يـــــــــــارب شغـــــــــلانة ما تكونش هــــلكانـــة

احسان: مالك يا شفشق ايه ربطة الخدامين دى ومالك حاطة ايدك على راسك كده ليه ؟؟

بتدبرلى مصيبة ولا اية

"بصوت واطى" جتك مصيبة فى معاميعك

شفقة:ايه يا احسان عايز ايه قطعت عليا حبل غسيلى

قصدى حبل افكارى

احسان:حبل ! طيب حطى المشابك كويس لحسن الافكار تقع من راسك ومنعرفش نلمهاشفقة :انت هتهزر يا سونة سيبنى فى اللى انا فيه

انا بفكر فى شوية مشاريع هيخلونا

هوب هوب هوب.... فوق

احسان: مشاريع... وهوب هوب فوق

يبقى يا حبيبتى هتبيعينا اللى ورانا واللى قدامنا

وهنبقى من سكان السطوح

وانا وانتى هنتشمس فى الرووف ان شاء الله

شفقة :انا مش بهزر يا احسان

انا فعلا قررت اعمل مشروع يخلينى اخد

لقب بزنس وومن

احسان : تقصدى بسبس وومن

انتى كبيرك بسبس مش بزنس
انتى اتجننتى يا شفقة ولا ايه؟؟

طيب والماجستير والدكتوراه وشغل الجامعة

والذى منه نويتى ترميهم فى الزوبالة ؟

شفقة : بص يا سونة يا حبيبى

اصلى بصراحة لقيت الحاجات دى ما بتاكلش عيش حاف

وانا اتعودت على العيش ابو سمسم

فقلت لنفسى لازم يا بت يا شفشق

تأمنى مستقبلك من غدر الزمان وغدرك انت كمان يا روحى

وقعدت امخمخ وافكر فى شوية مشاريع مكسبهم مية المية

احسان: ميه الميه!

يبقى اكيد هتشتغلى فى توزيع البانجو والحشيش وهتضربى حقن

هما دول اللى مكسبهم الف الميه غير كده كله صفرالمية

شفقة: بانجو ايه وحشيش ايه

انت شايفنى تاجرة مخدرات هتودينى فى داهية برأسك دى

بص يا احسان

احسان:ابص ولا اشم رجلك اللى حطاها فى وشى من الصبح دى

دى ريحتها عفنت وماتت

ما تتلمى يا شفقة
شفقة:مش عايزين هزار بقى ......ايه رايك يا سونسون

لو ااجر محل وافتحه كوافير حريمى

واحدة صاحبتى عملت كوافير وماشاء الله عليها

اشترت حتة ارض فى صفط اللبن

وربنا فتحها عليها على الاخر
احسان: كوافير !

يا حبيبتى انتى كبيرك حلاق حمير

وكمان هتبوظيلهم الفورمة

كوافير ايه يا شفشق بربطة الخدامين اللى انتى عملاها دى؟؟

طيب والنبى ازاى هتعملى شعر الناس

وتبقى واجهة للمحل وانتى بالمنظر المنعكش ده

ومركبة سلوك دش واريل فى راسك

شفقة: بس اسكت ما انتش فاهم حاجة

دى النعكشة دى احدث صيحة من صيحات الموضة

ما بتشوفش المطربة مريام فارس وهى عاملة نفس تسريحتى

احسان : لا بشوف فارس مش مريام فارس

وبعدين بقى انتى هتعرفى تمسكى سيشوار ومكواه؟؟

والنعمة هتشيطى شعر الزباين وتولعى فيه

وهتبقى زبونة من زباين المطافى

بقولك ايه

انا مش ناقص مصايب

بكده كل يوم هترجعيلى مضروبة لوكاميتن فى عينيك من الزباين

وبعدين ارحمى الستات دول اساسا نصهم على وشك يقرعوا

والنص التانى قرع و مركبين بواريك وداهنين مرهم كبريت

شفقة: انت هتخوفنى ليه يا سونة

يعنى انت شايف كده

طيب بلاش كوافير علشان اللوكميات انا اصلا يا دوبك بشوف طشاش

طيب ايه رايك لو فتحت محل بيع ادوات ماكياج واكسسوار ؟

حاجة ترى شيك واسميه زوقينى يا ماما

ها ....اظن دى شغلانة هايلة ومفيش ست ما بتحطش ميك أب
احسان: ما تزوقيني يا ماما ايه !!

هى ماما فاضية للمرقعة بتاعتكم دى خلى ماما فى الحلل وسلك المواعين

وبعدين المحلات ام 2 جنية ونص مالية البلد

ومخلتش الستات عايزة حاجة

كمان الميكاج دلوقتى بقى مضروب

تحطه الزبونة من هنا ويجيلها جرب وتجاعيد من هنا

وانتى مش ناقصة اللى تقولك جالى جرب

واللى تقولك رموشى اتحرقت

واللى تجيلها تينيا لا يا شيخة

ده كده اللى هتكسبيه هتعالجيهم بيه

وهتعملى اشتراك فى مستشفى التكميل والتجميل
شفقة: ايه يا احسان

بقى الروج والبودرة والماسكارا هيعملوا جرب وتينيا

وهو انا ببيع ميكياج ولا حساسية

خلاص خلاص بلاش مش عايزين هرش

طيب ايه رايك لو فتحت محل ملابس؟

اهو مفيهوش حاجة اهو

ولا هنحرق حاجة ولا هنجيب جرب لحد

كل ما هنالك شوية فساتين على كام بنطلون ساقط على شوية برمودا ولا اقولك شورتات علشان الموضة كده السنة دى والحكاية هتمشى

احسان : شورتات وبرمودات وبديهات

انتى كده ناوية تودينا اللومان او تحبيسينا اداب

لان الشباب هيفضلوا ملاطعين ادام الفترينة ليل نهار

ولو فتحتى بقك واتكلمتى هيلبسوكى قضية تهريب وجمارك

والذى منه وانا بصراحة مش فاضى اجيبك كل يوم من الاقسام
شفقة : طيب عندى اقتراح هيعجبك

بلاش نشترى ايه رايك لو نصنع احنا نفتح اتيلية شيك انا اقص

وانت ترفى ....وانا اخيط وانت تسرفل

وكمان نعدل حال البلد شوية ونغير لبس الستات المحزق والملزق

ونعمل حاجات محترمة

يشمك... اسدالات... خمارات ...جيبات فضفاضة

وبكده نبقى ارتقينا بالبلد

احسان: ارتقينا!

انتى بكده هتخربى البلد وهتبوظيها

ومالها البديهات والبنطلونات البرمودا

ده هى دى اللى معيشانه ومخليانة نشم نفسنا بعيد عنكم

لا ...ده افشل مشروع فكرتى فيه

قال محترم قال

يا شيخة

والرجالة تعيش ازاى بعد كده؟؟

ده اللبس ده هوا المتنفس الوحيد ليهم بره البيت

بعيد عن الغوريللات اللى متجوزينهم

والنعمة دول ييجوا يطربقوا الاتيلية على نفوخك

ابقى المك بقى كل يوم من المستشفيات ووشك كله غرز !!

شفقة : غرز.. لا لا خلاص بلاش

طيب هاقولك هافتح جاليرى اظن ده بقى حاجة فى منتهى الرقة والشياكة

شوية تحف على شوية براويز والشغل يبقى زى الرز

ومش هنبيع لاى حد للناس الشوياكة بس

اللى بتقدر النوع ده من الفن

احسان: ههههه تحف ؟؟ مش كفاية انتى ؟؟

الحقنا يا زاهى يا حواس

الست هانم اتجننت وعايزة تهرب اثار

والنبي لتخلينا كده احسن ... مترممين ومنكوسين

بدل ما هيدوها علينا وتقع على دماغنا

شفقة: يوووووووووووووووه طيب يبقى مفيش ادامى الا انى افتح محل كشرى

وساندوتشات كبدة واقدم معاهم وجبات

اطبخهم فى البيت وانت تجيب علب وتعبي

ولو الحكاية مشيت معانا نفتح المحل والموضوع يكبر ويكبر

واسميه كشرى الشفقة والاحسان كل واشبع يا جعان
احسان: انتى هتطبخى وانا اعبىء

وكمان شفقة واحسان

كل واشبع يا جعان

يبقى ان شاء الله مش هتبيعيه انتى هتفرقية ببلاش

ذكاة وصدقة على روحنا

والنبى يا شيخة لتشوفى اى مشروع تانى غير الاكل

لانك لو طبختيه يبقى هتلاقى كل يوم حالات تسمم وغسيل معدة

هو انت مش مكفيكى معدتى واللي جرالها ؟؟

عايزة تسمى مصر كلها
شفقة: كده برضو يا سونة ماشى.

طيب افتح نت كافية

واجيب شوية اجهزة مستعملة من سوق العصر

وكام شاشة على كام كيسة

الحكاية تمشى واخلى الساعة ب 5 جنية

شوف انت بقى فى اربعة وعشرين ساعة يبقى كام

احسان : كده مش هيبقى العصر قولى العشاء ..الفجر

بقى عايزة تفتحى اربعة وعشرين ساعة

يا بوليس الاداب تعالى الحقنى

انتى عايزانا نتمسك يا ست انتى

كده انتى هتلمى علينا العيال الصيع اللى مورهمش حاجة

ويقعدوا يدخلوا على المواقع اياها المخللة بالاداب

وهتحدقيها علينا وتفضحينا يا شفقة

اللى بعده ....غيره

شفقة:خلاص.... بس ....هى دى

وجدتها

ايه رايك احنا عندنا قطط وكلاب

وبصراحة انا مش عارفة اخلص منهم ازاى

نلم كل القطط والكلاب اللى فى السوق

ونجوزهم

القطط والكلاب تخلف

يكبروا نجوزهم ويكبروا يخلفوا نبيعهم وهكذا

احسان : انتى عاوزة تخضينى يا شفقة

شوية شوية تربيلى خنازير فى البيت

قال كلاب قال

انتى عايزة تربيلنا الرعب وتخلى رجلينا تخبط فى بعض

والجيران تهج من البيت ويعملولنا محاضر ازعاج وهوهوا

انتى هتعملى زى سمير غانم فى فيلم يارب ولد

احنا نجيب الكتاكيت من السوق

ونلم الفراخ البدارى ونربيهم يكبروا

نجوزهم .....يبيضواويفقسوا ...والبيض يفقس يطلع كتاكيت

تكبر تبقى فراخ

ايه يا شفقة احنا هنفتح زريبة يا امى
كده مش هيبقى مشروع
هيبقى زريبة وجنينة حيوانات
وبكده انا هلبس جلابية واشتغل معاكى بياع اقفاصشفقة: يوووووووووووووووووووووووووه انا خلاص زهقت
وعقلى طار
شليت تفكيرى امال هشتغل ايه دادة ؟؟
احسان: سيبينى انا بقى ااقولك على المشروع اللى يليق بمقامك يا حياتى
حاجة ايه ابهة هتريحك وتجيبلك فلوس وانتى قاعدة مرتاحة
وحاطة رجل على قفا السواق
قصدى رجل على رجل
وكمان هيريحنى انا كمان منك طول اليوم
وابقى ضربت عصفورين بحجر
شفقة : وساكت من الصبح ما تنطق يا راجل مشروع ايه؟؟
واهم حاجة هيخلينى هوب هوب هوب فوق
احسان :هى دى الحاجة الوحيدة اللى مضمنهاش
الا لو ركبولا اجنحة وعملوا منه نسخة معدلة تروح المريخ
وشغلوه مركبة فضائية
شفقة: وساكت انطق يا سونة اواااااام
احسان: تــــوك تـــــوك هشتريلك توكتـــــــوك واكتبه باسمك وهتبقى من الملاك
سيدة تاكتيك اد الدنيا
وبراحتك
تشغليه وردية اتنين
زى ما انتى عايزة
بس وردتين يبقى فلوسه اكتر
وارتاح انا كمان وقت اكبر
وكمان هتمارسى هوايتك يا ستى... شفتى انا بعزك ازاى
ضرب وشد شعر السواق وخناق وصويت معاه للصبح
وهو ولا كانه هنا ولا هيفتح بقه انا هوصيه
شفقة:توكــــــــتوك انت بتتكلم بجد؟؟
وده مشروع يكسب كويس
احسان: هو هيكسب بعقل
ده الفلوس الفضة هتجرى فى ايدك زى الرز وهتدعيلى
شفقة:فلوس فضة !
وشوية شوية تبقى جنيهات دهب
خلاص اتفقنا بكرة نشترى التوكتوك
احسان : المهم تورينى شطارتك .....بس بشرط ؟
شفقة : شرط ايه يا حياتى؟؟
احسان:هجيبلك السواق يعلمك
وشوية شوية تتعلمى و تسوقى انتى التوك توك
علشان المكسب يبقى حلال عليكى لوحدك
والاهم ان الوردية تبقى من 7 الصبح ل 7 تانى يوم
وبكده ارتاح منك ومن قرفك وحلال عليكى المكسب وحلال عليا البيت فاضى
اظن كده عدانى العيب وقزح
شفقة: هو قزح بس ده قزح وتكتك
والله وهتلعب معانا البلية يا سونسون وهنغنغك
طيب وسع بقى للسريع

شفقة

رســــــــالــة إلى ..... مــيـــــــــت

عزيزى عمرو ... أو يا من كنت عزيزي
ردا على جوابك اللي كتبتهولي وبعتهولي على الملأ والكل قراه
أبعتلك جوابي ده برضو على الملأ ... وياريت الكل يقراه

مش عارفه ابدأ كلامي بإيه ... ويا ترى كلامي ده هيوصلك ولا لأ
وإن وصلك ... هتقدر تفهمه وتستوعبه إزاي

مشاعرى مرتبكة مش عارفة احزن عليك ولا اعاتبك ولا الومك
ولا التمسلك العذر؟؟

أم أكتفي بالدعاء لك بالرحمة والمغفره ؟؟

فاكر فى يوم كنت وعدتنى انك مش هتفارقنى ابدا وانه مهما حصل مش هتمنعنا الظروف من اننا نكمل قصة حبنا وننهيها نهاية سعيدة
كنت مخدوعة فيك ولا الظروف كانت اقوى منك مش عارفة انا ؟؟
بس للاسف مش قادرة التمسلك اى اعذار ازاى ممكن انسان يقرر انه ينهى حياته فجاة وبالطريقه السودا دي ؟؟

ازاى الإنسان يقرر بكامل قواه العقلية وبإرادته انه يموت على كفر ؟؟
ازاي فكرت تعملها ؟؟
نسيت اهلك وحبهم واحتياجهم ليك ؟؟
نسيت اخواتك ولمتهم حواليك ؟؟
نسيت اصحابك؟؟
اعتقد انك نسيتنى كمان ...

طيب لو كنت نسيت كل دول .. إزاي نسيت ربك ؟؟
مفكرتش ولو للحظة واحدة انك هتموت على كفر مش على حق ؟؟
أد كده كان ايمانك ضعيف ؟؟ ومش واثق بربك ؟؟
ولا انت يا عمرو كنت كده كده ميت ؟؟



صدقني مفيش اى سبب ايا كان ممكن يخلى انسان عاقل واعى يتنازل عن حقه فى الحياة إلا اذا كان بيدافع عن ارض او عرض
و مفيش اى حد يستاهل انك تموت علشانه حتى وان كنت أنا
حبيبتك .. أو من كنت حبيبتك
اعتقد انه اللى يقدم على خطوة زى دى يبقى انسان ضعيف مسلوب الارادة عاجز عن التفكير
وانا عمري مافكرت أرتبط بإنسان ضعيف
امال ازاى كنت هتحمينى اذا كنت مقدرتش تحمى نفسك من نفسك
الحياة كلها محطات مشاكل وصعوبات والم ازاى كنت هتقابلها لما انت فى اول الطريق ومع اول موقف إتخليت عنى وعن نفسك بكل سهولة ؟؟
تفتكر يا عمرو ان هى دى الرجولة ؟؟
تفتكر انه الحل هو الهروب والانسحاب ؟؟
تفتكر ان الحب واليأس يجتمعوا مع بعض؟؟

سامحني يا عمرو لو قلتلك اني ندمانه
ندمانه إني في يوم حبيتك
كان نفسي اعيش معاك وليك وبيك
كنت فاكره اني هاكون في حمى راجل قوي
كنت باحسبك غير كده يا عمرو
انت فعلا صدمتني .. خذلتني
وكمان فوق كل ده .. فضحتني
يعني ايه يا عمرو تسيب جواب إسمي مكتوب فيه وكمان رقم تليفونى ؟؟
تفتكر إني هبقى سعيدة لما اسمع انه بيتقال عليا (النهاية الماساوية لقصص الحب تكتمل "روميو وجوليت" "ديانا ودودى" "عمرو ومنى") ؟؟

ولا كنت هبقى مبسوطة وانا البوليس بيخبط على بابى وبيخدنى بطلب حضور يستجوبنى فى انصاص الليالى وتسيبلي الفضيحه ليا ولأهلي ؟؟
تفتكر انه اللى يحب حد يعمل فيه كده ؟؟

انا حزينة اوى وجوايا مجروح مش علشان فقدت حبيب وبس لا

علشان كنت اتمنى اني أتباهى بيك سواء عايش أو ميت
ماكنتش اتمنى الاقي كتير بيلوموني على إختياري ليك
كان نفسي ماتسيبنيش وتسيب الدنيا كلها غير علشان حاجه تستاهل
علشان هدف نبيل ممكن نموت وغيرنا يعيش

تخيل يا عمرو الفرق بين شعوري يوم ما جالي الخبر المشؤوم
وشعوري لو قالولي ان حبيبك كان مشارك في قافلة الحريه
كان رايح يوصل السكن والغذا والدوا لإخواته
مات وهوا بيحاول ينقذ غيره
تفتكر شعوري وقتها يا عمرو كان هيبقى زي شعوري دلوقتي ؟؟
كنت هافتقدك آه .. هابكي عليك أكيد
بس كان هيصبرني إعتزازي بيك وبمواقفك وبرسالتك
ماهي لو هانت علينا روحنا يبقى تهون لشئ عزيز

كام واحد كل يوم بيموتوا لنقص دم سواء في حادثه أو عمليه ؟؟
مش كان أولى يا عمرو تتبرع بدمك وتنقذ روح متعلقه بيك ؟؟
مش أحسن ماكان دمك يسيل ويختلط بمية النيل ؟؟

جسمك ده اللي علقته في حبل بكام جنيه
مليان أعضاء كتير غيرك ياما حلموا بيه
ما كنت تدي عضو منه لحد كان هيموت عليه
كبد .. كلى .. جذعيه أو قرنيه تنور عينيه
مادام يا عمرو نويت خلاص انك ترميه
كنت رميته لحد يكون محتاج اليه

الراسل / منى

يـــــــــا انـــــا يـــــــا مــــــــانكــــى

شفقة: سونة يا حياتى ايه اللفة الكبيرة اللى اد دماغك دى..... معقولة تكون هدية ؟؟ سونة: هى فعلا هدية بس هدية ايه عجب

هتقوى مكانى فى البيت ده وتلقلق ناس تانية

شفقة: تلقلق ؟؟ يبقى جبت مسمار يا حبيبى علشان يثبتك
اللى ما بتفكر تهادينى لا فى عيد ميلاد ولا عيد جواز
جاى تهادينى فى عيد العمال !
ده على اساس انى واحدة من فئة الشعب الغلبان
المهرى طبيخ وغسيل ومكوة وتنضيف

احسان: من فئة الشعب المهرى على اساس انك حلة محشى يعنى صح؟؟
شفقة: حلة محشى ايه الفجعنة دى يا سونة .
لا بجد قلى جايب معاك ايه ؟؟
بس اوعى تكون قنبلة نووية انا ماليش فى الذرة
احسان: ذرة انتى كبيرك درة مشوى جنب الرصيف يا روحى
وعموما انتى نشنتى هى فعلة قنبلة
بس مش نووية..... لا نــــونــــوية واول ما فتحت اللفة اذ بى افوجا

بقطــــــــــــة ســـــوداء وقتها وقعت من طولى
وقعدت انونو قصدى اصرخ
يا مصيبتــــــى يا لهــــــــوتى

قطة ......جايبلى قطة يا احسان
وانت عارف انى بخاف من الصرصار

احسان: طيب احمدى ربنا انى مجبتلكيش صرصار
وهى القطط بتخوف يا شيخة روحى كده
دى انتى اللى تخوفيها دى حمل وديع
شوفى جمال لونها
ولا نعومة شعرها
ولا حلاوة عينيها
ولا رقة جسمها
سمبتيك يا اخواتى
بقى دى يتقال عليها حيوان وانتى بنى ادم!
سبحانك يارب ليك حكمة فى كده
شفقة:حلاوة ايه وطحينيه ايه ولون ايه وعين ايه ؟؟
انت هتقعد هتتغزل فيها
دى لازم تخرج من البيت ويا انا يا هى فى البيت ده
بقى دى عاملة تعملها يا سى احسان؟؟

احسان:لو كنت اعرف ان الاختيار هيبقى بينك وبينها كنت جبتها من زمان
يا خسارة ضاع عمرى هدر
وبعدين احمدى ربنا انى مجبتهالكيش ودبحتهالك

شفقة: ايه دبحتهالى؟؟
انت بقيت تاكل قطط ولا ايه؟؟

احسان: لا ده مجازا يعنى
مش المفروض العريس يدبحها للعرسة اقصد العروسة ليلة الدخلة
احمدى ربنا بقى اهو نصيبك جه معاها بعد كام سنة
وياريتنى كنت دبحتها ماكنش ده بقى حالى
"ادبحلها القطة فى ليلة عرسها .........ااااااااااااااااااه"

شفقة: انت هتعملى فيها احمد زكى
والنعمة يا احسان اصوت والم الناس
يا انا يا القطة فى البيت

احسان:"فى سره" احسن هو ده المطلوب القطة طبعا
ودى عايزة سؤال

شفقة: بتقول ايه مش سامعة

احسان: كويس انتى اتطرشى يا حبيتى
واللهى كويس على كده كل يوم اجيبلك قطة
لحد ما تبقى من الصم والبكم

شفقة : بسهوكة لحل الازمة القططية
كده برضوا يا سونة تعمل فى حبيبتك كده

احسان: يا حبيبتى متخافيش ده قط وديع وطيب جد
حتى شوفى وكمان ما بيعضش ولا بيخربش ولا بينونو

شفقة : ما بيعضش ولا بيخربش!
ليه هو قطة ولا ارنب

احسان: ما تخافيش يا شفقتى ان شاء الله هتحبيه اوى
ومش هتخافى منه
بس يارب هو يحبك وما يخافش تبلعيه بالحنجرة الهلامية دى
وطبعا ادام الكلام المهبب بستين نيلة ده

استسلمت للغزو القططى الشيرازى
اللى اقتحم بيتى ورضيت بالامر النونوى
على امل الجلاء من البيت فى يوم من الايام


شفقة: بتعمل ايه احسان عندك فى المطبخ ؟؟
هتتطافس ولا ايه؟؟ انت مش لسه واكل
قضيت على اكل البيت بتاع الاسبوع
مش لاقية لا الفراخ ولا اللحمة ولا السمك
ده حتى القشر بتاكله يا سونة مالوش اثر

احسان: القشر! لا لا مش انا
ده مانكى انا باكل القط علشان يكبر ويربرب

يا نهار اخبر
هو انت بتاكله ايه فراخ... ولحمة
ايه ده يا راجل واحنا ناكل العضم ولا ايه؟؟
قال يكبر قال
ده أنا لو مكالتش شهر بتحمد ربنا انى وفرتلك فى مصروف البيت
تقوم انت تأكله خزين السنة كلها
حسبى الله ونعم الوكيل فيك انت ومانكى

احسان: عموما هو لازم يكبر ويسمن
انما انتى اتعلفتى من زمان وبقيتى تسدى الحيطة
انتى مش واخدة بالك يا نور عينى
انا بحاول اساهم معاكى فى الريجيم
علشان ما تدخليش فى الحيطة بعد كده
ونضطر نرمم البيت
يعنى انتى لو كلتى باذن الله هنلاقى نفسنا فى الشارع يا ماما

شفقة:حرام عليك يا شيخ وهو انا باكل خالص يا مفترى
كمان وهو حد عارف يشترى اللحمة
ده الناس بتاكل الكناسة بتاعة اللحمة اليومين دول
ده الكيلو بقى ب60 جنيه
امال قارفنى كل يوم بعمرو اديب ليه
وكل شوية تقولى تعالى اسمعى بيقول ايه على اللحمة
ولا هى وحشة وغالية ليا انا وحلوة للقرد بتاعك

احسان: قلتلك قبل سابق انه مانكى مخلوق رقيق مش دقيق
زى حلاتك
وبعدين انتى تاكلى الكناسة
لكن هو ياكل الغالى والبلدى
ده انا حتى وصيت الجزار على ضانى علشان خاطر عيونه

شفقة: يا ناس يا هوه الراجل هيطيرلى البرج اللى فاضل فى نفوخى
بياكله لحمة ويشربه لبن
وانا بشرب الشاى سادة
اخ يا نارى
اعمل ايه اعمل ايه؟؟

يوم وراء التانى وسونة عمال يزغط فى القط زى البطة
ويهنن ويطبطب ويعاكس ويدلع
ولا نانسى عجرم فى زمانها
شوية شوية هياخد اجازة وضع من الشغل ويقعد جنبه
ويوم بعد يوم القط عمال يكبر وينفش وشعره يعلا
ابن اللذينا بيعزز من وضعه القططى
واحتل مكانى فى البيت ولا اللى جاتلى درة
ومع الكبر والنفشة والعلف اللى بيعلفهوله احسان
بدا يديها شقاوة وعفرتة
وبقيت بكلم نفسى فى الشقة

شفقة: يا لهوى الحقونى هتجنن انت جايبلى قط ولا عفريت

احسان:يا ريته كان عفريت اهو كان خفاكى وريحنى منك
ماله عمل ايه ؟؟

شفقة: حرام عليك يا راجل القط ده اتجنن
عمال يشدلى ملايات السرير والسجاجيد والستاير
قطعلى القماش كله وكانه متسلط عليا من الغرفة التجارية
البيت كله اتقطع ارحمنى

احسان: بكل برود ...معلش اصله اظاهر بيكره كل منتجات الوكالة
استنضفوا بقى
مش مهم خليه يعمل اللى هو عاوزه بيته وهو حر فيه

وقعدت اتاكتك مع نفسى فى خطة محكمة
اطرد بها الوحش الكاسر مانكى
واستنيت الى ان حانت الفرصة الذهبية

احسان: شفقة انا خارج خلى بالك من مانكى هروح اجيبله حاجة حلوة هيفرح بيها اوى

شفقة حاجة حلوة يا ما جاب الغراب لامه
اللا عمرك ما عملتها معايا
رايح تعملها مع القط
يلا نصيبنا كده
قليل الاصل من يومه لا تعاتبه ولا تلومه
طيب والنبى لانا مبوظة عليك فرحتك
ومنفذة الخطة
رقم نو.. نوتين.. خمس نوات.. مهى خطة قططى
اخلص منه واستريح من قرفه واعزز مكانى تانى فى البيت
وابقى انا الامبراطورة
ده انا بسببه بقيت ملطشة وقفايا اتهرى خرابيش
وياريت من احسان كانت تبقى مبلوعة
لكن من مقصوف رقبة اد الكف ده
حتى يبقى عيب
ما عاش ولا كان اللى يلطشنى قال قط قال
ان كان هو قط فانا حدايه
من الان فصاعد عليك ان تستعد يا هذا المانكى
للهجوم الشفشقى

وبشويش وكل لطافة خدعت مانكى بورك فرخة فى البوكس بتاعه
واول ما دخل رحت قافلة عليه
ووخداه ومسرباه بره البيت
حدفته فى الشارع شر حدفة
وبعدها قعدت ارقص واغنى فرحانة بجلاء الغزو الشيرازى
اللعين عن بيتى

وبعد شوية لقيت سونة جاى ومعاه قفص كبير


شفقة: ايه ده تانى يا احسان ايه حكاية االاقفاص معاك؟؟
هو انت اشتغلت فى سوق العبور ولا ايه؟؟

احسان: لا ده انا عملت لمانكى مفاجاة
مفاجاة تانى يا احسان
عموما مانكى بيسلم عليك وبيقولك سمعنى اغنية بودعك

احسان: مخضوض ..ايه قتلتيه يا مجرمة
خيانه .....خيانه
انا شامم ريحة ملوخية
انتى عملتى ملوخية بالقطط بدل الارانب ولا اية؟؟
بتخنسرى من المصروف

شفقة: مصروف ايه يا عم؟؟
مانكى تعيش انت
امه جت خدته كانت مسافرة
والست رجعت بالسلامة كانت فى بورسعيد بتتجوز
وجوزها الجديد قالها مش عايز عيالك من الاولانى
ولما اطلقت رجعت تاخد ولادها لحضنها

احسان: انتى هتعمليلى مسلسل امينة رزق
عموما انا قابلته هو ومامته وانا راجع
وعقلتها
وقلتلها ترجع لجوزها
واتحايلت عليها تخلى مانكى معانا
واتعاهدتلها اننا هنربيه احسن تربية
وهندخله مدرسة الشعب البيطرى
وكمان هنجوزه
وهى لما عرفت كده فرحت اوى
وزغرطت ووافقت وسابتهولى
الست عايزة تبقى جدة

شفقة: ايه بتقول ايه ؟؟
يعنى اطب ساكتة ادامك ولا اعمل ايه

احسان: لا استنى متطبيش دلوقتى
مش تشوفى المفاجاة الاول


وقتها فتح احسان القفص اللى كان مغطيه وبصيت لقيت فيه
مانكى وجنبه قطة تانية

شفقة: ايه ده مين دى كمان

احسان: دى مانكيـــــاية عروسة مانكى اشترتهاله النهاردة علشان افرح بيه
وبكده ابقى بساهم فى حل مشكلة العنوسة الحيوانية
عقبال ما احل مشكلة العنوسة البنى ادمية

شفقة : ايه عروسة ........... يا خرابى يا نفوخى

احسان: من فضلك بقى يا شفقة تحضرى اكل للعرايس
وتفضيلهم اوضـــــــة

شفقة: نعم بتقول ايه؟
امال انا هنام فين على الارض!

احسان: ودى برضه تفوتنى
امال انا شارى القفص لمين؟؟شفقة: الحقووووووووووووووووووووووووووووووووونى

شفقـــــــــــــــــــــــــة

الحلول الشفشقية للخيانة الزوجية

النهاردة انا عايزاكم تفوقوا وتصحصحوا معايا
وكل واحدة تروح تعملها جردل فسكافيه مركز
علشان تركزوا معايا وتصحوا من الغيبوبة اللى انتم فيها دى

وتسيبكوا من النوم على ودانكم ووقفة المطبخ اللى قشفت رجليكم
وخليكوا معايا وباذن الله هتغرقوا
اقصد هتفلحوا
اليكن بعض الدروس المستفادة
والمقترحات المجربة من ناس كانت نايمة على ودانها
لحد ما بقوا صم وبكم
ازاى تعرفى ان السيد قشطة اقصد سى السيد بيخونك

اولا... لو جيتى تكلميه وهو ولا هو هنا ولقيتيه متيم وسرحان
وعامل فيها عبده الحامولى ومتنح
ولا اللى عايش فى دنيا الخيال
وقتها لازم تعرفى هل هو سرحان فى كيفية تدبير المم ولقمة العيش
اللى هيطفحهالك وبيحاول يجيبها كده تجيله كده
لحد يا عينى ما اتعته وادروش
ولا الموضوع فيه
ان وكان واخواتهم وعيلتهم كلها
والباشا متيم بواحدة رايقة
وقتها لازم تفسدى عليه لحظات الهيمنة
وتحوليها لكابوس وسيطرة
وتقعدى ترغى فى اى حاجة لحدما ينسى اسمه واسمها واسم امه وياريت لو ينساكى انتى كمان ويدخل فى اعراض فقدان للذاكرة
وساعتها تبقى حولتى دنيا الخيال لدنيا الجنان


ثانيا... لو لقيته دخل الحمام وعمال يغنى ويدندن
ومبسوط على الاخر وفاتح بقه اد كده مترين
وقتها يا اما يكون مستحلى صوته وعايز ينافس ابو الليف بمناسبة الحمام
او انه افتكر نادية لطفى بتاعته وبيغنلها الحلوة الحلوة عيونه
وساعتها علطول ومن غير كلام
تدخلى تقرفيه وتكركيبيها فوق دماغه
وتخليها زحمة يا دنيا زحمة
وتقوليله الحمام خرب والدش باظ وعايزين سباك
والميه قطعت والبلاعة وقعت عند الجيران
وتزهقيه فى عيشته وتطفحيه كلام
وتخلى عيشته بكابورت
لحد ما يزهق ويقعد هو يصلحهكمان وهو خارج من الحمام يتزحلق على السيراميك
تنكسر رقبته ويبطل يغنى تانى

ثالثا....لو قبل ما يخرج من البيت قعد 300 ساعة ودقيقتين ادام المرايا
وعمل فرق من النص وسبايكى
وانتى متعودة على سيد ابو حفيظة
وخرج واول لما رجع
تلاقى ريحته حلوة وجايبة اخر الشارع
وانتى مش متعودة على كده
ومتعودة على ريحة الفازلين و اسمنتكو وبصله المحب دجاجةعلطول وفى وقتها تقعدى تشمشمى زى الكلاب
وتفتحى مناخيرك على الاخر
ولازم تعرفى الريحة دى مصدرها ايه واستوردها منين
وهل زهق ومناخيره باظت من الريحة الافيه اللى هو انتى
وحب يغيربتركيبة من ام 10 جنيه
ولا دى ريحة مزة ؟
و فى وقتها تروحى تجيبى جاز
وتكبى عليه علشان اثار الريحة تروح
وميفضلش غيرك
وغير ريحة الافيه المفحفحة منك
وتبقى انتى والجاز عليه
عيشة تحرق الدم
مهو يا اما كده يا اما هياخد
على التركيبة ويفك منك

رابعا... لو لقيتى التليفون كل شوية عمال يرن
ولما تفزعيه وتقوليله رد
يقولك اصله واحد غتيت من الشغل
واذا رد ياخد التليفون ويرد فى الحمام
او كانه بيوشوش نفسه
مع انه فى العادى صوته بيجيب 60 محطة بعد البيت
وقتها لازم تصحصحى وتشوفى ده صاحبه فعلا
ولا زميلة صياعة وسنكحة سفلقية
ووقتها تشوفى الاسماء اللى على التليفونولازم تعرفى مين حنفى وحسب الله وزينهم
اللى مسجلهم على التليفون دول
لانهم اكيد هيبقوا بدل حوحو وتوتو وفوفو
اختصار علشان ميفهمش الحمار
وقتها لازم تتقنى فن اللعب مع الكبار
وتمسكى التليفون تكسريه ميه حتة
وتقولى دوست عليه غصب عنى
ابقى هات غيره
خليه يرجع لايام الزنكوجراف

خامسا... لو جيتى تغسلى وفجاة لقيتى على هدومه
بقعة حمرا روج يعنىوانتى من النوع اللى بيستخدم سمنة بلدى وكاتشاب
ولما تساليه يقولك اصلى كنت باكل كشرى مع اصحابى
والصلصة وقعت على هدومى
وقتها تروحى جرى تاخدى الهدوم وتحليليها فى معملك
وتجرى عليها كل اختباراتك الميكياجية
ولو اتاكدتى انه روج مش صلصة كشرى
تسففيه طن كشرى مشطشط لمدة 80 شهر لحد ما يقول حقى برقبتىوتخلى بدل بقعة الروج دم اهو كله حمار

سادسا.... لو بالصدفة البحتة لقيتى شعره حمرا او صفرا او ميش على كتفه
وانتى من ذوات القرعة تتعايق بشعر بنت اختها
او من انصار الشعر المفلفل يكسب
وقتها لازمن ولابندق تخليه يقر ويعترف
واوعى يضحك عليكى ويقولك ده شعر الكلب بتاع الجيران
كنت بلاعبه
وهو بيخاف من النملة
ساعتها تروحى سريعا تجيبى المكبر
وتشوفى بنظرة تفحصية هل هو شعر كلب ام انسيه؟؟
لو كان شعر كلب
تروحى تطلعى عين الجيران
وتسمى الكلب
اما لو كان شعر انسية تروحى تجيبى الكلب بنفسك
وتعرفيهم على بعض
ولو الكلب انكر معرفته يبقى تصدقى الكلبوتكدبيه وتخلي الكلب يعضه
و يشمشم فيه لحد ما يغمن عليه من الخضة
ويبطل يكدب ويلزقها فى الكلاب
واهو يبقى اخدتى ثواب واكلتى الكلب

سابعا...لو قعدتى طول اليوم تعملى اكل واشى محمر ومشمر ومسبك ومقلى لما طلعت عينك وبظت لبرهوجه من بره قالك شبعان مش عايز اكل
ساعتها لازم تعرفى هل اكلك انتى اللى عك
وبتطبخى مسامير وشوربة صراصير
والراجل ما صدق خلع وفك ببطنه وانقذها من الدمار الشامل
ولا اتغدا بره مع مزه ودفعته دم قلبه
وجابلها وجبة هابى ميل من ماكدونالذا
وده الاحتمال الاكبر
وقتها جرى تعملى شوربة ملح انجليزى وتسيقهاله
على انها عصير جربان فروت
وتستنى لما يرجعووقتها هتتاكدى اذا كان اكل بره ولا لا
ولو اتاكدتى مش هوصيكى تطفحيه الاكل تنتوفه تنتوفه
حد ما معدته تصرخ وتقول جااااااااى وتجيله قرحة

ثامنا.... لو قاعدين بتتفرجوا على التليفزيون
وفجاءة لقيتيه بيتأوب وقام اتسحب
دخل ينام فى الاوضه التانيةاو راح نام جنب العيال
لازم تعرفى هل هو قرفان منك ومش طايقك
لانك من النوع المتأثر بالاوركسترا السيمفونى
ومناخيرك منفدة من كل ناحيةولا متيم بواحدة تانية وواخد المخدة فى حضنهوعمال يفكر فيها ومتأثر بفيلم الوسادة الخالية
لو اتاكدتى من المخدة انها الوسادة الخالية
يبقى تخلى ليلته خل محشى قطنوتبحترى القطن بتاع المخدة فى الاوضة على دماغهلحد ما ينام على الارض
وكمان تدفعيه حق المنجد ده فى حالة لو المخدة مش فيبر

تاسعا...لو طلبتى منه مصروف البيت
ولقيته علطول الخط مفلس
وجيبه خربان برضه تتاكدى الاول علشان الظلم حرام
يا ترى انتى اللى خاربة بيته وبيت اللى خلفوه
ولا بيصرف على مزة تانية
وانتى مش دارية
لو مكنتيش من النوع الخروبى وكنتى من النوع التمر هندى
يبقى لازم تعرفى فلوسه بتروح فين وتعمليلها غسيل اموال
ولو عرفتى انها بتتصرف على مزة
تعلنى ساعة الصرف مش الصفر
مش عايزاكى تخلى فى جيبه ربع جنيه مخرومرجعيه لايام العشرة ساغ والشلن
وكمان انتى اللى تديله مصروفه
وما يزيدش على تلاتة تعريفة
علشان التبذير تعريفة مواصلات
وتعريفة ساندوتش فول يفطر بيه
وتعريفه حاجة ساقعة
ايه هينهب؟؟

عاشرا..... لو سالتيه انتى بتحبينى يا حبيبى؟؟
ورد عليكى بهزة رأس بعد تفكير عميق
وسكت
يبقى الموضوع مش تمام
وبيخلص نفسه وخلاص
اما لو رد وقال
اه من غير نفس
ورحتى فزعاه انتى بجملة هو انت بتقولهالى شفقة واحسانفقالك اه بالظبط كده وصدق على كلامك
يبقى تشمى ريحة مش تمام
ريحة رنجة وفسيخ
ووقتها تنقضى عليه كالاسد المفترسوربنا معاه ويرفع عنه

اما اذا قام جاب جاز وولع فى البيت وفيكى وفى نفسه
يبقى وقتها تتاكدى انه اخلص واوفى زوج فى الكون
لانه هيكون مات وريحك وارتاح من وشك
ووقتها هنيأ لكى بيتك واكلك اللى هتاكليه لوحدك
وسريرك اللى هتنامى فيه لوحدك من غير ازعاج
ومعاشه اللى هتتشبرقى بيه على نفسك
ده غير حصولك على لقب ارملة
اللى زيه زى ملكة جمال التوفيقية
والعرسان هتبقى نمل عليكى

واخيرا لو جوزك راجل مخلص ووفى وده نسبة ضئيلة جدا
فحاولى جاهدة انك تحافظى عليه وعلى بيتك
وتخلى حياته كلها حب وهناء وسعادة

اما لو كان من نسبة 99% الخاينين
فاوعى ترخرخيله طبلة ودنك بوتيتا
ولا تسمعيله ووريه العيشة الهباب وزحف التراب
وبصى لنفسك ولو طلعتى غلطانة
يبقى مفيش غير كلمة واحدة هاقولهالك
حسبى الله ونعم الوكيل

شفقة