الاثنين، 19 مايو 2008

حتى لا "يطفش" نصك الحــــــــــلو


اعزائى القراء وعزيزاتى القارئات وخاصة عزيزاتى القارئات......انا هتكلم معاكم فى موضوع مهم للغاية وهو ازاى ممكن الواحدة منا تخلى بعلها يحب البيت ويحلف ما هو خارج منه ابدا حتى للشغل..ويفضل قاعد لازق ومتنح واذا كنتى من محبى ان جوزك يلزق مافيش مشكلة بس نصيحة تعملى بيها فى الشتاء بس بلاش الصيف علشان الحر والعرق يعنى من الاخر دى حبة نصايح للى تحب جوزها يعمل بيات شتوى.


لازم تسمى وتاخدى عهد على نفسك انه طول ما هو مرزوع فى البيت


***عليكى باتباع الاتــــــــــــى***


اولا...ما فيش غسيل ولا نضافة خاالص انسى الغسالة خالص وحجة انه مابينمش الا على صوتها دى بلاش...يعنى الغسيل مش مهم ولو كنتى مزنوقة اوى ممكن تبعتى الهدوم عند الدراى كلين وهما يتصرفوا المهم انك تاخديه هو فومين جوزك طبعا ومتنسيش تحطى عليه مسحوق علشان يفتح نفسك للقعاد معاه اذا كنتى من النوعية اللى بتقرف... اما مرحل الشطف فبلاش تستخدميها دلوقت لانك كده كده هتحتاجيلها فى الايام اللى هتكونى عايزة تطفشيه فيها.


ثانيا... متعمليش اى حاجة فى البيت ولا تدربيكى الدنيا فوق دماغه وتقعدى تدى بالمنفضه على نفوخه ولا تمسحى ولا حاجة خالص يعنى لازم توفريله الجو الهادى النضيف ويعنى محبكش تنضفى وهو قاعد وشيل رجلك من هنا واوع الكرسى ده لا بلاش. استنى لما يبقى يغور من البيت وشقلبى الدنيا على بعضها ولو اتزنقتى اوى اطلبى منه يجيب شغالة تساعدك فى البيت وتريحك واكيد اكيد ساعتها هو هيخرج من البيت ومش هتشوفى وشه تانى وابقى قابلينى.


ثالثا...دايما قلبك يكون عليه وعلى فلوسه يعنى متستنيش يدخل البيت وتقعدى تقولى التليفزيون باظ والدش بيهرتل والكمبيوتر خرف واهم حاجة تبطلى كلمة هات لحسن دى الكلمة الوحيده اللى الراجالة بتحتقرها وتكرهه كره العمى ممكن تستبدليها بكلمة"خد" يعنى مثلا ....خد الفاتورة دى ادفعها خد ده صلحه بس بشويش وحنية وهو قاعدة قعدة صفاء علشان ما يعدش هو يشتم ويلعن اليوم اللى فتح فيه البيت ده وشاف وشك وما ينوبكيش فى الاخر الا انه هو اللى يديكى اللى فيه القسمة والنصيب "من ضرب وتلكيم" وتبقى انتى اللى خدتيه مش هو !


رابعا... عليكى بتسكيت العيال ومتخليهومش يطلعوا نفس فى البيت طول ما الراجل موجود وياريت لو تديهم منوم طول اليوم علشان ترتاحى منهم خالص وتبطلى كل شوية بس يا بت... اخرس يا واد وشباشب تطير وكلام من ده....ولو اتزنقتى وحسيتى انك على الاخر منهم وصوتك هيطلع ابقى اديهم بالى فى رجلك بس براحة علشان هو ما يسمعش العياط والقرف ده وان منفعش معاهم حاجة لا منوم ولا شبشب انصحك ما تخلفيش خااااااالص او تاخدى انتى المنوم وتريحى نفسك وتسيبهومله هو يربيهم!


خامسا...النقطة المهمة انك لازم تحسسيه بانك بتشاركيه ومتفاهمة معاه يعنى لما يجى يتكلم معاكى فى حاجة وانتى كالعادة مش فاهمها حاولى تهزى له راسك وتضحكى ضحكة خفيفة قال يعنى البت خريجة الجامعة الامريكيه وبتفهم اوى وان كنتى من صاحبات الدماغ الغبية اسكتى خالص واسمعى وبس واديله احساس باهتمامك وبعدين ابقى برطمى على راحتك وابقى اسالى فى اللى متعرفهوش.


سادسا ...النقطة اللى فى الستات كلهم وهى الغيرة....بصى بقى لازم تحاولى متفهمهوش غلط خالص يعنى لو لقيته مركز اوى ومبحلق وعينيه هتخرج ادام التليفزيون ومشغل فيديو كليب ...عادى اعتبريه بيتفرج على برنامج ثقافى وحاولى تشوفى ايه اللى لافت نظره فى الميعة المايصة اللى بتتاصع ادامه يا ترى ايه اللى عاجبه فستانها... مكياجها وقولى الله الفستان ده حلو لا جسمها خطير ايه رايك انا عايزة اشترى فستان زى ده واطلبى يجبلك زيهم واوعدك انه مش هيتفرج تانى ده ان ما باعش التليفزيون والدش اصلا!


الكمبيوتر لو لقيته بيقعد على النت كتير عادى متظلمهوش اكيد الراجل بيعمل شات مع واحدة او بيدخل المواقع اياها بس ابدا اوعى تتنرفذى ولا تضايقى ولا تديله بحلة المحشى بس حاولى تاخدى كورسات كمبيوتر وانتى تعرفى بيعمل ايه ده ان شاء الله لو متعلمتيش انتى تعملى زيه وسيبتيه وسيبتى البيت يضرب يقلب وقعدتى تشيتى زيه.


سابعا...حاولى دايما تكونى واثقة فى نفسك وبطلى كل شوية تبصى فى المرايه مش مهم وحشة وحشه ما هو اتنيل واتجوزك المهم انك تبطلى نعكشه و الجاز اللى بتحطيه فى شعرك ...وحاولى تاخدى شاور كده علشان الراجل ما يفطصش منك وياريت ياريت ان امكن لو تستخدمى اسبراى كده ريحته حلوة حتى لو غالى مش مهم ما هو كله على قفاه المهم ريحتك انتى.


بالاضافة لحبة احمر واخضر مش لازم الراجل يتخض كل يوم ويصتبح بالخلقة دى انا عارفة الستات لما بتصحى من النوم شكلها بيبقى عامل ازاى! ويا سلام بقى لو كانت من هواه لف شعرها طاقية وربط الايشارب على جنب تبقى فى الجون اول ما هيشوفك كده اكيد اكيد هيعمل زى فيلم"خرج ولم يعد".


ثامنا...الرقة يا ستات ما اوصكيوش بحبتين الدلع والمياصه والصوت اللى على طرطيف صوابعك وبلاش تبقى بيئه وتخرجى الفاظ زفت ودبش ياريت تستعملى كلمات مدلعة كده وبلاش حاضر يا خويا ...وابعد عن وشى الساعة دى.. لحسن ساعتها ما تعرفيش الوقت طول عمرك..وبلاش كل شوية تقول له قولى كلام حلو يعنى يا ختى هيقولك شيكولاته!! ساعتها هيفتح نفوخ سعادتك المبجل...... كمان خلى بالك ان حصل وحسيتى ان صوتك بدا يعلى وما قدرتيش تمسكى نفسك ابقى احبسى نفسك فى اوضه وصوتى وعضى فى الارض براحتك زى اللى عندهم هيستريا مش مهم انتى تتجننى المهم صوتك ايش ايش ميسمعوش.


يارب يارب اكون قدرت اديكم فعلا نصايح وياريت تعملوا بيها وتقولولى على النتيجة...... اللهم بلغت واللى تيجى تشتكى بعد كده وتقول نام عند امه! نام فى البلكونة هى حرة!

ولا اقولكم خلاص متزعلوش اكيد العيب مش فيها......... العيب فى البلكونة!!


امضاء شفقة هانم

هناك 19 تعليقًا:

سنووايت يقول...

بجد نصايح جميلة ويااااااااارب كل القارئات يعملوها
مدونة دمها خفيف وجديدة
تقبلوا مروري

HERO يقول...

ياسلاااااام ليكي عليا ان شاء الله لما النصيب يجيلي كمان 10 سنين كده ولا حاجة هجيب خطيبتي تقرا النصايح دي وتحفظها زي اسمها وبرضه هسبلها البيت وهمشي ههههههه

تحياتي

رئـــــيسـة حزب الأحلام يقول...

هههههههههههههههههههه
ايه النصايح الجامدة دى انتى بجد هتقفلى بيوت كتير
بارك الله فيك
وتحياتى

Unknown يقول...

يا ست شفيقة

ياااااااااااااااااااا ست شفيقة .. ده انتى حتى اسمك شفيقة .. ايه الصورة اللى على باب المدونة دى ... والله اتخضيت وماقدرتش اكمل باقى البوست من الخضة

شليها الله يكرمك بجد

بالله عليكى ياشيخة

:D

بنت النيل يقول...

يا شفيقة هانم
اية النصائح دة بس
انتى موتنى من الضحك
بس بصراحة كلامك كلة صح
وانا احاول اعمل بية
تحياتى لكى
بنت النيل

Tamer Nabil Moussa يقول...

هههههههههههه

مية مية.

ربنا يستر على البلد هههههه.


تحياتى

ياسر يقول...

علي فكرة لية الراجل
مننا ميكنش مشارك في البيت
اكتر من اللسان والامر والنهي
اية المشكلة لما يكون فاضي
او عندة وقت يشارك شوية ست
البيت علشان يحس بيها بتتعب
ولاا لاا هل هو عيب او حرام اني
اساعد مراتي ياجماعة الجواز مش
سي السيد وبس رجل علي رجل
فين الشائ الغداء العشاء شيلي
العيال سكتيهم مش عارف انام وهما
ولاادها لوحدها وانت فين من دة انت
راسك بتوجعك وهيا لاا راسها حديد
اتمني من كل زوج يتقي الله في زوجتة
تكون اختة وابنتة وحبيبتة
تقبلوا مروري
تحياتي

امواج يقول...

هههههههههههههههه
مدونتك جميله ودمها خفيف بجد
اول مره ادخلها مش عارفه موقعتش فى ايدى قبل كده ازاى
الحمد لله انها وقعت بقى

tarek alghnam يقول...

شفقة هانم
سعيد بدخولى مدونتكم الرائعة
والحمد لله انى متزوج وبعملش بنصايحكم
الزواج مودة ورحمة
بس بأمانة بوست دمة خفيف
ربنا يوفقكم وترسموا السعادة على الجميع
واتمنى زيارة مدونتى المتواضعة
ودمتم بود

إيمان بلاعو يقول...

المدونة فكرتها جيدة ، وأسمها موفق ، وممكن من خلالها تطرقوا إلى المشاكل التي تهدد الحياة الزوجية ، فتقدما إستفادة مغلفة بالإبتسامة ، جميل جدًا فكرة أنكم بتعملوا شيئ مشترك ويارب تكونوا فعلاً إثنين ، لكن رجاء تغيروا الصورة لإنها ضايقتني جدًا عندمازرت مدونتكم ، وقلت لنفسي لن أدخل هذه المدونة مرة أخرى بسبب الصورة (بصراحة شعرت بالإشمئزاز وأنا أنظر إليها) ، لكني مدينة لك ياشفقة برد الزيارة ؛ بعدما زرتيني في مدونتي (سطورٌ أعجبتني) ، أشكرك على تعليقك على موضوع (القبلات تبيح المحظورات) ..... تحية وأمنية ..... سطورٌ أعجبتني .... إيمان بلاعو ....

جيفارا المصري يقول...

منتهي المتعةو الحكمة المحلاة بخفةدم مصرية اصيلة

mostafa rayan يقول...

نصايح حلوة بس ياريت الستات تعمل بيها

Diyaa' يقول...

كفاية إنه ييجي المدونة وهو هيخربلها عيشتها
برغم إن الموضوع دمه خفيف مش جد
بس ليه يعني حاسس إن الراجل هو اللي موقفه أقوي مع إن ده مش شئ بيحصل دايماً بالعكس كتير بيكون الراجل كل همه يرضي حرمه المصون وبيفشل غالباً
مبروك علي رفع الصورة :)
بس هو ليه محدش فيكم بيرد علي تعليقات؟

أم أحمد المصرية يقول...

مش عارف اقول لك ايه يا شفقة هانم انت طبعا عندك حق بس بشرط احسان بيه جوزك يكتب تدوينة زي دي للازواج عشان التظبيط يكون من الطرفين
اسيبك بقي و اروح اشغل الغسالة و اصحي الولاد اصل ابو احمد وصل :))))
تحياتي و ان شاء الله تواصل مستمر

دكتور بهــدوء يقول...

فعلا فعلا لو يتنفذ
سوف ينعم الرجال بدنيا م الهدوء والطمأنينه وراحه الباااال
بس مين يسمع ومين يعتبر
تعالوا اقروا وشووووفوووا الناس بتعامل اجوازهااا ازاااااي
==========================
ثانيا المدونه تحفه والاسلوب جميل والفكره جديده
تحياتي
:)

(احمد سكر ) يقول...

امممممممممممممم

نصائح جميله

ههههههههه

بس اللى تطبقها

تحياتى اختى الفاضله

اخيكى
احمد سكر

غير معرف يقول...

ايه يا حاجة ده الله يسمحك
هو انت بتعملي كدة مع جوزك للدرجة دي طهقانة منه طب اخلعيه
انا عن نفسي لولا المم كنت ما فرقته ابدا اصلي بحبه

امواج يقول...

شفقه انا سعيده لسؤالك بجد عنى فى مدونتى
معلش انا مش متبعاها الفتره دى لانى كنت تعبانه الفتره ال فاتت وكنت فى المستشفى شكلى هموت قبل ما اتجوز واعمل مدونه زى بتاعتكم هههههههههههههههه

Rannon يقول...

نصايح حلوة قوي ولو كل الستات نفذتها بجد وسمعت راجل بيشتكي من مراته هيبقى مالوش حل الا اقتل

أماأروح
أشوف إحسان بيه عمل نصايح للنص التاني ولا أ:)

تحيااااتي :)