الأحد، 11 أبريل 2010

الحلول الشفشقية للخيانة الزوجية



النهاردة انا عايزاكم تفوقوا وتصحصحوا معايا
وكل واحدة تروح تعملها جردل فسكافيه مركز
علشان تركزوا معايا وتصحوا من الغيبوبة اللى انتم فيها دى
وتسيبكوا من النوم على ودانكم ووقفة المطبخ اللى قشفت رجليكم
وخليكوا معايا وباذن الله هتغرقوا
اقصد هتفلحوا
اليكن بعض الدروس المستفادة
والمقترحات المجربة من ناس كانت نايمة على ودانها
لحد ما بقوا صم وبكم
ازاى تعرفى ان السيد قشطة اقصد سى السيد بيخونك

اولا... لو جيتى تكلميه وهو ولا هو هنا ولقيتيه متيم وسرحان
وعامل فيها عبده الحامولى ومتنح
ولا اللى عايش فى دنيا الخيال
وقتها لازم تعرفى هل هو سرحان فى كيفية تدبير المم ولقمة العيش
اللى هيطفحهالك وبيحاول يجيبها كده تجيله كده
لحد يا عينى ما اتعته وادروش
ولا الموضوع فيه
ان وكان واخواتهم وعيلتهم كلها
والباشا متيم بواحدة رايقة
وقتها لازم تفسدى عليه لحظات الهيمنة
وتحوليها لكابوس وسيطرة
وتقعدى ترغى فى اى حاجة لحدما ينسى اسمه واسمها واسم امه وياريت لو ينساكى انتى كمان ويدخل فى اعراض فقدان للذاكرة
وساعتها تبقى حولتى دنيا الخيال لدنيا الجنان


ثانيا... لو لقيته دخل الحمام وعمال يغنى ويدندن
ومبسوط على الاخر وفاتح بقه اد كده مترين
وقتها يا اما يكون مستحلى صوته وعايز ينافس ابو الليف بمناسبة الحمام
او انه افتكر نادية لطفى بتاعته وبيغنلها الحلوة الحلوة عيونه
وساعتها علطول ومن غير كلام
تدخلى تقرفيه وتكركيبيها فوق دماغه
وتخليها زحمة يا دنيا زحمة
وتقوليله الحمام خرب والدش باظ وعايزين سباك
والميه قطعت والبلاعة وقعت عند الجيران
وتزهقيه فى عيشته وتطفحيه كلام
وتخلى عيشته بكابورت
لحد ما يزهق ويقعد هو يصلحهكمان وهو خارج من الحمام يتزحلق على السيراميك
تنكسر رقبته ويبطل يغنى تانى

ثالثا....لو قبل ما يخرج من البيت قعد 300 ساعة ودقيقتين ادام المرايا
وعمل فرق من النص وسبايكى
وانتى متعودة على سيد ابو حفيظة
وخرج واول لما رجع
تلاقى ريحته حلوة وجايبة اخر الشارع
وانتى مش متعودة على كده
ومتعودة على ريحة الفازلين و اسمنتكو وبصله المحب دجاجة
علطول وفى وقتها تقعدى تشمشمى زى الكلاب
وتفتحى مناخيرك على الاخر
ولازم تعرفى الريحة دى مصدرها ايه واستوردها منين
وهل زهق ومناخيره باظت من الريحة الافيه
اللى هو انتى
وحب يغيربتركيبة من ام 10 جنيه
ولا دى ريحة مزة ؟
و فى وقتها تروحى تجيبى جاز
وتكبى عليه علشان اثار الريحة تروح
وميفضلش غيرك
وغير ريحة الافيه المفحفحة منك
وتبقى انتى والجاز عليه
عيشة تحرق الدم
مهو يا اما كده يا اما هياخد
على التركيبة ويفك منك

رابعا... لو لقيتى التليفون كل شوية عمال يرن
ولما تفزعيه وتقوليله رد
يقولك اصله واحد غتيت من الشغل
واذا رد ياخد التليفون ويرد فى الحمام
او كانه بيوشوش نفسه
مع انه فى العادى صوته بيجيب 60 محطة بعد البيت
وقتها لازم تصحصحى وتشوفى ده صاحبه فعلا
ولا زميلة صياعة وسنكحة سفلقية
ووقتها تشوفى الاسماء اللى على التليفون
ولازم تعرفى مين حنفى وحسب الله وزينهم
اللى مسجلهم على التليفون دول
لانهم اكيد هيبقوا بدل حوحو وتوتو وفوفو
اختصار علشان ميفهمش الحمار
وقتها لازم تتقنى فن اللعب مع الكبار
وتمسكى التليفون تكسريه ميه حتة
وتقولى دوست عليه غصب عنى
ابقى هات غيره
خليه يرجع لايام الزنكوجراف

خامسا... لو جيتى تغسلى وفجاة لقيتى على هدومه
بقعة حمرا روج يعنى
وانتى من النوع اللى بيستخدم سمنة بلدى وكاتشاب
ولما تساليه يقولك اصلى كنت باكل كشرى مع اصحابى
والصلصة وقعت على هدومى
وقتها تروحى جرى تاخدى الهدوم وتحليليها فى معملك
وتجرى عليها كل اختباراتك الميكياجية
ولو اتاكدتى انه روج مش صلصة كشرى
تسففيه طن كشرى مشطشط لمدة 80 شهر لحد ما يقول حقى برقبتى
وتخلى بدل بقعة الروج دم اهو كله حمار

سادسا.... لو بالصدفة البحتة لقيتى شعره حمرا او صفرا او ميش
على كتفه
وانتى من ذوات القرعة تتعايق بشعر بنت اختها
او من انصار الشعر المفلفل يكسب
وقتها لازمن ولابندق تخليه يقر ويعترف
واوعى يضحك عليكى ويقولك ده شعر الكلب بتاع الجيران
كنت بلاعبه
وهو بيخاف من النملة
ساعتها تروحى سريعا تجيبى المكبر
وتشوفى بنظرة تفحصية هل هو شعر كلب ام انسيه؟؟
لو كان شعر كلب
تروحى تطلعى عين الجيران
وتسمى الكلب
اما لو كان شعر انسية تروحى تجيبى الكلب بنفسك
وتعرفيهم على بعض
ولو الكلب انكر معرفته يبقى تصدقى الكلبوتكدبيه وتخلي الكلب يعضه
و يشمشم فيه لحد ما يغمن عليه من الخضة
ويبطل يكدب ويلزقها فى الكلاب
واهو يبقى اخدتى ثواب واكلتى الكلب

سابعا...لو قعدتى طول اليوم تعملى اكل واشى محمر ومشمر ومسبك ومقلى لما طلعت عينك وبظت لبرهوجه من بره قالك شبعان مش عايز اكل
ساعتها لازم تعرفى هل اكلك انتى اللى عك
وبتطبخى مسامير وشوربة صراصير
والراجل ما صدق خلع وفك ببطنه وانقذها من الدمار الشامل
ولا اتغدا بره مع مزه ودفعته دم قلبه
وجابلها وجبة هابى ميل من ماكدونالذا
وده الاحتمال الاكبر
وقتها جرى تعملى شوربة ملح انجليزى وتسيقهاله
على انها عصير جربان فروت
وتستنى لما يرجع
ووقتها هتتاكدى اذا كان اكل بره ولا لا
ولو اتاكدتى مش هوصيكى تطفحيه الاكل تنتوفه تنتوفه
حد ما معدته تصرخ وتقول جااااااااى وتجيله قرحة

ثامنا.... لو قاعدين بتتفرجوا على التليفزيون
وفجاءة لقيتيه بيتأوب وقام اتسحب
دخل ينام فى الاوضه التانيةاو راح نام جنب العيال
لازم تعرفى هل هو قرفان منك ومش طايقك
لانك من النوع المتأثر بالاوركسترا السيمفونى
ومناخيرك منفدة من كل ناحيةولا متيم بواحدة تانية وواخد المخدة فى حضنه
وعمال يفكر فيها ومتأثر بفيلم الوسادة الخالية
لو اتاكدتى من المخدة انها الوسادة الخالية
يبقى تخلى ليلته خل محشى قطن
وتبحترى القطن بتاع المخدة فى الاوضة على دماغهلحد ما ينام على الارض
وكمان تدفعيه حق المنجد ده فى حالة لو المخدة مش فيبر

تاسعا...لو طلبتى منه مصروف البيت
ولقيته علطول الخط مفلس
وجيبه خربان برضه تتاكدى الاول علشان الظلم حرام
يا ترى انتى اللى خاربة بيته وبيت اللى خلفوه
ولا بيصرف على مزة تانية
وانتى مش دارية
لو مكنتيش من النوع الخروبى وكنتى من النوع التمر هندى
يبقى لازم تعرفى فلوسه بتروح فين وتعمليلها غسيل اموال
ولو عرفتى انها بتتصرف على مزة
تعلنى ساعة الصرف مش الصفر
مش عايزاكى تخلى فى جيبه ربع جنيه مخروم
رجعيه لايام العشرة ساغ والشلن
وكمان انتى اللى تديله مصروفه
وما يزيدش على تلاتة تعريفة
علشان التبذير تعريفة مواصلات
وتعريفة ساندوتش فول يفطر بيه
وتعريفه حاجة ساقعة
ايه هينهب؟؟

عاشرا..... لو سالتيه انتى بتحبينى يا حبيبى؟؟
ورد عليكى بهزة رأس بعد تفكير عميق
وسكت
يبقى الموضوع مش تمام
وبيخلص نفسه وخلاص
اما لو رد وقال
اه من غير نفس
ورحتى فزعاه انتى بجملة هو انت بتقولهالى شفقة واحسان
فقالك اه بالظبط كده وصدق على كلامك
يبقى تشمى ريحة مش تمام
ريحة رنجة وفسيخ
ووقتها تنقضى عليه كالاسد المفترس
وربنا معاه ويرفع عنه

اما اذا قام جاب جاز وولع فى البيت وفيكى وفى نفسه
يبقى وقتها تتاكدى انه اخلص واوفى زوج فى الكون
لانه هيكون مات وريحك وارتاح من وشك
ووقتها هنيأ لكى بيتك واكلك اللى هتاكليه لوحدك
وسريرك اللى هتنامى فيه لوحدك من غير ازعاج
ومعاشه اللى هتتشبرقى بيه على نفسك
ده غير حصولك على لقب ارملة
اللى زيه زى ملكة جمال التوفيقية
والعرسان هتبقى نمل عليكى

واخيرا لو جوزك راجل مخلص ووفى وده نسبة ضئيلة جدا
فحاولى جاهدة انك تحافظى عليه وعلى بيتك
وتخلى حياته كلها حب وهناء وسعادة

اما لو كان من نسبة 99% الخاينين
فاوعى ترخرخيله طبلة ودنك بوتيتا
ولا تسمعيله ووريه العيشة الهباب وزحف التراب
وبصى لنفسك ولو طلعتى غلطانة
يبقى مفيش غير كلمة واحدة هاقولهالك
حسبى الله ونعم الوكيل


شفقة



هناك 59 تعليقًا:

سارة درويش يقول...

ههههههههههههههههههههههههههههههههههههه

المفروض كنتِ كتبتِ في الآخر

اهنئك لقد حصلتِ على الطلاق بدون محامي ولا محاكم هههههههههههههههههه

وحشتيني يا شفشوقتي والله اووووووووووووووي

just waiting يقول...

عثل ياشفشوقه بس ليه دا كله
انا دايما اقول ان احسن حاجه الواحده مننا تحط جوزها او الي هيبقى جوزها في البانيو وتحط فوقيه صودا كاوية يقوم يسيح وينزل في المجاري وكدا ماتخدش اعدام لأن مفيش جسم جريمه

sony2000 يقول...

ههههههههههههههه
حلوه دي
بجد
نصايح هايله:)

فكرة من الزمن ده يقول...

انا مش عارفة والله حسبي الله ونعم الوكيل في مين اشاسا ياهيفاء
نسيتي تقولي في الاخر لو نفذتي كل الموصايا دي
ماتتفاجئيش ابدا بلقب مطلقة او ارملة
لانها هتبقى النهاية الطبيعية لقصة الحب وده التطور الطبيعي للحاجة الساقعة ولازم الرجالة تعمل جمعية الرفق بالازواج ومنظمة حروق الرجل
تحياتي

صيدلانيه طالعه نازله يقول...

ههههههههههههههههههههههه
هههههههههههههههههههههههههه

مش ممكن انتى مشكله يا شفقه هانم

انتى متخيله واحد متجوز مسز كرومبو حيفكر اصلا انه يعمل كده
يبقى هو الجانى على نفسه

و على راى المثل
ععلى نفسها جنت براقش

الا قوليلى هو لسه عايش و لا الله يرحمه خلاص

مش جوزك طبعا
انا قصدى الكلب
ههههههههههههههههههههههههههههه

سمع هوص (Abo 3li) يقول...

ياساتر يارب.. انا دخلت ندوة لجمعية المرأة المتوحشة بعنوان "كيف تقتلين زوجك بدون سم فيران".. ولا ايه؟؟
براحة شوية دحنا غلابة...

بس بوست يموووت من الضحك

شفـقــة و إحســــان يقول...

سمو الاميرة سارة
حاشى وكلا يا سارة طلاق ايه يا امى واحنا هنسيبهم بالساهل
الطلاق ده معناه انهم يخلعوا منا
لا والف لا لازم يتعذبوا الاول ويفرهضوا ويموتوا على ايدينا
امال مين اللى هيدفنهم

شفـقــة و إحســــان يقول...

Just waiting
اهم حاجة فى العملية الانتحارية دى ان مقدار الصودا الكاوية ميقلش عن طن علشان يختفى تماما وميبقاش فى معالم جريمة بس بقولك ايه خلى بالك من البانيو لحسن يتلسع اه
واحنا ناقصين مصاريف يبقى موت وخراب بانيو قصدى ديار

شفـقــة و إحســــان يقول...

sony2000
حلوة وصفايح وانا بقول دوقوها انا بقول اقروها

شفـقــة و إحســــان يقول...

فكرة من الزمن ده
معاكى حق حسبى الله ونعم الوكيل فيكى يا هيفاء اصلها هى اس المشكلة هى اللى خلت الرجالة ماشية ملوحة
ربنا ياخدها بقى ويقل منها هى واللى زيها
وبعدين ايه شغل الاعلانات ده
عموما اهى الحاجة ساقعة هتطرى على الحروق اهو كله بثوابه برضوا

شفـقــة و إحســــان يقول...

صيدلانية طالعة نازلة
انتى جعانة ولا ايه يا دكتورة؟؟
ايه اللى جاب سيرة الكرنب دلوقت ده حتى تقيل على المعدة
وبينى وبينك هو مش متجوز كرومبو ده متجوز مازنجر نفسه
اما بالنسبة للكلب فهو لازال ينبح هوهو
بس اوعدك اكتم نفسه ومخلهوش يفلفص تانى

شفـقــة و إحســــان يقول...

سمع هوص
اذا كان على القتل فده مفيش اسهل منه
ده زى شكة الدبوس واحنا والحمد لله
ادها وقدود قال سم فئران قال
ده للفيران
اما البنى ادمين ليهم سم تانى مخصوص من تصنيع وتقفيل صينى مصرى
وشوف انت بقى
قال غلابة قال عموما الجمعية بتساعد الغلابة كل اول شهر ازازة زيت وكيس رز ابقوا فوتوا علينا بعدين

مهموهة أحمد يقول...

ههههههههههههههههههههههههههه
يا نهار ابيض يا شفقة كل ده يا شيخة ؟؟!!!!!!!!!!!!
حرام يا شفقة ده الرجالة دول حلوين اوي و دمهم خفيف اوي و بحبهم اوي اوي
ههههههههههههههههههههههههه

بس لو شميت انه بيحب واحدة تانية يبقى نيلة و قطران عليه و على اللي خلفوه
هههههههههههههههههههههههههههه

بس بجد لو الراجل بص برة البيت بيبقى فيه حاجة غلط في الست نفسها او تعاملهم مع بعض
و فيه رجالة طفسة بحد ذاتها مهما الست عملتله لازم يبص برة ما هو طفس

يللا ربنا يرحمنا من الناس الوحشة دي

وحشاني موت موت موت و الله
و اسفة على التاخير يا قلبي بس فعلا كنت بعيدة عن النت الفترة اللي فاتت دي

خالص حبي و حبي و حبي و اشواقي

ستيتة يقول...

ونعم النساء
وصفة من الأخر حقيقي
بس هو ياريت لو جاب جاز وولع
يولع في نفسه بره البيت زي الصينين
وياريت ملوش دعوة بيها وبالعيال وبالبيت اللي هي ها تورثه وتقعد على تله :)
عسولة يا شفشوقة وربنا

قلم رصاص يقول...

هههههههههههههههههه

محلاها عيشة العزوبيه


نصايح فظيعه بجد

أحييكي على البوست الجميل دا

والله كفايه الصور.. مش عارف بتجيبوها منين هههههههههههههه

مع تحيتي

Kiara يقول...

هههههههههههههههههههههههههههههههههههههههههههههههههههههههههههههههههههههههههه


درس حماتى ملاك


موتيني من الضحك ياشفقتي

شوكولاتة يقول...

هههههههههه
بجد مفترية جامدة يا شفقفق بقولك ايه انا عاوزاكي تعملي كتاب واوعدك ان البيوت حالها هينصلح علشان كل واحد هيعيش لوحده ويرموا العيال في ملجأ

شفـقــة و إحســــان يقول...

مهموهة
بقى الرجالة حلوين اوى يا مها
ايه عليهم عسل وسكر ؟؟
كمان دمهم خفيف علشان عليه ميه مغشوش يا مها
بذمتك كده يبقوا حلوين
وبعدين ايه شميت دى هو انتى اتاثرتى بالبوست بسرعة كده طيب خلى بالك لحسن حاسة الشم تزيد وبعد كده تعضى وتهوهوى
وقال لو عرف عليكى قال قولى مش هيعرف عليكى مين يا بنتى ده الاصحاب والاقارب والجيران
وهما بيعتقوا
وزى ما قلتى طفسين واى اكل فى سكتهم هينسفوه مش هياكلوه
ربنا يرحمنا بقى

شفـقــة و إحســــان يقول...

ستيتة حسب الله الحمش
وهو الولعة كمان دخل فيها الصينين يا دى النولة عليهم بقى ينافسونا حتى فى الحريقة مع انى كنت اعرف انهم باردين بس اظاهر احنا اللى مؤثرين وعاديناهم
واوعدك يا دكتور المرة اللى جاية ادعو الرجالة واحثهم على التوليع فى نفسهم بجاز ومية نار بره البيت
علشان ناخد احنا راحتنا بعدهم
اهو الواحد يشم نفسه

شفـقــة و إحســــان يقول...

قلم رصاص
ماشى يا عم عبد الوهاب محلاها عيشة الحرية
وهو فيه احلى من كده
وبعدين التحية لوحدها متنفعش لازم ترفع القبعة
وبعدين ايه حكاية كفاية دى انت انضميت لحركة كفاية ولا ايه؟؟

شفـقــة و إحســــان يقول...

كيارا
لا لا يا كوكى انتى كده هتلخبطى بينى وبين سحورة حماتى ملاك بعدين الحموات تتلخبط مع بعض ويحصل تبديل فى الزحمة
كفاية حما واحدة

شفـقــة و إحســــان يقول...

شوكولاتة
كتاب بس كده وحياتك لافكر فى عمل كتاب قنبلة ذرية
وهسممه قصدى هسميه لكى يا سيدتى المتوحشة
بس اياك وان متنفذوش اللى هاقول عليه انتم حرين
اما بخصوص العيال فانا شايفة ان مصيرهم هيبقى الاصلاحية مش الملجأ ده كفاية ان امهاتهم هيعملوا بنصايحى يعنى لومانجية

رحلتنا في الحياة يقول...

امممممممم اللى يعرف ان مراته ممكن تعمل فيه كده مش هيفكر ولا لحظة واحدة فى واحدة غيرها هههههههه
مش عارفة انا بس بشوف لو فعلا اى انسانة حسيت يتغير مشاعر جوزها تزود هى فى مشاعرها وتهتم بيه زيادة واكتر من الاول وده كفيل يحسسه بالذنب ويرجعه لعقله ويعرف ان مراته هى الوحيدة اللى بقياله وهى اللى يهمها مصلحته ويبطل عينه الزيغة

Cute Kitty **sookra يقول...

يالهوى يالهوى عليكى ياشفشوقه
هو دا الكلام ولا فلا
صح اكده
وفى الاخر اعتقد انها لازمن ولابدن انها تبندجه
وحشانى اوى جدا خالص

حنين يقول...

ازيك يا شفقه هانم
وحشانى مش بشوفك ليه
حلو اوى البوست
ايوه كده اديلو على دماغه
اصلهم كده يستاهلوا
تحياتى

Sonnet يقول...

اضحك الله ثغرك

morgana يقول...

ههههههههههههههههه
ده علي كده الواحد يعم حسابه مستقبليا انه هيحط عنيه في وسط راسه
وبعد ما هيحطها ميضمنش ايه اللي هيحصل بردو

بس بوست جامد:)

باحث عن حب يقول...

iiههههههههههههههههههههههههههههههه
\مصيبه كلامك
عايزه تشبعى فيها لطم
كلامك زى السكر
بس انتى مصوره ان البنوته انها طيبوبه
والواد مفترس
والله احنا اللى غلابه
وانتم الطيبوبات
مفترييييييييييات علينا
ومش هيبقى ما بنا الا
الشفقه
والاحسان
مدونه
رااااااااااااااااااائعه

Maha Shahen يقول...

هههههههههههههه
والله انك زى السكر
بعدين لو بيعمل حاجه كدا ولا كدا
كفايه بس تجيبه المدونه وتفرجه علي الصور العجيبه اللي انتى نشرتيها فيعرف مراته مقدمه علي ايه فيلم نفسه تلقائيا بدون اى وسائل مساعده
وتقوله شوف لو بتفكر تخون ولا بتخون مصيرك هيبقى زى ابو سنان ولا اللي زى صورة الشفايف ولا الأسنان يا وعدى علي الصور تفزع اجدع شنب ههههههههههه
وبلاش سيرة الأسنان احسن انا لسه راجعه من عند الدكتور اعااااااااااااااا

يلا تحياتى ليكى عسوله دايما
وربنا يبعد عنا الخيانه والخينين

لــــ زهــــــراء ــــولا يقول...

شفيقه هانم

مش قادره اعلق من كتر الضحك
ربنا يسعد قلبك

تسلم الايادى

Unknown يقول...

ههههههههههههههه


يالهوي يابنتى حرام عليكي .. ايه النصايح اللى تدخل السجن دي .. دي جمعية المرأة المتشردة .. يوه ، قصدي المتوحشة

ههههههههههههه

همس الاحباب يقول...

هههههههههههه
مش ممكن بجد ربنا يكون فى عونك يا سونه
قلبى معاك
ههههههههههه
تحفة بجد
تسلم الايادى
وحسبى الله ونعم الوكيل
هههههههههههه
تحياتى

هي وظروفها يقول...

الله يكون في عونك يا استاذ محمد صعبت عليا

ومني منك ادليت اي شيء نسائي من حياتي

انت متجوز حد بيعرف ازاي انك ليك في اللون ولا لأ

ياااااااااه ايه كل ده انا انا مستقيم احسن ولا بهدله ولا تفتيش ولا ضرب سبيك انتي

احلي من الشرف مفيش
شلامي ليكي ولاستاذ محمد وربنا يهنيكم

travelertrades يقول...

ربنا يستر على جوزك ده لو لسه مولعش فى نفسه

شفـقــة و إحســــان يقول...

احاسيس ايوشة
بقى عايزة الواحدة منا تزود مشاعرها كفولة؟؟
طيب قولى بامبرز تبقى معقولة
ووحياتك تزود ما تزودش ما بينفعش معاهم حاجة
وزى ما قلتى عيناهم فيها حول ربنا يحفظنا

شفـقــة و إحســــان يقول...

Cute Kitty **sookra
هو ديه الكلام التومام لازمن ولابندق تبندجه
الا قوليلى انتم بلدكم ايه علشان نيجى ناخد عندكم كورس بندجة فى الاجازة

شفـقــة و إحســــان يقول...

حنين
بقى بدل ما تهدينى تشعليليها وتولعينى
طيب شايفانى بخسر مكانى السياسى وحياتى فى البيت مهددة تقومى تحمسينى وتولعيها زيادة اقول عليكى ايه
عموما انا بس خايفة اديلو على دماغه اقوم اروح فى داهية وتخسرونى
الطيب احسن
والجرى الجدعنة كلها

شفـقــة و إحســــان يقول...

drsonnet
ايوا كده كلمتين حلوين باللغة الفارسية
الا ثغرك دى هندى ولا تونسى؟؟

شفـقــة و إحســــان يقول...

morgana
الست مرجانة
خلى بالك من على بابا المستقبل
بس نصيحة متحطيش عينك فى وسط راسك لان مناخيرك موقعها هيكون ايه من الاعراب

شفـقــة و إحســــان يقول...

باحث عن الحب
هتفضل تدور وتبحث وابقى قابلنى لو لقيته
قال حب قال
وبعدين ايه تشبعى لطم دى هو الطم اليومين دول بقى بدل اللحمة ولا ايه؟؟
كمان انا شايفة سيرتنا جت هنا
ها فى حاجة ولا ايه
وش مكلضم وماسك ساطور
هههههههههههههه

شفـقــة و إحســــان يقول...

nour shahen
لو ما انا مقولتكليش ده هو اللى حاطط الصور بنفسه تحت تهديد السلاح
كمان لو عمل حاجة كده ولا كده هو مش هيلحق ياعينى مش يشوف الصور
لا ده مش هيشوف اى حاجة تانى
هيبقى عمى اصلى على ايدينا اختك
وبعدين بطلى تجيبى فى سيرة السنان لحسن هى بتتلكك

شفـقــة و إحســــان يقول...

لولا وزهراء
لا استنى عندك انتى وهى
مين فيكم اللى هتعلق
وهتعلق ايه بالظبط
اه احنا نخاف المدونة كلها حاجات رفايع وثمينة
والنعمة اوديكم فى داهية
طلعوا اللى علقتوه بالذوق

شفـقــة و إحســــان يقول...

انسانة
يا بنتى ما هى دى مبادى الجمعية
ومن اهم شروطها ان تكون المرأة متشردة ولومانجية مع سبق الاصرار والترصد

شفـقــة و إحســــان يقول...

همس الاحباب
لو بتعزه بجد يا خالد مش هيبقى قلبك بس لا ده قلبك وفشتك ومصارينك وياريت لو جيبك كمان
لانه اكيد هيحتاج معونة

شفـقــة و إحســــان يقول...

هى وظروفها
عزيزى توفيق الدقن
ميقدرش يدلت لانى فيرس وتروجن صعب تدليته
وهفضل لاطعاله كده لحد ما يهنج ويعمل ريسترت وبرضه مش هيلاقى اى فايدة
وهيستسلم فى الاخر
والا هوقعله الشبكة

شفـقــة و إحســــان يقول...

muhammd fattouh
الحمد لله مازال حى يرزق ولكن به حروق شديدة لازال يعانى منها
ادعى عليه
اقصد ادعيله

ليس فقيرا من يحب يقول...

هههههههههههههههههههههه

يا جبروتك يا شفشق

هههههههههههههه الله يكون فى عونه

دنا تعبت وانا باقرى بس

والله انتى عسوله

Remas يقول...

والله انتى عسولة بجد

بجد احلى حلول شفشقية

وبصراحة اى راجل يقرا الحلول دى اعتقد عمره ما هايفكر في الخيانة

الصور بصراحة موتتنى من الضحك

ميرسي ياقمر على الكومنت بتاعك عندى
نورتينى بجد واسعديتنى

new-one يقول...

هههههههههههههههههههههههههه
يا نهار اسود
دا الطلاق ارحم يا ستى:))
الله يكون فى عونك يا احسان يا خويا
وحشتونى مووووووت على فكرة:)

أحــوال الهـوي يقول...

و الله يا مدام شفقه انتي ما عندكيش شفقة و بسببك هينقرض صنف الرجاله

بس عندك خفة ما حصلتش ما فيش حرف و احد مكتوب بدون ما يفطس من الضحك

ارشحك لكتابة السكاريو و الحوار لاخر افلام الاستاذ عادل مدام

و الله خليتي يومي جميل بخفة دمك

و احد من الرجاله اللي لسه عايشين

تحياتي

شفـقــة و إحســــان يقول...

ليس فقيرا من يحب
ايه يا ابنى تعبت ايه وبتاع ايه هو انت دخلت مستشفى ولا مدونة
عموما ماتخافش اللى هيتعب هنحاول نعمله الاسعافات الاولية ده احنا الدكاترة ناصف ابو الفضل قضية وربنا يستر

شفـقــة و إحســــان يقول...

reem
اى راجل يقرأ المحلول؟
انتى تقصدى محلول الجفاف
بس بينى وبينك ده ان لحق قرأ اصلا
الفاتحة على روحهم
امين

شفـقــة و إحســــان يقول...

new-one
طلق ايه ورحم ايه يا دكتور هى المهنة تغلب ولا ايه؟؟
عموما احنا خلاص مش عهنسال عليك تانى
اظاهر ان الجواز بيعلم الكسل التدوينى
هههههههههههههههههههه

شفـقــة و إحســــان يقول...

احوال الهوى
تقصد حضرتك انى اسم مش على مسمى
اوكيه ولكن انا عندى شفقة تكفى كل المتسولين على فكرة
اما بالنوسبة للخفة فده لانى كل قطرة من دمى ممزوجة بسكر
وعلى فكرة هما رشحونا اساسا لجوايز مهرجان كان وانا اللى رفضت
وبفضل الكتابة فى بيتنا
الحمد لله انك لحد دلوقتى وبعد قراة البوست لسه حى ترزق
نورتنا

كيكى عوووووو يقول...

ياخرااااااااااااااااااااااشى
دة انت جمعتى كل المشاكل وحلها
الانقاضض على الزوج فى كل الاوقات
اهنيكى يااختشى هنديكى جايزة مطوة وموس لتكميل المسيرة المهنية
وووحشتينى ياحاجة وبوست زى العسل

شفـقــة و إحســــان يقول...

كيكى
بقى كده يا كوكى الهدية موس ومطوة بس
ايه البخل ده امال فين بقيت عدة الحلاقة
طيب الامواس عايزة شفرات معاها انتى هتضحكى عليا ولا ايه
عموما لو شنطة العدة كلها مجتش مش هكمل المسيرة المهنية
لا هدب انا وانتى على عينيا

طوبه فضه وطوبه دهب يقول...

مستر كرومبو ياجدعان وعلى ايه وجع القلب دا كله ما احنا لسه على البر نصرف نظر عن الجواز كله ونشترى دماغنا بلا وش ههههههههههههه تحفه يا شفشوقتى

عالم ماريونت يقول...

شفشوقتي
انا وصلت
اسمع سلام مربع بقى
طبعا بعتذر عنن انقطاع ست سبع تمن شهور كدة بس المهم اني رجعت بالسلامة و الحمد لله
:)
====================
بالنسبة لفيلم غرام وانتقام ده
فاانا شايفة انك مخلصة و جايبة من الاخر و ان مفيش فايدة هنقهرهم يعني هنقهرهم
حلو اوي لوك المدونة الجديد
وحشتوني جداااااا و احسان كمان وحشني اوي0وش بيعمز)
سلامي لاحسان و ربنا يكون في عونه
:)
رنا

عبده الرايق يقول...

احسااااااااااااااااااان
انت يا احسان بيه
ازاى يا راجل تسيب الست شفيقه تكتب الكلام ده عن الرجاله
نو
نو
نو
انا لا اسمح
انا لا اوافق
انا احتج واشجب وادين
انا فعلا وقعت فى نفس المقلب وصلحت الحمام والباكابورت
لكن هنقول ايه
ربنا مع المظلوم يا احسان بيه
واعرفى يا شفقه هانم
ان دعوه الرجاله المظلومه مستجابه
وهيجى يوم ويرجع تانى عمنا الكبير يحيى شاهين ( سى السيد) ويفرجكوا مين هما الرجاله
والى هذا التمنى
والى ان يتحقق
سنواصل الاحتجاج امام تصليح الحمامات والبكابورتات ولو استلزم الامر اللجوء الى محكمه العدل الدوليه