الأحد، 28 سبتمبر، 2008

وحوي يا وحوي ......... إيوحــــــة

كل سنة وانتم طيبين
ورمضــــان كريم


ولو انها جاية متأخرة
بس والله أنا بقالي شهر وزيادة عايز أكتب البوست ده
بس كان مزاجي متعكر شويتين
فخفت لحسن انقلكم حالة الغم اللي أنا فيها
ودي حالة بتجيلي كل سنة في نفس الميعاد ده
الأسبوع اللي قبل رمضان على طول
لأني بافتكر شخص عزيز عليا

أعز أعز صديقاتي
وبعد عشرة فوق التلاتين سنة
افتقدتها في الوقت ده من أربع سنين
قبل رمضان بأسبوع بالظبط

بالتحديد كان يوم 8 أكتوبر
وأول رمضان كان موافق 15 أكتوبر
فجأة ومن غير ميعاد حياتي اتبدلت

*****


من يوميها وأنا مش حاسس بطعم الأكل
أهو باسد فراغ في المعدة بأي حاجة والسلام
باكل لمجرد مايقولوش عليا ده مات من الجوع
لأنها هتبقى موتة بفضيحة

*****


من يوميها وأنا مش قادر أضحك بجد
الضحكة الملعلعة بتاعة زمان راحت فين ؟؟؟
الإبتسامة اللي ماكانتش بتفارقني طول الوقت
كنت مبتسم بسبب ومن غير سبب زي العبيط
ماتت معاها الضحكة
وانتحرت حزنا عليها إبتسامتي البلهاء

*****


من يومها والجيران عرفوا معنى الهدوء
بطلت أشغل الكاسيت على آخره وأغني معاه
حتى غنا الحمام وأنا باستحمى بطلته كمان
وتقريبا كده هابطل أستحمى أساسا

*****


من يومها وأنا مش مهتم بنفسي ولا شياكتي
أسيب دقني أو أحلقها ماهيش أزمة
أقصر شعري أو أسيبه طويل منكوش وايه يعني
ألبس كوتشي أو الهاف بوت ولا أقولك مالوش لازمة
يعني اللي هيقابلك هيسيب شكلك وبهدلتك وهيبص ع الجزمة ؟؟

*****


من يومها وانا مبطل أمارس هوايتي في لعب الرياضة
بقى بعد ماكنت بالعب 120 تمرين يوماتي
أبقى من أصحاب الوزن الزيادة ؟؟
راحت فين أيام التنس والجيم .. والساونا اللي كانت عندي عادة ؟؟
دلوقتي بادخل النادي من السنة للسنة لأجل ما أجدد الكارنيه وأعمل إعادة

*****


من يومك وأنا عايش ماليش سكة ماليش عنوان
مش لاقي سبب للعيشة .. ومش عايش كما الإنسان
رحتي في سكة اللي يروح مايرجعش ولا بعد زمان
خلاص ياحبيبتي جالي جنان ومنخوليا على هذيان




لسة ماعرفتوش الفقيدة مين هيه ؟؟
دي كانت حبيبة قلبي ... العزوبية




عزاء واجب لكل من فقدوا العزوبية
لا أراكم الله مكروها في عزيز لديكم
مع خالص تعازي / إحســان الحزين


هناك 82 تعليقًا:

kochia يقول...

انا صدقت والدموع كانت هتنزل خلاص

الله يسامحك

كل سنة وانتم بخير

EMMY BABY يقول...

ههههههههههههههههههههههههههههههه

طب والله اقلك ايه بس انا عمالة بقى اقول فى اخلاص كدة فى حد ممكن يفتكر حد اوى كدة وياترى مين اللى غالى عليه اوى كدة

ماشى يا استاذ احسان

بس بوست دمه خفيف كعادتكم طبعا

كل سنة وانتم طيبين

تحياتى

ايمى

مواطن مصرى نايم يقول...

هههههههههههههههههههههههههه
على فكرة انا فهمت و الله من الاول
عارف انا الدماغ دى اصلى
بحب اعمل الحركات دى
بس ملعوبه يا معلم

بس يعنى دا اسمه كلام يا راجل
كنت تقولى لى من قبلها
كنت نزلت لك نعى عندى

عموما البركه فشفقه بقى
(;

قال عزوبيه قال
و الله العظيم دا كلام بس

انا بتضامن مع الاخت الغاليه شقفه و احب اعلن من موقعى هذا

ان لابد و حيثما و ربما و بما ان و لكى و لذلك و قد و اصبح و امسى و بات و اضحى و كأن و لكن و يكن و يكون و تكون و الله الموفق

و إنا لله و انا اليه راجعون

و كل سنه و انت طيب يا باشا عيد سعيد ان شاء الله

nona يقول...

ههههههههههههههههههههه
انا فعلا صدقت و كنت خلاص بحضر كلمتين حلوين عشان يصبروك لفقد العزيزة الغالية
بس ما دام طلعت العزوبية الف مليون مبروك على فقدنها و يا رب ما تعود تانى
و اعقبال باقى العزاب لما نفرح فيهم
و كل سنة و انت طيب و شقفة بخير و سعادة

شهد الكلمات يقول...

يا خراشي

فينك يا شفقة ماشوفتيش البوست ده ولا اية

بقي كدة تسيبيه يكتب الكلام ده من وراكي

انا مش هاتكلم بس انا عايزة رد قوي اشوفه في بوست جديد ليكي

و انا معاكي يا شوشو ضد حزب العزوبية ده

تحياتي

أبو خالد يقول...

أسلوب شيق و فريد و فيه إثارة
دمت مبدعا متزوجا فبعد أربع سنوات
تبكي علي العزوبية
يا راجل الواحد ثلاثة و ثلاثون سنة متزوج كان الله في العون
علي العموم أسمح لي أن أبعث لك و زوجتك أطيب الأماني في حياة سعيدة
و كل عام و أنتم بخير

maiosha يقول...

كده يا إحسان التعليق ده
ده أنا خلصت مناديل بيتنا وبعت أستلف مناديل من جيرانا

بقى كل دى إشتغالة فى الأخر
ههههههههههههههه

بس مالك يعنى زعلان على العزوبية ليه؟؟ ماهى لو ماكنتش راحت مكنتش إتجوزت شوشو اللى زى القمر دى

ده إنت المفروض تفرح بأيام ما بعد العزوبية حيث الحياة الزوجية والعيشة الهنية
ههههههههههههههه

بس حلوة الإشتغالة دى بجد

كل سنة وانتوا طيبين

إيما ( أم البنين) يقول...

بجد ضحكتني
وهو إللي متجوز واحده زي شفقه يبكي على العزوبيه؟!!!!!
رزقكم الله السعاده وكل سنه وإنتم طيبين

bos bos يقول...

حرام عليك بجد انا اتخضيت وافتكرت انه حد مات بجد
بس فى الاخر ضحكتنى مووووووووووووت

كل سنه وانتوا طيبين وعيد سعيد عليكم ان شاء الله

princess يقول...

انا صدقت واتلثرت وبعدين كل الكلام ده يطلع عشان العزوبية ماشى:)ده انا قعدت اقول ايه الاخلاص والوفاء ده ههههه
عموما هيا ميتبكيش عليها اساسا
تحياتى:)

طالب ثانوى يقول...

ههههههههههههههههه اية الاشتغالات دى انا بقرى ومتاثر بس مكملتش البوست قريت اول 4اسطر وقولت اشوف مين اللى مات لقيتها العزوبية الحمد لله لسة بدرى عقبال لما افقدها

كل سنة وانت طيب بمناسبةالعيد

سومه...مجنونه فى بلد عاقل يقول...

طيب وايه اللى رماك على المر اهو انتوا كدا يا رجاله تشتموا الحكومه عشان الشباب عاوز يتجوز ومش عارف من غلاء الاسعار وبعد ما تقع الفاس فى الراس تلعنوا ابو الجواز طيب ليه من الاول بقى
قال وانا مندمجه واقول شفقه لو قريت الكلام دا وسايباك تكتبه
عن صديقه تبقى مش ست مصريه بصحيح واللى بيجرى فى عروقها بيبس مش دم الاقيك كاتب العزوبيه بصراحه لو بطيخ كان عملها كنت خرطته للوز بس اهو قضى اخف من قضى
سلام

Tamer Alhosiny يقول...

تعرف يا استاذ احسان بيني وبينك لمدام شفقة تسمعنا
بصراحة انت عندك حق
مفيش اغلي علي الراجل من العزوبية
بس هي بقا قلة عقل
الراجل قبل الجواز هيموت ويتجوز وبعد الجواز
هيوت ويرجع لايام زمان
والمدام تغني
قول للزمان ارجع يا زمان

هههههههههههههههههه
كل سنة وانت طيب
ويارب شفقة مش تلاحظ وانت بتحتفل بسنة زوجية جديدة
انك بتبقا مهموم لفراق اجمل ايام

ايام الحياة بجد السعدية

تحياتي
تامر الحسيني
انسان عازب حر
واخد بالك من حر دي
هههههههههههههههههههههههه

mony يقول...

اعزيك في العزوبية


بس برضه اهنيك علي المولود الجديد
(الجواز يعني)



مش كده ولا اييييييييييه

هه هه؟؟

كيارا يقول...

ههههههههههههههههه


مش دخلت عليا كيكيكيكيكيك

كول سنه وانت وشفقه طيبين يارب ويباركلكم في ايامكم


وعيد سعيد عليكوا

ومش تقول العزوبيه وحشاك تاني انا بقول اهو

كفايه ان شفقه منورره حياتك

تحياتي

عاشقة الحب يقول...

و الله كنت هعيط
معلش
البقاء لله
ربنا معاك
و كل سنة و انت طيب

وووواء

هههههههههههه

سندس وأمل يقول...

والله أنا قلبى كان حاسس مش أنا قلت

لكى يا مدام شفقة إنوا هوا شرب مقلب

مسدقتنيش والله أنا حاسه بيك يا أستاذ

إحسان بس يالا أهوا نصيب ..وقدر...

هتهرب منه وتروح فين......

وإن شاء الله رمضان الجاى متحسش با

الاحسلس ده!!!!!!!"أنا مش أصدى حاجة"

أنا بأهدى النفوس بس"سندس"

norahaty يقول...

السلام عليكم ورحمة الله وبركاته
وكل سنة وانت طيبين يارب
وعقبال ما نيج نهنى بالسنه المئويه كمان للفقيدة الغير مأسوف عليهاوعلى شبابها اللى اسمها العزوبية دى !!!
ويارب دايمآ حياتكم مليانه بالافراح والليالى الملاح والجاتوهات علشان احسان
وكل سنة وانتم طيبين

عاشقة القمر يقول...

هههههههههههههههههههههههه ايه يابنتي انا كنت اهقوليك كلنا رايحنا مش نعيش في دنيا ههههههههههههه هي اهتكون مرتاح احسن ممنا بس عملي لها دعوات احنا في رمضان ههههههههههههههههههههههههههههههه في نهايه طلعه العزوبيه ياستي
ناس عايزه تفراق العزوبيه وناس تشتاق لي العزوبيه هههههههه

قلب مصرى يقول...

لأن البوست كاتبه إحسان وبيتكلم فيه عن واحدة فطول الوقت عمال أقول هو ناوى ينتحر ولا إيه أصل مراتك بعد ما تقرا البوست ده كان لازم تحضر الساطور والأكياس وفضلت قلقان عليك قوى لحد ما اكتشفت الحقيقة وإنك بتنعى العزوبية
ورغم كده إنت لسه فى خطر برضو لأنك المفروض تقول إن حياتك بعد الجواز بقت هى الجنة بعينها بدل ما شفقة هانم تأكد حزنك على العزوبية.

كل سنة وانت طيب يا متجوز زى حالاتى يا عينى

blue-wave يقول...

ههههههههههههههههههههههههههههه
يخرب بيت جنانك
انا كنت بدأت اتعاطف معاك وازعل عليك بقى وكدا:))
عموما يا سيدى انتم السابقون ونحن الاحقون:))
وكل سنه وانت طيب

يوميات نائمة في الأرياف يقول...

ههههههههههههههههههههههههههههههههههههههههههههههههههههههههههههههههههه
ياراااااااااااااااجل؟
والله كنت هعيط
وانا اقول معقولة بيقول صديقة وشفقة بتتصنط عليه؟
يادي النيلة
تكونش شفقة الي كاتبه؟
لاااااااااااااااا
بجد تحفة تحفة تحفة
والله للحظة زعلت اوي انت كنت بتتكلم جد خالص
لدرجة اني سدقت
كل سنة وانت طيب يا احسان
وشفقة كمان ميمنعش مع اني مش عارفة هي ساكتة ازاي على الكلام الجامد ده؟
بقالكو كتير مجيتوش عندي خير في اية؟
اصلا باعتالكم تاج ومضبطاكو
زعلانة منكم خالص
بس كل سنة وانتو طيبين
رنا

لماضة يقول...

هههههههههههه
يا خبر ده الدمعه كانت هتفر من عيني

لا اراكم الله مكروه في عزوبيه لديكم

تعيش وتفتكر

كل سنه وانت وميسز احسان بخير يارب
السلام امانه ليها

صدى الصمت يقول...

بصراحة العزوبية شىء جميل بس الجواز شر لا بد منة تعيش وتفتكر ياإحسان بك

Dexter! يقول...

ايييييييييه دنيااااااااااااا

ما دايم الا وجه الله


ربنا يصبرك و يبعد عنا شر الجوااااااااااز

FreeKiller يقول...

كل سنة و انتم طيبين

انا جايهاقول
ليكم تاااااااااااااااااج عندي
تعالوا خدوه
و اللي يجاوب يجاوب بقى مش فارقه
منتوا واحد و نص

و كل سنة و انتوا طيبين بمناسبة العيييييييييييييد
مبدرة مش متاخره اهي

مصري بالغربة يقول...

ايه دنيا ما دايم الا وجه الله

البقاء لله وتعيش وتفتكر يا ابو الحس

انا والحمد لله لسه عندي صديقتي

ومحافظ عليها باديا وسناني

ومع حزب الاحرار بردوا

وبمناسبة بوستك الجميل ده بحب انصح الشباب اللي لسه عندهم صديقتهم ديه وما متتش انهم يحافظوا عليها لانها نعمة

ومش حيحسوا بيها الا لما تموت بعد الشر

ههههههههههههههههههههههههههههه

ولك تحياتي واوعوا اوعوا تكون شفقة بتقرا تعليقات البوست بتاعك اوكيه

والدوام لله وما تزعلش قوي كده

والحمد لله لسه باروح الجيم والنادي , وكل حاجة ميه ميه

ربنا يخلهالي يا رب 0000000

مهيج الجماهير يقول...

باشا
:)
البقاء لله
انا عرفت ان الموضوع فيه ان .. بس قولت خلينى معاك للآخر
:)

الله يعينك بقى يا باشا
( وش بيغمز )

أتاريك مرديتش على التعليقات لحد دلوقت
ابقى طمننا عليك بقى
:)

تحياتى

مهيج الجماهير يقول...

نسيت أقولكوا كل سنة و انتوا طيبين

mohra يقول...

يا شيخ حرام عليك
بقه مراتك شفقه الحلوه ديه و الا البت المعصعصه العزوبيه ؟؟؟؟
ناس مفتريه و كمان فى رمضان
يلا كل سنه و انتم طيبين

نهر الحب يقول...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

شفقة هانم واحسان بك يقول...

Kochia
ان شاء الله هيسامحني
وخصوصا إني مكمل نص ديني
وأهي دي بقى الميزة الوحيدة في الإختراع اللي اسمه الجواز ده


ومانجيلكوش في حاجة وحشة أبدا يارب

شفقة هانم واحسان بك يقول...

إيمي

انتي واخدة بالك ان دمنا عمال يخف ؟؟
لحد ماهييجي يوم عليه يختفي خالص
ويبقى ماعندناش دم !!

بيتهيألي ان دي كمان من أعراض مرض الجواز
ربنا يشفينا يارب

ومانجيلكيش في حاجة وحشة


إحسان الحزين

شفقة هانم واحسان بك يقول...

إسلااااااااااااام
صح النوم يا مواطن

خلي بالك من نفسك ياإبني
انت عارف انت عزيز عليا قد إيه
إياك في يوم واحدة تضحك عليك وتقولك أتجوزك
وتسقيك حاجة أصفرة تلاقي نفسك قدام أبوها
وتطلب إيدها بنفسك علشان تلبسك بيها الكلابشات

أقولك حاجة أريح
خليك نايم على طول وإوعى تصحى
أحلام سعيدة ان شاء الله

أخوك
إحسان الندمان

شفقة هانم واحسان بك يقول...

Nona

شفتي إزاي تعبيرك خانك
وكلمة الحق طلعت منك
"عقبال باقي العزاب لما نفرح فيهم"

طب ليه النفسنة والحقد ده
هوا إحنا عملنالكم حاجة زعلتكم ؟؟
ولا إنتوا متسلطين علينا ؟؟
ولا إيه حكايتكوا معانا بالظبط ؟؟


عموما كل سنة وانت طيبة
وسعيكم مشكوووووووور

شفقة هانم واحسان بك يقول...

شهد الكلمات


أحب أقولك اني مابخافش من مراتي زي معظم المتجوزين
وبأقول اللي في نفسي واللي يحصل يحصل
يعني هيحصلي إيه أكتر من اللي حاصلي
ديتها حبة كدمات على جروح سطحية
مع خدوش على كام خربوش مش أكتر
ده مش أنا اللي بأقول
ده التقرير الطبي اللي كاتبه الدكتور امبارح هوا اللي بيقول
آه هو أنا ماقلتلكيش
ماهو أنا مجرد ما خلصت البوست ده حصلت حاجة مش فاكرها
فقت بعدها لقيت نفسي متربط ومتجبس في المستشفى
هاموت وأعرف إيه اللي حصل
ولا أقولك
المسامح كريم
وكل سنة وانت طيبة بقى عديها

تحياتي
إحسان الدكر

romansy يقول...

كل سنه وانتم طيبه
عيد سعيد عليكى وعلى المسلمين جميعا
باليمن والخير والبركات

(احمد سكر ) يقول...

ياعم انا عديت كذا مره

وااقول فى ايه

طب ارد ااقوله ايه فى العيد

ومكملش الموضوع

بس دلوقتى كملته

والله انت بتهرج

ماااااااشى

مسيرك تقع فى الفخ بردوو

كل سنه وانتم طيبين

احمد

ojg يقول...

ههههههههههههههههه
جامدة قوي
ربنا يخليلك شفقة هانم
ويصبرك بيها على فقد العزيزة الغالية العزوبية
وش بيغمز
ويجعل أيامكو كلها أفراح
قول آمين

كل سنة وانتوا طيبين
:)

حنين القلب يقول...

يا سيدى حرام عليك دنا عيطت
وتخيلت انها حبيبتك وماتت
والله قلبى وجعنى
ربنا يسامحك
والاخر تطلع العزوبيه
اقول اييييييييييييييه
يلا
كل سنه وانت طيب
واحمد ربنا لحد كده

وينكى يقول...

والله العظيم افتكرتك بتتكلم على حد بجد
وبعد كده قلت لاااااااااا
الموضوع مش موضوع صديق خااااااالص
دى اكيد حبيبه


واكتشفت فعلااااا
انها حبيبه
:P
كل سنه وانتو طيبيييييييين
:)

زهرة الجنة (زهرة سابقا) يقول...

هههههههه
خلتني كنت هبكي
تبكي علي العزوبية هه والله حرام
يعني زمان والا دلوقتي أحسن
أكيد طبعا دلوقتي ههه
كل سنة وانت طيب
وعيد سعيد عليكم

جنّي يقول...

السلام عليكم ورحمة الله وبركاته
عيدكم مبارك
تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر
كل عام وأنتي منصورة يا أمتي
أخوكم
سعيد

nado يقول...

والله العظيم اتخضط لانى بجد افتكرت حد عزيز عليه والله يرحمه مات فى رمضان.... ياعينى قلبت عليا المواجع الله يسمحك

وبعدين مش قد الجواز بتتجوزه ليه ياساتر

عاشقة القمر يقول...

ايها الشهر ترفق دمع الحبين تدفق
قلوبهم من الفراق تشقق
عسي توبه تصلح ماتمزق
عسي عسي متقطع عن ركب
المقبولين يلحق
عسي أسير الأوزار يطلق
عسي مستوجب النار
ببركه هذا الشهر يعتقق وعسانا الرضا الله وقبوله نوفق
كل عام انتم بخير

FreeKiller يقول...

المدون الزميل المحترم
بعد التحية
ندعوكم لحضور ملتقى مدوني الشرقية الأول
يوم الأحد 5-10 الساعة الرابعة مساءً
بمقر النادي الإجتماعي بالزقازيق بشارع مدير الأمن أمام حزب الوفد
و الدعوة عامة لجميع المدونين من أي حتة ف مصر
وللمزيد من التفاصيل يرجي زيارة اللينك التاااااالي
http://goharyblog.blogspot.com/

و كل عام و انتم بخير

ماما أمولة يقول...

كل سنة وانت طيب

عيد سعيد

وحياة سعيدة

تسلم ايدك

صباح الصباح يقول...

يااا شييييخ

حرام عليك

وقعت قلبى وكنت خلاص هاطلع لك اتنين جنية فكة

هاهاى هاى

دة شر لابد منة وربنا يهنيكوا ببعض دايما

ahmed_k يقول...

أسأل الله
أن يعطيك أطيب ما في الدنيا محبة الله
وأن يريك أفضل ما في الجنه رؤية الله
وأن يجمعك بأفضل خلقه رسول الله
وأن ينفعك بأنفع الكتب كتاب الله
وكل عام وأنتم بخير
عيد سعيد

اهو ده عيبه يقول...

كل سنة وانت طيب
والله العظيم انا فى الاول صدقت وافتكرت ان حد توفى بجد
بقى كل ده علشان العزوبية
بس برضه حرام الظلم بقى من بعدها مش عارف تفرح ولا تهتم بنفسك
انت كده بتظلم شفقه
عموما تعيش وتفتكر وكل سنة وانتم طيبين

semsem يقول...

انا صدقت وشويه وهعيط
وخلالالالالالالالالالاص
ومعدتش قدره
شويه وتقول العزوبيه
عاااااااااااااااااا
حرام بجد
عموما كل سنه وانت طيب
قال عزوبيه قال
معاكى يا شفقه

شخـا بيــط مـحـجـوب يقول...

اولا كل سنة وانتو طيبين وعيد سعيد عليكم وبجد المدونة دى خفيفة ودمها جميل وظريفة وسعيد جدا بالمرور
تحياتى


شخابيط mahgoub

حـــــدوتـــــة يقول...

السلام عليكم

يا راجل حرام عليك
ده انا كنت شوية وهعيط خلاص
وبقول هو انت بتكتب من ورى مراتك ولا ايه
بس جيت فى الاخر وفصلتنى فجأة

عموما بقه اغيظك زى ما فرستنى انت
انا والحمد لله لسه عازب وبصحتى
لا حد بيقولى رايح فين ولا جاى منين
وبغنى وانا بستحما كل يوم
وضحكتى من الودن دى للودن دى
يا سلام يا اخى ما احلى احساس الصياعة

يلا كل شىء اسمه ونصيب وانت ربنا يتولاك برحمته

سلالالالالالالالالالالالالالالالالالالالالالالالالالالالالالالالالام

زهرة الياسمين يقول...

هههههههههههههههههههههه
حرام عليك يا احسان بيه
ليه بس كده
بس اشتغاله جامده بصراحه

بنوتة يقول...

دة أنا صدقت وعشت في الدور و أعدت أشوف هكتبلك ايه وفي الآخر جيتي و بوظتي كل حاجة
جررررررررررررررررررررررررررر
على العموم
أتمنى تدخلي تشوفي مدونتي وان شاء الله تعجبك أصل هي لسة جديدة ومحتاجة تشجيع

اوعى تفكر يقول...

ههههههههههههه
ياراجل
يعنى انت دلوقتى مش مبسوط
حقيقه انا متوقع انك تتظبط من المدامبعد البوست الحزين ده
وكمان فى غيرك بيتمنى من كل قلبه انه يبقى زيك ومش عارف
ياعم ابسط انت فى نعمه ومش حاسس بيها

مقتطفات من حياة فتاة يقول...

هاهاهاهاهاهاها
الموضوع بجد تحفة وكومدي انا كونت هصدق
لاكن لحقت نفسك
بجد جامد جدا
انا شفت التعليق عندي ويريت تتبعوني

شفقة هانم واحسان بك يقول...

ابونا وأبو كل المدونين
أبو خـــالـــد

إنت بتقارن جوازنا بجوازكم بردو ؟؟؟
إزاي تقارن زمن الخيرات بزمن الخيبات ؟؟؟
إحنا نيجي إيه جنبكم بس ؟؟؟

تحياتي ليك ولكل أهالي بورسعيد
وكل سنة وانت طيب ،وعيد سعيد

شفقة هانم واحسان بك يقول...

maiosha

يعني تخبطي ع الجيران علشان تستلفي مناديل ؟؟؟
بقى ده اسمه كلام برضه ؟؟؟
أفهم من كده إنه مافيش بقال ولا كشك تحت بيتكوا ؟؟؟
هــــــــــــايل
طيب ياريت تديني عنوانكم علشان أجيب ترخيص كشك على ناصية شارعكم
ماهو الرزق يحب الخفية يا مايا

تحياتي
إحســان بتاع الأزوزة

شفقة هانم واحسان بك يقول...

دكتورة إيما

طبعا انتوا أصحاب انتي وشفقة
علشان كده مش هاقدر أفتح بقي

كل عام وانت والبنين بألف خير
عيـــــد سعيـــــــــــد


أخوك / إحســـــان

عاشقة القمر يقول...

فيان واحشتني
واتمني ان تزورني في مدونتي

شادي أصلان يقول...

البقاء لله
هي كدا وملهاش شكل غير كدا

شفقة هانم واحسان بك يقول...

bos bos

سلامتك من الخضة
وسلامتك كمان من الضحكة
حكم الضحكة في الزمن ده بقت غريبة

وكل سنة وانت أطيب طيبة

إحسان

شفقة هانم واحسان بك يقول...

princess

بقى العزوبية مايتبكيش عليها ؟؟؟
هو الراجل مننا عنده أغلى منها ؟؟؟
شكلك كده تبع حزب شفقة
مااااااااااااشي

واستنوا عليا
إحســـان

شفقة هانم واحسان بك يقول...

يا طالب ثانوي
إيه المعلومة الجديدة دي
" أنا بقرى ومتأثر "
أول مرة أعرف والله
عموما مادام اعترفتلي أنا كمان هاعترفلك
" أنا بقى جملي وبالعضم كمان "

تحياتي
إحســـان الجزار

شفقة هانم واحسان بك يقول...

سووووووووووومة

مالك ؟؟؟
انت هتيجي لحد عندي وهتعقلي ؟؟؟

وبعدين فين الأخ بطيخ من اللي انت كاتباه عليه ده ؟؟؟
وإذا كان على أكل الوز فإرميله رغيفين من أبو شلن

وصدقيني أنا بدات أقلق من صداقتك انت وشفقة
شكلك كده هتقويها عليا وتعلميها تربية الوز
وآه ياخوفي

سلااااااااااام

shasha يقول...

اول زيارة

مدونتك جميلة واسلوبك لذيذ

shasha يقول...

اول زيارة

مدونتك جميلة واسلوبك لذيذ

شفقة هانم واحسان بك يقول...

يا تامر يا حسيني

الله يسامحك
قلبت عليا المواجع
لان عيد جوازنا كان 8 أكتوبر
وكلامك جه على الجرح

ماااااااااااشي يا عم الحر
وهي كانت دامت لمين ؟؟؟


تحياتي بس مش أوي
إحســان المتغاظ

شفقة هانم واحسان بك يقول...

Mony

أشكرك على التعزية
وأشكرك على التهنئة

وهيا دي شيزوفرنيا الجواز
ولا إييييييييييييه ؟؟؟

شفقة هانم واحسان بك يقول...

كيارا

طبعا شفقة منورة حياتي
وأنا أقدر أقول غير كده
خلي يومنا يعدي على خير
والله أعلم بقى بالنفوس

هييييييييه ... دنيــــا

شفقة هانم واحسان بك يقول...

عاشقة الحب

بتتريقي ؟؟؟
وماله .. من حقك برضه

مسيرنا نشوف فيكي يوم
لما تتجوزي كده وتغيري اسمك
وتبقي
عــاشـقــــة الـغـلــــــب


تحياتي
إحســـان الشمتان

شفقة هانم واحسان بك يقول...

سندس وأمل

انا سعيد جدا انكم حاسين بيا
أخيرا
وشهد شاهد من أهلها

وعموما كل اللي اتجوزوا خدوا مقلب مش انا بس
وده اللي مصبرني شوية

ياللا عقبال مانشوفكوا في بيت العدل
وتشربوا صاحبي النصيب أكبر مقلب

وكل مقلب والرجالة بخير

شفقة هانم واحسان بك يقول...

Nora haty

سنة مثوية ؟؟؟؟؟؟؟
هههههههههه
ضحكتيني وانا متاثر

بصي أنا مش هرد عليكي
ولا هاقتل فيكي احساس التفاؤل اللي مش في محله
أنا بس هاستعير إسم مدونتك في وصف حالتي
"صعبان عليا حالنا "

وتقبلي تحياتي
إحسان صعبان

شفقة هانم واحسان بك يقول...

عاشقة القمر

دي تالت مرة تكلميني على اني مؤنث
بقى بذمتك كل الندم ده يطلع من واحده
والمفروض ان ربنا خد بيدها واتجوزت ؟؟؟

ركزي معانا شوية الله يكرمك
قبل ما ننسى أنا وشفقة مين فينا الراجل ومين الست


مع تحياي
إحســـان مذكر سالم

شفقة هانم واحسان بك يقول...

قلبك حاسس بيا يا "قلب مصري"


انت هلكتني من الضحك في جملتك دي
"كل سنة وانت طيب يا متجوز زى حالاتى يا عيني"

بس معلش كده كان عندي استفسار بسيط
تقصد إيه بـ ( يا عيني ) ؟؟
1- هل هو أسلوب نداء ( عادي كده يعني ) ؟؟؟
2- أم هو أسلوب رثاء على الزمن اللي عدي وفات ؟؟؟
3- ولا حد ضربك على عينك فانت بتتوجع يا ولداه ؟؟؟

صارحني وماتتكسفش
ماهو الحال من بعضه

شفقة هانم واحسان بك يقول...

Blue-wave

" أنتم السابقون ونحن اللاحقون " ؟؟؟
طيب ليه
ما انت لسة فيها
الحق نفسك وانفد بجلدك
ليه ما تقولش
" أنتم السابقون ونحن الملحوقون " ؟؟؟


تحياتي
إحسان إنقاذ

شفقة هانم واحسان بك يقول...

يوميات نائمة في الأرياف

اوعي تزعلي مننا
مانقدرش على زعلك أبدا

بس احنا لما عرفنا انك نايمة في الأرياف
أولا استبعدنا المشوار لحد الأرياف
ثانيا ماحبيناش نقلقك وقلنا نخليكي نايمة

نوم العواف انشالله

تحياتي
إحســان الكسلان

شفقة هانم واحسان بك يقول...

لمـــــــاضة

لأ اوعي تعيطي
انت دموعك غالية علينا أوي
وبعدين أنا جتتي نحست خلاص
دول مش سنة ولا إثنان ولا ثلاثة
دي أربع سنوات فعالة
مع إني حاسس انهم أربعين

ربنا يجعل كلامنا خفيف عليهم
والسلام وصل

وتقبلي تحياتي
إحســـــان

شفقة هانم واحسان بك يقول...

صدي الصمت

لابد منه أو مش لابد منه
المهم اننا متفقين على انه شر

تحياتي على صراحتك
إحســان الدوغري

شفقة هانم واحسان بك يقول...

Dexter

لأ أنا لسة ما طلبتش حانوتي

وحدووووووووووووووه

شفقة هانم واحسان بك يقول...

freekiller

كل سنة وانت أطيب
وشكرا جزيلا على التاج
ويارب نكون نستاهله