الأربعاء، 17 ديسمبر 2008

الطـــــــفل الهــــــــــاى ...... والطـــــــــفل اليــــــــاى

ازيكم وحشتونا موت الواحد بجد مابيعرفش قيمتكم الا لما بيبعد عنكم ...لا فعلا وحشتونا وحشة كبيرة اوى متشوفوش وحش طبعا ده بالنسبة لى اما بالنسبة لاحسان......فانا معرفش مشاعيره ايه من ناحيتكم احتمال يكون بيموت فيكم وده الاحتمال الضعيف.......... واحتمال يكوت عايز يموتكم وده الاحتمال الارجح والاكيد ما علينا المهم ندخل على البوست بقى يا معين يارب استعنا على الشقا بالله بصوا بقى انا اصلى اليومين دول بيلفت نظرى حاجات فظيعة مريعة وبما انى نظرى ضعيف
فانا هقلكم ايه اللى بيلفت نظرى
قال ايه قاعدة اتخانق انا واحسان على القناة اللى نتفرج عليها .......وكالعادة هو يقول الجزيرة والحوادث وانا الافلام واليابس

المهم واحنا بنتخانق جت قناة mbc 4 ولقينا برنامج للاطفال تحفة بتقدمه طفلة لا تتجاوز العشر سنوات
والبرنامج بيتكلم على .......الحيوانات الغريبة والخطيرة والبيئة اللى بيعيشوا فيها سواء ثدييات او برمائيات وهكذا وطبعا منهم حيوانت مفترسة

المهم ان البنت بتقوم بتقديم معلومات عن الحيوانات دى واماكن تواجدها وكيفية التكيف معاها
والتعامل معها والغريب.....ان البنت كانت بتبقى ماسكة الحيوان من دول ولا كانه قطة
وطبعا كان تعابين خطيرة وقنفد .....وتمساح وماشابه ذلك من حيوانات البعبع
اللى لو الاطفال عندنا شافوها بلاستيك او فى اللعب ......ممكن يجيلهم صرع والنص التانى يتوفى الى رحمة الله من الخضة
طبعا اللى لفت انتباهى....... ازاى الناس دول بيعلموا اطفالهم
ومش بيستخفوا بعقولهم برغم صغر سنهم
الا انهم بيقدموا شىء على سبيل انهم اطفال مدركين للمعلومة بجد شىء هايل عجبنى جدا لان الواحد شخصيا استفاد منه وعرف حاجات ماكانش يعرفها
مش زى عندنا برامج متخلفة معاقة...... كبيرها تتقدم لبيبهات
وكمان متنفعش تلاقى بكار ومكار والقط والفار
حاجة منتهى الاستخفاف
مجرد هزار ولعب وكلام فاضى لا يرتقى بمستوى العقول ... بجد الناس دى ممتازة
بتعرف يعنى ايه تعلم...... وتعرف وتناقش وتسال وتفكر


اللى لفت نظرى حاجة تانية ...
.......كنت مسافرة مكان ما من الاماكن اللى مابيروحهاش الا الناس الهاى
فكنت بقعد اتفرج على الاطفال الصغيرين.. واد ايه هما جمال ونضاف ولذاذ واذكياء ومابيرطموش الا بالعنجليزى فافتكرت ولاد الجيران اللى صوتهم بيجيب اخر الشارع...... وعلطول مبهدلين ومقطعين
كمان كان بيلفت نظرى ....الاطفال اللى بتلاقى اهاليهم رمياهم فى الشارع او الاطفال الشعبيين والاطفال المتشردين الواحد كل ما يشوف الاطفال دول ... بيحس اد ايه هما مهملين وممكن يطلع منهم ناس كويسين
بس للاسف
لا اهالى بتعلم وتربى ولا مدرسين ولا اى حد
وبصراحة هما ماينفعش معاهم ولا حتى الطبل البلدى الزنخ زنخ من يومه
بس مش عارفة العيب فى الظروف والماديات والبيئة
ولا فى الاه
ل ولا فى الاطفال دول نفسهم......يلا اظاهر ان كله جيل مهبب انا تخيلت وعملت مقارنة بسيطة بين الطفل الهاى....... اللى اتمنى يكون اطفالنا كلهم كده....وبين الطفل الياى اللى يصعب عليا انى اشبههم بالاطفال
واتمنى ينقرضوا من البلد والدنيا خالص علشان دول عاااااااااااااااار


طبعا الاطفال الهاى....... بتلاقى الطفل من دول لسانه ملووح علطول
وبيجيد اكثر من لغة يعنى ممكن يشتغل مرشد سياحى من غير حتى ما يعدى على كليات
المهم تلاقى الطفل من دول اول ما يصحى ....ويفتح عينه
تلاقيه شكله يفتح النفس وريحته مسك
ويخليك غصب عنك تقول الله ياخلاصى" مش يا ساتر يارب
" تلاقيه كده اول ما يصحى يبص للدادة ويقولها "جود مورننج "
وكله براءة ونشاط وحيوية
ويقوم اوام يلبس اللكلوك فى رجله.... ويدخل على الباث رووم "التواليت"
وياخد الشاور بتاعه ويغسل سنانه... بسيجنال تو
يخرج من التواليت مبتسم للدادة تنشفله...... وتسرحله شعره
وتحطله برفيوم يبص للدادة ويقولها "ثانكس"

اما الطفل الياى....بما اننا معاشرين الاطفال دول فاكيد كلنا عارفين لما بيصحوا بتبقى اشكالهم عاملة ازاى

الطفل من دول تلاقيه بيصحى عينيه معمصة .....وشعره منكوش
ونايم رجليه وحل .....وايده طين وتلاقيه عمال يدعك فى عينه
وامه عمالة تزعق قوم يا منيل على عينك...... يخرب بيت اللى جابك
.كان يوم اخبر يوم ما خلفتك هلاقيها منك .....ولا من المدعوق ابوك
ولما ما يرضاش يقوم تلاقيها بتحدفه بالجزم..... ومش عايزين نتكلم عن الجزم دلوقتى...... لحسن اليومين دول تحديف الجزم بقى على ودنه
وسمعنى احلى سلام من اجدع صرماتى فى حدف الجزم
وصولا لوش عمنا بوش
ويعيش وياخد غيرها ......المهم ان الست يا عينى بتفضل تصوت وتصرخ

هو بقى يبصلها ويقولها" جرى ايه يا امه على الصبح ما تصتبحى
وتقولى يا صبح عايزة ايه عاملة غاغة ليه؟؟
ترد تقوله..." علشان المدرسة يا بيه
يلا يا فاشل لما نشوف اخرتها وديب تقوم حدفاه بالشبشب على بقه
او زى ما تيجى تيجى ما يضرش
وتقعد تصحى وتناهد معاه..... لحد ما الحصة الاولى والتانية يضيعوا منه
طبعا يقوم مفيش عنده اختراع اسمه..... غسيل وش ولا ايد ولا اسنان
ده مش علشان .....هو جمال ربانى
لا علشان اصلا الميه ما بتجيش عندهم اساسا
يعنى مفيش عنده اى اختراع من اختراعات النضافة...... وكبيره فى العيد صابون سايل على شوية جاز


الطفل الهاى......يروح يغير هدومه ويلبس هدوم نضيفة ومكوية
ويلبس تكون الدادة حضرتله الشنطة والكتب
ينزل اوام على السفرة يسلم على مامى وبابى....وبوسة من هنا وبوسة من هنا ياخد "البريكفاست "بتاعه جبنة موتزريلا وشيدر وبسطرمة وزيتون كلاتاتا وكورن فليكس
اول ما يخلص فطار ياخد شنطته ومصروفه
ويخرج على صوت كلاكس الباص بتاع المدرسة
اول ما يدخل الكلاس يقول للميس "جود مورننج" ويسلم على الفريندز اصحابه
وتلاقى كل طفل فى ديسك لوحده...... والفصل مفهوش الا اربع او خمس اطفال
والميس بتشرح اخر رقة وشياكة
والكل بيفهم ومستوعب وبيفهموها وهى طايرة
الميس تدى لكل واحد شيكولاته كادبورى.... وجالاكسى
يضرب الجرس يروح يركب الباص ويروح


الطفل الياى.....يقوم مضروب بالجزمة القديمة
يقعد يدور على المريلة ساعتين
يلبسها بعد ما يلاقيها تحت السرير وكانها خارجة من بق كلب
وساعتين كمان يدور على الجزمة ولما يغلب يلبس فردتين غير بعض
وصوابعه طالعة من كل خرم فى الجزمة
ويدور على شنطة المدرسة مايلاقيهاش فيمسك شنطة بلاستيك او قماش
ينادى"امه.....انتى يا امه..الفطار فين عايزين نبل ريقنا"
امه"اصتبح يا مخفى على الصبح عندك طبق الفول وطعمياية .....اطفح من سكات" ياكل الفول بالعيش ابو رده سوداء .....ومليان مسامير
وصوت المضغ جايب اخر الشارع
يخلص فطار يدور على الكتب والكراريس مايلقهمش
ما يضرش يخرج من غير لا قلم ولا كراسة "ماشى على الكلام
اللى بيقول"العلم فى الراس مش فى الكراس" وهو اساسا ما يعرفش غير القلم اللى بياخده على قفاه كل يوم
ويقول لامه" المصروف تقوم تلاقى الحرب اشتغلت" امه"منين يا روح امك لا مصروف ولا دياوله ما خدتش ليه من الشملول ابوك
معندناش فضينا.....هى امك هتزرع الارض تطلع بطيخ؟؟
هو"وانا اعمل ايه دلوقتى اروح المدرسة ازاى ؟؟اجيب حق الميكروباظ منين؟ امه"اتشعبط يا حبيبى او خدها كعابى" يرد"بقولك ايه اخلصى" امه تديله بايد الهون فى وشه ......ودى التحية بتاعتها يقوم يلم نفسه
ويخرج ياخد نص السكة مشى والباقى يتشعبط فى الترام ويهرب من الكمسرى
يروح المدرسة متاخر يدخل الفصل اللى فيه 70 واحد
كلهم على تخته واحدة يتخانق مع اصحابه
وهاتك يا ضرب بالشومة وبالسنج واديله وهو ده كان المقرر فى الحصص
يروح البيت متشلفط وعينه ورمه وهدومة مقطعة وحافى من غير جزمة

الطفل الهاى.....اول ما يروح يسلم على بابى ومامى.....ويطلع على اوضته يقلع هدومه
ويدخل التواليت ياخد شاور ويقعد على السفرة ياكل الدينر بتاعه.
تشيكن وناجتس ....او ميت.... او سي فوود
ومعاهم سلاد ومايونيز والجوس بتاعه
وياكل بالشوكة والسكينة
يخلص غدا يقوم ينام ساعتين ويصحى
يعمل الهوم وورك لوحده وبعدين ياخد بريك يتفرج فيه على التلفيجن على قناة ال
mbc4 او يلعب جيميز....... او يقعد على النت
وفى "الويك اند" يصحى بدرى
ويلبس اسبورتس وير..... ويروح مع مامى النادى
يلعب سباحة وجولف وطايرة
يرجع ياخد الشاور وينام على انغام الميوزيك الهادية
والدادة تقعد تحكيله حكاية لحد ما ينام


الطفل الياى.....اول ما بيروح وهو متخانق
امه تفضل تصوت وتصرخ " يخرب بيت اللى جابك"
مين يا واد اللى عمل فيك كده ........انطق يا مدهول....... يا صايع...... يا رباية الشوارع"
الواد مضروب 100 جزمة وشبشب
" ايه ضربت العيال فى السجن..... اقصد المدرسة ضربونى اسكتلهم يعنى؟؟
الواد كابوكى...... اديتله حتة بونيه وروسية تمام علشان يحرم يبخ معايا تانى"
بقلك ايه يا امه عايز اكل الضرب جوعنى فين الغدا؟؟ امه"ابوك ماسبش فلوس كل بقية الفول " الواد يجيب فحل بصل على طبق الفول ......وهاتك حتتك بتتك وهات يا حشر
وكانه ديك رومى محمر ومعاه رغيف عيش بالصراصير فل
يشوف الصرصار من هنا وكانه لقى لقيه اهو بدل اللحمة"
شوية تلاقيه تنح وسرح ونام على روحه
يقوم من النوم يزعق"ايه يا امه مش سامعة كباكا.... ولا ايه عمال ينادى؟؟
انا هنزل العب كورة فى الحارة شوية كده وهاجى امه"والمذاكرة يا فاشل ؟؟ الواد"لما ارجع هو ماتش واحد ويقعد يبرطم مذاكرة ايه وبتاع ايه؟؟
مش شايفين لاعيبة الكورة بتكسب اد ايه؟؟
يرجع من الماتش مبهدل وموحل وهدومه عايزة الرمى....وهو شخصيا
يفتح التلفزيون قناة اولى... تانية.... تالتة.... والاخر يستقر على بكار.... وتوم وجيرى
شوية ويقعد يتحايل على اخوه
والنبى تعالى اعملى الواجب لحسن مش فاهم حاجة
والابله هتضربنى لو محلتوش
الذاكرة عنده خربانة .......لا سؤال ولا مسألة ولا اى حاجة وتلاقى امه بتصرخ "وحياة ابوك لو مفلحتش لطلعك من المدرسة واوديك للاسطى الميكانيكى يمرمط اهلك وشوية تلاقى جارتهم بتصرخ ولامة الحارة عليها
وعمال تدعى على الواد تجرى امه تشوف فيه ايه......يقوم يجرى يستخبا فوق الدولاب
الجارة...منه لله ابنك مش هسيبه عورلى الواد والنبى لادخله الاحداث الام تصوت وتشد فى شعرها
ومش بعيد تدلق على نفسها جاز وعلبة كبريت
ياااااااااااااااااااااااااااااااااااااااااااااااااااااااااااااااالهوووووووووووووووووووووووووووووووووووووووووووووى وكانت هى دى الحياة اليومية لاطفالنا اتمنى تكونوا استمتعتم......... واتعلمتم ازاى تربوا اطفالكم...... وتعلموهم بس ياريت تبعدوا خالص عن الجاز وسلام بقى انا طولت عليكم........ وكمان علشان الحق اروح اشترى جاز احتياطى
شـــفقة

هناك 85 تعليقًا:

انا حره يقول...

هههههههههههههههه

سكره ياشفقه دى ولا رساله ماجيستير فالعيال

موتينى من الضحك بجد

وحشتينا ياقمرايه

نعكشة يقول...

ممممممممم

معترضة

ميعجبنيش ان الطفل يرطن باللغات ولا ان الدادة هيا اللي تربية

مفروض يتعلم اللغة الاساسية بتاعتة العربي الاول طبعاً

بالنسبة للطفل التاني العيب في امة مش في الفلوس

هيا اللي سايبة الشوارع تربيه
هيا لو من البداية ربته كويس و مزعقتش في وشه طول النهار كان اتعلم بجد
يلا خير

لا دة عاجبني ولا دة عاجبني

يلا خير

سلام عليكِ

نعكشة يقول...

اة صحيح بالنسبة لهناك

برة يعني فيه كرتونات هبلة زي بكار كدة و اكثر منها هبلا كمان

فيه كل الانواع

بس احنا مقتصرين علي نوعية بكار

و بعدين البرامج التانية التعليمية ممكن متكونش مكلفة زي الكراتين دية بس تقولي اية

الاعلام مش عايز عقول نظيفة

سلام عليكِ

اقصوصه يقول...

looooooooooool

اعتقد الاطفال ما لهم ذنب

تالطفل مثل الورقه البيضا

احنا اللي نحدد شو بينكتب فيها

لو ربيناه تربيه حلوه

بيطلع ولد شااطر ومؤدب اكيد

ولو ما اهتمينا بتربيته

وما كنا احنا انفسنا قدوه صالحه لنا

فطبيعي يطلع بشكل سيء

ويفشل تربويا واخلاقياو في التعليم

انا اقول استغني عن الغاز احسن

او بدليه بزيت الزيتون :)

صدى الصمت - عاشقة الورد - يقول...

هههههههههههه
يا شيخة والله حرام عليكى تخيلت فجأة وأنا بأقرأ إن عيالنا كلهم من طبقة أولاد الشوارع وبيمثلوا فيلم اللقطاء فى الأرض
هههههههههه
والله فية عيال هندنا لسة بيستحموا وعندهم ليفة صابونة

غير معرف يقول...

Iههههههههههههههههههههههههه
انتى رسالة الدكتوراه بتاعتك على العيال دى ولا ايه
دى انتى فلتيهم
فصفصتيهم

ههههههههههه
موتينى على نفسى من الضحك ياريت تنورى مدونتى المتواضعه

فارس القمر يقول...

حلوة قوى موصفات الطفل المصرى

قصدى المتشرد المصرى بس لو الطفل ابو عين معمصه دا لو كان ابن ناس هاى لايف
ماكن دا بقى حالوا ومش هنقول ان العيب فى اهلوا
علشان الفقر مش عيب
هو الشارع المصرى كدا اوكى
لو ابن الهاى لايف دا قد فى الشارع يوم واحد هوبا اتعلم اللى محدش عرف يتعلموا ولو ابن الشارع قعد فى فيلا ولا شهور علشان يتاقلم عليها
هيا الدنيا مش بتدى كل واحد اللى هو عاوزوا
ولو جات على الجاز الجاز اليومين دول بقى مضروب مش بيولع بسرعه
سيبم نت الجاز واشترى بنزين
هههههههههههه
تحياتى

Mony يقول...

ازيك يا شفقة
كل سنةوانت طيبة يا اختشي


فينك يا بنتي الفترة الي فاتت ديه


و الله يا شفقة ياختشي الرك علي التربية
و الام

علشان كده المقولة اللي بتقول" الام مدرسة ان اعددتها اعددت شعبا طيب الاعراق"


ربنا معانا والله في تربية ولادنا

وردشان smilyrose يقول...

حمدلله على السلامة

واخبار احسان اللى عاوز يخنقنا ايه


على فكرة يا شوشو الطفل المصرى والله

لو وفرتيله البيئه المناسبة هتلاقيهة

اجمل من كل دول وهتلاقى عقلية

فوق الوصف بس الظروف المحيطة بيه

هى السبب فى كل دا

وبعدين ايه التشريد اللى عملتيه للعيال دا هجيبلهم اطتئاب

يا شيخه هما ناقصين

موضوع رائع وعودة جميلة

smilyrose

روح الحب الصادق

دردشة على الماشى يقول...

ياااة يا شفقة دة كأنك معانا فى المدرسة تخيلى بقى إنى بادرس فى مدرسة تقريباً أكتر من نصف طلابها من عينة اليااااى دى؟؟
وبنشوف كل يوم البدع منهم ومن أهاليهم
بس أحييكى على التخيل الرائع للى بيحصل فى الواقع الأغبر اللى احنا عايشينة
تحياتى
سلام

أمل حمدي يقول...

ازيك يا حبيبة قلبي يا شفشوقة

سلامتك من الجاز والكبريت

الياي دول بقوا بنسبة 90 % من اطفالنا اللي مش اطفال
دا من خلال احتكاكي بهم كمدرسة
دول حاجة تانية احنا بالنسبة لهم ملايكة والله بحس ساعات ان مش من الزمن دا
بتصدم من كل حاجة من الفاظهم وحركاتهم
بقوم مذبهلة من تحت النقاب الحمد لله ان مفيش حد شايفني
فعلا والله باصاب بالذهول
مش ها اقول بيعملوا ايه وبيقولوا ايه علشان الرقابة بس
المهم دا كله نتاج ايه؟
اهمال الاهل والفقر والشارع والتلفزيون والنت

كل دا تداخل مع بعض وانتجوا هؤلاء الياي

كفاية كدا

سلام

Unknown يقول...

يالهووووووووووووى
حيلى اتهد وانا بقرأ البوست
يسترك ربنا ابقى صغرية شوية
اية شفقة انتى مش لاقية حد تحكى معاه غرنا ارحمينا ههههههههههههه
بجد دمك زى العسل وكمان مقارنة رغم انها ساخرة الا انها واقعية جدا
وكمان فى اهمال من قبل الاهل بشكل كبير بحس انهم مش مقدرين النعمة اللى فى ايديهم ؟
بوست حلو اوى يا شفقة بس دا مش ممكن يرجعنى عن طلبى فى انك تبقى تعملى منتاج
او تختصر
اوفرى فى الكلام لانه هيغلى
ههههههههههه
باى

غير معرف يقول...

بوست حلو اوى
ضحكتينى على كلماتك
بس الاهالى معدويش بيربوا عيالهم بس يجيبوا اولاد ويرموهم فى الشارع
والزمن كفيل بتربيتهم
وحشتينى اوى يا شوشو

مهرة سالم يقول...

ههههههههههههههه
الله عليكي ...
بجد أسلوبك مالوش حــل لا مع ميس ولا مع أبله..
......
وشر البلية ما يضحك..
بس شوفي التواصل بين مامي والواد الهاي عامل إزاي كأنهم مايعرفوش بعض إلا في المناسبات درءا للتساؤلات..
وبين الواد الياي وأمه إلي بيتكلم معاها ليل نهار تحسها أم بجد..
........
دمتي بخير..

شفـقــة و إحســــان يقول...

انا حرة
وانتى الصادقة دى دكتواره ...زيا بنتى انتى بتتكلمى مع عقلية علمية متنيلة بستين نيلة
وحشتينى جدا

شفـقــة و إحســــان يقول...

نعكشة
ممممممممممممم ايه هى الحروف وقعت منك ولا ايه؟؟ وبعدين انتى معترضة علشان منعكشة ومابتتسرحيش
وبعدين انتى مترضة على اللغات وعايزة تعلميه اللغة العربية طيب بذمتك يرطن دى انهى لغة؟؟ وبعدين لما نتعلم احنا العربى نبقى نعلمهولهم
اما بالنسبة للطفل التانى فلو امه مزعقتش وشدت فى شعرها مش هيتعلم عمرهوعلى فكرة شد الشعر والصويت
سبب من اسباب النجاح فى تعليم الاطفال

شفـقــة و إحســــان يقول...

اقصوصة
وحياتك الطفل زى الفرخة البيضا
اللى بتكاكى طول النهار
وبعدين ايه حكاية تربية حلوة دى يعنى نحط عليها سكر؟؟
كمان احنا مش قدوة احنا قدرة صالحة لعمل عقول بالفول وزيت الزيتون

شفـقــة و إحســــان يقول...

صدى الصمت
نفسى اعرف مكانهم فين اللى بيستحموا باليفة والصابونة يا بنتى الاختراع ده بيطل

شفـقــة و إحســــان يقول...

غير معرف
ايه فلتيهم دى هو انا قردة دى مدونة مش جنينة حيوانات
وياريت بلاش موتينى دى لحسن تلبيسينا تهمة من اول زيارة

عاشقه وغلبانه يقول...

اسمحيلي اختلف معاكي
الطفل المصري من اذكي الاطفال علي مستوي العالم لحد مابيدخل المدرسه
وبيبدأ يختلط بيمدرس جاهل وفصل زحمه وناس مش مهتمه تعلم ولا تربي وبالتالي بيفقد ذكائه شويه بشويه
بالنسبه للشكل فهو ياطالع لبابه يا لمامته مش جايبه من بره يعني ولا بمزاجه

بالنسبه للهجه لو علمتيه من وهو صغير يقول بابي ومامي هايقول
ولو طلع لقي ام تعلم غسيل الاسنان قبل النوم وبعد الاكل هايتعلم مش هايقول لا
ولو طلع مالقاش ماما بتزعق مع بابا وعماله تصرخ مش هايعرف يعلي صوته ولا يبقي مزعج
كله ناتج من البيئع
حضرتك تعرفي ان الام الاجنبيه بتحط علي بطنها اثناء الحمل سمعات وتسمع البيبي بتاعها موسيقي هاديه علشان يطلع هادي ورومانسي
والله البيبي بتاعنا مش ذنبه ان مامي مش عملت كده
ومش ذنبه كمان ان مامي وبابي دخلوه مدارس حكوميه
وياما اطفال مصريه متربيه وولاد ناس وبيعملوا كل اللي حضرتك حكيتي عنه
ماخلفش انا خمسه وسته واجي اشتكي اني مش عارفه اربي
مايبقاش الفقر ممتوني واجي اجيب اطفال ابهدلهم معانا
هو مالوش ذنب اني بالكله فول في حين ان غيره بيفطر ساندوتش زبده وعسل
البيئه والام والاب هم اللي بيخرجوا اطفال زي ماحضرتك حكيتي مش الطفل
هم بيهتموا باطفالهم الاغبيه ويعلموهم
واحنا بنموت اطفالنا الاذكيه ونعدمهم فقر
تحياتي

Ahmed يقول...

معلش ياشفيقة
بس انا رأيي أن الأساس هو الأصل
من غير زعل, الأطفال الياي بيكونوا أولاد ناس في الأصل ياي

محدش ياي بيجيب هاي

على كل حال, الحل بسيط
تحسين السلاله

يعني الناس اللي مش ياي أوي يتجوزوا ناس هاي. والعكس

بعد كام جيل كده هنوصل لسلاله أحسن

فشكووول يقول...

سيدنا احسان بك .. ستنا شفقه هانم
والله انت لمست جرح كبير خدى بالك من برامج الاطفال عندنا .. واخده بالك من مسلسل بكار .. واخده بالك من مذيعه تطلع تلاعب اطفال وكأننا فى حضانه .. حاجات متخلفه .. والطفل الهاى والطفل الياى .. والله الطفل الهاي حاجه حلوه وانت قلت عليه كل الكلام الحلو .. اما الطفل الياى ..واخده بالك من الست عبله كامل اما بتطلع بادوار فى افلام اللمبى وخالتى فرنسا وكمية الشردحه اللى حاطينها فى الفيلم .. وللأسف ناس كتير مبسوطه .. وبعدين يا هانم احنا حنجيب الهاى منين .. كل الثقافه بتاعة اليومين دول ثقافة الشردحه واللمبى واستهبال الممثلين علينا فى الافلام .. ما بقولش حاجه على الافلام انت بتحبى الافلام .. والله حلوه وبتسلى .. بس انا ما بحبش الافلام العربى خالص ولا بطيق المسلسلات العربى الهبله دى خالص وخصوصا مسلسل الدالى حتى يحيى الفخرانى ما بقيتش احبه عشان بيهجس اليومين دول وبيركب حوادث مفتعله.ز ايه اللى جابنا عند الافلام والمسلسلات .. اصل دى هى اللى بتعمل الوعى الثقافى عندنا .. انا حالخبط .. كفايه بقى

Mafrousa يقول...

هههههههههههههههههههه
ههههههههههههههههه
دراسة ميدانيه مكثفة
ههههههههههههه
كلفتك تمام
بس يا شفقه هانم
ياتري انتى عندك اولاد؟؟؟
و لو عندك يا عكروته ...ولادك هاي ولا ياي
ههههههههههههههههه
انا اخدتها من قصيرها و مش عندي ياهتى
ههههههههههههههههههه


بس بجد الاطفل غلابه
عندنا يعنى... هوه بيبقوا على حسب البيئة اللى بيتربوا فيها
الطفل مش بيختار اهله و لا المحيط اللى بيعيش فيه
الرك كل الرك على الاهل
اذاكان الاهل عاوزين ابنهم يبقى كويس لازم يربوه تربيه كويسه
مش لازم فلوس
بي على الاقل ياخدوا بالهم من العيال
فيه ناس كتيرة
بتسيب تربيه العيال للمدرسة و للزمن

و انتى طبعا عارفه المدارس مش بتربي
و الزمن بعيد عنك بيعلمهم البلطجة و الحاجات الوحشة كلها

كل سنة و انتم طيبين و بخير يارب

صباح الصباح يقول...

هاهاى هاى هاى

لو انا ما كنتش شفت الكلام دة بعينى كنت قلت انها وسعت منك اوىىىىى

princess يقول...

هههههههه
ايه المقارنة الفظيعة دى
انا بشتغل "تيتشر" فى مدرسة لغات لكى جى تو فمستوعبة جدا البوست ده
لانى بشوف الاطفال الهاى دول كل يوم
فى اول شغلى مكنتش مستوعبة اوى لانك زى ماقلتى الاطفال اللى بنشوفهم فى الشوارع او اطفال الجيران اللى علطول فى الشارع يخلوكى مش شايفة غير صورة واحدة بس
عموما فى الجنة مش هيبقى فيه فرق
تحياتى

شفـقــة و إحســــان يقول...

فارس القمر
يا ترى انت واخد القمر معاك على الحصان ولا ايه؟؟
وبعدين اكيد انت تقصد التفل المصرى مش الطفل
بقى يا عم فارس الفقر مش عيب امال انت سيبت الارض وطلعت القمر ليه؟؟
كمان الشارع المصرى بقى الابندا مش كده اوكيه انت مش بتاع المسرحيات ولا ايه؟؟
كمان انت عندك حق ابن الشارع لو قعد فى فيلا مش ادام شهور وحياتك سنين على ما يتمسطر عليها مش يتاقلم
كمان عايزة اعرف مين اللى ضرب الجاز؟؟
وياترى باى اداة من ادوات الضرب؟؟
شومة ولا شبشب ولا سنجة ولا جزمة زى ناس؟؟

شفـقــة و إحســــان يقول...

mony
كده بردوا يا مونى من اولها بتقوليلى اختشى ليه هو انا كنت كاتبة كلام قليل الادب؟؟
كمان انا كنت غطسانة فى الفتو واللحمة قلت اعيش معاهم يومين مش بشوفهم طول السنة
وبعدين ايه اللغة الفظيعة دى الرك ده نوع من انواع الرقص ولا ايه؟؟
كمان ايه اللى دخلك فى السوياسة ما كنتى كويسة .....احنا مالنا ومال العراق خليهم فى الجزم اللى بيحدفوها

شفـقــة و إحســــان يقول...

smilyrose
احسان بيسلم عليكم وبيقولكم موتوا ولا لسه ...يعنى عايز يعرف الخنق جاب نتيجة ولا لا؟؟
الطفل المصرى على رايك عقلية علمية معملية بتنجانية فظيعة
لولا فعلا الظروف المحيطة واليابسة والجبال والمرتفعات ...ايه شغل الجغرافيا دى؟؟

شفـقــة و إحســــان يقول...

دردشة على الماشى
انتى فى مدرسة ايه علشان انقل عندكم؟؟
اه بما انكم عندكم اطفال هااى يبقى لازم اجى اعاين بنفسى
لكن شكلك زهقانة منهم كده ليه ؟؟
اوعى تكونى اتعودتى على الياى ده هو ده يبقى الاغبر بعينه

شفـقــة و إحســــان يقول...

ماما امولة
روح قلبى انتى سيبتى التدريس وهتغنى زى كاظم سلامتك من الاه بس انتى هتبقى سلامتك من الجاز؟؟
تصدقى فكرة
بس ايه حكاية كنتاكى ده انتى بتاكلى كنتاكى فى المدرسة يا ماما امولة ....خيانة
وبعدين انتى بتشتغلى فى مدرسة مكفوفين ...علشان مش بيشفوكى؟
واذا كنتى خايفة من الرقابة تعالى قوليلى وذيعى اللى انتى عايزاه على سينما 1 هى من غير رقابة

شفـقــة و إحســــان يقول...

نهر الحب
يا لهووووووى ايه انتى لحقتى تدلقى على نفسك جاز؟؟
معلش اصل البوست فى الدور العاشر ومفيش اسانسير ابقى ريحى عند الجيران يا نهر
وبعدين اصغره ازاى بعد ما كبر دا انا مصدقت انه كبر وارتحت من قرفه تقوليلى صغريه
ومعلش يا انوس انا بحب اطلع كل اللى فى نفسى عليكم قصدى معاكم بفضفض امال يعنى اكلم الحيطة يرضيكى؟؟
اما بخصوص المونتاج اوعدك بس لما الاقى استوديو فاضى
وخلى بالك من الكلام ليفور

ahmed_k يقول...

شفقه هانم إزيك وإزاي إحسان بيه
إن شاء الله تكونوا بخير وأحسن حال,
طبعا النموذجين مرفوضين بالنسبالي
فالهاي كما وصفتيه غريب عن مجتمعنا
لا يعرف من ثقافته شيئ وبعيد كل البعد عن أصوله وطبيعة بلاده
والثاني منتهى الإهمال الأسري وهم من ينتجون المجرمين والبلطجيه ,
في كتير في مصر غير هؤلاء النموذجين
وهم الأغلب الاطفال العاديين لاهما مرفهين لحد الثماله ولاهم متمرمطين لحد الغرق

فكلا الحالتين مرفوض تماما
وبالتاكيد الظروف الإقتصاديه عليها
عامل كبير في تنشئة الأسر لأطفالهم فمن توفرت له إمكانيات المدارس الخاصه فبالتأكيد حتلاقي أطفاله في مدارس خاصه مش لازم لغات بس بتحترم آدمية الإنسان وبتدي للتعليم حقه
أنا عن نفسي طول عمري في التعليم الحكومي وكان الفصل بتاعي في تالته ثانوي عددنا خمسه وعشرون طالب فقط فليس كل التعليم العام سيئ بل على حسب المنطقه ومدى كثافتها السكانيه

وآدي كل التعليق بتاعي
حلو ولا نغيره ههههههه

شفـقــة و إحســــان يقول...

هى فوضى
انتى احلى وحشتينى....معلش البوست حلو اوى علشان السكر كان زيادة
بينى وبينك الاهالى عندهم حق يعنى هيعملوا ايه ما هى الكوافيل بردوا غالية ومتعبة فى التغير

شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

m k
مالوش حل؟؟ ليه هى المسألة صعبة اوى كده؟؟
اه بلى قولى كده علشان دماغك فى لعب البلى والكلام الفاضى يبقى هتحلى ازاى؟؟
وبعدين ارسى على مادة انتى رياضة ولا عربى ؟؟
اصلى شايفة تواصل ....
ودرءا ....ايه الكلام المبعجج ده؟؟

شفـقــة و إحســــان يقول...

عاشقة وغلبانة
احييكى بشدة يا ست صباح
بس عايزة اقولك على حاجة الطفل من دول لو طلع ملقاش مامى بتشد فى شعرها وبتزعق مع بابى وبتتخانق مع الجيران هيحس ان فيه حاجة ناقصاه..... ومش هيبقى طفل طبيعى لان ده هو العادى بتاعنا
هى الحياة تبقى حياة من غير بس يا واد واخرسى يا بت وديب بالشبشب فى وشه؟؟
ههههههههههههههه
ميرسى على تعليقك الاكثر من رائع

شفـقــة و إحســــان يقول...

eng
شكلك كده بتروحى معامل كتير
لا بس برافو عليكى عرفتى تحلى المسالة
ممكن اتنين هاى... لناس نص ياى وصلحه؟؟

شفـقــة و إحســــان يقول...

fashkool
ايه يا عم فشكول روستخ روستخ يا ذكى يا روستخ
هتودينا فى داهية كده بردوا تجيب سيرة فرنسا هانم والدالى ويحيى الفخرانى لا مسمحلكش دول اصحابى ورايحين جايين على المدونة ولا انت عايز تطفشلى الزباين؟؟

شفـقــة و إحســــان يقول...

واحدة مفروسة
هى فعلا دراسة ميدانية عملتها فى ميدان العتبة على عينة من اطفال البلاليع واثرهم على البكابورتات والريحة اللى ممكن تطلع
انا دفعت فيها كل العيدية وحياتك
انا عندى خليط تشاو اتشاو على كيشاند يعنى هاى على اى ياى ياى
وبما انك خدتيها من قصيرها تبقى ما تبقاش ياهتى لا مينى جيباتى يا فالحة

شفـقــة و إحســــان يقول...

صباح الصباح
لا هى ما وسعتش انا عارفة المقاس بالظبط اصلى كنت بشتغل خياطة

*^*AL.7aAzZeEnN*^* يقول...

ول زياره ليا للمدونه الجميله دي

والله موضوع زي العسل بجد تحفه


و اتمني لك المزيد من التفوق

و اتمني لك زيارتك الي مدونتي المتواضعه

ميرا ( وومن ) يقول...

بصي بجد وحشتوني وزعلانة منكم ولو مش جيتوا صلحتوني هايبقي في حق عرب ماشي

ام هند بقي علشان ابو هند مش فاضي

عندك حقة يا شفق في كل اللي بتقولية وساعات الولاد الياي دول بيصعبوا عليا قوي

في جنب البيت عندنا مدرسة حكومية اتصادف اني معدية في الشارع وقت خروجهم بجد بقيت خايفة من العيال ووبعد عنهم وانا بسأل نفسي اهاليهم سيابهم بالمناظر دي ازاي

ربنا يعينا علي اللي عندنا

تحباتي

مسعدة يقول...

حلو مدونتكم اوى
اتمنى لكم دوام التوفيق
تحياتى

šσяšαяαα يقول...

هاللوز ياشفقة هانم
سالخير يام السعد

جود توبيك ماى ليدى
ايه الحلاوة دى بالصلاتو على النبى

هو ايه دا.. شفتى ياشفقة اللى جرالى
جالى انفصام فى الشخصية ودا تأثير البوست اللى كتبتيه.. ماذا اعمل دلوقتى

وبعدين ليا عتاب عندك.. يعنى مفيش غير الصراصير الغلابة اللى عملتيها سنجوشتات.. لولا غلاوتك بس ماكنتش عديتها

بس على فكرة انتى تقريبا يعنى تقصدى mbc3
هى اللى بتجيب البرنامج دا لانها قناة مخصصة للاتفال وبس:)
على فكرة بكرة جاى عليها علاء الدين وعودة جعفر الشرير..الساعة تنتين عصرا

شوفى بقى عالم ديزنى لما يعمل حاجة عربى بتبقى ازاى

وبمناسبة الاطفال بتوع اوروبا والدول المتقدمة.. فى ولد عنده خمس سنين ابوه صياد تماسيح مشهووور جداااا وليه برنامج عن الحيوانات ومغامراته معاهم
الولد لسا شايفاه امبارح فى خبر عنه عالmbc4 المرادى:)
كانو بيتكلمو عن انه ازاى بيشبه ابوه وحتى لابس لبس الناس المستكشفين دول
وكان ماسك بومة وبيسجل فى البرنامج وعمال يتكلم عنها
حتى كان عسول اوى..بيقول انا نسيت اللى هقوله:)
وعمال يطلع عالشجر وكان تحفة..مامتة جاية تساعده قاللها لا انا عاوز اعمل كل حاجة لوحدى
بجد عسول اوى وقهرنى اوى ماللى بشوفه هنا من حالة البلاهة المستوطنة عقول الاتفال فبلدنا
مع اننا المفروض اذكى الاذكياء.. شكله كلام فى الهوا

والاطفال الهاى .. هاى بفلوس البابا والماما
لما يكون البابا والماما يبقو عالحديدة وميعرفوش حاجة عن الهاى.. يبقى لازم نقول جااااى

ياللا مطولش عليكى
وعلى فكرة انا اول ماصحيت النهاردة قلت لازمن اعدى على شفقة واسلم عليها
- بجد مش كلام وخلاص -

بس انتى سبقتينى
فيكى الخير:)

وسلام مربع لاستاذ احسان

شوية قهوة يقول...

ايه ده كلوا انا كنت هنام وانا اعدة او يمكن تقلي نمت فعلا
ازيك وحشتينا جدا كان نفسي اكون من الاوائل بس يا خسارة
يا رب يا رب يكون عغيلنا المستقبلييييييييييييييييييييييييييييييييين اوي اللسة بدري عليهم يكونوا من الهاي ان شاء الله

الحرامي يقول...

بيان تأسيس العصابة
يشرفني انا الاستاذ / حرامي لص نشال

ان اعلن لكم عن تأسيس اول عصابة لسرقة المدونين

واحب اعرفكم اني خلاص بقي عندي عصابتي
واسلحتي ومفاتيحي وطفاشتي واعلن لكم جميعا عن ميثاق الشرف لتأسيس هذه العصابه

ويتضمن المواد الدستوريه التالية
1- ان لا يتم سرقة الا ما هو نفيس وغالي وعلي المدونين اللي أي كلام انهم يتطمنوا لاني مش هقرب ناحيتهم
اما المدونين المتميزين فيعرفو اني هسرقهم هسرقهم
2- اي عملية سرقة او سطو مسلح لن تتم الا بعد التهديد والوعيد يعني هبعت رساله للزبون اقوله اني نويت اسرقه
3- يتم ترك بصمات(تعليق ) علي كل مدونه تمت سرقتها عشان تعرف انها اتسرقت


4- يتم عمل نقطة بوليس (عندي في المدونه ) لتلقي البلاغات والشكاوي والتعليقات

5- لن يتم نشر اي موضوع الا اذا كان مسرووووق يعني انا مش هكتب حاجه من عندي

6- ان جيت في يوم واتقفشت فسوف اعلن توبتي وابطل سرقه واحل العصابه
وعشان تقفشني لازم تعرف اسم المدونة الاصليه بتاعتي اللي هيه مش سرقه يعني
- يتم نشر هذا البيان علي اكبر عدد ممكن من المدونات للعلم فقط
اعلانات مبوبه
اعلان لكل الجرايد الرسميه والغير رسميه
مطلوب مساعدين لحرامي.... علي ان يكونوا خبره لا تقل عن عام في السرقه والنصب والتدوين وعلي من يرغب في التقدم للوظيفه ارسال cv وصورتين او تعليقين
امضاء
الحرامي الكبير

عاشقه وغلبانه يقول...

ديب بالشبشب في وشه.............!!!!
ارحميني ياشفقه الله يكرمك مش ناقصين حوادث
دول اطفالك ياختي مش اطفال شوارع
وبعدين ماتعليش صوتك ولا تتعبي اعصابك الدنيا الايام دي مش بيعمر فيها غير الباردين وبس
وبالراحه علي العيال وابوهم
هههههههههههههههههههههه

كيكى عوووووو يقول...

ماشى مااشى يعنى ظهرتوا اهواا
طب الاحقوا استخبوا تانى علشان ماسرحها ولاد ابو اسماعيل عليكم
**********
ماشى المرة دى انا الى زعلانة بجد
********
بصى ياشفقة الموضوع من الاخر هو ان دى بيئة ودى بيئة تانية خالص فى ظروف مادية ومستويات اجتماعية يووووووو حاجات كتير بس مش ذنب الطفل الياى انو اتولد فى ظروف زى دى!!1
لا نى بالتالى كل مستوى ولية طريقة كلام مختلفة وتعليم مختلفة وحاجات كتير
المهم
المهم
بقى
الحقوا استخبوا منى علشان زعلان اوى بجد
عوووووووووووووووووو

Kiara يقول...

وحشتييييييييييييييييييييييييييني ياشفقتي بجد والله

بس موتيني من الضحك علي المقارنه


ههههههههههههههههههههههههه هو فعلا في فرق شاسع

**********
للى لو الاطفال عندنا شافوها بلاستيك او فى اللعب ......ممكن يجيلهم صرع والنص التانى يتوفى الى رحمة الله من الخضة

***********

احم احم

مش الاطفال بس


هتحوشيني ياشفقتي

dreem يقول...

لذيذة
اموت واعرف
ولا ياختى بلاش اموت اربى البنات احسن
نفسى اعرف بتقدحى زناد فكرك وبتجيبى الافكار دى منين
بجد لذيذة ودمك شربات يا اوختشى
سلاموز

جنّي يقول...

بصراحة جميلة جدا يا شفقة هانم ..

بس هما الولاد الياي بياكلو عيش بصراصير ليه ؟ طيب ما ياكلوا جاتوه او على الاقل توست ولا باتون ساليه !!

سلامي لاحسان بيك ..

سلام

شفـقــة و إحســــان يقول...

تيتو الحبيب
ميرسى يا تيتو على الزيارة بس يا ترى حنان ترك وعمرو واكد عاملين معاك ايه؟؟ ابقى سلملى عليهم اوى
كمان احنا خلصنا امتحانات ونجحنا وطلعنا من الاوائل.... فليه بقى مزيد من التفوق؟؟

شفـقــة و إحســــان يقول...

وومن
ليه بس الزعل يا قمر؟؟
قوليلى احسان زعلك ولا ايه وانا كنت اقطملك زمارة رقبته
ولا اقولك احنا هنيجى طالما فيها حق عرب لاننا مفلسين ومش هتخدى مننا لا حق عرب ولا اجانب
وبعدين ايه حكاية معدية دى؟؟
امال عايزانا نيجى ليه علشان نتعدى ونقعد نهرش لا بقولك ايه هنيجى بعد اما تخفى
وبلاش تعدى من جنب المدرسة الموبيوءه دى تانى بتروحوا تجبولنا بلاوى وترجعوا تقولوا زعلانين علشان ما بنزوركومش
تحياتى

شفـقــة و إحســــان يقول...

مسعدة
ربنا يسعدك كمان وكمان وتتجوزى مسعد ابن مبختة وتخلفى سعيد وسعادة ومسرور

شفـقــة و إحســــان يقول...

sorsara
اموت واعرف قالبة اسمك وكاتباه بالمشقلب ليه هو انتى بتلعبى يوجه؟؟
عموما هلوبندق وعين جمل وكل الكسرات
وسانور والهنا عليكى يا ام جردم
بعدين ارسيلك على لغة لحسن الكىبورد عندى هتهنج
ايه يا بنتى المحاضرة دى ما طبعا لازم يجيلك انفصام فى الشخصية والرعاش والاستبحس كمان
عموما انا مش فاضيلك هقعد اتفرج على عودة الشرير وعلاء الدين

شفـقــة و إحســــان يقول...

مقتطفات من حياة فتاة
اوائل ايه بقى وبتاع ايه؟؟
لما صفحة واحدة نمتى ادامها وشديتى اللحاف يبقى هتبقى اوائل ازاى احمدى ربنا لو طلعتى اواخر

شفـقــة و إحســــان يقول...

الحرامى
يشرفنا ويسعدنا ويحز فى انفسنا اننا نعلن ترحيبنا بالتاسيس الفظيع للعصابة بتاعتك ويسعدنا انضمامنا للعصابة
فنحن خبراء فى عالم الاجرام حاصلين على ثلاث شهادات مهببية فى عالم النشل والصياعة الاجرامية
بس هتدينا نسبة ولا هنقسم الغلة؟؟

شفـقــة و إحســــان يقول...

عاشقة وغلبانة
ومين سمعك...الواحد بقى ديب فريزر وتلاجة 14 قدم
يعنى برود تام وشبشب لحد ما تجيب زكام

شفـقــة و إحســــان يقول...

كيكى
انتى بتخوفينا...كمان استعنتى بولاد ابو اسماعيل؟؟؟
طيب ودول خرجوا من الزريبة ازاى؟؟
مع انى كنت ربطاهم بس ماشى
تعرفى لو حد هوب ناحيتنا هفجر المكان ولعلمك المكان كله محاصر وملىء بالالغام من نوعية بى بى اف اى ....وروث البهايم
ويا انا يا انتى يا كيكى عوووو
كانت معكم شفقة بخ

شفـقــة و إحســــان يقول...

مولان
الفرق شاسع علشان الطريق عريض
وبعدين ايه الجبن والرعب ده امال مولان وخدم وحشم
على فكرة انا نفسى مش بعرف احوش نفسى والجرى نص الجدعنة

شفـقــة و إحســــان يقول...

dreem
عايزة تعرفى بقدح ازاى....بسيطة اكتبى الوصفة
بجيب فكرى حبة صغيرين كده وعليهم شوية بهرات واحطهم فى الطاسة وعليهم حتة سمن وتقلبى يتقدح علطول وبالهنا والشفا
بقى عايزة تاخدى سر الطبخة اقصد الصنعة بعينك
سلابرتقال وسلا فراولة وسلا فاكهة كلها

شفـقــة و إحســــان يقول...

جنى
معلش يمكن ما يعرفوش الحاجات دى بتتباع فين؟؟
الا قولى ايه الساتون باليه دى؟؟
ده بيتاكل ولا بيرقصوا بيه على طراطيف صوابعهم؟؟

Lady E يقول...

بجد يا شفقة انا بعاني من الاطفال الياي دول ولاد الجيران تحسي كده انهم حاجة متشردة وانك عايزة ترميهم من الشباك بس برجع واقول العيب مش عليهم العيب على اللي رباهم او بمعنى اصح معرفش يربيهم

وبعدين بكار ده كميل وكنت بحب اشوفه وانا طفلة

بجد تسلم ايدك عالبوست الجميل جه في وقته

Ahmed Mohamed يقول...

انا زعلت اوي من طريقة كلام ووصف حضرتك للطفل الياي
وبعدين معلش كمان كلمة ياي دي بتتقال من الناس الهاي
كان افضل حضرتك تقولي
الطفل الي ظروفه ميقدرش يغيرها
يعمل ايه ولد اتولد في اي مكان شعبي بدون ذكر اسم المكان حتي
يعمل ايه يعني يغني يقول
لو كانو يسألونا قبل ما يولدونا عارفين كنا هانقول ايه
كنا نقول اولدونا في الذمالك او جردل ستي كنا نقول ربونا احسن تربيه الي هيه بتتكلف فلوس كتيره لوزم اللبس وخلافه وعايزين داده حتي لو مكنتوش لاقين تأكلونا
كنا نقول دخلونا مدارس اجنبي بفلوس
ملناش دعوه تسرقو تنهبو المهم لما نكبر
ميجيش حد يقول علينا يــــــــــاي

العين بصيره والايد قصيره
والكل نفسو يبقي ولادو أحسن ناس بس
غصب عن الطفل وعن الاهل وظروف بلدك كده

انا اسف ع الأطال

سمكه واحده يقول...

لا بصراحه
هو العيب في حجتين
اولا الماده طبعا
وثانيا في الاسره نفسها

لان ممكن بأقل التكلفه تربي كويس حسب امكانيتها بس مننكرش ان الماديات مهمه جدا وهي اللي بتخلي الواحد يعرف يرتب حياته يعني مفيش ضغط نفسي ولا عصبي وحجات كتير
ربنا يجعل اطفلنا كلها هاي

بس بردو انا زي ماقلت ممكن بأقل التكلفه لو الام والاب مثقفين يقدروا يعلموا اولادهم ويبقوا راقين
تحياتي

نعكشة يقول...

يا سلام

يعني عشان احنا العربي عندنا فاشل يبقى اولادنا العربي بتاعهم يبقى اكثر فشلا

اية النظرية العجيبة دية

اسلوب حضرتك ميقنعش واحد في اولي حضانة

وبعدين مين عمرة قا ان الزعيق و الصويت يربي طفل نفسيته سليمة
طبعاً غلط

اختلف معكما

سلام عليكما

شفـقــة و إحســــان يقول...

lady e
انا لو منك ابلغ على ولاد الجيران
وحشتينى اوى انتى مختفية فين يا بنتى؟؟
وبعدين بطلى تتفرجى على بكار يا طفلة وعايزة تكبر
طيب والنبى تكبرى ازاى بالشكل ده؟؟

شفـقــة و إحســــان يقول...

ahmed 3alam
منور يا استاذ احمد ....ومش معقول اول زيارة كده تزعل منا
لا احنا منقدرش على زعل حد
ولا يهمك المرة اللى جاية هغير كلمة الياى واخليها اللى ظروفه وحشة
ها كويس كده؟؟
وبعدين حضرتك شكلك متاثر بثلاثى اضواء المسرح اوى
عموما صحيح الاطفال دول مالهمش ذنب لكن فى ناس كتير بتتولد فى بيئة العن منهم وبيطلعوا احسن ناس
اوعى تزعل ونتمنى صداقتك

شفـقــة و إحســــان يقول...

سمكة واحدة
ايه يا سمكتى العظمة دى ؟؟
انا لو منك اعمل دراسة جدوى
وحشتينى يا سمكتى البحر واخدك مننا ولا ايه؟؟
بس كلام فى الجون

شفـقــة و إحســــان يقول...

نعكشة
ايه يا نعكوشتى مالك متحاملة اوى كده ليه؟؟
انا محبكيش تزعلى ابدا وما تنسيش اننا بنرد بطريقة ساخرة
ومين قال فعلا ان الصويت والصراخ بيطلع طفل طبيعى ؟؟
طبعا كلامك صح احنا بس بنرد بطريقة ساخرة ليس الا
عموما الاختلاف فى الراى لا يفسد للود نعكشة
ههههههههههههههه
افرديها بقى يا شيخة
سلام عليكم

kochia يقول...

هم دول اطفال ؟؟؟
انا بحب الطفل يكون كله طفولة
ابتسامته .. كلامه .. تصرفاته ..
مش طفل كرتون زي اللي في التلفزيون كدة
الاتنين مش عاوزاهم بصراحة

الباحثة عن السعادة يقول...

لكل صديق يطلع على مدونة طبيب بلا سماعة أرجو أن تقنعوه بعدم غلق المدونة

تقبلوا تحياتى
الباحثة عن السعادة

Unknown يقول...

شوشو حبيبتى تاخدى جرعة اكتئاب من بتاعتى اللى هى من عينة مش لاقيين ناكل هنربى منين مسحولين يبقى هنجيب الرقى من انهى حتة متبهدلين ومتشردين هنتعلم نربى ازاى؟؟؟؟
مش عايزة اكتئاب النهاردة؟؟؟
طيب خلاص مش هديكى اكتئاب يا شوشو انتى تؤمرى بس طريقتك واسلوبك يهلكوا من الضحك اى نعم ضحك من الهم بس اهو ضحك وعجبتنى اوى جملة يخرب بيت اللى جابك ابداع ابداع يعنى مش هزار

شفـقــة و إحســــان يقول...

kochia
دول اتفال مع اختلاف الحرف الاول طبعا
وكمان وحياتك مش كرتون وبس لا وبلاستيك وفيبر
بس ايه الرومانسية دى ابتسامته وكلامه تصرفاته
احم احم احنا بنتكلم على طفل يا هانم مش شاب مراهق
احترسى نفسك
ههههههه
وحشتينا اوى

شفـقــة و إحســــان يقول...

الباحثة عن السعادة
علم وجارى التنفيذ....حول

شفـقــة و إحســــان يقول...

enjy
اكتئاب وجرعة وعينة
انتى محجوزة فى مستشفى الامراض العقلية ولا ايه يا انوج
جبتيلى اكتوئاب
بس ايه رايك فى الابداع فنانة سيرياليزمية
مش عارفة يعنى ايه بس اهى ماشية مع الاكتئاب وخلاص

yoyo يقول...

و الله وحشتنى جدا يا شفقة

أخبارك ايه يا جميلة و الا ستاذ احسان بك عامل ايه ؟؟

انت موتنى من الضحك والله

رغم ان اللى انت قولتيه دا واقعى جدا
يا حبيبتى انا عايشة مع الاطفال الياى دول مهنة التدريس بها أحلى تعبيرات والفاظ والعيال مشاء الله عندهم ذكاء مش اقولك بقى هههههههههههه ابقى لسه مفهمهم وخلاص فهمتهوا و نحل ايوه يا مس و الاقى مواهب يا اختى اى اذ واى ار العيال هتنسينى الانجليزى والله ههههههههههههه

والله الطفل احنا اللى نقدر نشكله حسب ظروفنا و البيئة اللى احنا عايشين فيها ولعلمك فى اطفال كويسة جدا رغم ان اهاليهم من مش ياى اوى يعنى

مش تغيبوا علينا كدا عشان بجد بتوحشنا اوى
تحياتى
يويو

بسبوسة يقول...

الطفل الهاى..والطفل الياى
لا مقارنة حلوة

بنت مصريه يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يخرب عقلك يا شفقه
تصدقى رصد واقعى جدا للحقد الطبقى
اصدى لطبقات المجتمع هههههههههههههه

انا فطست م الضحك
سلميلى على احسان وتعالو زورونى

دعاء مواجهات يقول...

هههههههههههههههههههههههههههههه

اية يابنتى خفة لادم دى كلها

بس تصدقى فية حاجات من كلامك موجودة فعلا وبنشوفها

وبعدين مبقاش اصلا فية حاجة اسمها اطفال ف زماننا ده يابنتى

وحشتيينى اوى

سلام

ahmed_k يقول...

في تعليق لي فوق يا ترى شفتوه ولا لأ

بنت الغربة يقول...

شفقه هانم واحسان بيه
اولا انا معترضه على رايكم فى الاطفال
لان ولادى ممكن تعتبرهم من الاطفال الهاى لانهم فى مدارس لغات طول عمرهم ومدرسينهم مابيتكلموش عربى - ونص الكلاس اجانب -يعنى ظول النهار مابيكلموش عربى تقريبا
ده طبعا غير النت والنادى و.....الخ
بس مش معنى كده انهم محصلوش او انهم مريحنى وبيعملوا الهوم ورك فى معاده
او مابيلقطوش الفاظ سوقيه جدا بالانجليزى
وحركات من اياها الى تفرسك
وانا رفضت ان اجيب شغاله علشان مايدلعوش اكتر من كده - وباحاول على قد ماقدر انهم مايتعلموش العادات الغربيه البعيده عن الدين
لان ببساطه ابنى الى ماكملش 11 سنه عايز يقى عنده girle friend ومش عارف يختار مين من كتر البنات الحلوة الى عنده
لان منظره بقى وحش خالص قدام صحابه لانه لغاية دلوقتى مش مصاحب
صدقونى مش كل الاطفال الى ظروفها كويسه يبقوا كويسين
ولا كل الاطفال الى ظروفها وحشه وحشين
وتحياتى ليكم

Tamer Diab يقول...

ههههههههههههههههههههههه
بجد جميلة اوي
ومعلش أني قدييييييم ولسه داخل معلق أنا اصلا اول مره ادخل مدونتك وأساسا انا مدوناتي مستجد فاعزروني
بس أنتي نسيتي تقولي حاجة عند الهاي وعند الياي برضه
المدرس أو المدرسة
تلاقي المدرس الهاي يطلع من جيبة هدية للي هيجاوب علي السؤال بتاعه وأول ما حد يجاوب يخلي الفصل كله ستاند اب وكليمبينج ويديله هديته والواد الهاي طبعا وشه يحمر من الكسوف ويوقله ثانكس يا مستر
أما بقي الواد الياي
المدرس يدخل يسكت في السبعين واحد محدش معبر أمه طبعا يبتدي بقي يسب ويلعن سلسفين ابوهم كلهم
أقعد يا ابن الغساله منك ليه
علي شوية شتيمة من الي قلبك يحبهم من نوعية يا الي ابوك زبال وأمك رقاصة أسكت يالي تعرفش حاجة عن التربية أتلم
وهكذا
ويا سيدي بقي لما يسأل سؤال ومحدش يجاوب
الجلدة بتاعت باب الأوتوبيس تطلع وهاتك يا زرقان ايدين العيال
ولو جاوب يبقي ابن كلب بياخد درس بره
واحتمال يجبله أمر أعتقال لو مخدش عنده ويبتيدي يحطك الواد في دماغه عشان ميحلش تاني ولا ينجح ولا ينفع من اساسه
أنا اصلي بتكلم بقلب جامد لأن أنا نصي هاي ونصي ياي
يعني أبتدائي كنت هاي
وبعدها بقيت ياااااااااااااااي

мαησηα يقول...

ههههههههههه الله يسعدك ويكرمك ياشفقة

بجد تسلم الايادى

بس ع فكرة انتى بوصفك لطفل الشارع رغم انى بشوفه عادى يعنى خلتينى عايزة ارجع واعيط ارجع طبعا مفروغ منها

اعيط لان بحس ان الطفل ده مظلوم ومن حقه انه يكون زى غيره ويمكن لو عنده امكانيات كان يبقى افضل

والمشكلة انه مظلوم من اهله لان الجهل اللى عندهم ومش شرط يكون جهل بمعنى الامية لأ جهل فكرى يعنى ازاى اصلا يدخل على جواز وهو اصلا مش هيعرف يعيش ولاده فى بيئه كويسة .. ربنا يرحمهم بجد ويلاقوا حد يهتم بيهم ازاى معرفش بس ربنا قادر ع كل شئ

سلامى لاحسان بك

وكل سنة وانتوا طيبين وبخير يارب قولى اميييييييييين

أحلى حياة يقول...

السلام عليكم ورحمة الله وبركاته

ياساتر يارب ... ربنا يسترها علينا وعلى ولايانا يااختشي
يلا باي
:D:D

عشان نبقى جمعنا بين النقيضين بردو
:D