الخميس، 15 أكتوبر 2009

Back To Blogger

بعد السلام عليكم ... وازيكم ... والعواف
وكل الكلام الحلو ده


عايز أقولكوا ان شفشوقتي اتسخطت
لأ مش اتسخطت قرد



لا والنبي ماهي ناقصة
هههههههههه

لأ انا أقصد انها رجعت يجي عشرين تلاتين خمسين سنة ورا كده
وبقت عايشة في دور الطفلة


قبل ما تكتب البوست الأخراني بأسبوع كده
ظهر عليها أعراض المرض
وماتخافوش ... ولا تلبسوا كمامات
المرض ده مابيعديش .. هوا بيطلع في القفا عدل



الهانم نزلت يوم إشترت بلوزة وردي وجيب رصاصي
قلت ألوانها وهيا حرة فيها

تاني يوم نزلت إشترت صندل اسود من أبو أبزيم
قلت ومالو يمكن تحط فرده في بقها وتسكت


بعدها راحت اشترت شنطة Back bag
قلت يارب تكون هتلم هدومها وترحل


راحت مكملة بشوية كراريس على مقلمة بمستلزماتها
وقامت سانة أول قلم رصاص وكتبتلكوا البوست اللي فات


ساعتها بس أخدت بالي
بيتهيألي انتوا كمان خدتوا بالكوا !!!

البوست الأخراني بتاع شفقة
اللي هوا "عدنا بعد الفاصل"

ماخدتوش بالكم انها كتبته اول يوم في الدراسة ؟؟
وتحديدا يوم 4 أكتوبر

والبوست اللي قبله "وحشتونا موووووووووووت"
كان في نهاية الامتحانات وبداية الأجازات


واضح انها كانت واخدة أجازة دراسية زي التلامذة

آه أمال إيه

وكمان رسي عليها التأجيل بتاع أنفلونزا الخنازير



طبعا أنا ماصدقت لقيت فرصة
واستلمتها تريقة وكرهتها في نفسها
يعني انت مالقيتيش غير يوم دخول المدارس ؟؟
مش واخدة بالك إن آخر بوست كان مع بداية الأجازات ؟؟
الناس تقول عليكي ايه دلوقتي ؟؟ عيلة بمريلة ؟؟
وآآآل ماجيستير آآآل

طب خدي الإعدادية الأول

ههههههههههه


بس بيني وبينكم
أنا بعد ما اتريقت عليها لقيت عندها حق

ماهو برضو Blogger زي المدرسة
زحمة ومليان مدونين
فيهم الطيبين الجدعان اللي تحس معاهم انك وسط اخواتك
وفيهم ناس غاويين حوارات وتلسين وتستعيذ بالله منهم زي الشياطين
بس بالحق وللأمانة .. الأكتر هما الكويسين



حقيقي Blogger ده مدرسة
إتعلمنا فيها إزاي نكتب ونعبر عن اللي حاسينه
إتعلمنا إزاي نقرا لكل رأي شماله ويمينه
إتعلمنا إزاي نعمل خير ونحب اللي عاملينه
إتعلمنا نحب بعض ونخاف على اللي حابينه

فعلا إحنا رجعنا لمدرسة Blogger مع أول أيام الدراسة
بعد أجازة صيف طويلة
ومليانة أحداث مش ظريفة
رجعنا وكلنا إصرار وأمل مانغيبش عنها تاني
وحشتنا الدراسة فيها
ووحشونا أوي زمايلنا المدونين
وإن شاء الله ننتظم في الدراسة
وماتاخدوناش غياب تاني

من فصـل تالتة تاني
إحســــان التلمـوووذ

هناك 64 تعليقًا:

Unknown يقول...

بما انكم تلاميذ
فأنا خلاص مسكت العصايا وكمان طباشير
وهبتدى اشتغل
افتح الكراسات انت وهى واستعدوا للتقييم
انتم بجد من قلائل الناس اللى الواحد ارتاح لهم فى عالم التدوين وكمان حابب جدا انه يتواصل معهم باستمرار
لانكم ناس 9.5على 10
مش هقول 10على 10 عشان متتغروش
***********
فعلا بلوجر مدرسة الواحد فيها بيتعمل كتير جدا وكمان بيتعرف على مختلف العقليات والانماط

سلامى لشفقة روح قلبى
والاخ المناضل سمبا

باااى احسان بك

Unknown يقول...

تصدقوا انا اول تعليق
ازغرط
هههههههههههه

Unknown يقول...

وتالت كمان
عشان تبقى المراكز الامامية كلها لى
ههههههههههههههه
اول وتانى وتالت
وانا وانت
وووووووووو يا جدع
ههههههههههههه

محمد حمدي يقول...

اولا الف حمد لله على السلامه .. بجد البلوجسفير نور

ثانيا انا رايى ان مش بس بلوجر مدرسه .. الحياه كلها مدرسه .. الايام الحلوه ايام اجازه بتخلص بسرعه والايام الوحشه ايام دراسه طويله كئيبه .. وادينا بنتعلم كل يوم

من تانى بجد حمد لله على سلامتكم وعاوزين بوست يرد على كل الكلام الجامد اللى مكتوب هنا

فاتيما يقول...

قبل أى حاجة
انا عاوزة اقوّم البت اللى قاعدة جنبى عشان بتاخد القلم الرصاص بتاعى و تعضعض فى الأستيكة ....
و الواد اللى ورايا كل شوية يعطس
و الشباك بتاع الفصل مقفول و شيكلنا هيجلينا أيفنونزا على راى يسوفى وهوه صغير ....
الف حمدلله على سلامكتو
نورتوا البلوج سبوت كلاته
و فعلا عندك حق
البلوجر مدرسة
تشبه مدرسة الحياة كلها زى ما بيقول محمد حمدى و فيها كل صنف و لون من البشر ...
إنتظموا بقى فى الحضور و لاّ هتتلككوا بالأينفونزا اللى شغالة الأيام دى و تدوها طناش من تانى ؟؟

خالد كامل يقول...

بجد التدوين ده من أجمل الحاجات اللة حصلتلى فى حياتى
كفاية انى اتعرفت عليكوا من خلاله و الله

تحياتى

همس الاحباب يقول...

حمدلله على السلامة
ونورت البلوج سبوت وجيرانه
بس لنا بصراحة بعد ما قريت بوست فاصل ونعود بدات اقلق وانا اقول المدام بتحلف بالطلاق ليه وتقولى رجلى على رجلك فى اى لقاء تروحه
دلوقتى عرفت سر شويبس
ههههههههههه
ربنا يكرمك ويسعدك وتحقق اللى فى بالك
وسلامنا للست شفقة هانم بدل ما تقر علينا
ربنا يجعل كلامنا خفيف عليها

م/ محمد صالح يقول...

اولا انا بشكرك على مرورك الكريم اللى كان ( بالصدفة ) واتمنى انه يتكرر
وثانيا حمد الله على السلامة بعد الاجازة وياعم خف على شفيقة شوية وخليها تعيش اشمها ولا انت غيران منها ههههههههه
بس والله انت عندك حق فى ان بلوجر ده مدرسة اتعلمنا فيها ازاى نعبر عن مشاعر واحاسيس كانت مدفونة جونا
ودايما بيكون اخر كلامى سلام
أمضاء
( قرينك )

حـــــدوتـــــة يقول...

السلام عليكم

حمد الله على السلامة
الحياه كلها على بعض مدرسة
المهم نتعلم وننفذ اللى بنتعلمه

سلالالالالالالالالالالالالالالالالالام

غير معرف يقول...

عود احمد .... ومنورين بلوج سبوت كلها


واعتقد فعلا ان التدوين مدرسه .... بس مدرسه لا تتبع نظم التربيه والتعليم السخيفه بتاعتنا .... والا هنطلع فاشلين كلنا :D

تحياتي

yoyo يقول...

يا مساء السكر و العسل كمان

حمد لله على السلامة
البلوجر كله نور والله
يارب دايما معانا
مممممم
مدرسة هو انا مش مس ولا ايه
يالا يا احسان بك وانتى يا شفقة هانم
هاتوا الكراسة و القلم واكتبوا يالا ورايا
A B C D
حسن خطك يا بنى مش ينفع كدا
ههههههههههههه

حمد لله على سلامتكم مرة تانية
سلامى لست الكل شفقة هانم
فى انتظار جديدكم

دمتم بالف خير وسعادة
تحياتى
يويو

د. إيمان مكاوي يقول...

حمدا لله على السلامة
بجد التدوين بيكون ناقص كتير من غيركم ...بلاش غياب تاني
تحياتي

اقصوصه يقول...

looooooool

مبروووووك

الحين عرفنا سر غيابك الطويل

وظهروكم المفاجئ

ع العموم

تمنياتنا بالتوفيق والنجاح

فعلا بلوجر هالم جميل

تعلمنا منه العديد من

الامور المفيده والجميله :)

الشجرة الأم يقول...

حدوته حلوة .. وطعمها لذيذ أوي يا بابا ..

عاشقه الرومانسيه يقول...

حمد الله على السلامه
يلا تعالوا انا حاجزه لكم التخته الاولى فى النص
علشان تبقوا شايفين كل حاجه

أمل حمدي يقول...
أزال المؤلف هذا التعليق.
أمل حمدي يقول...

مد الله على السلامة يا احسان بيه

منور البلوجر والله

عجبني قوي كلامك في آخر البوست والظاهر انك تلموووذ مجتهد

ربنا يصلح حالك انت وشفشوقة هانم حبيبتي

micheal يقول...

هههههههههه..أنتوا بجد تحفة
مدونة لذيذة ودايما بحب أخشها عشان الترفيه والإمتاع
:)
ربنا يحمينا من شر الخنزرة وبلاويها
وبالتوفيق في الدراسة بإذن الله يا بتوع تالتة تاني
:))
تحياتي

Mafrousa يقول...

هههههههههههههههه
انت بقيت فى سنة تالتة
يااااه عجزت
انا يا خويا لسة فى كي جي 2
ههههههههههههه
احسن من سنة تانية
حمدا لله على سلامتكم و يارب تكون اجازة كويسة
مافيهاش محاكم ولا دعاوى
ههههههههههههه
بس تصدق يا احسان بيك
انا فى الصيف مش كان ليا مزاج ادخل خااالص
يمكن من الحر و مروحة الكومبريسور مش جايبة هوا كفاية
ههههههههههههه
المهم عودا حميدا بعد الاجازة و يارب تكونوا فرش
و النبي يا شيخ امانة عليك ابقى حط لشفقة كام سانتدويتش فى الشنطة
لأحسن باين عليها هفتانة
هههههههههههههههه
تحياتي ليكو انتو الاتنين
و نبقى نتقابل فى الفسحة
هههههههههههههههه

شوية قهوة يقول...

حمدالله على السلامة والله وحشتونا
بحد الدنيا كانت ظلمة من غيركم
نورتوا المدونات
ويا رب تفضلوا على طول معانا ومتغبوش تاني ابدا

Lady E يقول...

حقيقي Blogger ده مدرسة
إتعلمنا فيها إزاي نكتب ونعبر عن اللي حاسينه
إتعلمنا إزاي نقرا لكل رأي شماله ويمينه
إتعلمنا إزاي نعمل خير ونحب اللي عاملينه
إتعلمنا نحب بعض ونخاف على اللي حابينه

يعني أنا دلوقتي في مدرسة وكلية في نفس ذات الوقت عاااااااااا

welcome back وسلامي لشفشوقة

شفـقــة و إحســــان يقول...

نهر الحب
انتى عملتى فيها ابلة الناظرة ولا ايه؟؟
بقولك ايه والنبى يا شيخة لتجيبى واسطة وتتنقلى المدرسة اللى فيها شفقة وعايزك تمديها كل يوم ورينا الهمة بقى
وليكى الحلاوة يا نهر

شفـقــة و إحســــان يقول...

نهر الحب
احنا هنتدلع ولا ايه عايزين احتشام زغاريط ايه وبتاع ايه انتى هتشتغلى ابلة الناظرة ولا مع فرقة

شفـقــة و إحســــان يقول...

نهر الحب
لا ده انتى فعلا غيرتى النشاط
بس هو مين ده الجدع يا نهر ؟؟

شفـقــة و إحســــان يقول...

Mohamed Hamdy
الله يسلمك بس ايه حكاية التوكسفين دى؟؟
انا مش ناوى انتحر حالتى لسه موصلتش للدرجة دى مع شفقة
وبعدين ايه حكاية الحياة كلها مدرسة يا عم انا خلصت كى جى تو من زمان
وايه حكاية كتيبة دى كمان لعلمك انا ساقط كيك يعنى لا عمرى دخلت جيش ولا كتايب

شفـقــة و إحســــان يقول...

فاتيما
ايه ده يا فاتيما ايه العيال اللى بقيتى بتلعبى معاهم دول
وبعدين من فضلك احنا مش ناقصين عطس وكلام من ده واحنا ناقصين انفلونزا الخنازير مش كفاية شفقة عليا
وبعدين ايه الماس اللى انتى عملتيه ده؟؟
قال اسبوت قال ونورت ايه سبوت دى كما ده على اساس انى كهربائى وبعلق لمبات فى المدونة
وعموما ننتظم ما ننتظمش الغياب مرفوع

شفـقــة و إحســــان يقول...

مهيج الجماهير
انا معاك ان التدوين من اجمل الحاجات لكن انك اتعرفت علينا دى انا اشك فيها بدبوس اد كدددددددددددددددددددددددددددددة

شفـقــة و إحســــان يقول...

همس الاحباب
انت كمان بتقول سبوت هو ايه الحكاية هى شغلة الكهربائى دى انتشرت فى الوسط ولا ايه؟؟
اما بخصوص حلفان المدام فده لان العصمة فى ايديها وويلتاه
اما حكاية رجلى على رجلك دى ده لان رجلى بتوجعنى ونفسى احملها على حد تانى فملقتش اجدع منك يا ابو الاهماس
وسر شويبس هو موت حسن عابدين يا فالح
اما عن حرمنا المصون فهى بتوصلك السلام مع اجمل قراية صغيرة كده
اما بخصوص كلامنا الخفيف فلو جيت المدونة تانى ابقى هات معاك دواء هضم

شفـقــة و إحســــان يقول...

م محمد صالح
معلش يا سيدى اعمل ايه الاتوبيس هو اللى نزلنى عندك
وبعدين هو انتى شايفنى خانق شفقة وبموتها ما انا سايبها بتعيش حرة طليقة وكابسة على انفاسى
اما بخصوص اشمها دى فانا عندى زكام وشكلها كده انفلونزا الخنازير واتعديت من شفقة
بس انت ايه حكايتك سيبها تعيش مدفونة ايه الترب اللى انت عايشة فيها دى يا عم

شفـقــة و إحســــان يقول...

حدوتة
وعليكم السلام
بجد مش ناقص الا العصايا وتمدينا وفين يوجعك
وعموما لو عايزانا نتعلم وننفذ ابقى تعالى ادينا درس خصوصى

شفـقــة و إحســــان يقول...

فتاة من الصعيد
وايه اخبار الصعيد وناس الصعيد؟؟ والفطير المشلتت والمنين ؟؟
وبعدين قوليلى عود احسان مين احمد ده ؟
ولعلمك سواء اتبعنا نظم قلة التربية وقلة التعليم او التدوين فاخواتك فاشلين فاشلين مش بينفع معاهم اى حاجة عقلهم زلط

شفـقــة و إحســــان يقول...

yoyo
ايه يا بنتى التلزيق ده الدبان اتلم على المدونة
روحى كلى بعيد عننا قال مللسة قال انتى يا بنتى تروحى تشتغلى فى محل فطاطرى انفعلك
وقال بتقوليلى حسن خطك....طيب كان من باب اولى تقولى حسن حظك بس اظاهر النقطة جت غلط وادبست بسسببها فى شفقة وكانت حظى
يا باى

شفـقــة و إحســــان يقول...

د ايمان مكاوى
لما يكون التدوين ناقص من غيرنا ابقوا زودوا شوية ملح وهو يتظبط ويبقى تمام
اما بخصوص الغياب فهو مرفوع بسبب انفلونزا الخنازير يعنى براحتنا
وسلامى للحافى

شفـقــة و إحســــان يقول...

اقصوصة
ايه يا اقصوصة خضتينى هو انا العوووووو ولا ايه
عمالة تقولى سر غيابك وظهروك المفاجىء حسستينى انى شبح
وايه حكاية بلوجر هانم دى كمان حتى البلوجر طلعت مونث طيب على الطرب بالتلاتة ما انا مدون مش كفاية شفقة عليا
كل مونث كده مفيش مذكر خالص

شفـقــة و إحســــان يقول...

الشجرة الام
طعمها حلو ولذيذ! هو انا بعزم عليكى بصينية مكونة بالبشاميل؟؟

شفـقــة و إحســــان يقول...

عاشقة الرومانسية
لا لو بتعزينا صحيح احجزلنا التختة الاولى لحسن اخواتك شيش بيش مش شيش طاووق

شفـقــة و إحســــان يقول...

ماما امولة
اهلا بيكى ده حضرتك اللى منورة البلوجر كلها
بس لعلمك يا ماما انا تلممممموذ فاشل خالص وحتاج تقوية وشكلى كده هاجى بورسعيد وابقى تلموذ عندك فى الفصل يمكن افلح

شفـقــة و إحســــان يقول...

micheal
ايه يا عم الترفية والامتاع حسستنى انك داخل سينما ريفولى
واذا كنت عايز ربنا يحميك من الخنزرة يبقى متدخلش هنا تانى لحسن شفقة عندها انفلونزا الخنازير وناوية تنشرها

غير معرف يقول...

هههههههههههههههههههه

مدونه تحفه

تنم على جواز سعيييييد جدااااااا

على فكره انا مدرسه عربى بعد سنه ان شاء الله

وبما انك تلموووووووووذ

انا ممكن اديلك انت وشفقه درس معنديش مانع خالص

هههههههههههههههههههههه

حنين

------ يقول...

فعلا البلوج دا حاجة جميلة الواحد اتعلم فيها كتير

وعبر فيها عن نفسوا زكتب كل حاجة هو نفسوا فيها

وبجد سعيدة بزياتك ليا


وهكون اسعد لما تنورينا فى طيور الجنة
http://teoralgana.blogspot.com/

شفـقــة و إحســــان يقول...

واحدة مفروسة
محاكم ايه ودعاوى ايه انتى اشتغلتى محامية ولا ايه ربنا يجعل كلامنا خفيف عليهم وتقيل على شفقة
واحب اطمنك بانى بعمل كل يوم ساندوتشات فول وطعمية ومفتقة لما شفقة بقت اد الفيل
وربنا يستر وما يحجزوهاش فى جنينة الحيوانات

شفـقــة و إحســــان يقول...

كلام من قلبى
طبعا الدنيا كانت مضلمة لاننا احنا اللى كنا فاصلين الكهرباء عن المدونات
بينى وبينك طمعنا فى الكابلات

شفـقــة و إحســــان يقول...

lady e
احنا هنغش ولا ايه؟
لا مفيناش من كده والا هقدم فيكى بلاغ
وبلاش فشر بقى ايه كاية مدرسة وكلية مع بعض دى شكلها وسعت منك

شفـقــة و إحســــان يقول...

حنين
ايه بقى النق والقر ده هو احنا ناقصين
ده احنا مش طايقين بعض وبنقطع فى فروة بعض
عموما انا هابقى ابعتلك شفقة لانها عندها كساح فى اللغة العربية

شفـقــة و إحســــان يقول...

همسات على ضوء القمر
ونحن اسعد بزيارتك ويارب تزورينا دايما وياريت لو تاخدينا معاكى القمر نغير جو يومين اصل هنا حر اوى

المـــفـــــــقــــــــوعـــــة مــرارتـهــا يقول...

حمد الله علي سلامتك الاول وبالنجاح ياشفقة

ثانى هام بقي انا جيت هنا امبارح وفرحت اوي لانى شفتكم تاني
بعد غيبة طويلة
سحر غريب

المـــفـــــــقــــــــوعـــــة مــرارتـهــا يقول...

حمد الله علي سلامتك الاول وبالنجاح ياشفقة

ثانى هام بقي انا جيت هنا امبارح وفرحت اوي لانى شفتكم تاني
بعد غيبة طويلة
سحر غريب

رحلتنا في الحياة يقول...

الف حمدلله على السلامة
التدوين ده غيرنى كتير وغير شخصيتى واتعلمت حاجات كتير يمكن سنين الدراسة متعلمتش نصها

Humman being يقول...

حمد لله على السلامة يا شفشق انت وسونسون بلوج رائع ومتغيبوش تانى

mimi يقول...

الله عليك يا إحسان بيه

والله المدونة دي سكر خالص

أنا لقيتك كاتب عني كلمتي

" فيهم الطيبين الجدعان اللي تحس معاهم انك وسط اخواتك "

هههههههههههه

تواضع تواضع يعني



تحياتي البلوجرية

صبرني يارب يقول...

اولا انا باحب الاغنيه دي اوي

ثانيا

انت لسه عايش بعد البوست الى انت كتبته والصوره الى انت حطيتها دي ؟؟

يا نهار ابيض

يا شفشوقتي يا حبيبتى انا عايزااااااكي فى موضوع مهم

اه عايزاكي تربي ضوافرك وتستني الدعوه بتاعة جمعية المرأه المتوحشه

قشطه كده ؟

البلوجر ده انا عرفت فيه ومن خلاله احلى ناس وشوفت اعلى فكر وكتبت احلى كلام كتبته

ودايما باشكر ربنا وباشكركم جميعا على وجودكم فى حياتي

بيطرية ومش بايدى يقول...

يا حالولى يا حالولى
انا التعليق 52 فى عصابة بابا و ماما
التلامذة
قولولى بقى قاعدين ف التختة الاولى ولا التانية وبتجاوبوا كويس ف الحصة
هاروح اسال عليكم المس
وعندى ليكو الشكلايتة

بجد بجد فرحانة اوى انى اتعرفت عليكم

وواضح من القناة الفضحاية انكم بتموتوا فى بعض وبتقطعوا شعور بعض
من الحب مش كده :))))))))

اقول سلام بقى

شربات يقول...

ازيك شفقة مشكورة على سؤالك عليا



مفيش حاجة لما الوحدة ترجع الايام زمان الجميلة

حتى من نسى ماضية اية ههههه

تحياتى

شفـقــة و إحســــان يقول...

المفقوع مرارتها
والله الواحد مفقوع اكتر منك ...بس هنعمل ايه اهى عيشة والسلام
وايه حكاية فرحت بيكم بعد غيبة طويلة حسستينى اننا مبنظهرش الا فى رمضان
وعموما ما تشوفيش وحش خاصة شفقة يع ايخيه

شفـقــة و إحســــان يقول...

ايوشة
كده برضوا يا ايوشة التدوين يغيرك ما كناش نعرف انك هتبقى كده ايوشة سخصية
وبعدين هو انتى ساكنة فى الدراسة ؟؟
طيب بالله عليكى لتبقى تقرلنا الفاتحة فى الحسين على الظالم والمفترى والقادر وطبعا انتى عارفة هو مين

شفـقــة و إحســــان يقول...

Shaimaa
تصدقى بايه يا شيخة اول مرة اسمع حد بيدلعنى كده اللى ما جت من شفشق بس تعرفى كلمة سونسون دى نزلت على ودنى حرقتها اصلها فكرتنى بالينسون

شفـقــة و إحســــان يقول...

mimi
بجد سكر؟؟
اظاهر ان طعمها عجبك بس والنبى ما تسفى منها كتير لحسن السكر غلى خالص
وكمان علشان متلميش علينا النمل

شفـقــة و إحســــان يقول...

صبرنى يارب
اولا الاغنية مش دى دى بتاع الشاب خالد دى اغنية يا سلام على قرفى وقرفك
ثانيا ايه شغل بتوع اللبن دول ابيض وقشطة احنا ناقصين تلزيق
ويا سلام سلام عايزة شفشق تربى ضوافرها ما كفاية مربيانى انا
وكمان تنضم لجمعية المراة المتوحشة ... يا اما حصلنا الرعب والعض يا ستى الله لا يسيئك سيبها فى حالها كفاية جنينة الحيوانات اللى انا عايش فيها

الفراشه الحائره يقول...

دردشة مش اكتر تدوينه جديده على مدونتى يا رب تعجبكم http://frasha7a2ra.blogspot.com/

تايه في وسط البلد يقول...

الباشا الكبير

انت جبت المقلمة والمنقلة والمثلث والبرجل ولا لسه؟

أبلة الحساب فظيعة ولسه لاحقين واحد زميلنا من تحت ايدها بالضالين !!!

نورتني في المدونة بزيارتك يا باشا واحب تنوروني علي طول

الحق هات المنقلة بقي!!

momken يقول...

حمدالله على السلامه

وعوداً حميداً


عندك حق بلوجر بقى كل حياتنا تقريبا

احتلال كامل من بلوجر واعوانه

جوجل وهوت ميل
وفيس بوك


احنا ضعنا يا جماعه

حد فاكر الباس ورد بتاعى



تحياتى

------ يقول...

ازيك

انا قولت اطمن كدا واسلم ههه

يارب تكونى بخير

كيكى عوووووو يقول...

يااااااااااه
وحشتونى
ايه الى جابكم اقصد
حمد الله ع السلامه
كيفنى اوى الكلمتان بتوع بلوجر دوله!!
الاهم انكوا متغبوش تانى عمتا جوبات الانذار وصلت بتاعت بلوجر لولى الامر!!

شاب فقرى يقول...

احسان بيه


الله الله الله الله


الف حمدا لله عالسلامة الى البلوجر والتدوين مرة أخرى

متابعين

ويارب مش تغيب عننا تانى

شاب فقرى :)