يا انا .......يا الست السكورتوره

هالو ايفرى بادى نفر نفر نفر...... بجد وحشتونى موت

ولعلمكم دى مقدمة حونينة علشان تنصفوا اختكم المسكينة
اللى جوزها عايز يجبلها ....توره.... قصدى ضرة
واليكم ما حدث
قال ايه لسه قايمة من النوم وبفتح عينى اللى يدب فيها شيكولاته
الاقى الباشا قاعد عمال..... يتهرش بلذاذة
ومبسوط على الاخر ...وبقه مفتوح اد كده
وده حاجة نادرا ما بتحصل
قلت يا ترى يا بت يا شفشوقة الراجل ده كان بيعمل ايه وانتى نايمة على روحك
قاعد وشه فى وش النت
لا.....الموضوع فيه ان واخواتها كمان
لازمن ...وحتما... ولابندق تقفشيه وتطلعى بيه على الكراكون
ويقر ويعترف ادام البيه الضابط
وبعدين قلت فى عقل بالى ...وضابط ليه ؟؟
وانا رحت فين ؟؟ده انا اجدع من مية ضابط
بدبورة ..ونسر.. وصقر.. وحداية كمان
المهم انى تقمصت الدور ونطيت جرى من على السرير طيران زى اطاطا
ورحت لازقة فى احسان وفجاءة الراجل اتخض وكان هيموت من الخضة
يا اختى... جماله حلو يا ختى شبابه حلو ...الكميلة اتخضت؟؟
ايه مالك اتفزعت ليه ؟؟
شفت بعبن.. ولا ايه ؟؟هو انا عووووووووووووو؟؟
احسان:"يلتقط انفاسه" نفس نفس و برخامة... معقول ودى تيجى
قطع لسان اللى يقول عليكى كده يا مصيبتى قصدى يا حياتى
انا: وانت بتعمل ايه على النت من امبارح؟؟
ومالك قاعد لازق وشك فى قفاه ليه ؟؟ اعترافات
ايه يعنى اللى شدك كده ..ده انت مانمتش من امبارح ومش عوايدك
اول مرة فى حياتى انام واستجم من غير صوت الشكمان المسدود بتاع مناخيرك
احسان: اصلى عندى شغل
انا: اه طالما بدأت بكلمة "اصلى "يبقى وراك مصيبة
شغل ...شغل ايه ده ان شاء الله اللى بيسهروله ادام النت ليل ونهار؟؟
احسان :اصلى بعمل اعلان علشان انزله على النت وفى الجرايد
انا قلت... كلمة اصلى فيها ريحة مش مريحانى
اوعلان ...اوعلان عن ايه ؟؟
تكونش اخيرا هتطلبلى سفرجى ....وشغالة علشان ترحمنى من قرف شغل البيت
معقول ...هتعبرلى اخيرا عن فرط حبك ليا يا حوياتى
احسان: فرط هو عنقود عنب بقولك شغل مش فكهانى
انا بعمل اعلان بطلب فيه سكرتيرة
انا:"بحول" ايه سكورتيرة .... اسم النبى صاينك وحارسك
والسكرتيرة لازمتها ايه ان شاء الله ؟؟
هتيجى تاخدلك الهدوم فومين ولا هتشرف على قهوة ساعدتك
ولا تكونش هتقعدها على الورق علشان مايطيرش
احسان: يا حياتى الناس الشيك... كلها بتعمل كده خاصة لما تكون عندها شغل متلتل
ومحتاجة حد يساعدها فى مهامها الوظيفية
انا : تقصد الناس الشيك اللى من غير رصيد اللى بأذن الله على الومان عدل
عموما ورينى الاعلان اللى شوية شوية هتنزله فى الجزيرة والفضائيات
وبعد اطلاع اللجنة المشكلة برئاستى على الاعلان
بعيد عنكم اول ما شفته صرخت .. وصوطت .. وشديت فى شعر احسان
لحد ما طلعت الباروكة كلها فى ايدى
وكان يا عينى لسه مركبها عند كوافير الصغنن
يلا مالوش نصيب
والاعلان كالتالى
وعلى المتقدمة للوظيفة ان تتوفر فيها الشروط والفاصلة والهمزة والغمزة واللمزة
"ودول اهم من الشروط نفسها"
مطلوب انسة ...عزباء ...حسناء ...هيفاء... دعجاء... شمطاء
بيضاء السحنة ...غير طويلة اللحية
ملفوفة القوام ...صابة السيقان ... طويلة القامة
لبقة... بحبوحة حبتين ...اجتماعية
ترد على التليفونات والفاكسات... و تجيد العلاقات العامة والخاصة
متفرغة طوال اليوم وليس لديها اى ارتباطات ..............شلولخ
وما ليكم على حلفان انا شفت الاعلان من هنا وبعدها بثانية احسان ما كان ليه اثر فى البيت
فى ثوانى نط من البلكونة على القهوة اللى تحت البيت
ولما رجع عينكم ما تشوف الا الضلمة
قعدت استجوبه ولا كأنى امين شرطة اسم الله وبعمل محضر
والنبى لتحكموا انتم عليه


بقى عاملى اعلان تطلب فيه سكرتيرة
انسة عزباء .....وليه متكونش متجوزة او مطلقة وتعول
وعندها عشرة خمستاشرعيل بتجرى عليهم
علشان تاكلهم ....ها.... بقى بدل ما تكسب فيها هى وولادها ثواب
تروح تجبلنا مصيبة فاضية لا وراها عيل ولا تيل
وفى الاخر تتبلا عليك وتقع فى عرضى لحد ما تكتب عليها وتاخد اللى ورانا وقدامنا
يعنى ما تلاقيش الا الفاضية للروج والمسكارا والكلام الفاضى
سونة:يا ريت تتبلا عليا ..... احم مهو يا روحى المتجوزة هتيجى كل يوم تقولى روحنى بدرى
العيال هعدى عليهم فى الحضانة ....والواد بيعيط سيباه عند الجيران
طيب ادينى كل يوم ساعة رضاعة ومش هنخلص
انا : وماله نديها ساعة رضاعة... ونجبلها بزازة كمان
وايه حكاية حسناء.... دى كمان؟؟
يعنى لازم يكون عندها حسناء وماله بهاء وفطحاء وبلهاء
وكمان هيفاء ومالها عائشة الكيلانى ؟؟ زى الفل وطقم اسنان مفيش اجمل منه
هو يعنى مكانش بوس الواو ما ينفعش؟؟
استريح محدش هيتعور عندنا
ولو حصل مش هنبعت لهيفاء فى حاجة.... انا عاملة حساب الشاش والقطن
احسان: "بيتمتم" عيشة الكيلانى !حرام عليكى يا مفترية
هتبقى بره وجوه ...مش كفاية معاشر الكيلانى نفسه بقالى سنين حرام لما اغير؟؟
انا : بتقول حاجة يا سونسون؟؟
سونة: لا بكلم نفسى اتجننت... يا روحى اتجننت
انا: شمطاء... دعجاء ...بيضاء السحنة ... ومالهم السمر؟؟
عليهم كخة.... ده السمار نص الجمال.... لا ده الجمال كله
اول مرة اعرف ان ذوقك وحش ومابتفهمش فى الالوان
قال بيضاء قال وانت هتغمسها ولا هتعمل بيها اعلان رابسو ..دى حاجة غريبة والله
سونة: انا كنت بقول البيضاء تخلى يومنا ابيض زى الفل
ما تعتموش وتغمأها فى وشنا.... اكتر مهى غامقة


انا: وايه ملفوفة القوام دى كمان؟؟
وهو انت عامل اعلان عن سجاير كليوباترا يا روحى؟؟
ده انت حتى ما بتدخنش.... والتدخين ضار بالصحة
وبعدين مالهم مكعبرين القوام ....وملكومين القوام
دول حتى شكلهم سكر وهما ماشين زى البط كده فى المكتب
والواحدة منهم تطلب منها الحاجة تعملهالك اليوم اللى بعده.. على ما تقوم طبعا
يا شيخ اهو نشجعهم برضوا ونرفع من معدنياتهم لو قدرنا نرفع يعنى وابقى قابلنى
سونة:"هيعيط" بط .!مكعبرين !
هو انا شغال فى بحيرة البجع
رفع ايه انا ماليش فى الاثقال وضغطى واطى
انا عايز سكرتيرة مش واحدة تقول كاك


انا : وايه ....ايه صابة السيقان.... ايه يا حبيبى ده ؟؟
هو انت مقاول انفار ....وطالب بناه علشان يصب خرسانة
ومالهم مفشكلين السيقان ....معرجين ومقوسين الارجل ....واللى عندهم فلات فوت
دول حتى يشتغلوا معاك العمر كله
ومش يسيبوك علشان هيبقوا واخدين اعفاء من الجيش
سونة: بناه! وخرسانة ! الهى العمارة تتهد فوق نفوخك يا شفقة يا بنت حواء وادم


انا :كمان ايه طويلة القامة دى ؟؟
ومالهم الاقزام... وحشين دول ؟؟ ده حتى شكلهم حلو وما تحسش بيهم فى المكتب
يروحوا... ييجوا ويعدوا جنبك ولا انت هنا
زى النسمة لكن الطوال يخرمولنا السقف
واحنا لسه منكسين البيت ومش ناقصين غرامات
احسان: اقزام ... ؟؟ هو انا هشغل فطوطة
بقى ياربى احلم بفطومة.. يطلعلى بقدرة قادر فطوطة ...قادر على كل شىء


انا: وكمان عايزها ...ليفة!
ليه هو احنا هنستحمه بيها احنا نضاف والحمد لله
سونة: لبقة يا روحى...... لبقة ....يعنى بتعرف تتكلم مع الناس علشان العملاء
انا: اه تقصد بلسان ونص.... طيب ما تجيب بغبغاء احسن
اهو يسلى وبعدين عملاء ايه .....هو انت شغال فى فودافون؟؟
ده حتى خير الكلام ما قل ودل ...وعلى راى الباشمهندس فؤاد المهندس "كلمتين وبس"
سونة: اهى فتحت اذاعة الشرق الاوسط .....اهى....ومش هنخلص


انا : وايه اجتماعية دى ......؟؟
وهى جاية تشتغل ولا تتعرف على الموظفين
لا...... يا حبيبى احنا مش ناقصين قصص حب وجواز عرفى
وندخل فى متاهات ...ومالها المنطوية المنكسرة الغلبانة
اللى وشها ما بيفارقش الارض دى حتى متعملش مشاكل
احسان: مابتفارقش الارض ...هو انا جايبها تبص لى على الجزمة ........ارحمنى يارب


انا : وكمان ترد على التليفونات ....وهو انت عايزلك ردادة ياخويا
وايدك راحت فين .....ولا هندفعلها مرتب علشان تقول" الو"
طيب ما اسجلك شريط بصوتى ....ولما التليفون يرن تلاقى "الو" فى منتهى الرقة والحونية
احسان: ايه شريط وانا هشغل اغنية لسعد الصغير ...حاشرة ودنك حتى فى الشغل


انا:وتجيد العلاقات العامة والخاصة !!! سيدى يا سيدى
وهو انت هتبعتها عند الجيران ...........ولا هى جاية تشتغل فى اليونسيف
سونة: اليونسيف ......واليونيخنجر ...اللى ان شاء الله يدخل فى رقبتك يحشها


انا : وبعدين مفيش حاجة اسمها متفرغة
ناقص تقول انك هتجيبها تبات معانا كمان فى البيت
اصل الحكاية ناقصة دى كده تبقى فاضية ومورهاش حاجة بقى ومبعوتالى مخصوص
سونة: تبات ؟؟ ياريت .........حد طايل
انا: ايه..... ايه..... ايه ......ايه
لا يا سيدى الاعولان ده لازم يتعدل
زى ما انا قلت ............والا
سونة: يوووووووووووووووووه ....وهو كده بقى اعلان طلب سكرتيرة؟
ده كده اعلان فى صفحة الوفيات....يا امى


انا: خلاص عندى اقتراح.....ايه رايك لو تشغلنى انا سكورتيرة؟؟
احسان: يا حياتى انتى تنفعى سكورتوووووره
تووووره مش تيرة ... فيه فرق
انا:عموما جربنى وانا فيا كل المواصفات المطلوبة
واهو اخد انا السولارى وابقى وفرتلك
ويبقى زيتنا فى دقيقنا
سونة: مخضوض" زيتنا فى دقيقنا وهو انا عامل اعلان عن طباخة
لا......... اعلان الوفيات ارحم
انا :" بصوت اجش "كده يا سونة ... ماشى ... والله لتندم"
عموما انت الخسران كنت هوفرلك
وبما ان فلوسك كتير اوى ومش عارف تبعزقها فى ايه ... هخليك تزود مصروف البيت
اه يا خويا... اللى يخليك تدفع مرتب 275 جنية بحالهم للسكرتورة
يبقى انت مدكن من ورايا وانا نايمة فى العسل ويا انا يا التوووووورة

وقال على رأى المثل"ربى يا خايبة للغايبة" وعجبى

شفقة

دعــــــــــــــــــــــــــونى انتقـــــــــــــــــــــــــــــم

اصدقائى وصديقاتى المدونين والمدونات ..اشهدوا عليه هو اللى جابه لنفسه
واحكموا انتم بقى
قال ايه.... انا عمالة احضر واخرج واشترى تورتة وحلويات وهدية عيد ميلاد الباشا
اللى هو كان فى نفس يوم نزول ....البوست المشئوم
وانا نايمة على ودانى... ودايخة من هنا لهناك
فرجة على ده... وعلى الهدية دى
وهو قاعد يكتب ويتمهزا ويتريق عليا
اوم ايه ارجع البيت وانا دايخة وشايلة على قلبى ومحملة الهدية والتورتة
الاقى الباشا قاعد يضحك وفطسان على نفسه
الهى يفطس
ويقولى.... تعالى اقرى البوست الجديد اللى كتبته
قلت بس اكيد كاتب عنى قصيدة ....او حتى زغلولة
وقريت وانا منشكحة على الاخر وياريتنى ما قريت
اوم ايه
الاقى الراجل شاتم فيا
وكاتب بوست مهبب ومسميه "back" وحياتك لخليه "black"
وقال بيشيد فيه بمواصفاتى الجليلة
ساعتها بصتله بصة غدر ...ووشى قلب زى امنا الغولة
وحسيت ساعتها ان ساعة الزمن وقفت عند اللحظة التاريخية دى
ووقتها كنت هالبسه التورته بدل ما ااكلهاله وافتكرت كلمة الفنانة الرهيبة هند رستخ" كده برضوا يا سونة يا خاين" بذمتكم ده يصح
طيب والنعمة وماليكم عليا حلفان
انا فى اليوم ده خرجت ولفيت لما كعوب رجلى دابت واتشققت
وقبلها كنت قاعدة احوش القرش على القرش والسحتوت على المليم
وحرمت نفسى من اللقمة والهدمة النضيفة لحد ما جمعت اتناشر جنية ونص بحالهم
الله اكبر من عينكم مش ناقصة قر
وبعدها قلت بس هو ده المبلغ اللى يليق بهدية حبيبى وضلمة عينى
اللى عمانى من يوم ما اتجوزته
وقررت انى لازم انزل اشتريله هدية
وهو سونة.... شوية فى البلد دى شوال مش شوية وقعدت افكر
هتجيبى ايه يا شفشق ....هتجيب ايه يا بت
اه بس خلاص
اجيبله "بسكلته" اهى تنفعه واخد انا العربية بدل بهدلت المواصلات
لا بس مش هتنفع سونة دى
دى بتشيل 50 كيلو مش 500
كده هتددشدش من اول ركوبة وتبقى راحت فلوسك يا عويس خلاص بس
اجيب" كولونيا خمس خمسات" حاجة ايه بريحة مفحفحة
ولا اقولك لا برضوا الراجل ما بيتريحش
هو بيحب ريحته
ولما بقوله حط كولونيا يقولى لا انا محتفظ بمبدأ حنظلة" انها رائحة انسان" خلاص هى دى
اجيب" سليبر" يعنى شبشب بصباع
حاجة شيك كده من بتوع الكنيف
لا برضوا هو بيحب يبقى حافى
ودايما متمسك بعصور ما قبل التاريخ
وماشى على نظام انسان الغاب طويل النأب طيب خلاص
مفيش ادامى الا "سلسة كده او ميدالية فضة"
لا برضوا الراجل ما هيصدق ينزل يدلع بيها فى الشارع ويلم علينا بنات الجيران
وابقى جبته لنفسى وافضل اعض واحدة كل يوم وادخل اللمان
وهو ما هيصدق بس انا مش هريحه
قاعدله قاعدله
اذن يبقى "قميص ولا زعطلون" كده بكمر ساقط على الموضة
لا برضوا كل مرة مقاساته بتختلف وتفضل تكبر تكبر تكبر
لحد ما هيفرقع
ومش هلاقى المقاس ولا فى السلوم
ونقعد نرجع ويجيب بدلها "مم"مهو بتاع بطنه
كمان هو واخد على لبس الجلاليب البارتى
بتاعة المعلم طربقها الجزار
متمشيا مع مبدأ" رحرح واترحرح ولا تتزحزح "
يبقى بس خلاص
هوجع دماغى
ليه مفيش غيرها" ساعة"
ايون ساعة يا بت يا شوشو
بما انه بيحافظ على مواعيده ....اينعم محافظة شديدة
وما بيلطعش اى حد يجى 60 ساعة كده
يبقى مفيش غيرها اهى حاجة تعلمه الالتزام وتبطله حجة مش معايا ساعة
وهنا بقى انا اتبعت نظرية"ساعة تروح وساعة تيجى"
وهجننهولكو ان شاء الله
ورحت قايمة اوام جرى على... ستى ستارز ...وجدى سكاى
وجبتله ساعة من افخم واشيك الساعات "حر ونار فى ايده"
اللى قعدت تكتب الشتومة فيا
والنعمة يا احسان لاوريك
ماشى بقى انا اتسخطت قرد كده برضوا اوكيه
والنعمة لطربق الجنينة على نفوخك
وهوريك شغل التنطيط ....والتفلية اللى على حق
وهصوصولك ....وهعضك عض ايه قرودى
اما جبت عليها واطيها ومليتلك البيت كله مراجيح قرود
ومن دى لدى.... لما احوليك واجيبلك سعار
مبقاش انا شفشق
وكمان يا قاسى بتقول عليا تلموذة وبروح المدرسة
واعمل زى العيال اوكيه
صبرك عليا اما نفضتلك جيبك من كتر الدروس الخصوصية
ووريتك شغل انفلونزا الخنازرية
وبدل ما هحطلك الاكل فى اطباق هتلاقيه رضعة فى البزازات
وهوريك شغل المعيلة عياط ....واوأ ...طول اليوم
ومص مصاصات .... وشيكولاتات لحد ما الزقك واخلى يومك لونه بنى
ودبدبة .....وزن طول النهار
وانا عاوزة ....وعاوزة لحد ما تسد بقى
ومن هنا ورايح مفيش غسيل هنجيب بامبرز
ولا فى تنضيف ....ولا كوى ولا طبخ.... هنجيب دادة
والاكل كله هيبقى صنف واحد سيريلاك
وهوريك والا مبقاش انا شوشو بنت المدارس
ولو كنتم جدعان وطيبين زى ما بيقول ""عليكم ان تساعدونى فى قرارى هذا ""
" لقد قررت ان اعلن الحرب على احسان خرج النجف
لا ولا اقولكم احسان خرج الساعات
وهتحول لمصاصة دماء
وستتوقف ساعة الزمن من الان حتى ساعة اكل لسانه
عقابا له على طوله الزيادة
" واطلب منكم قراءة الفاتحة على المغفور له بأذن الله لسان احسان باشا خرج الساعات"

امضــــــــــــــــــاء

شفقـــــــــــــــــــــة بنت دراكولا

Back To Blogger

بعد السلام عليكم ... وازيكم ... والعواف
وكل الكلام الحلو ده

عايز أقولكوا ان شفشوقتي اتسخطت
لأ مش اتسخطت قرد


لا والنبي ماهي ناقصة
هههههههههه

لأ انا أقصد انها رجعت يجي عشرين تلاتين خمسين سنة ورا كده
وبقت عايشة في دور الطفلة

قبل ما تكتب البوست الأخراني بأسبوع كده
ظهر عليها أعراض المرض
وماتخافوش ... ولا تلبسوا كمامات
المرض ده مابيعديش .. هوا بيطلع في القفا عدل



الهانم نزلت يوم إشترت بلوزة وردي وجيب رصاصي
قلت ألوانها وهيا حرة فيها

تاني يوم نزلت إشترت صندل اسود من أبو أبزيم
قلت ومالو يمكن تحط فرده في بقها وتسكت

بعدها راحت اشترت شنطة Back bag
قلت يارب تكون هتلم هدومها وترحل

راحت مكملة بشوية كراريس على مقلمة بمستلزماتها
وقامت سانة أول قلم رصاص وكتبتلكوا البوست اللي فات

ساعتها بس أخدت بالي
بيتهيألي انتوا كمان خدتوا بالكوا !!!

البوست الأخراني بتاع شفقة
اللي هوا "عدنا بعد الفاصل"
ماخدتوش بالكم انها كتبته اول يوم في الدراسة ؟؟
وتحديدا يوم 4 أكتوبر
والبوست اللي قبله "وحشتونا موووووووووووت"
كان في نهاية الامتحانات وبداية الأجازات

واضح انها كانت واخدة أجازة دراسية زي التلامذة
آه أمال إيه
وكمان رسي عليها التأجيل بتاع أنفلونزا الخنازير



طبعا أنا ماصدقت لقيت فرصة
واستلمتها تريقة وكرهتها في نفسها
يعني انت مالقيتيش غير يوم دخول المدارس ؟؟
مش واخدة بالك إن آخر بوست كان مع بداية الأجازات ؟؟
الناس تقول عليكي ايه دلوقتي ؟؟ عيلة بمريلة ؟؟
وآآآل ماجيستير آآآل
طب خدي الإعدادية الأول
ههههههههههه


بس بيني وبينكم
أنا بعد ما اتريقت عليها لقيت عندها حق
ماهو برضو Blogger زي المدرسة
زحمة ومليان مدونين
فيهم الطيبين الجدعان اللي تحس معاهم انك وسط اخواتك
وفيهم ناس غاويين حوارات وتلسين وتستعيذ بالله منهم زي الشياطين
بس بالحق وللأمانة .. الأكتر هما الكويسين


حقيقي Blogger ده مدرسة
إتعلمنا فيها إزاي نكتب ونعبر عن اللي حاسينه
إتعلمنا إزاي نقرا لكل رأي شماله ويمينه
إتعلمنا إزاي نعمل خير ونحب اللي عاملينه
إتعلمنا نحب بعض ونخاف على اللي حابينه
فعلا إحنا رجعنا لمدرسة Blogger مع أول أيام الدراسة
بعد أجازة صيف طويلة
ومليانة أحداث مش ظريفة
رجعنا وكلنا إصرار وأمل مانغيبش عنها تاني
وحشتنا الدراسة فيها
ووحشونا أوي زمايلنا المدونين
وإن شاء الله ننتظم في الدراسة
وماتاخدوناش غياب تاني

من فصـل تالتة تاني
إحســــان التلمـوووذ

عـــــــــــــــــــــــــــــــــدنا بعــد الفـــــــــــــــــاصل

اعزائى واحبائى المدهولين ....عفوا اقصد المدونين وحشتونا خالص مالص بالص

المهم اننا قررنا نرجع بعد الفاصل ونواصل ..... بس لعلمكم ده ماكانش فاصل بس
ده كان فاصل وفاصلة وفصلتين ومفصول ومرفود كمان

لا نتكلم حبه جد بقى احنا اصلنا حصلتلنا شوية حاجات غريبة كده
بس الحاجات مش هى اللى غريبة لا التوقيت هو اللى كان غريب
كل حاجة وراها التانية
يعنى يادوب نخلص من حاجة ونكسر وراها زير
تطلعلنا حاجة غيرها

واليكم بيان بكل ما حدث

الحدث الاول :-

انتم طبعا عارفين ان جدتى رحمها الله وانتقلت الى الاخره لحد كده عادى وكلنا هنموت
ولكن بعدها علطول بشهر جدة احسان تعبت تعب شديد جدا وماتت بعد جدتى بشهرين
ساعتها احسان اتصدم وبصلى بصة غدر وقالى اظاهر ان ستك قرت على ستى ونشتها عين قبل ما تموت
كل ده علشان جدتى قالت ان جدته لسه بصحتها
فرديت وقلتله ليه ان شاء الله ده على اساس ان ستى عينها وحشة ...دى كانت قمر
وبعدين ده قدر وهى ست كبيرة بس ربنا يدينا عمرها
فقالى ايه انتى هتسطعبطى دى كانت عندها 80 سنة بس
واحنا العيلة عندنا بتقعد لحد 100 وانتى طالعة
يعنى ستى اتخطفت بدرى
وكله من عينيكم الوحشة "قل اعوذ برب الفلق"
ولقيت الراجل اتلبش ومش طايق منى اى كلمة
رحت متلككة وعاملة زعلانة وقلت هيتهد ويعتذر ويقدم فروض الطاعة والولاء
وقعدت الم بؤجتى وقلت اخد فى وشى واطفش واسيبله البيت يمكن يعرف قيمتى
لكن الراجل ولا الهواء
وساعتها اكتشفت اد ايه هو بيحبنى ومايقدرش على بعادى
المهم انى سحبت نفسى وقلت اقعد عند ماما كام يوم استجم

الحدث التانى:-

طبعا بابا وماما استقبلونى احسن استقبال اول ما شافونى داخلة بالبؤجة
لا نقرظة بالكلام... ولا سايبة بيتك ليه يا عايبة... ولا الموكوسة ملهاش الا بيتها
ولا اى حاجة من دى ... الصراحة ناس ذوق ذوق ذوق
وعصرت على نفسى ليمونة وقعدت وانا ملزقة من الليمون طبعا
وفى يوم صحيت لقيت بابا بيلبس ترننج وخارج
سالته " رايح فين ياباباه" بصلى وقالى عندى ماتش
بصراحة استغربت... ماتش ايه يا عم الشباب والرياضة وانت فى السن ده؟؟
اظاهر ان البيت باظ ومبقاش فيه لا ظابط.... ولا رابط من بعدى
وشوية والفريق جه ينادى عليه ونزل
بقيت بكلم نفسى ايه يا جدعان ده ...مال ابويا بقى عنده صحة كده ليه ؟؟ هو فاكر نفسه الكابتن ماجد
شوف الراجل عنده كام سنة ومع ذلك لسه نشيط ...وسى احسان افندى كل يوم يرجع يقول تعبان لما جابلى المرض
بلا وكسة على شباب اليومين دول .... هو ده زمن الكوارع و السمن البلدى والمفتقة والا فلا
ومفيش بعدها بعشر دقايق لقيت واحد بيتصل وبيقول ان بابا اخدوه على المستشفى
علشان عمل حادثة وعربية خبطته
قلت فى عقل بالى ايه يا شفقة ده انتى سرك باتع ولا ايه ؟؟ شكلك نشيتى ابوكى عين
يادى المصيبة اظاهر ان كلام احسان هيطلع صح ولا ايه العيلة دى عينيها حوله ولا ايه؟؟


طبعا جريت على المستشفى لقيت بابا مدشدش ورجليه متفتفتة
اظاهر انه دخل فيه لورى.... مش عربية عادية وقتها قلت لبابا اظاهر انى نشيتك عين يا بابا
فبصلى وقالى هو انتى يا مقصوفة الرقبة ما تلاقيش الا ابوكى وتحسديه
وراح مزعق لاحسان وقاله خد مراتك وغورها من عندنا
وبعد التفحيص والتمحيص والاشعة والتحاليل والذى منه
قرر الدكاترة اجراء عملية دقيقة لبابا فى رجله وتركيب شرائح ومسامير
وتمت العملية بخير والحمد لله

الحدث الثالث:-

كان خطيب اختى موجود معانا ولما سال ليه بابا طردنى شر طردة وعرف انى نقيت عليه

افتكر ان الموضوع صدفة لكن لما عرف ان جدتى قرت على جدة احسان
ساعتها الراجل خاف على نفسه وقعد يقول لاختى كلام زى الدبش لحد ما حدفت الدبلة فى وشه
وخد فى ديله وقال يا فكيك
واتفسخت الخطوبة وبقت اختى مكلوبة منكوبة

الحدث الرابع :-

الحمد لله بابا رضى عنى واقنعته انى مش انا اللى نشيته عين
وانه اكيد هو اللى ما كانش شايف بعينيه علشان كده حصلت له الحادثة
واخيرا صالحنى
واحنا قاعدين معاه جه عمى الصغير يزوره ويطمن عليه
وقعد يسأل بابا ازاى الحادثة حصلت؟؟
وازاى ما اخدش باله ؟؟....بابا رد عليه وقاله السن بقى
والواحد عجز وهو انا لسه شباب زيك
ويادوبك الراجل نزل من عندنا من هنا وسمعنا صوت صراخ ودب على السلم
جرينا نفتح الباب لقينا عمى جثة هامدة ورجله متفتفتة
خدناه على المستشفى قالوا رجله اتكسرت
ولازم تتجبس


المهم جبسناه واخدناه يلزم السرير المقابل لبابا وهو مش طايقه
واللى جاى على لسانه "قال بيقولى شباب قال وحسبى الله ونعم الوكيل"
طبعا لحد هنا وانا واخدة ان الموضوع صدفة ومش مصدقة كلام احسان بتاع نش العين ده
وقلنا ناخد هدنه و نبعد شوية ونسافر اى مكان بعيد بعد كل الاحداث دى
اللى تفوقت على احداث غزة

الحدث الخامس:-

سافرنا الى ابعد واهدأ مكان فى العالم على الحدود وقعدت انا واحسان نحب فى بعض شوية
وكلام جاب كلام افتكرنا واحد صاحبنا قعدنا نتكلم عليه ونقطع فى فروته
ومفيش ثوانى بصينا لقينا التليفون بيرن
رد احسان وعرف من المكالمة ان صاحبنا ده دخل المستشفى لاصابته بمرض خطير فجاءة
وانه فى العناية المركزة
طبعا برضوا سببنا الموضوع انه قدر ونصيب وصدفة بحته

الحدث السادس:-

اليوم اللى بعده صحيت لقيت احسان بيصلى وقاعد يقرا لجدته الفاتحة وقعد يفتكرها
قعدت جنبه وطبطبت على كتفه وواسيته
وساعتها قعدنا افتكرنا كل الناس الكبار اللى فى العيلة اللى ماتوا واللى ما ماتوش
ومنها تطرق الحديث على حما اخته وانه راجل عجوز
بس كله حيوية .... واحسان قعد يتكلم عنه وعن صحته واد ايه هو راجل عايش حياته ولا كأنه ابن امبارح
ومفيش بعدها بساعة تلقينا خبر وفاته
واننا لازم نرجع من السفر علشان نحضر العزاء والجنازة

وقتها وبعد كل الاحداث والمصايب اللى نزلت ترف فوق نفوخنا احسان بصلى
وقالى" اظاهر يا حبيبتى ان العيب مش فيهم ....ده العيب فى عيون البلاوى اللى حواليهم"
وطبعا مفهوم مين هما البلاوى
وبعدها قررنا اننا ما نخرجش من البيت تانى
وكل واحد فينا يقعد فى حبس انفرادى


وبصراحة اكتر مكناش بندون علشان اشفقنا عليكم مننا


ويفضل وضع خرزة زرقاء على باب المدونة
وربنا يستر
ومنجلكوش فى حاجة وحشــــــــــــــــــــــــــــــة

شفقـــــــــــــــــــــة