الجمعة، 5 فبراير 2010

ولا يا دقدق .. بهدلنا منتخب "الهلال والنجمة"


ايه اللي حصل ده ؟؟

وايه اللي عملوه ولادنا ده ؟؟
وايه الإنجاز اللي حققوه المصرين ده ؟؟
ياترى دي حرفنة لعيبه !!
ولا شطارة حسن شحاته !!
ولا دي دعوات الناس الغلابة اللي نفسها تفرح !!
ولا حظ ولا توفيق !!

ولا ايه الحكاية بالظبط ؟؟




ماتيجوا نرجع الشريط شوية
ونفكر شويه في اللي بيحصلنا من شهرين
ونبدأ من السودان
تحديدا إستاد أم درمان
تفتكروا كان عادي اننا نتغلب من الجزاير في الماتش ده ؟؟
زعلنا وإتأثرنا

وحملنا الفرقة والمدرب واتحاد الكورة مسئولية الخسارة دي
بس الغريبة اننا غيرنا رأينا في نفس الليله
وتاني يوم الصبح كان الكل بيقول الحمد لله اننا اتغلبنا
لإن ماحدش ممكن يتصور إيه اللي كان ممكن يحصل لجمهورنا هناك لو كنا كسبنا


طيب وبعد شهرين كان عادي اننا نقابل الجزاير تاني ؟
ولما قابلناهم كان فيه حد في الكون يتخيل السيناريو اللي حصل معاهم ده ؟

ماشفتش في حياتي فرقة اتطرد منها 3 لاعيبة منهم حارس المرمى
وكمان وفي ماتش مهم زي ده ناخد تارنا برباعية في حلاوة رباعيات صلاح جاهين ..

هوا صحيح الشرع حلل أربعة .. بس مش في ساعة ونص

مايقدرش على كده غير المعلم .. حسن شحاته
ربنا يديله الصحة بقى



أكيد ده ماكانش شئ عادي
ولا كان صدفة زي ما كتير قالوا
ولا كان بسبب الحكم "كوفي كودجا" زي ما هما قالوا
طب يعني هوا كان "كوفي كودجا" هو سبب هزيمتهم الأولى قدام ملاوي ؟؟
ولا هوا كان سبب هزيمتهم الأخيرة قدام نيجيريا ؟؟

ولا يمكن كان بيحكم كل ماتشات مصر الستة علشان يغلبوا فيها كلها !!
وهوا يعني مين اللي إختار أحسن لاعب وأحسن حارس مرمى وصاحب أحسن أخلاق رياضية وهداف البطولة كلهم من مصر !!
كوفي كودجا برضو ؟؟؟؟؟؟

ومين اللي صنف منتخب مصر العاشر على مستوى العالم .. وانتم الإثنين وثلاثين !!
هوا كوفي كودجا .. صح ؟؟؟؟؟؟



يا ناس يا خضر حرام عليكم
ده الراجل هيحققوا معاه ويمكن يتشطب من قائمة حكام كأس العالم علشان إتساهل معاكم
ضيعتوا مستقبل الراجل وهتقعدوه في بيته
وبعدين إيه حكاية الخضر جايين .. الخضر مسويين .. الخضر عاملين ؟؟
أنا حسيت إنهم لو جه فيهم جون هيتحولوا زي الرجل الأخضر زمان .. فاكرينه ؟؟
يطولوا .. ويعرضوا .. ويتنفخوا .. وهدومهم تتقطع من عليهم
ويقعدوا ياكلوا في النجيل زي البهايم

أهم في الآخر اتوكسوا ماتش ورا التاني ورا التالت .. يعني اتطلقوا بالتلاتة
وطلعوا ولا ليهم علاقة بالرجل الأخضر ولا اللون الأخضر حتى
ورجعوا وشهم أبيضاني على أحمر
وقفاهم يأمر عيش من كتر ماهو أحمر
وماحدش شاف إيه تاني فيهم بقى أحمر
وأهو احمر منهم دلوقتي مافيش
حتى رابـح ســعدان يا عيني .. رجع من هناك خــاســـر زعـــلان



=========================


باقولكم إيه........
أنا آسف ..
بجد بجد .. آسف
هاكون أجرأ منكم ومن حكوماتكم والسفير بتاعكم

وهاعتذر
أنا فعلا آسف

آسف على المستوى اللي وصلناله في الحوار بيننا
آسف على كل كلمة قلتها وكتبتها ممكن تجرح حد منكم
آسف على اننا بعنا بعض رخيييييييييييييييييص أوي
بس تعمل إيه لو إنت قاعد على النت لابيك ولا عليك
وفجأه تلاقي واحد لاتعرفه ولا يعرفك دخل عليك بسؤال عادي

( إنت مصري ؟؟ )
ولما تقول آه تتفاجأ بانك بتتكلم مع صفيحة زبالة بتنضح باللي فيها
ده موقف حصل معايا ..

ويمكن ده اللي استفزني للكتابة بأسلوب أنا شخصيا لا أحترمه
وأنا والله ماليش مشكله معاكم غير كرامة بلدي وإسمها وشعبها وعلمها
تحترموا دول تلاقوا كل إحترام وود وأخوة زي ما كنا دايما
ده أنا الشارع اللي ساكن فيه إسمه شارع الجزائري
مكتوب في بطاقتي ومش هينفع أغيره .. ولا عايز أغيره - ده لغاية دلو
قتي يعني -
وأكيد عارفين إن فيه ميدان هنا في المعادي إسمه ميدان الجزائر

وبيتهيألي انهم إتسموا كده تقديرا لبلدكم .. و للأخوة والعروبه اللي بينا
أو اللي المفروض انها بينا


وأنا واحد من الناس إتعرفت عن قرب على أحدى رموز الجزائر
واحده منكم .. ومنا في نفس الوقت

حبتنا فحبيناها
غنت لمصر فصدقناها
تشدو لنا وفينا .. فسمعناها

إسمها في سجلاتكم "ورده محمد فتوكي"
وإسمها في قلوبنا "ورده الجزائرية"


كانت أول مرة في ستوديو الفنان محمود ياسين "رباعيات"
وبعدها توالت زياراتي لها في منزلها على كورنيش النيل بالمنيل
حيث تقيم مع إبنتها وحفيدتها وإبنها رياض الذي شرفت بمعرفته
لم تكن تشكو من شئ في مصر سوى منتجها "محسن جابر"
كانت تحب مخالطة المصريين والتحدث معهم (وأنا منهم)
تتحدث كثيرا عن عملها وتاريخها الفني بلسان مصري طليق
تغلبها في اللهجة المصرية حفيدتها "دلال" بنت الـ16 ربيعا آنذاك

واللتي تشبه كثيرا ورده في صغرها
أذكر حينما كنت في مثل عمرها كم كان أبي من أشد معجبيها
شرائط الكاسيت تملأ البيت والسيارة
صوتها في أذني معظم ساعات يومي
(أوقاتي بتحلو) و (وحشتوني) كانتا المفضلتان لدي
لم يكن أبي ولا أنا ولا أحد يمتعض كونها جزائرية

لم نكن متعصبين ..
أبدا لم نكن قبليين ..
أبدا لم نكن طائفيين ..

إن ما نفعله الآن لهو الخطأ المبين
أكبر خطأ
أرجو أن نعود إلى رشدنا وصوابنا
ولا نشمت فينا أعدائنا المتربصين بنا

فهم يعلنون أسلوبهم ولا يخفوه
فرق ... تسد
أرجو الله ألا يفرق لنا جمعا
ولا يشتت لنا شملا
طالما إجتمعنا على ما يرضيه

وإجتهدنا في أمور ديننا ودنيانا


وآمنا بأن النجاح والتوفيق يأتي لمنتخب الساجدين
للداعين .. لقارئي الفاتحه .. للمكبرين
وطبعا بالأساس المجتهدين المخلصين
هكذا يصنع النجاح
فالنجاح لا يأتي صدفة
ولا برغبة الحكم البنيني "كوفي كودجا"
ولكن برغبة .. وأمر .. ومشيئة

الحكم ... العدل
سبحانه


أخــــــوكـم في العــروبــــــه
(ده لو لسه فاضل منها حتة)
إحســـــــان الأخضــــــــــــر

هناك 50 تعليقًا:

أمل حمدي يقول...

بوست رائع شامل

تسلم ايديكم يارب

وحشتوني يا شفشوقة وشكرا على كلامك الطيب

ربنا يصلح حالك ويوفقك انت واحسان يارب

احساس طفلة محبة للرومانسية بس واقعية يقول...

بوست فى الجوووووووووون
مفيش كلام تانى انتى تقريبا عبرتى عن احساس كل مصرى خاصة اللى بيقابل عرب اخرين وبيسألوه انت جنسيتك اية ؟
:( وبعدها عينك ما تشوف الا ابشع ما فيهم رغم انهم فى الحقيقة ممكن يكونوا شخصيات كويسة فى المجتمع بس مع المصريين معرفش لية فى جمووووع كارهه

ربنا ينصر المسلمين ويوحدهم
بلاش عرب مش هنقول عرب تانى مادام بتزعلهم

دمتى بكل خير
تقبلى مرورى

hend anwar يقول...

مصر والجزائر فووووووووقوا
والف مليون مبروك لمنتخبنا

hend anwar يقول...

مصر والجزائر فووووووووقوا
والف مليون مبروك لمنتخبنا

خالد كامل يقول...

ازيكوا عاملين ايه ؟؟
مبروك الفوز على الجزائر و الفوز بالبطولة

انا بالنسبة ليا مش فارقة كتير مصرى من جزائرى
احنا خدنا حقنا ( كروياً و اعلامياً و نتيا ) و خلاص

تحياتى

قلم رصاص يقول...

السلام عليكم

ألف مبروك لمصر
احنا فزنا بالبطولة والحمدلله
لكن مهما كانت الخلافات بين البلدين فاحنا في الاخر بتجمعنا الروابط اكتر مابتفرقنا المحن والمشاكل

أحيي حضرتك على البوست الرائع دا

تقبل مروري وتحيتي

Pink Dreams يقول...

الف الف مليون مبرووووووووووك لمنتخبنا

ومن فوز الى فوز يا رب

سمكه واحده يقول...

الله كلامك تحفه
الله ينور عليك بجد
انا فعلا الموقف ده اتعمل مع ابن خالي بردو لا بيه ولا عليه وشخص قاله انت مصري وياريت واحد لا بنت
وسمع كلام من اقذر ما يكون ليه متعرفش
ياله بجد كلامك حلو اوي والواحد مش عارف يعلق عليه
بحيك علي البوست الرائع ده
ودي هديه مني بقي
(:

واحد جزائرى ( متعب ) قوى طلع عنده ( زيدان ) فى بطنه .. امه عرفت قالت يا (حسنى) وجريت قالت ل ( جدو ) قالها وديه للدكتور يوم ال ( جمعه ) وربنا هو ال ( شافى ) وقال هو السبب ماهو مقضيها ( شحاته ) اصله واد ( غريب ) من صغره وكان فاكر انه حيلاقى خاتم ( سليمان ) لكن ماهو اصله بدوى مش ( حضرى ) وطول عمره رخيص مش ( غالى

احلي حاجه في المصرين بجد حفه الدم والفطنه وسرعه البديهه
في ثانيه حاجه تحصل كميه النكت اللي تحضر
بجد انا فخوره اني مصريه
مش عشان النتك ولا خفه الدم
لا عشان حجات كتير برغم اللي موجود فيها بس اجمل بلد في العالم
ربنا يحفظها ويحميها ويحفظ ولادها
تحياتي

ستيتة يقول...

يسلم كلامك يا احسان بيه
النص الأولاني صح
وجميلة صورة الأخ اللي مطلع لسانه لأني كنت حزينة قوي لما عمل حركة العيال دي
اهو رجع بلده وقفاه "احمر :)

وجميل النص التاني
وطول عمرنا بنحب وردة الجزائرية
ولطيفة التونسية
وسميرة المغربية
وكل اللي جولنا من الدول العربية
لا عمرنا قلنا لحد انت غريب
ولا كنا عنصريين
ولا من طبعنا اصلا

اما الجزء الأخير فياريت كل عاقل يفهمه كويس
ولو لم نتقوى ببعضنا البعض
ها تاكلنا الديابة
وما اكترهم
بس تقول ايه
اصحاب العقول في رااااااااااااااااحة

تحياتي

Unknown يقول...

احسان باشا
تصدق عرفت افرق من اول سطر بينك وبين حبيبة قلبى شفقة
بجد اسلوبك حلو جدا
وكمان انت طرحت الموضوع بشكل اكثر من جيد

بس انا استوقفتنى حاجة
انت تعرف وردة
طب ينوبك ثواب اشوفها طب
اصل انا بحبها بحس انها ممكن تغنى اى حاجة وكل حاجة
كمان بابا الله يرحمه كان بيعشقها
خلاص نتوكل على الله ونحل المشكلة المصرية الجزائرية
ونروح للست وردة ببوكية متعبر
اية رأيك عدانى العيب اهو

ابقى فكرنى احكى لكم عن واحد جزائرى
فضيحة على اليويتوب
بس انا ايه ضبطتة بالادب
والراجل بيحاول يمسك اعصابة
ههههههه

اختكم
ولا اقولك اختها هى وحماتك انت
نهر الحب

غير معرف يقول...

مبروووووك لمصر

وهارد لك للجزاير

بس خلاص :)

تحياتي

The illusionist يقول...

زناتى
واعوذ بالله من قوله زناتى
بيصبح عليكم جدا جدا
وبيقولكم
منتخب الهلال والنجمه انضرب بستون بنص من عيار قبقاب شمروخ زليخه
انا كتبت بوست تاريخى عشان اللى حصل ده
لو عديتوا عندى تانى ابقى مروا عليه
اصل كنت فى امتحانات
بس ممسكتش نفسى
دى مصر يا احسان باشا
مصر بتاعه صفر المنديال
وبتاعه واحد صفر فى السودان
لالالا
سيبك منها
مكنتش مصر دى يوم الجزائر
كانت مصر بتاع السبع بطولات
والاربع اجوان
وبتاعه التلت اهرامات ووزير التعليم اللى راقد جنبهم
ابو الهول يعنى
وتحياتى ليك
شرفتنى فى مدونتى
انحناءات وتعظيمات
طويل العمر يطول عمرك ويزهزه عصرك
وينصرك على من يعاديك هاى هيك

hana يقول...

دول مش كانو اربع أجوان دول كانو أربع أقلام ههههههههه
عشان يعرفوا مين منتخب مصر ومين هما
بجد فرحة مفيش بعدها فرحة وإحسآآآآس راائع
لأأنا مش فاهمة ليه كمية الكرة من الجزاير دي
انا كنت بتفرج علماتش في تلفزيون الجزاير بجد كمية كره رهيبة محدش يتخيلها ولا كان يعتقد كدة أبداً
دي مصر بتجب الكل وقلبها جمييييل

تسلم إيدكـ
بوست جميل أسلوب وحضور

أرق تحيااااتي

هناا

اقصوصه يقول...

مبروك الفوز

تستاهلونه :)

ولو اني ما كنت احبذ كلمة

(بهذلنا) هاي!

لان اول ع اخر هاي كوره

يعني كوره منفوخه هوا بس!

هديـــل الـروح يقول...

ألف مبروك للمنتخب ..
فعلاً البوست جميل ..
احنا كلنا عرب ولازم نحافظ على بعض مش الكوره هيا اللى هتفرقنا

شمس النهار يقول...

ماشاء الله
من اجمل البوستات اللي اتكتبت في الموضوع ده

والف مبروك

واو اني ماليييش في الكورة


والا بقيت بعترف بموضوع القومية العربية

برغم اني من ابناء مرحلة القومية العربية

مش عشان حاجة
بس علشان لاقيتة حلم عايش جوة اللي زي كده
وفجأة تحول لكابوس

سلامي

morgana يقول...

بوست جاااااااااااامد

ومبروك علينا الفرحه كلنا:)

ذكرى رحيل قلم يقول...

السلام عليكم

ازيك عاملة ايه انا بدعوكي لزيارة هذا الموضوع الهام لكل فتاة مسلمة
تحياتي

مدونة رهف قلبي

http://wwwrahf.blogspot.com/2010/02/blog-post.html

كيكى عوووووو يقول...

تعظيم سلاااااااام يامناضل
انت بتروح فين وبتيجئ امتى
ابقى تعال انا ببقى هناك علطول
!!!!
بختصار انها عادله السماء
تسلم ياكبير

عايش... ولكن !!!! يقول...

انا بجد يوم المتش ده كانى رجعتلى كرامتى مره تانيه
وبجد موضوع العروبه بقا كفايانا شعارات ونفسى اشوف حاجه ع الواقع

اميره الصعيد يقول...

انا مش عارفه ايه اللي بيحصل ده
طول ما احنا مش قادرين
نكون نسيج واحد

مش حنطلع لقدام

اصحوا بقي
احنا عرب
مصلحتنا واحده
متضحكوش الناس علينا


بوست جميل جدا ومعبر

مهموهة أحمد يقول...

شفقة هانم و احسان بيه ........

ايه الحلاوة دي بجد موضوع روعة

انا بجد كنت خايفة من الماتش ده لاني عارفة ان الخضر هيخلوا اولادنا يتعصبوا في الملعب

بس فين ؟؟؟؟؟؟
ده احنا ولادنا رجالة و بجد

تسلموا على البوست الرائع ده و ربنا يخليكم لبعض يا رب

سعيدة اوي بالمدونة الجميلة دي و اتمنى نكون اصدقاء

تقبلوا مروري الاول و ان شاء الله مش الاخير

و اكيد ضفت مدونتكم عندي في القايمة المهمة لانها تستحق فعلا

تقبلوا خالص احترامي و تحياتي وتقديري

wanna b a physician يقول...

والله كلام حقيقى طبعا وبعيدا عن العروبة وهذة المسميات

وبالنوسبة للكرة المدورة دى الاخ شاوشى المحتج اللى ضرب الحكم ده نفذ ضربة جزاء بنفس الطريقة اللى دخلت فيه يعنى ده بقا نقول عليه ايه تقليد ولا تخليص حق ولا كان يومنا قله ادب


تحياتى

غير معرف يقول...

بجد بوست فى الجوووووووووووووووووون

معاك حق فى كل كلمة

و الله حرام الهبل اللى حصل ده

شفـقــة و إحســــان يقول...

امل حمدى
كده برضوا يا ماما امولة بتدعيلها مفيش فايدة تحيز تحيز
عموما ادعيلها ربنا يهدها اقصد يهديها لحسن خلاص بقت استنجلينا

شفـقــة و إحســــان يقول...

احساس طفلة محبة للرومانسية
وهو بقى فيه رومانسية يا بنتى قولى فيه ملوخية معلش
ولعلمك البوست من كتر مهو فى الجون قطع الشبكة
يا ستى عرب ايه سيبك منهم وخليكى فى الاجانب تكسبى
حاجات ملونة ومعندهمش مشاكل ولا معقدين

شفـقــة و إحســــان يقول...

sun of free dom
طيب مش وانت بتفوقهم كنت جبت معاك طاسة الخضة ولا بصلة
امال هنفوقهم ازاى؟

شفـقــة و إحســــان يقول...

مهيج الجماهير
اخبارك ايه يا عم؟؟
والجماهير عاملة معاك ايه؟؟
تلاقيهم طوابير بعد فوز المنتخب ربنا يعينك
احنا الحمد لله بخير ولسه بشد فى شعر شفقة كالعادة

شفـقــة و إحســــان يقول...

قلم رصاص
انت معاك حق فى كل كلمة قلتها
بس خلى بالك من الرباط لحسن يتفك وتبان البلاوى
اقصد الخلافات والمشاكل

شفـقــة و إحســــان يقول...

Pink Dreams
الف مبروك لينا كلنا بس مش عارف انتى ليه فكرتينى بمحمد هنيدى " فى فيلم سور الصين العظيم"
عايزين فوس

شفـقــة و إحســــان يقول...

سمكة واحدة
تحفة والله ينور...ايه يا سمكة انت بتشتغلى فى البحر ولا عند كهربائى؟؟
وبعدين انا لو من ابن خالك كان بعتهالى وانا كنت اتصرفت معاها وعرفتها مقامها
اهى على الاقل ارحم من شفقة

شفـقــة و إحســــان يقول...

ستيته حسب الله الحمش
بشكرك على اهتمامك بقراءة الموضوع بالتفصيل واتمنى المرة اللى جاية نناقشه بالساطور اقصد بالسطور
اصل تفاصيلها ادق من الاجزاء

شفـقــة و إحســــان يقول...

نهر الحب
ايه الكلام ده يا نهر وهو انتى مكنتيش بتعرفى تفرقى بينى وبينى شفقة؟؟
ده حتى يبقى عيب عليكى
وهو احنا شبه بعض كده ولا هى اللى قلبت ولا ايه؟؟
ولا تقصدى انى اسلوبى انا حلو زى ما قلتى واسلوب شفقة حادق؟؟
اما بخصوص وردة فانا معرفهاش هى بس .... عيب عليكى انا اعرف الجنينة كلها
وبعدين ايه البوب بوب ده يا نهر؟؟
اختراع جديد؟؟؟

شفـقــة و إحســــان يقول...

فتاة من الصعيد
وايه حكاية هارد لك دى وانا ناقصة صعوبة وكمان بعتهالى انا مخصوص وبتقوليلى لك
وكمان بتقفلى معايا فى الكلام .... بس خلاص
عموما امشى بقى

شفـقــة و إحســــان يقول...

The illusionist
ايه يا عم زناتى ... الهلال والنجمة وقباقيب انت بتشتغل فى الجرادل ولا ايه؟؟
عموما انا عايز 10 قباقيب علشان حبيبتى شفقة
بس متفهمنيش غلط
لا علشان لزوم الحمام اصلها بتمشى حافية
وعموما هنبقى نعدى عليك ناخدهم ونشوف حكاية مصر والجزاير دى

شفـقــة و إحســــان يقول...

hana
اربع اقلام هو انتى بتشتغلى فى مكتبة ولا ايه يا هنا؟؟
ولعلمك بقى بعد الاجوان دى ما كانتش فرحة لا دى كانت فرخة وكلتها لوحدى ومديتش شفقة بس سيبتلها العضم
يلى كله بثوابه

شفـقــة و إحســــان يقول...

اقصوصة
عندك حق الحكاية كلها كورة منفوخة وربنا يستر ومتنفسش

شفـقــة و إحســــان يقول...

هديل الروح
كلمتين فى الجون لازم نحافظ على بعض
والكلام ليكى يا جارة اقصد يا شفقة

شفـقــة و إحســــان يقول...

شمس النهار
قومية مهلبية ! ما طبعا لازم يجيلك كابوس
بس قوليلى هو انتى تعرفى سيد ابو حفيظة؟؟

شفـقــة و إحســــان يقول...

morgana
لا الفرخة ليا انا لوحدى ده شفقة اللى اسمها مراتى حتى الان مطالتش منى الا العضم

شفـقــة و إحســــان يقول...

ذكرى رحيل قلم
بشكرك على الدعوة بس انا احسان مش شفقة هو الناس مبتعرفش تفرق للدرجة دى
والنعمة انتم قلقتونى على نفسى

شفـقــة و إحســــان يقول...

كيكى عوووووو
انا بروح الجبهة ودى محتاجة فقاقة
اهى احسن من القاعدة جنب شفقة
ابقى تعالى انتى هناك اتطوعى وياريت لو تقنعى شفقة بس مش بالتطوع لا بالشهادة

شفـقــة و إحســــان يقول...

عايش ولكن
وحياتك دى شعرية مش شعارات

شفـقــة و إحســــان يقول...

اميرة الصعيد
تسلمى على البق الحلو ده
بس ياريت تبقى تغزللنا النسيج وتجيبلنا كام توب قماش لحسن اخواتك شحاتين وهدومهم مقطعة والحال زى ما انتى عارفة

شفـقــة و إحســــان يقول...

الوفية للابد مها احمد
مين دول يا بنتى اللى يخلونا نتعصب ولا خضر ولا حمر
ولو راسنا وجعتنا مش هنتعصب هنبقى ناخد ريفو
سعداء جدا باضافتنا للقائمة السوداء اقصد قائمة الاصدقاء

شفـقــة و إحســــان يقول...

wanna b a physician
هو كان يومنا التلاتة مع بعض
مش مش تخليص حق لا تخليص جمارك

شفـقــة و إحســــان يقول...

انا ودماغى
ومش اى جون ده اربع اجوان
اما بالنسبة للهبل فده يخص شفقة

Medicine Break يقول...

انت استاذ

شفـقــة و إحســــان يقول...

Medicine Break
ايه يا عم انت شايفنى ماسك عصايه وطباشير وعمال امد العيال
بس يلا مقبولة منك ونورتنا

مونى يقول...

مقدرش اشوف الكلام الحلو ده
وعلقش عليه لكن اعلق على ايه
انتى مخلتيش اى حاجة ممكن حد يقولها ياقمررر
تسلم الايااادى والمصرى حيفضل مصرى
كفاية اللقب عليه علشان يكون بطل
كل زمان ومكان
اشكرك جداااا وتسلم ايدك
والبركة دايما فى مصر
وممبروووووووووووك النصر دايما لمصر