة الاخيرة لكنى حبتها تانى من بوستك
بالتوفيق
وماشاء الله على الجمال
وسماح ياهل السماح

مواطن مصرى نايم يقول...

انا سمعتك و انت بتنادى عليا
سمعت سيرة كتاب
و انا و انت
و احسان مخيمر
بس انا اهوه
جاهز
احساااان
احساااان
يا احساااان
انت نمت
بس مفيش حد حيشترى الكتاب غيرنا انا و انت و شفقة
ههههههههههههههه
تحياتى

اسلام

سوسا ومودى يقول...

هههههههههههه
أيه ياعم المغامرات الجامده ديه
دا أنت حبييييب بقى
يا ترى يا شوشو يا حبيبتى بتشوفى الرومانسيه ديه والترقب والترصد ده دلوقتى؟؟؟؟؟

ولا ملكيش حظ
؟؟؟
ههههههه
بس والله يا أحسان زكريات جمييييله
وأكيد أنت سعيد أوى وفرحان وأنت بتفتكرها

على العموم ربنا يسعدك
ياااارب
أنت و شوشو حبيبه قلبى

bastokka طهقانة يقول...

فضفضة سلسة قراتها كاملة
و عجبتني
جدا


اوروفوار

maiosha يقول...

أخيرا يا إحسان قريتلك حاجة جديدة
طيب وإنت لما تنزل بحاجة جديدة كده تتكلم عن الحب الاول

إيه يا شفقة إنتى فين من الكلام ده كله؟؟

على فكرة خلى بالك الناس اللى بتحب تهدى النفوس كتير الايام دى .. خلى بالك من شفقة لحسن تكون ناوية تعمل فيك حاجة بعد الكلام ده

لو لاحظت إنها بتسن السكاكين كتير أو بتشترى أكياس بلاستيك زياده عن اللزوم ... حاول تسيب البيت فورا .. قولها عندى شريط لازم أعبيه فى جمصة وهقعد هناك حوالى سنتين

ماهو العمر مش بعزقة

Mony يقول...

حلوة مجنون سماح انور ديه

طبعا اكيد ماكانتش شفقة هانم طهرت


بس بوست ممتاز مكتوب باحساس عالي

تحياتي ليكي يا مدام شفقة و انت بتقري البوست

شفـقــة و إحســــان يقول...

إزيك يا مروة ؟؟ منورانا
مش عايز اقولك يا بت يا قباحة
علشان أنا قريت مدونتك كلها مالقيتش فيها جنس الأباحة
واضح انك بتطلعيها وقت اللزوم بس
وربنا يستر


انتي بتقولي ايه بقى ؟؟
دنيا ايه اللي ضيقة ؟؟
وأستنى ليه الأيام تلف ؟؟
مانتي قلتي أهو انك شبهها
طيب خلاص بقى نستنى ليه ؟؟
ماهو خير البر عاجله
ها ... ايه رأيك ؟؟
ردي بسرعة قبل ما شفقة تصحى


تحياتي / إحســــــــان
اللي مابيخافش من مراته

شفـقــة و إحســــان يقول...

يا عم فارس
فين حصانك ؟؟

هي ايه المشكلة انك تجيبلك حصان ؟؟
بدل ما انت مقضيها مشي على رجليك
من المدونة دي للمدونة دي
بجد انت كده مابقيتش فارس
انت كده بقيت فارسني أنا

وبرضو تقبل تحياتي
إحســـان المفروس
من اسطبل الخيول

شفـقــة و إحســــان يقول...

نعكشة هانم

اوعي تطلبي تاني اني أسمعك حاجة
انتي نسيتي آخر مرة ولا ايه ؟؟
لما سمعتك طقطوقة قمتي باطحاني بالطقطوقة على نفوخي
أيوة يا ناس وحياة أبله فضيلة ده حصل
( وده طبعا علشان ماقدرتش تستحمل جمال صوتي )
وقعدت تشد في شعرها
ومن ساعتها ياجماعة وهي بقت
نــــعـــــــكــــــــشــــــــة



كلماتي / إحســـان (عندليب الدقي)
قريبا بالأسواق
على شرائط كاسيت وCD وعلب كشري

شفـقــة و إحســــان يقول...

انت ياعم النايم
ايه اللي صحاك دلوقتي بس ؟؟

انت تنام تنام ولما تصحى تولعها حريقة ؟؟
وهي الحكاية متلصمة خلقة ومش ناقصاك

أقولك حاجة حلوة .. غير البسبوسة
اضرب طبق الفول المدمس أبو سوس
وغمسه بالعيش المدعوم اياه
ومعاه قرصين طعمية مقلية في زيت تموين
على فحلين بصل أحمر أو أخضر ماتفرقش
صدقني هتنام شهرين تلاتة قدام ولا أهل الكهف
وأهو ترتاح وتريحنا
واسأل مجرب



خخخخخخخخخخ
إحسان مخيمر
من جزيرة القطن

شفـقــة و إحســــان يقول...

ليه يا سمسم كده ؟؟

ماسيبتيش ولا فتفوتة في البوست ؟؟
طيب آكل أنا ايه دلوقتي ؟؟
خلاص بقى ... ما بدهاش
هآكل ... ســـمـــســــم
همممممممم


تحياتي بعد الأكل
إحســـان بالسمسم

شفـقــة و إحســــان يقول...

بطوط بك الحبوب

شفت أنا محترمك ازاي يا دكتور محمود ؟؟
وكمان أحب أبشرك اني سناني بايظة ع الآخر
بس انت تشد حيلك وتتخرج
وانا أجيبلك سنان عيليتنا كلها تحت أمرك
بس اوعى تقول لشفقة والنبي
إهئ إهئ إهئ


تحياتي وأنا باعيط
إحســان طقم سنان

شفـقــة و إحســــان يقول...

ايه يا دكتورة MOHRA

فيه ايه يا دكاترة ؟؟؟
كل دول دكاترة واقفين مع شفقة ضدي ؟؟؟
دي مابقتش مدونة ... دي بقت مستشفى


وبرضو تحياتي
د. إحســـان
مدير المستشفى

شفـقــة و إحســــان يقول...

نهى العربي

عندي سؤال بجد
انتي 40 سنة بتدرسي ايه ؟؟
وجبتي الصبر دا كله منين ؟؟
وفي الآخر يعني بعد ده كله أخدتي ايه ؟؟
أخدتي اللقب اللي أنا واخده من زمان
"عاطل حتى اشعار آخر"
وعن جدارة
هههههههههه
زيي



بابعتلك تحياتي من غلبي
إحســـــــــــــان
زميلك من منازلهم

Diyaa' يقول...

يااااااااااه
الدنيا دي صغيرة خالص يعني

شفـقــة و إحســــان يقول...

sou

عايزة الصراحة ؟؟
أنا كنت ومازلت بأحب السمك
ومافرقتش معايا قبل الجواز ولا بعده

طبعا انا أقصد السمكة اللي بتتاكل
مش السمكة اللي بتتقطع هي وديلها دي

لأ أوعي تفهميني غلط
واوعي شفقة تسمعنا



مع تحياتي بالسلطات والطحينة
إحســـــــــان صياد السمك

شفـقــة و إحســــان يقول...

رنــــداااااااا

الحقيني يا رندا
أنا مش بقيت مجنون شفقة
أنا مجنون من شفقة وعمايلها
والجواز وسنينه وشهوره وأسابيعه وأيامه


طبعا احنا سعداء بيكي معانا هنا
وبرضو هنرخم عليكي في مدونتك هناك
وصدقيني ... هتندمي على معرفتنا دي
ولقد أزعر من أنعر



وتحياتي كماااااااان
إحســــان الندماان

شفـقــة و إحســــان يقول...

whisper tangooo

مالك كده محسساني انك وقعتي في حفرة
"ايه ده أنا ايه اللي جابني هنا"
خير اللهم اجعله خير
مع ان معرفتنا مش خير أبدا
واهو تيجي مني أحسن ماتعرفيها من برة

وبعدين ماقلتليش ... مالها بقى سماح أنور ؟؟
ومين قال انها ماتتحبش يعني ؟؟
ليه مالهاش نفس ؟؟
وبعدين ليه مستغربة اني حبيت سماح أنور ؟؟
وهو يعني مش الأغرب اني حبيت شفقة ؟؟

المهم ان البوست عجبك
والأهم بقى انتي ناوية تيجي هنا تاني ولا دي كانت غلطة مطبعية؟؟



تحياتي / إحســـان دانسر
راقص التـانجو الأول في كفر طهرمس

شفـقــة و إحســــان يقول...

وليـــــــــد

انت فعلا أبو زمل
مادام ضحكت معايا واتأثرت معايا
تبقى فعلا ابو زمل

بس أنا زعلان منك زعلة كبيرة بجد
مهما كان التباسط اللي بينا
فده مايسمحلكش انك تتجاوز حدودك معايا
وتقول عليا انساااااااان
أيوه
انت مش عارف ان دي بقت شتيمة ؟؟
عموما بسيطة
مردودالك
أهو انت اللي انسان .. وستين انسان
انت وكل اللي يتشددلك كماااااان
وأنا وانت .. وسمعني كمااااان
وتاتي تاتو ترالملم لاللو


كان معكم
المطرب الشيعبي
إحســــان نهاوند

شفـقــة و إحســــان يقول...

ايه يا نهر الحب ؟؟
مستغربالي ليه ؟؟
ده انتي نهر حب بحاله

يعني زي ما انا حالتي حالة
أكيد انتي كمان حالتك زي حالتي
ان ماكانتش أصعب شوية
بس الفرق بيني وبينك ان أنا فضحي شوية
ومجرس نفسي أنا وشفقة أول بأول
وما بيتبلش في بقي فولة

نصيحة
اعملي زيي وبوحي
قولي كل اللي عندك
ما تخبيش حاجة ممكن تفيد التحقيق
ردي كويس ع البيه وكيل النيابة
كلم البيه الظابط عدل .. طاااخ
وأخيرا ... هل لديك أقوال أخرى ؟؟


المقر بما فيه
إحســـان جنح

نعكشة يقول...

حرمت يا بوجي حرمت

ههههههههههههههههههههه


دمت سالم

سلامٌ عليك

tarek alghnam يقول...

رائع جدا هذا البوست
ماشاء الله على مدونتكم الرائعة
تقبلوا تحياتى
ودمتم بحفظ الله

Desert cat يقول...

سماح انور من الشخصيات المميزة جدا
خصوصا بعد ما اتعرفت على صديقة جميلة طبق الاصل فى صوت وصورة

Ahmed Fahmy يقول...

جميلة سماح انور من ذئاب الجبل و انا بحبها اوي
حاسس اني كنت بقرا رواية رومانسية جميلة و المفروض في النهارة ان احسان و سماح يتقابلوا في العش السعيد
ايه يا باشا المشاعر دي كلها
جميلة اوي مشاعر الصبا بجد و صادقة كمان
جميل البوست و اجمل البلوج
تحياتي

ادم المصرى يقول...

الله بوست جميل وشخصيه هائله بجد انا ليا اعجاب خاص بيها واتمنالك التوفيق ديما على فكره مدونتك الصور الى فيها متقلاها شويه مش اوى ولكن مئاسره فيها الصور

شفـقــة و إحســــان يقول...

سوووووووووووووسة
إيه أخبار مووودي؟

بقى أنا برضه حبيب كبير ؟؟
أمال انتي ومودي يتقال عليكوا ايه ؟؟
انا مابحسدش ... دول شوية أر ع الماشي

وبعدين أنا سمعت ان كتب كتابكم الخميس اللي جاي
ألف مليون مبروك ليكوا انتوا الاتنين
أخيرا هنخلص من قصتكوا انتوا الجوز
حقيقي الفرحة مش سايعاني
ومش قادر اقول غير
لولولولولولولوي
وناولني الشربات


ايه رأيكوا بقى في التدبيسة دي ؟؟
وريني بقى هيخلع منها ازاي


والعاقبة عندكم في المسرات
المأذون الشوارعي
الشيخ/ إحســـان

شفـقــة و إحســــان يقول...

لسة طهقانة ؟؟
أمال أنا أقول ايه ؟؟


أقولك
أوروفوار ياستي ورحمة الله وبركاته


مسيو / إحســـان
من مطاعم بون ابيتي

شفـقــة و إحســــان يقول...

MAIOSHA


انتي هتخوفيني ليه ؟؟
لا يا شيخة مش ممكن شفقة تعمل كده
احنا برضو فيه بينا عشرة
لآ مش 10 بقول عشرة
عشرة سنين يعني
بس بيني وبينك برضو الأمر مايسلمش
والعمر مش بعزقة

طب سلام دلوقتي لما ألحق سوبرجيت جمصة


إحســــان
اللي نفد بجلده

شفـقــة و إحســــان يقول...

Mony

أحب اقولك ان شفقة لسة ماقرتش البوست
والحمد لله ده من نعم ربنا علينا انها ماقريتهوش
كده لمصلحتها ولمصلحتي أنا كمان
ولمصلحة سماح أنور نفسها
وربنا يهدي


إحسان عبد الهادي

شفـقــة و إحســــان يقول...

diyaa

الدنيا فعلا صغيرة أوي
وعمالة تصغر يوم ورا يوم
واحنا بنكتر كل يوم
لحد ماهتضيق بينا ف يوم
وعجبي



إحســـان
ملك الموال

شفـقــة و إحســــان يقول...

الأستاذ طارق الغنام

أحمد الله الذي جعلني أصادف رجلا مثلك
وأحمده على نعمة البصر لأقرأ بها مدونتك
وأدعوه أن يمد في عمرينا كي يطول التواصل بيني وبينك


تقبل تحياتي
إحســـــان

شفـقــة و إحســــان يقول...

desert cat

على الرغم من ان سماح أنور مش صاحبة مظهر جذاب
ولا هي متحدثة لبقة فتجذبك بحديثها
ولا هي طاغية الأنوثة زي اللي بنشوفهم في الكليبات
بس مش عارف حقيقي
فيه ايه بيشدني ليها
مش يمكن تكون هي دي الكيميا ؟؟


التلموذ/ إحســـان الخيبان
راسب في مادة : الكيميا

شفـقــة و إحســــان يقول...

أحمد يا فهمي

مااااااااالك ؟؟؟
انت بتبصبص لسماح ولا ايه ؟؟
اياك وان

بس بذمتك ياشيخ مش لايقين على بعض ؟؟
إحسان و سماح
يااااااااااه
هو ده الثنائي
مش تقوللي شفقة
اييييييه أرزاق


تحياتي بس مش أوي
إحســــان

شفـقــة و إحســــان يقول...

آدم يا مصري


متشكرين على زيارتك المستمرة لمدونتنا
ومتشكرين كمان على رأيك الايجابي فيها
ومتشكرين على إعجابك بالبوست ده
بس مش متشكرين على اعجابك بسماح أنور
لأ ... خلي بالك أنا بغيييييييير


إحســـان الغيران

التائب يقول...

السلام عليكم ورحمه الله وبركاته
صديقتى شفقه واحسان
ماأجمل كلماتك التى قراتها لكِ
ولكن هنا لحظه فراق
صديقتى دمتى بكل حب وخير
فالنفترق
صديقتى انتِ مش المقصوده بالكلمه دى
انما الكون باكمله
والله الموفق
تركت بوست اخير
اتمنى ان تذهبى لمدونتى وتقرائيه

كيكى عوووووو يقول...

عووووووووووووووووووووو انا جيت اتخديت
...............................
يالهووووووووووووووووووووووووووى
لو شافت شفقة البوست دة
...............................
خد بالك لو الاكياس كترت فى البيت اليومين دول
................................
بجد خلتينى اسرح فى كلامك واتخيل كل مشهد
الله عليك بجد....................
عارف اهم حاجة انك اتعلمت البلياردو
هههههههههههههههههههههه
عووووووووووووووووووووووووووو

Asmaa mahaba يقول...

انا عاوزه اعرف دا دد الدد ولا تهريج؟؟
عموما انا شخصيا متعودتش احكم على حد معرفوش بس كنت بحبها زمان لدرجه كان نفسى ابقى ظابط لما شفتلها مره فيلم كانت بتنط فيه كدا وعامله حركات اكشن
معرفش ليه حسيتها بعد الحادثه اتغيرت للاسوا ومبقيتش احبها زى زمان
وانا اقول كل ما اجى ادخل المدونه اسمع نشاذ فى كورال المدونات ليه..؟؟
اه صحيح انا عارفه المعرض اللى انت بتقول عليه دا لانى ركبت قبل كدا عربيتها ماتركس فضى ...الولد اللى اشتراها قال لبابا دى عربيه سماح انور تقريبا
شكل نفس الولد سيحلنا احنا الاتنين...

تسلم على البوست وسلم على شفقه
تحياتى ليك سومه_87

kochia يقول...

بس مش ملاحظ ان الصدفة ساعدتك كتير
حتي لوكل سنتين تلاتة بس برده صدفك قوثة

علي فكرة الصدفة الحلوة من الحظ الحلو
يعني انت ما شاء الله محظوظ

يارتي فيه حاجات تانية في حياتك بتحبها وقابلتها كدة كتير بالصدفة

موضوع ظريف
تحياتي

حبيبـــــــة القمـــــر يقول...

ولو ان سماح اتغيرت كتير عن زمان
بس كانت تستاهل تتحب
عشان كنت تحس فيها الجدعنه
ورغم انها عسوله لكن كنت تحسها راجل اوي
تعرف لما عرفت بالحادثه بكيت عليها
وقعدت ادعيلها تقوم من تاني على رجليها
ودي كانت اخر مرة ادعي فيها لممثله
ومفتكرش هدعي تاني
ومتسألش ليه
وبعدين فين شفقه في الموضوع
انا بهدي النفوس بس

me يقول...

يالهوووووووووووووى
انت عايز شفقة تقلب عليا
لا يا عم

هو انت تلاقى زيها

اما بالنسبة لوقت القباحة باين ان وقتها دا ممتد 24 ساعة
عرض مستمر
الله يكون فى عون الناس

تشااااااااااوووووووووووو

Unknown يقول...

اية دا كله
اه صح مين قالك انت
لازم تقول علنى كدة
هههههههههه

حلو بجد بوستك سلمت يداك

ka2en Makboot يقول...

احسان بيك قطعت قلبي يا شيخ

ايه المغامرات الجامدة ديه

لا بجد مكافح ومثابر وهو ده الحب لا بلاش

نموت نموت وتحيا سماح :D

بس صحيح محمد رياض عينيه خضرا مش عسلي بلاش نلخبط في التراث :D

ســـلام وتحياتي لشفقة هانم :)

غير معرف يقول...

فيييييييييييييينك يا شفقه

وهو عمال يحب ويتحب وشغال شغل عالىىىىى
ومين كمان
سماح انور
انا بموووت فيها وفى جدعنتها
كانت مثلى الاعلى فى الكراتيه

..........

يا طنط شفقه
انتى سايبه ازاى عمو احسان يكلم كده

صحيح انت صوتك حلو بجد؟
طيب وايه مخلاش الالبون يكمل؟

عموعمو انت اشتغلت فى art
والنبى شغلنى الله يخليك

ههههههههههههه

سلامى ليك ولشفقه هانم

ادم المصرى يقول...

مفيش حاجه تانى انا عمال اجى ملقيش حاجه نزلى بوست بقه اتخنقت ههههههه

شفـقــة و إحســــان يقول...

البيه اللي مستني حبيبته ومعاه الحب

رحنا ياسيدي المدونة بتاعتك
وقرينا البوست ، وعلقنا عليه
ولا شفنا منك لاكيك ولا نسكافيه
ولا حتى حلبة حصى من قهوة المعلم ربيع


تحياتي
إحســـان القهوجي

شفـقــة و إحســــان يقول...

كيكي

على الرغم من العوووووووو اللي بتحضينا بيه ده
وبغض النظر عن كونك بتهدديني بشفقة لو شافت البوست ده
بس واضح ان الموضوع عجبك
وده في حد ذاته كفاية
والله عليكي انتي كمان
ياللي جابرة بخاطري


تحياتي/ إحســــان
من صالة البلياردو

بنت مصريه يقول...

شفقه تعرف الكلام دا يا احسان
انا هقعد افتن عليك لحد امتى
هقولها برضه

Bosssssy يقول...

احسان بك : اسمحلى احييك على شجاعتك , واسمحلى كمان احيي شفقة هانم على تماسكها وتفهمها للموقف .........

اعتقد انى لو فى موقف زى ده ولقيت جوزى بيفتكر حبه القديم مش هسامحه.....

مع انى بنسي بسرعه جدا اى حاجه وحشه بتحصلى لكن لو نسيت من كل الناس مستحيل انسي من انسان المفروض انه حبيبي.....

بجد ربنا يخليلك شفقة هانم ويخليلك عقلها الكبييييييير.......

مع تمنياتى بالتوفيق.......

أرجو ان تعتبرونى زائرة دائمة.....

كـــيــــــــارا يقول...

ممممممممممممم

ساموحه العسل
لالالالالا كده بقي هبقي مداومه علي زياره المدونه

سماح فعلا انسانه ابسط مافيها التلقائيه

المهم بوست مميز واسلوب شيق

تحياتي

كيارا

غير معرف يقول...

مرحبا .... مجنون سماح أنور
انا أسماء من السعودية


قريت قصتك مع سماح وبكيت بس تصدق انت احسن مني بكثير على الاقل انت شفتها انا اتمنى اتواصل مع على الاقل ..

ياليت يامجنون تساعدني ربنا يكرمك وتجيب لي عنوانهاو ا رقم تلفونها او ايميلها او اي حاجه توصلني لها

واكون لك شاكره اوي اوي اوي

حاجــ عيال ــات يقول...

هي مدام حضرتك متافهمة اوي كده....أنا بهدي النفوس

بوست جميل

حاجــ عيال ــات يقول...

شفقة هانم وأحسان بيه
مدونتكم زي العسل
ودمكم زي السكر

وانا متابعاكم بقالي فترة ودي اول مرة أشاركم
ربنا يسعدكم يارب