عزيزى عمرو ... أو يا من كنت عزيزي
ردا على جوابك اللي كتبتهولي وبعتهولي على الملأ والكل قراه
أبعتلك جوابي ده برضو على الملأ ... وياريت الكل يقراه
مش عارفه ابدأ كلامي بإيه ... ويا ترى كلامي ده هيوصلك ولا لأ
وإن وصلك ... هتقدر تفهمه وتستوعبه إزاي
مشاعرى مرتبكة مش عارفة احزن عليك ولا اعاتبك ولا الومك
ولا التمسلك العذر؟؟
أم أكتفي بالدعاء لك بالرحمة والمغفره ؟؟
فاكر فى يوم كنت وعدتنى انك مش هتفارقنى ابدا وانه مهما حصل مش هتمنعنا الظروف من اننا نكمل قصة حبنا وننهيها نهاية سعيدة
كنت مخدوعة فيك ولا الظروف كانت اقوى منك مش عارفة انا ؟؟
بس للاسف مش قادرة التمسلك اى اعذار ازاى ممكن انسان يقرر انه ينهى حياته فجاة وبالطريقه السودا دي ؟؟
ازاى الإنسان يقرر بكامل قواه العقلية وبإرادته انه يموت على كفر ؟؟
ازاي فكرت تعملها ؟؟
نسيت اهلك وحبهم واحتياجهم ليك ؟؟
نسيت اخواتك ولمتهم حواليك ؟؟
نسيت اصحابك؟؟
اعتقد انك نسيتنى كمان ...
طيب لو كنت نسيت كل دول .. إزاي نسيت ربك ؟؟
مفكرتش ولو للحظة واحدة انك هتموت على كفر مش على حق ؟؟
أد كده كان ايمانك ضعيف ؟؟ ومش واثق بربك ؟؟
ولا انت يا عمرو كنت كده كده ميت ؟؟
صدقني مفيش اى سبب ايا كان ممكن يخلى انسان عاقل واعى يتنازل عن حقه فى الحياة إلا اذا كان بيدافع عن ارض او عرض
و مفيش اى حد يستاهل انك تموت علشانه حتى وان كنت أنا
حبيبتك .. أو من كنت حبيبتك
اعتقد انه اللى يقدم على خطوة زى دى يبقى انسان ضعيف مسلوب الارادة عاجز عن التفكير
وانا عمري مافكرت أرتبط بإنسان ضعيف
امال ازاى كنت هتحمينى اذا كنت مقدرتش تحمى نفسك من نفسك
الحياة كلها محطات مشاكل وصعوبات والم ازاى كنت هتقابلها لما انت فى اول الطريق ومع اول موقف إتخليت عنى وعن نفسك بكل سهولة ؟؟
تفتكر يا عمرو ان هى دى الرجولة ؟؟
تفتكر انه الحل هو الهروب والانسحاب ؟؟
تفتكر ان الحب واليأس يجتمعوا مع بعض؟؟
سامحني يا عمرو لو قلتلك اني ندمانه
ندمانه إني في يوم حبيتك
كان نفسي اعيش معاك وليك وبيك
كنت فاكره اني هاكون في حمى راجل قوي
كنت باحسبك غير كده يا عمرو
انت فعلا صدمتني .. خذلتني
وكمان فوق كل ده .. فضحتني
يعني ايه يا عمرو تسيب جواب إسمي مكتوب فيه وكمان رقم تليفونى ؟؟
تفتكر إني هبقى سعيدة لما اسمع انه بيتقال عليا (النهاية الماساوية لقصص الحب تكتمل "روميو وجوليت" "ديانا ودودى" "عمرو ومنى") ؟؟
ولا كنت هبقى مبسوطة وانا البوليس بيخبط على بابى وبيخدنى بطلب حضور يستجوبنى فى انصاص الليالى وتسيبلي الفضيحه ليا ولأهلي ؟؟
تفتكر انه اللى يحب حد يعمل فيه كده ؟؟
انا حزينة اوى وجوايا مجروح مش علشان فقدت حبيب وبس لا
ماكنتش اتمنى الاقي كتير بيلوموني على إختياري ليك
كان نفسي ماتسيبنيش وتسيب الدنيا كلها غير علشان حاجه تستاهل
علشان هدف نبيل ممكن نموت وغيرنا يعيش
وشعوري لو قالولي ان حبيبك كان مشارك في قافلة الحريه
كان رايح يوصل السكن والغذا والدوا لإخواته
مات وهوا بيحاول ينقذ غيره
تفتكر شعوري وقتها يا عمرو كان هيبقى زي شعوري دلوقتي ؟؟
كنت هافتقدك آه .. هابكي عليك أكيد
بس كان هيصبرني إعتزازي بيك وبمواقفك وبرسالتك
ماهي لو هانت علينا روحنا يبقى تهون لشئ عزيز
كام واحد كل يوم بيموتوا لنقص دم سواء في حادثه أو عمليه ؟؟
مش كان أولى يا عمرو تتبرع بدمك وتنقذ روح متعلقه بيك ؟؟
مش أحسن ماكان دمك يسيل ويختلط بمية النيل ؟؟
جسمك ده اللي علقته في حبل بكام جنيه
مليان أعضاء كتير غيرك ياما حلموا بيه
ما كنت تدي عضو منه لحد كان هيموت عليه
كبد .. كلى .. جذعيه أو قرنيه تنور عينيه
مادام يا عمرو نويت خلاص انك ترميه
كنت رميته لحد يكون محتاج اليه
