مش تباركولنا ؟؟؟
مش أخيرا لقينالنا شغلانة
وهنودع عالم العواطلية ... ولو مؤقتا
آه والله باين كده
حتة فكرة مطرقعة
طرقعت في دماغنا
اللي هي مطرقعة اصلا
وكان نتيجتها اننا
بدأنا في تجهيز مكتب كبييييير
( أوضة وصالة )
في أرقى أحياء القاهرة الكبرى
( إمبـــــابة )
وإشترينا كل الأثاث المكتبي
( من سوق الجمعة )
وجبنا خروف علشان ندبحه بعد الصلاه
( مأجرينه من الجزار مش شاريينه )
وإتعاقدنا مع شركة حراسة وأمن
( سيكيوريتي يعني )
ولسة هننزل إعلان طلب سكرتيرة
( بس شفقة هانم مزمزقة )
الظاهر كده انها منمرة على الوظيفة دي لنفسها
ومش عارف هي طمعانة في المرتب الكبير للسكرتيرة ؟؟
( 300 جنيه في الشهر حتة واحدة )
ولا هيا خايفة من قصص الحب التقليدية بين السكرتيرة والمدير؟؟
( بيني وبينكم عندها حق ... ماهي عارفاني )
المفاجأة اللي هتخليكوا ماتعرفوناش تاني
واللي هتأكدلكوا أد ايه احنا جوز مجانين
هي اننا لغاية دلوقتي مش عارفين هنشغل المكتب ده إيه
آه والله
أنا باتكلم جد مش هزار
عملنا زي بخيت وعديلة لما أسسوا شركة "بخيلة كو"
وبعد ما إكتشفوا خيبتهم قالوا خلاص نشتغل في التصدير والإستيراد
( نستورد اللي بيستوردوه ، ونصدر اللي بيصدروه )
بس احنا الحمد لله حالتنا مش بالغباء ده
لأ
إحنا عندنا ثلاث بدايل بنختار بينهم
بس إحنا إستعجلنا في تجهيز المقر قبل مانستقر على نوع النشاط
وده والله احنا معذورين فيه
التاريخ والميعاد بتاع الإفتتاح لن يتكرر
8/8/2008
والساعة 8م
وموافق جمعة كمان
بذمتكم مش عندنا حق ؟؟
علشان كده قلنا نمشي بالشقلوب
نعمل الإفتتاح الأول وبعدين نشوف بقى هنشتغل في إيه
عادي بتحصل في أحسن الشركات
إيه رأيكوا لو تساعدونا في إختيار شغلانة ؟؟
طب والله هتكسبوا فينا ثواب
إختاروا معانا واحد من ثلاثة
الأولاني : مكتب تصدير وإستيراد
وإخترت له إسم تجاري مبتكر
"S.T.Rad"
والنشاط ده هو أكتر نشاط أنا ميال ليه
وأدعي إني بافهم فيه شويتين
فأنا كان عندي مصنع وكان جزء من الإنتاج بيتصدر
للسودان وليبيا والعراق وتوجو
مع اني والله العظيم ماأعرف توجو دي تبقى فين على الخريطة
بس كنا بنصدرلها
آه بجد
ودلوقتي أنا باستورد قطع غيار من الصين والهند
بس كله عن طريق وسطاء أو مكاتب تصدير واستيراد
علشان كده فكرت اني أستورد شغلي بنفسي
وكمان لإننا (أنا وشفقة) مدمنين سفر ورحلات
وأهويبقى منه شغل وسنكحة
أما البديل التاني فهو : جمعية خيرية
وتحمل إسم " شفقة وإحســـان "
وشفقة مياله أوي للفكرة دي
وخصوصا إن الهدف من تأسيس الجمعية هيكون
القضاء على
البطــــــــالة
وبالتالي القضاء على
الفقـــــــــــــــر
ثم بالتالي القضاء على
العنـــــــوســـــة
وده اللي إحنا سميناه مثلث الموت في بلدنا
وأحب أقولكم ان الحكاية مش مجرد فكرة أو كلام وبس
لأ ده البرنامج لتحقيق الأهداف دي جاهز كمان
بس مستنيينكم تدونا زقة
أما بقى عن النشاط التالت
فده بقى ماكانش في الخطة خالص
بس انتوا اللي كبرتوها في دماغنا
وهو : دار نشر
مع اننا نعترف باننا لانفقه أي شئ في المهنة دي
بس مالناش دعوة ... انتوا السبب
وربنا يسامحكو بقى
كتير منكم طلب مننا نألف كتاب
خصوصا ان شفقة هانم ليها مدونة تانية
وبتكتب فيها بنفس لون الأدب الساخر
ناجحة وليها أصدقائها ومتابعينها
ولما قرينا كتابات أصدقائنا
لقينا منهم كتابات مستواها فوق الجيد
ومنها ما يرقى لمستوى المحترفين
وده اللي خلانا نفكر مانكونش أنانيين
ونطبع كتب لينا ولغيرنا
وأهو الكل ياخد فرصته ويقول كلمته
إيه بقى رأيكم في أفكارنا المجنونة ؟؟
وفي مشاريعنا اللي من يومها مديونة ؟؟
وفي دراسات الجدوى المعدومة ؟؟
مش مهم كل ده ... المهم تشغلونا
ملحوظة :
اللي يعرف سكرتيرة حلوة عايزة تشتغل في مكتب لسة مش لاقيينله صفة ولا إسم يكلمنا بسرعة
لألألأ ... ولا أقولكوا يكلمني أنا لحسن شفقة تطفشها
وتقبلوا جزيل الشكر والإحترام
رئيس مجلس الإدارة
إحســــان بزنس مان
هناك 34 تعليقًا:
wow, very special, i like it.
هههههههههه
300 جنيه
مينفعش طيب سكرتيره كانت بتشتغل دكتورة قبل كده
واعتزلت
دول 300 جنيه يا ناااس
ههههههههههههههه
انا عندى السكرتيرة دى
على انااا بس انت انوووووووووى
والله على ما اقول شهيد
وللاستعلام انت عارف مدونتى !
بس ابقى شخشخ جيبك شوية 300 جينة اية بس خليهم 305 عشان الحسد
انت عارف الفلوس عليها عفاريت
اما عن تشتغل اية فاية رأيك نفكر فى حاجة رابعة كدة على ما تفرج
اقصد على ما ربنا يكرمكم
هههههههههههه
بوست يجنن
ألف مبرووووووووووووووك
يا رب باذن الله يبق فتحة خير عليكو
و يرزقكوا من وسع
ويبقي مشروع ناجح
انا عاجباني أول فكرتين
بس مش عارفة سكرتيرة
مع اني كنت اعرف
بس والدتها بتخاف عليها
مش عارفة يعني هوه انا مش متأكدة يعني
عامتا ربنا يوفقكوا يا رب
سلام عليكم
بما إنى مزنوقة فى قرشين
ممكن تشغلونى سكرتيرة
أقترح إنكوا تعملوا التلاتة فى بعض
من باب التوفير
::::::::::::
مدونة لذيذة أوى جدا خاالص
ربنا يوفقكوا يارب
وتلاقوا شغلانة للمكتب
انا بقترح انكوا تشتغلوا في الاستيراد و التصدير و جزء من العائد يبقي تمويل للجمعية الخيرية دي عشان بجد الجمعية حاجة مهمة و ربنا هيجازيكوا عنها خير ان شاء الله
ربنا يوفقكوا يا رب
و طبعا بعد ما شفت الاجر المغري بتاع السكرتيرة قلت لازم ادور لك بنفسسي عنها و جاري البحث و استني مني موبايل
لشفقة طبعا
ههههههههههه
هفتن عليك
300 جنيه يا جماعة بيقول 300 جنيه انتوا لس قاعدين!!!!!!!!
والله حكاية انتو الإتنين حكاية بجد
أنا بأرجح دار النشر عشان أنا هأنزل كتاب في معرض الكتاب 2009 يايت أنشرو عندكم وتبقى فاتحة خير بس إياك انتوا تستقروا على دار النشر
بأتكلم بجد والله لو استقريتوا بلغوني
كل ودي
الف مبروك بجد وربنا يجعله باب خير ليكو ان شاء الله انا عن نفسى بقترح انكو تشتغلو فى الاسيراد والتصدير اما بالنسبه لحكايه السكرتيره فشفقه اولى بيها ياراجل يعنى تبقى موجوده وتروح تدور بره ينفع كدا
السلام عليكم
اولا مبروك على المكتب اللى ما يتسماش دا (لسه مش حطيت له اسم يعنى)
ههههههههههههههههههههههههههههههه
بقى فى حد يعمل افتتاح قبل ما يعرف هيعمله ايه
هههههههههههههه
التلات مشاريع اجمد من بعض
بس نصيحة منى لله
لو فتحت مكتب نشر هتقفله قبل السنوية بتاعته
لانك عارف البلد بتاعتنا دى عدد اللى بيقروا قليل.
وبالنسبة للجمعية فكرتها هايلة
والاستيراد فكرته بردو حلوة
وبالنسبة للسكرتيرة
خليها سكرتير احسن عشان خاطر شفقة
سلاموز.
مبرووووووووووووك
مبروووووووك
لولولولولولولولولولولىىىىىىىى
بقولك ايه
انا عندى فكره
ما تخلينى انا السكرتيره
واخد ال300 جنيه واهرب وابنى عماير بقى وابقى من اصحاب الشركات
دول 300 جنيييييييييه
هو لعب عيال
انتوا بتصدروا لتوجو!!!!
مش عارف لية افتكرت فيلم اشاعة حب لما كانوا هيصدروا بطاطين الكونغو..
هههههة اما بقى بالنسبة للسكرتيرة.. اة منك انتا يا احسان بك.. اشمعنى عاوزها امورة؟ اوعى تكون شايف لك شوفة..
ههههههههههة
عملت اية يا احساب باشة بية
انا قلت اطمن عليك
وعلى الوظيفة الجامدة اوى دى
والمرتب المغرى جداا
00000
بص ان شاء الله فى لقاء لنا فى بورسعيد يوم الجمعه 22/8 وهيكون معنا مدونى الدقهلية والقاهرة لو تحب تنورنا يكون بجد شرف لينا
بس ما تنساش الـ 305 جم
ياريت تبلغنى بردك
أنا مش لاقيه شغل ياريت لو تمنحنى الوظيفه الفظيعه ذات المرتب المغرى بتاعت السكرتيره دى ههههههه
انا برشح الفكره التانيه بتاعت الجمعيه الخيريه وهنيالك يافاعل الخير والثواب
سامعه حد بيجيب سيره امبابه !!!!!!!!
كنت سامعه فرح فى اخر الشارع بتاعنا من كام يوم
تكونوش انتو ؟؟؟؟
مبروك ع المكتب وخلي مراتك هي السكرتيره
عييييييييب مش تبص بره
بس خلاص نتكلم فى الجد
الفكره التانيه والتالته حلوين خالص خالص
بس الاولى مش اوى
البلد كلها بتشتغل استيراد وتصدير
افتحو دار نشر واطبعولي اول كتاب ليا
يلا يلا
تشاو بقى
مبروووووووووووك
ال3 افكار اجمل من بعض
بس انا رايي مكتب استيراد وتصدير وبعدين ممكن تعملوا الجمعيه
يارب تلاقوا سكرتيرة
اظن انكم خلاص سويتوا الموضوع وبقي جاهز للاكل
وانا ممكن اشتغلكم سكرتيره
مبروووووووووك
اول ما تنشروا
انا اول واحده هاشترى
بس لازم طبعه اقتصاديه و فى غايه الشياكه زى المكتب كده
هههههههههههههههههههههه
انا رأيى استيراد وتصدير
تستوردوا رباط جزم
وتصدروا الطرشه:))
تحياتى
بقولوكو ايه
نشاط السياحه يا ولاه
مضمون وزي الالماظ
وهوه المستقبل
وقال ع رأي المثل
اللي ماتعرفش ترقص
تقول ع الارض عوجه
السياحه مصلحتك اولن
ألف مبروك على الإفتتاح والمدونة رائعة ودمها خفيف وأقترح تفتحوا مول فية محلات وسينيما ومطعم وساعتها هتلاقوا البلية لعبت أن شاء الله
يا غلابه انتوا الاتنين اعملوها شركه توظيف اموال واسرقوا الناس وكتوا على برا هههههه
او انا عندى فكره اقلبوها محل عصير قصب
على فكره عادى انا اعرف ناس برضوا بيعملوا مشاريع مش عارفين يشغلوها ولا عارفين هى بتتعمل ازاى
انا عندى سكرتيره بجد وضامنه ليك ان شفقه متغيرش منها عشان بتضرب فى النافوخ لو حد كلمها
هههههههه
واخيرا مبروك على المكتب الا زحيح اخدتوا الشقه فين وبكام والله الواحد بيفكر يفتح مكتب دعايه واعلان او كارتون لسه مش عارفه محددتش
تحياتى ليكم سومه_87
اه شرط لو عملتوا دار نشر تنشرولى حكاياتى انا وبطيختى حبيبى
لولولوولولووللى الف مبروك على المكتب وربنا يوفقكوا يا شفقة واحسان هههههههههههههه لو عاوزين سكرتيرة فى مشكلة دلوقتى ابعتها لمين شفقة تطفشها ولا احسان يوظفها ههه انتوا عثل
كويس انكوا فكرتوا تشتغلوا احسن برضه من العطله الدائمه حاكم الحياه بقت وحشه اوى والناس بقت اوحش ورمضان كريم
المهم ندخل ف صلب الموضوع النشاط يتحدد من خلال حاجتكم اساسا للشغل يعنى لو عايزين تدلعوا افتحوه دار نشر وبكده حتفرحوا شويه وبعدين تطلعوا ف برنامج اتكلم ع القناه الاولى مع البنيأدمه الغريبه دى وتسمعولكوا كلمتين عن اطمحلال مستوى الفكر الادبى على اديكوا
ولو عايزين تخدوا ثواب ومش محتاجين ماديا (ربنا يكفيكوا شر الحوجه أمين) يبقى تتجهوا للنشاط الخيرى وسعتها حتطلعوا ف برنامج 90 دقيقه مع المذيع الكول الكوميدى الخفيف الظل ميزو وكمان تخدولكوا كام سؤال غبى من البت الى معاه دى ويفضلوا يزألكوا بالكلام عن الفساد ف الجمعيات الخيريه ويطلعوكوا بتكلوا العيال الصغيرين العيال الصغيرين
اما اذا كنتوا عيزين تخسروا كل شئ حتى
كرمتكوا فأنا بنصحكوا بمشروع الاستراد والتصدير
اما اذا كنت عايز تجرى احسان هانم ورى معاشك يبقى تستمر ف الاعلان بتاع مطلوب سكرتيره
اتمسوا بالخير بقى
السلام عليكم
الف الف مليون مبروووووووك على الشغل
انا من راْيى تفتحوا جمعية خيرية
اما بقى السكرتيره فبلاش عشان شفقة متزعلش خليه سكرتير
المدونة دمها خفيف جدا
انا هبقى هنا دايما شفقة واحسان
ههههههههههههههههههههههههه
بجد و الله مشكله انتم دماغ جامده جدااا
ربنا يوفقكوا
يا رب
بص بالنسبة للسكرتيرة انا موجود و اعمل نفسك مش واخد بالك انى راجل
يعنى عشان صورتك تبقى كويسه قدام شفقه
بس بجد ربنا معاكوا
انا فعلا كنت بدأت انى احضر لكتاب ساخر
و ده طبعا بعد ما البلوج بتاعى اتكتب عنه فى جريده و شوشه هو و جروب عامله عالفيس بوك
يعنى اخدت شهره لا بأس بها
فعشان كده قررت انى اكتب كتاب ساخر
و ربنا يسهل
لو عملتوا دار نشر
يبقى مووووز
بس انا عندى فكره جامده طحن
ان دار النشر متكنش مجرد انها دار نشر بس
لا ممكن تكون فى جريده اسبوعية كمان
حتبقى جامد على فكرة
الجريده متكنش اخبارية
لا تكون ساخرة و خاصه بعالم التدوين
يعنى الجديد فى عالم التدوين
و يكون فيها مقال ثابت لتعديل شكل البلوج و كيفية اضافة اى حاجة عليه
و كده يعنى
المقال اللى اتكتب عنى و عن البلوج و الجروب حتلاقيه فى اخر بوست عندى
تحياتى يا باشا
اسلام
ههههههههههههههههههههههههه
تحفة تحفة تحفة
اية خفة الدم دي؟
بجد دمك خفيف اوي
بص
أنا مش بشتغل
لو عايز شغلني عندك
بس أنا اقترح تعمل دار نشر
بجد فكرة جامدة
واهو ممكن تنشر للسكرتيرة بتاعتك؟
ولا اقول لشفقة؟
هههههههههههههههههههههه حلوة قوى وممكن كمان أزود وأقول أنها فكرة تجنن
بس أنا عندى اختيار رابع تشاركوني أنا وأصدقائي فى شركتنا اللى هنفتحها بإذن لله بعد التخرج شركة برمجة _صدقوني هتبقي فكرة حلوة وبتكسب كمان- أنا وأصحابي ناويين ومختارين الناس كمان أنتوا تشاركونا بالمكتب واحنا بالشغل وكله بثوابه D: بس بقي لو عايزين اختار من التلات اختيارات اللى موجودين فمن حيث المكسب أعتقد الأولى أفضل
من حيث اللى البلد تحتاجه أكتر هى فكرة زى التانية
تقبلوا مروري -يا ريت بلاش موضوع السكرتيرة ده عشان شقفة هانم ما تزعلش-
سلااااااااام
طيب متفتحوها جزاره
ده كيلوا اللحمه بقي ب 37 جنيه
ده انا بحمد ربنا اني مبكلهاش
بس بصراحه هي كل الافكار حلوه بس الاستيراد والتصدير هي اضمن مكسب
وده من راي
والقرار طبعا ليكم
بس ابقوا قولولي اخر اخباركم ايه بقي
يلا بقي بست وشز فور يو
اهلا اهلا
للاسف ميعاد بورسعيد اتأجل
والجمعه القادمة هو يوم بؤجة الخير فى القاهرة عشان نلم الملابس واى شئ انت متبرع به لاهلنا واخواتنا المحتاجين
اللقاء فى القاهرة والتفاصيل عندى اضغط على الصورة بتاعت بؤجة الخير
وانا ان شاء الله وابو المدونين ابو خالد جايين يعنى فى بيتكم ان شاء الله
الواجب بقى عندك ههههههههه
ابقى اتبرع ب00000
يارب تقدر تجى وانا هنزل
تنوية عندى عن التفاصيل بالكامل
ال3 أفكار احلى من بعض
وخصوصا الجمعية الخيرية لأنها هتفيد في الدنيا والأخره
ومجرد الاحساس بإن الانسان بيساعد غيره بيعمل شعور قوي بالسعادة
ربنا يوفقكم
تفاحة للسفر والسياحة
:)
بما إنى مزنوقة فى قرشين
ممكن تشغلونى سكرتير
إرسال تعليق