الاثنين، 12 يوليو، 2010

1000 مبــــــــــــــــــــــــــــــــــروك


اسمع كلام امك.... شرد لابوك....... بهدل عمتك كسر دماغ عمك اخو ابوك
قطع فى فروة ستك طلع المطوة وغز جدك طبعا كل الجمل دى متعارف عليها فى اى سبوع
واحنا والحمد لله كان عندنا اجمل سبوع لاجمل ننوس عين امه " ادم "
بس ربنا يستر وما يطلعش عينها ويخليها تبظ لبره ويعملها جحوظ
المهم يا رنونة انك تستحملى وتسلمى امرك لله لانه شىء لابد منه لازمن ولابندق انه يكون فيه عيال
امال يعنى ناخد بتارنا منك ازاى؟
مهو ربنا بيخلص ذنب ناس من ناس
المهم انى جاية النهاردة اباركلك واقولك الف الف مبروك
لانك بعد ما بقى عندك ادم الدنيا هتتغير خالص........ وهتتقلب راسا على عقب
وهيبقى لونها بمبى بمبى مسخسخ
الف مبروك..... عليكى حصولك على لقب ماما وامه ويامايه ويا ماماتى واللى زيه .. زى لقب ميس ايجيبت كده
يعنى حاجة عظيمة اوى.... وما تنسيش ان الجنة تحت اقدام الامهات
ده ان بقى فيكى قدم اصلا
الف مبروك.... انتقال لقبك من مودام وانتى الولية والالفاظ اللى اتهريتى من سماعها دى
الى مامى ....ويامه .....ويا ست الحبايب انتى ويا ماى ماذر
الف مبروك...... انك خلاص هتودعى الوظيفة وهتنتقلى من كادر الموظفات المحترمات
الى كادر وظيفة احلى كتير وهى المرضعات.... والدادت .....وشغل الحضانات
وده طبعا اعلى فى السلم الوظيفى.... بس خلى بالك لتقعى من على السلم وتركبى مقشات
الف مبروك...... عليكى اخيرا هيجى اللى هيعرف يشكمك ويقولك بس اسكتى وما تتكلميش كده مع بابا

ويخلى بابا بقه مفتوح على اخره من كتر الانشكاح ويبقى فرحان اوى بعصابة على بابا اللى بتأيده

الف مبروك انك خلاص من هنا ورايح عيونك هتجافيها النوم ......وابقى قابلينى لو شفتيه تانى قبل اربع
خمس سنين وبرضوا هيبقى تخاطيف
وهنيئا لكى الصويت والعياط وكلمة واءءءءءءءءءءءءءءءءءءء.... والزن اللى عمال على بطال واللى هيلم عليكى الجيران
الف مبروك عليكى قاعدة البيت ليل ونهار..... والحرمان من الخروج والفسح والسفر
والذى منه......وكبيرك تجيبى لب وترمس وتعمليهم وتقزقزيهم فى البيت
وتقعدى تفتكري الايام الخوالى بتاعة الكورنيش....... والسميط ابو جبنة

الف مبروك..... اخيرا جالك اللى يحكم رايه ويمشى كلمته عليكى
وما تعرفيش تفرضى عليه رايك ........زى ناس تانية كانت بتعمل وهى ساكتة سكتم بكتم
الف مبروك ....انه مش هيبقى فيه ولا مكان فى البيت تقدرى تقعدى فيه..... وهتفضلى تلفى حوالين نفسك من الكركبة وهتعيشى فى زحمة يا دنيا زحمة ...... ومولد يا دنيا
الف مبروك..... عليكى كلمة هاتى وانا عايز يا ماما.... واشمعنا اصحابى ....والبت بنت الجيران وعايز مصروف علشان احجزها قبل ما عريس تانى يتقدملها..... وادفعى يا ماما

كمان لازم تنسى كلمة مهمة اوى وتحذفيها من قاموس حياتك ..... كلمة خدى لازم تطلقيها بالتلاتة
من اليوم فصاعد لازم تكونى مضحية
الف مبروك ....عليكى سهر الليالى فى المذاكرة والضرب فى جتة العيال.... وهما ولا هما هنا منحسين بعيد عنك
بعد ما كنتى كبيرك تمسكى مجلة الازياء ولكى يا تفيدة...... وموضة ام اربعة واربعين
الف مبروك .....عليكى انه اخيرا هيجى اللى يطلع عين جوزك وياخد حقك...... لك يوم يا ظالم
الف مبروك .....عليكى شد الشعر والمشى حافية..... وتشقق القدمين
بعد ما كنتى بطلة العالم فى المرواح للكوافير... ووداعا للتجميل ومكوجى الرجل
الف مبروك.... عليكى المورستان وكاس العالم اللى هينظموه فى بيتك....... ووداعا للراحة والهدوء وعيشى مع مبدأ لا راحة بعد اليوم
الف مبروك..... عليكى اخيرا هتلاقى المنافس الوحيد اللى مش هتقدرى تفتحى بقك معاه
واللى هيستولى على الاب توب بتاعك .....علشان يشيت مع الجو
وانتى تروحى تترزعى فى المطبخ مع حللك ومواعينك


الف مبروك ....انك هتقعدى تزعقى وتصوتى للصبح لحد ما الاحبال الصوتية تختفى ....ومش هتلاقى حد تفشى غلك فيه ولو قلتى مين عمل كده ؟؟
مش هتلاقى غير كلمة واحدة مش انا يا ماما

الف مبروك...... عليكى الخضة لما تقعدى تنادى كل شوية وتلاقيه طالعلك من اى مكان زى عفريت العلبة

هناك 29 تعليقًا:

موناليزا يقول...

بورك لكم فى الموهوب وشكرتم الوهاب وبلغ أشده ورزقتم بره


----
على جنب بقى؟
مين اللى بنقولها مبروك:)

كيــــــــــــارا يقول...

الف الف مبرووووووووووك وربنا يباركلها فيه ويكون ولد صالح ويعنها علي مسئوليته

mrmr يقول...

اولا : مبرروك للمولود الجديد
وثانيا : حرااااااااااااااااااااام
كده برضه تضلمى الدنيا فى وشها وتصدميها بالواقع الاليم اللى ح تشوفه
خليها تجرب وحده وحده يا واش يا واش
اه كل ده ح تشوفه واكثر منه
لكن براحه
يا عينى عليكى يا بنيتى معلش هى الكهرباء كان الفولت بتاعها عالى قوى علشان كده الصدمه شديده
نحن السابقون وانتى الاحقووووووووون

ربنا يسعدك

reem يقول...

هههههههههههههههههه
الاول الف الف مبروك عليكم البيبي الجديد
ربنا يخليه لمامته وباباه ولكم يارب

ثانيا بقى انتى سكر والله وموتينى من الضحك
ومن العياط بردو لان دا حالى مع بناتى
ههههههههههههههههه

والله انتى قلتى اللى بيحصل فعلا

بوست زى العسل بجد

نهر الحب يقول...

بصى يا شف شق هانممن غير ما بص من اللى كاتب انا واثقة بالثلث انك انتى اللى مشوهه الدنيا وبترعبينى اكتر مانا مرعوبة من الاطفال
هم صحيح كدة وزيادة شوية بس برضة
هم زينة الحياة الدنيا وبيخلوا للدنيا طعم

عارفة بس لو ميعيطوش
ومبعملوش بيبى
ولو انتى زعلانة وعصبية مردوش
ولو ميقلوكيش من النوم الصبح
وو مش هتذاكرى لهم ولا هيناكفوا فيكى ويطلعوا عينك كانت الدنيا بقت وردى


هههههههههههههه
كدة عديتينى
اقوك مبروك وعقبالك وخلاص
بس خلاص على رأى شعبولا الاولا

Ramy يقول...

صاحبة واجب الصراحة

و كتر خيرك طمنتيها (:(:

و الف مبروك لمامت أدم

عقبال ما تفرح بيه كده

ربنا معاها فى اللى جى

شفـقــة و إحســــان يقول...

موناليزا
على جنب والنعمة حسيت انى سواق تاكسى
عموما اللى بنقولها مبروك تبقى اخت سى احسان بيه افندى
ومش عايزين اجرة

شفـقــة و إحســــان يقول...

كيارا
ايوا كده يا كيارا دعوتين حلوين لحسن اختك ام المولود محتاسة فى البساسة

شفـقــة و إحســــان يقول...

mrmr
اولا شكرا على المباركة
ثانيا حلال مش حرام
وبعدين مين قالك انى طفيت النور فى وشها والنعمة هو اللى قطع من زيادة الكهرباء وبعدين هى ضلمت فى وشها هى بس دى مضلمة فى وش مصر كلها من اول الصيف
وبعدين ايه شغل الارفات ده عموما الفاتحة

شفـقــة و إحســــان يقول...

reem
ايه التناقض ده ضحك مع عياط ايه الشيزوفرينيا دى يا ريمتى
جبتيلى هسهس نفسوانى

شفـقــة و إحســــان يقول...

نهر الحب
ايه يا بنتى انتى عايزاهم ميعيطوش ولا يعملوا بيبى ولا يقلقوا منامك ايه انتى عايزة انسان الى مش بيبى وبعدين لو كانوا بالرقة دى كان زمانى خلفت من زمان

شفـقــة و إحســــان يقول...

ramy
واجب ايه عم رامى رجعتية كى جى تو من تانى وفكرتنى بالمدرسة
وبعدين خلى بالك اللى بيجيب مرة طفل فى الزمن ده ما بيفكرش يجيلوا تانى

الحب الجميل يقول...

ألف مبرررروك
ربنا يخليهولها يارب ويبارك لها فيه

اما بخصوص البوست فدمه زى العسل
تسلم ايدك يا شفقه هانم
بس يارب ما تقراه الا ترمى الولد
هههههههههههههه

الحصول على لقب ماما من اجمل الاحاسيس
ربنا يدمها على الستات كلها نعمه بما فيها من شقاء
الاولاد زينة الحياه
دمتى بخير وام ادام كمان بخير
الف مبرررروك

ذكري رحيل قلم يقول...

السلام عليكم

الف الف الف مبروك انا حسيت وانت بتوصفي لها الحالة الجديدة انك بتولي لها احسن بقيتي ام هاه هاها هاه

ربنال يبارك في المولود ويرزقه الخير ويجعله من الصالحين ويرزقه حفظ القرآن الكريم اللهم امين
دمتم بحب وود

كل سنة وانتم طيبين اللهم بلغنا رمضان

ستيتة حسب الله الحمش يقول...

يا اختي يا شفشوقة
الف مبروك ليها
ونرجوا ان تقرأ البوست بكل عنااااااااااية
علشان تقرأ
الحقيقة العارية
عسل يا شفقة
والنبي عسل

طوبه فضه وطوبه دهب يقول...

ربنا يكرمها يارب ويبارك لها فيه ويجعله الذريه الصالحه وقدم السعد اللهم امين

خواطر شابة يقول...

مبروك المولود ربي يخليه لاهله ان شاء الله بس انت كده خضيتي الوالدة المسكينة ورصيتي لها كل المساوئ رصة تخض
طب ليه مقلتلهاش ان نظرة واحدة لطفلها وان ضحكة منه تخليها تنسى الدنيا واللي فيها وتخليها تحس انها اسعد واحدة ي العالم وتنسى كل التعب والسهر
دمت بكل الود والمحبة

كلام من قلبي يقول...

ازيك يا جميل انتي فين محدش بيشوفك خالث
بس انا طلعت احسن وجيت

الف الف مبروك يتربى في عزها
ويخليه ليهم يا رب

ahmed_k يقول...

طبعا ألف مبروك وصول البيبي الجديد بالسلامه
بس دي الأم داخله على معركه حربيه مش امومه وطفوليه هههههههههه
وعقبالنا يا رب

شفـقــة و إحســــان يقول...

الحب الجميل
ما تخافيش مش هترمى دى ما صدقت

ستيتة حسب الله الحمش يقول...

شفشوقة
انا علقت على البوست ده
يا تقبي بالتعليق يا إما
ها أبج بطن البلوج بجيج
او ها اخطف ام النونو
علشان تنام عندي شوية
وهي ها ترفض يندفع فيها اساسا فدية
اختاري
حول :)

فتافيت يقول...

مبرووووووك ما جالكم

بس كده تعقديني في الجواز والخلفة وانا اصلا مش ناقصة :))

همس الاحباب يقول...

الف مليون مبروك
ربنا يجعله قرة عين لكم ان شاء الله
وبعدين حرام عليكى شردتى العيال واهليهم مقدما
عامة ام ادم لم تزهق منه هتحدفه على طنط شفقة ما هى مرات خاله والخال والد يا جدعان
كل سنة وانتم طيبين
ورمضان كريم

hend...hanady يقول...

زى لقب ميس ايجيبت كده..............مس ايجيبت ايه قولى مس وورلد

الف مبروط ليها وربما يحفظه لها وتشوف عيال عيال عيال عياله

زهرة الجنة يقول...

مبروووووووووووك البيبي الجديد
ربنا يخليه لمامته ويبارك فيه

وحشتوووني جداااااااااا
رمضان كريم عليكم يارب

شمس النهار يقول...

:))
مش ممكن اتعقدت البنيه اللي خلفت

كلنا هذه الماما

الف مبروك

وكل سنه وانتم طيبين
رمضان كريم

قلب مصرى (محمد فاروق) يقول...

أخى إحسان
بقيت خالو .... ألف مبروك وربنا يسعد أيام المولود الجديد ويجعله ذرية صالحة.
وكل رمضان وانتم بخير

صدى الصمت - عاشقة الورد - يقول...

والله بجد بجد حرام عليكى
عقدتى البنت فى عيشتها
كنتى سيبيها تأخد الصدمة بالتدريج
عموماً ألف مليون مبروك للمولود السعيد
ورمضان كريم

عمرو يسرى يقول...

اولا مبروك للمولود الجديد
ثانيا واضح ان انتى تعبتى كتير
ربنا يكون فى عونكم جميعا