الخميس، 15 مايو 2008

شـــفقــــــــــــة هـــــــــــــــــانم ..... مــــــــــــــــراتي


مع اننا كنا متفقين ان كل واحد مننا هيعرفكم بنفسه على حده
بس لأ ... أنا شايف اني أعرفكم بيها ... وهي تبقى تعرفكم بيا
بيتهيألي ان كده أحسن ... لأن ماحدش بيعرف يتكلم عن نفسه كويس
عموما ألحق الفرصة وهي نايمة دلوقتي وأعرفكم بيها علشان أكتب براحتي


المدعوة "شفقة" من مواليد القاهرة سنة 1977
كبرت وترعرعت في كنف والديها على مدى ربع قرن
بعدما أتمت ال25 سنة تحولت لكنفي أنا
ومش عارف ليه كلمة "كنفي" دي مقبضة ... وبتفكرني بكلمة "كفني"
باين على شفقة انها هتعمر لحد ما تلفني بايديها فيه
ربنا يستر
لها من الأخوات ثلاث بنات
اتنين منهم لسة ما اتجوزوش ... وبندورلهم على عريس
وواحدة متجوزة ... وبرضو بندورلها على عريس
عادي جدا
نسيت أقولكم ان شفقة تبقى أكبر أخواتها
يعني هي البكرية
وطبعا انتم فاهمين البكري بيفضل طول عمره يعامل معاملة الأطفال
عموما مش هاطول في النقطة دي علشان على راسي بطحة أنا كمان

ندخل بقى في الصفات الشخصية

ياااااااااااااااااااااااااه

أخيرا جاتلي الفرصة اني أعبر وأقول رأيي فيكي بصراحة يا شفقة

ده أنا هاقووووووول قوااااااااالة

بصوا بقى ... شفقة دي زي العسل و السكر ... وكمان شهد مكرر

مشوها كده دلوقتي وبعدين هابقى أقولكم رأيي بصراحة

لأ بجد بجد بجد

أنا باعتبر نفسي محظوظ في الجواز منها
أكتر حاجة بتضايق أي راجل ان مراته تخنقه ... وتكبت حريته
أنا ولله الحمد مش حاسس بالأعراض الطبيعية للجواز وكاني ما اتجوزتش
وأعتقد ان ده ذكاء منها
هي عارفاني ما باحبش القيود وعنيد جدا
ولو واجهت التيار أكيد هيغلبها ويغرقها
فاختارت انها تعوم مع التيار
دي أكتر حاجة عاجباني فيها
لأن الصفة دي نادرا جدا ما نلاقيها في الست العربية عموما
ده بالاضافة لاهتمامها بنفسها كأي أنثى قبل الجواز
واللي طبعا عادة بعد الجواز ما بتبقاش انثى من اصله

بجد الكلام كتير وخايف استرسل أكتر من كده
كفايه عليكم كده النهارده
وأظن انكم مع الوقت هتعرفونا أكتر وأكتر


وتقبلوا تحياتي
سي إحســــــان

هناك 4 تعليقات:

التائب يقول...

بجد ربنا يخليكو لبعض على طول
والاسلوب الجميل بتعكم دة هيقربكم من الناس بسرعه وربنا معاكم وبالتوفيق

مطرح ما ترسى....دقلها يقول...

على فكرة يا احسان

انت اسلوبك احسن من شفقة فى الكتابة

وانا متحيزلك عشان انت الجانب الذكرى فى الموضوع كمان


مستنى البوست الجاى بتاعك

هوة فى أيه؟؟soso يقول...

يا أحسان بجد أنت راجل محترم ويكفى أننا حسينا من كلامك أنك بتحب شفقه جدا جدا جدا
أنا يا شفقه متأكده
أه والله
وبرافو عليكى أنك مش خنقاه لان ديه فعلا أكتر حاجه بتطفش الرجاله
رغم أنهم طفشانين خلقه

بس بجد بجد بقى
ربنا يخليكوا لبعض ياااااااااااااااااااااااارب
ويسعد أيامكم
ويهديكم ويصلح حالكم
وييسر أمركم ويشرح صدركم ياااااااارب

Rannon يقول...

انتوا مش خايفين من الحسد :))
ما شاء الله عليكم بجد

عندي شوية ملحوظات:: هو فعلا دايما الكبيرة بتعامل معاملة الاطفال؟؟


وفعلاً ذكاء منها انها حاربت مع التيار
وزي ما انت محظوظ بيها واضح ان هي كمان محظوظة بيك :)

ما شاء الله عليكم

تحياتي :)