الأربعاء، 28 مايو 2008

قبل الجــــــــــــــــــــواز متهنيه......وبعـــــــــــــده متــــــــــربيه









ايوا والله فعلا الواحدة منا قبل الجواز متهنية سامبتيك كده حاجة شبه... البونبونايه و العسلية اما بعد... الجواز يووووووه متربيه تربيه ولا الشـــغـــالة الفليبنيه!

يا سلام الواحد افتكر الايام الجميلة لما كانت الواحدة رايقة كده وبالها مرتاح وقاعدة حاطة رجل على رجل عمالة تهز فيها وتسمع اغانى عبد الحليم وحبك نار وكده…ومتانزحه على الاخر وكل شىء مجاب….اما بعد الجواز يا باى لو الواحدة فضيت خمس دقايق يبقى كويس وكبيرها تسمع اغنية بحبك يا حمار….وشيل ده من ده!

الواحده زمان كانت تطلب اى حاجة من باباها ومامتها يشتريهالها هواء تكون عندها ولا بس تقول عايزة فستان ولا بلوزة بابا يقول .......حاضر يا ستو انا وانا عندى كام حبيبة بابا من عينى.

اما بعد الجواز تطلبى حاجة يا سيدى ممكن تشوفى وتسمعى اللى عمرك ما سمعتيه......."يكلضم ويكشر ويفتح بقه على الاخر"نعم يا هانم فى ايه…..هو كل يوم هات هات ايه اجيبلك منين هو انا وارث الابعديه وبعدين يعنى هو انتى هتخرجى تروحى فين اعدى فى البيت اوفر وانا مش لسه مشتريلك السنة اللى فاتت لحقوا يدوبوا".

ولا لما الواحدة كانت تتكلم مع صاحبتها فى التليفون............... ماما كانت تيجى تقول سلملى عليه كتير اوى يا حبيبتى.

لكن الباشا بعد الجواز...... لو مسكتى التليفون يفضل رايح جاى رايح جاى عليكى وينفخ ويزعق ..."احنا مش هنخلص فى سنتنا ولا ايه الفاتورة يا ست هانم الشهر اللى فات جت اد كده ولا انتى مواركيش الا الخراب !!اقفلى ولو فى حاجة خليها هى تتصل بيكى ولا عايزانى اطلع من هدومى!!

الاكل بقى مقولكوش طبعا...... الواحدة منا كانت معززة مكرمة تقعد هانم والاكل يجى لحد عندها وما تدخلش المطبخ ابدا ولو معجبكيش الاكل حالا بابا ينزل يجيب اللى انا بحبه ويفضل يتحايل وحياة بابا لا انتى واكله انتى طول النهار ما كلتيش وشك بقى اصفر علشان خاطرى حته بس.

لكن سبع البرومبه......معاه هتدخلى المطبخ غاظ بنعنك داخلة داخلة ...ولو الاكل مخلصش يخلى عيشتك زفت...."الطفح فين ولا مش ناوية تطفحينا النهاردة …طبعا نايمة طول النهار وناسيه البيه اللى متجوزك….ولو غضبتى على الاكل ومكلتيش يقول احسن وفرتى اللى ياكل على ضرسه ينفع نفسه".

عند ماما كانت الواحدة تزعل وتتامص زى ما هى عايزة...... وماما تيجى تصالح وتتحايل عليكى وتقولك كفاية مقدرش اشوف دموعك ابدا.

لكن جوز الهنا ........يشوفك زعلانة ولا كأنه هنا ويسيبك تموتى من العياط ويقولك ...." اهو قلبناها محزنة اهو مش كفاية نكد ولا ايه انتى هنفضل نعيط طول النهار والعياط يجبلنا الفقر اكتر ما احنا مفقورين".

يا سلام الواحد فى بيت اهله كان يخرج ويتزوق ويحط مكياج زى ما هو عايز وبابا وماما يقولوا "الله زى القمر بدر منور والله من غير ميكب كمان احلى واحلى ربنا يحرسك من العين".

الباشا يقولك....."ايه يا هانم الفرح اللى فى وشك ده اراجواز انا متجوز راقصة ولا ايه امشى امسحى اللى فى خلقتك ده اوام لحسن احلف ما انتى خارجة من البيت خالص".

ولا لو واحدعاكسك وانتى فى الشارع وقلتى لمامتك.........."طبعا مهو عندهم حق شايفين قمر غزال ليهم حق يعاكسوكى ربنا يحميكى ويحرصك"

البيه جوزك لو عرف ان حد عاكسك......."طبعا ما هى الهانم ماشية تتاصع فى الشارع وتدلع ولابسة المحزق والملزق ما هو لو كان شاف واحدة محترمة ادامه مكنش عاكسك من اصله"

فى بيت بابا كان هو ولا ماما يطلبوا منك اى حاجة لازم يقووا.........."بعد اذنك لو سمحتى يا حبيبتى ممكن تعمليلى شاى"

جوزك بقى"اتفضلى ورينى طولك واعملى لى كذا اخلصى اوام يا هانم عايزة اخرج خلصينا"

الفسح والخروج يا سلام بابا وماما كانوا يدلعوا وفسح كل اسبوع واللى الواحدة تختاروا ويسالوكى ..............تحبى نروح فين النهاردة "

جوزى الهنا......."نتفسح نعم هو انا فاضى لساعدتك؟ مفيش خروج عايزة تخرجى روحى عند مامتك …قال فسح قال هو فى فلوس لكده صحيح دماغك فاضية ورايقة"

لو تعبتى تحسى ان بابا وماما سهرانين طول الليل وهيموتوا علشانك وتروحى لمية دكتورويقولوا"........ان شاء الله كنت انا بدالك يا حبيبتى ربنا يشفيك وتقومى بالسلامة"

اما البيه جوزك.........."يسيبك ويروح ينام فى اوضة تانية وهاين عليه يقولك احنا هندلع دى انفلونزا هى حاجة ! وشوية شوية عايز يقولك يا ريت لو تروحى عند مامتك علشان مصاريف العلاج وميقدرش يخدمك!!

الشغل لما الواحدة كانت تفكر تشتغل ماما تقولها ............"ربنا يوفقك ويفتح لك الابواب المقفولة ايوا كده لازم تحققى ذاتك"

لكن جوزك.........."يقعد يحبط فيكى ويقولك انا مش عارف هيشغلوكى على ايه ولا انتى فاهمة حاجة فى اى حاجة…..انا عارف ايه لزمته ولا هو نزول وخروج وخلاص يعنى فى الاخر هتبقى ايه رئيسة الجمهورية!

التليفزيون ......كان الواحد يقعد فى البيت يتفرج على القناة اللى تعجبه وادامها طبق اللب والسودانى ولو صادفت وبابا عايز يتفرج على الماتش وانتى على الفيلم كان ينزل يتفرج على القهوة ويقولك......."خلاص يا ستى اتفرجى زى ما انتى عايزة"

جوزك بقى يا اما بيتفرج على الاخبار يا قناة الرياضه ولو حبيتى بس تفتحى بقك وتقولى........."عايزة احول على القناة بتاعة المسلسل تبقى حكاية ويقولك...."مش فاضى انتى اتعميتى؟ مش شايفانى بتفرج على الاخبار روحى نامى بلا تفاهة !

شـــفتم بقى اد ايه الجواز حـــــلو وممتــــــع ولذيذ واد ايه هو نظام اجتماعى هايــــل وناجح جــــــــدا جــــــــدا جــــــــــــدا!!

لا بجد عايزة اقولكم اذا كان فى عيب يبقى مش فى الجواز………..العيب فينا احنا فى اختيارنا

لكن لو كنا عايزين المركب تمشى من غير عواصف ونعيش فى سعادة وراحة بال ……لازم كل واحد فينا يمسك المجداف ويجدف ادام التانى.

سلالالالالام بقى علشان اقوم ادى احسان بالمجداف ….اقصد اادف قصاده!

أمضــــــــــاء شفقـــــــــــــــه

هناك 48 تعليقًا:

Unknown يقول...

هههههههههههههه

ايه ده واضح ان إحسان مهنيكي و مدلعك و محببك في الجواز اوي

العيب بيكون ان الزوج عايز داده مش واحده تشاركه حياته عايزيقعد هو و يتستت و حد يعمله كل حاجه بالريموت بس احنا الي دلعناهم ولازم نوريهم العين الحمرا

تحياتي

شفـقــة و إحســــان يقول...

معاكى حق يا ايمى الرجالة كلهم عايزين خدامين ميعرفوش اننا مخلوقات رقيقة وحشاشة!

غير معرف يقول...

هاهاهااهاها
ضحكتينى و الله يا إيمى
"الزواج تأديب و تهذيب و إصلاح"

بصى حتى لو جوزها طيب أكيد فى موقف من المواقف دى حيحصل معاها و لو مرة و إن مكانش النهارده يبقى بكرة :)))))))))

بصى و على فكرة عشان ما نظلمش الرجالة هما كمان بيتبهدلوا معانا (يبقى راجع من الشغلو يلاقى البيت غرقان ماية و انزل هات السباك أو يبقى راجع يلاقى انبوبة البوتجاز خلصت, يبقى ما فيش أكل و أنزل غير الأنبوبة)

فى الاخر أحب أضيف كلمتى الشهيرة: "اللى ما ربهوش أهله الجواز يربيه" :)))))))))))))

Unknown يقول...

الللللللللله

الله يطمنكككككك ياست شفيقة .. طب وعلى ايه وجع القلب ووجع الدماغ ده .. منا قاعدة فى بيت ابويها كافية خيرى شرى وميت فل و15 كمان

عن اذنك بقا اما اروح اقول لخطيبى معطلكش
:(

رئـــــيسـة حزب الأحلام يقول...

ماحدش عاجبه حاله سبحان الله
تحياتى لكى

شفـقــة و إحســــان يقول...

ليلى
معاكى حق هما فعلا بيتبهدلوا معانا بس كمان بيبهدلونا...يا شيخة ده السجن احسن اهو الواحد بيلاقى حد يطبخه له ويعمله كل حاجة....ههههههههه..لا بس بجد حرام مش كل الرجالة وحشين يعنى احسان مثلا زى العسل وطبعا ده باين من بوستاتى

شفـقــة و إحســــان يقول...

انسانة
لا حرام ما تظلميش خطيبك مش كله زى بعضه اصل الجواز ده بطيخة وانتى وحظك...

شفـقــة و إحســــان يقول...

رئيسة حزب الاحلام
فعلا يا ريئسة محدش بيرضا بحاله الا لما يشوف حال غيره والحمد لله ان مش هعيب وراضية بسى احسان

عبده الرايق يقول...

ازيك ياست شفقه
عامله ايه ؟؟؟؟
شفت تعليقك عندى لقيت دموعى نزلت من اسمايكم
شفقه واحسان
وعلشان قلبى طيب جبت معايا عشر ارغفه وباتنين جند فول
وكيلو خيار وتمن جبنه بيضا
بالهناء والشفاء انتى واحسان
وحسنه قيله تمنع بلاوى كتيره
اه
على فكره
نسيت اقولك هو احسان بيعاملك ليه كده؟
لا
انتى متسبيش حقك
تتكلمى فى التليفون براحتك وتعملى اى حاجه نفسك فيها محدش احسن من حد
والشقه من حق الزوجه
والباب يفوت جمل
واللى مش عاجبه يخبط دماغه فى الحيطه
انا جاى بس اهدى النفوس

ملحوظه
لو احسان قراء التعليق
ابقى قوليلى اعمل حسابى العمر مش بعزقه

أم أحمد المصرية يقول...

حبيبتي شفقة حسستيني بالشفقة عليك و علي نفسي
take it easy
سيد القوم خادمهم يا بنتي أما البلوزات و المكياج و الكلام الحلو و اغاني حليم و كاظم فدي كماليات يابنتي مش مهمة خالص
اسيبك بقي و اقوم اقطف الملوخية
ابقي زورني في مدوننتي و اقري جديدي و احنابنشرب الشاي بعد ما تسربي احسان بيه من البيت
تحياتي

شفـقــة و إحســــان يقول...

مسيو عبده
اهلا بك فى عالمنا ومتشكرين جدا على الفول والخيار والجبنة والعيش انت الوحيد اللى حسيت بظروفنا ان شاء الله نردهالك كده لما سى احسان جوزى يقرا التعليق ...وانت وحظك !

شفـقــة و إحســــان يقول...

ام احمد
منورنا والله مش عارفة اقولك ايه طبعا انتى حاسة بيه مهو الحال من بعضه ...صحيح فكرتينى اما اقوم اجيب الرز انقيه واحنا بنشرب الشاى!

المـــفـــــــقــــــــوعـــــة مــرارتـهــا يقول...

هي فين الأهالي إللي بتدلع دي
مافيش .. دولاهوما كمان عملة نادرة في اليومين دول
مسكينة البنت لا قبل الجواز عايشة عيشة هنية ولا بعد الجوازة متهنية

دكتور بهــدوء يقول...

لا واللهي صوابعك مش زي بعضها
كل كلامك صح بس ماعدا المسلسل
هخليها تجيبه عاااادي
اصل لو اتفرجت عليه هتأخر العشا
ودي حاجه نتخانق عليها لايمكن افوتها ولو حتي كنت انا السبب
هي من نفسها مش هتفكر تتفرج عليه تاني

اخبار احسان ايه بعد المجداف
:)))))))

HERO يقول...

هههههههه
علشان كده اسمك شفقة ؟؟!! من كتر اللي بيشفقوا عليكي
طيب متروحي تعدي عند ماما وبابا انا بهدي النفوس والله مش قصدي حاجة
والناس اللي لسة متجوزتش زي حالاتي كده تقول ايه ؟ خلاص انا كرهت الجواز

تحياتي

غير معرف يقول...

السلام عليكم
طب والله حرام ازي يا خالتي شفقة تقولي علي جوزك كدة افريضي مش معاه يجيب فستان ولا اقوللك هو انت مش نصه التاني وعارفة ايه الموجود وايه الا مش موجود ايد علي ايد تساعد يا ستي وفري له واتغدي يوم عند مامتك ويوم عند ممته وهاتي بتمن الغدي فستان
ههههههههههههههه
علي فكرة اسلوبكم كوميدي جامد جدا
الخر

الـجـدة فـصـيـحـة يقول...

السلام عليكم ورحمة الله وبركاته


الحياة في بيت الأهل قد يكون لها مميزات كثيرة فعلا
لكنها ليست بالوردية التي رسمتيها أنتِ
ووالدك هو كمان زوج
وأكيد رب أسرة وعنده عائلة يصرف عليها

كما أن الحياة الزوجية ليست بهذا الوصف طول الوقت أيضًا
عجبني أخر كلامك
فعلا في أيدنا نحول الحياة لسعادة مطلقة لو عرف كل طرف يتنازل شوية عن متطلباته ويريح الطرف الأخر

موضوع دمه خفيف جدًا وأكيد في أمثلة موجودة قريبة من الشكل ده لكن اسلوبك طلع الموضوع خفيف الدم

تحياتي

شفـقــة و إحســــان يقول...

المفقوعة
حرام عليكى اوعى تقارنى الجوز بالاهل ...هو فى زى الحياة مع الاب والام صحيح كان فى شوية تلطيش بس مع الامصة كانوا بيجيبوا نتيجة لكن فى الجواز اعملى اللى انتى عايزة هيسيبك تضربى دماغك فى الحيطة

شفـقــة و إحســــان يقول...

دكتور
ازيك منورنا شكلك كده راجل طيب ومثالى يارب الرجالة يتعظوا منك ويخلونا نتفرج على المسلسل والنبى ابقى قول لاحسان يبطل قناة الجزيرة شوية

شفـقــة و إحســــان يقول...

hero
لا انا ما اقصدش اكرهك فى الجواز بس انا بردوا جايه اهدى النفوس ...اما بخصوص القعاد عند ماما وبابا مين قالك انى ما بقعدش انا هناك علطول...هههههههههههه

شفـقــة و إحســــان يقول...

نورا منورة
بسبب نصيحتك دى انا طلبت منه نقعد نص الاسبوع عند ماما والنص التانى عند طنط...وبكده هشترى مش فستان لا كل اللى انا عايزة بس اوعى تقولى لاحسان

شفـقــة و إحســــان يقول...

الجدة فصيحة
طبعا يا جده الحياة الزوجية مش كلها كده والا كان الواحد طفش من زمان ....هههههههه ومكنتش كتبت المدونة دى

مطرح ما ترسى....دقلها يقول...

لا فعلا واضح انك كنتى عايشة قبل الجواز مع ملايكة وعايشة بعد الجواز مع رئيس عصابة

انتى تحمدى ربنا يا هانم انه مش بيفطرك ويعشيكى بعلقة

ستات اخر زمن صحيح

انتى بتفكرى تعارضى جوز الهنا بتاعك؟؟؟
وكمان عاوزة تتفرجى على المسلسل؟؟؟

ايه؟؟


سامعك بتعترضى...


اه بحسبك بتعترضى ولا حاجة
-------------------

على الهامش بقى
مدونتك حلوة بجد

مع تحياتى العميقة


كريمى

Empress appy يقول...

وهذه هى الحياة ههههههههههه والراجل قبل وبعد
معلش اتحملى مش البنت هى اللى عاوزة تتجوز يبقى تتحمل

mostafa rayan يقول...

البوست بتاعك بيطرح سؤال مهم جدا
ليه الست قبل الجوزا بتفضل تحلم دايما بالجوزا وبالرجل والبيت الخاص بيها وبعد الجواز تفضل تشتكي وتقول اه يانا وتقول نفس الكلام اللي انتي قولتيه دة
طيب يعني هما الستات عايزين ايه بالظبط - اغلب الستات مش عارفين هما عايزين ايه - ومدام مش قد مسؤلية الجواز بيقولوا عايزين نتجوز ليه مالو كدة تبقي الست احسن خليها في بيت ابوها عايشة عانس طول عمرها
بردة الرجل علي فكرة قبل الجواز حياته بتبقي احسن بكتير مافيش قيود عليه بيخرج ويجي وقت ماهو عايز امه بتعمله الأكل واخته بتنضف له حجرته وتكويله هدومه وماحدش بيوجع دماغه بتأخرت ليه ولا كنت فين ولا عايزين كذا وكذا كل اللي معاه له هو لوحده بس
لكن
بعد الجواز اكيد زي مانتي عارفة كل حاجة بتتغير وبيكون في الف خانة هو المفروض يسدها لكن دي سنة الحياة ان الأنسان يتجوز ويكون له بيت واسرة
بجد المفروض الستات يحمدو ربنا ويبوسو ايدهم وش وضهر ان في رجالة لسة بتتجوز وبتفتح بيت في الزمن اللي احنا عايشينه في دة
معلش قد يكون في كلامي بعض القسوة ولكن كلامك استفزني جدا وكان لازم ارد
تحياتي لزوجك العزيز

كيكى عوووووو يقول...

ههههههههههههههههههههههه...مدونة جميله اووووووووووووووووى..تحياتى...حلوة اووى صور الفرح بتاعتكم...زى القمر

شفـقــة و إحســــان يقول...

مطرح ما ترسى دقلها
لا بجد انا بحمد ربنا على سى احسان اهو الواحد لحد دلوقت ما اخدش علقة ...وكفاية عليا انى مبتفرجش على المسلسل اهو احسن من الضرب بردوا.

شفـقــة و إحســــان يقول...

appy
كده بردوا بدل ما تنصرينا تقولى ان احنا اللى عاوزين كده....شكلك لسه متجوزتيش انا هستنى لما اشوف رايك بعد الجواز يا ترى هتستحملى ولا ايه؟ههههههههه

شفـقــة و إحســــان يقول...

mostafa
انت مالك مكلضم كده ليه من اولها ....اضحك ما حدش واخد منها حاجة ...كمان يا سيدى انا البوست بتاعى لا بيطرح ولا بيجمع ده بيضرب علطول...ومعلش اذا كنت قسيت شوية على الرجالة..انا بردوا لميت الدور فى اخر البوست ولا انت مكملتهوش للاخر؟
وبينى وبينك كده صحيح لما احنا بنشتكى يعنى كنا بنتجوز ليه وملهوفين كمان على الجواز..؟ ولا تزعل طبعا مش كل الرجالة زى بعض ...ده احسان جوزى مثلا مفيش اتنين زيه فى مصر امال ده لقطة انا بتكلم بجد مش بتريق

شفـقــة و إحســــان يقول...

كيكى
منورانا والله انتى اللى قمر عقبال ما نشوف صور فرحك يااااااااااااااااارب .

Desert cat يقول...

انا اخدت البلوج كله على نفس واحد
بس واضح انكو ديتو محصلش ربنا يحفظكو يارب
ويبارك لك فى سى احسان

هوة فى أيه؟؟soso يقول...

ههههههههههه
أيه يا شوشو ده
أنتى عقدتينا
مش قوى يعنى
المواقف ديه يمكن تبان غلسه
لكن فى الحقيقه دمها خفيف والدليل أهوة
لما بتحكى كلنا بنضحك
أنتوا لذاذ أوى أوى
وبينى وبينك
مفيش حد مرتاح
لا المتجوز
ولا المخلل زى حالاتى كده
هههههههه
بس انا بحب مخلل اللفت
بلاش الجزر عشا ناشف
بجد مدونتكو تحفه وان شاء الله حتفرقع

بنت مصريه يقول...

دا انتى تحفه زى العسل والله
دى اول مره اتشرف بدخول مدونتك بس ان شاء الله مش هتكون اخر مره
انا متجوزه
صدقينى يا بنتى
اللى كننا بنعمله ف اهالينا
اهو بيطلع على جتتنا بعد الجواز
دا تخليص حق صدقينى
ههههههههههههههههههههه
اللى بنكله بط بط بيطلع علينا صراصير صراصير
اتمنى تنورينى

روح يقول...

هههههههههههههه
جميل اوي البوست ضحكتيني
ربنا يعزك بطاعته
علي فكرة انا مش متجوزة
ومشكلتي اني مدركة جدا
مدة الاختلاف اللي بين الحياة
قبل الجوزا وبعدها
ودة مخوفني جدااااااااااا
ومعلش ليا طلب عندك
ياريت تشيلي الصورة كمان مرة
وتحطي صورة كاريكاترية
يكون فيها حوار مضحك بين
زوجين اظن ان دة هيكون الذ
تحياتي ياجميلة

شفـقــة و إحســــان يقول...

قطة الصحراء
ليه بس خدتى البلوج على نفس واحد لا بجد احنا نخاف عليكى بعدين يجرالك حاجة تقولى احنا
نورتينا يا قمر

شفـقــة و إحســــان يقول...

soso
لا بجد متتعقديش لانى لو كنت عقدتك من الجواز يبقى هتعملى اضراب انتى وغيرك ومتتجوزوش وافضل انا لوحدى اللى متعقدة ومفروسة
لا لازم تشاركونى ونتعقد كلنا سوا امال اصحاب ازاى؟

شفـقــة و إحســــان يقول...

بنت مصرية
منورة وان شاء الله متكونش اخر مرة وتشرفينا علطول اه احنا اللى يزورنا مرة ما ينسناش بالمرة
بس بقولك ايه بلاش حكاية البط دى اصلى مكنتش بحبه لكن عندك حق فى انه طلع صراصير صراصير وكاننا بلاعة!

شفـقــة و إحســــان يقول...

ro7
اهلا منورة وبعدين بقولك ايه لازم تفضلى مدركة ومدركة ونص ان قبل الجواز غير بعده خاااااااااااااااااااااااالص.....وان شاء الله نتقابل لما تتجوزى واعرف منك ما كنتى تدركيه ده لو لقيتى وقت تدركى اصلا
الصورة لعلمك بقى انا غيرتها قبل كده بناء على طلب القراء وان شاء الله لو لقيت صورة اوحش اوعدك انى احطها

د. إيمان مكاوي يقول...

والله أنا النهارده مهمومه ومزاجي مش هو..بس لما دخلت مدونتكم ضحكت من قلبي..واسمحولي اضمكم لقائمة مدوناتي المحببه علشان أعدي كل شويه..
تحياتي

كلام على بلاطة يقول...

حقا يا اختى
فضفضى
عيشة تزهق
لكن انظرى للطرف الاخر اللى هو الافندى
ولامكانياته ولا هو بيستعبط
تحياتى

المتحرش بها يقول...

كل اللى انتى قولتيه حقايق مسلم بيها قبل الجواز وبعده شتان

مجداوية يقول...

السلام عليكم

أشكر لكما تواصلكما معى وعميق شكرى وامتنانى
أراكما على خير

والسلام عليكم ورحمة الله

شفـقــة و إحســــان يقول...

ema
انتى نورتينى وبعدين متزعليش ولا يهمك محدش واخد منها حاجة....كمان انتى تعدى وتقعدى ونشرب الشاى سوا كمان

شفـقــة و إحســــان يقول...

كلام على بلاطة
منورة ومزحلقة مش بلاطة
ده سوال بردوا تساليه يا بلاطة هو فيه افندى فى الزمن ده ما بيستعبطش.....لكن خدى بالك الا احسان جوزى

شفـقــة و إحســــان يقول...

المتحرش بها
منوووووووووووة
والله بصى هى مش مسلم بها وبس لا وموثوق فيها الى ابعد حد

شفـقــة و إحســــان يقول...

مجداوية
منورة ده احنا اللى بنشكرك من عميق اعماق العمق ....واكيد هنتواصل ونتواصل ولكن بعد الفاصل انتظرينا

Mony يقول...

مدام شفقة هانم


احب افكرك بالمثل الشعبي المشهور

"من خرج من داره اتقل مقداره"

و قيسي علي ده كتييييير


عندك حق في كل اللي قولتيه

مش هنظلم ازواجنا
اه هم ساعات بيكونوا كويسيين اوي بس الساعات التانية اكتر علشان كده بتعلق معانا

Rannon يقول...

اه يا شفقة
اهو انا اللي مخليني بفكر ألف مرة قبل ما أربط مصيري بمصير انسان هو اللي بتحكي فيه ده...
صعب قوي كل التغييرات دي تحصل للواحدة مرة واحدة..
وبعد ما كانت الدلوعة المتهنية اللي مابيترفضلهاش طلب
تبقى مكسوفة حتى تطلب وهي هاتموت وتجيب اللي نفسها فيه....

ربنا يسهل بقى

تحياتي :)