يــــــــــــــلا حـــــــالا بالا ....حـيوا ابو الفصـاد

سونة : ايه يا شفقة الشمع و البلالين دى كلها

انتى ناويه تلمى عيال الشارع وتلعبى معاهم؟؟

ولا عندك سبوع؟؟ ولا انتى اتهطلطى يا روحى ولا ايه؟؟ شفقة: بقى كده برضوا يا سونة ...بقى انا مهطولة ؟

شايفنى باكل كمامى وبعض فى الحاف.... قال وايه انا اللى كنت عملالك مفاجعة
سونة: لا العفو ده انا اللى باكل مشابك الغسيل

وحياتك بلاش انتى ومفاجعاتك اللى تودى فى داهية دى

الواحد مش ناقص مصايب

مش كفاية انتى يا شفقة عليا

مصيبتين فى الراس توجع... وانا راسى اتفتحت مش اتوجعت

شفقة: يا سيدى مش انا اللى عملالك المفاجاة

دى ماموه .....مامتى حبيبتى ....قرة عينى
سونة:خير اللهم اجعله خير

انتى بقيتى بنت ابو لهب ولا ايه ؟؟

ربنا يجعل كلامنا خفيف على حماتى قنبلة حياتى

يا ترى الحاج طردها من البيت.... وجاية تقضى معانا الويك اند

ما انتم اصلكم عيلة تغم وتسد النفس
شفقة: ايه ده اتطردت ايه وبتاع ايه !

وهو حد يقدر دى اليدر يا ابنى اللى مزبط ومربط البيت

وبعدين لما احنا نسد النفس ...امال مين يفتحها ؟؟
سونة: ده على اساس انكم مخلل صح
شفقة: بطل بقى تهريج ....يا ابنى انت ناسى ولا ايه عيد ميلادك بكرة

كل سنة وانت طيب

وانا بقى بالمناسبة دى عزمت كل العيلة علشان يحتفلوا بيك

ونهف التورتة سوا

ونقول يلا حالا بالا بالا حيوا ابو الفساد ......ها
سونة:كنت زمان ابو الفصاد اما على ايدك بقيت فساد

وبعدين يحتفلوا بيا ولا يقضوا عليا

دول تتار يا امى وهيجوا يعملوا هجوم على البيت

شفقة: بقولك ايه كفاية هزار بقى

ويلا استعد علشان بعت اشتريت شوية حاجات صغننة كده وزمانها هتوصل
سونة: يـــــــــــا خراب بيتى المستعجل

جبتى ايه يا جلابة الهنا ......يا وش السعد

شفقة: ابدا تورتة 3 ادوار.... ويجى عشرة كيلو حلويات شرقية

و6 دسة جاتوه و5 كيلو ساليزون

على كام كيلو كرواسون ....على 3 كراتين بيبسى كانز

يعنى مش كتير بس تفتكر يقضوا ولا نطلب تانى؟؟
سونة: نطلب الاسعاف او بوليس المطافى

قال يقضوا قال دول مش هيقضوا دول هيقضوا عليا يا شفقة

ومش هيبقى عيد ميلادى

لا دى هيبقى يوم الذكرى السنوى بتاعتى

حرام عليكى يا شيخة كل دى حاجات
وكمان تورتة 3 ادوار

ليه يا امى وهو فرح ؟؟

ده انا لو فكرت اتجوز تانى ......مش هدفع المصاريف دى كلها!
خربتى بيتى يا شفقة ....... اشوف فيكى يوم يا مفترية
شفقة: يا شيخ بدل ما تقولى كتر خيرك انك بتهتمى بيا

وبتفتكرى عيد ميلادى ....حاجة تعل
سونة: الهى يجيلك زهيمر يا شفقة ليوم القيامة

اذا كانت الذاكرة هتعمل فى جيبى كده وهتخرب بيتىاما الحق اروح بقى الشغل ااقدم على سلفة لعشر سنين قدام
وجاء اليوم التالى والتتار ......وصلوا وعملوا هجوم على البيت
ماما :كل سنة وانت طيب يا حبيبى عقبال مليون سنة
سونة: وانتى طيبة يا حماتى .....بس بلاش حكاية مليون دى لتستجاب

وهو انا عارف اعمر سنة مع بنتك.... لما تدعيلى بمليون

دانا كبيرى كام شهر وشوية كسور
ماما:" ههههههههههههه ....يوه جتك ايه دمك خفيف

ده انا بنتى تخلى العجوز..... يرجع صبى
سونة: صبى قهوجى وانتى الصادقة

امال الواحد شعره ابيض وطقطق من ايه؟؟

دانا قربت اصلع يا حماتى وازرع شعر .......دى توكسفين كله دمار شامل شفقة: بقى كده ...طيب مش هوريك هديتى

ده انا جايبالك ترننج وكوتشى بعينك

خلاص يا ماموه ....اوعى تقوليله على المفاجاة اللى انتى كمان محضراها

ده ما يستاهلش
سونة: مفاجأت تانى ؟؟

ابوس ايدك...... ده الشركة اعلنت افلاسها.... هروح لمين تانى
ماما: هههههههههههه عموما كل سنة وانت طيب

وانا بقى بالمناسبة دى حجزتلكم يومين فى اسكندرية

ده كادو عيد ميلادك ....روحوا اتفسحوا وقضوا يومين

واعملوا شهر عسل من تانى

سونة:عسل!! وهو ما بيخلصش فى العيلة دى ولا ايه؟؟

ده انتم على كده ......عايزين بلاليص مش اجواز
عموما متشكر يا حماتى ......وكل سنة وانتى طيبة
وتانى يوم لمينا البؤج وشدينا الرحيل وسافرنا اسكندرية

ويا على هواء اسكندرية.... وبحر اسكندرية ...وشط اسكندرية
شفقة: يلا يا سونة عايزة انزل البحر احنا هنفضل قاعدين كده؟؟

انا جاية استجم......... واشم هواء ... والعب بالودع
سونة: جاية تستحمى طيب..... ما الحمام قدامك اهو

خشى خدى دش لحسن ريحتك ...قلبت البحر يا شفقة والودع استخبىء
شفقة: يلا بقى بطل رخامة ........انا عايزة انزل البحر
سونة: وانا حايشك ما تنزلى............"فى سره" الهى ياخدك البحر وما يرجعك تانى
شفقة: يلا بقى ماليش دعوة عايزة انزل البحر ...اها اها

سونة:امرى الى الله بس يارب دعوتى تستجاب المرة دى
شفقة:ايه يا سونة احنا جايين على البحرعلشان تنام مش مكفيك النوم فى مصر

كمان جاية تنام فى اسكندرية

احنا مش فى البيت هنا..... احنا على البحر...... يعنى شوية شعر....شوية هيام....شوية رومانسية
سونة: شعرية........ وملوخية انتى جوعتى ؟؟
شفقة: يووووووووووووووه بقولك ايه انت زهقتنى... هات لى ايس كريم

علشان حرانة ....وسودانى ....وكاجو ....ولب..... وام الخولول علشان تحرم تتريق
سونة: ما اجبلك خولول شخصيا تطلعى عينه حبة زى ما طلعتى عينى

حاضر يا ستى هجبلك بس يارب نخلصويا ام الخلول

الهى تقف فى زورك
كمان انا جوعت وعايزة اتغدى سمك مشوى وجمبرى

وبكلاويظ وشوربة سى فود اه مش احنا فى اسكندرية يبقى سمك

سونة:ما تيجى تاكلينى اوفر

شفقة:" فى سرى"يا عينى يا سونة هتدفع دم قلبك

عموما مش مهم فدايا وهو انا بتفسح كل يوم

بقولك ايه بعد الغدا عايز اخرج اتفسح وعايزة اروح سان استفانو

عايز اتفرج على شوية حاجات

سونة: سان استيفانو ومالها زنقة الستات يا خراب بيتك يا احسان

شفقة: شايف الحاجة حلوة ازاى وبتبرق وبتلمع وجميلة اد ايه؟؟

سونة: اه من ناحية شايف فانا شايف ايه الجمال ده ... ايه الحلاوة دى كلها؟؟

سيدى يا سيدى على الستات ايه الحلاوة دى ايه الطعامة دى

ليت التلاتينات تعودوا يوما ...علشان ارمى القديمة اللى جنبى

واغير بقى بحاجة تفتح النفس ...اخ

الواحد اظاهر بقاله كتير مش متابع اخبار المزز

وخاصة المزز البحرى.... حاجة تفتح النفس

وترجع الشباب مش زى القبلى اللى جنبى

هى دى هدايا عيد الميلاد والا فلا
شفقة: ايه يا سى احسان مال راسك ملوحة ليه؟؟

خليك معايا هنا بدل ما تروح من غيرها

وترجع من غير رقبة ولا عين. ايوا كده شاطر يا روحى
بقولك ايه.... ايه رايك فى الفستان الجميل ده؟؟

انا ماليش دعوة انا عايزاه يا سونة
سونة: ها .....الفستان ولا صاحبة الفستان؟؟
شفقة: ها بتقول ايه ؟؟

انت مركز فى ايه بالظبط؟؟

يلا عايزة الفستان
سونة: حاضر....... حاضر
شفقة: ياخرابى على الجمال ......ايه الشوز الفظيع ده؟؟

انا ماليش دعوة انا عايزة من ده ده يهبل...انا عايزة من ده يا حزومبل انا عايزة من ده
سونة: طيب خلى حزومبل يشتريهولك ...اما زومبل فخلاص اعلن افلاسه
شفقة: يا لهوى... يا هوسى.... ايه الشميز والترننج الخطير ده ؟

انا اتهوست....واتجننت ماليش دعوة عايزاهم
سونة: ده انا اللى ماليش دعوة .....اتخرب بيتى يا شفقة.... خفى
شفقة: اففففففففففففففففففففف ايه الكوتشى الرائع ده لا ....لا

انا مش قادرة انا عايزة من ده
سونة: ياخرابى يا خراب جيبى ....هنشحت يا شفقة

وهنرجع من اسكندرية للقاهرة مشى وزحفا على الاقدام
يا مفترية بقى تجبيلى هدية ب200 جنية تاخديها بعدها بيوم 1200 ده ولا البنوك تعمل كده
ربنا يسامحك يا حماتى .....انتى وبنتك هتكونوا سبب هلاكى
شفقة: سونة ايه يا روحى .....مش هنسافر بقى ولا ايه ؟؟
سونة:اه طبعا امال لازم هنسافر بس لما تقولى لامك تبعتلنا حق تذاكر السفر

وحسبى الله ونعم الوكيل فيكى يا شفقة
اشوف فيكى يوم ..... ما تطلعلوش شمس
شفقـــــــــــــــة

ثقافية كـــــــافية...كله فى الاوكــيه

انساتى وسيداتى الحلوات والجميلات المقطقطات وحشتونى اوى اوى

بحيكم من ادام شاشة الكمبيوتر بعد غياب طال اكتر من شهر ونص

سامحونى اصلى كنت من السيدات اللى طالع عينهم فى رمضان فطار وسحور وموائد الراحمن

لما ورمت ونفوخى طار

المهم انى يا دوب بدات اخد ويك اند.... واشم نفسى لقيت تليفون من انوسة حبيبة قلبى من جوه

واليكم ما حدث
انوسة: بت يا شفقة استعدى انا جاى اعمل هجوم على القاهرة

شفقة: ايه ....هجوم ايه يا انوسة ؟؟ ناوية تسرقى بنك ولا ايه؟ طب بالنص والا هبلغ عنك
انوسة: ايه اللى بتقوليه ده ؟؟بقولك هاجى القاهرة ...اقيموا انالاحتفالات ودقوا الطبول
ا نا جاية علشان عندى مفاجاة
شفقة: اشجينى شكلك جاية تقتلى جوزى ....وهو فيه مفاجاة احلى من كده

دانا ساعتها مش هدق الطبول

لا هدق كفتة واوزعها على الغلابة ندر
انوسة: ااقتل جوزك ايه يا هبلة انتى هتودينى فى داهية

اقفلى يا بت السكة .....اقفلى
شفقة : طيب خلاص قولى احبطتينى ايه هى المفاجعة ؟؟
انوسة: اختك كلموها من التليفزيون وعندها تصوير
شفقة: تصوير! ايه ده يا انوسة بقى يوم ما تشتغلى تدورى بكاميرا فى التليفزيون زى المصوراتى

حد عايز كارت صورة يا بيه ....صورة يا هانم ...وتعملى زى اضحك الصورة تطلع هطلة

لا لا مش مقامك يا انوس

انوسة: بقولك ايه انتى هتجنينينى... دول كلمونى علشان اصور انا وسارة طوبار

صاحبة مدونة محاولات البحث عنى هنصور فى برنامج ثقافية كافية
شفقة: محاولات البحث عنى ليه هى كانت تايها ولا ايه ؟؟

عموما هستناكى بعد ما تدوروا عليها وتلاقوها بس ابقوا هاتوا منادى على توتوك كويس
انوسة :ااقفلى يا بت انا قطعتى علاقتى بيكى انتى وجوزك
وجاء اليوم الموعود وما نفذتش ايناس تهديدها ومقطعتش علاقتها بينا

لانها كانت فى احتياج للعصابة بتاعتنا انا واحسان

وكله هيتضح لحضرتكم بعد كده وجت انوسة الننوسة واختها نسمة العسولة الى ارض الوطن

واتقابلنا واحسان كالعادة كان جعان وعمال يتحايل على ايناس ناكل

تقول ابدا مش هأكل الا لما اصور مش هتبهدل ولا همسح الروج ابدا

ولا هبهدل اناقتى وشياكتى

واحسان يتحايل وانا اتحايل وهى على كلمة واحدة "مش هاكل يا سونة مش هاكل يا سونة "

بينى وبينكم الراجل كان هيقع منى

ده نازل من البيت على فرخة... وحلة مكرونة ....ولتر بيبسى

مش حاجة يعنى " طيب ما كان جه كلنا احسن"
وجاء موعد التصوير راح احسان قالى نوصل البت الخنيقة دى لحد الاستوديو اللى فى المقطم

ويمكن السلعوة تاكلها وتريحنا وبعدين نروح نشوفلنا خروف ندفن نفسنا ....فيه انا وانت يا جميل

وقد كان

طلعنا المقطم ووصلناها وهناك وعند ميعاد التصوير

لقينا ايناس بترتعش .....وجالها حمى وسخونة

قلتلها انوسة حبيبتى مالك مرتبكة ليه؟؟
الحالة جت ولا ايه باينننا هنعمل زى فيلم عنتر بن شداد " هات العطر يا ولا"
انوسة شدى حيلك وفوقى ولا يهمك... اديهم على نفوخهم

بقى مذيعة مش هتعرفى تلميها ...ده انتى لامة البلد كلها

ومبهدلانا فى مدونتك.... ومبهدلة الوطن.... وقريب هتتمسكى

اجمدى يا هبلة وارفعى مناخيرنا لفوق
وبعد ما شمت نفسها افتكرت ان سارة وجوزها القهوجى لسه موصولوش

وان ميعاد التصوير قرب ولازم يكونوا سوا..... قعدت تقول اعمل ايه انا دلوقتى

"كده فرصة احترافى هتضيع"
شفقة :ايه يا بنتى ده انتى هتصورى فى ثقافية كافية..... ولا فى برنامج الكورة فى الملعب ؟؟
انوسة :اصلى وعدت اصحابى انى لو نجحت واشتهرت ....هعمل بطولة اول فيلم استعراضى غنائى راقص

وهسميه" ثقافية كافية وانا فى الاوكية" وهيكون اخراج جاد شويرى

وقعدت تعيط وتنعى حظها بسبب تاخير سارة
انا قعدت اهديها ..عموما استنى شوية... تلاقى سارة بتشطب الكوبايات والصوانى وبتلم حق نصبة الشاى والقهوة بتاعة امجد

ما انتى عارفة انها بتساعده بعد الضهر علشان يعرفوا يتجوزوا

ما انا كنت بعمل كده مع سونة كان سواق على ميكروباص وكنت انا التباع بتاعه

وهو ينفع جواز من غير الكفاح
شوية ووصلت العروسة الجميلة سارة وجوزها امجد القهوجى
شفقة:مالك يا سورسارة خدى نفسك
سارة: اصلى تعبت اوى النهاردة فى القهوة ويادوبك خلصت... وسيقت وروحت خدت شاور علشان اطلع زى القمر وجيت
شفقة: سارة جبتى باكوين شاى وسكر للبوفيه

سارة: لا ...ليه يا شفقة هما معندهمش بطاقة تموين ولا ايه ؟؟

لا يا خايبة ما انتم لازم تظبطوا المذيعة علشان تظبطكم... والا هتتهروا اسئلة
سارة :تصدقى معاكى حق يا شفقتى... لو الواحد يعرف كان جاب معاه التموين وهو جاى
انوسة : ايه ده ان شاء الله انتم لسه هتكلموا وتلوكوا مع بعض

يلى يا ست سارة بينادوا على اسمك ....ساقطة وقعدت تتريق

واول ما وصلوا عند الاستوديو انوسة كان هيغمى عليها

ونفسها مرة واحدة اتقطع وقعدنا نشممها فى بصل وكرفس

لما روحنا طلعت.... وشوية شوية كنا هنطلب 55 اسعاف... يجوا يرفعوا الجثة
شفقة: شدى حيلك يا انوسة ما تخافيش

نحن السابقون وانتم الاحقون..... وحـــــــــدوه
ودخلت ايناس وسارة الاستوديو بعد ما المذيعة قعدت تتحايل عليهم وتترجاهم

علشان مستقبلها ما يضيعش
وبعد الشحتفة والعياط

وافقت ايناس وسارة انهم يسجلوا فى البرنامج بشرط

انهم يدفعولهم بدل ....."استغلال ثقافى "
وخدت ايناس وسارة على قلبهم اد كده

بس ما تفهموش غلط ما خدوش فلوس ......لا خدوا اسئلة لما قالوا يا بس

البت سارة كلت الجو.... وقعدت تزق فى ايناس وتقرص فيها وكل شوية.... تبصلها وتلعب لها حواجبها

لحد ما ايناس ارتبكت وما بقيتش مركزة..... واستحلفتلها انها لما هتخرج هتوريها وهتبلغ بتوع التموين

يقفلولها القهوة لكن ما انقذهاش من الحوسة

الا اتصال عبد الحميد افندى ....وروضة هانم السلحدار.... والملك طلال ....والشاعر الهمام امجد

كلمتين حلوين... على حبة مكسرات على مدح فى الزهرتين المنورين
و خلصت الحلقة بعد ما ضرسولنا سنانه من المكسرات لكن الحق

كلنا صقفنلهم ورفعنلهم القبعة

وخاصة للبت المضروبة ايناس اللى بتقول كلام زى الفل....... بتاعة مصر دى

لا بجد وطنية ....وطنية يا انوسة

بذمتك بقى الوطنية ولا الكوسة؟؟

والعقل والرزانة ولا مخ المهوسة؟؟ مين يكسب فى البلد دى يا فيلسوفة؟؟
بعدها اتفاجانا بانه عيد ميلاد ست البنات العروسة الشربات

اللى متجوزة شاعر الاتوبيسات ...."سارة حبيبة قلبى"
هنعمل ايه ...ايه ...ايه ؟

فجاة لقيت انوسة بتتفق مع احسان وبيكونوا عصابة هى واحسان ونسمة

وبيفكروا انهم يعملولها عيد ميلادها فى مركب

وده كان مخطط انوسة علشان تفش غلها فى سارة

واقترحت اننا كل واحد منا ياخد معاه بدلة غطس .....وعوامة انقاذ اشترتهم على حسابها

هما والتورتة اللى كانت غامقة علشان محشية ديناميت

علشان بعد ما هيطفوا الشمع.... ايناس هتعد لتلاتة وبعدها هتتنفجر المركب

وتغرق سارة وامجد وتعملهم زى عروسة النيل

وقالت مقولتها الشهيرة "علشان تبقى تاكل الجو منى وتقول للمذيعة مدونتى اسمها محاولات البحث عنى

" طيب اهو انا هخليهم يبحثوا عنك فى مياة النيل الضحلة مع السمك"

واصبحت نهر الحب نهر الانفجار والتدمير
ولكن للاسف بعد ما ركبنا المركب ونفسنا اتقطع فى نفخ البلالين وخاصة نسمة

يا دوبك جينا نولع الشمع..... ما لقناش معانا كبريت وفشلت الخطة الشوريرة

وفضلت ايناس تعض فى صوابعها لحد ما دخلت على العقلة نفسها

ولما لقيت مفيش فايدة راحت قعدت على اول المركب... وقعدت تهز فيها قال يعنى يمكن تغرقنا

وبرضوا ولانها سوفيفة.... باءت محاولاتها بالفشل
واستسلمت للأمر الواقع..... ساعتها قالت بس مفيش الا انه احسان يغنى

وطبعا كله الا سونة..... كروان مغرد...... بلبل صداع

ااقصد صداح .....قالت يمكن يغنى الراقدون تحت النيل

ومع الصوت الجميل يمكن ينتحروا ونفوز احنا بالهدايا

لكن ابدا وكأن سارة وامجد

معملوهم حجاب عند عم سرداب.... بتاع الاعمال الهباب... اللى بيخلى العايقة تلبس النقاب
احسان بقى ايه قال ابدا بوتيتا مش هوافق على افكارك الشوريرة يا ايناس

انا مش عايز اتحبس واروح اللومان.... خلينى جنب مراتى غلبان فقير جعان حيران

ومرضيش ابدا يشترك فى الخطة

ربنا يخلهولى عاقل..... عاقل ما بيحبش اللومان لكن بيحب الدمار الشامل اللى هو انا
ايناس اتغاظت محدش عايز ينفذ اى خطة

تلف شمال ....تدور فى المركب.... ولا احنا هنا

وقعدنا نغنى ....وامجد يقول شعر

شوية يبص لاحسان ويقول شعر رثاء

وشوية شعر فى الاتوبيسات شكله معجب بيها

اوى وسارة.... تقوله خليك كده متحبش فيا

وفرحان بالاتوبيسات بتاعتك اوى يا خويا

وخاصة بيموت فى خط الكيت كات..... فيصل

وفضلنا كده ساعة .....شوية رثاء ....وحبة هجاء

لحد ما ايناس طقت....واخر لما غلبت طلعته على عين المراكبى

بما ان خطتها فشلت مع الراكبين ....قالت تطلعه فى المراكبى وتاخد حقها ضرب وتلطيش فيه

الهوبة جت وعايزة تهدأ ونسمة تهديها وتطبطب عليها مفيش فايدة ... مهوسة

" ساعة تروح وساعة تيجى"
احسان قعد يحوشها ويقولها علشان خاطرى سيبيه ....هنتحبسى وهتلزق فينا وافانا هيتهرى ضرب

وهى ابدا لحد ما الراجل خلص فى ايديها ......وما انقذهوش الا امجد
وبعدها مشينا ومن كتر الغيظ والغل...... رجليها فضلت تورم..... وتورم لحد ما بقت اد رجل الفيل

وساعتها اعترفت بغلطها لرحيل..... وطلبت منها السماح

واترجت الناس الملاح اللى هو احنا اننا نعفو عنها

وبعد ما سامحناها جريت على البيت

خدت شنطها.....وشيلتهم للبت نسمة

وراحت راكبة اول سوبر جيت هى واختها

وعلى بلدهم عدل

توصلى بالسلامة يا انوسة

بالرغم من خططك الشوريرة المريرة ....الا انى بموت فيكى وبحبك جدا

انتى وسارة ونسمة

ربنا يوفقك وتلاقى المخرج اللى يخرجلك الفيلم

وتبقى بطلة اد الدنيا زى ما بتحلمى ....بس ساعتها هبقى اخد منك حق تذكرة السينما

علشان اخواتك شحاتين وفقرانين

شفقـــــــــــــــة

تحــــــــــــــــــــــــــــديث + 1000 مبروك

حاجة غريبة نزلت البوست امبارح وبصيت لقيته نازل بتاريخ قديم

هو بلوجر بيهيس ........ولا الجهاز هو اللى بيخرف

عموما البوست اهو تحت اسمه "1000 مبروك"

1000 مبــــــــــــــــــــــــــــــــــروك

اسمع كلام امك.... شرد لابوك....... بهدل عمتك كسر دماغ عمك اخو ابوك
قطع فى فروة ستك طلع المطوة وغز جدك طبعا كل الجمل دى متعارف عليها فى اى سبوع

واحنا والحمد لله كان عندنا اجمل سبوع لاجمل ننوس عين امه " ادم "

بس ربنا يستر وما يطلعش عينها ويخليها تبظ لبره ويعملها جحوظ

المهم يا رنونة انك تستحملى وتسلمى امرك لله لانه شىء لابد منه لازمن ولابندق انه يكون فيه عيال

امال يعنى ناخد بتارنا منك ازاى؟

مهو ربنا بيخلص ذنب ناس من ناس

المهم انى جاية النهاردة اباركلك واقولك الف الف مبروك

لانك بعد ما بقى عندك ادم الدنيا هتتغير خالص........ وهتتقلب راسا على عقب

وهيبقى لونها بمبى بمبى مسخسخ

الف مبروك..... عليكى حصولك على لقب ماما وامه ويامايه ويا ماماتى واللى زيه .. زى لقب ميس ايجيبت كده

يعنى حاجة عظيمة اوى.... وما تنسيش ان الجنة تحت اقدام الامهات

ده ان بقى فيكى قدم اصلا

الف مبروك.... انتقال لقبك من مودام وانتى الولية والالفاظ اللى اتهريتى من سماعها دى

الى مامى ....ويامه .....ويا ست الحبايب انتى ويا ماى ماذر

الف مبروك...... انك خلاص هتودعى الوظيفة وهتنتقلى من كادر الموظفات المحترمات

الى كادر وظيفة احلى كتير وهى المرضعات.... والدادت .....وشغل الحضانات

وده طبعا اعلى فى السلم الوظيفى.... بس خلى بالك لتقعى من على السلم وتركبى مقشات

الف مبروك...... عليكى اخيرا هيجى اللى هيعرف يشكمك ويقولك بس اسكتى وما تتكلميش كده مع بابا

ويخلى بابا بقه مفتوح على اخره من كتر الانشكاح ويبقى فرحان اوى بعصابة على بابا اللى بتأيده

الف مبروك انك خلاص من هنا ورايح عيونك هتجافيها النوم ......وابقى قابلينى لو شفتيه تانى قبل اربع

خمس سنين وبرضوا هيبقى تخاطيف

وهنيئا لكى الصويت والعياط وكلمة واءءءءءءءءءءءءءءءءءءء.... والزن اللى عمال على بطال واللى هيلم عليكى الجيران

الف مبروك عليكى قاعدة البيت ليل ونهار..... والحرمان من الخروج والفسح والسفر

والذى منه......وكبيرك تجيبى لب وترمس وتعمليهم وتقزقزيهم فى البيت

وتقعدى تفتكري الايام الخوالى بتاعة الكورنيش....... والسميط ابو جبنة

الف مبروك..... اخيرا جالك اللى يحكم رايه ويمشى كلمته عليكى

وما تعرفيش تفرضى عليه رايك ........زى ناس تانية كانت بتعمل وهى ساكتة سكتم بكتم

الف مبروك ....انه مش هيبقى فيه ولا مكان فى البيت تقدرى تقعدى فيه..... وهتفضلى تلفى حوالين نفسك من الكركبة وهتعيشى فى زحمة يا دنيا زحمة ...... ومولد يا دنيا

الف مبروك..... عليكى كلمة هاتى وانا عايز يا ماما.... واشمعنا اصحابى ....والبت بنت الجيران وعايز مصروف علشان احجزها قبل ما عريس تانى يتقدملها..... وادفعى يا ماما

كمان لازم تنسى كلمة مهمة اوى وتحذفيها من قاموس حياتك ..... كلمة خدى لازم تطلقيها بالتلاتة

من اليوم فصاعد لازم تكونى مضحية

الف مبروك ....عليكى سهر الليالى فى المذاكرة والضرب فى جتة العيال.... وهما ولا هما هنا منحسين بعيد عنك

بعد ما كنتى كبيرك تمسكى مجلة الازياء ولكى يا تفيدة...... وموضة ام اربعة واربعين

الف مبروك .....عليكى انه اخيرا هيجى اللى يطلع عين جوزك وياخد حقك...... لك يوم يا ظالم

الف مبروك .....عليكى شد الشعر والمشى حافية..... وتشقق القدمين

بعد ما كنتى بطلة العالم فى المرواح للكوافير... ووداعا للتجميل ومكوجى الرجل

الف مبروك.... عليكى المورستان وكاس العالم اللى هينظموه فى بيتك....... ووداعا للراحة والهدوء وعيشى مع مبدأ لا راحة بعد اليوم

الف مبروك..... عليكى اخيرا هتلاقى المنافس الوحيد اللى مش هتقدرى تفتحى بقك معاه

واللى هيستولى على الاب توب بتاعك .....علشان يشيت مع الجو

وانتى تروحى تترزعى فى المطبخ مع حللك ومواعينك

الف مبروك ....انك هتقعدى تزعقى وتصوتى للصبح لحد ما الاحبال الصوتية تختفى ....ومش هتلاقى حد تفشى غلك فيه ولو قلتى مين عمل كده ؟؟

مش هتلاقى غير كلمة واحدة مش انا يا ماما

الف مبروك...... عليكى الخضة لما تقعدى تنادى كل شوية وتلاقيه طالعلك من اى مكان زى عفريت العلبة

يـــــــــــارب شغـــــــــلانة ما تكونش هــــلكانـــة

احسان: مالك يا شفشق ايه ربطة الخدامين دى ومالك حاطة ايدك على راسك كده ليه ؟؟

بتدبرلى مصيبة ولا اية

"بصوت واطى" جتك مصيبة فى معاميعك

شفقة:ايه يا احسان عايز ايه قطعت عليا حبل غسيلى

قصدى حبل افكارى

احسان:حبل ! طيب حطى المشابك كويس لحسن الافكار تقع من راسك ومنعرفش نلمهاشفقة :انت هتهزر يا سونة سيبنى فى اللى انا فيه

انا بفكر فى شوية مشاريع هيخلونا

هوب هوب هوب.... فوق

احسان: مشاريع... وهوب هوب فوق

يبقى يا حبيبتى هتبيعينا اللى ورانا واللى قدامنا

وهنبقى من سكان السطوح

وانا وانتى هنتشمس فى الرووف ان شاء الله

شفقة :انا مش بهزر يا احسان

انا فعلا قررت اعمل مشروع يخلينى اخد

لقب بزنس وومن

احسان : تقصدى بسبس وومن

انتى كبيرك بسبس مش بزنس
انتى اتجننتى يا شفقة ولا ايه؟؟

طيب والماجستير والدكتوراه وشغل الجامعة

والذى منه نويتى ترميهم فى الزوبالة ؟

شفقة : بص يا سونة يا حبيبى

اصلى بصراحة لقيت الحاجات دى ما بتاكلش عيش حاف

وانا اتعودت على العيش ابو سمسم

فقلت لنفسى لازم يا بت يا شفشق

تأمنى مستقبلك من غدر الزمان وغدرك انت كمان يا روحى

وقعدت امخمخ وافكر فى شوية مشاريع مكسبهم مية المية

احسان: ميه الميه!

يبقى اكيد هتشتغلى فى توزيع البانجو والحشيش وهتضربى حقن

هما دول اللى مكسبهم الف الميه غير كده كله صفرالمية

شفقة: بانجو ايه وحشيش ايه

انت شايفنى تاجرة مخدرات هتودينى فى داهية برأسك دى

بص يا احسان

احسان:ابص ولا اشم رجلك اللى حطاها فى وشى من الصبح دى

دى ريحتها عفنت وماتت

ما تتلمى يا شفقة
شفقة:مش عايزين هزار بقى ......ايه رايك يا سونسون

لو ااجر محل وافتحه كوافير حريمى

واحدة صاحبتى عملت كوافير وماشاء الله عليها

اشترت حتة ارض فى صفط اللبن

وربنا فتحها عليها على الاخر
احسان: كوافير !

يا حبيبتى انتى كبيرك حلاق حمير

وكمان هتبوظيلهم الفورمة

كوافير ايه يا شفشق بربطة الخدامين اللى انتى عملاها دى؟؟

طيب والنبى ازاى هتعملى شعر الناس

وتبقى واجهة للمحل وانتى بالمنظر المنعكش ده

ومركبة سلوك دش واريل فى راسك

شفقة: بس اسكت ما انتش فاهم حاجة

دى النعكشة دى احدث صيحة من صيحات الموضة

ما بتشوفش المطربة مريام فارس وهى عاملة نفس تسريحتى

احسان : لا بشوف فارس مش مريام فارس

وبعدين بقى انتى هتعرفى تمسكى سيشوار ومكواه؟؟

والنعمة هتشيطى شعر الزباين وتولعى فيه

وهتبقى زبونة من زباين المطافى

بقولك ايه

انا مش ناقص مصايب

بكده كل يوم هترجعيلى مضروبة لوكاميتن فى عينيك من الزباين

وبعدين ارحمى الستات دول اساسا نصهم على وشك يقرعوا

والنص التانى قرع و مركبين بواريك وداهنين مرهم كبريت

شفقة: انت هتخوفنى ليه يا سونة

يعنى انت شايف كده

طيب بلاش كوافير علشان اللوكميات انا اصلا يا دوبك بشوف طشاش

طيب ايه رايك لو فتحت محل بيع ادوات ماكياج واكسسوار ؟

حاجة ترى شيك واسميه زوقينى يا ماما

ها ....اظن دى شغلانة هايلة ومفيش ست ما بتحطش ميك أب
احسان: ما تزوقيني يا ماما ايه !!

هى ماما فاضية للمرقعة بتاعتكم دى خلى ماما فى الحلل وسلك المواعين

وبعدين المحلات ام 2 جنية ونص مالية البلد

ومخلتش الستات عايزة حاجة

كمان الميكاج دلوقتى بقى مضروب

تحطه الزبونة من هنا ويجيلها جرب وتجاعيد من هنا

وانتى مش ناقصة اللى تقولك جالى جرب

واللى تقولك رموشى اتحرقت

واللى تجيلها تينيا لا يا شيخة

ده كده اللى هتكسبيه هتعالجيهم بيه

وهتعملى اشتراك فى مستشفى التكميل والتجميل
شفقة: ايه يا احسان

بقى الروج والبودرة والماسكارا هيعملوا جرب وتينيا

وهو انا ببيع ميكياج ولا حساسية

خلاص خلاص بلاش مش عايزين هرش

طيب ايه رايك لو فتحت محل ملابس؟

اهو مفيهوش حاجة اهو

ولا هنحرق حاجة ولا هنجيب جرب لحد

كل ما هنالك شوية فساتين على كام بنطلون ساقط على شوية برمودا ولا اقولك شورتات علشان الموضة كده السنة دى والحكاية هتمشى

احسان : شورتات وبرمودات وبديهات

انتى كده ناوية تودينا اللومان او تحبيسينا اداب

لان الشباب هيفضلوا ملاطعين ادام الفترينة ليل نهار

ولو فتحتى بقك واتكلمتى هيلبسوكى قضية تهريب وجمارك

والذى منه وانا بصراحة مش فاضى اجيبك كل يوم من الاقسام
شفقة : طيب عندى اقتراح هيعجبك

بلاش نشترى ايه رايك لو نصنع احنا نفتح اتيلية شيك انا اقص

وانت ترفى ....وانا اخيط وانت تسرفل

وكمان نعدل حال البلد شوية ونغير لبس الستات المحزق والملزق

ونعمل حاجات محترمة

يشمك... اسدالات... خمارات ...جيبات فضفاضة

وبكده نبقى ارتقينا بالبلد

احسان: ارتقينا!

انتى بكده هتخربى البلد وهتبوظيها

ومالها البديهات والبنطلونات البرمودا

ده هى دى اللى معيشانه ومخليانة نشم نفسنا بعيد عنكم

لا ...ده افشل مشروع فكرتى فيه

قال محترم قال

يا شيخة

والرجالة تعيش ازاى بعد كده؟؟

ده اللبس ده هوا المتنفس الوحيد ليهم بره البيت

بعيد عن الغوريللات اللى متجوزينهم

والنعمة دول ييجوا يطربقوا الاتيلية على نفوخك

ابقى المك بقى كل يوم من المستشفيات ووشك كله غرز !!

شفقة : غرز.. لا لا خلاص بلاش

طيب هاقولك هافتح جاليرى اظن ده بقى حاجة فى منتهى الرقة والشياكة

شوية تحف على شوية براويز والشغل يبقى زى الرز

ومش هنبيع لاى حد للناس الشوياكة بس

اللى بتقدر النوع ده من الفن

احسان: ههههه تحف ؟؟ مش كفاية انتى ؟؟

الحقنا يا زاهى يا حواس

الست هانم اتجننت وعايزة تهرب اثار

والنبي لتخلينا كده احسن ... مترممين ومنكوسين

بدل ما هيدوها علينا وتقع على دماغنا

شفقة: يوووووووووووووووه طيب يبقى مفيش ادامى الا انى افتح محل كشرى

وساندوتشات كبدة واقدم معاهم وجبات

اطبخهم فى البيت وانت تجيب علب وتعبي

ولو الحكاية مشيت معانا نفتح المحل والموضوع يكبر ويكبر

واسميه كشرى الشفقة والاحسان كل واشبع يا جعان
احسان: انتى هتطبخى وانا اعبىء

وكمان شفقة واحسان

كل واشبع يا جعان

يبقى ان شاء الله مش هتبيعيه انتى هتفرقية ببلاش

ذكاة وصدقة على روحنا

والنبى يا شيخة لتشوفى اى مشروع تانى غير الاكل

لانك لو طبختيه يبقى هتلاقى كل يوم حالات تسمم وغسيل معدة

هو انت مش مكفيكى معدتى واللي جرالها ؟؟

عايزة تسمى مصر كلها
شفقة: كده برضو يا سونة ماشى.

طيب افتح نت كافية

واجيب شوية اجهزة مستعملة من سوق العصر

وكام شاشة على كام كيسة

الحكاية تمشى واخلى الساعة ب 5 جنية

شوف انت بقى فى اربعة وعشرين ساعة يبقى كام

احسان : كده مش هيبقى العصر قولى العشاء ..الفجر

بقى عايزة تفتحى اربعة وعشرين ساعة

يا بوليس الاداب تعالى الحقنى

انتى عايزانا نتمسك يا ست انتى

كده انتى هتلمى علينا العيال الصيع اللى مورهمش حاجة

ويقعدوا يدخلوا على المواقع اياها المخللة بالاداب

وهتحدقيها علينا وتفضحينا يا شفقة

اللى بعده ....غيره

شفقة:خلاص.... بس ....هى دى

وجدتها

ايه رايك احنا عندنا قطط وكلاب

وبصراحة انا مش عارفة اخلص منهم ازاى

نلم كل القطط والكلاب اللى فى السوق

ونجوزهم

القطط والكلاب تخلف

يكبروا نجوزهم ويكبروا يخلفوا نبيعهم وهكذا

احسان : انتى عاوزة تخضينى يا شفقة

شوية شوية تربيلى خنازير فى البيت

قال كلاب قال

انتى عايزة تربيلنا الرعب وتخلى رجلينا تخبط فى بعض

والجيران تهج من البيت ويعملولنا محاضر ازعاج وهوهوا

انتى هتعملى زى سمير غانم فى فيلم يارب ولد

احنا نجيب الكتاكيت من السوق

ونلم الفراخ البدارى ونربيهم يكبروا

نجوزهم .....يبيضواويفقسوا ...والبيض يفقس يطلع كتاكيت

تكبر تبقى فراخ

ايه يا شفقة احنا هنفتح زريبة يا امى
كده مش هيبقى مشروع
هيبقى زريبة وجنينة حيوانات
وبكده انا هلبس جلابية واشتغل معاكى بياع اقفاصشفقة: يوووووووووووووووووووووووووه انا خلاص زهقت
وعقلى طار
شليت تفكيرى امال هشتغل ايه دادة ؟؟
احسان: سيبينى انا بقى ااقولك على المشروع اللى يليق بمقامك يا حياتى
حاجة ايه ابهة هتريحك وتجيبلك فلوس وانتى قاعدة مرتاحة
وحاطة رجل على قفا السواق
قصدى رجل على رجل
وكمان هيريحنى انا كمان منك طول اليوم
وابقى ضربت عصفورين بحجر
شفقة : وساكت من الصبح ما تنطق يا راجل مشروع ايه؟؟
واهم حاجة هيخلينى هوب هوب هوب فوق
احسان :هى دى الحاجة الوحيدة اللى مضمنهاش
الا لو ركبولا اجنحة وعملوا منه نسخة معدلة تروح المريخ
وشغلوه مركبة فضائية
شفقة: وساكت انطق يا سونة اواااااام
احسان: تــــوك تـــــوك هشتريلك توكتـــــــوك واكتبه باسمك وهتبقى من الملاك
سيدة تاكتيك اد الدنيا
وبراحتك
تشغليه وردية اتنين
زى ما انتى عايزة
بس وردتين يبقى فلوسه اكتر
وارتاح انا كمان وقت اكبر
وكمان هتمارسى هوايتك يا ستى... شفتى انا بعزك ازاى
ضرب وشد شعر السواق وخناق وصويت معاه للصبح
وهو ولا كانه هنا ولا هيفتح بقه انا هوصيه
شفقة:توكــــــــتوك انت بتتكلم بجد؟؟
وده مشروع يكسب كويس
احسان: هو هيكسب بعقل
ده الفلوس الفضة هتجرى فى ايدك زى الرز وهتدعيلى
شفقة:فلوس فضة !
وشوية شوية تبقى جنيهات دهب
خلاص اتفقنا بكرة نشترى التوكتوك
احسان : المهم تورينى شطارتك .....بس بشرط ؟
شفقة : شرط ايه يا حياتى؟؟
احسان:هجيبلك السواق يعلمك
وشوية شوية تتعلمى و تسوقى انتى التوك توك
علشان المكسب يبقى حلال عليكى لوحدك
والاهم ان الوردية تبقى من 7 الصبح ل 7 تانى يوم
وبكده ارتاح منك ومن قرفك وحلال عليكى المكسب وحلال عليا البيت فاضى
اظن كده عدانى العيب وقزح
شفقة: هو قزح بس ده قزح وتكتك
والله وهتلعب معانا البلية يا سونسون وهنغنغك
طيب وسع بقى للسريع

شفقة