الجمعة، 5 مارس 2010

بدون عنوان


تعرفوا اول مرة ادخل المدونة واحس انى مش عارفة هاكتب ايه
والادهى من كده انى مش هكتب بوست كوميدى
او حتى هيتخلله كلمات ممكن تثير الضحك بالعكس
ممكن تثير البكاء بل وتستفزه رغما عنه
يعنى تقدروا تعتبروه مود جديد عليا
اتمنى انه يكون ولو لمرة واحدة فقط
اتمنى انه ميتكررش
يعنى اهو تغيير
يمكن اكون محتاجة اخد رايكم فى موضوع مهم
يمكن حسيت انى بحب اتكلم فى مدونتى اوى واسمع ارائكم
ويمكن بثق فيكم جدا
اول مرة احس وانا بكتب بشىء غريب ينتابنى
ممكن يكون تنميل فى اطرافى رعشة رغما عنى
او شىء بيسرى فى جسدى يؤلمنى
احساس بعدم التركيز
وفقدان للوعى
بس الم نفسى مش عضوى
مش مــــــــرض
لكن احساس بضيق شديد مع امتزاج بمرارة وألم
وطعم مر .....امر من طعم الصبار
يعنى يمكن يكون نوع مرض نفسى جديد
طبعا بتسألوا ايه الكلام الكبير ده؟؟
ومعناه ايه؟؟ وبقصد بيه مين؟؟
مش مهــــــــــــــــم
المهم انه بقى فى مسمى جديد أسمه
" الخــــــيـــــــــانة"
انا عارفة انه موجود من زمان
بس يمكن انا بس اللى حسيت انه مسمى جديد
وانه عمره ما كان موجود ولا هيبقى موجود
لانه طول ما كان فيه مصارحة وثقة متبادلة
وصدق
وحب بين الطرفين
يبقى ليس هناك وجود للخيانة
بل لا داعى لها من الاساس
مش عارفة يعنى ايه خيانة ؟؟
وليه بنضطر اننا نخون؟؟
تفتكروا الخيانة دى مرض؟؟
ولا الواحد بيلجأ لها علشان ينسى شىء معين ؟؟
او يعوض بيها نقص ؟؟
ولا هى ممكن تكون انعدام دين وعدم التزام؟
ناس كتير بتخون برغم دفء الحب فى حياتهم
وبرغم احتمائهم فى احضان الحب ده
الا انه برضوا ما بيمنعش انهم يخرجوا من الدفء ده لشوية برد يلسعهم
مع العلم انه ممكن يلسع لسعة برد خفيفة
وممكن فى حين أخر يعمل التهاب ونزلة برد شديدة
او حتى انفلونزا الخنازير
طيب ليه الحب ما بيمنعناش من الخيانة؟؟
وليه الخيانة ما بتمنعش الحب طبعا حب الطرف اللى اتخان؟؟
اكيد الكثير منكم سيجيب
الحب شىء والنزوة او اللهو شىء اخر
وممكن تكون بدون قصد
او ساعة شيطان
ولكن ليس هناك التماس للاعذار
فالحلال بين والحرام بين
طيب لو فيه حب تنفع الخيانة؟؟
فى اعتقادى ان اللى بيخون لايمكن يكون بيحب
ولا حتى بيحترم الطرف الاخر
ولا بيراعى مشاعره واحاسيسه
يمكن بيظن انه علشان بيحبه
يبقى مهما هيعمل هيغفرله
للاسف مبيفكرش ان بيخيانته بيدوس على كل شىء
وبيموت كل شىء حلو
لا... وبيقضى عليه
فبالتاكيد ان الخيانة بتمنع الحب وبتقتله
وكتر مزوالتها بتدى للانسان مناعة وجفاء وقسوة
لكن بسأل نفسى ليه الحب برغم قوته لا يمنع ذلك الرادع المظلم
المسمى بالخيانة
ولا تفتكروا انه الحب درجات متفاوتة ؟؟
اللى بيحب قوى بيمنع نفسه من الوقوع فى وحل ذلك المسمى الغريب
واللى نص نص بيحاول على اد ما يقدر انه يقاوم وما يقعش
طيب واللى بيدعى الحب
وهو ما بيحبش اكيد ولا يعرف معنى للكلمة دى اصلا
هو ده اللى بيقع فى جب الوحش المفترس
الخيانة
ولكنه بالرغم من ذلك بيدعى الحب والوفاء
مجرد ادعاء
ولكن وقت ما نشعر بالخيانة لابد ان نجرد ما نحبهم
من صفة الوفاء والحنية والطيبة والاحساس
ولن نجرد فقط
لا
بل ننتزع منهم تلك الصفات فهم لا يستحقونها
ولا يستحقون المسمى الاسما كلمة
حـــــــــــــــــــــــــــب
بل نستبدلها بمعنى ومفهوم اخر على نفس منوال الخيانة
بينى وبينكم قعدت مع نفسى احاول اجيب تعريف للخيانة
استنتجت انها محاولة قذرة وفاشلة من طرف
ليجرح بها طرف اخر جرح عميق
ومن كثرة الجرح والألم اصبح الجرح له صوت يئن وينزف ولا يندمل
بالرغم من ان الخيانة لذة وقتيه بل لحظية
يشعر فيها الطرف الاخر بانتصار وقوة لبضع لحظات
وسرعان ما لم تكتمل فرحته ولا نصره
فحين يفيق لنفسه
تتضخم مشاعره بالاحساس بالندم والألم الشديد على ما فعل
اذن لماذا لا يسأل الخائن نفسه منذ البداية
ماذا ستفعل له تلك المتعة اللحظية؟
هل عوضت عنده نقص كان يفتقده؟؟
ام انها عادة
من وجهة نظرى تفعل الكثير بالسلب
عدم رضا الرب
فقدان ثقة الغير
فقدان الحب
اعتقد ان الخيانة لها كثير من الاسباب وبرغم تعدد اسبابها الا انها لا تنفى عقابها
وبالرغم من الخيانة والجرح
الا ان الحب لازال هناك بقايا منه
نعم بقايا
فهل بعد الخيانة سيظل الحب مكتملا!
وهل تعتقدوا ان وجود الحب
يدل على انه نوع من الحب الصادق
الذى يسكن ويتغلغل فى الاعماق ومهما جرح ؟؟
ام ان الخيانة لا تهز قلعة الحب ؟؟
ولكن بالرغم ايضا من الحب الا ان النسيان صعب
فهل من الممكن ان ننسى الخيانة بالرغم مما فعلته فى الروح من تدمير؟؟
واحساس بالانكسار والنقص ؟؟
هل يستطيع الحب والنسيان ترميم الشروخ التى احدثتها الخيانة؟؟
اعتقد ان النسيان قد يكون علاج لخيانة سمعناها
وكانت على مسامعنا بين الصدق والكدب
او ربما لخيانة نشعر بها وندركها لكن لا نراها او نسمعها
لكن هل يجوز النسيان والسماح مع خيانة تاكدنا منها؟؟
واعترف بها الطرف الاخر واصبح ليس هناك مجالا للشك
أظن انه لايجوز معها نسيان ولا اى شىء اخر
فالصورة لا تزال باقية فى الذاكرة
ولكن كل نفس وقدرتها على التحمل
فالتحمل ايضا مثل الحب.... درجات
واذا استطعنا ان نتحمل
اذن علينا ان نتمهل
وان نفكر جيدا فى اتخاذ القرار بالرغم من كل هذا
ووقتها سندرك ان السماح والحب والعفو اعلى واسما
ولكن السؤال
اذا اكتشفت خيانة من تحب فماذا تفعل؟؟
تدعى عليه وتنتقم منه؟؟
ام تتركه وترحل؟؟
ام تظل معه رغم الاهانة حتى لا تهدم حياتك بسبب نزوة ؟؟
واخيرا اذا كنت تحب وتستمتع بحبك .....ولا تخون
ولا تفكر حتى فى الخيانة
فهنيأ لك حياتك ... وسعادتك ... ورضا ربك
اما اذا كنت تحب ....وتخون
فهذا قناع زائف عليك ان تخلعه
وتختار
اما الحب اوالخيانة
شفقة

هناك 41 تعليقًا:

Kiara يقول...

ازيك ياشفقتى الله مش باعدنى غير الشديد القوي

ثم انا مش اقدر استغنى عن المثاثه يوه قصدى عنك

اية حكاية البوست الفاضي دا

ااااااااااااااه بتقوللنا صباح الخيرررررر

صباح الورد ياعثل

غير معرف يقول...

اعتقد ان الحب مضاد للخيانه

بس في نزوه بتكون مع الحب ... بس بتكون مره ممكن تكون نتيجه اننا بنخاف من الحب ... بنفتكره سجن

لكن بنرجع نندم

نغفر للزلات ... ولكن لا نغفر الخيانه المتكرره

تحياتي

Kiara يقول...

اية دا دا اتحط بوست

هقرا واجى

Ms Venus يقول...

الخيانة


صدقينى الكلمة لوحدها حتى مجرد انها تتكتب حروف على الكيبورد قاسية لا بل قاتلة


بس اللى انا مؤمنة بيه ومصدقاه جدا

ان لو فى حب حقيقى مستحيل هيبقى فى خيانة

مستحيل فعلا

وعلى فكرة الخيانة مش بس جرح للطرف التانى

الأهم والاخطر هى قتل للإنسان الخاين نفسه

يعنى بيموت نفسه بنفسه

لما يفوق من لحظة الخيانة هتلاقيه بيحتقر نفسه

بيتهيألى ده عقاب اشد من عتاب الحبيب له


تحياتى ليكى

Unknown يقول...

هو المفروض ان اللى بيحب مش ممكن يخون
الا انه من الواضح انه فيروس بينتشر ولا اعرف له سبب
الا كما ذكرتى محاولة فاشلة
احيانا للتغيير او لكسر الملل
او حتى لتلذذ بشعور قد يكون غاب او اختفى من فترة بين المحبيبن
الا ان كل تلك المسميات لا تبرر ابدا الخيانة لانها جرح لا يندمل ابدا

Kiara يقول...

يانهار ابيض

انا مش هعرف اعلق

بس قول كلمتين

الحب والخيانة مش مكن يتجمعو

اما بالنسبة للتسامح فبتفرق

بدرجة الارتباط والحب

يعني المرتبطين غير المخطوبين غير المتجوزين

وعلي حسب العشرة والايام الحلوة والمواقف طبعا

ربنا يبعد الناس عن شرور الخيانة

غير معرف يقول...

مالك يا شفقتى ياقمر انتى مين مزعلك بس

بصى اللى بيحب بجد عمره ما بيخون

واللى بيخون يبقى مش يستاهلك ولا يستاهل حبك

طالما انتى هونتى عليه من البدايه

هونى على نفسك ومش تزعلى

ربنا معاكى هو اقوى واكبر من الكل

همس الاحباب يقول...

متفق مع حضرتك فى كل كلمة قولتيها
بس الخيانة انواع ودرجات
لكن هى بانواعها ودرجاتها قاسية
وان كانت اشد قسوة بين المحبين
تحياتى

just waiting يقول...

بصي يا شفقه
الخيانة جرح عمر
صعبه قوي
لانها بتكون جرح وفراق وخيانة في نفس ذات اللحظة
هو احساس بشع صعب وصفه
ومش عارفة اقولك ايه بعد كل اللي انتي قولتيه دا
في انتظار ترجع بسمتك من تاني ياشفشوقة

فشكووول يقول...

حاسس ان الموضوع صعب
خصوصا مع الدموع والحزن وما تعتريك من مشاعر واحاسيس
بس مش قادر احكم على الامور هل هى خاصه ام هو احساس لاحاسيس الغير.

احنا ممكن نقول نصايح .. بس النار ما بتحرقش غير اللى كابشها. بس يا ترى مين اللى كابشها

احاسيسك بتقول انك كابشه النار ومع ذلك انا اقول لك يا بنتى الاعتراف بالخطأ الطريق الى الصواب .. وهو اعترف بالخطأ .. والله يغفر لمن يشاء ولو شاء المخطأ فى حقه الغفران ربما يعوضه الله خيرا .. وقليل جدا جدا من الرجال لا يخون حتى لو بعينه .. فالسماح طبع الملاح والزمن ممكن يضيع كل حاجه من الذاكره.

مش عايز استفيض وربنا يهديكم الصواب

قلم رصاص يقول...

فعلا البوست المرة دي غريب على المكان
ويارب يكون اخر مره اشوف النوعيه دي عند حضرتك .. لأنك دائما مصدر للبهجة ورسم السعادة على وجوه قرائك الكرام

تقبلي مروري وتحيتي

ريمان يقول...

خيانه؟

انا اما بسمع الكلمة دى اعصابى بتتعب اصلا

الكلمه دى بحس ان ممكن يهتز من هولها الجبال

اصعب شىء فى الدنيا الخيانه

اللى بيخون بيكون ضعيف الايمان ومش ملتزم بتعاليم الاسلام
وانا بكلم عن الخيانه بكل انوعها

خيانه وحب مستحيل يجتمعوا مع بعض

لو فى حب وبعدين حصلت خيانه هنا لازم نرجع نبص بصه للحب
اكيد مش زى ما هو اكيد قل او ممكن يكون انعدم لان الخيانه عمرها ما تتفق مع الحب ابدا

ستيتة يقول...

الكلام اللي اتقال كله زي الفل
احاسيس امرأة وعبرت عما يجول في عقولهن
سواء رأي بناء عن تجربة أو رأي بناء عن رؤية لحالة واقعية

عاوزة بس اقول كلمة
انتي سألتي سؤال
لو فيه حب تنفع الخيانة؟

آه بتنفع عادي جدا جدا جدا

اصلا لأن الطرف الثاني لا يسميها خيانة

ممكن يسميها لعب عيال
لعب ديل
تجديد شباب
حقي .. من حقي

علشان كده ممكن يكون بيحب جدا
وبيبص جدا
وبيكلم جدا
وبيضحك جدا

لكن في مرحلة ما بيقول ها اخسر الحب

طالما جه في نقطة ووقف
يبقى فعلا بيحب
يبقى فعلا عاقل
يبقى خايف من الأكياس السودة :)

لو بتتكلمي عن المفهوم العام للخيانة
فكلنا سنتفق معك شكلا وموضوعا
زي خيانة الدين
خيانة الوطن
سرقة الأعراض "ماهو ده نوع من الخيانة"


اما لو بتتكلمي في اشياء نسبية
يمكن لكل منا ان يفسرها ويجد لها مبررات
ساعتها بس رأيك هو اللي ها يقنعك

لأن ما يشعر به احدنا يختلف عما يشعر به سوانا

بالنسبة بقى للرجالة
وبدون شخصنة للمواضيع
لو كان ربنا سبحانه وتعالى عارف ان الوفاء عندهم درجة اولى
مكنش حلل لهم الحلال علشان لا يلجئوا للحرام
ربنا عارف تركيبتهم
هو اللي خالقها لمصلحة البشرية

اهم شيء ان اللي اتعرض للخيانة يقدر يفوق بسرعة
يقف على رجله بسرعة
علشان خاطر نفسه اولا وصحته النفسية
وعلشان خاطر ميضيعش شقا وجهد وحب وعشرة السنين

دايما الستات كده قوية مفترية
سر قوتهم الحقيقية انهم اقوى نفسيا
ويقدروا يفوقوا بسرعة لإنقاذ مواقف تبشر بكارثة


تحياتي على الموضوع العام اللي طرحتيه بصراحة طرح قيم جدا

sony2000 يقول...

كلام حلو اوي وجامد جدا
بس في حاجه
الخائن دا مبيشوفش انه بيعمل حاجه غلط
مثلا لو واحد خان مراته لما تساليه هيقول لانها مقصره وكذا وكذا ولو شوفتي انتي بنفسك هتلاقيها موش كدا
دا مبرر بس علشان يعمل اللي بيعمله
يارب يهدي الجميع
تقبلي مروري وتحياتي

ameen يقول...

مقدرش اقولك غير ان اللى حب بجد

ممكن يقسى لاقصى درجه على حبيبه اللى خانه
وممكن يبعد عنه
مش يوم او اتنين
لا سنين

بس ف الاول وف الاخر

عمر الحب الحقيقى ما بيروح

والسماح بيجى بعد فتره الشك ما تروح

shimaa elkholy يقول...

ايه ده فى ايه ؟؟؟؟؟؟؟؟؟؟

هو الخيانه شيء مر

مر اوي

وعلى قدر الحب على قدر المراره الى هايحسها الشخص الى اتخان

مش عارفه احيانا افكر الاقي مافيش جوايا حاجه بتقول انى ممكن اسمح على خيانه من اي حد


ربنا يسترها معاكي يا جميل ويفكر كرب كل مسلم

Unknown يقول...

سلامتك شفقة هانم
فيه ايه بس؟!!
هو أحسان بــك
مزعلك ولا شىء؟

Unknown يقول...

وزى ما فتاة من
الصعيد قالت
انها ممكن
تكون
نزوة !!
مجرد زلة أو نزوة !

Humman being يقول...

أول مرة أشوفك بتكتبى بالمرارة دى ...ايه مالك؟؟؟... أنا كنت متابعة من بعيد لبعيد...

قبل ما تعتقدى فى أى حاجة أو تصدقيها... اتأكدى منها الأول...ولازم تعرفى اننا فى الأول والآخر بشر ... ممكن نغلط... بس ممكن برده نعرف ان ده غلط ونعتذر ومنكرروش تانى

micheal يقول...

واضح أن الموضوع كبير للأسف بس أنا مقدر ألم الخيانة والإحساس ده
ربنا معاكي
تحياتي يا شفقة

ميرا ( وومن ) يقول...

أزيك يا شفقة ليكي وحشة

البوست ده آثر فيا قوي يمكن حسيت كل كلمة فيه كأني كنت عاوزة اقولها
ومتفقة جداً مع كلام د. ستيتة

بس وانا بقرا الكلام افتكرت اني مسامحتش وقسيت وبعدت ورفضت كل محاولات العودة وكل مكنت ابعد كل مكنت اتعب واقسي

بس بعد سنة واتنين وأكثر بعد ماكبرت بقي واتغيرت بصيت لاقتني بقول لنفسي كان حصل ايه لو كنت سامحت وكملت
لو كنت اديلته فرصة تانية طالما كنت متأكدة انه بيحبني
طالما كنت واثقة ان خيانتة نزوة وطيش
طالما كان لسة بيحبني ومتمسك بيا وعاوز يكمل

الخيانة صعبه قوي ومرة قوي قوي بس الأصعب اننا نخسر حد بنحبة وبيحبنا علشان غلطة

لو بجد ندمان وآسف كفاية عقاب صارم محدش بيسامح وربنا مش بيقف جنبة

قلبتي علينا المواجع يا شفقة

مهموهة أحمد يقول...

شفقة هانــــــم .......
بجد واحشاني خالص و الله و ايه المود ده قلقتيني عليكي و الله

معلش يا حبيبتي اوقات احنا كده دايما لو مفيش حاجة تزعلنا بنحس اننا لازم نزعل و نحس بغيرنا اهو من باب التغيير بردو
بس صدقيني الهموم و الامراض النفسية دي بقت كتير اوي بين الناس و بقت تقديري تقولي كده عادي يعني
شيء عادي اكتئاب
شيء عادي شيزوفرينيا
شيء عادي هلوسة
شيء عادي انفصام في الشخصية
منهم لله اللي هبلوا الناس و غيروا عقولهم

المهم يا حبيبتي موضوعك جميل و كلامك معاكي فيه كل الحق بجد
و بيحصل مع ناس كتير اوي
اما عن اجابتي عن سؤالك لو لقيت حبيبي بيخوني بجد هتمنى الموت الف مرة قبل ما اعرف حاجة زي كده و اكيد هحط حد فاصل لعلاقتنا يا نكمل باحترام للطرفين يا ننفصل لا قدر الله
و بعدها هقتله و اقتلها خطافة الرجالة دي
ههههههههههههههههه
و بعدين اموت نفسي بقى لاني عايشة لحبيبي و من غيره اموت احسن

ربنا يبعد عننا كل شر يا رب
و يحميكي و يسعد ايامك كلها يا قمرايا

خالص حبي و تقديري ليكي

كيكى عوووووو يقول...

اوبه
البوست دة بجد !!! انا قلت شفقة فى الاخر هتعمل مقلب واكيد بتهزر
كل شوية اقول فين المقلب
طلعتى انتى الى اخدتى المقلب!!!
يالهوى ياشفشق ياصاحبى مين الى قاهرك اوى كدة والى وجعك اوى كدة
ادينى رقموا اقرفوا بالرسايل!!!
بجد بقى
الى بيحب بجد بيفكر الف مرة لو اى حاجة هيعملها ياترى هتوجع الطرف التانى
ولا لا!!!
ربنا ياحبيبتى يسعدك ومايدوقك طعم الخيانه تانى
شفشق صاحبى
فكك
امواااااااة

غير معرف يقول...

مساء الخير
حضراتكم ما بتعرفوني وتعليقي ماهو إلا بلاغ بخصوص من تدعي أنها مدونة /مها أحمد صاحبة مدونة الوفية للأبد
حيث أكتشفت اليوم أنها قامت بسرقة مدونتي همسات قلب http://rtoosh.com/blogs/mhyarelfarah/ ونسبت مافيها من خواطر لنفسها..وهذه سرقه وعندما واجههتها وكتبت قامت بألغاء الشات بوكس اللذي حمل عنوان مدونتي وحضرت نشر التعليقات مالم توافق عليها
وأخر بوست قامت بأدراجه تحت عنوان سر لهفتي روعة محبتي ماهو الا قصيدة قمت بأدراجها في مدونتي سابقة الذكر بتاريخ 25 نوفمبر2008 وهذا غيض من فيض ونتيجة لعدم أعترافها قررت أسفة وحفاضا على حقوقي تبليغ كل من يزور مدونتها وذلك أحقاقا للحق فقط لاغير
أرجو ألا أكون أزعجتك
مهيار الفرح...

hana يقول...

عارفة مش ممكن يكون حد حاسس حب اوي
حاسس دفا حاسس أنه في حضن بيضمه وبيرتاح جواه
ويخون

مش ممكن حد بيلاقي الرقة والحنية والاحتواء يلاقي نفسه في عيون حبيبه ويخون

القلب لو راح لبعيد يبئا السبب مش فيه على أد مالمسؤليه كلها على الطرف التاني

ليه راح قلبه لازم يكون في سبب

وكل انسان بيغلط وربنا بيسامح
والانسان كمان لازم يسامح
ويحاسب نفسه ليه وبإجابته ليه
هيعرف يرجع ويرجع الدفا لحبيبه وليه نفسه

الانسان لو إفتقد الأمان بيروح على أول مكان آمن يقابله
ولو افتقد العطف والحنيه هيروح على أول مكان يحس فيه الدفا
ويمكن يروح من غير ما يروح يروح بروحه بقلبه بفكره
وودة شيء صعب جداً

واجابة بئا السؤال بإعتقد البحث عن السبب وعلاجــه


وصباحــك سكـــر
هنون

مي يقول...

الخيانة اصعب شيىء
بس لو الحب موجود مش شوية رياح هتهزه دى اكيد نزوة طيش مؤقت بس الطرف التانى كمان اعترف لانه اكيد حس بالغلط ياريت نسامح منضيعش حاجة جميلة كانت بينا
يارب تكونى بخير

لــــ زهــــــراء ــــولا يقول...

شفقة واحسان

والله العظيم انا حاسة اد ايه الموقف صعب بالنسبة لكِ
يكفي انها اعتذرتلك قدامو كل الناس اللي في المدونة


السلام عليكم ورحمة الله وبركاته
اللهم اكفينا شر الخائنين
واحمينا من شرور خلقك اجمعين

الخيانة صعب اننا نسامح فيها
لانها لما بتحدث بتكون قااااااااتلة تنزل على القلب كالخنجر وضربتها تفقد الحب الحياة
ربنا يحمينا يارب منها

رحلتنا في الحياة يقول...

افتكر ان اللى بيحب بجد مبيعرفش يخون مرة سمعت جملة من واحد كان ليه علاقات كتير قبل ما يرتبط بالانسانة اللى بيحبها ولما حبها قالها انه مش شايف فى الدنيا غيرها ومش بيحاول يفتح عينه فى واحدة تانية
يبقى فعلا الحب ضد الخيانة والعكس
بس فكرة انى هقابل الخيانة ازاى فانا من النوع اللى بكرهه الخيانة من اى انسان حتى لو صديقة واختيارى هيكون البعد مهما كانت مشاعرى اتجاه الانسان اللى خانى
بس اكيد الخيانة برضو درجات يعنى فى خيانة ممكن يتسامح فيها

ذو الوجه المبتسم يقول...

ولكن السؤال اذا اكتشفت خيانة من تحب فماذا تفعل؟؟

تدعى عليه وتنتقم منه؟؟

ام تتركه وترحل؟؟

ام تظل معه رغم الاهانة حتى لا تهدم حياتك بسبب نزوة ؟؟

واخيرا اذا كنت تحب وتستمتع بحبك .....ولا تخون
ولا تفكر حتى فى الخيانةفهنيأ لك حياتك ... وسعادتك ... ورضا ربك

اما اذا كنت تحب ....وتخون
فهذا قناع زائف عليك ان تخلعه
وتختار اما الحب اوالخيانة

اعتقد انك كتبتى كل الاحاسيس اللى بيفكر فيها الطرف الاخر

اما عن الخيانة بحد ذاتها فهى مرفوضة رفضا باتا

اما اذا كانت مجرد نزوة فاعتقد ان التسامح والغفران مطلوبين

اما عن الحالة مش عارف هى حالة خاصة ام عامة

تمنياتى لك بالتوفيق

خواطر شابة يقول...

موضوع غريب عن الجو العام لهذه المدونة
الخيانة صعبة وقاسية خصوصا لو كانت ممن نحب لكن عموما اللي بيحب بجد بيغفر ويسامح خصوصا لو كانت غلطة حبيبه نزوة عابرة وندم عليها حبه بيخليه يصفح ويغفر
أسعد الله قلبك بكل الخير

akeedba7ebha يقول...

يا شفقه انا عن راى ان الخيانه هتيجي من جه واحده والى اساسها تخريب الامور والحياه بين الخائن والى هيخونه والى هي تعتبر زى اى حاجه وحشه زى السرقه والنصب وكل الحجات الى ممكن يكون اساسها هو الشيطان فهو بيجى عند الفرد الى بيبقى تحت اى نوع من انواع الضغط فى حياته ويكون ساعتها فى نقطه ضعف معينه وبيقوم الشيطان يوس وس طبعا ووكل ده لجعل الانسان عاصى بالله وربنا ما يورينا اى حاجه من الى فوق دى

وطبعا الحجات دى كلها بتبقى سهله لذوات النفوس الضعيفه والى بتبقى متكررة بصفه مستمره ايا كان نوعها من خيانه او سرق او نصب او اى شىء مضر بالانسانيه وعمل شيطانى

حياة يقول...

انا رأيي زيك
لو حدي بيحب أكيد هيحترم مشاعرك
وهيخاغ يضايقك
فعلا اللي بيحب مش ممكن يخون
لأن حبه لحبيبه هيمنعه انه يخون

Maha Shahen يقول...

عبرتى بكلمات رقيقه وشديده بدت لى كأنها طلقات تنير اجواء السماء لننظر اليها ونهرع لنرا ماذا يحدث

ببساطه شديده زمان كنت سمعت احد الشيوخ كان بيقص علينا قصة وقال انه الشيطان بيزين لينا الحرام علشان نلاقى فيه السعاده الزايفه وروى قصه عن اتنين وقعو فى جريمة الزنا وبعدها قررو يتوبو الي ربنا ويتزوجو لكنهم سرعان ما شعرو بعد الزواج بزوال السعاده الي كانت محيطه بيهم فى اللحظات القديمه المحمومه التى جمعتهم

ببساطه تانيه الشيطان بعد عن تزيين المشاعر ليهم وكان لازم يصبرو علشان يشعرو بجمال الايمان

دا بالنسبه لسؤال ليه بنخون
اما عن السؤال ازاى بيكون تصرفنا بعد علمنا بالخيانه فهى بتتوقف علي قدرة كل شخصيه وعلي تحمل الموقف نفسه وازاى عرف بأنه مخدوع بحب عمره

فى ناس بتقدر تتحمل الالم وتقول هنقابل الاصعب علشان تهون علي نفسها ومرحله وتعدى مهما كانت النهايه وناس يقتلها الالم لأنها مقدرتش تستوعبه وناس وناس وتختلف الناس وتتفق وفى النهايه النفس البشريه عليها تصرفات ما تعدمها دايما غريبه ومفزعه وما شاء الله فى الاجدد دايما ولو حاولنا نفهم هنحلل الى ما لا نهايه وفى الاخر مش هنفهم يبقى نعمل ايه نطلب من ربنا الرحمه ونطلب منه ينور طريقنا ونحمده لو اخدنا القرار الصح او حتى الغلط لأنه قدر الله وما شاء فعل
الأهم منخافش وانا اسفه للرغى الكتير اللي بقى ملعبك فهضطر اسكت حاليا
خالص تحياتى ليكى

صدى الصمت - عاشقة الورد - يقول...

الخيانة شىء بشع بيدمر علاقة كانت رائعة وبيدمر الطرفين لأن الخاين بيندم بعد فترة قصيرة بعد ما بتروح الغشاوة من على عينة وقلبة وعقلة وبيحس فجأة إنه إتسرع وإتصرف بلا وعى وبيحاول يرجع لعل الطرف الآخر يغفر ولكن دايماً بيكون فات الآوان
تحياتى

Unknown يقول...

والله لازم نتسامح مرة ونتعاتب مرة
لكن الخيانة في حد ذاتها صعبة قوي على القلب وخصوصا القلب اللي مخلص

مدونة رائعة وكلام مهم جدا

تحياتي

ويبقى التواصل

سمكه واحده يقول...

علي فكره جيت قبل كده
ومعرفتش اعلق ومشيت
وجيت تاني قلت يمكن كاتبه حاجه جديده
اصل الموضوع ده بيجرح اوي ووحش اوي
والخيانه شيئ مش سهل
وبيوجع اوي

لا اكتبي بوست بيضحك بلاش الحزن
ربنا يبعد عننا كل حاجه وحشه
بقالك كتير مش بتكتبي

فينك؟

Unknown يقول...

انا مش هعلق علي البوست ده
انا بس هقولك اني اتبسطت اني شفتك انت واحسان في بورسعيد
انا مالحقتش اسلم عليكم
بس بجد سعيده اني شفتكم
:)

-_- يقول...

كتير شفنا الحب و الخيانة بيجتمعوا مش زي ما كيارا بتقول

كيكى عوووووو يقول...

البوست دة بقى خلل
ياريت تغير المود
ولا مش قادرة
اسمعى شعبولا
عوووووووو

مونى يقول...

كلامك فى الصميم واسال عن اجابته
ليا فترة طويلة جداااااااااا
طالما الحب موجود يبقى لييييييه
الخيانة
والغريب اذا اكتشفنا الخيانة ولو حتى
بالصدفة لانها طبعا بتكون مدارية
فى السررررر هع
الاخ يتاسف ويقول انا معرفش عملت
كده ازاى وانا ماليش غيرك وقدرش استغنى
عنك والكلام المعروف ده وده بيبق حقيقى على فكرة بس اعتقد انه بيبقى حب امتلاك مش اكتر انا بتكلم عن تجربة شخصية
لان ممكن الطرف الاخر برضه اللى هى الاخت يعنى هع هع ممكن تكون هى الخاينة
بس لحد دلوقتى مش عارفة اوصل لحل بجد
يلا اهى عيشة والسلام وادينا بنفضفض
يعنى هو فى ايه كويس لما حتفضل دى
اتمنى انى اتحفتكم بردى لكن اكيد مافيش اى افادة
بالتوفيق يا عسسسل

حنين القلب يقول...

اولا ازيك يا شفقة وحشتينى والله
معلش علشان مش كنت متابعة الايام اللى فاتت الولادة ياختى بقى

المهم
الخيانة هى كل اللى قولتيه تعويض نقص ويمكن تعويض حب ويمكن نزوة بس الاخر اسمها خيانة
المهم ان الطرف اللى بيتخان مش بيقدر ينسى الخيانه دى هو ممكن يكمل حياته علشان مش يخرب بيته انما بتفضل جواه

الاهم من انه يكمل معاه او مش يكمل
انه يتصالح مع نفسه ويحاول ينسى بجد علشان يعرف هو نفسه يعيش من غير ما يحس انه اقل من اى حد