الخميس، 24 ديسمبر، 2009

الراجل ده هيجننى

اسكتوا بقى شفتوا سونة الخاين بيعمل فيا ايه؟؟
فى الملاك البرىء ....النسمة الرقيقة .... الجمال الفتان

احم احم اللى هو انا طبعا حد عنده اعتراض؟؟
المهم مقولكوش الراجل بقال
ه كام يوم متغير ولونه مخطوف
ومش عارفة مين الحرامى اللى خطفه
اقصد الحرامية بنت النشالة اللى
نشنت عليه وهو يا حسرة جيوبه فاضية
اخ يا نارى لو كنت اعرفها كنت قرقشت طبلة ودنه
ا لحد مسيبتها على العضم
طبعا مش فاهمين حاجة وتلاقيكوا انتن"نون النسوة" كمان نايمين فى العسل نوم
اقصد فى بلاص العسل كله ولا دريانين بيلى بيحصل
من وراكم اه مهو احنا نسمع كلمة حلوة م
ن هنا نرخرخ طبلة ودننا من هنا
وقلبنا يهفهف ورجلينا تخبط فى بعضها
وننسى عمايلهم اللى زى وشهم
قال ايه كل ما اكلمه الاقيه مسهم وهايمان وبيحلم وهو صاحى
وعايش فى دنيا الخيال ولا عبد الحليم فى زمانه
وفيلم المخدة الفاضية اللى جابتلنا لوحة فى الرقبة والغضروف
وقال ايه يرد عليا بعد عشرومية ساعة وهو بيتنهد وبياخد نفس عميق
ولا اللى بياخد غطس فى طشت م
ية والنبى لاحدفك فيه واغرقك يا احسان
وقال ايه ليل ونهار بيبحلق فيا ولا اللى شايف عزرائيل
وكل شوية يبص للسقف كانه قاعد مستنى نجمة تنزله من فوق
الهى يرزقه بنجمة ابراهيم مش اى نجمة بتاعة ريا وسكينة
وحسرة عليها ما جت رجليها
بينى وبينكم انا شكيت فيه اه اصلى انا زى الابرة
اشك لحد ما اخيط غرزيتن فى نفوخه
وهسيبكم انتم اللى تخيطوا اقصد تحكموا
شفقة: سونة يا سونسون جيتلك اهو.... سونة يا حياتى ده على اساس انه رشدى اباظة وانا شادية
الهى تتبظظ عينيه الاتنين بظبوظة بظبوظ
ة
احسان: تنهيدة تتبعها تافف مع اتفو... ايه يا وليه ما ترحمينى شوية
واقفة ليه فوق نفو
خى اعتقينى ؟؟
شفقة: ستى امبو سبل وجدى كمان ايه يا راجل ده؟؟
انت فاكر نفسك بتكلم ام زعبله الغسالة ؟؟
ده حتى ام زعبله الناس بتعملها الف فوم وشطفة اقصد الف احترام عن كده
ايه الاسلوب البيئة ده؟؟

انا وليه انتى هتعملى زى يونس شلبى فى العيال كبرت "هو انتى الولية"
وايه فوق نفوخك دى كمان؟؟

احسان: يووووه مش هنخلص فوق نفوخى دى يا حياتى كناية عن انك ريشة ..عصفورة
حاجة خفيفة كده .....مش شوال رز
لاسمح الله
شفقة: انت بتتريق يا
سونة انا شوال؟؟
احسان: لا ذو الحجة....ولا اقولك زكيبة ها ايه رايك ؟؟
شفقة: زكيبة ايه وشوال ايه؟
ايه جو التموين اللى انت معيشنا فيه ده؟؟

احسان: دى يا حبيبتى اللى اسمها الشاعرية
شفقة: تقصد الشعرية مش الشاعرية
احشان: هو الواحد ما يعرفش يقعد يختلى مع نفسه شوية ياربى
شفقة: يتخلى وماله يا حبيبى ده على اساس انك فراخ بانيه
طيب كوكى كا ....كوكى كا يمكن ترد لما اكاكى
يا مصيبتى لتكون بتحب
احسان: طيب ايه رايك ه
سيبك لما تفقسى ومش هرد
هههههههههههه
يا ستى سيبينى شوية فى حاجات فى دماغى بفكر فيها

"وهوهيمان وسرحان "حاجات مهمة اوى حلوة اوى لذيذة خالص
يا حلاوتها يا قطاقيطها
المهم انا كنت شمه ريحة خيانة يتبعها شياط وحريقة وفوران فى الدم ومع ذلك اقعدت استجوبه وعملت نفسى مش واخدى بالى من الكلام لحد ما يقر هو ويعترف بنفسه وساعتها تقمصت دور المفتش كرومبو
شفقة: حاجات وحلوة وقطاقيط فى دماغك
الشر بره وبعيد.... قمل يعنى..
ايوه هو مفيش غيره
اللهم احفظنا

خليت الواحد يتهرش ودماغه تاكله
طيب مش كنت تقول يا حبيبى انك جربان

احسان: جربان ...طيب سيبينى وحلى عن سمايا لحسن مرضى معدى وخطير
ابعدى بقى الاوكسجين راح من الاوضة هتخنق
يا ساتر
شفقة: تتخنق وده يرضينى برضوا يا سونة
"بغيظ"ثوانى يا حياتى اجابلك انبوبة البوتجاز
احط خرطومها فى بقك

ولا تشيل هم هتتنفس احلى تنفس
يا ابنى انت معاك اجدع ممرضة
خريجة الشفخانة قسم كتم انفاس
احسان : وانتى هتقوليلى ده كتم انفاس واحتباس
ده ايه ياربى المصيبة اللى حدفتهالى فوق دماغى دى وانا ناقص
خنقة
شفقة:بصوت عالى بتبرطم تقول ايه ؟؟
احسان: مربى.... هقول ايه يعنى؟؟
مش بتقولى ببرطم
شفقة: يا حلاوتك وسكرك الزيادة
بجد ...بجد مالك وايه حكايتك ؟؟متغير ليه ؟؟ ولونه مخطوف؟؟
وضربات قلبك زيادة...ومش طايقلى تنتوفة حرف
احسان : طيب بطلى تفافة غرقتينى قال ضربات قلب قال
اصلى افتكرت انى واخد احلى شلوت فى حياتى
ممكن تسيبينى شوية اعيش الامجينيشن وافكر فى المز
ة
شفقة:على صرخة واحدة يا لــــــــــــــــهوتى يا خـــــــــــــــــرابى
مزة .....مزة مين يا سى احسان دى كمان؟؟

ها ....انطق ......قول
اقوام بسرعة قبل ما السر الالهى يطلع فى ايدى

اه ما انا طبقت فى زمارة رقبته وانا هسيب حقى
فاكر نفسك دنجوان ...ولا دنجوان
عيب على الصلعة والحواجب البيضاء والديسك
احسان: ديسك !ديسك ايه؟؟ يا بنتى انا معرفش الا السى ديهات
ديسك ايه.... وبتاع ايه ؟؟
دانتى قديمة اوى... واظاهر ان السماعات عندك هنجت
والهارد خرف

والرامات عايزة تنضيف
وبعدين انتى بتسمعى ازاى بقى انا قلت مزة ....انا؟؟
"بخبث"حاشى ....وكلا
قال مزة قال
"برخامة ولئم"انـــــــــــــــــــــــا... معقول
وهى فين المزز دى ؟؟ وهو الواحد بعد ما اتجوزك بقى بيشوف مزز
ولا بيعرف الصنف ده من اصله

طيب قولى مرة
تبقى مبلوعة زى العيشة المرة كده

مش مزة
انتى بس غلطتى فى نقطة
ونقطتينى وعليتينى
اظاهر سمعك تقل

شفقة: سمعى تقل ليه وزنته ؟؟
ماشى يا سونة لما نشوف سمعى انا اللى تقل
ولا نظرك انت اللى خف

يا مصيبتى ليكون الراجل بيحب ولا بيخونى ولا يروح يعمل زى الحاج ميتو ويروح يتجوز عليا يا خرابى نفوخى صواميله بتفك
ماشى استنى عليا يا حاج احسان اما واريتك
ومن ساعتها وانا مابنامش وماشية وراه فى البيت
وانا ماسكة عصاية المأشاه وعاملة زى الغفير
براقبه
وعماله اكلم نفسى يا ترى مين المزة؟؟ مين ؟؟ مين؟؟
يا اخواتى بذمتك انا مش عندى حق ؟؟
فيها مزة ولا..... لا؟؟
طيب محدش شاف احسان مع مزة؟؟
ماتخافوش مش هاقوله بس يفتن

عموما انا مش هبطل شك لحد ما حد يدينى ميسد ويقولى انه ظبطه متلبسا
وسيبوا الباقى عليا دانا شفق الله والاجر على الله
شـفقـــــــــــــة

هناك 78 تعليقًا:

خواطر شابة يقول...

الصور التي تحتارينها للموضوع تضفي عليه رونقا حخاصا وتضفي عليه طابع أكثر كوميدية
ياعيني على احسان واللي حيجراله المسكين اوعي تكوني من ستات الاكياس السودا تبقى مصيبة

اقصوصه يقول...

على راي المثل

يا مأمنه بالرجاله

لوووووووول

شفقه انا اقولك اياكي ثم اياكي

تفكري بالاشفاق عليه

الامور هاي تتطلب قوه وحسم وشجاعه

وممكن توصل الى الدم احيانا

بس اهم شيء تكوني منتصره

وبانتظار اخر الاخبار :)

الشجرة الأم يقول...

فيلم المخدة الفاضية أنا شفته كتير أوي .. والله يعينك يا ستي شفقة على الحال المايل دا !!

عاشقه الرومانسيه يقول...

حد يبقى معاه القمرررر ويبص للنجوم؟
(وش خبيث)
ربنا يسترها معاك يااحسان
خايفه البوست الجاى يكون بصور الاكياس والساطور
انفد بجلدك واهرررررررب

حنين القلب يقول...

والله العظيم انتى عسل

ايوة كده ياختى حطى عينك فى وسط راسك دى الرجاله اليومين دول مش ليهم امان وخصوصا بس ازمه العنوسه فى البلد

ولو احتاجتى اى مساعده احنا فى الخدمه

ايووووووووووه يا جدعان من الرجاله

اختك
سكينه

همس الاحباب يقول...

ههههههههه
ليه كده يا سونه يا اخويا تعمل كده
ده حتى الست شفقة تتحط على الجرح يولع
وبعدين نون النسوى كلهم عليك
ولا تراجع ولا استسلام
الاخت ريا والاخت سكينة واخ حسب الله كمان موجودين
طب استاذن انا وارجع مرة تانية
هههههههههه
تحياتى

norahaty يقول...

مــــــالك بس
ياأحسان يااختى
ما تسيبى الراجل
(يحلم )شويــة
مالوش نفس!!

norahaty يقول...

وفيلم الوسادة
الفاضية دا
حبيبى
ايام(الهبل)!

أميرة الاحزان يقول...

اول مره ادخل المدونه
جميله قوي
ربنا يخليكوا لبعض دايما
تقبلوا مروري

Manamino يقول...

ههههههههههههههههههههههههههههههههههههههههههههه
والله ضحكتيني بجد
ربنا يكون في عونه بصراحة الاستاذ احسان
ههههههههههههههههههه
ده واخد نسمة نسمة نسمة يعني
وبعدين بلاش مخدات خالص اليومين دول خصوصا اللي بتتعمل من الريش دي احسن انفلونزا الفراخ منتشرة اليومين دول وربنا يستر

المجاهد الصغير يقول...

السلام عليكم
ههههههههه
جزاكم الله خيرا
ننتظر المزيد

طوبه فضه وطوبه دهب يقول...

اقولك حل نزلى صور احسان على المدونه واكتبى ابحث مع الشرطه اللى يشوفه مع مزه يبعتلك دوخرى وكدا تضمنى انك توقفشيه متلبس اى خدمه انتتى بس شغلى الحسه البوليسيه واحنا معاكى يا غلبانه ياشفشقتى كان بدرى عليكى يا حبيبتى قال يا مأمن الرجال

sookra يقول...

يالهوىىىىىىىىىىى
عليك وعلى اللى هيجرالك يااحسن
شفقه يااختشى اوعى تسيبى حقك وخليكى وراه وانا اوعدك لو ظبته مع المزه دى اديكى فيست كود على طولللللللللل
ههههههههههههههههههه
والنعمه انتى شربتاته ازاى يبص لغيرك ايه اتحول ولاايه
نحن وراكى
نون النسوه
تا
تعيش
تا
تعيش

MǿиY El-Shreef يقول...

هههههههههههه

حرام عليكي طلعتي تيييت الراجل اساسا

سيبيه شويه وهتلاقيه هو حكالك عن كل حاجه ياستي

ولو ماقرش واعترف ساعتها تقدري تعملي فيه كل الي قلبك يحبه هع هع هع ابتسامه شريره :D

ليس فقيرا من يحب يقول...

حطيتى الراجل فى دماغك يا شفشق

عينى عليك يا احسان كنت طيب وامير

هههههههههههههههههههه

انتى عسووووله جدا

نعكشة يقول...

هوه فيه جزء تاني ولا لأ عشان نتأكد من أمر تلك الموزة او التفاحة

.....

رجالة آخر زمن

مش المفروض يعني يعني يعني

ان هوه يشكي لحضرتك لما يكون قرفان
اومال هيشكي مين

يلا خير

ربنا يهدي سركوا

سلامٌ عليكِ

mimi يقول...

شفشق هانم
ههههههههههه بدلعك أهه

لا تأخذك به شفقة أبدا
يلا الله يعينك علي فعل الخير

وفتحيله عيونك وطرطئيله ودانك

أيون أحب الحمشنة
سلامو عليكووو

Wanda يقول...

و الله حرام
استنى بس
انا فاكرة انى شوفته فى عربية شفولية 4x4 و كلها كماليات
ز اعتقد دلوقتى بيقولوا على العربيات مزة ، اصل المصطلح الحريمى القديم انقرض :-)))

تلاقيه بيفكر فى العربية الجديدة و خايف يقولك لا تقولى الراجل اتجنن

استهدى بالله يا شفشفق و اعمليله امينة و هو حيسيب العربية و يرجعلك
يعنى حيروح لمين غيرك يعنى :-))
ده سى احسان برضة يلف بالعربيات و يلف و يرجع لبيته اخر الطريق :-)))

صدى الصمت - عاشقة الورد - يقول...

يا شيخة حرام عليكى هتخنقى الراجل
سيبية يتنفس شوية وإطمنى هوة مش هيلاقى زيك أبداً

قلم رصاص يقول...

"قال ايه كل ما اكلمه الاقيه مسهم وهايمان وبيحلم وهو صاحى"

هههههههههههههههه

راجل بيفكر ازاي هيسدد ديون مصر..ايه ..ايه سوء النوايا ده

ههههههههههههههه

بجد بوست يجنن ..ضحكتيني جدا

ربنا يكون في عونه

في حفظ الله

سمو الأميرة سارة يقول...

هههههههههههههههههههههههههههههههههه انا شوفته انا شوفته
فاكرة يوم حفلة توقيع كتاب المدونات ؟؟ ف الساقية
شفته مع مزة خضراء العينين واول حرف من اسمها ميم :D

اوعي تقولي اني فتنت عليه ماشي ؟

سمو الأميرة سارة يقول...

شفشوقتي حبييبتي قبل اما تنوي تقتليه ابقى قولي لي علشان ابقى اغطي الخبر فقط وحصرياً ههههههههههههههههه

فتاه من الصعيد يقول...

ههههههههههههههههه

والله بالرغم من اني من المدافعين عن اي ست ضد اي راجل .... بس احسان بيصعب عليا موش عارفه ليه :)

ربنا معاكي .... ومعاه

حنان الشافعي يقول...

هههههههههههههه
اكيد فيها مزه امال فيها بيبي
هههههههههههههه
اقولك نصيحه حطيله جهاز تتبع في جيب الجاكت ووكماا جي بي ار اس في الموبايل ومتسيبهوش نوهائي وهاتك يا استجواب استجواب لغاية ما يغلط وبعد كده وانتي بتكلميه سجليله عشان ميقولش بقي مقولتش هههههههههههههههه

شفـقــة و إحســــان يقول...

خواطر شابة
بعد اللى انا شفته من احسان هعمل مدونة واقتبس منك الاسم بس هسميها خواطر شايبة من كتر الغلب اللى انا شايفاه
وبعدين تعالى هنا ايه الكلام الكبير ده رونقا والذى منه
بس وحياتك انا فعلا باضفى رونقا خاصة بس بضيف ملح وفلفل وشطة وبهارات علشان تولع وتشطشط كده
كمان احسان مش مسكين لا ده سكين وان شاء الله هغزه قريب
اما بخصوص الاكياس السودا فانا اصلا يا بنتى اللى مختراعها وكمان كنت بطلة فيلم النضارة السودا حاكم اى حاجة سودا وعتمة ومضلمة تبقى تبعى

شفـقــة و إحســــان يقول...

اقصوصة
ايه حكاية مامنة دى انتى هتمثليلى دور امنة فى دعاء الكروان وفين هنادى يا اماى
لا مش وقته دورى عليها بعدين وخلينا فى احسان بيه
وبعدين شفقة ايه اللى هشفقها عليها يا بنتى ما تنخدعيش بالاسم ده اسم فقط مش صفة
وكمان الامور هايدا عم بتتطلب قوة وبلغة وساطور مش حسم وشجاعة سلو بلدكم غير سلو بلدنا
اما بخصوص الانتصار فاتبعى اخبارى على قناة اليابس اقصد الجزيرة

شفـقــة و إحســــان يقول...

الشجرة الام
الحال يا شجرة مابقاش مايل لانه وقع خلاص واتهد فوق نفوخ ناس ادعيلهم بقى يقوموا بالسلامة
يارب

شفـقــة و إحســــان يقول...

عاشقة الرومانسية
بقى كده يا عاشقة الرومانسية ماشى "وش اخبث"
بتقوليله انفد بجدلدك طيب هيروح فين لا مفر
وبعدين مش اذا كان جلده اساسا موجود
يا بنتى ده اتفرم

شفـقــة و إحســــان يقول...

حنين القلب
عسل ايه هو البلاص اللى فى البوست فكرك بيا ولا ايه؟؟
احط عينى فى وسط راسى! طيب ازاى وودى شعرى فين ؟؟
انتى عايزانى ابقى قرعة ؟؟ كده برضوا يا حنين
وبعدين ايه حكاية النعوسة دى كمان انتى بتتاوبى وجاى تنامى عندنا
عموما روحى انعسى بعيد عنى انا عندى دورية اليومين دول وبراقب احسان
كمان انتى مسبتليش رقم الخدمة علشان لو عايزة مساعدة بس اوعى تكون 55 اسعاف

شفـقــة و إحســــان يقول...

همس الاحباب
كده برضوا يا ابو شابى... بقى شابى يرضيها كده؟؟
بقى انا اتحط على الجرح يولع ؟؟
ليه هو انا صبغة يوت
ماشى يا عم همس
اما خليت نون النسوة كلهن يجتمعوا ويعلنوا الحرب عليكم جميعا مابقاش انا شفق الله والاجر على الله
وعليك ان تمكث فى بيتك لحد ما ابعتلك ريا وسكينة وحسب الله يعملوا الازم

شفـقــة و إحســــان يقول...

norahaty
عموما يا نور انا مش هرد على التعليق ده لانه مالوش علاقة بيا
ليه علاقة بشفقة بيه مش احسان هانم
واظاهر ان مش احسان لوحده اللى خف نظره
شفقة بيه

شفـقــة و إحســــان يقول...

norahaty
فيلم المخدة الفاضية ده وانتى الصادقة كان ايام الفقر وقلة القطن وعدم وجود اختراع الفيبر مش ايام الهبل
وتحياتى للمنجد

شفـقــة و إحســــان يقول...

اميرة الاحزان
والنبى ما انتى خارجة احنا الداخل عندنا مفقود والخارج مفقود برضوا لانه غالبا بيفقد عقله ومن عندنا لسرايا المجانين عدل
نورتينا

شفـقــة و إحســــان يقول...

Manamino
على فكرة يا استاذ مانمينو نسمة مش موجودة عندنا اظاهر انك غلطت فى المدونة
اما هنا عندنا قمر ونجوم وكواكب وساعات لما تقلب على حد تبقى زحل والمريخ
كمان شكلك اتاثرت بالبوست وخاصة كوكى كا كوكى كا والفراخ البانية بما انك جبت سيرة انفلونزا الفراخ
لكن نحب نطمنك احنا عندنا نوع تانى احلى واجمد ومستديم انفلونزا الكتاكيت البدارى

شفـقــة و إحســــان يقول...

المجاهد الصغير
نوعدك بالمزيد بس انت محددتش مزيد من ايه؟؟
من البوستات ولا من الضرب والعكننة والخناقات
اه لحسن تفرق

شفـقــة و إحســــان يقول...

طوبة فضة وطوبة دهب
صور ايه بس يا بنتى اللى انزلها انتى عايزة المدونين يطفشوا ويبطلوا يدخلوا انتى كده يا طوبة تبقى بتطربقيها فوق دماغى
وبعدين انتى شغالة مخبر اليومين دول ولا ايه شكلك متقمصة دور جيمس بوند
قال شرطة قال الشر بره وبعيد انتى ناسية ان اخواتك سوابق وعندهم حساسية من السيرة دى

شفـقــة و إحســــان يقول...

sookra
وحياتك وراه وبالماشاه امال يعنى هروح فين
ايون كده جدعة يا بت طالعة لابلتك لواحظ ووحياتك لو اديتنى فيست كول لاشبرك واحولك بجنية رصيد يلا ان شاء الله ما حد حوش

شفـقــة و إحســــان يقول...

MǿиY El-Shreef
كده يا مونى انا شامة ريحة خويانة عظمة
وبعدين تييت ايه وبيب ايه هو عربية
وقال اسيبه قال امال اطبق فى زمارة رقبة مين
الا اذا كنتى انتى متبرعة بزمارتك بداله

شفـقــة و إحســــان يقول...

ليس فقيرا من يحب
بقى احسان امير وحياتك بعد اللى انت عمل فيه ما يحصلش مملوك ولا حتى غفير
ادعيله ربنا يرقيه ويمسكه الحكم لو عرف يزحزحنى من على كرسى العرش

شفـقــة و إحســــان يقول...

نعكشة
طبعا يا نعكوشتى ده هيبقى فيه اجزاء واكياس وسواطير مش جزء واحد
حاكم انا بحب اقطع الحاجة حتت علشان الجوريمة ما تبانش
بس انتى ابقى تابعى اخبار الحواداث

شفـقــة و إحســــان يقول...

mimi
يا بنتى ما تخافيش شفقة ده اسم بس اما الفعل ما قولكيش
واذا كان على الحمشنة فمفيش عندى غيرها
هااااااااااااااااااااااااااااااااااا
مين هناك

شفـقــة و إحســــان يقول...

wanda
بتقولى شوفتيه فين؟؟
عربية 4*4 طيب قولى 27 تبقى مبلوعة
وكمان بتقولى اعمله امينة ده ايه حبك فيا ده
انتى عايزاه يروح يتجوز عليا نعمة الله ومديحة والفت
ليه هو انا عبيطة ولا عبيطة

شفـقــة و إحســــان يقول...

صدى الصمت عاشقة الورد
بقى انا هخنقه ليه شايفانى حبل مشنقة؟؟
كده برضوا يعنى تسكتى تسكتى وتنطقى بالاعدام
ماشى
اما اذا كان على اللى زيى فطبعا مش هيلاقى انا منزلش منى غير حتة واحدة بس تقفيل مصراوى

شفـقــة و إحســــان يقول...

قلم رصاص
يسدد ديوان مصر ليه هو سعد زغلول
طيب لما يسدد مصروف البيت ويدفع الايجار والمية والنور يبقى يفكر فى مصر

شفـقــة و إحســــان يقول...

سمو الاميرة سارة
الساقية وخضراء هو بيعرف زرعة ولا ايه يا سارة؟؟
وكمان اول حرف ميم اوعى تكون فاتن حمامة بطلة امبراطورية ميم هى مفيش غيرها
بس عرفها ازاى؟؟
عموما ولا كانك قلتى حاجة وخليها فى سرك

شفـقــة و إحســــان يقول...

سمو الاميرة
تغطى الخبر طبعا علشان البرد وانفلونزا بس بالبطانية يا سارة مش بالحصيرة

شفـقــة و إحســــان يقول...

فتاة من الصعيد
بما ان احسان صعب عليكى تبقى مش من المدافعين لا تبقى من الاعداء وعليكى ان تتحملى الحرب اللى هشنها عليكى وتستحملى المدافعين والصواريخ والكلاشنكوف كمان اللى هبعتهملك

شفـقــة و إحســــان يقول...

حنان الشافعى
انتى بتتريقى ما طبعا لو فيها مزة يبقى هيبقى فيها بيبى مش بعيد يتجوزها ويجبلى عياله ارابيهم
بس بجد تسلملى افكارك التصنتيه واجهزة المخابرات اللى انتى شغالة فيها
بس بقولك ايه ما تخليها بدل جى بى ار اللى هى تبقى "جبر"
نخليها جى ار بى " جرب" مش كده اهرش قصدى احلى

akeedba7ebha يقول...

ايـــــــــــــــــــــه كل ده الله يكون فى عونك يا احسان قلبي وقلوبنا كلنا معاك

انا مصدقتش نفسى لما لاقيت البوست الى كان قبل ده

لكت المرة دى مقرردتيش اكمل حتى البوست للنص بيتعب

الله يكون فى عونك يا اخويا ويكفيك شرهم دول

سورى يا شفقه

وكل سنه وانتوا طيبين

مدونتى إسمها مرايتى يقول...

إوعى تديله الفرصه دى

إنه يبص بره

مش مهم تعرفى الحقيقه أو توصلى للمزه

لانك ممكن تكونى المزه بس فى أحلامه بصوره تانيه

واوعى تحشرنى نفسك فى دماغه لا يقتل المزه الى فى خياله

حلوه زيك يا شوشو

حنين يقول...

ازيك شفقه هانم
بقولك ايه بقى ماتخفى على الراجل شويه
انا حاسه انك ظلماه ودايما شاكه فيه
وبعدين ماتجري ناعم كده وشويه رومانسيه
والامور تتظبط ولو انى يااختى بينى ويبنك
ما بيتمرش فيهم احيانا يعنى مش دايما وكمان بينى وبينك احنا مانعرفش نعيش من غير مانشك وننكد عليهم ونزن على دماغهم
يلا ربنا يقويكى يا حبيبتى

Sonnet يقول...

شفقة هانم و إحسان بك:
جزاكم الله خيرا على الزيارة و الدعاء
اللهم إني أحبكما في الله
اللهم فاشهد
أختكم SONNET

شفـقــة و إحســــان يقول...

akeedba7ebha
واللهى فكرتنى باغنية شهيرة وكلنا بنحبها خالص مالص"الله معاك ومعاك قلوبنا " اكيد تعرفها مفيش حد فى الشعب المصرى ما يعرفهاش بس هى كانت بتتقال للريس
مش للريس متقال اقصد احسان
وعموما الرجالة كلهم فى صفه هتيجى على واحد ؟؟
كمان سورى يا شفقة دى مش صح هو مش سورى هو مصرى ابن مصرى

شفـقــة و إحســــان يقول...

مدونتى اسمها مرايتى
انتى خوفتينى ورعبتينى اوى يا مرايتى
حشر وقتل يا بنتى ده احسان مش يوم القيامة

شفـقــة و إحســــان يقول...

حنين
اخف! ليه هو انا وزنى تقيل اوى كده؟؟ ده حتى بشهادته انى ريشة وكالعصفورة الرشيقة
وبعدين لما انا اجر الناعم امال الخشن هنسيبه لمين
وبعدين اهو اعترفتى بنفسك ما بيتمرش فيهم ابدا لانهم بياكلوا تمر كتير
ربنا يرحمنا

شفـقــة و إحســــان يقول...

Sonnet
واللهى احنا اللى متشكرين على الزيارة
ويارب تكرريها بس ياريت تفضلى تدعيلنا وماتغيرش رايك وتدعى علينا

akeedba7ebha يقول...

ايه ده انتى مالك زعلانه كده ليه

ده صوت الحق يا استاذه

البقاء للرجاله هع هع مافيش ستات تانى

وكمان هو المصرى مبيقولش سوغى ولا ايه

ده بيعرف كل اللغات

ستيته حسب الله الحمش يقول...

ايوة يا شفقة يا اوختشي
اصحي للون
قال احلام يقظة قال
ومالها شفقة هانم؟
تحلم بيها صاحي نايم
بالأمرررررررررررر :)

sookra يقول...

شفشوقه يااختشى
عملتى ايه عرفتى الموزه
انا شفته امبارح ماشى مع واحده بيضا وحمره وصفرا ياختشى جايبه كل الالوان
لا وايه كانوا داخلين مصمت
استنيهم هناك واعملى عليه شوربه وابقى ادعينى عشان اكل معاكى شوربه
الا هى بتتشرب ولابتتاكل الشوربه دى

شفـقــة و إحســــان يقول...

akeedba7ebha
صوت الحق! شكلها جريدة جديدة
هو حضرتك صحفى ولا ايه
وبعدين المصرى اللى على حق ما يقولش للغلط لا
يا عم احنا بنهزر انت بتصدق ولا ايه
عموما فلتحيا الشنبات ولتسقط الشلنكبات
ولا تزعل

شفـقــة و إحســــان يقول...

ستيتة حسب الله الحمش
ايه يا ستوتى تعالى هنا اوام مين احلام دى ؟؟
وكمان بتقولى عليها قطة
يا خراشى
كده تظبطيه معاها ومتدنيش فيسد كول

شفـقــة و إحســــان يقول...

sookra
موزة ايه وبرتقالة ايه هو فكهانى يا سكرة
وبعدين بيضا وحمرا انتى شفتيه بيكاكى قصدى ماشى مع فرخة؟؟
وداخلين مصمت !
اللى عمره ما عملها معايا
ماشى يا ديك باشا يا احسان
طيب قوليلى هى كانت بلدى ولا شمورت
ونافشة ريشها والنبى لاقصقصهولها واخلى انفلونزا الفراخ تجيلها

شمس النهار يقول...

ماشاء الله عليكي
مش ممكن انا ضحكت ضحك

بتكتبي لطيف اوي

ربنا يديم عليكم نعمة الوفاق

ربنا يكرمكم

سلامي

akeedba7ebha يقول...

يا شفقه انتى كل ده ومش عارفه انا مين طيب اسالى شوفى انا مين او حتى قولى لاحسان

انا محمد ابوعجيله بورسعيد يااساتذه

خشى على المدونه وانتى تعرفى

نهر الحب يقول...

يياخراشى عليكى يا شفقة ياحبيتى
مش عارفة بتجبى الصور دى منين
كمان متسيبى احسان يبصبص شوية
بس لما تروحى البيت انتقمى واثأرى لك ولكل الستات النايمين على وداناتهم
هههههههههههه
وحشتينى ياقمر

akeedba7ebha يقول...

ايوة كده قوليلها يا ايناس قوليلها ولا هى الدنيا تبقى خنقه كده ز الواحد على كده مش هيجوز بقى


ههههههههه لزوم التسيط يا جماعه اصل بدور على عروسه هاهاهاها

blue-wave يقول...

يا نهار ابيض عليكى
انتى بتقوميهم علينا ولا اييييييييييه؟:))))

mimi يقول...

كل سنة وانتو طيبين ،، يلا صفعة جديدة

أأأأقصد صفحة جديدة

أنا قلت بس أجي أهدي النفسيات

هع هع هع

قوس قزح يقول...

بصى طول ما هو مش معبرك و متنح يبقى عاااادى لسه مش فاء من صدمة الجواز ..تقلقى بقى لما يجى من بره و معاه هدية و يقولك بحبك وحشتنى
هنااا بقى تعرفى انه بيريح ضميره من حاجة عاملها و ساعتها مش هوصيكى .. انا بس بحب اهدى النفوس


يارب دايما تكونوا دمكم زى العسل كده سوا و قريبين من قلوب بعض و عام سعيد عليكم و على كل احبائكم

P A S H A يقول...

كل سنة وأنتم طيبين.

سومه...مجنونه فى بلد عاقل يقول...

كل سنه وانتى واحسان بالف صحه وسلامه

micheal يقول...

ههههههههههههههههه..كان الله في العون
أنتوا الاتنين طبعا..متجيبليش نصيبة
:))
ارجع واسأل بتجيبي الصور اللوذعية دي منين بس
:)
هابي نيو يير
تحياتي

نهر الحب يقول...

ازيك ياقمر
مدونتك جميلة قوى وموضوعاتها رائعة.


ان شاء الله لى عودة مطولة عندك


خالص تقديرى

نهر الحب

Sharm يقول...

دمكم خفيف والله

شهد الكلمات يقول...

كل سنةو الست شفقة و ميسيو احسان بخير و سعادة و سوا سوا يا رب دايما

ان شاء الله مايكونش في حاجة هو بس اكيد بيوستهايئلك ولا حاجة ده سي احسان راجل كومل

ثم يبص برده لية !!! دي معاه احلى موزة

دمك عسل طبعا كاعدتك
استمتعت جداااااااا بالموضوع و بالاغاني الجميلة اللي ع المحطة

تحياتي

shemo يقول...

السلام عليكم....
بقااااااااالى زمن مش جيت هنا
ولكوا وحشة والله
ههههههه وربنا يكون فى عونك وتعرفى سر التوهان الى هو فى دا
الرجالة دول فعلا مش ليهم امان خااااااالص بذات فى الزمن دا
دومتى بخير
فى رعاية الله
shemo

صباح الصباح يقول...

كل سنة وانتوا دايما مع بعض وبالف صحة وخير

Wise يقول...

جميلة اووى مدونتك وظريفه جدا
ان شاء الله نتابع معاك