الأحد، 8 يونيو 2008

جـــــــــــــــــواز" دوت " كــــــــــــــــــوم



النهارده بقى هنتكلم عن الجواز النص كوم ولو حد سألنى ليه يا شفقة بتقولى عليه نص كوم؟ هقله ده نظرا لاننا فى الصيف.... والله الواحد مش عارف يقول ايه؟....معقول الواحد والله مش مصدق.........ايه ده يا بنات ...بتعملى ايه يا مقصوفة الرقبة انتى وهى؟؟ يا دى المصيبة عليكن اجيال مهببة بهباب مهبب ........الواحد مش مصدق اللى بيشوفه ده قال ايه... افتح التليفزيون على القنوات اياها اللى فيها المذيعات اياهم اللى بيقعدوا يتاصعوا ويدلعوا ادام المشاهدين وعمالة تقول فوازير وهى بتترقص اول حرف منه" ح" وبينهق" تفتكروا تبقى ايه؟؟ طبعا كلها فوازير للاذكياء فقط...سيبكم من ده دول عايزين قصة لوحدهم نبقى نتكلم فيها بعدين وهتلاقى قبول فظيع خاصة من الرجالة.... المصيبة فى الشريط اللى بتكتب فيه تحت على الشاشة الاقى......اعلان فى طلب عريس قال ايه....الهانم كاتبة انا فتاة مؤدبة" وطبعا باين"...عشرين سنة"طيب يا فالحة متسربعة على قصف عمرك بدرى ليه؟؟....هيفاء تقصد "هايفة".....طويلة ممشوقة القوام "وكانها عاملة اعلان لموديل"....تطلب عريسا غنى ..ابيض..عريض طبعا علشان تاخد علقة كل يوم..يمتلك سيارة فارهة "على اساس انها هتكون بديلة للشقة"..خريج كليات القمة" تقصد القمامة على اساس انها نسيت بقية الحروف".

معقول ايه يا بنتى ده طيب ما تروحى احسن تشترية من السوبر ماركت! اهو على الاقل هتلاقى كل اللى انتى عايزاه الرخيص والغالى ...ابو بدلة.. وابو بيجامة.. والحافى وكله بتمنه!

شويتن ادخل على النت... وده بقى الاجمل الاقى مواقع للزواج وفجاءه كده تتخض وتلاقىكاتبلك "ادخل " بيحسس الواحد انه واقف على الباب!

طبعا ده بعد ما تسيب كل بياناتك ومواصفاتك ومواصفات شريك الحياة...ده ايه الحلاوة والجمال ده ايه التقدم المذهل ده....لا صحيح عصر التكنولوبيا..

كأن بكده هتتحل مشاكل كل البنات واللى هتطلبه هتلاقيه ...مكنش حد غلب امال البلد كلها فيها عنوسة ليه؟؟

طيب انا بقى هطلب عريس يكون نافش ريشه وملون ومبيفتحش بقه خالص ...."ديك" انا بصراحة مش عارفة ايه اللى بيحصل ده الغريبة... ان تلاقى البنت من دول مصدقة وتدخل تسيب بياناتها ومواصفاتها كده عادى قال يا عينى هتلاقى فارس احلامها وتسيب رقم تليفونها او ايميلها ومش عايزة اقول على الباقى اللى بتدخل المواقع دى عارفة الباقى بس اعتقد انها بتدخل تدور على فارس الاحلام ابو حصان وفى الاخر الحصان بيرفسهم هما الاتنين ما علينا نخرج من الاسطبل ده ونكمل!

حبة وتلاقى ماسيج على الماسنجر حبيتن بقى كلام... شويتن تليفون... ثم خروجة... ثم قلة ادب ...ده طبعا على اساس انه عريس اه " محدش يفهم غلط ".

وهكذا كالعادة لحد ما يخلع ويسيبها... وهو معقول فى حد بيتجوز بالطريقة دى؟ المصيبة تلاقى البنت بتدخل المواقع دى ومامتها عارفة وكل شوية تعدى تسالها بصوت ناعم وحنين "ها يا حبيبتى كام عريس بعتلك النهاردة؟ طيب هتقابلى مين الاول؟ بقولك ايه... عايزين حاجة حلوة كده!

الاحلى والاجمل الجرايد والمجلات...افتحها الاقى عناوين "اذا كنت تبحث عن نصك المنيل او عايز حد يعكنن عليك...او نفسك فى حد يطلع عينك ...ويقرفك ويخسسك النص ابعت لنا.... الخاطبة نبوية ام عيون عسلية مبتخدش فلوس نقديه بتقبل هدايا وعربيه.... ابعت لنا واكيد هتندم عندنا"

او تلاقى اعلان على جنب كده فى صورة واحدة مكعبرة وكاتبة" ام منص للزيجات العصرية اذا كنت تبحث او تبحثين على نصك التانى نحن فى انتظاركم بشرط ممنوع التقدم الا للطبقات العليا ...كل ما لدينا من اصحاب الطبقات الراقية"هى تقصد بالطبقات العليا" اللى ساكنين فى الدور العاشر وما فوق يعنى سكان الارضى والاول لا "ما يعتبوش هناك" والطبقات الراقية اللى بياكلوا رقاق كتير...اما بتوع الجبنة والفول والطعمية يمتنعون دول يشوفلهم... صاحب مطعم"

والجديد بقى المكاتب المحترمة اللى بتاخد فلوس....بس ما عليكى غير انك تروحى ناكشه شعرك وعامله خصلتين حمر ولابسة اللى على الحبل ومعاكى السى فى بتاعك وانتى وحظك العريس على اد اللى انتى عامله فى خلقتك.....ده طبعا بعد ما تدفعى حق الابلكيشن "استمارة البيانات" والضريبة والخدمة وبعدين يحددولك ميعاد المقابلة والمشاريب وكله على حسابك وطبعا هتلاقى عرسان بالهبل لان كل مقابلة بتدفعى....بس ابقى قابلينى لو لقيتى العريس اللى انتى عايزاه وساعتها ابقى ارمى نفسك فى البحر وربنا يعوض عليكى فى فلوسك وهتسمعى جملة"مواصفاتك مش موجودة عندنا ...وفلوسك استعوضى فيها ربنا"

عايزين الحق اللى بيحصل ده تهريج.... بجد بجد كل واحدة تصون نفسها لغاية ما يجىء الشخص المناسب لحد عندها اللى يصونها....لكن لو كانت هتموت على الجواز وخلاص بتشد فى شعرها يبقى احسن ليها تعمل اعلان وتكتبه على يافطه بالبنط العريض وتحطه على عربيه نص نقل او كارو ومعاها مايك... تلف بيه فى الشارع تنادى"محدش شاف عريس بالمواصفات دى....يا ولاد الحلال حد يدلنى على عريس"وربنا معاها .


بجــــــــــــــــــــــد عايزة اقولكم حاجة يا بنات ليه ما بتاخدوش بالكم من الزمن اللى فات؟؟ ارجعوا شوية لزمن الامهات ..شوفوا يعنى ايه عروسة وازاى كانوا بنات عائلات محترمات..... ده الخجل والحياء مميزات وصفات .....اسالوا نفسكم ينفع احنا اللى ندور على البهوات؟؟..... للاسف انتم متعرفوش يعنى ايه جواز...فاكرينو عريس وعفش وجهاز! خطوبة ودبلة وهيصة وطبلة.


الجـــــــــــــــــــــــــــــــــواز....يعنى حب وارتباط وتفاهم يعنى التزام مش خاطبة ودش وشات يا بنات يا افاضل يا محترمات اصبروا على نصيبكم بدل ما تستعجلوه وترجعوا تضربوا نفوخكم فى الحيطه.
وبعد اذنكم بقى علشان اروح اشوف العريس اللى كنت منزله عنه اعلان لبنتى فى الجرنال..........وعقبــــــــــــــــــــــــــالكم
شــــــفقـــــــــــــــــــة

هناك 75 تعليقًا:

Lobna Ahmed Nour يقول...

عصر التكنولوبيا

ههههههههه .. عندك حق يا شفقة

تحياتي

شفـقــة و إحســــان يقول...

unique
انتى بجد بجد منورنا اصل انتى اول واحدة ولسه محدش نورنا...الظاهر ان النور قاطع النهاردة عند كل المدونين....وخلى بالك احنا دلوقت فى عصر التكنولوبيا شوية كده مع التقدم هيبقى عصر التكنوفاصوليا

المـــفـــــــقــــــــوعـــــة مــرارتـهــا يقول...

ده فيه قناة مخصوصة للاعلانات دي الحقي حطي اعلان لبنتك هناك
ده فيه طلبات جواز عرفي ومسيار وكل اللي نفسك فيه هاتلاقيه ومن غير خشا ولا كسوف

خالتى بمبة يقول...

بنات مش عارفيين مصلحتهم هتندمو بعد كده على كل يوم من ايام البنوتية اللى فيها الدلع كله
وبعدين انا معاكى ان اللى بتصون نفسها وتبقى رزينة وعاقلة كده بيجيها الشخص المحترم اللى يقدرها ويصونها

غير معرف يقول...

شفقة ازيك؟ بصى أنا معاكى فى كل حاجة قلتيها و فى وسيلة تانية جديدة أكيد عارفاها و محدش بياخد باله منها لإنها طريقة غير مباشرة و هى...

.
.
.
.
.


الFacebook

أيوة ما تستغربيش كده هو الFacebook
طب ايه الحكاية دى؟
تلاقى البنت من دول حطة صورتها و هى لابسة اللى على الحبل أو تحط صورها بالأبيض و الإسود و أجمد لعب بالفوتوشوب
كمان لو مش محجبة تبقى عاملة شعرها و كام صورة جامدين بفساتين سواريه أو صور فيها شوية دلع و حركات و الولاد يقعدوا يقولوا انتِ زى القمر يا فلانة أو تجننى يا علانة و هما بقى ميرسى أوى ده بس من زوقك و حاجات كدة...

بس بجد المشكلة أنهم بيصعبوا عليا يا جماعة أى حد عدى سن ال25 بيبتدى يقلق لأنه شايف اللى من سنه و متجوز و معاه عيال أو عدى سن ال32 و بجد لو قلتلها أن معمولك عمل على رجل نملة حتنزل تدور عليها!!!!!

بصى الحل ان الحكومة تقفل المكاتب بتاعت الجواز دى و ان كان مش حينفع لأنه بالنسبة لبعض البنات ده زى شباك الأمل بالنسبة ليهم و أكيد فى 1\1000 مكتب مش حيبقى للنصب.

بصى أنا شايفة ان أحسن طريقة للتغلب على المشكلة دى ان البنت تشغل نفسها فى حاجات كتير زى: زيارات الأيتام و دروس دين أو تروح جيم. ممكن كمان تشتغل. أنا أعرف ناس كتير اتجوزوا من دروس دين و من الشغل. كمان ممكن تود قرايبها من وقت للتانى (مش لازم يعنى من العيد للعيد او كل رمضان مرة)
يعنى حاجات صغيرة و بسيطة بس ممكن دى تكون سبب فى النصيب و ان كان الواحد بيتولد و نصيبه ووقته مكتوب له.

بس البنات مستعجلة شوية :))))))))

شفـقــة و إحســــان يقول...

المفقوعة
وحشتينى عاملة ايه؟
والله بجد طيب الواحد بقى يقدم فى الاعلانات دى....وكمان من غير خشا وكسوف والله حاجة جميلة جدا اهو الواحد يقدم وهو مرتاح بردوا

شفـقــة و إحســــان يقول...

خالتى بمبه....منورة والله بجد
انتى فعلا معاكى حق مقاصيف الرقبة دول مش عارفين مصلحتهم وهيعرفوها بس بعد فوات الاوان

شفـقــة و إحســــان يقول...

ليلى ...ازيك يا قمر؟
اسكتى عارفه طبعا القفا بوك والوش بوك حاجة منيلة كل واحدة فيه حطه اجمل ما عندها وقال يعنى هتلاقى بكده عريس والله دول عايزين البوليس...وعلى رايك ياريت كل واحدة تشغل نفسها بحاجة لكن تقولى ايه ناس فاضية....ربنا يهديهم

HERO يقول...

مهو ده من باب مساواة المرأة بالرجل عايزين يتساوا بالرجالة في دي كمان وشوية شوية ممكن يروحوا يخطبوا العرسان من بيتهم ويجيبوا الشقة والجهاز
وعوضي على الله طول ما البنات دول مخهم فاضي ومدلعين هنشوف اكتر من كده

تحياتي

عروسة ننوسة يقول...

ايه يا شفقة العظمة دى...لا بجد موضوع مثير للاهتمام خاصة ان الموضوع ده بقى منتشر جدا...تسلمى

ادم المصرى يقول...

والله انا شايف ان ده من التصرع النفسى الى هما فيه فكرين انهم كدا حفظو على حبهم او ممكن يفتهم القطار
وسبحان الله فى منهم كتير اتوفقو فى ده وانصل حلهم وغيرو العرفى بى شرعى وشفت بعينى وفى الى اذا نفسو جامد جدا ولكن

ما علينا سوا الدعاء للحفاظ على مكارم الاخلاق والهما احفظ بنات المسلمين

**************
اتمنا اكون خفيف فى تعليقى
************
واتمنا زياره مدونتى

هوة فى أيه؟؟soso يقول...

ههههههههههه
طبعا يا بنتى ديه تابعات المشاكل الازليه اللى عايشينها
وأرتفاع سن الزواج
وأرتفاع نسبه النموسه
معلش سامحينى أصلى مش بحب أنطق اللفظ التانى أصلى بتشائم
هههههه
فكل واحده عايزة تلحق نفسها قبل ما النموسه تقرصها
ههههههه
حتى لو كانت حته مفعوصه 20 سنه
على العموم يا شوشو
أحنا لسه مشوفناش حاجه
ربنا يستر

شفـقــة و إحســــان يقول...

عروسة ننوسة
منورة يا قمر ربنا يخليكى وعقبالك ما نحضر فرحك

شفـقــة و إحســــان يقول...

ادم
منورنا يا جميل شكلك هتطلع دكتور نفسانى وهتجننلنا البنات....بس معاك حق ادعيلهم يمكن دعوتك تبقى مستجابة

نعكشة يقول...

مدونتكوا سكرة ماشاء الله


بصي انا معاكي في كل اللي قولتية

يمكن كمان بالنوزبالي لو هعنس يبقي قشطة بس معرضش نفسي لحد عشان يتجوزني
امو هند

بس فعلا زي ما خالتي بمبة قالت
بعد ما البنات بتكبر
سن 25 او 30 او ايفن 35

بتحس انو خلاص بقة
ولازم تلحق
ومش عايزة اي حاجة
يعني اكيد اتقدملها ناس اي حاجة
وهيا رفضت
سو بتدور عاللي هيا عايزاة

وبعدين ماهو زمان كان فية خاطبة
اعتقد المكاتب دية زي خاطبة
انما جواز النت دة مش عارف يلا عامتا

ربنا ما يوري البنات يوم وحش في حياتهم

انا اصلا لما دخلت افتكرتك هتتكلمي عن جواز النت اللي هوه جوزتك نفسي اونلاين
يلا خير

بقولك اية
كلام في سرك
انا فاتحة مكتب بستورد عرسان من الصين
لو عايزة 2 لبنتك و التالت مجاناً
انتي قشري س
وانا هقلي البطاطس :D

سلامون عليكي

شفـقــة و إحســــان يقول...

soso
بس خلى بالك ليتلم علينا النموس....وبعدين يجبلنا ملاريا والواحد مش ناقص كفاية الجرب!هههههههه

Asmaa mahaba يقول...

هههههههه يا بنتى اعزرى البنات دا ناقص نمشى بيفط فى الشارع وتيشيرتات مكتوب عليها مطلوب عرسان.....
ارحمينا شويه وايه الطاووس اللى ناويه تتجوزيه دا يا ست شفقه يا بنتى خليكى قانوعه انا شخصيا عاوزه واحد غلبان ريشه على قده يا دوبك متدفى هههههه ولا ملون ولا ابيض واسود انا راضيه يكون شفاف
واهو ضل راجل ...اقل من ضل حيطه بس مش مشكله...ادى الله وادى حكمته
تحياتى ليكى سومه_87

Unknown يقول...

دمك خفيف قوي .. ومعاكي حق في كل اللي قولتيه .. بس اللي يسمع ويعقل.. متشكر قوي على زيارتك لمدونتي واتمنى ما تكونش آخر مرة.

صيدلانيه طالعه نازله يقول...

مش عارفه مستعجلين على ايه
استعجلنا قبلهم و خدنا على قفانا
الواحد بقى شغال فلبينيه ببلاش
نفسى اسمع كلمه شكرا او كلمه اعجاب باللى باعمله فى البيت
قال عايزيين يتجوزوا قال
بلا هممممممممممممم

غير معرف يقول...

على فكرة انا مش معاكى انتى سنك كام انتى لو كنتى متجوزة او سنك وصل مثلا لـ 30 ومش متجوز كنتى حسيتى ليه البنت بتعمل كده
انتى ممكن متبقيش حسيتى بيها وبإحساسها لوصولها لسنها دا ونفسها تكون ام نفسها يكون عندها طفل تاخده فى حضنها وتحبه نفسها يكون ليها زوج يشيل عنها متاعب كتير او حتى يتقاسموا المتاعب سوا نفسها تحس انها انثى وليها رغبات
لما تكون واحدة محترمة ومش كل الى رايح واللى جاى عامل يغازل فيها ونفسها يكون ليها زوج هو بس اللى يقولها كلمة حلوة يكون لها طفل منه
انتى تعرفى يعنى ايه توصلى لـ 30 ومفيش مكان تقدرى تلبسى فيه لبس نفسك تلبيسه مفيش مرة حسيتى بأنوثتك
دى حاجات بتدفع البنت انها تدور بنفسها دا غصب عنها ما هى لو كنت لاقت مكنتش عملت كده
كل اللى علقوا يا سنهم صغير يا متجوزين
لم يمروا بالإحساس دا
لو مريتى بالإحساس دا هتغيرى رايك اصل احنا طبعنا نحكم على الامور من وجهة نظرنا من غير ما نحط نفسنا مكان الناس اللى بتعمل كده
مش يمكن واحدة مش مرتاحة فى بيت اهلها عاوز يكون ليها ولو مساحة 63 متر تقدر تاخد حريتها ولو بضع من الوقت
حاجات كتيير اوى انتى مش واخدة بالك منها معلش بقه طولت عليكى

كوارث يقول...

هههههههههههههههههههه
ربنا يديكي الصحة
كل ده ؟
انا فعلا معدتش بحترم الجرايد والمجلات اللي بتعمل كده ومن اسباب انفقاعي من مجلة الشباب الحديثة موضوع الجواز ده !
بقه عامل زي باب هل تعلم اللى جابنا ورا وكنتي تلاقيه في اي مصيبة حتى ميكي ماوس !!

شهرزاد يقول...

هههههه
طيب جورنال ايه ده عشان عايزاه
بجد مدونتك جميلة جدا ودمها خفيف
مشكلتنا في الوقت ده ان مابقاش في صبر
الناس عايزة تكبر بسرعه وتدخل الجامعه وتخلص بسرعه وتتجوز بسرعة وتخلف بسرعه
تقريبا وعايزين يموتوا بسرعه
مافيش صبر
سلمت يداكي

شفـقــة و إحســــان يقول...

سومة المجنونة....نورتينا وجنينتينا
ده بكره الاعلان يبقى على التىشيرتات وعلى الجلاليب والبنطلونات وهتبقى هيصة....بس يا سومة هو لسه فى رجالة غلبانة فى الزمن ده...يمكن بس معدوش عليا...وعلى فكرة ضل الحيطة افضل وادفىء بكتييييييييييييير

شفـقــة و إحســــان يقول...

حسام
منورنا والله اوعى تقطع الزيارات علشان نبقى نجى نشرب عنك نيسكافيه وكيك
وبعدين عامل تقولى دمك خفيف ايه هو انا ببيع زغزغه...ههههههههه لا بجد متشكرة
بس عايزة اقولك انت قلت للى يسمع ويعقل والحمد لله اغلب الناس اصبحوا مجانين حتى اخطف رجليك لحد السرايا الصفراء

شفـقــة و إحســــان يقول...

صيدلانية طالعة ونازلة
هديتى حيلنا من الطلوع والنزول ...نورتينا وقطعتى نفسنا
لا بجد معاكى حق بس هو الواحد خد على قفاه بس....؟ طيب خليها فى سرك
وكمان بتطالبى بحقك ...عايزة كلمة شكر للى بتعمليه..خسئتى اياك وان ده طلب صعب المنال يا ماما والحال من بعضه

شفـقــة و إحســــان يقول...

غير معرف
والله عاجبنى كلامك ...بس بردوا انا مش معاك لما الواحدة توصل لسن معين تبقى زى المجانين كده وتدور فى اى حته يعنى معنى كده انك شايف او شايفة ان الجواز بالطريقة دى صح؟ احتمال لكن فى اغلب الاحوال مابينجحش...ولو الواحد رجع بيه الزمن تانى بردوا مش هيفكر كده....واللى بتقول عليهم دول اللى مش لاقين مكان يلبسوا فيه براحتهم ابقى هاتيهم عندنا....ههههههههه
على فكرة اختلاف وجهة النظر لا يفسد للود قضية...اتمنى زيارتك دائما

شفـقــة و إحســــان يقول...

كوارث
منورنا بس والله الواحد مش عارف يرد عليك ولا يلحق نفسه قبل ما الكوارث تحل عليه....طيب مكنش فيه حاجة تانية اخف من كوارث يعنى زلزال بركان اهو حاجة واحدة والسلام....المهم متزعليش واياك والجرايد كفاية عليكى نقطة لحد كده لحد ما بقيتى كوارث....بس بجد اسعدتينى

شفـقــة و إحســــان يقول...

شهرزاد
منورة يا حبيبتى والله فكرتينى بالف ليلة وليلة
وبعينك مش هقلك اسم الجرنال....وبعدين عامله تقولى مستعجلين مستعجلين ايوا يا ماما ما تنسيش اننا بقينا فى عصر السرعة
والجواز والخلفة دول اصبحوا انجازات

شفـقــة و إحســــان يقول...

نعكشة
منورنا والله بس ياريت تتسرحى الاول
ميرسى على تعليقك الحالى اوى...مش بتقولى مدونتى سكر!
وبعدين عامله تقولى ايفين وسو وشايفة فى الموضوع لغات شرقية..وفى الاخر نعكشة اوه سيتروه....ههههههههه
وكمان عندك مكتب بتستوردى عرسان صينى طيب انا عايزاهم بلاستيك علشان الصينى بيتكسر بسرعة....ومش هشر علشان بجيب البطاطس فارم فريتس يا جهلة "عصر التكنولوبيا بقى"

Unknown يقول...

هههههههههههه
بجد جامده جدا جدا جدا
انا عاوزه من ده يا حزنبل
جميله بجد تسلم ايدك يا شيخه
جتهم القرف ملوا البلد

NilE_QueeN يقول...

تصدقي يا طنط شفقه ان موضوع الجواز دا ف دماغى
مش قصدي انى عايزه اتجوز انا قصدي ان القضيه واللى بيحصل فيها شاغلني

سواء اعلانات الجرايد او الشات او مواقع الزواج ف دا اشبه بنظام الخاطبه وانا زى ما برفض الخاطبه بتاعة زمان برفض الخاطبه العصريه



الناس اللى بتعمل كده معندهمش ثقة ف ربنا _اتمني مكونش غلطانه_ الانسان لو مؤمن انا نصيبه هياخده ومش هيروح لغيره مش هيعمل كل دا

وطرق التعارف اللى انتى اتكلمتى عنها دى مش كل حالاتها بتفشل

فى ناس الاسلوب دا يوافق تفكيرها ومعندهاش اى مشكله تتجوز بالطريقه دي

فى ناس بتاخدها تسليه ولعب
وفى ناس بتقول زي ما تيجي

شفـقــة و إحســــان يقول...

لماضة...اقصد ست الحكيمة....مبروك طلوعك فى التلافازيون نورتى اوه تى فى
ونورتينا هنا فى القناة بتاعتنا
وبعدين بعينك يا سعاد حسنى عم حزنبل مش هيديكى من ده...ده كان زمان من ابو بلاش دلوقتى كله بتمنه....ههههههههه
لا بجد اسعدتنى زيارتك جدا يا فتاة الشاشة

شفـقــة و إحســــان يقول...

nile queen
ايه العظمة والشموخ ده يا مولاتى والله نورت القصر بتاعنا وامتعتى الحاشية بكلامك الجميل
ومتخليش الموضوع يشغل بالك كتير بلا جواز بلا نيلة انتى بس اهتمى بالشعب وبالبلاط الملكى"عفوا اقصد السيراميك الملكى" ومتشغليش بالك بكلام فاضى زى ناس
تحياتى وانا منحنيه

Marwa Friday يقول...

يا صباح الفل
دمك خفيف يا شفوووووقة
عسل
عاجبني وصفك جداً
بس معقولة حكاية كام عريس بعت لك
هههههههه
ربنا يسترها
:)

Desert cat يقول...

احنا فى عصر الدش والعنترنت
يعنى لازم العريس كون دوت كوم ودوت نت كمان
تحياتى

Mony يقول...

مدونة تحفة يا شفقة
انا اول مرة ادخل بس انشاء الله مش اخر مرة


بالنسبة لجواز دوت كوب انتي عندك حق في كل اللي كاتباه

و بعدين انا بحس ان الموضوع ده فيه اهانة للبنت
انها تعرض نفسها للي يسوي و اللي مايسواش
و اغلب اللي بيدخل علي الواقع ديه ناس عاوزة تتسلي فبيبقي معظمهم ناس ماتسواش

ده اول خناقة هتقوم بين اتنين متجوزين بالمنظر ده هيعايرها و يقولها دانتي اللي كنتي عارضة نفسك
او يقول دانتي كنت بتدللي علي نفسك علشان تتجوزي

ادم المصرى يقول...

السلام عليكم

اذيك يا قمر انا نزلت الجزاء التالت من اميره بكل النساء اتمنا ان يعجبك البوست وده الفصل الاخير

عروسة ننوسة يقول...
أزال المؤلف هذا التعليق.
شفـقــة و إحســــان يقول...

مروة جمعة
منورنا بس انتى المفروض تزورينا يوم الاجازة....وبعدين عايزة تعرفى كام عريس جه لحد دلوقتى مش هقولك احنا هنبتديها قر وحسد من الاول .... لكن شكلك كده عايزة تعرفى انا نزلت اعلان فين علشان تنزلى فيه صح؟

شفـقــة و إحســــان يقول...

desert cat
نو نو نو يعنى نورتى بلغتك.....بس انتى سمعتى عن العنترنت والدش فين يا قطة ؟
انتى كبيرك البدو والقطط البريه اللى انتى عايشه معاهم فى الصحراء وكده احسن بلا نت بلا دش الرمل اجدع

شفـقــة و إحســــان يقول...

mony
ربنا يخليكى انتى اللى اتحف....بس كفايه علينا كده لحسن انتى غرقتينا بالكوب
وبعدين كلامك صح فيما عدا انها بتعرض نفسها للى يسوى واللى مايسواش لانهم كلهم يا ماما مايسوش وانتى قلتى كلمة حكمة انهم بيتسلوه وفعلا نظرا لان اللب والسودان غلى جدا والشباب معهوش....اتمنى زيارتك للمقله بتاعتنا

شفـقــة و إحســــان يقول...

ادم المصرى
منورنا وبما اننا ولاد بلد واحدة ومصريين زى بعض اتمنى ميكنش الجزء التالت هو النهاية وتعمل جزء رابع مع تعديل بسيط
شفقــــــــــة بكل النساء

غير معرف يقول...

ازيك يا شفقة حلوة منك بس انت جاية علي البنات كدة ليه كل بنت بتحلم بيوم الزفاف دون ان تدرك مسؤلية ما بعد هذا اليوم تعرفي ان حالات الطلاق بعيد عننا يا رب كترت قوي بسبب عدم الوعي بالمسؤلية الزواج
انا عايزاكي تتكلمي عن انواع الزواج ال هو يومين واقلب عارفة ولا مش بالطريقتك الساخرة الكوميدية
نور

شهرزاد يقول...

بجد دمك خفيف ولذيذ أوي يا شفقة
ياريت لو تشتركي معانا وترشحي مدونتك في كتاب مدونات مصرية للجيب
ادخلي على اللينك ده واقري الشروط
تحياتي

شهرزاد يقول...

بجد دمك خفيف ولذيذ أوي يا شفقة
ياريت لو تشتركي معانا وترشحي مدونتك في كتاب مدونات مصرية للجيب
ادخلي على اللينك ده واقري الشروط
تحياتي
http://sneen.blogspot.com/
أو على الفاسبوك
http://www.facebook.com/group.php?gid=13820826455

موناليزا يقول...

معاكى حق البنات متصربعين على ايه
ده محدش بياخد اكتر من نصيبه

سنووايت يقول...

تسلمي يا شفقة علي الكلام دا
علشان انا فعلا مفقوعه من الاعلانات دي وخاصة اللي بتيجي في التليفزيون لان دي مش اعلانات ناس بتدور علي جواز لا دي اعلانات حاجات تانية
وللاسف ولا فيه رقابة ولا اي حاجة وللاسف ان فيه ناس بتشارك فيها
للاسف
ربنا يستر من اللي جي الله اعلم ايه اللي هيحصل اكتر من كدة

شفـقــة و إحســــان يقول...

نور مش قادرة اقولك نورتينا لاننا من نورك اتعمينا
كل بنت بتحلم بيوم الزفاف خليها تحلم لان بعد الجواز مش هتشوف غير كوابيس ....اما بنسبة لانواع الجواز فمتخافيش اكيد هتطرق ليها بس بشرط بعد ما اجربها

شفـقــة و إحســــان يقول...

شهر زاد يا بتاعة الف ليلة وليلة
انا يا بنتى مرشحش مدونتى فى كتاب انا هعمل كتاب ايه رايك ؟ بس ايه لو مشترتيش يجى 200 نسخة كده انتى حره هاقول شهريار وانتى عارفة.... يا سياف!

شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

موناليزا الجميله
اسعدتنى زيارتك .....وعايزة اقولك كلامك صح محدش بياخد اكتر من نصيبه وده قبل الجواز.....لكن بعد الجواز بياخد اكتر من نصيبة يعنى مصايب واكيد انتى عارفه

شفـقــة و إحســــان يقول...

سنووايت
انتى جبتلنا برد

ايه بس اللى خلاكى تخرجى من التلاجه ؟
وبعدين معلش علشان خاطرى متتفقعيش من الاعلانات بتاعة الحاجات التانية دى لان ده وحش عليكى كده هتسيحى وتبقى ويتروايت "ميه" انتى حره!

غير معرف يقول...

no no no لآ يا حبيبتي بعد الشر عليك انك تجربي يومين واقلب ده وبعدين انت مش متجوزةولا ايه

maiosha يقول...

سلام عليكم

أنا جاية بس اجاوب على السؤال اللى كتبتيه .. الإجابة (برتقاله) صح؟؟

موضوعك بجد جميل جدا جدا .. بس فى نفس الوقت عقدنى .. طبعا زى ماهو باين عليا إنى لسه انسة بس بصراحة عندى 20سنة تفتكرى أعمل إعلان ولا أروح المكتب .. مين الأسرع؟؟

يالا ماهو عصر السرعة بقى

تحياتى

Ahmed Fahmy يقول...

الله
ربنا يخلي لنا عصر التكنولوجيا دة فعلا
ماحدش بياخد اكتر من نصيييييييبه
فين ايام الحب بتاع زماااااااان
فين الحب الجميل بين الهمسة و اللمسة و النظرة الحلوة
ايييييييييه دنيا
موضوع لذيذ اوي يا شفقة و بجد سعيد اني زرت المدونة الجامدة دي و بأيد اقتراح انك ترشحي مدونتك ف كتاب مدونات مصرية للجيب

M A K I يقول...

الموضوع ده بيفكرنى بالانسان اللي بيكون عارف ان المخدرات ضارة و برده بيدمن !

يعنى أكيد كل البنات و ف بعض الأحيان الصبيان عارفين العواقب الوخيمة و برده بيعملوا كده...هى بتبدأ بتسلية و بتنتهى بحالة مزرية..

Miss. Sosa يقول...

ليه يا شفقة الوحاشة ديه
انتي بتقطعى علينا
ده انا كنت ناوية اشتغل خاطبة اون لاين ههههههههههههه

ليه بتحاربيني فى لقمة العيش
اخس اخس اخس

-------
شوية جد بقى
الموضوع جميل بجد
بس زي ما غير معرف ما قال البنت لما بيتأخر سنها فى الجواز بتبقى عايزة توصل لهدفها باي شكل

فى كتير من اللي بيقدموا فى المواقع ع النت بيبقى هدفهم خير فعلا
بس ممكن حظهم يقع فى ناس مش محترمة داخلين هزار وا بنوايا سيئة ويتلاعبوا بيهم .. فالاضمن ان البنت تستنى رزقها
وتدعى ربنا باخلاص وربنا قادر كريم يحقق لها حلمها

----------
على فكرة انا مقصرة مع الكل فى المتابعة بسبب شغلي والله .. ادعولى بس اقدم البروبوزال وانا اسيبلكم 10 كومنتات مش واحد

ســـلام

مجرد خواطر يقول...

السلام عليكم
انا اول مرة امر هنا يا شفقة بس احمدى ربنا ان الجواز نص كم مش حمالات.اه والله فى جواز حمالات

كيكى عوووووو يقول...

عوووووووووووووووووووووووووو انا جيت اتخدتم....بصى موضوع مهم..بس لو رجعتى للاصل لية بيعملوا كدة....هتلقى ان المشكلة فى مجتمعنا ان البنات خايفة من كلمة عانس..صدقينى دى صعبة اوووى...لكن المشكلة دلوقتى انهم بيضحكوا على الناس ازاى كانت القنوات او النت بيستغلوا النقطة دى اسوا استغلال...محدش بيعمل كدة وهو مبسوط صدقينى...سلام دلوقتى علشان جالى العريس رقم..1556845

شفـقــة و إحســــان يقول...

نور احمد
ايه يا نور النونوه دى؟ انتى باعته لقطة؟
وبعدين بذكائك هو انا لو مكنتش متجوزة كنت عملت المدونة دى اصلا!
واكتمى خالص لحسن احسان ياخد خبر وتفضحينى

شفـقــة و إحســــان يقول...

maiosha
ايه النور والذكاء ده؟
برتقالة لا بجد هايلة !
وبقولك ايه انا قريب هفتح مكتب للجواز هبقى اديكى العنوان علشان تكونى اول زبونه

شفـقــة و إحســــان يقول...

ahmed fahmy
ايه عمال تصرخ ليه يا عبد الحليم يا بتاع الزمن الجميل؟
وبعدين لمشة ايه وهمشة ايه اللى انتى عايزهم احنا دلوقتى الحاجات دى بقيت دليفرى

شفـقــة و إحســــان يقول...

مى
نورتينا وسطلتينا
عندك حق يا مى اصل نوعية البنات دى بتبقى حشاشة بس الموضوع بيبدا بتسلى وبينتهى بحلة مزبلة مش مزريه!
اتمنى زيارتك ومرحبا بكى فى الغرزة بتاعتنا

شفـقــة و إحســــان يقول...

miss sosa
اه منك يا سوسة يا ليئمه بقى كنتى ناويه تشتغلى خاطبك بعينك انا سبقتك واياك وان تقطعى عليا والله ااعمل اعلان اكتب فيه انك بتجيبى عرسان مضروبه وغير صالحة للاستخدام الادمى
بس سؤال......ايه البزازة دى انتى بتشتغلى فى حضانه يا سوسه!

شفـقــة و إحســــان يقول...

طائر حزين
نورتنا فى الحديقه بتاعتنا
وبعدين كلام فى سرك ده فيه جواز cut كمان
وستومك وساقط بس بيبقى من الوكاله!

شفـقــة و إحســــان يقول...

كيكى
اتخضينا والله ايه عوووو دى....انت عفريت
على العموم نورتنا وبعدين ليه البنات بتخاف من كلمة عانس هى وحشة ولا وحشة مش احسن من كلمة مجوزة وتعول ؟
وبعدين الرقم ده رقم عريس ولا عربيه الاسعاف؟

R-H-S يقول...

هههههههههه
كل واحده زنبيها علي جمبها
هتبص تلاقي نفسهاالقطر عدي المحطه وهي عماله تشيت في العرسان
تحياتي

شهد الكلمات يقول...

المدونة دي تحفة بجد

و دمها خفيف و اسمحيلي اضيفها عندي في المدونة

انا قريت اغلب المواضيع حلوة جدا و فكرتها جديدة

بس هو احسان بك فين مش بيكتب لية بقاله مده

تقبلي مروري اللي لا يمكن يكون الاخير

تحياتي

حبيبـــــــة القمـــــر يقول...

ايه الجمال دا بس
المدونه دمها شربااااااات
بجد ياشفقه انا لفيت فيها وعجبتني جدا
خلاص كدهانا لميت عزالي وجيت فرشت هنا مدونتك هواها بحري ويرد الروح

خالص تحياتي ياقمر

ReEm يقول...

ربنا يخليكو لبعض مدونتكو حلوة اوي

رد على البوست يا ستي اللي يعيش يما هيشوف اكيد انا ضد الحاجات دي خصوصا لو البنت صغيرة بس البنت اللي بتكبر من غير زواج المجتمع مش بيرحمها و بتبقى نظرتهم ليها انها معيوبة و مالهاش قيمة لو ايش ما عملت كتر الضغط ده من اللي حواليا و اللي بيبقى اولهم اهلها اللي حسو انها هم و شايلنه عشان ماتجوزتش ممكن يخليها في لحظة تفقد توازنا وادراكها و تمشي في الحاجات دي و تتبع امل كداب ممكن يخلصها من اللي هي فيا و ممكن يكون فعلا فيه نصيبها بس في الغالب العاقلة بترجع بس ساعات كتر الضغط النفسي اللي بيمارس على الي متجوزتش و همز ولمز اللي حواليها هو السبب دول ممكن يقولولك عقبالك كانك شحاتة او متشردة بيشفقو عليها بجد احساس صعب يارب ماتحسوش اي بنت
بوست جميل زي باقي المدونة


الا على فكرة سؤال في اول زيارة ليا
هو استاذ احسان فين مش باين غير البوستين اللي في الاول ؟!

شفـقــة و إحســــان يقول...

gehad
منورة السكة الحديد يا قمر ....وبعدين هى ذنبها هيبقى على جنبها بس ! ده هيبقى على البودى كله !

شفـقــة و إحســــان يقول...

شهد الكلمات
نورتينا ولزقتينا بحلاوتك
وميرسى على زوقك انتى اتحف اتمنى زيارتك علطول واحسان يا ستلى لسه تعبان من ساعة ما حدفته بالمجداف فى البوست بتاعى وان شاء الله يسترد صحته ونستكمل المباراه

شفـقــة و إحســــان يقول...

حبيبة القمر
ايه يا بنتى شربات ايه انتى بتزورينا فى فرح! وبعدين تعالى هنا ايه الاحتلال والاستعمار ده هتلمى حاجتك وتيجى عندنا....احنا مدونتنا مش بحرى صحراوى وحر مووووووووووووووت

شفـقــة و إحســــان يقول...

reem
ايه يا بنتى الشحاته دى انتى هتقلدينا ولا ايه؟
وبعدين ملهومش دعوة بلا همز ولا لزم ده كلام فاضى اللى واثقة فى نفسها تتركن جنب امها
احسان الحمد لله فاق من المجداف وعاد اليكم

Rannon يقول...

والله معاك حق اللي بيحصل ده تهريج
مكاتب زواج ايه واعلانات ايه..وجواز ايه ده اللي البنت هي اللي تدور فيه على الراجل؟؟!!
زي ما قلتي البنت المفروض تصون كرامتها وتستنى نصيبها اللي هيجيلها في وقته..
وأدينا مستنيينه هيحصلنا ايه يعني :))

إبعت يارب:))

بوست هايل كالعادة
تحياتي :)