الثلاثاء، 21 سبتمبر 2010

ثقافية كـــــــافية...كله فى الاوكــيه

انساتى وسيداتى الحلوات والجميلات المقطقطات وحشتونى اوى اوى
بحيكم من ادام شاشة الكمبيوتر بعد غياب طال اكتر من شهر ونص
سامحونى اصلى كنت من السيدات اللى طالع عينهم فى رمضان فطار وسحور وموائد الراحمن
لما ورمت ونفوخى طار
المهم انى يا دوب بدات اخد ويك اند.... واشم نفسى لقيت تليفون من انوسة حبيبة قلبى من جوه
واليكم ما حدث
انوسة: بت يا شفقة استعدى انا جاى اعمل هجوم على القاهرة


شفقة: ايه ....هجوم ايه يا انوسة ؟؟ ناوية تسرقى بنك ولا ايه؟ طب بالنص والا هبلغ عنك
انوسة: ايه اللى بتقوليه ده ؟؟بقولك هاجى القاهرة ...اقيموا انالاحتفالات ودقوا الطبول
ا نا جاية علشان عندى مفاجاة
شفقة: اشجينى شكلك جاية تقتلى جوزى ....وهو فيه مفاجاة احلى من كده

دانا ساعتها مش هدق الطبول

لا هدق كفتة واوزعها على الغلابة ندر
انوسة: ااقتل جوزك ايه يا هبلة انتى هتودينى فى داهية

اقفلى يا بت السكة .....اقفلى
شفقة : طيب خلاص قولى احبطتينى ايه هى المفاجعة ؟؟
انوسة: اختك كلموها من التليفزيون وعندها تصوير
شفقة: تصوير! ايه ده يا انوسة بقى يوم ما تشتغلى تدورى بكاميرا فى التليفزيون زى المصوراتى

حد عايز كارت صورة يا بيه ....صورة يا هانم ...وتعملى زى اضحك الصورة تطلع هطلة

لا لا مش مقامك يا انوس


انوسة: بقولك ايه انتى هتجنينينى... دول كلمونى علشان اصور انا وسارة طوبار

صاحبة مدونة محاولات البحث عنى هنصور فى برنامج ثقافية كافية
شفقة: محاولات البحث عنى ليه هى كانت تايها ولا ايه ؟؟

عموما هستناكى بعد ما تدوروا عليها وتلاقوها بس ابقوا هاتوا منادى على توتوك كويس
انوسة :ااقفلى يا بت انا قطعتى علاقتى بيكى انتى وجوزك
وجاء اليوم الموعود وما نفذتش ايناس تهديدها ومقطعتش علاقتها بينا

لانها كانت فى احتياج للعصابة بتاعتنا انا واحسان

وكله هيتضح لحضرتكم بعد كده وجت انوسة الننوسة واختها نسمة العسولة الى ارض الوطن

واتقابلنا واحسان كالعادة كان جعان وعمال يتحايل على ايناس ناكل

تقول ابدا مش هأكل الا لما اصور مش هتبهدل ولا همسح الروج ابدا

ولا هبهدل اناقتى وشياكتى

واحسان يتحايل وانا اتحايل وهى على كلمة واحدة "مش هاكل يا سونة مش هاكل يا سونة "

بينى وبينكم الراجل كان هيقع منى

ده نازل من البيت على فرخة... وحلة مكرونة ....ولتر بيبسى

مش حاجة يعنى " طيب ما كان جه كلنا احسن"
وجاء موعد التصوير راح احسان قالى نوصل البت الخنيقة دى لحد الاستوديو اللى فى المقطم

ويمكن السلعوة تاكلها وتريحنا وبعدين نروح نشوفلنا خروف ندفن نفسنا ....فيه انا وانت يا جميل

وقد كان

طلعنا المقطم ووصلناها وهناك وعند ميعاد التصوير

لقينا ايناس بترتعش .....وجالها حمى وسخونة

قلتلها انوسة حبيبتى مالك مرتبكة ليه؟؟
الحالة جت ولا ايه باينننا هنعمل زى فيلم عنتر بن شداد " هات العطر يا ولا"
انوسة شدى حيلك وفوقى ولا يهمك... اديهم على نفوخهم

بقى مذيعة مش هتعرفى تلميها ...ده انتى لامة البلد كلها

ومبهدلانا فى مدونتك.... ومبهدلة الوطن.... وقريب هتتمسكى

اجمدى يا هبلة وارفعى مناخيرنا لفوق
وبعد ما شمت نفسها افتكرت ان سارة وجوزها القهوجى لسه موصولوش

وان ميعاد التصوير قرب ولازم يكونوا سوا..... قعدت تقول اعمل ايه انا دلوقتى

"كده فرصة احترافى هتضيع"
شفقة :ايه يا بنتى ده انتى هتصورى فى ثقافية كافية..... ولا فى برنامج الكورة فى الملعب ؟؟
انوسة :اصلى وعدت اصحابى انى لو نجحت واشتهرت ....هعمل بطولة اول فيلم استعراضى غنائى راقص

وهسميه" ثقافية كافية وانا فى الاوكية" وهيكون اخراج جاد شويرى

وقعدت تعيط وتنعى حظها بسبب تاخير سارة
انا قعدت اهديها ..عموما استنى شوية... تلاقى سارة بتشطب الكوبايات والصوانى وبتلم حق نصبة الشاى والقهوة بتاعة امجد

ما انتى عارفة انها بتساعده بعد الضهر علشان يعرفوا يتجوزوا

ما انا كنت بعمل كده مع سونة كان سواق على ميكروباص وكنت انا التباع بتاعه

وهو ينفع جواز من غير الكفاح
شوية ووصلت العروسة الجميلة سارة وجوزها امجد القهوجى
شفقة:مالك يا سورسارة خدى نفسك
سارة: اصلى تعبت اوى النهاردة فى القهوة ويادوبك خلصت... وسيقت وروحت خدت شاور علشان اطلع زى القمر وجيت
شفقة: سارة جبتى باكوين شاى وسكر للبوفيه

سارة: لا ...ليه يا شفقة هما معندهمش بطاقة تموين ولا ايه ؟؟

لا يا خايبة ما انتم لازم تظبطوا المذيعة علشان تظبطكم... والا هتتهروا اسئلة
سارة :تصدقى معاكى حق يا شفقتى... لو الواحد يعرف كان جاب معاه التموين وهو جاى
انوسة : ايه ده ان شاء الله انتم لسه هتكلموا وتلوكوا مع بعض
يلى يا ست سارة بينادوا على اسمك ....ساقطة وقعدت تتريق
واول ما وصلوا عند الاستوديو انوسة كان هيغمى عليها
ونفسها مرة واحدة اتقطع وقعدنا نشممها فى بصل وكرفس
لما روحنا طلعت.... وشوية شوية كنا هنطلب 55 اسعاف... يجوا يرفعوا الجثة
شفقة: شدى حيلك يا انوسة ما تخافيش
نحن السابقون وانتم الاحقون..... وحـــــــــدوه
ودخلت ايناس وسارة الاستوديو بعد ما المذيعة قعدت تتحايل عليهم وتترجاهم
علشان مستقبلها ما يضيعش
وبعد الشحتفة والعياط

وافقت ايناس وسارة انهم يسجلوا فى البرنامج بشرط

انهم يدفعولهم بدل ....."استغلال ثقافى "
وخدت ايناس وسارة على قلبهم اد كده

بس ما تفهموش غلط ما خدوش فلوس ......لا خدوا اسئلة لما قالوا يا بس

البت سارة كلت الجو.... وقعدت تزق فى ايناس وتقرص فيها وكل شوية.... تبصلها وتلعب لها حواجبها

لحد ما ايناس ارتبكت وما بقيتش مركزة..... واستحلفتلها انها لما هتخرج هتوريها وهتبلغ بتوع التموين

يقفلولها القهوة لكن ما انقذهاش من الحوسة

الا اتصال عبد الحميد افندى ....وروضة هانم السلحدار.... والملك طلال ....والشاعر الهمام امجد

كلمتين حلوين... على حبة مكسرات على مدح فى الزهرتين المنورين
و خلصت الحلقة بعد ما ضرسولنا سنانه من المكسرات لكن الحق

كلنا صقفنلهم ورفعنلهم القبعة

وخاصة للبت المضروبة ايناس اللى بتقول كلام زى الفل....... بتاعة مصر دى

لا بجد وطنية ....وطنية يا انوسة

بذمتك بقى الوطنية ولا الكوسة؟؟

والعقل والرزانة ولا مخ المهوسة؟؟ مين يكسب فى البلد دى يا فيلسوفة؟؟
بعدها اتفاجانا بانه عيد ميلاد ست البنات العروسة الشربات

اللى متجوزة شاعر الاتوبيسات ...."سارة حبيبة قلبى"
هنعمل ايه ...ايه ...ايه ؟

فجاة لقيت انوسة بتتفق مع احسان وبيكونوا عصابة هى واحسان ونسمة

وبيفكروا انهم يعملولها عيد ميلادها فى مركب

وده كان مخطط انوسة علشان تفش غلها فى سارة

واقترحت اننا كل واحد منا ياخد معاه بدلة غطس .....وعوامة انقاذ اشترتهم على حسابها

هما والتورتة اللى كانت غامقة علشان محشية ديناميت

علشان بعد ما هيطفوا الشمع.... ايناس هتعد لتلاتة وبعدها هتتنفجر المركب

وتغرق سارة وامجد وتعملهم زى عروسة النيل

وقالت مقولتها الشهيرة "علشان تبقى تاكل الجو منى وتقول للمذيعة مدونتى اسمها محاولات البحث عنى

" طيب اهو انا هخليهم يبحثوا عنك فى مياة النيل الضحلة مع السمك"

واصبحت نهر الحب نهر الانفجار والتدمير
ولكن للاسف بعد ما ركبنا المركب ونفسنا اتقطع فى نفخ البلالين وخاصة نسمة

يا دوبك جينا نولع الشمع..... ما لقناش معانا كبريت وفشلت الخطة الشوريرة

وفضلت ايناس تعض فى صوابعها لحد ما دخلت على العقلة نفسها

ولما لقيت مفيش فايدة راحت قعدت على اول المركب... وقعدت تهز فيها قال يعنى يمكن تغرقنا

وبرضوا ولانها سوفيفة.... باءت محاولاتها بالفشل
واستسلمت للأمر الواقع..... ساعتها قالت بس مفيش الا انه احسان يغنى

وطبعا كله الا سونة..... كروان مغرد...... بلبل صداع

ااقصد صداح .....قالت يمكن يغنى الراقدون تحت النيل

ومع الصوت الجميل يمكن ينتحروا ونفوز احنا بالهدايا

لكن ابدا وكأن سارة وامجد

معملوهم حجاب عند عم سرداب.... بتاع الاعمال الهباب... اللى بيخلى العايقة تلبس النقاب
احسان بقى ايه قال ابدا بوتيتا مش هوافق على افكارك الشوريرة يا ايناس

انا مش عايز اتحبس واروح اللومان.... خلينى جنب مراتى غلبان فقير جعان حيران

ومرضيش ابدا يشترك فى الخطة

ربنا يخلهولى عاقل..... عاقل ما بيحبش اللومان لكن بيحب الدمار الشامل اللى هو انا
ايناس اتغاظت محدش عايز ينفذ اى خطة

تلف شمال ....تدور فى المركب.... ولا احنا هنا

وقعدنا نغنى ....وامجد يقول شعر

شوية يبص لاحسان ويقول شعر رثاء

وشوية شعر فى الاتوبيسات شكله معجب بيها

اوى وسارة.... تقوله خليك كده متحبش فيا

وفرحان بالاتوبيسات بتاعتك اوى يا خويا

وخاصة بيموت فى خط الكيت كات..... فيصل


وفضلنا كده ساعة .....شوية رثاء ....وحبة هجاء

لحد ما ايناس طقت....واخر لما غلبت طلعته على عين المراكبى

بما ان خطتها فشلت مع الراكبين ....قالت تطلعه فى المراكبى وتاخد حقها ضرب وتلطيش فيه

الهوبة جت وعايزة تهدأ ونسمة تهديها وتطبطب عليها مفيش فايدة ... مهوسة

" ساعة تروح وساعة تيجى"
احسان قعد يحوشها ويقولها علشان خاطرى سيبيه ....هنتحبسى وهتلزق فينا وافانا هيتهرى ضرب

وهى ابدا لحد ما الراجل خلص فى ايديها ......وما انقذهوش الا امجد
وبعدها مشينا ومن كتر الغيظ والغل...... رجليها فضلت تورم..... وتورم لحد ما بقت اد رجل الفيل

وساعتها اعترفت بغلطها لرحيل..... وطلبت منها السماح

واترجت الناس الملاح اللى هو احنا اننا نعفو عنها

وبعد ما سامحناها جريت على البيت

خدت شنطها.....وشيلتهم للبت نسمة

وراحت راكبة اول سوبر جيت هى واختها

وعلى بلدهم عدل

توصلى بالسلامة يا انوسة

بالرغم من خططك الشوريرة المريرة ....الا انى بموت فيكى وبحبك جدا

انتى وسارة ونسمة

ربنا يوفقك وتلاقى المخرج اللى يخرجلك الفيلم

وتبقى بطلة اد الدنيا زى ما بتحلمى ....بس ساعتها هبقى اخد منك حق تذكرة السينما

علشان اخواتك شحاتين وفقرانين

شفقـــــــــــــــة

هناك 29 تعليقًا:

الحياه يقول...

ههههههههههههههههه

بجد جامد اوي التوبيك ده
بجد قتلني من الضحك
يخرب عقلك انا بجد كنت في مود وانتى خليتيني في مود تاني خالص

هههههههههههههههههه

بس جامد جود جود جود

donya يقول...

كلامك علي طول جميل

الصداقه والمحبه حاجه حلو اوي

ربنا يخليكم لبعض

* تحياتي

richardCatheart يقول...

مش ممكن والله هموت قتلتينى

انت شربااااااااااااااااااااات مش شربات اللى بتتلبس لاء اللى بتشرب هههههههههههههه


والله ايناس تستاهل كل خير ربنا يكرمها ان شاء الله وتعمل اللى نفسها فيه

اهو تحقق حلمها وتخدنا تحت بطها تدينى دور اعدى من اؤدام الكاميرا اى حاجه احقق انا كمان حلمى

انا كلمتها بالصدفه قبلها بيوم وقالتلى على المعاد ونقلت القناه اؤدام وحظى التعس نمت قبل البرنامج بنص ساعه من التعب والصحيان بدرى
وجريت ادور واصوت فى العيال وابوهم وكل فى هاله زهول بس للاسف الساعه كانت 8 او سبه ونص وكان مضى قطار العمر وملحقتهوش

فاياريت لو موجود عندكم تنزلو نشوفه
او على تيوب اى حاجه لانى زعلانى اوى انه فاتنى للاسف

مبروك لنوسه وساره ويارب ديما ما احسن لاحسن

وانت بقى يا مشكله البوست جنان
سلامى للجميع عندكم

رحــــيـل يقول...
أزال المؤلف هذا التعليق.
رحــــيـل يقول...

ههههههههه
بقى كده ياشفقة بتزورى فى التاريخ بقى انا كنت متأخرة برضه يالهوووووووووووووووى ده انا اعصابى باظت بسبب انكم كنتوا خاطفين ايناس ونسمة والحلقة بدأت وهما لسه رهينة الحمد لله ان فقرتنا ماكنتش فى الاول

ربنا يكووون فى عونك يا احسااااااااان

لا بجد ربنا يخليكوا كان يوم جدا جدا جدا من هنا لبكرة :)
يارب متجمعين بود كده
ماتشدى حيلك كده معانا وتحاولى ترفيعلنا الحلقة نت ههههههههههههه

Remas يقول...

بجد يا شفقة موتيييييييينى من الضحك
ربنا يسعدك دايما يا حبية قلبي

بس كدا تروحو مركب من غيري

ماااااااااااشي مااااااااشي

لازم لازم لازم تاخدوني انتى واحسان وتركبوني مركب
بس مش تغرقوني تركبوني وتنزلوني تاني معاكو
بجد كنت نفسي اوي اكون موجودة اليوم دا

مبروووك لانوسة حبيبة قلبي اللى بموت فيها
ولسارة اللى بحبها من كلام الناس وحبهم ليها مع انى للاسف مش اعرفها

وبعدين يا شفقة انا شايفه سارة بتقول ان انتو اللى كنتو مـتأخرين
بردو يا شقفة انتى واحسان بردو ؟؟؟
حتى في ايام التصوير متاخرين ؟؟
هههههههههههههههههه

على فكرة يا توتة انتى وحشتينى جداااااااا
انتى وانوسة ونسمة
وبحبكم جدا جدااااااااااا

رحــــيـل يقول...

انا هعتبر ان حق الرد مكفول للجميع وارد تانى على عبد الحميد وريم
انا قولت ياشفقة ارد يعنى بما انى مشاركة فى بوست الدمار الشامل اللى انتى كاتباه ده ربنا ما يحكمك ي شفقة على تاريخ بلد تكتبيه وكمان بقى بمناسبة التأخير ان الناس دى ممكن تعليقها يحمض مثلا وريحته تطلع والجيران تشتكي وتبقى حوووسة

عبد الحميد عجبك قوى يا اخويا وميت من الضحك انا ما شفتش فى حياتى طولة بال وروقان قد شفقة واحسان ونتصل وتقولى جايين واتصل وتكنسل ده انا ونسمة كنا هنخلل فى العربية ده كويس اننا مش فى البرد كنا بقينا اصنام ثلجية من كتر الانتظار ده امجد وايناس اللى نزلوا والمفروش كانوا يحصلونا على الساقية وصلوا قبلنا اصلا وسبقونا وانا ونسمة مازلنا فى عربية احسان بنستناهم طيب مش كانوا يسيبوا المفتاح كنا خلعنا احنا اى نعم محدش فينا بيعرف يسوق بس كنا اتصرفنا
ده غير انتظارنا ليهم قبل الحلقة وهما خاطفين البنات وبعد الحلقة صعبنا على بتوع القناة فكنا هنشارك الامن اللى واقف كنبته الصغيره بس كانت هتكفى مين ولا مين انا وامجد ونسمة وايناس وفى المقطم بقى صحرااااااااااااااااا

بس برضه يعنى الحق يتقال اليوم ماكنش هيكمل من غيرهم ده كفاية ان احسان غني
-----------------------------
ريم

والله يا اوختى انا كمان بسمع عنك كل خير
وان شاء الله نتقابل قريب بس نصيحة بلاش مركب مع شفقة واحسان ممكن تطلعلك سمكة قرش من النيل عادى يعنى ماهو عما يجو النيل هيكون فتح على البحر الاحمر ده غير اللسان طبعا هيبقى فى لسان وعنين ومناخير وودان بسبب عوامل التعرية وتغير الجو وخريطة العالم اللى طبعا اكيد هيحصل فيها تغيراااات كتييييييييير طول ما انتى بتستنى شفقة واحسان

وهذا احقاقا للحق واجلالا للواقع و رفعا لراية لا لتزوير التاريخ وشقلبة الحقائق اللى بتقودها شفقة

الحق اروح بقى قبل ما اضرب :)) على فكرة انا مش انا يا شفقة

نسر الشرق يقول...

ههههههههههههههههههه
ايه الحاجات الحلوة دى بجد مدونة رائعه وحمدالله على السلامه
http://nisr-elsharq.blogspot.com/

Unknown يقول...

ازيك يا شفقفق يا حياتى
بقى مش هتبطلى فضايع انتى وجوزك
ماشى يا شفقة اما وريتك
كمان انا قلت لو نجحت هعمل فيلم 0000
بس ماشى ادينى منجحتيش اقولك خبر صحيح
مش البت سارة جالها عريس
والله انا لسة مقلتيش لامجد ولا لها ههههههه
يالا بقى اما نشوف وقع الخبر عليهم
جالها من الحلقة

بس والله اما اشوفك على الفضايح دى

Unknown يقول...

بصوا بقى انا بجد كنت مقتولة ولما اتفرجت على الحلقة اللى انا مش عارفة الحمد لله ارفعها عشان الفضايح
اكتشفت التالى

اولا انى كنت مهيسة على الاخر
والست البيه المذيعه بتسألنى فى حتة وانا بجاوب فى حتة تانية خالص يعنى هى فى المقطم وانا فى العباسية


انى هبلة اان مالى ومال بلدنا ومصر
والكلام دا خلينى فى اللى انا فية روح الشهيد البطل المفدى احمد عرابى نزلت على فجأة وياريتنى قلت جملة عدلة :((

اما عن المركبى يا ست شفقة فدا حرامى
وكمان جايلى وانا تعبانة عيزانى اعملة اية
خرامى يبقى ياخد على دماغه واهو جوزك كان معايا والحمد لله

بس خلاص
بما ان سارة بترد هنا كمان وعملت احتلال

بت ياسارة جالك عريس صعيدي اسالى امجد وردى على
اهو على الاقل امركم شورى

هاهاهاهاهاها


بس خلاص انا هنام لانى تعبانة بقى

غير معرف يقول...

مبرووووك لإيناس وساره ظهورهم بالتيفي :)

وعقبالك يا شفشق انتي واحسان ... بس اوعوا تيجوا خلف الاسوار :)

تحياتي

رحــــيـل يقول...

ايناس انا مش مسئولة عن اللى هيحصلك امجد كان بيعزك جدا والله بس اعتقد ان رصيدك معاه بدأ يسود وبعدين ما احنا قولنا ده مدح برئ مش اكتر
انا نفسي اشوف الحلقة بس عشان اعرف ايه موضوع العقل والزانة اللى الناس اجمعوا عليه ده اصلى مش حساني يعنى كده
يالهووووووووووووووى انا حاسه ان نهايتى على ايديكى من يوم التبرع بالدم ههههههههههههههههههههههه بلااااااااش فضايح ابوس ايدك ده لسه فاكرلك موضوع العقرب الاسود :)

عروستى يقول...

مدونه جميلة جدا بجد

Mona Hekal يقول...

http://3aklwqalb.blogspot.com/
مدونه هايله
ممكن تبادل اعلاني " علي رأي الفيس توك "

شفـقــة و إحســــان يقول...

الحياة
كنت فى كمود ازاى يعنى وهو اليومين دول الناس بتبقى قاعدة فى كمود؟؟
اصل على ايام الناس كانت بتبقى قاعدة على كرسى
وبعدين مين جوده ده لاعب كورة ولا ايه؟؟

شفـقــة و إحســــان يقول...

donya
مين قال انه فيه صداقة ومحبة ده فيه كره وبغضاء ونميمة وكل الحاجات الحلوة دى
وهى الصداقة ايه غير شوية نفاق على نميمة على بغضاء فوق بعض

شفـقــة و إحســــان يقول...

richardCatheart
احسن حاجة عملوها العيال انهم خلوكى تنامى وما تتفرجيش بجد ما تشوفيش وحش والنعمة النوم اجدع
بس صحيح ايه حكاية سبه ونص دى هى ساعة جديدة بتوقيت جديد ولا ايه
وكمان ايه التوتو اللى هرفعلك عليه ده وهو حد قال ان البرنامج كان بيتذاع فوق شجرة
عموما لو طرحت ابقى انذله بس لما استاذن اصحاب المزرعة

شفـقــة و إحســــان يقول...

رحيل
بقى انا بزور فى التاريخ يا رحيل ليه شايفانى حاطة تواريخ ملخبطة
وبعدين ايناس ونسمة هما اللى خطفونا انتى مش عارفة ان ايناس عاملة عصابة ولا ايه
وبعدين ايه حكاية الرفع ده
والنعمة لارفعكم كلكم على الفلكة وفين يوجعك

شفـقــة و إحســــان يقول...

reem
اولا يا قمر ده احنا نجيب المركب ماشية من القاهرة لحد طنطا علشان خاطر عيونك
ثانيا انتى تامرى بس ما اوعدكيش اننا لو خدناكى معانا مركب هنرجعك تانى لان انتى عارفة البحر غدار وكله قضاء وقدر وما دايم الا وجه الله
وحدووووووووووووه
اما بخصوص التاخير فهذا افتراء وكذب اى والنعمة

شفـقــة و إحســــان يقول...

رحيل
ايه يا ست رحيل ما تاخدى كمان الباسوورد وتحتلى مدونتى احسنى
والنب تعالى بس يا شيخة تعالى
انتى بتخطفى زباينى منى ولا ايه والنعمة لابلغ انا عن القهوة وابقوا ورونى هتتجوزوا ازاى فى سنتكم
يلا يلا امشى العبى ادام باب مدونتك امشى

شفـقــة و إحســــان يقول...

نسر الشرق
الله يسلمك ولو ان احنا مغبناش اكتر من شهر والنعمة الواحد حس انه راجع من الكويت

شفـقــة و إحســــان يقول...

نهر الحب
يعنى عايزانى اكتم على الخبر بقى ده يصح
ابقى اعلامية اد الدنيا واخبىء خبر الحادثة المروع ده طيب ازاى ينفع اعديه كده؟؟
وبعدين ايه حكاية العريس ده يا لهوى لما امجد يعرف نفسى اعرف وقع الخبر عليه
علشان انشره البوست اللى جاى
ومش عارف ابارك ولا اقول يا لهوى
مشاعر ممتزجة

شفـقــة و إحســــان يقول...

نهر الحب
بقى انتى كنتى مهيسة وهبلة امال احنا كنا ايه عاملين دماغ
يا شيخة حرام عليكى ده شوية شوية المذيعة كانت هتسيبلك البرنامج والميك والاستوديو وتقدم استقالة يا مفترية

شفـقــة و إحســــان يقول...

فتاة من الصعيد
معقول برضوا تباركلهم على التى فى امال لو كان ان ثرى كنتى هتقوليلهم ايه
وبعدين ما تخافيش اخواتك حريصين انهم يخلوا خلف الاسوار اخر حاجة واوعدك انى انا بس اللى اطلع فيه بعد ما اقضى على سونة
علشان استحوذ على البرنامج لوحدى

شفـقــة و إحســــان يقول...

رحيل
والنعمة لو ما انجعرتيش من هنا لهرش عليكى ميه انتى خلاص مفيش فايدة رايحة جاية تعدى علينا ايه البلاوى اللى بتتحدف علينا دى ياربى
وبعدين يا ايناس ابعدى عن امجد احسنلك لحسن تروحى فى خبر كان الراجل كل شوية يقول انا كاتب كتابى
احترمى نفسك وافهمى انه ممنوع الاقتراب او التصوير

شفـقــة و إحســــان يقول...

عروستى
ربنا يخليكى يارب بس اظاهر ان الكوشة اثرت على ارائك

شفـقــة و إحســــان يقول...

غير معرف
والنعمة انت راجل زى الفل وبتقول كلام زى الفل
وهو فيه احلى ولا اجمل من اسكندرية

شفـقــة و إحســــان يقول...

Mona Abo - Elso3od
منورانى بجد بس انا مش عارفة ايه التبادل الاعلانى ده اصل اختك جديد على الفيس توك ومعرفش الا الفيس قفا

داليـ ـ ـ ـ ـ ـ ــــا يقول...

جميل البوست
دمك خفيف