الجمعة، 12 سبتمبر، 2008

النية المستخبية


وحشتونى اوى اوى جدا خالص بس معلش اعذرونا بقى رمضان وكان من المتوقع ان احسان هو اللى يفجر البوست الجديد وقعدت استنى واستنى لكن للاسف الصيام عامل معاه شغل فاستنيت لما هو خرج وقلت اكتب بوست انا ويكون ليا السبق البوستاوى.


لكن انا مش هاكتب حاجة عن رمضان علشان ما تبقاش خيانة لاحسان لانه هو اللى هينزل البوست الصيامى

اما انا فهنزل البوست الفطارى حاجة كده تسلى على السحور.


المهم انا كنت عند واحدة صاحبتى طلبت منى احضر معاها مقابلة مع العريس........ وانا بقى بموت فى الحاجات دى وقعدت اتفرج ومطرطقة ودانى على الاخر ومركبلهم سماعات .


المهم لقيت العريس داخل البيت اخر شياكة وانتكة الجاكت مالوش دعوة بالبنطلون ولا بلون الشوز ودقنه طويلة شكله كده معهوش تمن موس الحلاقة المهم ابتدت المحاكمة اقصد القاعدة والتعارف وانا عمالة ابص لنظرات كل واحد فيهم واحللها بتاملاتى ونظراتى النفساوية المتقوقعة فى الداخل.


وطبعا من المتوقع بس ده كان زمان ما اعرفش دلوقتى ايه الاخبار .....ان اجمل احساس لما واحد يجىء يتقدم لواحدة ويطلب رجليها للجواز.....عفوا يطلب ايدها علشان يحطها فى الكلبشات


طبعا اول ما ابو العروسة بيشوف العريس بيمسك فيه بايده وسنانه طبعا اخيرا هيخلص من البلوة اللى عنده وهيخلص من كلمة عايزة يا بابا .......... ويسلمها لواحد تمسك فى رقبته


وتلاقى الراجل يا عينى مش طايق العريس بس هيعمل ايه مضطر وكل واحد منهم بيقول حاجة بيكون له نيه تانية


خاااااااااااااااااااااااااااااااالص


ابو العروسة اول ما شاف العريس قال "اهلا اهلا يا ابنى والله احنا بنشترى راجل"


وفى سره.." راجل قال راجل قال وهو بقى فيه رجاله فى الزمن الاغبر اللى احنا عايشينه ده؟؟


ده بقى زمن الخنافس والعرس......... جتكم وكسة كلكم شباب فسدان بتوع الفيسكو.... والحظاظة ....والكلام الفارغ ايخيه


العريس قاعد عامل مكسوف ومش عارف يتكلم "ربنا يخليك يا عمى اهو ده العشم برضوا"


وفى سره.."خلصنا يا خويا وقول عايز كام فى البيعة دى شبكة ومؤخر وقيمة ونايمة ...والعشم فى انك تتهاود معايا وتقسطهم بدل ما تكسر وسطى ووسط اهلى


اهى الهانم بنتك مش السفيرة عزيزة.......... دى كبيرها طشت وكوز وحلتين المونيوم


العروسة.. تخرج هتموت من الكسوف وقال يعنى عمرها ما اتكلمت مع رجالة " اهلا ...تشرفنا ..نورتنا"


فى سرها.." يا دى الخيبة قال نورنا قال بلا نيلة..... دلوقتى النور يقطع لما شاف خلقتك


يعنى هو الواحد كان ناقص ضلمة.......... مهو كفاية حياته مضلمة خلقة...ولا الواحد كان ناقص حد يخدمه ويقوله رايح فين........ وجاى مين اهو الواحد بعد كده مش هيعرف يخلع مع اصحابه على الديسكو


.يوووووووه ............... يا شيخ روح كده شكلك هتكتم على نفسى ........ وانت شبه بتاع البليله


ام العروسة.." اهلا وسهلا يا ابنى...منور امال فين الحاجة؟؟ ما شرفتناش ليه؟؟


فى سرها.." الهى تكون مقطوع من شجرة .........وامك ماتت وشبعت موت ..اهو تريح البت ويكون من حظها ونصيبها ان ما لهاش حماه ام اربعة واربعين


العريس.."قريب ان شاء الله تزوركم وتبارك الجواز"


فى سره.." قال تبارك قال ...هى اصلا مش عايزة تشوف خلقتكم خالص ......ولا تعرفكم........ يعنى هى كانت ناقصة واحدة تقرفها وتصرف عليها ..مش كفاية انا لسه بيتصرف عليا وكل يوم تسم بدنى بالكلام يلا اهو الاقى حد ياخد نصيبه معايا


العروسة.." اه..لازم فعلا طنط تشرفنا واحنا لينا بركة الا هى"


فى سرها.." قال بركة قال" بركة السبع" جتها كسر رجليها وتنشك فى معاميعها


الواحد كان عايز واحد لقيط...لا اب ولا ام


وخصوصا الام ويا حبذا بقى لو كان حاصل على شهادة الجودة من دار الايتام


ابو العروسة.." ها يا حبيبى قولى بقى ...ان شاء الله ناوى على ايه .........وايه امكانياتك؟؟


فى سره.." اكيد ناوى تجبلى شلل والرعاش ..... وهو شباب اليومين دول حيلته حاجة


...بس على مين انا لازم ادفعك دم قلبك انت واهلك ......اه امال هتاخد البت كده ببلاش على الجاهز


وانا علمت وكبرت وربيت كل ده فين تمنه ؟؟


هى سايبه ولا سايبه ........ امال هنكسر وسط مين فى الجهاز والعفش والذى منه ؟؟


زى ما اتكسر وسطى عليها هى واخواتها


العريس.." زى ما تحب يا عمى .....اللى حضرتك تأمرنى بيه


فى سره.." عمك دبب وحبك برص....خلصنا يا خويا وقول عايز كام خلينا نخلص من الرزيه دى اقصد الجوازة دى


ام العروسة.." احنا يا حبيبى يهمنا راحة بنتنا... وكل اللى تجيبه كويس المهم الراجل وشخصيته


فى سرها.." هىهى قال سخصية قال ؟؟


لا يا اخويا احنا عايزين واحد لا بيهش ولا بينش مش ناقصينك تجيب للبت كأبه


قول بقى هتدفع كام فى البت .....اه دى ليها تمنها


وقال بنشترى راجل يا خويا ما ابوها قاعد قدامك اهو كان عملى ايه ؟


كحيان وفقران وصدمان وعدمان كانت الرجوله اكيلتناه؟؟.......... بلا وكسة


العريس.." والله يا طنط الراى رايكم انا من ايدكم دى لايدكم دى"



فى سره.." جاتكم قطع ايدكم ورقبتكم .......ده الكلام والحبتين دول دلوقتى


بعد كده مش هنخلص من كلمة هات هات جاتكم الهيتهات كلكم.


لكن صبركم بالله عليا لما تيجى عندى البيت بس........ هطلعه بلاء على جتتها وجتت اللى خلفوها


ابو العروسة منشكح اوى.." خلاص يا ابنى شوف احنا علينا نص العفش وانت النص........ والفاضى يدى للمليان واهى فى بيتها


فى سره.." الود ودى تشيل وتدبس انت فى كله ...الواحد لسه عنده مصايب غيرها .....هانجيبلهم منين ادفع يا اخويا مش كفايه هنديك بت زى الفل
عود ورور كده........ ياختى على جمالها

العريس.." تمام كده يا عمى طيب وحاجة الكهرباء والمطبخ؟؟


فى سره.." كسرتوا وسطى الله يقطم ضهركم والله ما ادفع اكتر من كده ....نحلتوه وبرى"


ام العروسة.." حاجة الكهرباء عليك والمطبخ علينا


فى سرها.." الهى تتكهرب يا بعيد.......... بس بعد ما تكتب الكتاب.......... ونعلى الجواب علشان البت تورثك

العريس.." ها ....يا ترى عروستنا موافقة؟؟


نقرأ الفاتحة


فى سره.." الهى ما توافقى انا مش عايز البيعة دى


انا مش ناقصك انتى واهلك هتخربوا بيتى


العروسة.." طبعا مكسوفة وحطها وشها فى الجزمة... اقصد فى الارض


فى سرها.." يلا خليه يشرب بقى.......سيبك انت ده انا ناويالك على حتة نيه عسل


"وهى بتخن صوتها" استنى عليا يا حسب الله


ام العروسة.." السكوت علامة الرضا "


فى سرها.." دى مش طايقاك بس يلا اهو تلاقى حد تمسك فى رقبته شوية


وتحل عنا وبعدين تعمل ايه يا عين امها ......كبرت ومش عايزة تبور وتعنس


العريس.." مكسوف قال يعنى فرحان وهو هيتنقط "فعلا شكلها خجول وبتتكسف"


فى سره.." وهو يا ختى فيه بت دلوقتى بتتكسف هتعملوهم علينا ولا ايه يا اخوانا ...ولا علشان معدينها بمذاجنا؟؟


لا احنا ما بناكلش من كلام الاونطة ده ....ما تعملوهمش علينا


وفى الاخر تلاقيهم كلهم رافعين ايديهم .....وبيقراو الفاتحة


العريس.." بيقرأها طبعا على روحه مقدما"


ابو العروسة.." ما صدق خلص من بنته وانزاح الهم


ام العروسة.." ما صدقت ودبستهاله وارتاحت من الضرب والتلطيش بتاع كل يومط


العروسة .." بتقراها على روح العريس ....وامه..... واهله كلهم هما واللى خلفوهم"


انا بقى محصلش معايا ولا حاجة من دى الحق يتقال من وراء سى احسان اه الراجل قيمة .....وسيما ومش دقة قديمة

بس هو متزمت حبتين مش بيخلينى اروح الفيسكو غير يوم واحد فى الشهر


الصراحة حصل اكتر من كده بس ايه على مين فى الاخر وقع على بوزه....... وكان ليه القرف اقصد الشرف .......وكلبشنى





سلام بقى علشان ارجع الزنزانه لحسن ميعاد الزيارة خلص
وكل جوازة وانتم طيبين

شفقة

هناك 169 تعليقًا:

كيارا يقول...

بحجز اول تعليق هقرا وارجع بس صغروا الخط حبه

A.SAMIR يقول...

اول مرة اتشرف بزيارة المدونة الجميلة دي وارجو ان تقبليني صديقا للمدونة
انا كمان باحجز تاني تعليق
تحياااتي

كيارا يقول...

ههههههههههههههههههههههههههههههههههههههههههههههههههههههههههههههههههه

فقر فقر فقر بجد الله عليكي ياشفقه بجد موتيني من الضحك ههههههههههه

لالالالا غبتي وكنتي قلقاني عليكي بس رجعتي بموضوع فقرررررررررررر


لكي كل تحيه

قلب ينبض لله يقول...

الخط كبر مرة واحدة بطريقة فظيعه ما أعرفش دا عندي بس ولا عند الكل

المهم أنا قريت البوست بس طبعا ما عرفتش أكمله

ههههههههههههههههه
شكلهم هايبئوا نسايب متافهمين جداااااااا

مبروك مقدما للعروسين:)

سندس وأمل يقول...

بجد بجد موضوع رائع ومدونة اروع

"خليه يشرب"

يعنى أستاذ أحسان لما أتجوزك شرب مقلب

ههههههههههههههههههههه

ربنا يكون فى عونك يا أستاذ احسان...

أبو أسامة - مدونة كباية شاي يقول...

أيوه يا حاجة
أنا أهوه كنت رايح اخطب
بس غيرت رأيي
الناس معدش لها أمان يا حاجة
كله داخل على طمع .

الحاجة : طيب وهتعمل إيه دلوقتي يا ابني ؟

أنا : هقوم أحضر لخطبة الجمعة أحسن يا حاجة .

طبعا أنا قريت الموضوع من Google Reader ربنا يخليه لنا مجاني دايما وده مخلانيش أعاني من مشكلة الخظ اللى زي الفل ده .
الموضوع رائع وجميل بصراحة .
مستنيين كمان

Zanooba (Zeinab sab9n) يقول...

يا عيني ده إحسان ملوش حق خالص بتروحي الفيسكو مرة واحدة في الشهر
هههههههههههههههههههههههههههههه
الراجل المتحضر هو اللي بيخلي مراته تروح الفيسكو مرة كل أسبوع :)
يا ستي بلا جواز بلا نيلة حناخد إيه من الجواز يا أختي غير الهم و الأرف :) يعني ممكن نتجوز و نجيب أولاد و بعد كده نرمي أبوهم من الشباك :) عاااااادي موضوع تحفة و ضحكتيني موووووت ...رمضان كريم و ينعاد علينا الشهر بخير

زينب

saso يقول...

ههههههه مش ممكن هو ده فعلا بيتقال ف السر بين اهل العريس والعروسه ههههههههه دى تبقي قلتها احسن ....

الحمد لله اتطمنت عليكوا انتوا اتاخرتوا اوى ليه كده

بس اكيد كنتوا بتحضروا الفضيحه دى

مش تتاخورا تاانى بتوحشونا

وكل سنه وانتوا طيبين

MaGn0liA... يقول...

ههههههههههههههههههه

دمك زى السكر

و كويس انك لحقتى نفسك و مش قلتى حاجه عن احسان

كل زمانك فى خبر كان

ههههههههههههههه


سلامات :)

عايش ولكن يقول...

هههههههه
خفة دم فظيعه
بس العرسان مظلومين هههههه
دمتى موفقه
علاء

يوميات نائمة في الأرياف يقول...

هههههههههههههههههههههههههههه
اية يا شفقة الافترا ده كلة؟
لا مليش دعوة انا عايزة احسان
احسان طيب
هههههههههههههه
انتي شردتي الناس
بس عارفة اقولك حاجة بجد بقى؟
انا بحس ان الناس اليومين دول بيتجوزو بس عشان هما مفروض يتجوزو مش اكتر
تحياتي ليكي
وكل سنة وانتي طيبة
واحسان كمان طيب وبخير
انت فين يا احسان؟

صدى الصمت يقول...

ياااه أنا حضرت إتفاقات جواز كتير بس أول مرة أفكر فيها بالشكل دة
إسلوبك لذيذ قوى و بيرسم إبتسامة على الوجوة و رمضان كريم

nona يقول...

هههههههههههههههههههههههههه
بجد بجد بتغيب بس بترجعى بقوة بتخلى الواحد ينسا غيابك
بس اية التشريد دة كدة هتخلى الشاب و البنات يرجعوا فى كلامهم و ما يتجوزوش وبعد كدة يتهموكى انك السبب
بس ساعات بيحصل كدة فى جواز الصالونات وتلاقى العريس عمال يفاصل اكانة بيشترى كيلو طماطم
كل سنة و انتى طيبة و احسان بيك
ما تخلهوش يتاخر علينا و انتى كمان قبل ما تنشغلى فى تجهيزات العيد

FreeKiller يقول...

اول حاجه ضحكت
بعدين ضحكت اكتر لما الخط كبر

بس لما وصل للحجم المريع ده معرفتش اقرا


ايه الجوجل ريدر ده يا عالم؟؟؟

ahmed_k يقول...

دول داخلين على معركه
مش جوازه
حرام عليكي
ده العريس فرحان
والعروسه مظأططه
والأشيه معدن
وكله أليسطا

مواطن مصرى نايم يقول...

ههههههههههههههههههههههههههه
ههههههههههههههههههههههههههه
بوست جامد ميت على نفسى من الضحك

فسرى بقول :
لا جامد و لا حاجة هو انا طايقه اساسا
هههههههههههههههه
هههههههههههههه
لا و الله جميل الله ينور يا شفقة
و رمضان عامل عمايله معاكى

افتكرت مسرحية العيال كبرت
لما سعيد صالح بيقول

انت جيييت يا رمضاااااان

ههههههههههه

تحياتى
و سلمى لى على احسان


اسلام

قلب مصرى يقول...

إيه ده ؟؟؟؟ أنا لو كنت أعرف إن الكلام ده فى دماغ حمايا وحماتى قبل الجواز كان الوضع اختلف خالص :)

ممكن تصغروا الخط شوية علشان أعرف أقرا النص التانى من البوست

انا ودماغي يقول...

هههههههههههههههههههههههههههههه
و الله بجد بوست زى العسل و بصراحة انا انبهرت من فكرة المدونة دى لانها فكرة جديدة اوى ربنا يخليكو لبعض و كلبشة سعيدة إن شاء الله

صباح الصباح يقول...

لا هوة لية بقى كلة كدة مش طايق كلة

اة واللة

الام مش طايقة مرات ابنها

والحماة مش طايقة جوز بنتها

والمتجوزين اصلا طول النهاار

ماسكين فى خناق بعض

دى مش جوازة دة ماتش رجبى

شفقة هانم واحسان بك يقول...

كيارا
ايه انتى حاجزه فى السينما ما تخلصونا بقى فى يومكم ده

شفقة هانم واحسان بك يقول...

a samir
حضرتك شرفتنا اكتر وقد قبلتك صديقا لنا على خيرة الله

شفقة هانم واحسان بك يقول...

كيارا
فقرتينا ليه كده وجبتلنا النحس احنا ناقصين

شفقة هانم واحسان بك يقول...

قلب ينبض لله
معلش بالنسبة للخط اظاهر انه تقلها شوية فى الفطار اوعدك بانى اعمله ريجيم
وبعدين احنا ما بناسبش الا عائلات

شفقة هانم واحسان بك يقول...

سندس وامل
منوراناه
بس احسان شرب جوافه باللبن مش مقلب

شفقة هانم واحسان بك يقول...

ابو اسامة
يا راجل بلا خطوبة بلا جوازة هو الواحد ناقص واحدة تقرفه وتطلع عينه
سيبك وانضم للى منظمة احسان الاضراب عن الجواز

شفقة هانم واحسان بك يقول...

زينب
زنوبة ازيك وحشتينى واللهى معاكى حق بلا وكسه بلا نيله بلا تخلف قال جواز قال ارخم حاجة فيه انى مش عارفة اروح الفيسكو براحتى

شفقة هانم واحسان بك يقول...

saso
معلش يا قمر الواحد بقى فى رمضان بيجيله زهيمر وفقدان للذاكرة ومابيبقاش عارف هو مين
بس اوعدك اننا منتاخرش تانى ونبقى نركب تاكسى مش ميكروباص

شفقة هانم واحسان بك يقول...

magnolia
انتى مدرسة لغة عربية ولا ايه؟؟
بس انا لو كنت جبت سيرة احسان كان زمانى مطبقة فى كتاب النحو نفسه

شفقة هانم واحسان بك يقول...

عايش ولكن
نفسى اعرف ولكن ايه ؟؟
عايش ومش لاقى اكل
ولا ولكن بضرب فى طابور العيش
ولا ولكن عاطل ايه بالظبط حيرتنى حاسة انى بحل فوازير رمضان
وبعدين العرسان مش مظلومين لان احنا القضاء بتاعنا عادل

شفقة هانم واحسان بك يقول...

يوميات نائمة فى الارياف
اه انا بقيت اقلق منك كل شوية فين احسان عايزة احسان شكله كده بيروح الارياف من ورايا
لا اصحوا انا مفتحه اوى دانا اعمل فيكم عمايل عغعالالغاببليبليمنتومةىو
اه هو انا اى حد خافى بقى على نفسك
بس وحشتينا بجد

شفقة هانم واحسان بك يقول...

صدى الصمت
شكلك كده بتشتغلى خاطبة اقرى اعترفى
هبلغ عنك الضرايب
وبعدين برسم ايه انا مدرسة فى الجامعة بس مش مدرسة رسم

شفقة هانم واحسان بك يقول...

nona
شفتى الغياب بيعمل ايه سيبينى بقى اغيب اد سنة كده وشوفى البوست هايكون مطرقع ازاى
بس العريس اللى بتتكلمى عليه ده بيكون متقدم لبنت بتاع الخضار

شفقة هانم واحسان بك يقول...

free
ليه بقى النص التانى من الاسم ده مش قادرة اكتبه من كتر الخوف والرعب
بعتذر للمرة التانية عن الخط لانه للاسف اول سنة يصوم وبيدبها فى الفطار
بس انا اديتله علقة واعتقد انه اتعدل
ولو حصل انه كبر تانى ممكن تاخد البوست كوبى وبيست

شفقة هانم واحسان بك يقول...

ahmed k
معركة ايه ومسدسات ايه هو العريس مجند فى الجيش ؟؟
وبعدين بيبقى مبطبط ومطبق مش مظاطط

شفقة هانم واحسان بك يقول...

مواطن مصرى نايم
ماشى يا مصحح اللغة العربية
ممكن تعلل لما ياتى ليه البوست موتك من الضحك
جاوب يا فاشل
بعدين انا بفكرك بسعيد صالح امال نانسى راحت فين

شفقة هانم واحسان بك يقول...

قلب مصرى
منور بس يعنى لو كنت عرفت كنت هتعمل ايه يعنى الوضع كان هيبقى متشقلب رجليه فوق وراسه تحته
يا عم انت ادبست وخلاص بس ام رقيه اكيد ست تستاهل ومالكش دعوة بالبوست انت حالة اثتثائية

شفقة هانم واحسان بك يقول...

انا ودماغى
منور بس لحد مرحلة الانبهار اوكيه لكن الفكرة تتسرق نونونونونو
وابقى نبه على دماغى كمان لحسن بعملها هو من وراءك

شفقة هانم واحسان بك يقول...

صباح الصباح
ايه يا عم الصباح ده اللى محدش طايق حد فيه ده
انت خلتنا مش طايقين بعض

مـجـنـووون يقول...

بجد موضوع جميل قوي واأقدر اأقولك أن رغم أن الموضوع يموت من الضحك بس في نفس الوقت حسيت بالزعل والحزن الشديد

لو الناس وصل تفكيريها لموضوع الزواج وكان في دماغم الحاجات دي ، يبقي علي الدنيا السلام

ويمكن الحاجات دي إلي بتخلق المشاكل بين أهل العريس وأهل العروسه ، وممكن أصلا الزواجة متمش علشان حاجات هايفه وتافهة
الرسول عليه الصلاة والسلام بيقول
( من جائكم من ترضون خلقه ودينه فزوجوه )

ودا طبعا ميمنعش أنا في حاجات تانيه نسال عليها

يا رب أرحمنا برحمتك
تقبلي مروري
مجنووون

عاشقة القمر يقول...

ههههههههههههههههههههههه اول مره اشوف مدونتك جميل بجد في زمان داه تلقي راجل يملي العيون بس مش كلهم ام انتم في مصر عندكم مش زي السودان احنا اصعب يعني عدنا العريس تكلفه كثير اوي بجيب ملابس كل نواع بجي العطور بجيب الاحذيه بجيب كريمات بجيب مواد الغذايه بعمل الشقه والعفش والعروس عليه لم جيه الاهل العريس الفرح يعمل لهم العشاء محترم قبل العرس باليوم اهل العروس يعملوا فطور الي ام العريس بكميات وايضا عليه يدفع حق الحفل ومكان حفل الكوفير كمان شوفت شاب سوداني بعب اوي لم يفكر عشان تزواج بس برضو يدفع المهر في ناس بتنزل من الاشيا داي بقول نشتري راجل بس قلبلا بقول كده

FreeKiller يقول...

طيب كويس
الخوق حلو برضه
عن اذنك بقى اروح اقرا ف السريع كده و ارجع

مش لاقية اسم يقول...

المدونة تحفة تحفة تحفة او الموضوع الاخير بلح البلح وموز الموز
ماشاء الله تعبيرات تهلك من الضحك
اخيرا دخلت مدونة وضحكت فيها
كل سنة وانتى طيبة ورمضان كريم
اة على فكرة اختى (قررت اكون عانس )بتسلم عليكى جدا
ارجوا تشريفك مدونتى (مش لاقية اسم )
وجزاك الله عنا كل خير

blue-wave يقول...

ههههههههههههههههه
يا نهار ابيض
كل دا بيحصل؟
لا دانا على كدا الحق نفسى وافلسع بدرى بدرى:)))

ojg يقول...

عرفتوا بقى انا بطفشهم من بره بره ليه؟؟
بس سيبك انتي تحليل متميز
فعلا صعب قوي ان اللي جوه الناس يظهر في القعدات دي

وعلى رأي المثل
من جوه فلة فلة ومن بره يعة يعة
:))
بوست جامد

jessy88 يقول...

والله انا لو من منك وانا حضرة الجريمة دى اروح اقطع النور وانهى اليلية الغم دى يخربيت جواز الصالونات الا صحيح يا شفقة انتى اتعرفتى على احسان ازاى؟

زهرة الجنة (زهرة سابقا) يقول...
أزال المؤلف هذا التعليق.
زهرة الجنة (زهرة سابقا) يقول...

المدونة جميلة جدا
والبوست الخاص بيكي يا شفقة هانم حلو قوي
لكن قوليلي هي دي جوازة والا حكم بالأعدام
لو كل الجوزات كده يبقي يفتح الله
خلينا كده أحسن

كل سنة وأنتوا طيبين

شفقة هانم واحسان بك يقول...

مجنون
ايه يا عم الكلام الكبير اوى ده
شكلك كده بعد ما دخلت مدونتنا عقلت
ربنا يهدى

شفقة هانم واحسان بك يقول...

عاشقة القمر
بكاكا داسه منورة يا قمر
واللهى السودانين دول ربنا يكون فى عونهم بجد بس طالما هما راضين بكده هما حرين بس بكره يندموا
بقولك ابقى سلميلى على الاستاذ الاعلامى الكبير فاروق الجوهرى ده سلام مخصوص من مصر للسودان

شفقة هانم واحسان بك يقول...

free
شفت انا خفت وكشيت ازاى اى رعب
وبعدين بطل تتلكع عندنا لو سمحت رايح جاى عندنا فى المدونة براحتك ايه فى ناس بتقول انك بتعاكس
هنبلغ عنك

شفقة هانم واحسان بك يقول...

مش لاقيه اسم
منورة بس يعنى من قله الاسامى ولا انتى من الناس اللى بينسوا اسمهم
وبعدين بلح ايه وموز ايه ايه الكوكتيل الرمضانى ده
رمضان ماثر عليكى جامد
سلميلى على العانس اوى وقوليلها وحشتينا وبيدعولك فى رمضان ربنا يفك عقدتك وتبقى قررت اكون متكلبشة

شفقة هانم واحسان بك يقول...

blue wave
منور ومشرف ومبروك على كتابة القصص
لكن بقولك ايه مفيش فلسعة لما الرجالة تفلسع امال احنا نقرف ونمسك فى شعور مين
يرضيك كده منلقيش حد يفك عقدتنا

عاشقة القمر يقول...

مالوا لو العريس بدفع كل شي بس الحمدالله اهل العروس مرتاحين هو بشنري بنتهم تكون معزز مكرم

شفقة هانم واحسان بك يقول...

ojg
هنفشر من اولها ونقول بنطفشهم واحنا اصلا مش لاقين اوكيه هعديها علشان ارفع من روحك المعدنية
بعدين انا ماعنديش معمل تحاليل من اللى اذاع هذه الاشعة المغرضة؟؟
اقصد الاشاعة
وبعدين بطلى بقى تقفى فى الاشارات كتير علشان الفل اثر عليكى

شفقة هانم واحسان بك يقول...

jessy
جريمة ايه بس انا لو كنت حضرت جريمة كان زمانى بكتب البوست من الزنزانة
وبعدين انا اتعرفت على احسان فى الاتوبيس وجوازنا كان جواز انتريهات لان الصالونات بقت موضة قديمة

شفقة هانم واحسان بك يقول...

زهرة الجنة
منورة
لا مش عايزين حد يتاثر بالبوست امال مين اللى هيطلع عين الرجالة لا متفقناش على كده هما الستات هيعملوا اضراب ولا ايه
امال مين اللى هيحمل الرايه معايا

شفقة هانم واحسان بك يقول...

عاشقة القمر
انتى بكلامك ده هتخلينا نعمل انقلاب على الرجالة هنا
ونيجى نتجوز من عندكم

سومه...مجنونه فى بلد عاقل يقول...

هههههههههه فيكى الخير ديما
حلو تشبيه الجواز بالزنزانه بس السجان فى اول الجواز حبيب وفى اخره بطيخ;))
ياله سلام

FreeKiller يقول...

شفت انا خفت وكشيت ازاى اى رعب
وبعدين بطل تتلكع عندنا لو سمحت رايح جاى عندنا فى المدونة براحتك ايه فى ناس بتقول انك بتعاكس
هنبلغ عنك

********************

هههههههههههههههههه
طب و الله العظيم أنا بنت
انا قلتلكم مرة قبل كده ف البوست بتاع البنات اللي بيشيشوا دول
هعاكس !!!!!!!!!!!
و تبلغوا عني كمااااااان
!!!!!!!!!!!!!!!!


عموما بوست رائع كالعادة

تسلم الايادي

princess يقول...

ممممممممم
تصوير عن قرب مبعدى للموضوع ههههههه
ونعم الجواز واللهى:)
انا كان راى جوزيه يلعب 4 4 2
ههههههه
مش عارفة اقول حاجة غير المنظر كالتاتى الراجل راجع بالبطيخة والجرنال اول ما يفتح الباب يلاقى 7 عيال بيجروا ورا بعض خطفوا البطيخة والجرنال وشدلوا شعره وجريوا والام تجيى تقولوا مش كنت تجيب حاجة حلوة للعيال
cut
اقطع
كل سنة وانتوا طيبيبن:)

عاشقة القمر يقول...

هههههههه مالو انفلاب هلا وسهلا في اي وقت

سمو الأميرة سارة يقول...

ههههههههههههههههههههههههههههههههههههههههههههههههههههههههههه

لأ مش ممكن بجد يا شفقة .. انتى كرهتينى فى الجواز من قبل ما اتجوزه ههههههههههههههههههه لما هم مش طايقين بعض كده بيتقدم لييييييييييه ههههههههههه

لأ بس بجد جميييييييلة جداً تسلم ايدك

وربنا يخليكي لاحسان و يخليه ليكى يااااااارب

شفقة هانم واحسان بك يقول...

سومة
وحشتينى موت موت بلح بلح
انتى فين كمان بدخل المدونة عندك لكن انتى قافلة التعليقات
بس شكلك سجانة قديمة
بخصوص الحلقة اللى بعتيها على الميل اكتر من هايلة بجد واللهى بس لما احدد مساحة الحلقة هبعتلك بس لازم تشوفى الشخصيات اللى فى القصة وتستعينه بيهم
وطلعينى بره انا واحسان
وشكلك كده هتعقلى

شفقة هانم واحسان بك يقول...

free
خلاص بنت بنت ما تزعليش اوى كده واى رعب وبطلى تتلكعى عندنا علشان فى شباب اشتكوا من المعاكسة
حلو كده
شفقة مصححة لغة عربية

شفقة هانم واحسان بك يقول...

princess
ايه ده بقى شكلنا كده طلعنا زمايل
هى الباشمهندسة خريجة اعلام ؟؟

شفقة هانم واحسان بك يقول...

عاشقة القمر
طالما بترحبى بينا يبقى هبدا فى الانقلاب
بس جهزى انتى العرسان بدل ما نعمل انقلاب احنا هنا ونطير العرسان ونروح السودان منلاقيش الا خرفان

شفقة هانم واحسان بك يقول...

سمو الاميرة سارة
لا يا سوسو انا مش عايزاكى تكرهى الجواز انا عايزاكى تكرهيه هو فى الجواز وتخلى عينه فى وسط راسه وربنا يكتر من امثالك

عايش ولكن يقول...

هههههههههه ضحكتينى
القضاء بتاعنا عادل
ياشيخه قولى كلام غير ده

انا بقا عايش ولكن
فهيا تحتمل كل المعانى اللى فى دماغك دى لانى خلاص زهقت بقيت ... عايش ولكن ..!!!

romansy يقول...

اية الجمال دا انتى كاتبة ساخرة تنفعى تكتبى فى مجلات الاطفال
اسلوبك جميل وشيق وممتع
دى اول زيارة لمدونتك بس مش هتكون الاخيرة

سندس وأمل يقول...

يا خبر...........

يعنى استاذ احسان شرب جوافة ضاربة

وكمان لبن فاسد!!!!!!!

ربنا يكون فى عونك يا استاذ احسان

على الجوافة بااللبن أقصد على مدام

احسان ............

وأن شاء الله ربنا يعوض صبرك خير.

وخيرها فى غيرها........

سندس

EMMY BABY يقول...

هههههههههههههههههههههههههههههههههههههههههههههههههههههههههههههه

انتى متاكدة ان دى جوازة

هتخلينا نقلق من الجواز كدة

لا بجد انا مش عارفة ايه اللى جابه اصلا كان يقعد فى بيتهم اكرمله بدل ما يتدبس التدبيسة دى

بوست جميل كالعادة

تحياتى

ايمى

حنين.. يقول...

هههههههههههههههههههه
تسلم ايديكى يا شفاشق
على فكره انا مفيش بوست ما اتقراش
قعدت اقرا اقرا
لغيت ما مت من الضحك
وبعدين اتفكرت انى معلقتش
رجعت تانى
وعلى فكره فكرة الجواز
خلاص
اتشالت من دماغى خالص
هههههههههههههه
وانا بقترح عليكى تحذفى البوست لانى كدا هتزيد نسبة عنوسة الشباب والبنات
ومش بعيد يرفعوا عليكى قضيه
هههههههههههههههههه لا طبعا بهزر
بوست دمه خفيف
وتسلم ايديكى
ومستنين عمو احسان
دمتى سالمه
فى انتظار المزيد من الدم الخفيف
حنين

Ahmed Al-Sabbagh يقول...

هههههههههه

عسل عسل عسل

مش ناويين تسألوا علينا بقى

(خدوهم بالصوت )

ههه

maiosha يقول...

هههههههههههههههه
ايه يا شوشو البوست الجامد ده
هههههههههههههه
يا شيخة عقدتو الواحد فى الجواز

كله كوم والحوار اللى فى سر كل واحد ده كوم تانى خالص

عالم كرهه بعضها وعايزة تتجوز

ههههههههه

كل سنة وانتى طيبة يا قمر

وسلميلى على إحسان كتييييير

محمد محمود يوسف يقول...

هههههههههههههههه


الواحد يفكو من موضوع الجواز بعد اللي قراه ده



يخربيت الوقعة


كان نفسي أشوفكو ف المستشفى


سلميلي على احسان

Rannon يقول...

ايه السيناريو الفطيع ده يا شفقة

بس مش قوي كدة.. ليه تدي الناس صورة وحشة كدة هتكوني سبب في زيادة العنوسة الرجالي والحريمي :))

تحياتي :)

خديجة محسن "لؤلؤة الاسلام" يقول...

هههه
بصراحة
مدونتكم رااااااااااااائعة
بجد عاجبااااانى اوى
ما شاء الله طريقة الكتابة فظيعة و تشد اوى

و بجد بجد بجيكم يا شفيقة هانم و يا احسان بك
على هذه المدزمة الراءعة
و تحياااااتى
رمضان
كريم
و مدونتكم هتكون في لمفضلة عندى
ده اذا مش كان في مشكلة

مصري بالغربة يقول...

ديه اول زيارة لي للمدونة

وعلى فكرة جميل جدا جدا

وانا على فكرة على وش مقابلة زي ديه قريب جدا

وكويس اني اكتشفت الحقيقة المرة ديه

بالذات لام العروسة اللي عايزة تخلص من الاتب اللي طالعلها ( على راي بعض الناس ) ومن

ابو العروسة اللي عايز يخلص منها كل شوية هات هات

كويس انه لقه واحد مجنون ف الزمن ده وعايز يتجوز ويشيل الليلة ديه

وعرفت ان العروسة بتعمل شوية حركات تمثيلية رائعة زي الكسوف والدلال والكلام ده كله

وهي في سره بتقول بس لما نكتب الكتاب بس
هههههههههههههههههههههههههههههه

بجد موضوع تحفة

واتمنى زيارتك لمدونتي انت وجميع المدونيين

مهيج الجماهير يقول...

ايه الغيبة الطويلة دى ؟؟
و الله بتوحشونا
و البوست جامد جداً
انا بقى عن نفسى بتخنق من الحوارات دى
ربنا يستر على الناس اللى هيتحطوا معايا فى موقف زى ده
D:
طبعاً بقى مش هقعد أقول اسلوب جامد لأنى قلت ده قبل كدة
و ياريت ماتغيبوش علينا كدة
و سلامى لأستاذ احسان

ABOALI يقول...

ايه يعم ده
دى معركة مليئه مواهب واسلحة
خد بلالغة على تصوير
ويا سلام عليك فى المناظر
فعلا يا واد بتعرف ترسم صح الاداء التعبيرى
هههههه
جميل الحوار
بس يعنى لسه فى خير
وفيه ردله حلوين وعاداله

عندك عروسه

تحياتى

غير معرف يقول...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

صانعة الأحلام يقول...

ههههههههههههههههههههههههههههه

لاء فطاري فطاري يعني

شفقة هانم واحسان بك يقول...

عايش ولكن
خلاص يا سيدى ما تزعلش عايزنى اقول كلام غير ده اقلب الكلمة
القضاء بتاعنا لادع
يارب يكون عجبك كده

شفقة هانم واحسان بك يقول...

romansy
ايه يا عم انت عرفت منين انى بكتب للاطفال لا بجد فراسه احيك عليها
كمان ايه قوام ورشاقة انت داخل مدونة ولا صالة جيم

شفقة هانم واحسان بك يقول...

سندس وامل
اخ يا نارى بتقومى احسان عليا وتهدى النفوس وتقوليلو خيرها فى غيرها ماشى
اه بس لو اعرف مين فيكم اللى قالت كده سندس ولا امل
ماشى ولقد ازعر من انعر

شفقة هانم واحسان بك يقول...

emmy
نو نو نو اوعى تقلقى ده الجواز حلو خالص وما تخافيش هو اللى هيدبس مش انتى ولو حسيتى انك هتدبسى ابقى فكى الدبوس او بوظى الدباسة

شفقة هانم واحسان بك يقول...

حنين
لا يا قمر اوعى تشيلى فكرة الجواز من دماغك لحسن يجيلك صداع كده مش حلو
الجواز اهم حاجة فى حياتنا بس انتم اتحدوا مع بعض والرجالة هيسلموا الرايه البيضا
فكرى فى الموضوع وما تخافيش
ولو صمصمتى على رايك ثقى تماما انك تبقى انتى اللى ساهمتى فى زيادة نسبة العنوسة وهتبقى موجودة موجودة
يعنى ما تلزقيش العنوسه فى البوست بتاعى

شفقة هانم واحسان بك يقول...

احمد الصباغ
اهلا اهلا اهلا وحوى يا وحوى
ها قد وصل الينا الرجل الهمام صاحب محلات السرجة
ايه يا عم احمد انتى بقيت بتاع عسل وبلاليص وكده وسيبت الصحافة والشغل الجامد ده
شكله ما بيكسبش
بس بقولك ايه احنا مش بناخدهم بالصوت احنا فى رمضان بناخدهم بالحلل والصوانى
ولو سمحت اطلع بالفطار اللى كلته فى وسط البلد
بقى ما تفتكرش اخواتك بردوا وسمعت ان كان فيه كباب وكفته وحمر ومشمر
ماشى براحتك

شفقة هانم واحسان بك يقول...

maiosha
لا يا قمر انتى بالذات من الناس الفاشلة اللى لازم ما تاخدش موقف من الجواز اوعى ازعل
انتى لازم تطلعى الفشل على عينه
وحشتينا وما تغبيش علينا

شفقة هانم واحسان بك يقول...

maiosha
لا يا قمر انتى بالذات من الناس الفاشلة اللى لازم ما تاخدش موقف من الجواز اوعى ازعل
انتى لازم تطلعى الفشل على عينه
وحشتينا وما تغيبيش علينا

شفقة هانم واحسان بك يقول...

maiosha
لا يا قمر انتى بالذات من الناس الفاشلة اللى لازم ما تاخدش موقف من الجواز اوعى ازعل
انتى لازم تطلعى الفشل على عينه
وحشتينا وما تغيبيش علينا

شفقة هانم واحسان بك يقول...

محمد يوسف
منور بس بقولك ايه اوعى تعزف عن موضوع الجواز لا لا امال البنات يطلعوا عين وجيب مين؟؟
كمان بطل حقد ونق علينا كده بردوا كنت عايز تشوفنا فى المستشفى طيب اختار مكان رومانسى وشاعرى بدل الحوادث دى

شفقة هانم واحسان بك يقول...

rannon
طبعا يا بنتى لازم اعمل سيناريو مش بطبق عليكم اللى درستوا
بس علشان تعرفوا انا اد ايه كنت طالبة مجتهدة

شفقة هانم واحسان بك يقول...

خديجة محسن
واللهى ما تغلى المدونة عليكى هى واحسان اتفضليهم الاتنين طالما عاجباكى المدونة اوى
وبشكرك

شفقة هانم واحسان بك يقول...

مصرى بالغربة
منور بس انا لو منك اسيب الجواز وافضل بالغربة
وعلى العموم كويس البوست نزل فى توقيت مناسب قبل ما تدبس
خد بالك

شفقة هانم واحسان بك يقول...

مصرى بالغربة
منور بس انا لو منك اسيب الجواز وافضل بالغربة
وعلى العموم كويس البوست نزل فى توقيت مناسب قبل ما تدبس
خد بالك

شفقة هانم واحسان بك يقول...

مصرى بالغربة
منور بس انا لو منك اسيب الجواز وافضل بالغربة
وعلى العموم كويس البوست نزل فى توقيت مناسب قبل ما تدبس
خد بالك

شفقة هانم واحسان بك يقول...

مهيج الجماهير
ازيك وازى الجماهير ياترى لسه بيهللوا ولا ايه؟؟
واحنا موجودين انت اللى ما بتزورناش
احسان بيسلم عليك كتير اوى وبيقولك اخبار التصوير معاك ايه

شفقة هانم واحسان بك يقول...

aboali
ايه يا عم ده انت كاتب هيروغليفى للاسف انا ثقافتى فلاليحى ما اقدرتش افهم غير عندك عروسة
اه عندى تعال خد احسان

شفقة هانم واحسان بك يقول...

غير معرف
ميرسى على الكلام الكبير اوى ده والثقافة العالية ده وان شاء الله نتابع

شفقة هانم واحسان بك يقول...

صانعة الاحلام
شكلك كده لسه بتحلمى وجعانة كمان

enjy يقول...

يا نهار اسوح على الكلام التحفة....
يا لهويييييييييييييييييييييييي هموت من الضحك مش قادرة اخد نفسى والله خلاص.......
والله انت تحفة تحفة تحفة سلام عشان مش قادرة ابطل ضحك

انى احبكم فى الله يقول...

المدونه بجد جميله وانا محظوظه انى دخلتها وعلى فكرة المدونه فعلا دمها حفيف واشكرك على التعب والجهد والبوست الجميا تحياتى ليك وتقبل مرورى

Beram ElMasry يقول...

ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله

Lady E يقول...

ايه كل الشخصيات الشوريرة دي

وبعدين في حد بيتفق على المهر والشفكة

والكرهبا والمطبخ من اول مقابلة كده

عالعموم الف مبروووووك لصبحتك

وربنا يتمم لها على خير يااارب

ومتنسينيش في الجاتو بقىىىى

حـــــدوتـــــة يقول...

السلام عليكم

ربنا يطمنك على الكلام الجامد ده
عشان كده الواحد مش ناوى ياخد اى خطوة
إلا لما يكون مالى مركزه كويس
عشان تبقى النية المستخبية زى الباينة

سلالالالالالالالالالالالالالالالالالالالالالالالالالالالام

الملاك الحزين يقول...

أول مرة أعلق لأن إسلوبك شدنى فى الحقيقة مدونة جميلة وكوميدية ولذيذة
كل عام وانتى بخير

د/مروة المعداوى .....قباحة سابقا يقول...

كده يا شفقه و انا اللى كان جيلى عريس
و النعمه خلاص صرفت نظر
دا الواحد يشترى توستر احسن
بلا قلبه دملغ و انا هقعد افكر بقى اللى اتقال و اللى متقالش
لا ياختى انا كدا فله شمعه منوره

ههههههههههه

تشااااااااااااوووووو

عمار صبرى يقول...

السلام عليكم .....

ههههههههههههه
بوست دمه خفيف

على فكره أنا أول مره أدخل المدونة دى بس شكلى هبقى زبون دايم

سلامات .

تامر الحسيني يقول...

للاسف دي الزيادرة الاولي لبيتكم سوري لمدونتكم العامرة
بس انا بجد سعيد قوي بالزيارة دي
وسعيد اكتر انكم زوجين ومدونين في نفس الوقت
انا من احلامي اني اتجوز واحدة مدونة ونعمل مدونة مشتركة كدة
هههههههههههههههه

اما بقا عن خفة الدم فحدث ولا حرج
اخر موضوعين قرئتهم من اول كلمة لاخر كلمة
قمة في المتعة بجد
اسلوب سردي جميل جدا
واتمني اني اشوف علطول موضوعات جميلة عندكم علطول ويكون في زيارات عائلية لمدونتي
كمان
هههههههههههههههههه

تحياتي
تامر الحسيني
انسان عاشق حر

مواطن مصرى نايم يقول...

ههههههههههههههههه
نانسى

ماشى
ههههههههههههه
بس ايه رأيك فى مصحح اللغة العربية
و بعدين فين النعت الشبه جملة
انا مش قلت لك استخرجى نعت

ههههههههههههههه

كيكى يقول...

مكنتى تخليهم يقتلوا بعض احسن
هههههههههههههههههههههههه
هههههههههههههههههههههههههههه
بجد والله انا الى زعلانة منك اووووووووى
وانا الى كنت بدور عليكى..ولقيتك على الميل..وانتى عارفة الباقى
!
وبخصوص المستشفى والله لحد اخر لحظة مكنتش هاروح
والله جت كدة بس والله والله
انتى واحشنى اووووووووووووووووووووووووى
والله
عوووووووووووووووووووووووووووو

شفقة هانم واحسان بك يقول...

enjy
ازيك يا قمر وازى صحتك دلوقتى ؟؟
بقولك ايه اوعى تموتى من الضحك لحسن البس تهمة

شفقة هانم واحسان بك يقول...

انى احبكم فى الله
لا شكر على واجب بس انتى حسستينى انى بشتغل فى الفاعل
مش اوى كده

شفقة هانم واحسان بك يقول...

beram
منور جدا واحنا فعلا ممن نتذوق اى شىء طعمه حلو بس المهم ما يكونش فول
بس احنا زعلانين اوى منك يعنى عايزنا نتذوق طبيخك وانت ما تدوقش حاجة عندنا طيب بوست واحد يا راجل وقلنا طعمه ايه اجبر بخاطرنا

شفقة هانم واحسان بك يقول...

lady
طبعا يا بنتى مش صاحبتى دول ناس مخلصة من اول قعده يخلصوا علطول هو لسه فى وقت
وبعدين كل مرة الجاتوه الجاتوه بطلى طفاصة بقى

شفقة هانم واحسان بك يقول...

حدوته
لا انا عايزاك تاخد كل الخطوات مرة واحدة علشان ما تحسش لان كل خطوة بغيبوبة
وايه حكايه مالى مركزه دى هو الباشمهندس هيتجوز لما يبقى لواء

شفقة هانم واحسان بك يقول...

الملاك الحزين
منور بس ايه اسلوبك شدنى دى هو انا مغناطيس
على العموم ميرسى على المجاملة الرقيقة

شفقة هانم واحسان بك يقول...

د مروة
يا عم يا عم عدينا وبقينا نقول نشترى توستر ربنا يوستر علينا

شفقة هانم واحسان بك يقول...

عمار صبرى
منور وطبعا ما تبقاش تنسى حق الفيزيتا بما انك هتبقى زبون
ولا ابو بلاش كتر منه

شفقة هانم واحسان بك يقول...

تامر الحسينى
منور بجد بجد
وميرسى لكلامك الرقيق بجد بجد
واخجلتم تواضعنا

شفقة هانم واحسان بك يقول...

مواطن مصرى نايم
شكلك صحصحت علينا يا اسلام
ومعلش انا تلميذة خايبة شوية فى اللغة العربية بس اوعدك لما ابقى من فطاحل اللغة ابقى استخرج النعت

شفقة هانم واحسان بك يقول...

كيكى
وحشتينى اوى اوى عوووووووووووووووووو
اما بخصوص القتل فاحنا بنساعد فى جوازة مش جنازة
وربنا يعينه على الجريمة دى

ضى القمر يقول...

هههههههههههههههههههه

ههههههههههههههههههههه

روووعه .. بوست خطير بجد

على دى اول زيارة للمدونه .. ولقيتها مدونه تجنن .
لكن لو اتجننت هيكون حساب العلاج عليكم .
يلا سلام دلوقتى ..
وممتتأخروش بالبوست الجديد ..
مستنياه من دلوقتى
يلا سلام وكفايه رغى عليكم كده :)

وومن يقول...

احسان هانم

بجد بجد بوست في الجون فكرتيني بالقعدات دي كويس انها خلصت بقري الفاتحة بالنوسبة ليا بفضل اخلصها بفرصة تعيسه متكرورهاش مرة تانية

كل سنه وانتم طيبين

دعاء مواجهات يقول...

يخرب عقل خفة دمك بجد

انتى زى العسل


بتوحشونا
متغيبوش عننا

سلام

إيما ( أم البنين) يقول...

بوست هايل ياشفقه ..والله كنت محتاجه أضحك شويه ربنا يخليك ليا
وآسفه على تقصيري معاكم ظروف رمضان وكمان عندي إمتحانات بعد رمضان وملخومه آخر لخمه ..إدعولي
كل سنه وإنتم طيبين

مصري بالغربة يقول...

اناعازمك انت واحان بيك

يا شفيقة هانم

لا لا مش على الفطار .....

ولا السحور ......

لا عازمك على حاجة احسن من كده

عازمك على زيارة مدونتي

بيقدموا لكل ضيف مج نسكافيه 100/100

مع قطعة جاتوه من اللي كان نفسك فيه بالساقية بتاعة الصاوي

بس الصاوي مجاش

شفقة هانم واحسان بك يقول...

ضى القمر
منورة ونورك غطا على المدونة
بس من فضلك ما تتجننيش علشان حساب العلاج ما تلاقيش
مش من اولها الحساب علينا

شفقة هانم واحسان بك يقول...

وومن
اهلا بيكى بس على فكرة احسان هانم زعل منك اوى لانك غلطتى فى نوعه
هو احسان بيه
اما انا شفقة هانم
كمالن انتى حسستينى انك دخلتى الاستاد مش المدونة
عموما جت اوت المرة ادى
والى اللقاء فى جولة اخرى

شفقة هانم واحسان بك يقول...

دعاء
منورة يا ترى ايه اخبار المواجهات؟؟
وحشتينا بس كده بردوا عايزة عقلى يخرب........ عموما انا موافقة بس تصليحه هيبقى عليكى

شفقة هانم واحسان بك يقول...

ايما
وحشتينا اوى اوعى تطولى الغيبة علينا
على فكرة انا دخلت مدونة زوجك العزيز ابو البنين ربنا يخليكم لبعض يارب
سلامى ليه
وربنا يوفقك فى الامتحانات علشان ما تبقيش ملخومة لخمة
تبقى تيجى تفرقى علينا لحمة

شفقة هانم واحسان بك يقول...

مصرى بالغربة
العزومة احنا موافقين عليها بس بشرط يكون فيها لحمة لان احسان مالوش لا فى النيسكافية ولا الجاتوه

(احمد سكر ) يقول...

يسلام يسلام

ادى النسب ولا بلاش

لايقيين على بعض خالص
هههههههه

ايه الجنان دا ههههههه

بجد روعه ف الصياغه

ممممممممم

وقراءة الافكار

تحياتى

احمد سكر

انا ودماغي يقول...

على فكرة
انا بس كنت عايزة أقول إنى قريت المدونة من اولها لآخرها...و بجد مكنتش قادرة أمشى إلا لما أقلكم إنها رائعة جدا جدا جدا و ربنا يخليكوا لبعض و يسعدكوا:)

عروسة ننوسة يقول...

احمد سكر
اهلا اهلا بالسكر والنمل اللى هيتلم علينا
وعمال تقول نسب ومقادير ايه يا سكر انت سيبت الصيانة وبتشتغل شيف ولا ايه

عروسة ننوسة يقول...

انا وةدماغى
ايه انتى بتمشى بالمقلوب على كده طيب ربنا يعينك

Hossam يقول...

ههههههههههههههههههههههههههههههههههههههههههههههههههههههههههه
جامد جامد اخر حاجة
بجد تحفةةةةةةة
حلوة معهوش تمن الموس دى ههههههههههه
اتمنى نكون اصدقاء
بس عندى نقض
ان الموضوع كل ما كان قصير
كل ما كان احسن
عشان القارء لمدونتك مش يزهق لو لقاه طويل
مع انى اشك انه هيزهق هههههههههههههههه
يلا سلام بقى

يوميات نائمة في الأرياف يقول...

شفقة واحسان
انتو فين؟.
تعالو ليكو عندي حاجة

Appyplanet يقول...

انا بس جايه احذركم فيه حد واخد اسمي وبيدخل يشتم الناس والنبى خلو بالكوا انا عامله بوست عندي بكده
ربنا يكرمكوا

نهر الحب يقول...

والله والله والله
انا علقت هناا وجوجل منها لله بقى
قالت لى اريور
الله يسامحها
بوست جميل ياشفقة بس لخبطى صورة ابو البنت يعنى لازم تقولى انه ما هيصدق يخلص منها هههههههههههه

كل سنة وانتى طيبة

la Princesa ... WHiSPeR يقول...

انا جه

كده مش تسالو عليا بقالي شهرين ماجتش هنا
مش يمكن الاعداء غزو مملكتي واغتالوني متكهربة بكوز ميه حادقه

ههههههه

هو انا لما يجيلي عريس هيعملو كده الناس ههههه بلاش جواز احسن طالما الدنيا مش طايقه بعضيها كده

بس سيبك انتى تحليلك للشخصيات عميق عمييييييييق لما يجي عريس هخليكي تيجي تقعدي معاه تشوفيه بيقول ايه فى سره هههه

يلا تشاااااو

Amgad يقول...

مش ممكن بجد
هو كله كده في سرة
كل واحد بيقول حاجه وفي سره حاجه تانية
بس باين بجد انك بتموتي في الحاجات دي
وواضح اوي انك هاضماها موووووووت
عزائي لاحسان بك انا عارف انو اتعذب كتير
تحياتي
امجد مجاهد

مهيج الجماهير يقول...

الله يسلمك و يسلم استاذ احسان
و بالنسبة للتصوير .. انا مستنى أجيب كاميرا .. و بعد كدة أبقى أقولكوا على أخبار التصوير .. أهو أكون صورت أى حاجة يعنى
D:
تحياتى

engy يقول...

اول مره ازور المدونه الرائعه دى والاقيها تحفه كده اضحك الضحك ده كله بجد جميله جدا ربنا معاكم كل سنه وانتم طيبين

بنت مصريه يقول...

ههههههههههههههههههه
يا يا شفقه دا انتى نفساويه قوى ايه الغل ده بس عسل والله

دا انتى جايبه سماعات خارقه يا بنتى تسمع اللى قالوه واللى عايزين يقولوه هههههههههههههه

ارحمك يوم من عمل الفطار
فيه فطار للمدونين يوم الجمعه ف ساقيه الصاوى يوم 26
لوعايزه تعرفى تفاصيل اكتر روحى عند عليا حليم
صاحبه مدونه عندليبيات
http://www.blogger.com/profile/07939244575100207924
قولى لاحسان وتعالوا
ولو ما وافقش تعالى انتى وسيبيه يفطر لوحده
انا بهدى النفوس عادى يعنى ههههههههه

اتمنى تنورونى

dina يقول...

السلام عليكم
اول مره ازور مدونتكم بالصدفه
جميله عجبتنى وكونكواانكم تدنوا سوا اجمل والله
وشكلكو اتنين زىالعسل ربنا يفتح عليكو
بالنسبه للموضوع
يانهارى لو كان ده بيحصل فعلا
ربنايلطف بينا
على كده لواتقدملى حد هستلف جهاز كشف الكدب يومها
هههههههه
تقبلوا مرورى

غير معرف يقول...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

المتبهـدلـون فـي الأرض يقول...

هيه هيه أول تعليق....أول تعليق


نياهاهاها

بنوتة يقول...

ههههههههههههههههههههههههههههههههههه
يا نهار اسود للدرجة دي مش طيقين بعض بس الموضوع حلو منتظرين المزيد

اهو ده عيبه يقول...

والله انتى دمك زى العسل
ولما الكل مش طايق بعضه لازمتها ايه الجوازة السودة دى
لو كل جوازة حتمشى كده يبقى عليه العوض
بس بجد موضوع لذيذ وحلو تسلم ايديكى

جنّي يقول...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

manmona يقول...

هههههههههههههههههه
يا بخت مين وفق راسين فى الحلال؟؟
ماشي

على فكرة بقه المدونة دى بجد ملهاش حل
هتلاقونى بنطلكوا هنا كتير

عبده الرايق يقول...

احسا بيخليكى تروحى الفيسكو مره كل شهر
ههههههههههههه
انا اشك
ههههههههههههه
لكن لو هتتفرجوا على نور الديسكو من بعيد ممكن
اقولكم
كل سنه وانتم طيبين
وخلى بالك يا شفقه احسان واخد ارباح على العيد
الحقى بقى قصقصى ريشه

mony يقول...

كالعادة يا شفقة ليكي ايفيهات تموت من الضحك



بس عايزة اقرأ من الموضوع ده من الطرف الاخر برضه علشان نعرف بيقولوا علينا ايه

شفقة هانم واحسان بك يقول...

hossam
منورنا واللهى بس ليه كده زعلتنى عندك نقص يا حرام اقولك بلاش تعمل ريجيم وحاول تاكل كتير
اما بخصوص الحاجات القصيرة فانا ما بحبش المينى جيب ومن انصار الطويل واللى يحب يقرا للطويل يشرفنا اما القصير مالوش مكان اصلى انا عندى عقدة
انا طويل واهبل مش قصير اوزعه

شفقة هانم واحسان بك يقول...

نائمة فى الارياف
احنا تحت النظر بس معلش مشغولين اوى اوى فى الاكل والنوم بقولك ايه خلى الهدية عندك لبعد العيد وان شاء الله اجى بنفسى اخدها بس اوعى تتديها لحد تانى

شفقة هانم واحسان بك يقول...

appy
اخيرا شرفتينا ايتها الغادة الحسناء
ماشى يا ستى علم بس بينى وبينك اوعى تكونى انتى اللى عاملة المقلب ده فينا واللى ما بيعجبكيش بتشتميه

شفقة هانم واحسان بك يقول...

نهر الحب
شوف شوف بقى من اولها هنبرطم بالعنجليزى جوجل بقى وكلام من ده وبعدين لما هى بتقولك اريل خالص اسمعى كلامها وظبطيه وهتلاقى التعليق وصل

شفقة هانم واحسان بك يقول...

la priencesa
بونجور مولاتى
معلش على عدم السؤال احنا كنا فاكرينك فى انتخابات او بتتفقدى شئؤن الرعيه قلنا نسيبك براحتك
وبعدين انا تحليلى بوسيتيف مش عميق ايه احنا فى معمل تحاليل ولا برميل؟؟
شكل الكوز والميه الحادقة اصروا عليكى وخللوكى

شفقة هانم واحسان بك يقول...

amgad
ايه يا عم حاسستنى انى فى المقابر شوية بتموتى وشوية عذاب
من اولها كده بنفول اعوذ بالله

شفقة هانم واحسان بك يقول...

مهيج الجماهير
ايه يا عم هو المصوراتى اللى كنت بتشتغل عنده طردك ولا ايه؟
على العموم ما تزعلش وانا هخلى احسان يجبلك واحدة جديدة بالقسط بس بلاش الصور المحروقة

شفقة هانم واحسان بك يقول...

engy
منورة يا قمر وميرسى على المجاملة الرقيقة دى وكله من ذوقك

شفقة هانم واحسان بك يقول...

بنت مصرية
بقى كده يا مصرية انا نفساوية وغلاوية
ماشى واللهى لطلع جنانى عليكم وما حدش يلومنى
اما بخصوص الفطار فلاسف انا مدبسة فى عزومة لو عرفت اخلع هاجى

شفقة هانم واحسان بك يقول...

dina
كده بردوا يا دينا تطلعى عميلة جهاز كشف الكدب مرة واحدة

شفقة هانم واحسان بك يقول...

المتبهدلون فى الارض
ايه الضحك ده كله طيب حاسب على نفسك لتفطس

شفقة هانم واحسان بك يقول...

بنوتة
طبعا للدرجة دى هيطيقوا بعض ازاى ودرجة الحرارة فوق الاربعين

الحشرى - سيد يونس يقول...

بجد موضوع مهم وخطير

تسلم الأيادى يا شفقة

aloneinlife يقول...

very very veryyyyyyyyyyyy nice begad tohfa