الأحد، 15 يونيو، 2008

اجــــــــــــــــــــــــــازة مرضـــــــــــــــــــــــــــــيه

أجــــــــــــــــــــــازة مرضيـــــــــــــــــــــــة
226 magnify

أصدقائنا ... صديقاتنا
عدنا بعد الفاصل
والفاصل ده المفروض انه كان زيارة عادية لأهلي وأهلها
بس زيارة الأهل دي كانت هتقلب زيارة من نوع تاني
زيارة ضريح
ضريح السيدة/شفقة و السيد/ احسان
وعاجباني كلمة "ضريح" دي أوي
محسساني اني راجل "ضريح" و "ضوغري"


هههههههه
كفاية كده مقدمات
واليكم الأنباء بالتفصيل

اليومين اللي كنا فيهم عند أهلها قضيتهم شفقة عيانة بالمعدة
تقريبا ماصدقت لقت أكل ببلاش فقالت تحوشه في بطنها
فطبعا قضينا اليومين دول
مشروبنا المفضل كان عصير الليمون والنعناع والينسون
والوجبة اليومية كوكتيل من الخضار المسلوق
يسبقه فوار الفواكه
ويتبعه خلطة أقراص وكبسولات كله على بعضه
يعني من الآخر يومين آخر جمال

بمجرد ما شدت حيلها شوية
أخدتها ورحنا عند أهلي
وأنا ناقم على اليومين اللي قضيناهم في مستشفى أهلها
قصدي ( بيت ) أهلها
وهيا يادوب ليلة اللي قضيناها في السليم
صبحت دماغي تقيلة وعظمي مكسر
وشوية وجسمي سخن والحرارة بقت فوق الـ40

بقت حالتي صعبة وتصعب ع الكافر
طبعا صعبت على شفقة هانم
ربنا يخليهالي يارب وما يحرمني من جدعنتها
راحت نازلة "بعد محايلة" وجابتلي 3 علب زبادي

آه والله
بقيت مش عارف أودي جمايلها عليا فين


المهم عدوا تلات ايام على خير
والأهم اني ما اكلتش من الزبادي غير علبة واحدة
وخفيت الحمد لله
وربنا ما يحوجنا لحد



اللذيذ في الموضوع يوم ماقلنا هنروح بيتنا
طبعا مسكوا فينا ياجماعة استنوا تمشوا بعد الغداء
قلنا وماله ؟ أهي مصلحة برضه
ومش هاقدر أوصفلكم في الحالات دي مراتي بتسيب الثلاجات عاملة ازاي
صحراء جرداء لا أكل فيها ولا ماء
طبعا ده بحجة انها ما تأكلنيش أكل بايت
فيكون الحل انها ما تأكلنيش خالص


هاااااااا
أم هئ
اتغدينا .. حلينا .. وقعدنا شوية
وقبل ما أسال "ننزل نروح" لقيت سؤال مفاجئ
ممكن انزل ساعة أشتري حاجة من عباس العقاد ؟
وأنا بكل كرم أخلاق قلتلها : وماله

طبعا ماهي كاسرة عيني بـ 3 علب زبادي


أم هئ


بعد ساعتين لقيتها بتكلمني على الموبايل

بنت خالك كلمتني وعرفت اني جنب بيتها
وقالتلي هازعل بجد لو ماعدتيش عليا شويه
وطبعا عملت خاطر لبنت خالي علشان ماتزعلش
وكمان خاطر لبنت حماتي علشان ماتتضايقش
وأتفلق أنا مش مهم
دول 3 علب زبادي ياجماعة
مش أي كلام

هيييييييه
تنهييييييييده
المفروض انها هتتأخر ربع ساعة
عايز أقولكم اني بعد زهقي من التحويل بين قنوات الدش
لميت جرايد البيت جديد وقديم وقعدت أقراها
ولما قريتها وخلصتها وقطعتها
قلت أكمل زهقي على الدي في دي
واتفرجت على فيلم "الشبح" بالكامل
والفيلم بصراحة رغم خفة دمه وروعته
الا ان مشاهد القتل كانت كتيرة قوي
وانا كنت في حالة مزاجية تسمح لأبو الأباليس انه يستغلني
خفت من الفكرة لتكبر في دماغي
قمت أخدت دش عشان انسى
خرجت لبست هدومي وانا ناوي أروح لوحدي
اذ بي افوجأ بتليفوني بيرن ... آه آه ... تيرلم تيرلم
واللي ردت آه يا عيني ... صوتها يغم
مع كل اعتذاري ليك يا تامر يا حسني
بس صدقني انت لو كنت مكاني كنت قلت أنيل من كده
ويمكن ماكنتش غنيت عاطفي من أصله

أم هئ
تقول ايه الهانم لما تعرف اني كنت ع الباب نازل أروح لوحدي
ايه ده بجد ؟؟ طيب كويس اني لحقتك قبل ما تنزل
عدي عليا بقى خدني معاك
شفتوا أسقع من كده رد ؟؟؟
اضطرتني أتعامل معاها على اني فريزر بيتكلم مع تلاجة
قلتلها ماشي ياروحي يا 16 قدم انتي
أنا قدامي 7 دقايق بالظبط والترموستات يفصل وأكون عندك
بس عايزك تستنيني تحت
علشان مايعزموش عليا أطلع والوقت اتأخر وأنا مش شايف قدامي
الجنينة اللي في مدخل العمارة فيها كرسي بامبو
اقعدي عليه على ما أجيلك
يادوب على ماتسلمي تلاقيني قدامك
طبعا فهمتوني
ايه
مش فاهمين ؟؟
أنا مارحتلهاش
أنا قلت أفرغ طاقة الغيظ اللي جوايا
علشان لو كنت روحت كده معاها
أولا كان مش هيجيلي نوم من الغل
ثانيا كنت ممكن أرتكب جناية وأقول "أحمد عز" هو اللي وزني
سامحني بردو يا أحمد يا عز

طبعا حسيت براحة مش ممكن هيفهمها غير اللي يجربها
كأنك كنت معتقل من سنين .. واتفك أسرك فجأة
هيييييييييييييه
فرحة عيالي شويتين
أخيرا أنا حر
على الأقل أسبوعين كده ولا حاجة
على ما تاخدلها كورس أمص ولوي بوز
بس فيه مشكلة
البيت فراغ من أي شي صالح للاستخدام الآدمي
قلت لنفسي بسرعة
وايه يعني
نرجع تاني لأيام العزوبية
حد طايل ؟؟

أعدي على السوبر ماركت أجيب أي حاجة
المهم أسد فراغ التلاجات اللي شغالة بتبرد في نفسها
لدرجة اني فكرت أفتح بيبانهم وأحط جواهم مروحة
يعني أحولهم تكييفات من الآخر

أم هئ
دخلت السوبر ماركت
بضعت من كل صنف ولون
لحوم .. فراخ .. أسماك .. خضار مجمد .. وجبات نصف تجهيز
مع البقالة والعصاير والحلو والوحش وكله
آه لسة ناقص حاجة
اللبن
رحت قسم الألبان
بامد ايدي أجيب اللبن الرايب
وقعت عيني على الزبادي
نفس العبوة
من نفس الحجم
لنفس الشركة
من نفس نوع الزبادي اللي كانت حبيبتي جابتلي منه وأنا عيان
شريط سينما مر بسرعة
الـ 3 ايام اللي كنت عيان فيهم
فلاش باك
و الـ 3 علب زبادي اللي جابتهملي
زووم إن
الزبادي اللي قدامي على الرف
كاميرا محمولة
إزازة اللبن الرايب اللي بقالي ساعة مادد ايدي أجيبها
وقعت من على الرف
عملت صوت
زووم أوت
الناس بصت ناحيتي
وأنا في نفس اللحظة فقت من سرحتي
حسيت ان كل الناس باصين عليا ومستغربين
بس مش بسبب الإزازة اللي وقعت
لأ
حاسيت انهم كلهم عارفين اني بقالي ساعة هنا في السوبر ماركت
عمال أعمل شوبنج
وسايب مراتي مستنياني على كرسي البواب
في جنينة مدخل العمارة
الناس باصينلي باحتقار كده ليه ؟؟
هو أنا بجد أستاهل كده ؟؟
بيتهيألي عندهم حق
أنا كده غلطت
اجري بسرعة
شوف أقرب كاشير
لأ ده زحمة
اللي هناك ده فاضي شوية
أرفع اللي اشتريته بسرعة من العجلة
أحطه قدام الكاشير
بسرعة لو سمحت علشان واقف صف تاني
أي كلام
الولد اللي بيحط مشترياتي في شنط شغال على مهله أوي
بدأت أساعده
حاسبت الكاشير
أخدت الشنط بسرعة
كانوا كتير
الولد شالهم
عنك يا باشا
وأنا في عقلي : باشا مين يابني ؟؟
انت لو تعرف أنا عامل ايه في مراتي دلوقتي ماكنتش شيلتلي الشنط
كنت لبستهالي في دماغي
بسرعة حطهم في شنطة العربية
آدي كل الفكة اللي معايا
نصها ليك ونصها للمنادي
دورت بسرعة ومشيت بسرعة لأ جريت بسرعة
كويس اني مارحتش بعيد
بيت بنت خالي قريب جدا من هنا
في دقيقتين كنت قدام العمارة
نزلت أوام أدور على مراتي حبيبتي
وأنا مش عارف هاقولها ايه اللي أخرني كده
مش مهم
بس هي فين ؟؟
تكون طلعت تاني لما اتأخرت عليها ؟؟

تكون زهقت ومشيت ؟؟
طيب هتروح على فين ؟؟
بيت اهلي علشان أقرب ؟؟
ولا بيت أهلها علشان زعلانة ؟؟
ولا هتكون عاقلة وفي بيتنا دلوقتي ؟؟
أكلمها على الموبايل
وأنا بأطلبها افتكرت انها ماكلمتنيش لما اتأخرت عليها
ياترى فيه ايه ؟؟
ردت عليا
صوتها عادي جدا
استنيت تعاتبتني على التأخير ... ماحصلش
وعرفت انها فوق ونازلة على طول
سألتها : انت فوق من امتى ؟؟
قالتلي : من ساعة ما كلمتك
سألتها : يعني لما قلتلك استنيني تحت مانزلتيش ؟؟
ردت بالبرود المعهود : هو أنا مش عارفة مواعيدك ولا ايه ؟؟
طبعا لأ
جردل ميه ساقعة متلجة نزل على نفوخي اللي وصل للغليان
ولقيت رجلي مش شايلاني
والعربية على الصف التاني من الشارع
رحت قاعد أنا على كرسي البواب البامبو اللي في مدخل العمارة
وقعدت على الحال ده تقريبا تلت ساعة
واللي طالع واللي نازل يبصلي ويقول في باله
هوا ده البواب الجديد ؟؟
لحد ما ظهر البواب الحقيقي للعمارة
وقبل ما يسألني انت مين ولا قاعد هنا ليه
عرفته بنفسي
وطبعا قمت من كسوفي وقعدت في العربية
لقيت الراجل باعتلي ابنه بكباية شاي
وأنا بصراحة ما باشربش الشاي
أشرب أزوزة أنا
مع اعتذاري برضه لليلى بنت نظمي
خلينا في موضوع شفقة بنت ..... ولا بلاش

أم هئ
أخيرا ظهرت الهانم
قررت ما اتكلمش معاها لحد مانروح
بامد ايدي في جيبي أدي الولد ابن البواب حاجة
وأنا بأرجعله كباية الشاي اللي دلقتها وكأني شربتها
مالقيتش معايا فكة
اضطريت آسفا اني أتكلم معاها
مجرد سؤال : ممكن 5 جنيه ؟؟
وكان الجواب برده سؤال : ليه ؟؟
رديت علشان أخلص : هأديها لابن البواب
وجاني الرد
جاني الرد جاني ولقيتها مش طايقاني
مع اعتذار شديد جدا للعندليب
الرد حقيقي كان مفاجئ
ضربة ارسال
ساحقة ماحقة لا تصد ولا ترد
حسيت اني متجوز "شتيفي جراف" في عز مجدها
مع اعتذاري ليكي برضه يا "شوشو"
شكلي هاقضيها طول اليوم اعتذارات ولا ايه

أم هئ
الهانم ترد تقولي ايه لما طلبت فكة أراضي بيها ابن البواب
تيجي منين الخمسات ؟؟
انت ناسي ان أول الشهر عدى وما خدتش منك مصروف
ولا مصروفي ولا مصروف البيت
ده أنا شفت "جزمة" كانت هتطلع من عيني
"دعيت في سري وقلت يارب تدخل في عينها بدل ما تطلع منها"
وما رضيتش أجيبها
علشان أجيب حاجة في ايدي وأنا طالعة عند بنت خالتك
وأول أول امبارح لما كنت عيان
مش جيبالك زبــادي ؟؟؟؟؟

ايه؟؟
نعم ؟؟
يااادي الزبااادي

فورا غيرت اتجاه سيري
ورحت لحمايا أطلب منه القايمة
أيوه القايمة اللي مضاني عليها زمان
لأ مش علشان أقطعها
لأ
علشان هاضيف عليها الـ 3 علب زبادي


احـــــــــــــسان

هناك 43 تعليقًا:

المـــفـــــــقــــــــوعـــــة مــرارتـهــا يقول...

كل ده عشان علبة ذبادي أومال لو كانت حنت عليك وعملتلك شوربة خضار
كانت عملت ايه فيك
بس انتم كدة رجالة مش بيطمر فيكم
الست كتر خيرها جابتلك ذبادي ... عاوزها تعمل ايه تاني
انت كان مفروض تشتريلها هدية عليها القيمة نظير وقفتها جنبك في عياك

الف سلامة ليكم انتم الأتنين ومانجيلكوش في حاجة وحشة

كاتب مصري يقول...

والله أسعدتوني جدا جدا جدا يزيارتكم دي وتعليقكم
أقول ايه ربنا يكتر من زيارتكم يا أصحاب الدم الخفيف..
وشكرا على شوية الضحك دول

HERO يقول...

ههههههههه
فعلا ثنائي ملوش حل فيه تفاهم وتسامح لأبعد الحدود حاسس ان انتوا الاتنين في جبهتين حرب وبتحدفوا بعض بالزبادي
ربنا يخليكوا لبعض
بس انا حاسس ان انتوا بتحبوا بعض قوي صح ؟؟ ولا ايه ؟؟

تحياتي

Desert cat يقول...

بص بقى يا احسان بيه بما ان حضرتك لما مرضت شفقة هانم اجبت لك 3 علب زبااااادى 3 وهى دى جدعنة وشهامة ولاد البلد وعلى راى محمد ابو سويلم فى الارض وعلشان كنا رجاله ووقفنا وقفة رجاله
المفروض انك تجيب لها هدية دهب
وسيبك دلوقتى من اقلايمة

Unique يقول...

يادي الزبادي اللي محيرك

ردهولها وريح ضميرك

هههههههههههههههههههه

اوعى تفكر يقول...

كل ده بسبب الزبااادى
ياعم بطل اكله وخلصنا
كفايه ذل بقى

GeHaD-----(male) يقول...

ايه ياعم احسان علشان 3 علب زبادي تعمل فيك كدا
ايش حال انك راجل الدار
الزبادي كان من ابو كام؟؟؟؟
علشان نعرف يعني هيأثر في القايمه ولا لأ
تحياتي

ادم المصرى يقول...

ههههههههههههههههههه زبادى امال لو فى رمضان كانت ولعت فيك
ايه الثنائى الجامد جدا ده احييك بجد بوست تحفه تحفه تحفه ....

بسم الله اليوم نتعاون من اجل تدويننا من اجل الاسلام ومن اجل ديننا فى جعل يوم من ايمامنا فى التدوين لله الواحد مستنيكم عندى

اهو ده عيبه يقول...

دى اول زيارة وان شاء الله ابقى زبونة مستديمة
مكنتش اعرف ان الزبادى ممكن تخلى الانسان رومانسى وشاعرى كده
امال لو كنت اكلت التلات علب كنت حسيت بايه

بجد بوست حلو قوى وان شاء الله اركب العجلة واخد لفه فى المدونة واقراها كلها

تحياتى لك ولها

سومه...مجنونه فى بلد عاقل يقول...

ههههههه الف سلامه عليكم انتوا الاتنين
تحياتى ليكم سومه_87

بنوتة من وسط البلد يقول...

انت الى غلطان من الاول .. انت الى دلعتها .. وكمان امنتلها واكلت من اديها علبه الزبادى

المهم اخدت بالك بس من تاريخ الصلاحية

وع العموم الى اتلسع من الزبادى يبقى ينفخ فى الشوربة بعد كده :)

تحياتى

بيكيا للبيع يقول...

ههههههههههههههه
ايه ده يا عينى هو فيه حد كده معلش معلش بقى يا احسان

rara يقول...

مساء الخير
بجد مدونة جميلة وفكاهية اوووووى
ودى اول زيارة لكن مش هتكون الاخيرة

ودمتم بخير وسعادة وربنا يوفقكم

تقبلو تحياتى

بنت مصريه يقول...

ههههههههههههههههه
الله يجازيك يا احسان
نفس مواقفى مع زوجى سبحان الله
بس قوللى بقى السوبر ماركت كان ماركاتو ولا ابو زكرى ههههههههههههههههه

PrInCeSS BeRy يقول...

هاى اخباركوا اية مدونتكوا دمها خفيف اوى ما شاء الله وضحتونى بجد تسلموا

واحدة مفروسة يقول...

هههههههههههههههه
3علب زبادي ...ملكوا حوا من آدم
3 علب زبادي خلو آدم مكسور العين قدام حواء
3علب زبادي فسحوا حواء لوحدها و شيلو آدم شنط السوبر ماركت

مممممممممممممممممممممم

سلام لما اروح اجيب 6 علب زبادى لجوزي و اجيلكم تااااني
ههههههههههههههههه

نهر الحب يقول...

اية الحب دا كله
انا حاسة ان قلبك بيوجعك من كتير حب زوجتك بدون زبادى طبعاا هههههههه
وانك متحملها وحاططها فى عينيك
ههههههههههههه

اولا سلامتكم
بوست دمه خفيف جداا
وبصراحة انت بتستحمل بس اكيد هى لها رأى فى الموضوع داا

ان شاء الله امر تانى من هناا

شفقة هانم واحسان بك يقول...

المفقوعة
فقعتينا وكترتينا....طبعا كل ده علشان علبة زبادى وهو علبه الزبادى دى قليله؟وبعدين متزعليش علشان خاطرك انتى بس هشتريلها هديه ....وهتكون كيلو لبن بحاله علشان تعملى زبادى ايه رايك بقى فى الهديه دى؟ شفتى ازاى انا راجل مدلعها

شفقة هانم واحسان بك يقول...

كاتب مصرى
والله انت اللى نورتنا فى الجريده بتاعتنا .....بس بقولك ايه انت عرفت منين ان دمنا خفيف ؟ هو حد فتن علينا وقالك اننا مزودينه ميه ..ولا انت عندك معمل تحاليل؟

شفقة هانم واحسان بك يقول...

hero
اهلا يا هركليز منورنا بس بقولك ايه من غير عنف....حرب ايه وجيش ايه يا عم اسكت بقى لحسن شفقة هربانه من التجنيد ولو سمعتك هتيجى تحدفنى انا وانت بعلبة الزبادى
وبكده هتعرف اجابه سؤالك احنا بنحب بعض ولا ايه

شفقة هانم واحسان بك يقول...

desert cat
لا بقى بسبب تعليقك ده انتى هتخلينى انونو بجد دهب ايه وبتاع ايه كده بردوا تقوميها عليه اهى شبطانه اهى وعايزة دهب عاجبك كده؟ هى دى الجدعنه وشهامة ولاد البلد..ولا ولاد الصاغة!

شفقة هانم واحسان بك يقول...

unique
حرااااااااام بقى معقول يا ناس ارد 3 علب زبادى بحالهم ؟ انا كده ضمير هيتعبنى طول العمر مش هيرتاح

شفقة هانم واحسان بك يقول...

اوعى تفكر
منورنا....صحيح هاقولك ايه ما انت اوعى تفكر بتتكلم وخلاص ...وهو يا ابنى فى حاجة تانيه تتاكل وانا قلت لا؟؟

شفقة هانم واحسان بك يقول...

gehad
اهلا يا مرحبا برجاله...سعره مش هياثر فى القايمة....هياثر فى القاعده شوف انت بقى يبقى بكام؟

شفقة هانم واحسان بك يقول...

ادم المصرى
لا لو فى رمضان كانت علقتنى بدل الفانوس

شفقة هانم واحسان بك يقول...

اهو ده عيبه
منورة بس بقولك ايه وانتى بتاخدى لفه بالعجله اوعى تخبطينا....اما بخصوص انك هتبقى زبونه مستديمه فمفيش مانع انك تاخدى شكك وبالتقسيط المريح كمان

شفقة هانم واحسان بك يقول...

سومة المجنونة
الله يسلمك بس ايه هو انتى عقلتى ولا ايه ؟

شفقة هانم واحسان بك يقول...

بنوته وسط البلد
الله يخليكى يا نصفانى ....اعمل ايه راجل حنين بدلعها بس ما بيطمرش فيها ...اما بالنسبه للصلاحيه فكانت منتهيه من 3 سنين
بس مش صلاحية الزبادى ...افهمى انتى بقى

شفقة هانم واحسان بك يقول...

بيكيا للبيع
منورة....اه شفتى فيه حد كده بس بقولك ايه ماتخدميش اخوكى احسان وتاخدى شفقة بيكيا للبيع وانا موافق باللى تدفعيه

شفقة هانم واحسان بك يقول...

rara
اه يا طماعه عجبتك المدونه علشان كلها فكاهيه وفيها فاكهه كتير اه بس يكون فى علمك احنا مبنديش حاجة ببلاش كله بتمنه قبل ما تزورينا تانى وتقولى ماحدش قالى

شفقة هانم واحسان بك يقول...

بنت مصريه
انتى كمان بتعملى كده مع جوزك ....طيب والنبى السلام امانه للراجل الطيب ده وياريت تبقى تعرفينا على بعض
اما بالنسبه للسوبر ماركت فكان من عند اللبان

شفقة هانم واحسان بك يقول...

priencess
منورنا يا مولاتى فى القصر بتاعنا وميرسى اوى لرقه عظمتك

شفقة هانم واحسان بك يقول...

واحده مفروسة
فرستينى كده بردوا ربنا يكون فى عون ادم اقصد راجل الدار وبقولك ايه .....ابقى قوليله يكتب ال 6 زبادى فى القايمة اه علشان يضمن حقه

شفقة هانم واحسان بك يقول...

نهر الحب
ايه فيان الكلام ده ونبع الحنان المتدفق ده؟
فعلا انا بموت فيها ومن كتر حبى فيها مش قادر استحملها فى عنييه اصل عينى ضيقه ...وهنستناكى تمرى علينا احنا فاتحين الباب علطول

كاتب مصري يقول...

أولا والله كتبت حلقة جديدة انت مشفتيهاش ولا ايه ده انا خايف من ردة الفعل بتاعتكم عشان هي حلقة حزينة شوية..
ومن ناحية مدونتك تبقى عندي حاضر فورا بس والله تلاقيني سهيت حاكم أنا بنسى بسرعة
خير
سلام

نور احمد يقول...

ان الاعتراف بالحق فضيلة يعجبني عدم تركك للمدام في الشارع ويعجبني ايضاً ذكاء الزوجة لموعيد زوجها مما يجعلهاتنتصر دائما
شاو

sosa يقول...

هههههههههههه
كل ده عشان الذبادى
ههههههه
حراااااام

والف سلامه عليكوا أنتوا الاتنين
بجد مدونه تحفه تحفه
دمكم زى العسل

وصور الممدونه تحفه جدا
أنتوا بتجيبوها منين؟؟؟

Sometimes يقول...

هههههههههههههههههههههههههه
الله يكرمكم ويسعدكم يارب
شفقة هانم
انتى سكرة بجد ونصايحك هايله اكيييييييييد
احسان بك
مهما تلف وتدور انت بتموت فى مراتك ربنا يخليهالك

سعدت جدا بمرورى على مدونتكم الجميله والفريده من نوعها وكل موضوعاتكم فى الصميم

وفرحت اكتر لما لقيتها بتقربكم لبعض كمان وكمان

سلاااااااااااااام

إيما ( أم البنين) يقول...

خلاص هموت من الضحك ..الأولاد بيقولوا ماما إتجننت ولا إيه...
شكرا جزيلا
وعلى فكره دي مش أول زياره أنا زرتكم قبل كده ورديتم علي لكن من غير نسكافيه ولا كيك ولا حاجه ..باقيه
ياريت دايما تشرفوني والنسكافيه علي
أم البنين

كيكى يقول...

ههههههههههههههههه
كل دة علشان زبادى
ههههههههه
على فكرة انتوا بخلة اووووووووووووى
مش بتردو الزيارة

حبيبـــــــة القمـــــر يقول...

ههههههههههههههههههه

الزبادي يعمل كل داااااا

مش ممكن بجد البوست تحفففففففه
تسلم الايادي

ام البنات يقول...

انا بس بثبت حضور
وبعدين هاعلق بصرحاة مدونه لطيفه واسلوبكم محبب الى النفس

Rannona يقول...

هههههههههههههههههههه
وضيفت ال3 علب زبادي ؟؟


بوست جميل
تحياتي :)