الثلاثاء، 18 نوفمبر 2008

حــــــــرامية فى جمــــــعية خيرية



وحشتونا بجد اوى اوى اوى بس ياريت ......تسامحونا على البوست ده ....طبعا انتم عارفين الحالة فى البلد عاملة ازاى وان انا واحسان ........عواطلية من زمان.

ومش لاقين شغل..... والحالة والظروف اضطرتنا انن
ا نكون ضمن تشكيل عصابى لخطف الاطفال على الانترنت

والتشكيل ده كانت بتتزعمه..... ايناس "نهر الحب" ومعاها..... نسمة اختها..... وداليا "اهو ده عيبه"..... ودعاء "ربع ضارب" وسارة "محاولات البحث عنى" وماما امولة"الزمن الجميل"

وطبعا لما ايناس عرضت علينا اننا نبقى ضمن التشكيل الخطير ده ......احنا بدون تفكير وافقنا

اكيد انتم عارفين الاطفال بتتباع بكام دلوقتى........ ولا يا سلام بقى لو خدنا العيل من دول وفصصناه حتت وبعناه اجزاء .......وكل عضو لوحده
وعلى فكرة احنا مش طمعانين فى فلوس بس ..........لا كمان احنا بنساعد الدكاترة والمرضى المحتاجين للاعضاء دى علشان نرتقى بالمستوى الصحى فى البلد

طبعا زعيمات العصابة والتى تراسهم ايناس............ كانوا محضرين الخطة قبل التنفيذ باسبوع ودارسين المكان كويس ......والموقع ومعاهم خريطة محدد فيها كل حاجة
والمكان كان دار ايتام ببورسعيد....... والدار فيها 60 طفل يعنى شوفوا انتوا بقى الطفل .......يتباع بكام

المهم اننا اتفقنا مع ايناس .......وحددنا ساعة الصفر
واتجهنا الى بورسعيد فى اليوم والموعد المحدد....... ولكن احنا روحنا متاخرين شوية ولقينا ايناس منتظرانا هى وداليا





واول ما شافونا قالوا"احنا سعداء جدا بانضمامكم معانا " .....وان احنا بقينا من افراد العصابة
وطلبوا منا اننا نلبس اقنعة واحنا داخلين على الاطفال "تم
وية يعنى"علشان محدش يعرفنا

وكان برضوا من ضمن افراد العصابة ....... الصباغ"ابو المخاليل" وخالد "همس الحب" ومحمد"ابن حجر العسقلانى" ودول كانوا بيتفقدوا المكان

وبيشوفوا غرف الاطفال...... والمناور والشبابيك ..... وازاى نقدر نخطف الاطفال ونهرب بيهم بدون ماحد يحس
وايناس ط
لبت مننا اننا نلعب مع الاطفال........ ونشغلهم ونلهيهم فى اى حاجة
لحد ما
بقية افراد العصابة يحضروا وكمان .........علشان الاولاد ما يشكوش فينا

وقعدت ايناس ....وداليا ....ودعاء.... وسارة .....ونسمة يشوفوا الهدايا واللعب ويلاعبوا الاطفال
وانا ....وحوكة"سونة سابقا" قعدنا نلعب م
عاهم...... ونغنى اغنية " يا لعبو لعبو " علشان نهد حيلهم ونعرف نخطفهم........ بس العيال ايه....... كانت دماغهم مصفحة ولا ياثر معاهم حاجة

وشوية وجه عسقول......... معاه شاش..... وقطن...... وميكركروم .......لزوم اى اصابات

ولما بدانا نهجم عليهم ......حس بينا طفل منهم وهو ...عبد الرحمن
كان عفريت راح اوام جاب منشار........ وقال اللى هيتحرك منكم هقطعه حتت
ماشاء الله اظاهر ان الدار بتعلمهم ازاى يدافعوا عن نفسهم بادوات النجارة
ولما بدا
يهجم علينا....... عور نفسه يعنى كان فيه مصابين

وشوية لقينا ........بنوتة اسمها رحمة عمالة تبصلنا .......ومستغربة وقالت لنا ......انتم مجانين ولا ايه؟؟؟
يعنى مالقتوش غيرنا ؟؟؟؟ما العيال المتشردين اد كده فى الشارع مالقتوش الا الغلابة اللى زينا

حبتين كمان لقينا بنوتة "نورهان"هجمت علينا وقالتلنا عوووووو ........قال يعنى بتخوفنا يمكن نتراجع ونكش

وفجاه
الصباغ.........اتهور هو.... وخالد وكان معاهم كورة راحوا حدفوها على البنت وهبدوها على الارض وعسقول مسك ولد منهم وكتفه

واحسان راح ماسك بنوتة ....ولافف ايده حوالين رقبتها علشان ماتصرخش.... وتفضحنا
قال يعنى...... قلنا نطلع بعيل
ولا اتنين.... حتى يجى على المشوار اللى دبيناه ........من مصر لبورسعيد

وانا وبقيه زعيمات العصابة
قعدنا ناخ
د الهدايا .....والحلويات ونلم فيهم ونحط فى شنطنا ....... اهى حاجة ما تخسرش
لكن للاسف ملحقناش نهرب واتمسكنا

ورحنا القسم كلنا ...... وكام قفا ........ على كام شلوت ......... وفين يوجعك

وشوية ولقينا ناس اصحاب ايناس من بورسعيد جايين يشوفونا
كتر الف خيرهم وجايبين معاهم ..
...عيش وحلاوة
هما م
حمد الكتاتنى ......وجاسر مدونة"شباب روش طحن"....... وصاحب مدونة عقل مكركب ......ولما معرفوش يعملوا حاجة

خالد....... بقى اقترح اننا نكلم بابا ابو خالد نستنجد بيه
واتصلنا بيه لقيناه مع حرمه وابنه خالد .......كانوا فى مشوار برغم من ان ابو خالد منقطع بقاله فترة عن عالم التدوين وكان واحشنا جدا جدا
الا انه الله يكرمه ويخليه لينا يارب متاخرش عنا ....وحضر بصح
بة المدام وابنه خالد
وفورا ضمنَا فى القسم .......بعد ما اتعملنا محضر....... بعد
م التعرض للاطفال

اما الوحيد اللى فضل مقبوض عليه هو........ الصباغ
بتهمة الشروع فى اللعب مع سبق الاصرار والترصد .....وفضلنا مستنيينه ادام باب القسم كلنا
ولقيناه خارج بيركب البوكس وبيشنق نفسه ...... لانه مقدرش يستحمل الفضيحة
وقرر
الانتحار ادام القسم

احنا لما شفنا كده جرينا كلنا .....خفنا نلبس تهمة والوحيد ....اللى قال انا هستنى مع عمو الصباغ
لما اعرف هيعملوا معاه ايه ....... وكمان طلب منه صورة تذكارية ادام القسم....... هو خالد ابن بابا ابو خالد
الوحيد اللى طلع شهم وجدع ورجولة


المهم اننا جرينا اوام...... قبل ما يتقبض علينا تانى

وركبنا المعدية ......اوم ايه بقى واحنا بنجرى
البت ايناس ....ودعاء ......زقوا داليا .......اظاهر
كانوا متغاظين منها وعايزين يخلصوا منها
ووقعت داليا على الارض واهو ده كان عيبه
ودلوقتى داليا بقت اسم على مسمى "اهو ده عيبه"

حتى المعدية نفسها من نحسنا عليها وعلشان الحرام ما بيدومش عملت بينا حادثة بسيطة
وخبطت فى الرصيف .......وعرفنا ان تانى يوم ما كنا هناك ان المعدية عملت حادثة وخبطت فى باخرة بنميه
وتوقف سير الملاحة....... واغلقت قناة السويس نص ساعة
طبعا عرفتم اد ايه احنا نحس ..........ونحسنا البلد بحال
ها
حتى الاجرام نفسه فاشلين فيه

المهم ان ماما امولة ......الله يبارك لها ويخليلها اولادها
خدتنا معاها بورفؤاد نستخبى هناك ........وعزمتنا ...... انا طبعا احم احم شفقة هانم وسونة جوزى...وداليا...... ودعاء .....ونسمة....... وسارة....... وبابا ابو خالد واسرته....... وعسقول .......وخالد
على اكلة سمك وجمبرى لاننا كنا..... واقعين من الجوع

اما عن احمد الصباغ
فقد تم التحفظ عليه....... وحاليا بيلف المحافظات كعب داير فى عربية الترحيلات"اللى انتم عارفينها طبعا" وان شاء الله يتم الافراج عنه قريبا ..........ما لم يكن مطلوبا على ذمة قضية اخرى
وياريت تدعوله وتبقوا تسالوا عليه


شفقة



هناك 123 تعليقًا:

mohamed ghalia يقول...

واضح إنه كان يوم ممتع
انا كان نفسى أجى عشان السمك والجنبرى
هههههههههههه
تحياتى

Unknown يقول...

وجول وجول وجول
هههههههههه
انا بت وكمان انا زعيمة عصابة كدة ضمنت انى مش هدخل الدار تانى ولو دخلونى يبقى عشان يودونى القسم من اوسع ابوابه الله يستر على وعلى شبابى
والله كنت طيبة وبنت حلال :(
وانا زقيت داليا انتى بتتبلى على
ماشى يا شفقة لكى يوم

ههههه

بجد كان يوم حلو الحمد لله
هنكمل باقى المخطط بتاعنا فى المرات التانية ههه

Unknown يقول...

شوفى اللينك دا يا شفقة ياختى
http://fawdaa.blogspot.com/

عالم ماريونت يقول...

ربنا يارب يجازيكو على فعل الخير
نفسي يوم انضم ليكم
انا عارفة احساس عمل الخير مع الايتام بالذات من رسالة
بس مفسي اطلع يوم كدة مع المدونين
ربنامعاكم
رنا

Kiara يقول...

شفقه حبيبتي

شيلي اللينك بتاع ضي القمر لانه مبقاش ضي القمر اتعمل هاك هقرا وارجع سلاموز ياثكره

moory-mero يقول...

السلام عليكم و رحمة الله و بركاته

كنت بحسب هكون اول تعليق رغم انها او لزيارة ليا بس يلا موث في نصيب
بجد المدونة زي العثل واسلوبك في الحكي جميل جدااااااااااااااااا
وحسستيني اني بتفرج على فيلم مرعب على اكسن على اثارة روعه بجد وضحكتيني اوي
ربنا يبارك فيكي يا قمر
مبسوطة كتير بتواجدي هنا

دمتي بخير

ويارب الصباغ يطلع موش على ذمة قضايا اخرى ههههههههههه

في رعاية الله

Kiara يقول...

هههههههههههههه بجد انتي حته ثكره

وصفك لليوم جميل جدا

كان نفسي اكون معاكم بس السفر بقي

عااااااااااااااااااااا

دعاء مواجهات يقول...

هههههههههههههههههههه

بجد اكتر من رااائع

تحفه

انتوا مشكله

كنت نفسى اكون معاكوا بجد

ربنا يجازيكو خير وتبطلوا خطف ف العيال بقى

بيس

صباح الصباح يقول...

اللة

دى باينها كانت رحلوة وتجمع شديد طحن طحن

يا بختكووووووووووووووووووووووووا

حواء يقول...

فعلا باين عليها رحله جميله جدا
بس اكتر حاجه لفتت نظري في الصور واحده منتقبه ياتري مين ؟؟؟؟؟
عايزه اعرف

د. إيمان مكاوي يقول...

وحشتوني جدااااااااااا
شكرا لسؤالكم عني أيام إمتحاناتي
وتشكيلكم العصابي ده جميل قوي ..يارب كل العصابات تبقى زيكم
اللهم اجعله في ميزان حسناتكم
تحياتي

كيكى عوووووو يقول...

ههههههههههههههههههه
يخرب بيت دماغك هو دة البوست بتاع العمل الخيرى انتى خلتى تشرد خالص
هههههههههههههههههههههه
بجد تحفة والله
وكمان احمد الصباغ اتقبض علية يالهووووووووى
هههههههههههههههههههههه
انا عمالة اضحك وناسية انى بعد شوية هاروح انا كمان اللجنة اتظبط فى الامتحان..ربنا ان شاء الله يكرمنى بالجنة من غير مراقبين دعواتك انتى بس
بوست تحفة
عووووووووووووووووووووووووو

بذرة امل يقول...

هههههههههه
باين عليه كان يوم رائع جدا
بصراحة انا نفسى ازور بورسعيد جدا

مدونتكم بجد لذيذة جدا

اهو ده عيبه يقول...

ههههههههههههه
ازيك يا شفقه
ايه السيناريو الاجرامى ده حرام عليكى سوئتى سمعتنا ومش حنعرف نخطف تانى
الحمد لله ان الليلة عدت على خير ومحدش شربها غير الصباغ
بجد كان يوم جميل وسعيده بوجودكم وان شاء الله يتكرر تانى بس بعيد عن الاقسام
سلام

رحــــيـل يقول...

هههههههههه

ايه الوصف الرائع ده كده تفضحينا قدام الناس وتعرفيهم ان احنا كنا راحين نخطف الاطفال وهما فاكرينا ملايكه وراحين نزورهم
طيب لو حبينا ندخل دار تانى نرووووح ازاى ؟؟؟؟؟؟؟

هههههههههههه

كان يوم جميل بجد
يارب نكرره تانى

Mony يقول...

ههههههههه

تصدقي محبوكة


المهم انكم اتبسطوا

ربنا يجعل المشوار ده في ميزان حساناتكم

سندس وأمل يقول...

سااااااااااااااااااااااخساره

وياااااااااااااااااااااألف خساره

ليه كده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

محبسوكيش لييييييييييييييييييييييييه

إستاذ إحسان والجماعه الباقيه

كنا عيزنهم إنما .......:)

أنا بأهزر لتفتكرى بجد ولا حاجه

تخطفينى زى العيال .............

ومش حضرتك الى بتصورى الصور دى

كانت باينه إنه كله هزار فى هزار

المفروض كان يبان إنه مش هزار يعنى

الى بيتصور يمثل بالظبط........

إنما العيب فى المصوره....:)

لوكان حد تانى هوا الى مصور تبقى

الصور جمييييييييييييييييييييله:)

سلام عليكم "متزعليش " حضرتك الى قلتى

عندنا "وحشتونااااااااااااااااااا"

فأنا جأت أطلع الى جواى بقى إستحملى

"سندووووووووووووووووووووووووووووسه"

Teawater يقول...

هاي طنط شفقه

ايه العصابه التدوينيه الجميله ديه

وايه اليوم التحفه ده

بس تصدقي انتي قمرو كتير والوش بتاعك ده عندي بحبه وبالبسه والعب بيه قصد اعمل عصابه بيه و عمو سونه كان زي القمر ابقا سلميلي عليها

انا مش باعكسه ولا حاجه انا بهزر بس واوعي تغيري

ههههههههههههههههههههههه

محمد فاروق الشاذلى يقول...

واضح إنكم مش نافعين خالص فى حكاية الإجرام دى.
بس احييكى يا شفقة هانم لأن انتى الوحيدة اللى اعترفت فى بوست مطول بحكاية التشكيل العصابى ده والباقى عملوا نفسهم قال ايه بيعملوا عمل خيرى.

الحمد لله إنى ماعرفتش آجى اليوم ده وإلا كان زمانى مع الصباغ فى كعب داير

soulmate يقول...

يا رب دايما يجمعكوا على الخير وجزاكم الله خيرا ويا ريت المره الى جايه تقولولنا عشان بس نبقى معاكى فى حاجه زى دى وتدونا احنا كمان ثواب

dr. Ahmed Sakr يقول...

ما شاء الله على اللى عملتوه

يمكن ده الواحد بيفكر يعمله من زمان بس مش لاقى اللى يساعدة

بس بجد جامدة

همس الاحباب يقول...

هههههههههه
هههههههه
انتى مشكلة بجد يا شفقة
فعلا تشكيل عصابى
بزعامة احسان وشفقة انا معترف بكده
وقسم وكده
بس بجد ينفع فيلم اكشن
والصباغ بصراحة عايزه يلف كعب داير
ولا حد هيسال عليه
اليوم كان فعلا جميل
والصحبة كلها زى العسل
جزاءكم الله خيرا
وجعله فى ميزان حسناتكم

RaRa يقول...

ربنا يقدركم دايما على فعل الخير
كان نفسى بجد أكون معاكم
وصفك جميل اوى

حنين القلب يقول...

يا ريتنى كنت معاكم
بجد تقبل الله منك صالح الاعمال
ويجعل اليوم ده فى ميزان حسناتكم

تقبلوا مرورى

عالم ماريونت يقول...

ربنا يكرمكم يارب
انا نفسي نعمل حاجة كدة في المنصورة
ما تيجي نعمل كدة يا شفقة
شوف كدة يا احسان؟
وانا طبعا ببدأ المبادرة بصفتي من اهل البلد
رنا

أمل حمدي يقول...

هههههههههههههههههههههههههه

يالهوي يا شفقة فضحتينا بس الحمد لله انت مخدتيش بالك من العيلين اللي كنت مخبياهم تحت النقاب
عدوا بسلام الحمد لله
رائعة يا شفقة

ربنا يخليكي حبيبتي وحشتيني والله
ربنا يصلح حالك انت واحسان بك

شفـقــة و إحســــان يقول...

mohamed
هو فعلا كان يوم معتم ما بانتلوش شمس
بس ايه يا عم الطفاسة دى سمك ايه وجمبرى ايه ؟؟ هو انت بتعرف تاكله اصلا؟؟
ههههههههه
طيب كنت قلت ياريتنى كنت جيت شوفتكم او ساعدتكم فى خطف العيال كده يعنى مش كله على البطن

ربع ضارب يقول...

زى العسل والله يا شفقة شكلك نوية لينا على اعدام او اقله موبد وشكلك حتودينا فى توكر وبدل ما احنا اللى حنزوراحنا اللى حنزار بس فى لمان طرة لده بالنسبة للولاد وسجن النساء ده بنسبة ليا انا وداليا وايناس ونسمة تفتكرى ايناس تاخد كام سنةبصفتها الزعيمة والمحرضة ههههههههههههههه وديتوا البنت فى داهية مكنش يومك يا انوسة هههههههههههههههههههههه شكرا جدا على زيارتكم للدار وعلى تعابكم وبجد نورتم بورسعيد

شفـقــة و إحســــان يقول...

نهر الحب
انتى بتذيعى من الاستاد ولا ايه يا انوسة؟؟
يا حبيبتى انتى رايحة القسم رايحة طول ما بتعرفينى ما تقلقيش
وبعدين بطلى كذب يا ايناس انا شايفاكى بعينيه اللى هتاكلهم الدود وانتى بتزقى داليا مش حرام عليكى
بقى هى دى الصحبيه؟؟
ولما الخطة الاجرامية الجديدة تخلص ابقى ادينا خبر بميعاد تنفيذ العملية

شفـقــة و إحســــان يقول...

نهر الحب
شوفته وياريتنى ما شوفته

شفـقــة و إحســــان يقول...

يوميات نائمة فى الارياف
ايه انضم دى حسستينى انك عايزة تروحى الجبهة تحاربى وتنضمى لصفوف العدو

شفـقــة و إحســــان يقول...

مولان
مين ضى القمر دى انا معرفش حد بالاسم ده انتى غلطانة فى العنوان
وبعدين ايه سلامون دى انتى جعانة ولا ايه
عموما لو جعانة شوفيلك اى بحر هتلاقى مليان سلامون زى ما انتى عايزة

شفـقــة و إحســــان يقول...

mero
اكيد انتى ما بتذاكريش كويس علشان كده مطلعتيش من الاول ومعرفتيش تفوزى باول تعليق
وطالما انبسطتى من افلامنا ابقى تعالى كتير لانك لسه ما شوفتيش الهندى
ونورتى القناة الفضائية

شفـقــة و إحســــان يقول...

مولان
ايه احنا مورناش غيرك ولا ايه هتاخدى كل التعليقات وعملتلنا زحمة على باب المدونة وسعى فى ناس عايزة تذاكر

شفـقــة و إحســــان يقول...

دعاء مواجهات
احنا يا بنتى وبلا فخر مشكلة وكوارث ونواكب اى جريمة يا دعاء
وبعدين احب اعرفك اننا مش هنبطل خطف للعيال لانها شغلانة بتكسب دهب وياريت تنضمى لينا علشان تعرفى اد ايه هى مربحةوتعذرينا

شفـقــة و إحســــان يقول...

صباح الصباح
يا ابنى اللى بيطحن السكر والبن انت ماتعرفش ولا ايه شكلك مش من البلد دى

شفـقــة و إحســــان يقول...

زوجة
يعنى محدش تانى لفت نظرك ايه ده شكلك كده عندك قصر نظر
هههههههه
منورة بجد
المنتقبة هى مين مين حذرى فزرى
ماما امولة

Kiara يقول...

عاااااااااااااااااااااااااا



بقي كده ياشفقتي

عاااااااااااااااااااااااااااااااا

شفـقــة و إحســــان يقول...

ايما ام البنين
طيب بما انك خلصتى امتحانات وعاجبك التشكيل العصابى ما تيجى تنضمى لينا وتبقى واحدة من زعيمات العصابة
وهتكسبى اكتر من الطب

شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

كيكى
كده يا كيكى بتدعى على دماغى يا شيخة سيبيها فى بيتها مرتاحة
وبعدين روحى نوحى على الصباغ فى مدونته..... مش عايزين صوان وصويت ومايتم عندنا

شفـقــة و إحســــان يقول...

بذرة امل
منورة بس مجبتيش عمر معاكى ليه؟؟
وبعدين لو عايزة تروحى بورسعيد روحى محطة الترجمان واقطعى تذكرة ب 17 جنيه وقوليله بورسعيد وهتلاقى نفسك هناك
وابقى سلميلنا على المعدية
سعداء بزيارتك

شفـقــة و إحســــان يقول...

اهو ده عيبه
انتى عاملة ايه بعد الوقعة اللى وقعتهالك ايناس ودعاء؟؟
وبعدين ايه رايك مش انفع والنبى ابقى انا زعيمة العصابة بدل ايناس؟؟
يلا بقى الهمة وشدوا حيلكم علشان نشوفلنا عملية تانية لحسن اخواتك مزنوقين اوى اليومين دول فى اى قرشين

شفـقــة و إحســــان يقول...

رحيل
كان لازم افضحكم ادام الراى العام علشان تكونوا عبرة لمن يعتبر
وبعدين بتسالينى انا هتروحى تزوروا الدار تانى ازاى هى دى محتاجة فقاقة يا سارة
طبعا بالسوبر جيت

شفـقــة و إحســــان يقول...

mony
مين محبوكة دى ؟؟
هى فرد جديد فى افراد العصابة؟؟

شفـقــة و إحســــان يقول...

سندس وامل
الحمد لله انك طلعتى اللى جواكى
وعموما انا استحملت
ميرسى على ذوقك

شفـقــة و إحســــان يقول...

teawater
برضوا طنط وعمو يا شيخة ده احنا ادك ...ماشى ماشى براحتك
وبعدين اوعى تفتكرى انك ممكن تعاكسى سونة
اه .... علمك علمك اللى يبصله بصه كده ولا كده ابصله بحول
اوعى عقلك يشاورك

شفـقــة و إحســــان يقول...

قلب مصرى
انا بس اعترفت علشان ضميرى صحى وكنت عايزة اخلص ضميرى ادام الراى العام والعدالة وادينى اعترفت باللى حصل
بس ياريتك تنضم معانا للتشكيل العصابى
لاننا محتاجين كوادر زيك يساعدونى خاصة ان السياح يكسبوا اكتر من الاطفال
فكر ورد علينا

شفـقــة و إحســــان يقول...

مشمشة
انا بعلنها على الملا اهلا ومرحبا بيكى فى عالم الجريمة
وطالما نفسك تبقى معانا فاحنا سعداء بانضمامك فرد ضمن افراد العصابة

شفـقــة و إحســــان يقول...

الحشرى
من اول زيارة كده هنحشر مناخيرنا
عموما مالكش حجة اديك لاقيت اللى يساعدك ورينا هتعمل ايه

Mahdi Mahdi يقول...

يلزمنى رايك فكن ناصحا ولا ملامة، فهدفى افهام المرضى والموتورين ممن يتطاول او يخادع بدس السم فى العسل تحت دعوى الدفاع عن الاسلام ، ان العين بالعين والسن بالسن والبادى اظلم

شفـقــة و إحســــان يقول...

همس الاحباب
كده برضوا يا خالد انت هتتبلا علينا بقى هى دى صحبيه الاجرام والعهد اللى واخدينه على نفسنا ان الصاحب مش صاحب وقرانا الفاتحة على الخاين والندل
عموما احنا خلصنا حقنا وشردناكم اى خدعة
وللاسف مكنش العشم انك تتخلى عن الصباغ صديق الكفاح والخطف
بس عم عشم اظاهر انه مات

شفـقــة و إحســــان يقول...

rara
احنا يا ستى اللى نتمنى تكونى معانا هو احنا لاقين اصل الناس اللى بتنضم لينا قليلين بس احنا بنحاول نجمع
وكل واحد وتخصصه
تحبى تتخصصى فى حاجة معينة ولا تبقى كله؟؟

شفـقــة و إحســــان يقول...

حنين القلب
ما تزعليش المرة اللى جاية نوريكى الخطة ونشوفلك دور كده فى العملية وتبقى معانا

شفـقــة و إحســــان يقول...

يوميات نائمة فى الارياف
ايه ده بقى؟؟
انتى عايزانا نعمل شغل خصوصى بقى فى المنصورة
ماشى بس اهم حاجة تامنى المكان والمناور والبدرون وتحددى ساعة الصفر واحنا معاكى ومعانا بقية افراد العصابة

شفـقــة و إحســــان يقول...

ماما امولة
انا مفضحتكيش ده انا حتى مرضيتش اجيب سيرة العيال اللى خبيتهم وقلت تسترزقى منهم لوحدك علشان بتربى بط ووز وفراخ ودول محتاجين اللى يصرف عليهم علشان ما ينحرفوش
بس اعمل ايه ....اهو كده انتى فضحتى نفسك
يلا بقى يا ماما امولة هاتى نصيبنا فى العيلين
والا هنبلغ عنك

شفـقــة و إحســــان يقول...

ربع ضارب
ما تخافيش يا دعاء احنا برضوا كلنا مع بعض سمك وسبيط وجمبرى ومش هيهون علينا ادخلوا انتم بس السجن وشوفوا احنا هنعمل معاكم ايه
هتلاقى عيش وحلاوة وفول وطعمية بس بقولك ايه ادفعوا حقهم الاول اه
ولا ناوين تاكلوا علينا حقهم زى ما كلتوا علينا حقنا فى خطف العيال؟؟

وردشان smilyrose يقول...

هههههههههههههههههههههه

بجد احلى عصابة

وياريت تدوم عليكم التشكيل الجامد دا

كان نفسى بجد اكون معاكم بس

الظروف هنعمل ايه بقى


احلى عصابة شوفتها فى حياتى

دايمااااااااااااااااا

smilyrose

روح الحب الصادق

هــــــــــــايدي يقول...

غالسلام عليكم ورحمه الله
هههههههههههههههههههههه
بجد حلو اوى
ويابختكم باليوم
بس ساستى الاجرام له ناسه
بس مش يمنع بردهخ اهننا نحاول مش فى حد بيتعلم بين يوم وليله
المره الجايه تطلعلكم بعليلين تلاته
سلام

Asmaa mahaba يقول...

يا سلام وانا نايمه فى العسل ومحدش قالى يا ربنا ع النداله انتوا ايهوبهديلك الكلام الحلمنتيشى دا
............
انا كنت زعلانه حبه بقيت زعلانه اتنين والقلب منكم شكى يا خساره مليش قلبين ..
والسح الدح امبوه ادى الواد لابوه وياعينى سومه بتعيط
ماشى بس الحق مش عليكى الحق على اللى مقاليش
ياله سلام

اقصوصه يقول...

looooooooooool

واضح ان لكم خبره كبيره

في عالم الاجرام!

بس بيني وبينك

اكلة السمك هاي

خلتني اتذكر

ان الوقت وقت غدا الحين

وان عصافير بطني

تزقزق..سو سو سو

حلوه التدوينه:)

تقبلي مروري:)

فوكيره يقول...

ههههههههههههه ... جاااااااامده القصه دى محبووووكه

كان نفسي اووى بجد اكون موجوده الليوم ده
منها لله امتحانات اعمال السنه

بجد ضروري تتكر بس اكون موجوده بقا

أية عفيفي يقول...

بجد شكله كان يوم جميل

ربنا يجازيكم على فعل الخير دايما

kochia يقول...

كل ده حصل
شكله كان يوم حافل
وحلو التسجيل التدويني الدقيق ده

مش عاوزين عنصر عصابي جديد؟؟؟

الملاك الحزين يقول...

ههههههههههههه

حسستونى اني بتفرج على فيلم رعب
وضحكتيني اوي
بجد جميل جدا

أبو العريف يقول...

يا سلام علي الافكار الاجراميه خطف الاطفال مره واحده طاب وليه التعب دا انا عندي بنت اخويا مغلباني قوي قوليلي وانا ابعتهالكو
كانت هتوبكو قبل ما تفكرو في الاجرام

زوروني

EMMY BABY يقول...

ههههههههههههههههههههههههههههههههههههههههه


حتى الزيارة خلتيها كلها ضحكة والله انتى فعلا ملكيش حل

بتضحكينى من قلبى بجد

كان نفسى اكون معاكم بس مفيش دار هنا فى القاهرة لازم سفر

تحياتى

ايمى

ميرا ( وومن ) يقول...

ههههههههههههههههههههههههههههه

انتم مش وش إجرام بتدخلوا فيه ليه كدة هاتطلعوا سمعه وحشة علي الخطافين والقتله المأجورين

بجد اليوم كان شكله هايل يارب اشوفكم قريب يوم البؤجة قولوا جايين ان شاء الله

عاشقة القمر يقول...

ربنا يجعل في ميزان حسناتكم
كنت اتمناه ان اكون معاكم
بس عارفه انز انا في السودان

شهد الكلمات يقول...

ربنا يجازيكوا خير علي المصايب اللي عملتوها في البلد و العيال هههههههههههههههه

شعور جميل اللي عملتوه ده و ياريت تشرفوني في جروب خمسة تدوين و تسجله فيه اي حدث زي ده هاتقوموا بيه عشان الناس تعرف و تنضم ليكوا
ده اللينك
http://www.facebook.com/group.php?gid=31035659947

تحياتي لكل اللي راحو و لسي احسان و للست شفقة العسولة و اسلوبها اللذيذ

Tamer Alhosiny يقول...

عزيزتي شفقة عزيزي احسان
بجد لا تتصوروا مدي اسفي لاني لم اشارك معاكم في اليوم الجميل ده
بسبب ظروف العمل
طبعا فاتني كتير اولا اني اعمل خير زي ده
واشوف الاطفال والعب معاهم خاصة
رحمة لاني بحب قوي البنوتات الصغيرات الحلوين دول
وكمان كنت احب اشوف استاذ احسان
قوي واتعرف عليه واقف معاه واعرفه ان وراه رجالة
واننا ماشيين علي الدرب وعلي الطريق
حماك الله لنا يا احسان
هههههههههههههههه
وكمان اشوف كل المدونين
تحياتي ليكم جميعا
واتمني في اقرب فرصة اقدر اشارك معاكم

تحياتي
تامر الحسيني

romansy يقول...

ههههههههههههههههه
انتى كده شرحتى الرحله بالتفصيل

اهم حاجه اسعاد طفل جميل

كل سنه وانتى طيبه

فشكووول يقول...

طبعا مش انتم كنت راحين تخطفوا الاطفال وتشوفوهم وتبروهم .. طبعا كويس ان ما جراش لكم اكتر من كده .. هو بجد احمد الصباغ مقبوض عليه ولا لزوم البوست ولا دا كلام هزار يعنى .. بجد والله .. تحياتى

إيمان قنديل يقول...

السيناريو ده ينفع لفيلم كارتون حايبقى جميل جدا

عالم ماريونت يقول...

طيب
انا هأمن مداخل ومخارج المنصورة
وخلينا نشوف كدة بقى
وبتكلم بجد
واللي يرجع في كلامة يبقى اية؟
يبقى عيل
مااااااشي؟

بس خلاص ... يقول...

بجد بجد تشكيل عصابى مالوش حل ... اكثر الله من امثالكم ..وجزاكم كل الخير ... كان نفسى اكون طفله تخطفوها ....

واثقة بربها يقول...

اول مرة ادخل مدونتك الاقيكى

كنت منورنا عندنا

المرة الجاية العزومة عندى

شفـقــة و إحســــان يقول...

smilyrose
هى احلى عصابة علشان السكر بتاعنا كتير
وبعدين ايه حكاية الظروف والجوابات دى؟؟
انتى بتشتغل فى هيئةالبريد؟؟

شفـقــة و إحســــان يقول...

هايدى
منورة ومعاكى حق الاجرام له ناسه شكلك خبيرة طيب بقولك ايه ما تيجى تعلمينا كده
والثواب والاجر عند الله

شفـقــة و إحســــان يقول...

سومة المجنونة
وحشتينا موت والتعليقات من غيرك دمار
بس ابعدى عنا شوية يا سومة لحسن انتى بقيتى ملزقة خالص
فى حد ينام فى السل برضوا
وبعدين ايه حكاية الزعل دى بقى؟؟
ولا الاغانى تحفى برافو يا سومة انتى شوية شوية هتقلدى مصطفى كرانشى وعبد الباسط حمودة

شفـقــة و إحســــان يقول...

اقصوصة
ايه الزغاريد دى انتى عملتنلنا فرح فى المدونة قال لول قال
وبعدين انتى دخلتى مطبخ ولا لقيتى ريحتنا تقلية
ايه الطفاسة دى
طيب مش هتقوليلى انتى طابخة ايه؟؟

شفـقــة و إحســــان يقول...

فوكيرة
مين محبوكة دى؟؟
وبعدين هى السنة كمان بقى ليها اعمال وسحر وكده؟؟
يا نهار ابيض هو الواحد ناقص عفاريت

شفـقــة و إحســــان يقول...

ebtesama
ايوا ادعى كمان وكمان وادعيلنا بالهداية

شفـقــة و إحســــان يقول...

koshia
ايه يا بنتى تسجيل ودقيق احنا بنجهز عروسة؟؟
دى عصابة يعنى عووووو وحاجات كده
عموما احنا نبقى فى غاية السعادة لو انضميتى لينا

شفـقــة و إحســــان يقول...

الملاك الحزين
ايه ده انتى بتخافى ؟؟
وفيلم رعب مرة واحدة انتى بتخافى من الاقنعة اللى لبسناها ولا ايه؟؟
امال لو شفتى الوش اللى بيركبه احسان تعملى ايه؟؟

شفـقــة و إحســــان يقول...

حد مش فاهم حاجة
هو عدم الفهم وصل للدرجة دى علشان تسمى المدونة مش فاهم حاجة....ايه هى كيمياء؟؟
عموما انت منورنا جدا وسعداء بزيارتك
بس ياريت تزورنا من غير بنت اختك احنا مش عايزين نتوب وبنموت فى الاجرام

شفـقــة و إحســــان يقول...

emmy
يلا يا ستى اديكى بتضحكى ببلاش بس متاخديش على كده علشان بعد كده الدخول عندنا هيبقى بتذاكر اصل احنا اتعلمنا من الاجرام كتيييييييير
والدنيا بقت مصالح
ان شاء الله يكون بهد كده فيه خطة هنا فى مصر من غير سفر اهو نوفر حق المواصلات

شفـقــة و إحســــان يقول...

وومن
وانتى الصادقة احنا قفا اجرام الوش اليومين دول بقى مش مهم
ومين سمعه ده؟؟ دلع اسماعيل؟؟
ان شاء الله هنيجى يوم البؤجة بس يارب مندالجش عليها

شفـقــة و إحســــان يقول...

عاشقة القمر
فى السودان خلاص نيجيلك احنا ولا يهمك
وسلميلى على ام دورمان والخرطوم
واذاعة وادى النيل

شفـقــة و إحســــان يقول...

شهد الكلمات
علم يا فندم وجارى التنفيذ بس مش لو كان خمسة فرفشة كان يبقى احلى

شفـقــة و إحســــان يقول...

tamer
ايه يا عم تامر انت هتعاكس البنت ولا ايه
لا يا عم تامر ابعد عن رحمة الا دى
وبعدين لسه برضوا متضامن مع احسان؟؟
اوكيه خليك وراه فعلا علشان يعرف ان وراه راجل واحد مش رجالة
الحزب بتاعكو لسه مفهوش اعضاء ربنا معاكم وتكسبوا اصوات

شفـقــة و إحســــان يقول...

romancy
ايه شرحتى بالتفصيل دى انت شايفنى مدرسة تدبير منزلى؟؟
وبعدين انا معرفش مين اسعاد طفل دى.....انا اعرف اسعاد يونس

شفـقــة و إحســــان يقول...

fashkool
ايه ده اوع تكون حضرتك بتصدقنا ولا حاجة لحسن نروح فى داهية ويتقبض علينا بجد
لا طبعا احنا بنهرج اصلا متربين فى سيرك
واحمد الصباغ موجود حى يرزق وزى االحصان

شفـقــة و إحســــان يقول...

maksofa
اصلى يا بنتى خبيرة فى كتابة السيناريوهات متنسيش انى خريجة اعلام
بس بلاش افلام كارتون ماينفعش فيبر؟؟

شفـقــة و إحســــان يقول...

يوميات نائمة فى الارياف
امنى انتى ومالكيش دعوة بس هتعزمينا على سمك وجمبرى ولا ايه؟؟
اه احنا مش عايزين نموت من الجوع احنا ناس شقيانة
وبلاش سيرة العيال دى الله يخليكى خليها اللى يرجع فى كلامه يبقى راجل
احسن العيال بتتخطف اليومين دول

شفـقــة و إحســــان يقول...

بس خلاص
هو فعلا بس خلاص اتسخطى من تانى وحطى ببرونه فى بقك ...واحنا نوعدك بالخطف من غير كلام

شفـقــة و إحســــان يقول...

واثقة بربها
طالما فيها عزومة هتلاقينا عندك طيران

فشكووول يقول...

اشكركم يا حراميه فى جمعيه خيريه ويا ريت المره اقصد السريقه الجايه تعزمونى معاكم .. اشكركم على التعليق وارجو ان لا تنقطع الزيارات .. من ناحيتى حاجيلكم كل يوم .. تحياتى

Nostor Azzuro يقول...

يوم جميل وياريت كنت معاكم

emey يقول...

يوم جميل قوى يارتنى كنت معاكو ربنا يسعد ايامكم كلها

تحياتى

مواطن مصرى نايم يقول...

شكلة كان يوم جميل
ربنا يبسطكم ديما و يقدركم على فعل الخير
بجد احساس جميل انك تسعد طفل يتيم
ربنا يجعله فميزان حسناتكم

تحياتى

اسلام

صدى الصمت - عاشقة الورد - يقول...

جميل قوى طريقة وصفك لليوم والرحلة الرائعة والأجمل الروح الطيبة والهدف النبيل لهذة الرحلة ، تحياتى

ahmed_k يقول...

بقا طلعتوا تشكيل عصابي أممممممم
وكمان منفذتوش المهمه بنجاح أووووك
قررنا أنكم تسلموا نفسكم لتشكيل عصابي آخر حتي يتم تمرينكم جيدا علي كيفية سرقة الأطفال ببراعه وإستخدام قاعدة العض والقرص للطفل لتخديره,
هههههههههههههههههههه

أيه الفيلم الجميل ده
بصراحه أنا عرفت أن اليوم كان جميل ربنا يجعله في ميزان حسناتكم
وكان بودي أكون معاكم بس المشوار بعيد حبتين
بس المره الجايه أعمل حسابي إن شاء الله

عايش علي الهامش يقول...

انا قلت بلاش ادخل لحسن اسني يتاخد ضمن المجموعه الارهابيه الي نظمت الموضوع ده و...
لا الرد ده مش ليكم ده لمدونه تانيه مه كله بقي عنف دلوقتي

واضح ان اليوم كان اكثر من رائع
كان نفسي اعيل بس يالله متعزمتش


شكرا لكما

أبو خالد يقول...

أبنائي /شفقة و أحسان
أجمل روح و أعظم تشكيل عصابي و سعدت من أعماقي بالتعرف عليكما عن قرب
أسعد الله أيامكم و رزقكم الذرية الصالحة و بارك لكم في أعمالكم الصالحة
و دوما نلتقي علي خير

!!! عارفة ... مش عارف ليه يقول...

جزاكم الله خيراً
وأعانكم على البر

وإن شاء الله في ميزان حسناتكم


تحياتي
وليد

رئـــــيسـة حزب الأحلام يقول...

هههههههههههههههههههههه
لا بجد رحلة جامدة
ادام الله عليكم الحب

Lady E يقول...

عاااااااااا كان نفسي اكون معاكووووو

بس حصلت ظروف ومعرفتش اجي

المرةالجايه ان شاء الله لا ممكن تنزل الارض ابدا

وبإذن الله اشارك معاكو

مهرة سالم يقول...

شفقه هانم..إحسان بك....
شكرا على هذه اللفته الطيبه..
وجزيتم خيرا...
والتقرير جدا رائع...
.......
دمتم بخير..

د. إيمان مكاوي يقول...

فرقعة الإعلام المصري ومحاولة إلصاق التهم بأناس ابرياء لتضخيم الامور في قضية الطبيبين المصريين في السعوديه....
وما علاقتهم بمستشفى السلام بجده ؟
تدوينه جديده في يوميات أم البنين

شفـقــة و إحســــان يقول...

fashkool
اكيد هنعزمك طالما انت حابب تكون معانا
بس بلاش حكاية هزوركم كل يوم دى واحنا هنقضلى على الزيارات دى منين؟؟

شفـقــة و إحســــان يقول...

nostor
منور ان شاء الله المرة اللى جاية نكتب الخطة فى بوست واللى يحب يشارك يقولنا عايز يبقى دوره ايه فى العملية؟

شفـقــة و إحســــان يقول...

emey
خلاص من دلوقتى ادربى وخدى كده كام كورس روصيات على ضرب شلاليت على اقلام وحضرى نفسك للعملية القادمة

شفـقــة و إحســــان يقول...

مواطن مصرى نايم
ايه ده شكلك عقلت يا اسلام
مش مصدقة حاسة انى بقراه تعليق لمواطن مصرى مطحون او عاقل
وبعدين ايه فيلم سعد اليتيم ده اللى عيشتنا فيه
المرة اللى جاية تعمل حسابك انك هتيجى معانا ودورك هيكون تنيم العيال

شفـقــة و إحســــان يقول...

صدى الصمت
انتى كده هتخلى احسان يغير
نبيل مين بس ؟؟
هتلبيسينا تهمة كده

شفـقــة و إحســــان يقول...

ahmed k
بجد هنسلم نفسنا لتشكيل عصابى تانى
الله احسن علشان بصراحة التشكيل اللى اشتركنا معاه فاشل ومالوش لا فى عض ولا قرص

شفـقــة و إحســــان يقول...

عايش على الهامش
منور بس ايه حكاية الارهاب ده يا ابنى احنا الارهاب والكباب
انت بتعليقك ده هتخلينا احنا اللى على الهامش

شفـقــة و إحســــان يقول...

ابو خالد
الله عليك يا ابو المدونين كلهم
ربنا يخليك لينا يارب.....احنا اللى اسعد ناس فى الدنيا
ربنا يخليك لينا ويباركلنا فيك

شفـقــة و إحســــان يقول...

عارفة مش عارف لية
ربنا يخليكى ايوا كده محتاجين كام دعوة زى دول

شفـقــة و إحســــان يقول...

رئيسة حزب الاحلام
المرة اللى جاية انتى معزومة انتى والحزب

شفـقــة و إحســــان يقول...

lady e
حبة عياط على كام دبة فى الارض على عض فى السجاد ادينى اكتر
ولما نشوف يا حنفى هتنزل المرة اللى جاية ولا ايه

شفـقــة و إحســــان يقول...

m k
منور وبنشكرك على الكلمتين الحلوين دول بس نفسى اعرف اللافتة دى متعلقة فين؟؟

شفـقــة و إحســــان يقول...

ايما ام البنين
وحشتينا جدا....المذاكرة خدتك مننا...
ولا الحافى؟؟
البوست عندك مميز