الخميس، 10 يونيو 2010

رســــــــالــة إلى ..... مــيـــــــــت



عزيزى عمرو ... أو يا من كنت عزيزي
ردا على جوابك اللي كتبتهولي وبعتهولي على الملأ والكل قراه
أبعتلك جوابي ده برضو على الملأ ... وياريت الكل يقراه

مش عارفه ابدأ كلامي بإيه ... ويا ترى كلامي ده هيوصلك ولا لأ
وإن وصلك ... هتقدر تفهمه وتستوعبه إزاي

مشاعرى مرتبكة مش عارفة احزن عليك ولا اعاتبك ولا الومك
ولا التمسلك العذر؟؟

أم أكتفي بالدعاء لك بالرحمة والمغفره ؟؟

فاكر فى يوم كنت وعدتنى انك مش هتفارقنى ابدا وانه مهما حصل مش هتمنعنا الظروف من اننا نكمل قصة حبنا وننهيها نهاية سعيدة
كنت مخدوعة فيك ولا الظروف كانت اقوى منك مش عارفة انا ؟؟
بس للاسف مش قادرة التمسلك اى اعذار ازاى ممكن انسان يقرر انه ينهى حياته فجاة وبالطريقه السودا دي ؟؟

ازاى الإنسان يقرر بكامل قواه العقلية وبإرادته انه يموت على كفر ؟؟
ازاي فكرت تعملها ؟؟
نسيت اهلك وحبهم واحتياجهم ليك ؟؟
نسيت اخواتك ولمتهم حواليك ؟؟
نسيت اصحابك؟؟
اعتقد انك نسيتنى كمان ...

طيب لو كنت نسيت كل دول .. إزاي نسيت ربك ؟؟
مفكرتش ولو للحظة واحدة انك هتموت على كفر مش على حق ؟؟
أد كده كان ايمانك ضعيف ؟؟ ومش واثق بربك ؟؟
ولا انت يا عمرو كنت كده كده ميت ؟؟




صدقني مفيش اى سبب ايا كان ممكن يخلى انسان عاقل واعى يتنازل عن حقه فى الحياة إلا اذا كان بيدافع عن ارض او عرض
و مفيش اى حد يستاهل انك تموت علشانه حتى وان كنت أنا
حبيبتك .. أو من كنت حبيبتك
اعتقد انه اللى يقدم على خطوة زى دى يبقى انسان ضعيف مسلوب الارادة عاجز عن التفكير
وانا عمري مافكرت أرتبط بإنسان ضعيف
امال ازاى كنت هتحمينى اذا كنت مقدرتش تحمى نفسك من نفسك
الحياة كلها محطات مشاكل وصعوبات والم ازاى كنت هتقابلها لما انت فى اول الطريق ومع اول موقف إتخليت عنى وعن نفسك بكل سهولة ؟؟
تفتكر يا عمرو ان هى دى الرجولة ؟؟
تفتكر انه الحل هو الهروب والانسحاب ؟؟
تفتكر ان الحب واليأس يجتمعوا مع بعض؟؟

سامحني يا عمرو لو قلتلك اني ندمانه
ندمانه إني في يوم حبيتك
كان نفسي اعيش معاك وليك وبيك
كنت فاكره اني هاكون في حمى راجل قوي
كنت باحسبك غير كده يا عمرو
انت فعلا صدمتني .. خذلتني
وكمان فوق كل ده .. فضحتني
يعني ايه يا عمرو تسيب جواب إسمي مكتوب فيه وكمان رقم تليفونى ؟؟
تفتكر إني هبقى سعيدة لما اسمع انه بيتقال عليا (النهاية الماساوية لقصص الحب تكتمل "روميو وجوليت" "ديانا ودودى" "عمرو ومنى") ؟؟

ولا كنت هبقى مبسوطة وانا البوليس بيخبط على بابى وبيخدنى بطلب حضور يستجوبنى فى انصاص الليالى وتسيبلي الفضيحه ليا ولأهلي ؟؟
تفتكر انه اللى يحب حد يعمل فيه كده ؟؟

انا حزينة اوى وجوايا مجروح مش علشان فقدت حبيب وبس لا

علشان كنت اتمنى اني أتباهى بيك سواء عايش أو ميت
ماكنتش اتمنى الاقي كتير بيلوموني على إختياري ليك
كان نفسي ماتسيبنيش وتسيب الدنيا كلها غير علشان حاجه تستاهل
علشان هدف نبيل ممكن نموت وغيرنا يعيش
تخيل يا عمرو الفرق بين شعوري يوم ما جالي الخبر المشؤوم
وشعوري لو قالولي ان حبيبك كان مشارك في قافلة الحريه
كان رايح يوصل السكن والغذا والدوا لإخواته
مات وهوا بيحاول ينقذ غيره
تفتكر شعوري وقتها يا عمرو كان هيبقى زي شعوري دلوقتي ؟؟
كنت هافتقدك آه .. هابكي عليك أكيد
بس كان هيصبرني إعتزازي بيك وبمواقفك وبرسالتك
ماهي لو هانت علينا روحنا يبقى تهون لشئ عزيز

كام واحد كل يوم بيموتوا لنقص دم سواء في حادثه أو عمليه ؟؟
مش كان أولى يا عمرو تتبرع بدمك وتنقذ روح متعلقه بيك ؟؟
مش أحسن ماكان دمك يسيل ويختلط بمية النيل ؟؟

جسمك ده اللي علقته في حبل بكام جنيه
مليان أعضاء كتير غيرك ياما حلموا بيه
ما كنت تدي عضو منه لحد كان هيموت عليه
كبد .. كلى .. جذعيه أو قرنيه تنور عينيه
مادام يا عمرو نويت خلاص انك ترميه
كنت رميته لحد يكون محتاج اليه

الراسل / منى

هناك 23 تعليقًا:

Ramy يقول...

طبعا الموضوع على قد ما هو قاسى

بس انتى جبتى الموضوع بطريقة تانى

أعتقد تحليلك للحادثة كان منطقى

كان صح دة حقيقى ممكن يكون اللى حصل بنسبة 90%

أنا مش عارف أكتب حاجة تانى بجد أنتى قلتى كل حاجة بتحليل أكتر من رائع

صيدلانيه طالعه نازله يقول...

انتى كلامك صح
مش عارفه فعلا ازاى جاله قلب
يعمل كده فى نفسه

ربنا يغفرله و يصبر اهله

أمل حمدي يقول...

قلبي واجعني
مش عارفة ازعل منه ولا عليه
ربنا يرحمه ويغفرله ويعفو عته اللهم امين

وحشاني يا شفقة
ربنا يصلح حالك يارب حبيبتي

Unknown يقول...

اولا انا عجبنى جدا اسلوبك
و حبيت مدونتك جدا جدا
ثانيا:
هو اكيد اكيد فى اللحظة ده كان عقلة مغيب
يعنى لو واحد فكر للحظة ماكانش عمل كده
و اكيد ايمانة ضعيف عشان مش يفكر فيها
لا ده قدر يعملها اصلا
طبعا لما بفكر فيها بحس انها صعبة اوى
لان مافيش حاجة تستاهل انى اموت كافرة عشانها

عاشقه الرومانسيه يقول...

والله عمرو مثال لكل الشباب اللى فى بلدنا
ياترى كام شاب هيموتوا فيكى يابلد؟؟
ولو مش قرروا ينتحروا فهما بيموتوا هما وكمدا وحزنا على وضعهم وعجزهم عن تحقيق احلامهم

♥♥ شذا ♥ الروح ♥♥ يقول...

تعرفى على قد ما انا زعلانه عشان حصل المنظر البشع ده على قد بجد ما انا عارفه هيقابل ربه ازاى

كلامك وجعنى اووووووووووووووووى

وابكانى انا شفت الخبر ده قبل كده وشفت تفصيله بجد منشر بشع

احيك على اسلوبك وكلامك الراقى جدآ

تحياتى

just waiting يقول...

طب بعد الكلام دا كله اقول ايه
ربنا يرحمه

Unknown يقول...

بنلومه حتى بعد ما مات وعمالين نقطمه ونقوله جبان ومش شجاع

متخيلين البنى ادم دة اتقهر قد ايه عشان تهون عليه نفسه للدرجة دى؟؟؟

متخيلين هو حس بايه عشان يموت نفسه الموتة دى؟؟؟

متخيلين مدى الفقر والذل اللى شافه خلاه يتجنن وينتحر

الانتحار حالة جنون وقتى دة تعريف علم النفس مش كلامى

الراجل دة محتاج اننا ندعى له ونفوق ونعمل حجة للبلد بدل ما ينتحر غيره وغيره وغيره

بلاش نحس اننا احسن منه لاننا منتحرناش واستحملنا..اى حد اذا كان اللى كتب او اللى علق..قاعد فى بيته قدام الجهاز وممكن يكون بيشرب نسكافيه كمان

لكن اللى انتحر دة مكانش لاقى فلوس يحس بيها انه يستحق يعيش

منتحرش من الحب..لكن انتحر عشان اكتشف انه مش مة حفه يحب ويتجوز ويعيش..انتحر لانه حس انه بنى ادم على الهامش مالوش حق فى اى حاجة

هو دلوقتى فى دار الحق..كفاية بقى كدة كلام عليه حرام..الله يرحمه ويرحم اللى زيه وينقذ الباقيين من الانتحار

غير معرف يقول...

أعتقد أن كلامك وتحليلك قاسي جداً... الشاب مات ولا أحد منا يملك حق محاكمته وتأنيبه.. أن يصل الإنسان إلى حد وضع حد لحياته بيده ليس بالأمر الهين... أعتقد أن لا أحد منا له القدرة على تخيل ما كان يدور في ذهنه وقتها..وإلا لكنا مكانه!!

نهاية موضوعك كانت في منتهى القسوة...حياة إنسان إنتهت ..ألم تفكري ما الذي أوصله لهذه اللحظة؟ هل من تهون عليه حياته في لحظة يأس قاتلة سيفكر في أن يجعل من جسده مورد لقطع الغيار الآدمية؟ ألم تفكري بهذا الشخص كأنسان؟ بعيدا عن "فضحه" لحبيبته وعن "خيبة أملها
فيه لأنه لم يكن شهيداً في أسطول الحرية..بعيداً عن كونه "مخزن" قطع غيار .. فكري فيه كإنسان ..ضحية يستحق الشفقة والتعاطف

عذراً غن اطلت..وعذراً إن بدا أسلوبي هجومياً..ولكني متابعة من فترة لمدونتك وأراها شيقة..ولكن موضوعك اليوم أثر في بشكل كبير

تحياتي..ليبية

أع ـقل مـ ج ـنـونــة يقول...

جسمك ده اللي علقته في حبل بكام جنيه
مليان أعضاء كتير غيرك ياما حلموا بيه
ما كنت تدي عضو منه لحد كان هيموت عليه
كبد .. كلى .. جذعيه أو قرنيه تنور عينيه
مادام يا عمرو نويت خلاص انك ترميه
كنت رميته لحد يكون محتاج اليه

جبتي المفيد كله ياشفقة !

صعب ان الواحد ينهي حياته كدا بسهولة

لانها مش ملكه اساسا !!

ربنا يرحمه ويغفرله يارب ويهدي شبابنا اجمعين !

بس ممكن طلب ياحبيبتي !

ممكن تشيلي الصور .. دي حرمة ميت .. مش عشان انا بتألم لما بشوفها

لاء

عشان حرام .. لان الميت بيكونله حرمه .. !

خواطر شابة يقول...

بعد قراءة البوست مش عارفة ازعل منه او ازعل عليه لكن صراحة ليصل لهذه المرحلة وليتخذ هذا القرار الله وحده العالم بحاله وبماعاناه انا لاأبرر له لكن فعلا الله وحده العالم به قد يكون مريضا بالاكتئاب او اي مرض نفسي اخر وهو الذي أوصله لهذه النتيجة
لايمكن لذي عقل سوي ان يلقي بنفسه الى التهلكة
في النهاية لانملك الا ان ندعو الله ان يغفر له فهو خالقه وهو أدرى به
صراحة لااعرف ان كان نشر هذه الصور امر صحيح ام لا فتعودنا على رؤية مثل هذه الصور يجعل مشاعرنا تتبلد وهذه مشكلة كبرى

بنت وولد يقول...

ربنا يرحم عمرو و اللى زيه اليائسين كتير قوى
و يبعد عنهم و عنا الهم و الغم

و لحظات اليأس اللى ممكن تخلينا نرتكب حماقات تحرق قلوب اللى حوالينا

شوكولاتة يقول...

شخص ضعيف اوي مش ممكن يكون ده الحل ما الناس كلها عايشة ازمة جواز في البلد يعني هو اول ولا اخر واحد ميعرفش يتجوز اللي بيحبها علشان الفلوس

had-befham يقول...

صعب اوى الكلام

راء يقول...

:((

مش عارفة غير ان فعلا موضوع مأساوي كارثي..حللتيه حلو يا طنط شفقة

ابقى اعدي ف وقت تاني

محمد فاروق الشاذلى يقول...

الأخت العزيزة منى (حبيبة عمرو)
هل كنتى تعرفين وأنتى تكتبى هذه الرسالة إلى عمرو إنه كان متزوج من امرأة أخرى منذ عشر سنوات؟ وأن هذه المرأة تكبره بعشر سنوات؟ هل كنتى تعرفين أن عمرو لم يكن يمر بضائقة مالية إلا فى آخر أسبوعين من حياته فقط لأنه ترك العمل؟ أنا كنت أعرف فعمرو هو صديق زوج أخت زوجتى، وأعتذر للجميع لأنى لا أجد له مبرراً على فعلته.
أنا أقسو فى حكمى على عمرو ولا أقبل منه أو له عذراً على ما فعل.

د. إيمان مكاوي يقول...

حقيقة أنا فكرت في الموضوع ده كتير
ياترى المنتحر ده مريض نفسي ونلتمس له العذر أم أنه سليم وإيمانه ضعيف
أنا محتاره
في لحظات ضعف بيتعرض لها الإنسان ومنقدرش نحكم وإحنا خارج الصورة
ربنا يرحمه ويغفر له

غير معرف يقول...

ثقافة الهزيمة .. حلوة يا بلدى

فى كتاب داخل مصر"Inside Egypt": أرض الفراعنة على شفا الثورة الذى صدر عام 2008 يقول كاتبه الصحفي الأنجليزي جون برادلي عن مستقبل مصر أنه على رغم من بعض النجاحات الاقتصادية ألا أن توزيعها تم على من أرتبطوا بالنظام فقط دون أن يصل ذلك لباقي الشعب مما أدى"زيادة الحنق" بين المصريين. ويشير الكاتب إلى رؤيته في زياراته المتكررة لمصر كيف مثلا أن عدة ملايين من الثروة المصرية تنفق لأنشاء المصارف وتقديم المياه للقرى السياحية والفنادق الفاخرة التي يستخدمها السياح الأجانب والأغنياء المصريون فقط "في حين يموت الألاف المصريين كل عام نتيجة تلوث المياه التي تصل لهم"...

باقى المقال ضمن مقالات ثقافة الهزيمة بالرابط التالى www.ouregypt.us

و لايفوتك زيارة صفحة من الشرق و الغرب فى نفس الرابط و به الكثير من المقالات الجيدة.

غير معرف يقول...

والله الواحد موش عارف يزعل عليه ولا منه :(

ربنا يغفرله ويرحمه

تحياتي

لــــ زهــــــراء ــــولا يقول...

الموضوع مؤلم جدا واعصابي مش متحملة اتكلم فيه انا من ساعة الخبر وقلبي واجعني

لولا

حاجات جوايا يقول...

ربنا يرحمه
ويرحم كل ولادك يا مصر

البوست جميل جدا ومؤثر
ولو منى بجد اللى هتكتبه مش هتكتب غير كده

تحياتى وتقديرى

Asmaa mahaba يقول...

المشكله يا شفقه ان احيانا الناس دى بتنتحر اما توصل لدرجه معينه من الاكتئاب اسمه الاكتئاب الزهانى على ما افتكر من علم النفس
ومش بيبقى فى تفكير سليم فى الحياه وقتها
ربنا يسامحه ويغفرله والزمن دا لحظات الضعف اكتر من لحظات القوى بكتير ويسترها على بناتنا وولادنا يا رب

momken يقول...

الله يحرقه

الى ميقدرش يحافظ على امانه الله الى اودعه فيه مش هيقدر يحافظ على شىء


الى يخون امانه الله ويقتل النفس التى حرم الله قتلها لايستحق الرحمه

الى ميقدرش يتحمل مسئوليه حياته لن يستطيع ان يتحمل اى مسئوليه


انا مش عارف اتكلم


تحياتى