الاثنين، 12 يوليو 2010

1000 مبــــــــــــــــــــــــــــــــــروك


اسمع كلام امك.... شرد لابوك....... بهدل عمتك كسر دماغ عمك اخو ابوك
قطع فى فروة ستك طلع المطوة وغز جدك طبعا كل الجمل دى متعارف عليها فى اى سبوع
واحنا والحمد لله كان عندنا اجمل سبوع لاجمل ننوس عين امه " ادم "
بس ربنا يستر وما يطلعش عينها ويخليها تبظ لبره ويعملها جحوظ
المهم يا رنونة انك تستحملى وتسلمى امرك لله لانه شىء لابد منه لازمن ولابندق انه يكون فيه عيال
امال يعنى ناخد بتارنا منك ازاى؟
مهو ربنا بيخلص ذنب ناس من ناس
المهم انى جاية النهاردة اباركلك واقولك الف الف مبروك
لانك بعد ما بقى عندك ادم الدنيا هتتغير خالص........ وهتتقلب راسا على عقب
وهيبقى لونها بمبى بمبى مسخسخ
الف مبروك..... عليكى حصولك على لقب ماما وامه ويامايه ويا ماماتى واللى زيه .. زى لقب ميس ايجيبت كده
يعنى حاجة عظيمة اوى.... وما تنسيش ان الجنة تحت اقدام الامهات
ده ان بقى فيكى قدم اصلا
الف مبروك.... انتقال لقبك من مودام وانتى الولية والالفاظ اللى اتهريتى من سماعها دى
الى مامى ....ويامه .....ويا ست الحبايب انتى ويا ماى ماذر
الف مبروك...... انك خلاص هتودعى الوظيفة وهتنتقلى من كادر الموظفات المحترمات
الى كادر وظيفة احلى كتير وهى المرضعات.... والدادت .....وشغل الحضانات
وده طبعا اعلى فى السلم الوظيفى.... بس خلى بالك لتقعى من على السلم وتركبى مقشات
الف مبروك...... عليكى اخيرا هيجى اللى هيعرف يشكمك ويقولك بس اسكتى وما تتكلميش كده مع بابا

ويخلى بابا بقه مفتوح على اخره من كتر الانشكاح ويبقى فرحان اوى بعصابة على بابا اللى بتأيده

الف مبروك انك خلاص من هنا ورايح عيونك هتجافيها النوم ......وابقى قابلينى لو شفتيه تانى قبل اربع
خمس سنين وبرضوا هيبقى تخاطيف
وهنيئا لكى الصويت والعياط وكلمة واءءءءءءءءءءءءءءءءءءء.... والزن اللى عمال على بطال واللى هيلم عليكى الجيران
الف مبروك عليكى قاعدة البيت ليل ونهار..... والحرمان من الخروج والفسح والسفر
والذى منه......وكبيرك تجيبى لب وترمس وتعمليهم وتقزقزيهم فى البيت
وتقعدى تفتكري الايام الخوالى بتاعة الكورنيش....... والسميط ابو جبنة

الف مبروك..... اخيرا جالك اللى يحكم رايه ويمشى كلمته عليكى
وما تعرفيش تفرضى عليه رايك ........زى ناس تانية كانت بتعمل وهى ساكتة سكتم بكتم
الف مبروك ....انه مش هيبقى فيه ولا مكان فى البيت تقدرى تقعدى فيه..... وهتفضلى تلفى حوالين نفسك من الكركبة وهتعيشى فى زحمة يا دنيا زحمة ...... ومولد يا دنيا
الف مبروك..... عليكى كلمة هاتى وانا عايز يا ماما.... واشمعنا اصحابى ....والبت بنت الجيران وعايز مصروف علشان احجزها قبل ما عريس تانى يتقدملها..... وادفعى يا ماما

كمان لازم تنسى كلمة مهمة اوى وتحذفيها من قاموس حياتك ..... كلمة خدى لازم تطلقيها بالتلاتة
من اليوم فصاعد لازم تكونى مضحية
الف مبروك ....عليكى سهر الليالى فى المذاكرة والضرب فى جتة العيال.... وهما ولا هما هنا منحسين بعيد عنك
بعد ما كنتى كبيرك تمسكى مجلة الازياء ولكى يا تفيدة...... وموضة ام اربعة واربعين
الف مبروك .....عليكى انه اخيرا هيجى اللى يطلع عين جوزك وياخد حقك...... لك يوم يا ظالم
الف مبروك .....عليكى شد الشعر والمشى حافية..... وتشقق القدمين
بعد ما كنتى بطلة العالم فى المرواح للكوافير... ووداعا للتجميل ومكوجى الرجل
الف مبروك.... عليكى المورستان وكاس العالم اللى هينظموه فى بيتك....... ووداعا للراحة والهدوء وعيشى مع مبدأ لا راحة بعد اليوم
الف مبروك..... عليكى اخيرا هتلاقى المنافس الوحيد اللى مش هتقدرى تفتحى بقك معاه
واللى هيستولى على الاب توب بتاعك .....علشان يشيت مع الجو
وانتى تروحى تترزعى فى المطبخ مع حللك ومواعينك


الف مبروك ....انك هتقعدى تزعقى وتصوتى للصبح لحد ما الاحبال الصوتية تختفى ....ومش هتلاقى حد تفشى غلك فيه ولو قلتى مين عمل كده ؟؟
مش هتلاقى غير كلمة واحدة مش انا يا ماما

الف مبروك...... عليكى الخضة لما تقعدى تنادى كل شوية وتلاقيه طالعلك من اى مكان زى عفريت العلبة