الجمعة، 30 أبريل 2010

يـــــــــا انـــــا يـــــــا مــــــــانكــــى

شفقة: سونة يا حياتى ايه اللفة الكبيرة اللى اد دماغك دى..... معقولة تكون هدية ؟؟ سونة: هى فعلا هدية بس هدية ايه عجب
هتقوى مكانى فى البيت ده وتلقلق ناس تانية



شفقة: تلقلق ؟؟ يبقى جبت مسمار يا حبيبى علشان يثبتك
اللى ما بتفكر تهادينى لا فى عيد ميلاد ولا عيد جواز
جاى تهادينى فى عيد العمال !
ده على اساس انى واحدة من فئة الشعب الغلبان
المهرى طبيخ وغسيل ومكوة وتنضيف

احسان: من فئة الشعب المهرى على اساس انك حلة محشى يعنى صح؟؟
شفقة: حلة محشى ايه الفجعنة دى يا سونة .
لا بجد قلى جايب معاك ايه ؟؟
بس اوعى تكون قنبلة نووية انا ماليش فى الذرة
احسان: ذرة انتى كبيرك درة مشوى جنب الرصيف يا روحى
وعموما انتى نشنتى هى فعلة قنبلة
بس مش نووية..... لا نــــونــــوية واول ما فتحت اللفة اذ بى افوجا

بقطــــــــــــة ســـــوداء وقتها وقعت من طولى
وقعدت انونو قصدى اصرخ
يا مصيبتــــــى يا لهــــــــوتى

قطة ......جايبلى قطة يا احسان
وانت عارف انى بخاف من الصرصار

احسان: طيب احمدى ربنا انى مجبتلكيش صرصار
وهى القطط بتخوف يا شيخة روحى كده
دى انتى اللى تخوفيها دى حمل وديع
شوفى جمال لونها
ولا نعومة شعرها
ولا حلاوة عينيها
ولا رقة جسمها
سمبتيك يا اخواتى
بقى دى يتقال عليها حيوان وانتى بنى ادم!
سبحانك يارب ليك حكمة فى كده
شفقة:حلاوة ايه وطحينيه ايه ولون ايه وعين ايه ؟؟
انت هتقعد هتتغزل فيها
دى لازم تخرج من البيت ويا انا يا هى فى البيت ده
بقى دى عاملة تعملها يا سى احسان؟؟
احسان:لو كنت اعرف ان الاختيار هيبقى بينك وبينها كنت جبتها من زمان
يا خسارة ضاع عمرى هدر
وبعدين احمدى ربنا انى مجبتهالكيش ودبحتهالك

شفقة: ايه دبحتهالى؟؟
انت بقيت تاكل قطط ولا ايه؟؟

احسان: لا ده مجازا يعنى
مش المفروض العريس يدبحها للعرسة اقصد العروسة ليلة الدخلة
احمدى ربنا بقى اهو نصيبك جه معاها بعد كام سنة
وياريتنى كنت دبحتها ماكنش ده بقى حالى
"ادبحلها القطة فى ليلة عرسها .........ااااااااااااااااااه"

شفقة: انت هتعملى فيها احمد زكى
والنعمة يا احسان اصوت والم الناس
يا انا يا القطة فى البيت

احسان:"فى سره" احسن هو ده المطلوب القطة طبعا
ودى عايزة سؤال

شفقة: بتقول ايه مش سامعة

احسان: كويس انتى اتطرشى يا حبيتى
واللهى كويس على كده كل يوم اجيبلك قطة
لحد ما تبقى من الصم والبكم

شفقة : بسهوكة لحل الازمة القططية
كده برضوا يا سونة تعمل فى حبيبتك كده

احسان: يا حبيبتى متخافيش ده قط وديع وطيب جد
حتى شوفى وكمان ما بيعضش ولا بيخربش ولا بينونو

شفقة : ما بيعضش ولا بيخربش!
ليه هو قطة ولا ارنب

احسان: ما تخافيش يا شفقتى ان شاء الله هتحبيه اوى
ومش هتخافى منه
بس يارب هو يحبك وما يخافش تبلعيه بالحنجرة الهلامية دى
وطبعا ادام الكلام المهبب بستين نيلة ده


استسلمت للغزو القططى الشيرازى
اللى اقتحم بيتى ورضيت بالامر النونوى
على امل الجلاء من البيت فى يوم من الايام


شفقة: بتعمل ايه احسان عندك فى المطبخ ؟؟
هتتطافس ولا ايه؟؟ انت مش لسه واكل
قضيت على اكل البيت بتاع الاسبوع
مش لاقية لا الفراخ ولا اللحمة ولا السمك
ده حتى القشر بتاكله يا سونة مالوش اثر

احسان: القشر! لا لا مش انا
ده مانكى انا باكل القط علشان يكبر ويربرب

يا نهار اخبر
هو انت بتاكله ايه فراخ... ولحمة
ايه ده يا راجل واحنا ناكل العضم ولا ايه؟؟
قال يكبر قال
ده أنا لو مكالتش شهر بتحمد ربنا انى وفرتلك فى مصروف البيت
تقوم انت تأكله خزين السنة كلها
حسبى الله ونعم الوكيل فيك انت ومانكى

احسان: عموما هو لازم يكبر ويسمن
انما انتى اتعلفتى من زمان وبقيتى تسدى الحيطة
انتى مش واخدة بالك يا نور عينى
انا بحاول اساهم معاكى فى الريجيم
علشان ما تدخليش فى الحيطة بعد كده
ونضطر نرمم البيت
يعنى انتى لو كلتى باذن الله هنلاقى نفسنا فى الشارع يا ماما

شفقة:حرام عليك يا شيخ وهو انا باكل خالص يا مفترى
كمان وهو حد عارف يشترى اللحمة
ده الناس بتاكل الكناسة بتاعة اللحمة اليومين دول
ده الكيلو بقى ب60 جنيه
امال قارفنى كل يوم بعمرو اديب ليه
وكل شوية تقولى تعالى اسمعى بيقول ايه على اللحمة
ولا هى وحشة وغالية ليا انا وحلوة للقرد بتاعك

احسان: قلتلك قبل سابق انه مانكى مخلوق رقيق مش دقيق
زى حلاتك
وبعدين انتى تاكلى الكناسة
لكن هو ياكل الغالى والبلدى
ده انا حتى وصيت الجزار على ضانى علشان خاطر عيونه

شفقة: يا ناس يا هوه الراجل هيطيرلى البرج اللى فاضل فى نفوخى
بياكله لحمة ويشربه لبن
وانا بشرب الشاى سادة
اخ يا نارى
اعمل ايه اعمل ايه؟؟

يوم وراء التانى وسونة عمال يزغط فى القط زى البطة
ويهنن ويطبطب ويعاكس ويدلع
ولا نانسى عجرم فى زمانها
شوية شوية هياخد اجازة وضع من الشغل ويقعد جنبه
ويوم بعد يوم القط عمال يكبر وينفش وشعره يعلا
ابن اللذينا بيعزز من وضعه القططى
واحتل مكانى فى البيت ولا اللى جاتلى درة
ومع الكبر والنفشة والعلف اللى بيعلفهوله احسان
بدا يديها شقاوة وعفرتة
وبقيت بكلم نفسى فى الشقة

شفقة: يا لهوى الحقونى هتجنن انت جايبلى قط ولا عفريت

احسان:يا ريته كان عفريت اهو كان خفاكى وريحنى منك

ماله عمل ايه ؟؟

شفقة: حرام عليك يا راجل القط ده اتجنن
عمال يشدلى ملايات السرير والسجاجيد والستاير
قطعلى القماش كله وكانه متسلط عليا من الغرفة التجارية
البيت كله اتقطع ارحمنى

احسان: بكل برود ...معلش اصله اظاهر بيكره كل منتجات الوكالة
استنضفوا بقى
مش مهم خليه يعمل اللى هو عاوزه بيته وهو حر فيه
وقعدت اتاكتك مع نفسى فى خطة محكمة
اطرد بها الوحش الكاسر مانكى
واستنيت الى ان حانت الفرصة الذهبية

احسان: شفقة انا خارج خلى بالك من مانكى هروح اجيبله حاجة حلوة هيفرح بيها اوى
شفقة حاجة حلوة يا ما جاب الغراب لامه
اللا عمرك ما عملتها معايا
رايح تعملها مع القط
يلا نصيبنا كده
قليل الاصل من يومه لا تعاتبه ولا تلومه
طيب والنبى لانا مبوظة عليك فرحتك
ومنفذة الخطة
رقم نو.. نوتين.. خمس نوات.. مهى خطة قططى
اخلص منه واستريح من قرفه واعزز مكانى تانى فى البيت
وابقى انا الامبراطورة
ده انا بسببه بقيت ملطشة وقفايا اتهرى خرابيش
وياريت من احسان كانت تبقى مبلوعة
لكن من مقصوف رقبة اد الكف ده
حتى يبقى عيب
ما عاش ولا كان اللى يلطشنى قال قط قال
ان كان هو قط فانا حدايه
من الان فصاعد عليك ان تستعد يا هذا المانكى
للهجوم الشفشقى

وبشويش وكل لطافة خدعت مانكى بورك فرخة فى البوكس بتاعه
واول ما دخل رحت قافلة عليه
ووخداه ومسرباه بره البيت
حدفته فى الشارع شر حدفة
وبعدها قعدت ارقص واغنى فرحانة بجلاء الغزو الشيرازى
اللعين عن بيتى

وبعد شوية لقيت سونة جاى ومعاه قفص كبير


شفقة: ايه ده تانى يا احسان ايه حكاية االاقفاص معاك؟؟
هو انت اشتغلت فى سوق العبور ولا ايه؟؟

احسان: لا ده انا عملت لمانكى مفاجاة
مفاجاة تانى يا احسان
عموما مانكى بيسلم عليك وبيقولك سمعنى اغنية بودعك

احسان: مخضوض ..ايه قتلتيه يا مجرمة
خيانه .....خيانه
انا شامم ريحة ملوخية
انتى عملتى ملوخية بالقطط بدل الارانب ولا اية؟؟

بتخنسرى من المصروف

شفقة: مصروف ايه يا عم؟؟
مانكى تعيش انت
امه جت خدته كانت مسافرة
والست رجعت بالسلامة كانت فى بورسعيد بتتجوز
وجوزها الجديد قالها مش عايز عيالك من الاولانى
ولما اطلقت رجعت تاخد ولادها لحضنها

احسان: انتى هتعمليلى مسلسل امينة رزق
عموما انا قابلته هو ومامته وانا راجع
وعقلتها
وقلتلها ترجع لجوزها
واتحايلت عليها تخلى مانكى معانا
واتعاهدتلها اننا هنربيه احسن تربية
وهندخله مدرسة الشعب البيطرى
وكمان هنجوزه
وهى لما عرفت كده فرحت اوى
وزغرطت ووافقت وسابتهولى
الست عايزة تبقى جدة

شفقة: ايه بتقول ايه ؟؟
يعنى اطب ساكتة ادامك ولا اعمل ايه

احسان: لا استنى متطبيش دلوقتى
مش تشوفى المفاجاة الاول


وقتها فتح احسان القفص اللى كان مغطيه وبصيت لقيت فيه
مانكى وجنبه قطة تانية

شفقة: ايه ده مين دى كمان

احسان: دى مانكيـــــاية عروسة مانكى اشترتهاله النهاردة علشان افرح بيه
وبكده ابقى بساهم فى حل مشكلة العنوسة الحيوانية
عقبال ما احل مشكلة العنوسة البنى ادمية

شفقة : ايه عروسة ........... يا خرابى يا نفوخى

احسان: من فضلك بقى يا شفقة تحضرى اكل للعرايس
وتفضيلهم اوضـــــــة

شفقة: نعم بتقول ايه؟
امال انا هنام فين على الارض!

احسان: ودى برضه تفوتنى
امال انا شارى القفص لمين؟؟شفقة: الحقووووووووووووووووووووووووووووووووونى




شفقـــــــــــــــــــــــــة

هناك 41 تعليقًا:

هوبتي يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
الله يكون في عونك
بصي انا لو مكانك هاعمل حاجة من الاتي
يا اسيب له البيت يضرب يقلب
يا ابيته علي السيلم هو القطط بتاعته
يا اوفر في مصروف البيت وبيما ان اللحمه شاحه ادبح القطتين واطبخهم وقت اللزمه

just waiting يقول...

هههههههههههههههههههههههههههههههههههههه
لا مش قادرة اصدق وانتي ساكتاله يا شفقه
مش معقولة لازم تتصرفي وتلاقي حل دا كدا هيجبولك قطاقيط صغيرة يملو عليكم البيت
مبروك ماجالك

Lady E يقول...

يا خلاثي قطتين شيرازي

لما تحبي تسربيهم ابعتيهملي بالبلوتوث يا شفشوقة ولا تقلقي اطلاقا :)

غير معرف يقول...

جابلك مانكي هاتيلوا روي بتاع صالح سليم..

ماتسيبيش حقك واوعي ترضخي لمؤامرته..

انا جايه اهدي النفوس :)) ..

تحياتي

مهموهة أحمد يقول...

ههههههههههههههههههههههههههههههههه
ههههههههههههههههههههههههههههههههه

يا نهاري يا شفقة هانم
بجد الله يكون في عونك
انا بكره القطط دي اوي
و مش بحب اي حيوان يكون في البيت

الحيوانات مكانها البيئة الخارجية الشارع يعني
لكن بيوتنا ؟؟
و اكلنا ؟؟
و هدومنا ؟؟
و ملاياتنا ؟؟؟
و سرايرنا ؟؟
و غرفنا ؟؟

لالالالالالالالالالالالالالالالالالالالالالا و الف لا

ربنا يقويكي و خلي سونة مرة في الشغل و سميهم يا ستي
قوليله اكلتهم فراخ و لحمة بس و الله اعلم اللحمة طلعت لحمة حمير او كلاب
ههههههههههههههههههههههههههه

خالص حبي و تقديري

واحشاني موت

غير معرف يقول...

هههههههههههههههه ما هاسا !!؟

يلا تعيشي وتاكلي غيرها

بس القوطط جوووومال وحلوين فعلا

بس قولتك بيخربو كل حاجة

و يا سلام لو كانو بيتكو في شعرهم الحرير ويقرفوكي

تلاقي كل الاكل شعر قوطط
ولا بقا الهدوم الغامقة مقولكيش هههههههههه انسيها ههههه


سلام

شفـقــة و إحســــان يقول...

هبة الحياة
بقولك ايه انا مش عارفة اختار ممكن استعين بصديق
انت يا عم جورج قرداحى
ده ممكن ينيمنى انا على السلم ويبيتهم هما فى حضنه
شفتى هو بيحبى اد ايه

شفـقــة و إحســــان يقول...

Just waiting
الاقى حل ازاى السالة صعبة اوى ومعقدة محتاجة استخدام نظرية فيثابورس
او فيثافار

شفـقــة و إحســــان يقول...

Just waiting
الاقى حل ازاى المسالة صعبة اوى ومعقدة محتاجة استخدام نظرية فيثابورس
او فيثافار

شفـقــة و إحســــان يقول...

Just waiting
الاقى حل ازاى المسالة صعبة اوى ومعقدة محتاجة استخدام نظرية فيثابورس
او فيثافار

شفـقــة و إحســــان يقول...

Lady E
واللى يرجع فى كلامه يبقى ايه؟؟
بس بقولك ايه اختك جاهلة تكنولوبيا
ابعتهملك ازاى افتح الكاميرا وادخلهم منها ولا ابعتهم من فتحات الزراير
بس قوليلى الطريقة صح لحسن عقبال ما يوصلوا بالشبكة يكونوا فطسوا

شفـقــة و إحســــان يقول...

فتاة من الصعيد
اجيبله روى بتاع صالح سليم ده على اساس انى نجاة الصغيرة
وهتقعد نبدا الفيلم من اوله واغنيله لا تكذبى وانا فيا دماغ لكده

شفـقــة و إحســــان يقول...

مهموهة
نفسى اعرف ايه كمية الهيه دى ملاقتيش اسم اسهل من كده شوية؟؟
وبعدين ايه القسوة بتاعتك دى ده انتى محتاجة كورس فى مدرسة احسان البيطرية ومحتاجة برضوا شهادة معتمدة من جمعية الرفق بالحيوان
علشان تبطلى كرهه ليهم
دى مخلوقات رقيقة
اما بخصوص السم فانا حاولت بس للاسف مش هما اللى كانوا هيموتوا
لا جت فى سونة وجارى عمل غسيل معدة له

شفـقــة و إحســــان يقول...

يالواناتك
بالوناتك ايه طيب خلى بالك لتفرقع
وبعدين ايه الدعوة اللى زى الفل دى وانا كنت خلصت من الاكلة الاولانية علشان اعيش واكل غيرها
انا بكده تجيلى تخمة وانا صحتى متستحملش
وبعدين الاكل كله شعر قطط والهدوم الغامقة اظاهر انك مجرب وشارب ممن عمايلهم لما قلت يا بس
عموما انا بعرف اتغلب على الشعر بالقصايد

Kiara يقول...

ههههههههههههههههههههههههههههههههههه
يالهوي ياشفقتي

وهتستلمى كدا ؟؟

أع ـقل مـ ج ـنـونــة يقول...

هههههههههههههههههههههههههههه

ايه دا
بجد المدونة دي كانت غايبة عني فين !!!!!

بجد بجد بجد تحفة :D

ربنا يكون في عونك

يابنتي الردالة دول مبيجوش الا بالـ !!!!!

:D :D

الحق اجري بئة :D :D

استمرررررررررررررررررررررررررررري ^_^

had-befham يقول...

هههههههههههههههههههههههههه
انا بجد وقعت على ضهرى من الضحك

فتــافيت (رحاب الخضري) يقول...

هههههههههههههههههههههههههههه

يا خبر يا خبر ... ازاي انا مابجيش هنا ؟؟؟؟ ده انتم عثثثثثثثثثثثل والله خالص

وزعلانة منك يا شفقة هانم.. ليه تعملي كده في مانكي ده القطط اجمل وارق كائن في الدنيا

جربي بس انتي حبيه وحبي مانكية بتاعته.. وهم هايحبوك خالص

نصيحة شريرة...

لما تحبي تسربي قطة.. تاخديها بالعربية في منطة تانية خالص.. لان لو سربتيها في نفس المنطقة.. بتعرف البيت لو على بعد من رحته وترجعه تاني

اي خدمة بقى :)

هاجي هنا كتير.. وهاضيف المدونة عندي بعد اذنكم

غير معرف يقول...

من هنا

بعلن تضامنى الوجدانى معاكى


بقولك
متنسيش تعزمينا بقى فى السبوع بتاع القط البيبى

هع هع هع هع هع هع هع

ستيتة يقول...

شفشوقة
جرام سيانيد
وتقسميه بين مانكي ومانكيايه بالتساوي

مننها تخلصي بعملية نضيفة مية في المية
ومنها تبصي لإحسان ولا كأنك ريا وتقولي زي النكتة "الأول" :)

سواحة يقول...

هنا اول ما اسمع حد بيقول جاب قط
ثانى سؤال بسمعه و حتعمل ايه معاه فى الربيع و خصوصا لو مانكاية
و عادة هنا بيعملهم عملية جراحية تعقمية او بيدوهم حقنة كل سنة :-)

و انا قاعدة اقراء قولت و يا ترى شفيقة حتعمل ايه لما الربيع يهل عليها :-)))

اتارى احسان باشا قام بالواجب و حل المشكلة من جذورها و جابلك مانكياية :-)
و انت زعلانة منه ياشيخة حرام عليكى
ده الراجل غلبان :-))

انت معندكيش فشة و كلاوى تعطفى بيهم على المساكين دول

و المهم ابقى سجلى المواليد فى دفتر احوال الصحة القططيطية علشان الدعم القططى يستمر :-) و تاخذوا على حسه كام كيلو لحمة من الى بجد

شفـقــة و إحســــان يقول...

كيارا
استسلم ؟
ما خلاص يا كيارا رفعت الرايا البيضا والا كان زمانى فى خبر كان
ده بق مانكى حوت وانتى الصادقة

شفـقــة و إحســــان يقول...

اعقل مجنونة
كانت غايبة عنك فى المطبخ
وبعدين لما تغيب تانى ابقى اخصمى من مرتبها
وبعدين ايه الجبن ده قولى قرى واعترفى الردالة عايزين ايه
ايون سم فيران
مظبوط
اما الحق اجرى انا الاول

شفـقــة و إحســــان يقول...

had-befham
وقعت على ضهرك!
وهو داخل عيادة عظام وبتشخصلى الحالة يا ابنى دى مدونة مش عيادة
نورت

شفـقــة و إحســــان يقول...

صيدلانية مسلمة
علم وجارى التنفيذ يا فندم

شفـقــة و إحســــان يقول...

فتافيت
ايون صحيح ازاى ما بتجيش مش تبقى تيجى وتجيبى معاكى كيسين فاكهة لزوم الزيارة
عموما انا هعمل بالنصيحة الشوريرة ويارب تجيب نتيجة

شفـقــة و إحســــان يقول...

star in the sky
بس للاسف السبوع مش هيحضره الا كبار زوار قطط الشارع اللى فى شارعنا والشوارع اللى جنبنا
امال علشان القطط يبرطعوا زى ما هما عايزين

شفـقــة و إحســــان يقول...

ستيتة حسب الله الحمش
ايه يا دكتورة السباخ اللى بتقولى عليها دى
يا ترى بتتباع فى الصيدلية ولا عند بتاع البهايم
وتفتكرى احسان مش هيفقسها ده خبير مواشى اد الدنيا

شفـقــة و إحســــان يقول...

Wanda
ايه يا بنتى عملية ايه وحقن ايه
انتى بقيتى طبيبة بيطرية ولا ايه
اوعى تكونى اتعينتى فى مستشفى الشعب البيطرية
وكمان ايه حكاية الربيع دى هو انتى فاكرانى سعاد حسنى
عموما حسين فهمى شاطر اوى فى الجذور والشجر اصله جناينى قديم
كمان متشكرين على المعلومات الصحية دى ومن بكرة جرى هسجل مانكى ومانكياية فى دفتر الاحوال
علشان يبقوا مثبتين رسميا
وناخد حصتهم فى التموين وهو حد لاقى

حنين القلب يقول...

ههههههههههههههههههههههههههه

انا لو منك اروح ادبح دكر البط اللى عندى واعملهم عشا الفرح

علشان مانكى يتقوى كده
هههههههههههههههههههههههههههه

ربنا معاكى

ALLELIO- موطنـــــــــــــــــــــــــــى(ma patrie) يقول...

شفقة: بتقول ايه مش سامعة

احسان: كويس انتى اتطرشى يا حبيتى
واللهى كويس على كده كل يوم اجيبلك قطة
لحد ما تبقى من الصم والبكم

شفقة : بسهوكة لحل الازمة القططية
كده برضوا يا سونة تعمل فى حبيبتك كده

احسان: يا حبيبتى متخافيش ده قط وديع وطيب جد
حتى شوفى وكمان ما بيعضش ولا بيخربش ولا بينونو

هههههههههههههه توبيك جميل جدا جدا

واضح ان كل الاولاد بيحبوا القطط دة انا حالف لما اتجوز اجيب قطة وتعيش فى حمايتى فى البيت لان كرامتها من كرامتى ولن اسمح باى تطاول عليها

همس الاحباب يقول...

ههههههههههههه
الحمد لله
اخيرا حبيبى واخويا احسان بيه انتصر فى معركة من معاركه
الف نهار ابيض احنا لزمن نوزع شربات وشيكولاته فى فرح مانكى
ونوزع كافيار وسيمون فاميه كماااان
يلا عنه ما حد حوش
وبالرفاء والبنين يا سى مانكى
ولا عزاء لشفقة هانم
ههههههههه
تسلم الايادى
تحياتى ليكم

شفـقــة و إحســــان يقول...

حنين القلب
تقصدى بدكر البط مين مانكى ولا ناس تانية؟؟

شفـقــة و إحســــان يقول...

بلياتشو
ايه تونيك دى؟؟
احنا هنا مدونة مش محل ملابس

شفـقــة و إحســــان يقول...

همس الاحباب
اهلا اهلا بالمناصرين
بقى هتوزع شيكولاتة وكفيار وسيمون فاميه ده احنا ما عملنهاش فى فرحنا
وعلشان مبقاش كدابة ما نلبنيش الا الفامية
اصل العربية كانت متفيمه
اول مرة اعرف ان الفامية بيتاكل
واوعدك يا ابو شابى ان المعركة اللى جاية انا اللى هنتصر فيها وهعلق العلم

غير معرف يقول...

السلام عليكم

ألوناتِك حضرتك .. مش بالوناتك هو عيد ميلاد
انا مجربة وكنت مدمنة قطط قبل ما اتجوز و قططي كانت بقا شنيعة كدا ههههه .. ولما اتجوزت حببت جوزي فيهم وقام جاب قطة كرهتنا احنا اللي الاتنين في القطط
سربيهم ولا لفيهم كدة بلفة شيك وخديهم كادو لوحدة مفقوعة منها

صدى الصمت - عاشقة الورد - يقول...

تصدقى بقى إنى كنت بأتحايل على جوزى إننا نشترى قطة الإسبوع ال فات وإتفقنا مع الراجل وهنشتريها الإسبوع ال جاى
كويس قوى إنك نبهتينى لكل الحوارات دى
خلالالالالاص
ما فيش قطط هتدخل البيت
تحياتى

شفـقــة و إحســــان يقول...

الوناتك
ما احنا عارفين انها الواناتك بس بنهرء معاكى
خلى بحبوحة كده وفرفوشة
بس تصدقى انا اول مرة اعرف ان فى ادمان قطط بس دى حقن ولا شم؟؟
ادينى بجرب اهو لما اشوف الادمان هيودينا لحد فين
بس انتى متاكدة انك سربتى القطط ولا حد تانى

شفـقــة و إحســــان يقول...

صدى الصمت
طيب ما ينفعش تخليها الاسبوع ده وتيجى تاخدى اللى عندنا
اهو ينوبك ثواب

واثقة بربها يقول...

هههههههههههه
ياعينى عليكى يا شفقة هانم مبقاش مانكى بس ده بقى مانكى و مانيكانه
و يجيبوا شويه مانكيات صغيرة و هتحولى فى الاخر البيت لجبلاية قرود

سربى القطة و ابعتيها لامى زى مانكى بالضبط

مونتي بوكيه ورد يقول...

مساء الورد والخير والحنان و الرقه و السعاده عليكم يارب
منورين كلكم الجبايب كلها متجمعه عند شفقة هانم واحسان بيه
كنت بدور عليكم من زمان والحمدلله لاقيتكم ويسعدني متابعة عالمكم الجميل
طاب مساؤكم
Master of love