أحســــــــان أفندى فى المصيـــــــف

الجو حر الجو نار والصيف مولع الواحد مبقاش يستحمل

شفقة: سونسون الجو نار الدنيا هتولع

احسان:نار هتولع

انتى عندك طفاية حريق

طفى بيها وسيبينى اتفرج على الماتش يا مؤذيه

شفقة:ماتش ايه يا عم انت ؟؟

وطفاية حريق ايه بقولك الجو حر

مش العربية بتولع

احسان: طيب يا شفقة ما تقعدى فى التلاجة

ولاافتحى التكييف تتكيفى

ولا انا اجيب تكييفات وادفع دم قلبى وانتى تقولى الدنيا حر

او ادخلى الحارة اللى جاية على ايدك الشمال هتلاقى

طشتك وبانيوهك وميتك

اقعدى فى الطشت هتلاقى طراوة

شفقة: انا اقصد ان الصيف جاى السنة دى غير كل سنة

احسان:غير كل سنة ازاى يعنى؟؟

مش لابس بربطوص ولا

مركب زلومة

شفقة: ياه على تقل دمك وهزارك يا سونة

انا عايزة اطلع اصيف اروح اتفسح

احسان: تصيفى فين بقى ان شاء الله ما الهواء هنا

فى البلكونة يشرح القلب

ولا انتى غاوية شحططة ومرمطة؟؟

شفقة: بلكونة ايه وبانيو ايه؟؟

انا عايزة اروح بورتو مارينا او بورتو السخنة

او ممكن لندن..... باغى

يعنى حاجة كده تليق بمقامقى

احسان: مقامك؟؟ لا اذا كان على المقام فعندك الحسين

او السيدة

قال بورتو...... قال ....ولندن

يا خالتى ومالها بلطيم وافغانستان وحشين؟؟

تروحى هناك تتجندى وترجعيلى تايبة

والنبى يا شيخة ابعدى عنى وشوفيلك حتة تتهوى فيها

شفقة:والنبى يا سونة نفسى

اصيف وابلبط فى البحر

تعالى نروح بورتو مش هتندم البت سفاقس بنت خالتى راحت

بورتو وبتقولى جنان تهوس

احسان:بذمتك فى حد يبقى اسم بنت خالته

سفاقس!

ويروح بورتو؟؟ ده كبيرها الملاحات

عموما اذا كانت تجنن يبقى مفيش مانع

اهو نرجع من هناك بفايدة

وندخلك سرايا المجانين

وارتاح من الزن واللت والعجن

شفقة: اه بس فى حاجة كمان صغننة رفيعة عريضة

احسان: ها يا واجعة معدتى ادينى تقلصات ادينى

شفقة:عايزة اجيب مايوه بيقولوا هناك المايوه هو الزى الرسمى

يرضيك ابقى عره وسط اهل بورتو؟؟

احسان: نعم ياختى....... مايوه وزى رسمى

طيب ومالها البدلة والبابيون دول عليكى يليقوا اوى

مع شنب كمان تبقى زى الفل وسيبك من مارينا وروحى اقعدى على القهوة

شفقة:يوووووووووووووووه .....بطل بقى

احسان:بقولك ايه نسافر اه...... مايوه..... لالالالالا

انا بس اللى البس مايوه

ستات دماغها مليانة كلام فاضى

بطلى تتفرجى على كليبات بوسى سمير

شفقة: وفيها ايه يا سونة انا اقصد مايوه شرعى

احسان:اه..... اذا كان كده ماشى

اصلى كنت بحسبه عرفى

وسافرنا صبرتوا ونولتوا المدينة الغناء بورتو مارينا

واحنا قاعدين على البلاج

شفقة: احسان بتبص على ايه شايفة عينك رايحة وجاية

لما جتلها ميه بيضاء

طيب حتى وقفها فى الاشارات

احسان يا شيخة طيب زمرى قبل ما تتكلمى

خضتينى انا ببص على الايس كريم بالشيكولاته

شفقة: بييييييييييييييييييييييييييييييييييييييييب ادينى زمرت اهو

بقى بتبص على الايس كريم ولا الايس كريمـــــــــــــــة؟؟

احسان: كريمة مين وبتاع مين يا شيخة

انا بس بتأمل بشوف ايه الجديد

"فى سره"والنعمة البت سفاقس بنت خالتك دى تستاهل هدية

اول مرة تدلنا على حاجة عدلة

تلاقى جوزها ابن المحظوظة هو اللى عرفها المكان

شفقة :حاجة عدلة اللى هى ايه ؟؟

المايصين المدلعين اللى رايحين جايين على البلاج يتاصعوا

بالمايوهات الفسفورى ولا ليهم ظابط ....ولا رابط

احسان: جرى ايه يا ست انتى

هو انتى من الحكومة ولا ايه؟؟

بقى ما صدقنا خلصنا منهم تطلعلنا انتى يا ساتر عليكى

ست من الحزب الوطنى المقرفاتى النابراتى

مين جاب سيرة الظباط والعساكر دلوقتى؟؟

انتى هتخليها امن دوله ولا ايه

خلينى امتع نظرى شوية بالحاجات الحلوة

قبل ما يروح عليا وامسك عكاز

وقعد يغنى انا بعشق البحر وبعشق موززه كمان

وحاسس انى تايه وحيران

ومبسوط ومش نعسان

وحاسس انى ندمان... وكنت كمان غلطان لما اتجوزت زمان

من شفقة اللى شبه ابو قردان

ويا عينى يا عينى يا سيدى على النسوان

شفقة: نعم بتقول ايه يا سى احسان

حاجات ايه اللى حلوة؟؟

احسان: ها... مابقولش انا اقصد الحاجات الحلوة الكتير اللى قاعدة مرزوعة جنب قفايا

انتى يا بسبوسة قلبى ......يا قطايف عقلى

شفقة: طيب حاسب يا سى رمضان لتلزقنى

بياميشك..... ااقصد بكلامك

احسان:بس تصدقى يا شفشوقتى كان عندك حق

لما قلتى نيجى بورتو

اهو تغيير برضوا بدل المناظر بنت الكئيبة اللى بتعمينا هناك

وبنصتبح بيها كل يوم فى مصر

والنعمة الواحد يطلب نقله فى الشغل هنا

تفتكرى يوافقوا يا روحى ويقدروا ظروفى

شفقة: وان شاء الله هتشتغل ايه ...... مبصبصاتى .... ولا معكساتى

ولا هتشيلهم الشنط؟؟؟

احسان:وانا اطول بس قولى يارب

احم احم يا ستى ده انا سبعة صنايع والبخت ضايع جنبك

ده انا علشانهم وعلشان مايوهاتهم

اشتغل روم سيرفيس

ارص شماسى وكراسى على البلاج

اشتغل دليفرى بيتزا

اى حاجة تخلينى لازق فى المزز اللى ترد النظر دى

شفقة: مزز وترد النظر هو انا مش مالية عينك ولا ايه؟؟

احسان:ماليه؟؟؟ ده انتى تملى تلاجة بحالها

مش عينى بس

يابــــــــــــاى الواحد مش عارف يتنفس

ارحمينى بقى وسيبينى اتمتع شوية

واشم ريحة نضيفة بدل ريحة المحشى وبابا غنوج وام اربعة وتمانين

شفقة: تتمتع شوية..... وبابا غنوج

شكلك جوعت يا سونة وشكلى هاكلك طرب

بس من اللى هو

عارفه؟؟ الطرب بالبونيه والبوكس والروسيات

احسان: روسيات ما تخليها طاليانات احسن والطف

يا روحى عليهم امــــــــــــوه

عاملين زى السمك بيلعلطوا فى الميه

اه يا اوحــــــى...... يا اوحــــــــى

شفقة: جتك وجع اوحــــــــــــــك يا حياتى

وفات يوم والتانى وسونة مش مركز معايا قاعد لازق على البلاج

ولا اللى قاعد جوه كرتونة مش عارف يخرج منها

عينه بتشرق وتغرب وراء المزز لحد ما فرسنى ولا كانى هنا

قعدت افكر واقول جبتيه لنفسك يا بت يا شفشق

استنى عليا يا مقصوفة الرقبة يا سفاقس لما ارجعلك

انا توقعينى الوقعة دى

وكان مالها بلطيم ولا القنطرة وحشين ولا وحشين؟؟

ده كان هناك الهواء مفيهوش نسمةبس على الاقل بيقعد زى الألف

ويشوفنى هناك ولا مارلين مونورو

اعمل ايه قعدت اقول اصيف اصيف لما الراجل هيروح منى

وهتنشله بت بلطية ولا طاليانيه ولا روسيه

لابقى ما بدهاش لازم امخمخ وامشى من مارينا بلا رجعة

ومالها كوم الدكة

اهى حلوة والمزز هناك بالجلاليب ام سفره وحفى وبالعمه

وحاجة تشرح القلب وزى الفل

هناك يا دوبك يلحق

يرجع

مش يبص

واحس هناك انى ملكة جمال انطاكيا

لكن بـــــــــــــــــــــورتو

خلت البنات هناك تبورتو ....وتعنسوا..... وتشيخوا كمان

وبقيت كل يوم اروح افصل الكهرباء من العمومى

لما خلتها عتمة وضلمة

لحد ما سونة ما بقاش عارف يفرق بين الشورت والجلابية

ولا البانيو من البحر

شفقة :سونة بقولك ايه يا حبيبى فى الظلام الدامس ده

احنا شكلنا مش هينفعلنا قعاد هنا

لا شايفين حاجة ولا عارفين حاجة

الدنيا كحل واحنا جايين نصيف ولا نتعمى؟؟

يلا بينا نرجع

احسان:شامم ريحتك فى الموضوع ده يا شفقة

اخ يانى اخ ....... يا فرحة ما تمت اصل هو كده فى ناس فقرين

عارفاهم يا حبيبتى؟؟

شفقة: ولا تزعل نفسك يا نور عينى انا حجزتلك اسبوع فى جمصة

وحضرتلك برجرام انما ايه يهوس

وهتنبسط اوى

احسان:برجرام فى جمصة وعمالة تقولى لندن وباغى

قدامى..... قدامى ياختى

شفقة: يا خويا بلا بورتو بلا فورتو

وقال على رأى المثل من خرج من داره يتقل مقداره

شفقـــــــــــــــــــــــــــــة

النســــــاء قـــــــــادمون...والازواج راحــــــــلون

اولا وحشتونى اوى اوى اوى بعد فترة غياب طويلة ان شاء الله مش هتتكرر تانى

وثانيا مبروك لينا كلنا على ثورة 25 يناير

وخاصة لشباب الثورة اللى عرفونا

يعنى ايه معنى الحرية

ثالثا بقى احسان بيه جوزى اللى كان من المناضلين

والمرابطين فى ميدان التحرير

بصراحة الراجل من شباب الثورة بس مش اللى كانت بتنادى باسقاط

النظام

لا كان مع اللى بينادوا...... باسقاط وخلع المودام

وحل المجلس النسائى الرقيق التيف .....اللى من غيره ما نعرفش نعيش

وقال ايه الاقى الراجل داخل عليا من كام يوم شعره منعكش

وهدومه متبهدلة بس رايق وفايق وماسك فى ايده يافطة مكتوب فيها

" التغير التغير ولابد من الاستقلال والرحيل"

شفقة: يا لهوى ايه ده يا احسان؟؟

وهو لسه فيه مظاهرات؟؟ وبعدين خير يا حبيبى

هو انت كنت نايم الفترة اللى فاتت دى ولا ايه؟؟

ما خلاص الرئيس مشى ورحل بلا عودة

احسان:ما انا عارف ان الرئيس خلع ..

لكن انا كنت ماشى فى مظاهرة تانية من نوع خاص

بتطالب بتغير مهم وجذرى فى المجتمع

شفقة:جذرى ايه يا حبيبى... انتم بتطالبوا بخلع النخل ولا ايه؟؟

احسان:لا احنا بنطالب بتغير الغيط كله علشان الارض قربت تبور

شفقة:انت بقت مهندس زراعى ولا ايه يا روحى ايه الكلام الجرار ده

احسان:"فى سره"جرار اما يدهسك ويخلصنا بقى... بقولك تغير مهم وجذرى

هيغير حياة كل راجل ويخليه فى حياة افضل

شفقة:شكلكم كده بتعملوا اعلانات لمدينة الرحاب

احسان:لا وانتى الصادقة احنا بنطالب بتغير رحاب نفسها

بنطالب بتغير المدام

وكان شعار المظاهرة "لا لامنا الغولة" " ولا لحكم قراقوش"

" ولالآم اربعة واربعين اللى كابسة على انفاسنا بقالها سنين "

شفقة:بقى كده يا راجل يا عميل.... يا ناكر للجميل

تمشى فى مظاهرة حمقاء بلهاء... بتطالب بتغير النساء

طيب دول قلة شوريرة مندسة مالك انت ومالها؟؟

احسان:ما انا عضو فى القلة القليلة دول وضحك

شفقة: يخونك اليخنى اللى بعمله.... ولا الجلاش الابلاكاش.... ولا التورلى المهطورلى

اخس عليك يا سونسون ما كانش العشم

طيب الرجالة الوحشة دى ايه مطالبها؟؟

احسان:بصوت خشن" ان الست لو خايفة على بيتها وعايزة تلحق نفسها

قبل ما تتشرد وتتسول فى الشوارع

لازم ترضى بشروطنا واهمها

1-الغاء حظر قانون الطوارئ المنزلى وانها تسيب جوزها يخرج ويدخل على

كيفه

من غير ما تسال رايح.... فين ولا جاى منين

وما جرجتش عندنا ليه...... زى نادية مصطفى

وتسيبه يبرطع براحته وماتكتمش انفاسه

2- تبطل تأمم كل فلوسه وتسيبله مرتبه كله يشبرق بيه نفسه ويهيص

لحد ما يتهطل من الفرحة

وتدور هى على شغل تصرف منه على نفسها وعليه ان أمكن

3- رفع الرقابة من على لاب توبه والكام بتاعته

وتليفونه المحمول وتبطل تفتش فى المسجات بتاعته

وتقلب فى اسماء المزز

4- تديله حريه التصرف الكامل فى كل كبيرة وصغيرة فى البيت

يعنى يقعدها يطردها يبيتها على السلم كنوع من التغير هو حر

يجيب فول يجيب قلقاس تقول حاضر.. يجيب طوب تاكل وتموت وهى ساكتة

5- تسمع كلامه من غير ولا نفس ومفيش هروح عند ماما ولا بابا

لآنهم سبب البلاوى والعكننة وكمان اكتشفنا انهم عملاء

وبيعملوا دسيسة ومؤامرات ضد الزوج

ودايما بيلجأوا للاجندات الخارجية والكراريس كمان

6- مفيش لا ميمى ولا ستونة ولا الدادة الرفيقة أم عطيات صاحباتى ممنوع منعا باتا

دخولهم البيت لاننا اكتشفنا انهم من المحرضين ضد الازواج

7- الخروج هيبقى مرة واحد فى السنة وتكون لجنينة الحيوانات علشان العظة والعبرة

وتفتكر هى كانت ايه فى يوم من الايام

او يكون الخروج للقبور كعظة لاخرتها

والجوز اللى هو احنا 6 مرات خروج فى اليوم يشم نفسه

ويشم ريحة تانية غير البصل والتوم والجنزبيل

7- القبول بزوجة اخرى وان لزم الامر وكان عينه زايغة وصايع القبول بتلاتة

زى ما حكم الشرع احنا ناس بتوع ربنا امال ايه مش مسخرة يعنى

عمل دستور جديد والانتخاب يبقى ليكم مرة واحدة... وحذارى من اللى هيقول لا

الانتخاب هيبقى كل اربع شهور مش سنين

ده حتى اربعة كتير اوى تكون النفس جزعت منكم بس يلا نستحمل ونعصر كيلو ليمون

واللى مش عاجبها تلم بؤجتها

وترحل على بيت الاعداء بيت اهلها

انتهى البيان والله الموفق المستعان

شفقة:بحسرة"لولولىىىىىىىى" وقال يا قاعدين يكفيكوا شر الفاسدين

"بينى وبينكم" انا كنت هنقض عليه اعضه

بس بسرعة لميت نفسى وافتكرت اننا كده ممكن نبقى فى الشارع

ومانلاقيش الا ميدان التحرير

بس بصراحة انا اشفقت على الميدان هيساع مين ولا مين

وقلت ادينا قاعدين وضل راجل ولا ضل حيطة

كمان علشان الشحاتة ما تزيدش وتنتشر رحت رديت عليه بلطافة

طيب مفيش اى تفاوض يا سونسون.... او حتى قاعدة عرفيه نوصل فيها لحلول وسطيه

احسان:مفيش واضربوا دماغكم فى الحيط

شفقة:بقى كده يا سونة اوكيه

افتكر انكم انتم اللى بداتوا المعركة

ويا انا يا انتم يا معشر الرجال

تانى يوم عملت اجتماع نسائى على مستوى قاعدة الحارة

ولميت كل ستات المنطقة والمناطق المجاورة

واتفقنا اننا هنشن الحرب على الرجالة

وهنعمل مظاهرات نشجب ونندد فيها بعنف الرجال

واستبدادهم وديكتاتوريتهم ضد المرأة

وكان رمز المظاهرة الحلة والمغرفة

و شعار مظاهرتنا "لا لاستبداد سى السيد عبد الجواد"

ولا لشهريار اللى بيتجوز فى طلعة كل نهار"

ونزلنا الشارع وقعدنا نهتف" قاعدين قاعدين ....قاعدين ومش ماشين

"على قلبكم على قلبكم ...جالكم اللى هيذلكم"

وهنقعد قاعدة الحزانة.... احسن من رجالة الندامة"

"الستات الستات يا هنخلى عيشتكو هباب"

وقعدنا نهتف لحد ما صوتنا راح ونلف شوارع

يمين وشوارع شمال لحد ما سيطرنا على الموقف

ايوا موقف العباسية وابو زعبل وابو النمرس وبكده مسكنا زمام وسط البلد

بعدها الستات شالونى على كتافهم وقعدوا يهتفولى ويحيونى

وبعدها قرروا يرشحونى

لرئاسة مجلسهم وخوض المعركة وبعد كام يوم من المظاهرات

جاءت نتيجة الشراشيح قصدى الترشيح

نجاح ساحق وموافقة والجميع موافقون

احسان: ايه اليفط اللى مالية الشارع دى؟؟

هو فى حد رشح نفسه فى المنطقة ولا ايه؟؟

بس اظاهر انه جامد اوى شكله جالكم اللى هيلمكن

شفقة: امال يا حبيبى بس هو مش هيلمكن لا هيلمكم....تفرق

وكمان رمز الحلة طقم حلل بحاله والمونيوم كمان مش تيفال

حاجة صلبة ومتينة

احسان: ويا ترى هو مين؟؟

شفقة:قصدك هى مين؟؟

احسان:هى؟؟ نعم هى ست؟؟

شفقة:ومش اى ست دى ست الستات يا مصرية

شفقة مراتك حبيبتك.... ديا يا عينيا

مش تباركلى مش انا رشحت نفسى للحزب وكسبت وبفوز ساحق

احسان: ساحق انتى مسحوق معلش...حزب ايه يا وليه

ده على حزب وداد جلبى يا بوى

شفقة: بتهزر ساعتك

لا يا حياتى انا بقيت عضوة فى مجلس الشعب وليا كرسى

احسان:يا نهار منيل بنيلة مية كرسى على نفوخك وطرابيزة كمان

بقى اطالب بتغيرك من البيت تقومى ترشحى نفسك وتبلى المنطقة كلها

والعدوة تنتشــــــــــــــــر وتتســـــــرب وتتـــــــــوغل

شفقة: لا ومش كده وبس

ده انا هرشــــــــح نفسى كمان لكرسى الريــــــــــاسة

واللى هيفتح بقه بكلمة

هخلى الستات تعتقله واللى مش عاجبه

ياخد اول طيارة على شرم الشيخ

وقال عايز اطرد مرأتى بــــــــــــره.... جابت هى الكرسى وبقت ضـــــــــــــــــــرة

وعجبــــــــــــــــــــــــــــــــــــى

شفقـــــــــــــــــــــة