السبت، 2 أبريل، 2011

النســــــاء قـــــــــادمون...والازواج راحــــــــلون

اولا وحشتونى اوى اوى اوى بعد فترة غياب طويلة ان شاء الله مش هتتكرر تانى

وثانيا مبروك لينا كلنا على ثورة 25 يناير

وخاصة لشباب الثورة اللى عرفونا

يعنى ايه معنى الحرية

ثالثا بقى احسان بيه جوزى اللى كان من المناضلين

والمرابطين فى ميدان التحرير

بصراحة الراجل من شباب الثورة بس مش اللى كانت بتنادى باسقاط

النظام

لا كان مع اللى بينادوا...... باسقاط وخلع المودام

وحل المجلس النسائى الرقيق التيف .....اللى من غيره ما نعرفش نعيش

وقال ايه الاقى الراجل داخل عليا من كام يوم شعره منعكش

وهدومه متبهدلة بس رايق وفايق وماسك فى ايده يافطة مكتوب فيها

" التغير التغير ولابد من الاستقلال والرحيل"

شفقة: يا لهوى ايه ده يا احسان؟؟

وهو لسه فيه مظاهرات؟؟ وبعدين خير يا حبيبى

هو انت كنت نايم الفترة اللى فاتت دى ولا ايه؟؟

ما خلاص الرئيس مشى ورحل بلا عودة

احسان:ما انا عارف ان الرئيس خلع ..

لكن انا كنت ماشى فى مظاهرة تانية من نوع خاص

بتطالب بتغير مهم وجذرى فى المجتمع

شفقة:جذرى ايه يا حبيبى... انتم بتطالبوا بخلع النخل ولا ايه؟؟

احسان:لا احنا بنطالب بتغير الغيط كله علشان الارض قربت تبور

شفقة:انت بقت مهندس زراعى ولا ايه يا روحى ايه الكلام الجرار ده

احسان:"فى سره"جرار اما يدهسك ويخلصنا بقى... بقولك تغير مهم وجذرى

هيغير حياة كل راجل ويخليه فى حياة افضل

شفقة:شكلكم كده بتعملوا اعلانات لمدينة الرحاب

احسان:لا وانتى الصادقة احنا بنطالب بتغير رحاب نفسها

بنطالب بتغير المدام

وكان شعار المظاهرة "لا لامنا الغولة" " ولا لحكم قراقوش"

" ولالآم اربعة واربعين اللى كابسة على انفاسنا بقالها سنين "

شفقة:بقى كده يا راجل يا عميل.... يا ناكر للجميل

تمشى فى مظاهرة حمقاء بلهاء... بتطالب بتغير النساء

طيب دول قلة شوريرة مندسة مالك انت ومالها؟؟

احسان:ما انا عضو فى القلة القليلة دول وضحك

شفقة: يخونك اليخنى اللى بعمله.... ولا الجلاش الابلاكاش.... ولا التورلى المهطورلى

اخس عليك يا سونسون ما كانش العشم

طيب الرجالة الوحشة دى ايه مطالبها؟؟

احسان:بصوت خشن" ان الست لو خايفة على بيتها وعايزة تلحق نفسها

قبل ما تتشرد وتتسول فى الشوارع

لازم ترضى بشروطنا واهمها

1-الغاء حظر قانون الطوارئ المنزلى وانها تسيب جوزها يخرج ويدخل على

كيفه

من غير ما تسال رايح.... فين ولا جاى منين

وما جرجتش عندنا ليه...... زى نادية مصطفى

وتسيبه يبرطع براحته وماتكتمش انفاسه


2- تبطل تأمم كل فلوسه وتسيبله مرتبه كله يشبرق بيه نفسه ويهيص

لحد ما يتهطل من الفرحة

وتدور هى على شغل تصرف منه على نفسها وعليه ان أمكن

3- رفع الرقابة من على لاب توبه والكام بتاعته

وتليفونه المحمول وتبطل تفتش فى المسجات بتاعته

وتقلب فى اسماء المزز

4- تديله حريه التصرف الكامل فى كل كبيرة وصغيرة فى البيت

يعنى يقعدها يطردها يبيتها على السلم كنوع من التغير هو حر

يجيب فول يجيب قلقاس تقول حاضر.. يجيب طوب تاكل وتموت وهى ساكتة

5- تسمع كلامه من غير ولا نفس ومفيش هروح عند ماما ولا بابا

لآنهم سبب البلاوى والعكننة وكمان اكتشفنا انهم عملاء

وبيعملوا دسيسة ومؤامرات ضد الزوج

ودايما بيلجأوا للاجندات الخارجية والكراريس كمان

6- مفيش لا ميمى ولا ستونة ولا الدادة الرفيقة أم عطيات صاحباتى ممنوع منعا باتا

دخولهم البيت لاننا اكتشفنا انهم من المحرضين ضد الازواج

7- الخروج هيبقى مرة واحد فى السنة وتكون لجنينة الحيوانات علشان العظة والعبرة

وتفتكر هى كانت ايه فى يوم من الايام

او يكون الخروج للقبور كعظة لاخرتها

والجوز اللى هو احنا 6 مرات خروج فى اليوم يشم نفسه

ويشم ريحة تانية غير البصل والتوم والجنزبيل

7- القبول بزوجة اخرى وان لزم الامر وكان عينه زايغة وصايع القبول بتلاتة

زى ما حكم الشرع احنا ناس بتوع ربنا امال ايه مش مسخرة يعنى

عمل دستور جديد والانتخاب يبقى ليكم مرة واحدة... وحذارى من اللى هيقول لا

الانتخاب هيبقى كل اربع شهور مش سنين

ده حتى اربعة كتير اوى تكون النفس جزعت منكم بس يلا نستحمل ونعصر كيلو ليمون

واللى مش عاجبها تلم بؤجتها

وترحل على بيت الاعداء بيت اهلها

انتهى البيان والله الموفق المستعان

شفقة:بحسرة"لولولىىىىىىىى" وقال يا قاعدين يكفيكوا شر الفاسدين

"بينى وبينكم" انا كنت هنقض عليه اعضه

بس بسرعة لميت نفسى وافتكرت اننا كده ممكن نبقى فى الشارع

ومانلاقيش الا ميدان التحرير

بس بصراحة انا اشفقت على الميدان هيساع مين ولا مين

وقلت ادينا قاعدين وضل راجل ولا ضل حيطة

كمان علشان الشحاتة ما تزيدش وتنتشر رحت رديت عليه بلطافة

طيب مفيش اى تفاوض يا سونسون.... او حتى قاعدة عرفيه نوصل فيها لحلول وسطيه

احسان:مفيش واضربوا دماغكم فى الحيط

شفقة:بقى كده يا سونة اوكيه

افتكر انكم انتم اللى بداتوا المعركة

ويا انا يا انتم يا معشر الرجال

تانى يوم عملت اجتماع نسائى على مستوى قاعدة الحارة

ولميت كل ستات المنطقة والمناطق المجاورة

واتفقنا اننا هنشن الحرب على الرجالة

وهنعمل مظاهرات نشجب ونندد فيها بعنف الرجال

واستبدادهم وديكتاتوريتهم ضد المرأة

وكان رمز المظاهرة الحلة والمغرفة

و شعار مظاهرتنا "لا لاستبداد سى السيد عبد الجواد"

ولا لشهريار اللى بيتجوز فى طلعة كل نهار"

ونزلنا الشارع وقعدنا نهتف" قاعدين قاعدين ....قاعدين ومش ماشين

"على قلبكم على قلبكم ...جالكم اللى هيذلكم"

وهنقعد قاعدة الحزانة.... احسن من رجالة الندامة"

"الستات الستات يا هنخلى عيشتكو هباب"

وقعدنا نهتف لحد ما صوتنا راح ونلف شوارع

يمين وشوارع شمال لحد ما سيطرنا على الموقف

ايوا موقف العباسية وابو زعبل وابو النمرس وبكده مسكنا زمام وسط البلد

بعدها الستات شالونى على كتافهم وقعدوا يهتفولى ويحيونى

وبعدها قرروا يرشحونى

لرئاسة مجلسهم وخوض المعركة وبعد كام يوم من المظاهرات

جاءت نتيجة الشراشيح قصدى الترشيح

نجاح ساحق وموافقة والجميع موافقون

احسان: ايه اليفط اللى مالية الشارع دى؟؟

هو فى حد رشح نفسه فى المنطقة ولا ايه؟؟

بس اظاهر انه جامد اوى شكله جالكم اللى هيلمكن

شفقة: امال يا حبيبى بس هو مش هيلمكن لا هيلمكم....تفرق

وكمان رمز الحلة طقم حلل بحاله والمونيوم كمان مش تيفال

حاجة صلبة ومتينة

احسان: ويا ترى هو مين؟؟

شفقة:قصدك هى مين؟؟

احسان:هى؟؟ نعم هى ست؟؟

شفقة:ومش اى ست دى ست الستات يا مصرية

شفقة مراتك حبيبتك.... ديا يا عينيا

مش تباركلى مش انا رشحت نفسى للحزب وكسبت وبفوز ساحق

احسان: ساحق انتى مسحوق معلش...حزب ايه يا وليه

ده على حزب وداد جلبى يا بوى

شفقة: بتهزر ساعتك

لا يا حياتى انا بقيت عضوة فى مجلس الشعب وليا كرسى

احسان:يا نهار منيل بنيلة مية كرسى على نفوخك وطرابيزة كمان

بقى اطالب بتغيرك من البيت تقومى ترشحى نفسك وتبلى المنطقة كلها

والعدوة تنتشــــــــــــــــر وتتســـــــرب وتتـــــــــوغل

شفقة: لا ومش كده وبس

ده انا هرشــــــــح نفسى كمان لكرسى الريــــــــــاسة

واللى هيفتح بقه بكلمة

هخلى الستات تعتقله واللى مش عاجبه

ياخد اول طيارة على شرم الشيخ

وقال عايز اطرد مرأتى بــــــــــــره.... جابت هى الكرسى وبقت ضـــــــــــــــــــرة

وعجبــــــــــــــــــــــــــــــــــــى

شفقـــــــــــــــــــــة

هناك 19 تعليقًا:

صيدلانيه طالعه نازله يقول...

ههههههههههههههههههههههههههه
قال الزوج يريد تغيير المدام قال
ده بعيد عن شنبهم يا اوختى
و بعدين هما اصلا بيبقى ليهم تمن ولا قيمه من غيرنا
و اديكى شايفه ايمن نور بعد ما جميله اسماعيل حلقتله و نفضتله
بقى عامل زى الكلب الاعور الحزين
و كل الناس بتفكر ازاى ممكن يبقى رئيس و هو معندوش جووووزه يييييه قصدى زوجه

مبروك عليكى كرسى المجلس و عقبال المريسه يا اوختى

شمس النهار يقول...

الزوج يريد تغيير المدام

هو يمشي مش هنمشي

:))))

مافيش اعتراض خالص
اللي عايز يغير يغير بس هو يمشي والقلل عليا

وروح ياناكر خيري شوف زمني من زمن غيري

واللي اخدته القرعه تاخدع ام الشعور

واسمع سلام خاليك هنا خاليك وبلاش تفارق مع الجز علي السنان

شفـقــة و إحســــان يقول...

صيدلانية طالعة نازلة
طبعا بعيد عن شنبهم وعن بقهم كله بقى الحياة تبقى حلوة من غيرنا
وصحيح ايمن نور من ساعة ما مراته سابته عمال يهوهو فى كل القنوات
يا ختى ربنا يخلينا ويحمينا

شفـقــة و إحســــان يقول...

شمس النهار
برافو يا شمس والنعمة انتى اسم على مسمى حرقتيهم
بس بلاش سيرة القرع لحسن كتير منا بعد الجواز شعره وقع من كتر الشد فيه وكتير هيزعلوا
خليها اللى خدته ام الباوريك تاخد ام الزلومة

عليم يقول...

انا لسة مقريتش اي حاجة بس المدونة عجبتني مووت هرجع تاني
بس حبيت اسجل اعجابي

باي

elsha3er يقول...

دعوة للأنضمام ألى جروب المدونين على الفيس اللينك
http://www.facebook.com/#!/home.php?sk=group_150308615029590&notif_t=group_activity

سندباد يقول...

سعيد بمروري للمدونة الشقية اللي دمها خفيف دي
تحياتي ليكم
تقديري واحترامي

ameen يقول...

انا مش عارف اقول ايه !!

والنبى انا غلبان

مش هقعد اللى هخطبها ع النت عشان متشوفش الكلام ده
وااااااااااااااااااااء

اخبار مصر لحظة بلحظة يقول...

أول مرة أزور مدونتك القيمة .. تهنئتي لك على المجهود المبذول والرائع..
ميدان التحرير الان
اخبار مصر لحظة بلحظة
ثورة 25 يناير

ميرام يقول...

ههههههههههههههههههههههههههه
بجد انتو هايلين
بتجيبو الصور ديييي منييييييييين

hanan khorshid يقول...

حمد لله على السلامة نورتو البلوج سبوت

momken يقول...

الف حمدالله على السلامه
طبعاً انا فى صف الثوره والتغير والتجديد والتنجيد

واحسان عنده كل الحق
بعد النظام ما عملت له عيد ميلاد اسطورى السنه الى فاتت...اتنفضله بشده السنه دى
والنظام اهتم بعيد شم النسيم واهمل عيد ميلاد الراجل
وكأن التورته والجاتوة رجس من عمل الشيطان
الراجل لاقى البنات الثوريات الحلوات فى الميدان بيحتفلوا بيه
والنظام فى البيتودن من طين والودن التانيه بردول من طين
لازم يقلب على مهندس زراعى

الى دوخت عليه فى البوست
فين جمله _انا لم اكن انتوى لفتره جديده-
وفين جمله زنجه زنجه-

انتى نظام جديد ولا ايه


البوست روعه بعد غياب طويل
نورتوا بلوجر تانى

ربنا يدنى بقى طوله العمر واشوف البوست الى جاى


تحياتى

reem يقول...

شفقة حبيبتي وعيوووووووووووووني

منورة البلوجر كله كله كللللللللله

انا طبعا من اوائل الناس اللى كنت عارفه نوايا احسان وصرح بيها كثيرا اكتر من مرة انتى فاكره طبعا يا شفقة

بس انتى عجبتينى ورفعتى رأس النساء عاليا
دايما بتتصرفي بهدوء وحكمة وبالراااااااحة خاااااالص من غير احسان ما يشعر
وبعدين ازاى يطالب انك مش تشوفي صحباتك ؟؟
امال انا اشوفك ازاى يعنى ؟؟

طبعا انا عارفه احسان بعد الكومنت دا مش هايخليكى تعرفينى بجد هههههههههههه

بصي علشان انتوا الاتنين اصدقائي يرجع الوضع في البيت على ما كان عليه قبل الثورة وغير مسموح لاى حد انه يقوم باى تظاهرات
اعتقد كدا اسلم


البوست عسووووول اوي يا قلبي ومش تتأخري علينا بتدويناتك تانى

abo mazen يقول...

بقى كل الكلام ده على الراجل , حرام عليكى . داحنا علبانين و مفيش مفترى غير الست . بس على فكرة الافترا ده على قلبى زى العسل . تحية اعزاز و تقدير لشخصك و اسلوبك الرائع

BNT ELISLAM يقول...

مبروك العوده وجميله اوى اوى الحلقه وتحفه الاسلوب والعرض وخفه ادم

وفرحت اوى انى قرات هنا ووباذان الله الزيارات كتير وربنا يديم الوصال

مشاهدة فيلم صرخة نملة يقول...

ايه كل دا حرام عليكو

سعودي انحراف يقول...

بالتوفيق بقي

ريري كربكه يقول...

هههههههه
شفقه عايزه اقولك حاجه
قولي لاحسان ديما ان كيدهن عظيم
هههههههههه

ريري كربكه يقول...

ههههههههههههه حلوه اوي يشم ريحه تانيه غير البصل
هو مش بالصل ده اللي بيتحط في الاكل اللي هي؟؟؟؟؟؟؟؟؟؟؟؟؟؟
هههههههههههههههههههههه