الخميس، 30 أكتوبر، 2008

هتطبخى يعنى هتطبخى



وحشتونا بجد معلش بقى اصل تورتة عيد الميلاد خدت............... وقت طويل عقبال ما اكلناها
اصلها مش بتزورنا كتير .......وبينى وبينكم
بقالى فترة كده قاعدة متنحة لسى احسان عمالة اتفرج عليه.............. وهو بياكل واتحسر على ايام زمان لا كان فيه..... كرش ......ولا ترهلات .......ولا شحومات

وسرحت كده شوية ايام الخطوبة .......ايام ما كان احسان يجى يزورنا وجايب معاه بوكيه ورد ....اما دلوقتى ما يدخلش الا بكوارع وممبار وفخدة لحمة

ولا لما كنا نعزمه على الاكل...... كان يجى ما يرضاش ياكل ابدا ويقولى اصلى شبعان
ده كفاية البصة فى عينيكى....... ونقعد نتحايل انا وماما علشان ياكل ونحط اللحمة ادامه يقول ....ابدا مقدرش اكل ويسيب طبقه مليان


و كان يقعد ياكل فى خمس دقايق ويقطع على مهله بالشوكة والسكينة

ولما كان يسالنى انتم عاملين اكل ايه النهاردة....... واقول مثلا مسقعة يقولى الله بموت فيها
دى تلاقيها جنان علشان عمايل ايديكى

ولما يجى يزورنا يقول....... الله ريحتكم باينة من على السلم ولا اللى داخل محل حلويات
طبعا ما انتى اللى عاملة بايديكى الحلوين دول...... والصوابع اللى عايزة تتاكل

اما دلوقتى ........يا ختى عليه راجل تشوفوا التامير والصوت اللى جايب اخر الشارع .........ولو رجع مالقاش اكل ولا لو فتح التلاجة ولقاها فاضية تبقى مصيبة

وينادى عليا " ايه ست هانم فين الاكل ؟؟اكل نفسى ولا ايه؟؟

فين مصروف البيت يا ست .....؟؟خدتيه ودتيه على الكوافير ولا ايه نهارك مش فايت

وساعات تلاقيه كل شوية ينادى عليا فين الاكل ؟؟ اقوله انت مش لسه واكل يقولى......... انتى هتجبيلى من بيتكم ؟؟
جعان عايز اكل
اقوم اسد بقه باى حاجة

وشوية يقولى اللى بعده فين الحلو؟؟ خلصينا الواحد حاسس انه هفتان

اقوم ابص له بصه غدر واقوله .....هفتان طيب تعالى كلنى احسن

وساعات يرجع من بره يقولى "انتى طابخة ايه النهاردة ؟؟ اقوله مسقعة ولسه مكملتش الكلمة يهب فيا..... ويقولى انا راجل شقيان ..تعبان مسقعة ايه

اللى هاكلها انا عايز "امح "على اللحمة وبمجرد ما ارد واقول مفيش..

عينكم ما تشوف الا النور...... وودانكم ما تسمع الا كل مصيبة ودبش وكلام متنقى ......مع حرمان من المصروف
ولا لو شم ريحة تقليه ......يوووه

اليوم ما يعديش ويقولى .......ايه يا هانم الريحة دى ....... ويحسسنى انه ولا اللى بتتوحم ولو الشوربه كانت دسمه شوية يهلل ويزعق ويرفس السمن كتير

شكلك كده متعرفيش يعنى ايه شوربة .........روحى بيت ابوكى اتعلمى وابقى تعالى اطبخى
ونقعد للصبح فى محاضرات ومهاترات طبيخية لحد ما يروح فى النوم

بصراحة فيه رجالة ........بيجيلهم حالة صرع مغولى فى الاكل بعد الجواز
ومش عارفة نفسهم بتتفتح على ايه ........اظاهر ان الخناق والمشاكل الزوجيه بتخليهم طفسين

المهم يا ستات المستقبل......... خلوا بالكم كويس من عرسانكم وعليكن بمراقبتهم والبحلقة ليهم وهما بياكلوا

بس بقولك ايه انتى وهى ده يكون من تحت لتحت يعنى ما تخلهوش يحس انك بتراقبية بدل ما يجيله تلبك او مغص معوى وتلبسى انتى وعينيك الموضوع

ولا تلاقيه بيقولك انتى باصالى فى اللقمة اللى بطفحها
ويقوم حادف الشوكة والسكينة فى وشك والواحد ما يضمنش العواقب ..اه

بصى يا ستى انتى تعزميه على الغدا ولا اقولك خليها عشاء علشان يبقى اوفر .....وما تغرميش كتير

واول ما يبدا ياكل ويحط ايده فى الطبق

خدى بالك كويس .......وشوفيه يا ترى بياكل زى الناس العاديين فى خمس دقايق
ولا اقعد نص ساعة زى الناس الخارقة للطبيعة؟؟

لو لقيته بياكل وبيخلص فى وقت مناسب وبيهتم يقولك رايه فى الاكل

كده يبقى انسان معتدل وطبيعى وتمسكى فيه بايدك وسنانك وعلى الماذون طيران

اما لو قعدتى تزغوريله ولقيته بياكل واحدة واحدة... وتاته تاته وعلى مهله على الاخر
ولا اللى مورهوش حاجة وقعد فى الاكل حاجشتاشر ساعة

وتساليه خلصت يقولك ومستعجلة على ايه ....هو احنا ورانا حاجة ؟؟ ويقعد يمزمز
ويمصمص ويسال على المقادير علشان هيروح يجربها

ده لازم تطرديه من بيتكم فورا ....وتقوميه من على الاكل غصب عنه
ويستحسن لو ترميله الشبكة فى وشه وتقوليله ماتعتبش هنا تانى

لانه يبقى انسان بارد وان شاء الله لو اتجوزتيه...... وسالتيه على حاجة هيرد عليكى بعد 90 سنة
والنوع ده يجيب الضغط والسكر والمرارة

اما لو لقيتيه بياكل ويخلص بسرعة جدا

وعقبال ما انتم تقعدوا على السفرة يكون هو خلص وبيغسل ايديه

وتقوليله انت كده كلت يقولك اصلى بحب اكل بسرعة زى كل الناس اللى فى الدول المتقدمة...... وتلاقيه كل وحلى
وشرب الشاى وهيروح وانتم لسه ما حطيتوش ايدكم فى الطبق

ده طبعا انصحك بانك ما تتجوزهوش .......لانه يبقى انسان متسربع على عمره ........ومتهور وطايش

ولو فكرتى تتجوزيه ومفيش غيره ادامك امرك الى الله
بس تاكدى انه ممكن يطلقك يوم الصباحية
ويقولك مش انتى الانسانة اللى كنت بدور عليها........ وبكده يبقى اتخلص منك بدرى بدرى

اما لو لقيته قبل ما ياكل بيغسل ايده عشرين مرة بديتول وفينيك
وكل شوية يبص فى الطبق قبل ما ياكل وعمال يسال الاكل ده اتعمل ازاى
وفين وامتى ومين اللى شارك فى طبخه؟؟
وكانت غاسلة ايدها بمطهر ولا لا والطبق مصدره منين وبكام وخامته ايه ؟؟؟؟وفى الاخر ما ياكلش

فده تاخدى بالك منه كويس....... اوى لانه هيقرفك من الدنيا واللى فيها
وهتلاقيه جايب سنارة وقاعد يصطاد من الطبق .......ومصروف البيت هيضيع على المنظفات
واحسنلك انك تسيبيه فورا لانه هيعلك............ ويشلك ويجبلك الهسهاس
والنوع ده يبقى عايز بيت زجاجى معقم......... وممرضة مش زوجة

اما لو لقيته انسان هادى وبياكل عادى ولا بيهش ولا بينش
وكل ما تقوليله الصنف ده حلو؟؟ يرد يقولك هايل طيب دوق من ده...يقولك حلو اوى
طيب ايه رايك فى المكرونة دى؟؟؟؟ وتبقى معجنة وكل مكروناية لوحدها
يرد يقولك جميلة جدا........ تسلم ايدك
طيب والفراخ حلوة كده؟؟ يقولك كل اللى تعمليه فظيع

لازم تعرفى انه انسان مالوش كلمة ولا هيهش ولا هينش فى البيت
وتعرفى انك هتكونى المتصرف الوحيد والحاكم الامر الناهى
وده طبعا فيه ستات بتموت فى النوع ده......... ويا بختهم بيه لان الواحدة منهم هتقعد وتدلدل رجليها ولا حد
هيقولها بتعملى ايه

اما لو لقيته كل ما يجىء يزوركم يقولك الله ايه الحلاوة دى؟؟
تقومى انتى تنشكحى اوى وتزقططى فاكراه بيعاكسك
يقوم يقولك الله على ريحة التقلية ولا المحشى ريحته تجنن

تقومى تبصيله تزغوريله وتقوليله .......نعم افندم يقولك ايه يا عروستنا
...........انتم مش عازمينى على الغدا ولا اقوم اروح ؟؟
انا شامم ريحة الملوخية والبط كمان دى ريحتكم جايبة اخر الشارع

ولما يقعد على السفرة تلاقيه مزقطط وفرحان .........ولا اللى جاتله علاوة

وعمال يدب فى الاكل.... شوية ......محمر...... وحبه مشمر وكل شوية يقولك لا احنا لازم نستعجل على الجواز
مش علشان بيحبك ولا علشان خاطر عيونك لا علشان........ مفيش حد فى البيت يطبخله
وتبصى تلاقى نفسك قاعدة مع فيل على السفرة..... عمال يحشر فى بطنه لحد ما يجيله انتفاخ
ده بقى لازم تتاكدى انه ما ينفعش خالص
وانه عايز مطعم يعيش فيه مع الديوك والفراخ والبط .......مش يعيش فى بيت
وانه طفس وهمه على بطنه ..... كمان لازم تعرفى انك لو اتجوزتيه هترجع بيت ابوكى ناقصة ايد او رجل
لانه من المحتمل انه لو جاع ومالقاش اكل......... هياكلك انتى

اما لو لقيته من النوع اللى كل شوية يقولك السمن كتير فى الاكل
يا ريت لو ما تحطيش سمن خالص ........علشان الكوليسترول

وايه الزيت ده ياريت ما تستعمليش الا زيت زيتون ودرة ........علشان الزيت العادى بيجبلى حموضة
ولو اكلتيه حلويات يقولك خفى السكر شوية انت بتاكلينا عسل ؟؟ السكر غلط يجبلنا المرض

خفى التقلية بتاعة الملوخية ومالها الملوخية واقعة تحت ليه والشوربة فوق؟؟
التسبيكة فيها حاجة غلط ....محشى الفلفل حراق والبتنجان مكعور والصباع كبير ......ايه اللى انتى مهبباه ده اللحمة نيه والاكل بيقرقش

النوع ده طبعا انا مش هوصيكى عليه........... اكيد كلكم عارفين هتعملوا معاه ايه ؟؟
طبعا وهو نايم من البلكونة عدل
ولو الجيران نادوا عليكى ولا كانك هنا .........وكانك جالك طرش مزمن
ولو اتحيلوا عليكى معلش تعالى على نفسك وباجدع سكينة عندك

يارب بقى تكونوا استفدتم وتقدروا تختاروا صح
مع انى عارفة ان فى الوقت ده ...........مفيش حاجة اسمها اختيار ..........والواحدة منا يا عينى ما بتصدقش تلاقى خيال راجل
وتمسك فيه بايدها وسنانها ........ طفس طفس .......مفجوع مفجوع
المهم تتجوز بس انا حبيت انبهكم علشان ما تتصدموش

بس خليكم عارفين " اقرب طريق الى قلب الراجل معدته"

وكفاية بقى كده لحسن الجيران ............بقالهم ساعة بينادوا عليا


شفقة

هناك 94 تعليقًا:

blue-wave يقول...

هههههههههههههههههههههههههههههه
ايه يا بنتى حرام عليكى
كدا محدش هايتجوز خالص:)))
طيب يعنى نعمل ايه؟
لو كلنا مش عاجب مكلناش مش عاجب
نولع فى نفسنا بقى ولا ايه؟؟؟؟
بس سيبك
انتى جبتى فعلا من الأخر
تسلم ايدك
السلطه حلوة اوى:)))))

مواطن مصرى نايم يقول...

ههههههههههههههههههههههههههه
ماشى يا شفقة و الله انا معاك ريس احسان
يعنى انتى بتبوظى الشعر بتاع البوست اللى فات
بالشعر ده
ههههههههههههههه
بس انا مصدقش ان احسان كده
ممكن تكون شايله و معبيه منه بس
ههههههههههههههه

بوست زى العسل و الله

بس خفى على احسان شوية الا انا حجوزة عروسه شبة عيشه الكيلانى
اه هو حيتقمر

يا كده يا بلاش

هههههههههههههه

تحياتى

اسلام

Desert cat يقول...

حلوة نصائح قبل الزواج
كيف تختارين زوج شيك فى الاكل
:)

nado يقول...

ليه كده بس حرام عليكى ... انا مخطوبه بس بشكل ده اعتقد هكون مخطوبه على طول
او افسخ الخطوبه وعلى الاقل الواحد يخلص من وجع الدماغ وحرق الدم ويعيش خفيف ويموت خفيف عمتا بجد اسلوبك ذى العسل وده مش جديد عليكى ياقمر

ماما أمولة يقول...

هههههههههههه

والله زي العسل يا شفقة

بس نعمل ايه اهو نصيب

تفتكري ايه سبب التغيير اللي بيحصلهم

طبيعي يعني ولا من الهرمونات بتاعت

الفراخ ولا الخضار اللي مليان مبيدات

ربنا يكون في عونا

سلام يا شفقة

اهو ده عيبه يقول...

مفيش راجل صيامى؟
يعنى ياكل مرة واحده فى الاسبوع زى الجمل ويخلصنا
اصل بصراحه كل الانواع اللى قلتيها تقلق
عموما ربنا يستر ومنقعش فى حاجه من الانواع دى
تحياتى لكى وخلى بالك من دراعك

يوميات نائمة في الأرياف يقول...

الجيران بينادو لية يا شفقة انتي وديتي احسان فين؟
تكونيش رميتيه من البلكونة؟
مكنش يومك يا احسان
انتي بجد تشبيهاتك تحفة وخصوصا اللي بياكل بالسنارة بس
ومع ذلك اعتقد انك جبتي المفيد ومن الاخر لما قلتي ان احنا مش هنتامر واحنا كنا لاقيين؟
ربنا يكون في عونك يا احسان مش عارفة ليه مع البوست الطويل العريض ده مش قادرة تخليني اتعاطف معاكي وحاسة كدة يا شفقة وبعض الاحساس خيبة انك مفترية على احسان وانه واحد غلبان اوي
ولا اية رايك يا احسان؟

عاشقة القمر يقول...

ههههههههههههههههههههههههه
بجد دم خفيف جدا فعلا كلامك صح
فعلا قبل خطوبه بتكون شكل بعد زواجه شي تاني بمقلوب
ههههههههههههههه
الله يعطيك العافيه
بوست جميل

انا حره يقول...

عااااااااا

هيا الحكايه ناقصه

يابنت الحلال الرجاله شاحين الايامدى فالسوق ومحدش بيتجوز

جايه تكلكعيها اكتر ماهى مكلكعه

اهو راجل وخلاص انشالله يكون بياكل برجليه حتى ههههههههههههههههه

هههههههههه انا بهزر طبعا ممكن استحمله لو بياكل ب اديه الاتنين مع بعض يعععععععععع

بوست جامد ياهانم

انا حره يقول...

بس قوليلى هوا احسان شايل اللوز قبل الجواز هههههههههه

mony يقول...

ههههههههههه

دمك سكر يا شفقة


بس انت ماقلتيش نوافق علي ايه بالضبط


انت حذرت من انواع كتير و ماقلتيش ايه اللي ممكن تنصحي بيه يا فندم

mohamed ghalia يقول...

اقرب طريق الى قلب الراجل معدته"
ههههههههههههههههههههههههههه
حقيقى بوست رائع الواحد بقاله كتير مضحكش كده
ربنا يسعدكم دايما
تحياتى

esraa يقول...

هههههههههههه

لأ ياستي احنا علينا من ده بايه

ماحنا قاعدين في بيت أهلنا زي الفل أهو

صباح الصباح يقول...

بصى الاحسن اشترى دماغك واديلة فلوس يشترى بيها الاكل اللى هوة عاوزة وصباح الخير يا جوزى انتا فى حالك وانا فى حالى

هههههههههههههههههههههههههههههههههه

Tamer Alhosiny يقول...

صباح الخير
عليكم النهارضة الجمعة
انا عايز اقولك علي سر
بجد انا دائما بتحيز لاحسان
وبعلنها من هنا

انا مع احسان

واي موضوع بقراه بحط نفسي مكانه علشان كدة متزعليش لو قلت ليكي انك مش قللتي حسنة واحدة للراجل كل الاي افتكرتيه الاكل ونسيتي تعبه في الشغل
واهتمامه ببيته وبيكي
وراجل البيت بقي

اما عن الجوازات وانواع الرجالة
انا حصل لي موقف طريف
كان لية واحدة قريبتي كنت سمعت من امي انها رفضت عريس بسبب انه بيطلع صوت وهو بياكل
وده سببها الرئيسي لرفض العرسان
انا سمعت المعلومة دي ومش اخدت في بالي دارت الايام واتعزمت عندهم بالصدفة
وقاعد باكل كدة
مش واخد بالي والله
لاقيتهم بيبصوا لبعض
افتكرت بقي
طبعا الحمد لله مش بطلع اصوت والكلام ده
المهم لاقيت امها بتقولها
بس بصوت واطي كدة تامر اهه
انا طبعا فهمت تقصد ايه
بس عملت نفسي مش فاهم
وطبعا بعد الاكل جت البنت ومعاها الحلو وفضلت تتقرب لية وكدة في الكلام وجت قعدت جنبي
ما صدقت قمت ماسك الطبق واكلت وطلعت صوت
هههههههههههههههههه
لاقيتها قامت
قمت ضاحك وقايل لتنت علي فكرة ماما قالت لي انها بترفض العرسان علشان كدة
بس كنت ناسي
قعدت تضحك


بس انا لية راي
لو الست هترفض كل الانواع دي هتتجوز مين
ده اصلا اذا حد اتقدملها
انتي اصلك الحمد لله الاستاذ احسان جه بحصانه الابيض
واخدك خلاص
اما بقي البنات دلةوقتي بتحارب علي العرسان مش لاقية احنا في ازمة حضرتك
الرجالة عايزة تتجوز ومش لاقية
والبنات عايزة تتجوز ومش طايلة
هههههههههههههههههههههه

تحياتي
تامر الحسيني
اعلن نفسي
مدون مع احسان

كـــيــــــــارا يقول...
أزال المؤلف هذا التعليق.
كـــيــــــــارا يقول...

ههههههههههههههههههههههههههههههههههههههههههههههههههههههههههههههههههههه

موتيييني من الضحك ياشفقه ياعثل

------------

وهتلاقيه جايب سنارة وقاعد يصطاد من الطبق
--------------
ههههههههههههههههههههههه

فكرتيني بي بابا

ههههههههههههههههههههههه
بيصطاد برده وماما تفضل بصاله كده بموت علي نفسي من المنظر

ماما فامه هو عاوز ايه

هههههههههههههههههههههههه

---------------

يالهوي انتي شردتيهم خالص

هههههههههههههههههههههههههههههههههه

بس احسن كده ياشفقتي خلينا نعرف احنا داخلين علي ايه

عشان مش نتصدم :)

شفقة هانم واحسان بك يقول...

blue wave
لا يا عم تولعوا فى نفسكم ايه انتم كده تجبولنا مصيبة احنا ناقصين
سيبك المهم ايه رايك فى السلطة عمايل ايديا وحياة عينيا وبالخل والزيت والليمون

شفقة هانم واحسان بك يقول...

مواطن مصرى نايم
ماشى يا اسلام هتجوزه عروسة شبه عايشة الكيلانى اوكيه
يعنى احلى منى ماشى بتغيظنى ولا يهمنى
خليها تطبخ بقى

شفقة هانم واحسان بك يقول...

desert cat
لا يا عبيطة كيف تختارين زوج شيك فى الدفع
وقابل للصرق

شفقة هانم واحسان بك يقول...

nado
لا يا قمر امسكى وكلبشى فيه بايدك وسنانك بس راقبيه كويس ولو لقيته كده ولا كده بالمغرفه على ام راسه

شفقة هانم واحسان بك يقول...

ماما امولة
معاكى حق ربنا يكون فى عونا وفى عون الفراخ والخضار

شفقة هانم واحسان بك يقول...

اهو ده عيبه
فيه راجل فطارى وغداوى وعشاوى
قال صيامى قال
طيب لو لقيتى منه ابقى احجزي لاخواتى كام واحد
ودراعى اللى فاضل بيسلم عليكى وبيقولك انتى لسه فاكراه

شفقة هانم واحسان بك يقول...

يوميات نائمة فى الارياف
اه انا حاسة باتحاد بينك وبين احسان
ماشى يا نائمة وحياتك لو شميت ريحة غدر كده ولا كده هتلاقينى فى الارياف
بقى انا مفترية ده انا كلى حنية

شفقة هانم واحسان بك يقول...

عاشقة القمر
طبعا الحكاية بعد الجواز بتبقى بالمقلوب
علشان احنا بنخليهم يقفوا على راسهم

شفقة هانم واحسان بك يقول...

انا حرة
انا معاكى هما شاحين بس لو خطفتى رجلك لحد السوق السوداء او المعارض والنوادى
هتلاقيهم على قفا مين يشيل

شفقة هانم واحسان بك يقول...

انا حرة
انتى معلوماتك قديمة اوى هو شايل اللوز والبندق والعين جمل

شفقة هانم واحسان بك يقول...

mony
اذا كنتى عايزة النصيحة الخلاصة واللى مش فى البوست تبقى القعدة فى بيت ابوكى معززة مكرمة
هههههههههههههههه

شفقة هانم واحسان بك يقول...

mohamed
اه بس الضحك ده مش ببلاش المرة اللى جاية هتدفع يعنى هتدفع

شفقة هانم واحسان بك يقول...

esraa
واللهى برافو عليكى خليكى قعدة زى الفل بس اوعى تحنى للبنفسج والقرنفل والصبار

شفقة هانم واحسان بك يقول...

صباح الصباح
اديله فلوس امال انا هاخد امتى؟؟
وبعدين بديله يشترى هو بيرجع برضوا يقول جعان اعمل ايه تانى اخبط على الجيران؟؟

شفقة هانم واحسان بك يقول...

tamer
منور ايها المدون المتضامن مع سونة
ماشى يعنى بكده انت تبقى تانى واحد فى حزب احسان عموما انا اغلبية
اما بخصوص ان انتم مش لاقين لان احنا خلاص شاحين من البلد وغلينا وما بقتوش تقدروا على مهرنا
اما البنات اللى مش طايلة دول بنات ايدهم قصيرة واقزام

شفقة هانم واحسان بك يقول...

كيارا
ازيك يا روحى بلغى ماما انى متضامنة معاها
وربنا يكون فى عونها
ههههههههههههههههههههه
هتلاقى مصروف البيت ضايع على المنظفات والذى منه

maiosha يقول...

هههههههههههههههه

مش ممكن يا شوشو إنتى تحفة بجد

والله دمك زى العسل

هههههههههههههه

المدونة دى أنا عاملاها زى كتاب الحياة الزوجية

كل يوم بتعلم منها حاجة

لغاية ما هتخرج من تحت إيدك إن شاء الله ست بيت مفترية

ههههههههههههه

مواطن مصرى نايم يقول...

ههههههههههههههههه
ههههههههههههههه
دا انا كنت حعاقبة بعيشه الكيلانى مش جوازة يعنى
ههههه
بس انا عاوز رأى احسان فالموضوع ده
هههههههه

nona يقول...

هههههههههههههههههههههههههههههههه
اية النصايح دية يا بنتى
باة بعد عيد الميلاد و الكلام الحلو و التورتة تكتبلنا البوست دة
على فكرة كدة هيطلعوا عليكى ايشاعة انك سبب العنوسة فى مصر و انا مش مسئولة اهوة
بصى هو الحذر لا يمنع القدر فامهما عمالنا و مهما امتحانا برضة هنقول ظالموة
وهنغنى فاطريقك مسدودا مسدودا ياااااااااااااااااابنيتى

mohra يقول...

ده انتى سودتيها فى وشى خالص
على كده مافيش حد هاينفع

واحده قربيتنا مره قالت"الجواز ده بطيخه يا حمرا يا قرعه و فى الغالب قرعه!!!!!!!!!!

صبرني يارب يقول...

طب يعنى فى الاخر يتجوزوا مين ؟؟؟؟

والله يااختي انا جوزي من يوم ما شوفته في حياتي وهو بياكل وما يقولش اي حاجه خالص ولما اتغاظ انا بقى اسأله الاكل حلو؟؟ اه ده جميل تسلم اديكى

بس للامانه هو اول مابيخلص اكل يقول الحمد لله تسلم اديكى
ممكن يعنى لما تزيط معايا يقولي ياااااه الواحد كان جعان والاكل حلو وانا كلت كتير .

واعملي اللي فى الاكل هى نفس التعبيرات ونفس الانفعالات هههههههههههههههههه

شفقة هانم واحسان بك يقول...

maiosha
يلا ادينا بنعمل اللى علينا ....والقاموس ده علشانك انتى
ولازم تتعلمى وتعلمى..... علشان نخرج اجيال مهببة منيلة تعرف يعنى ايه بيت وحياة مفترية

شفقة هانم واحسان بك يقول...

مواطن مصرى نايم
اسلام باشا واللهى انت عسل ايون كده هو ده القاب والا فلا
عموما هو هيرد عليك فى وقت لاحق ....لانه قد يكون مكسورا او مفشفشا او مدغدغا من وقعة البلكونة
ولكن عليك المحاولة فى بوست اخر

شفقة هانم واحسان بك يقول...

nona
ايه يا عم عبد الحليم؟؟
انتم هتلذقولنا العنوسة ولا ايه البنات بايرة بايرة مش عايزين لذقة
لا لا لا ده انا الننوسة مش العنوسة

شفقة هانم واحسان بك يقول...

mohra
ما تسمعيش كلام قريبتك اظاهر انها متجوزة فكهانى

شفقة هانم واحسان بك يقول...

صبرنى يارب
ما انا قلت الخلاصة وردا على سؤالك
القعدة فى بيت ابوهم احسن واحلى وطراوة
اما بخصوص جوزك اللى ما بيتكلمش
فبطلى تاكليه سد الحنك علشان انا مجربة مفعوله قبلك

قلب مصرى يقول...

يافندم سيادتك طلعتى كل أنواع الرجالة لا تصلح للجواز !!!
أنا دلوقت عرفت إيه سبب إرتفاع معدلات العنوسة.

Tamer Alhosiny يقول...

ههههههههههههههههههه

البنات الاي قيدهم مش طايلة بنات صيرة واقزام

هههههههههههههههههه

فكرتيني لما رحت جامعة عين شمس
فكرت الطالبات بتوع اعدادي
دخلو الجامعة منغير ما يعدو علي الثانوي
من كتر ما هما اقزام
ههههههههههههههههههه

تحياتي
تامر الحسيني
مدون مع احسان

همس الاحباب يقول...

ههههههههه
هههههههه
قلبى معك اخى احسان
شفقة هانم شفلطت الرجالة كلها
وما فيش راجل ايتجوز بعد اليوم
دى نصائح سوسية لكل الاخوات المقبلات على الزواج
وانا بقول معدل الجريمة زاد والرمى من البلكونة انتشر
هههههههه
لا بجد تسلم ايديكى بوست لطيف جدا
كله ده من تاثير التورته يا عم احسان
قلنا بلاش اشرب بقى
تحياتى وتقديرى

ojg يقول...

ايه رأيك بقى في اللي مش بياكل خالص
وعامل نفسه مكسوف
او يكون مالوش في الأكل خالص؟
ولا كمان ايه رأيك في الراجل اللي يدخل البيت ويعزم على اهله؟؟؟؟
يعني تبقوا قاعدين وتلاقيه هو اللي بيعزم عليكي ويقولك ماتاكلي مابتاكليش ليه
ناس غريبة والله الواحد بيقابلهم
شوفي يا قمر
انا اللي نفسي اتجوزه بجد
راجل يكون مش بيتكسف ولا بيعمل مكسوف
يعني ياكل نفس أكلته في بيتهم
عادي يعني زينا
مش بحب التمثيل خالص في الموضوع ده
وطبعا البوست بتاعك كالعاده دمه شربات يا جميلة
ربنا يخليكي لينا وتنصحينا
:)

دنيتى الجميله يقول...

ايه يا شفقه
حرام عليكى
انا لولا انى متجوزة كنت اتعقدت من كل الرجاله يا بنتى
ليه كده بس
ده اختبار صعب جدا على كل الرجاله والاصعب اننا نقعد نبصلهم كده ونختار منهم الانسب
بس دمك خفيف موت

شفقة هانم واحسان بك يقول...

قلب مصرى
اه شكلك كده هتلزقلى موضوع العنوسة طيب وانا مالى
البلد كلها بايرة مالقتوش غيرى وتعلقوا العنوسة عليها
عموما انا عارفة انها غلطة كتابية انت تقصد الننوسة صح؟؟

شفقة هانم واحسان بك يقول...

tamer
يا شيخ ما طبعا دلوقتى بتوع اعدادى بيدخلوا الجامعة من غير ما يعدوا على الثانوى وابتدائى كمان بيدخلوا الجامعة على علطول شكلك كده مش مواكب التطور التعليمى فى مصر
وبعدين انت خلاص عملت حزب مع احسان؟؟
كل شوية مدون مع احسان ماشى
طيب شفقة مدونة مع احسان

شفقة هانم واحسان بك يقول...

همس الاحباب
انت تقصد ان معدل النشر فى البلكونات زاد نشر الغسيل .....مش الرمى
فعلا انا بنشر كتير
اما موضوع الجريمة ده ماليش دعوة بيه مطلقا ولو حصل وكان ليا دعوة بيه هجيب محامى اروبة يطلعنى زى الشعرة من العجين

شفقة هانم واحسان بك يقول...

ojg
هو فيه حد دلوقتى يا بنتى بيتكسف؟؟
لا بس اللى غريب اللى بيدخل البيت ويعزم على اهله ده يعنى كمان جاى يطفح ويورثهم بالحياة
شوية شوية هتقوليلى انه بعد ما ياكل فى بيتهم هيقوم يفتح الباب ويقولهم مع السلامة
وبعدين ايه حكاية ما بتحبيش التمثيل دى يا عبيطة ده بيكسب دلوقتى دهب
شوية شوية تقولى معندكيش تلفزيون ولا دش

شفقة هانم واحسان بك يقول...

دنيتى الجميلة
خلاص وانتى زعلانة ليه ؟؟
انتى ادبستى خلاص زى حالاتى
سيبى اللى لسه ما ادبسوش يتعظوا وينفذوا
وعمالة تقولى اختبارات وتعقيدات انتى مدرسة رياضة؟؟

son's egypt يقول...

السلام عليكم
معلش بقي الراجل قبل الجواز بيكون ملتزم شوية في الاكل
بعد الجواز حاجة تانية خالص

Geo Amr يقول...

ههههههههههههههههه وبعد الكلام دة حد هيتجوز ايه الاختبار الاكل دة شكرا على خبرتك

رحيق الحياة يقول...

وحشاااااااني جدا يا شفقة

عارفة ساعات لما بكون مع أصحابي و أقول إن الست لازم تتقاسم كل شيئ مع جوزها خاصة لما بتكون تشتغل هيا كمان، يعني يتعاونوا علي كل شيئ فقالوا كلام حلو و فيه شوية من المنطق بس لما قلت و انا لما اتجوز حشتري فوطتين عشان المطبخ بصولي و قالوا ليه؟ قلت ماهو حيطبخ هو يوم و أنا حطبخ يوم...كل الشباب قلوا نعم؟؟؟ قلتلهم مش كنت موافقين علي مبدأ التعاون؟ قالوا آه بس إلا الأكل...
و انا لسه مصره علي المبدأ ده و بجد اتشجعت لما قريت كلامك بس دايما اسع
رغدة حطي عقلك في راسك لو عايزة تتجوي ههههه

وليلي اعمل ايه اا بقي؟؟

تحياتي

رغدة

smilyrose يقول...

طب ايه هيحصل يعنى لو اهتم آدم بصحته

بعد الجواز ايه هيحصل لو مبقاش ليه

كرش مثلا

ههههههههههههههههههههههههههه

اكييد هيكون فيه تغيير

بس بينى وبينك شكل طبيخك روعه

عشان كدا احسان بيتخانق عشان

تطبيخيله كل يوم اكل

الحمدلله حبيبى اللى كان كان عاوزنى

مكنش بعرف اطبخ عشان اتعلم الاكل

اللى هو بيحبه بس

وكان بس راح اللى كان

سلالالالالالالالالالالالالالالالام

يا اجمل شفقه

وخفى شوية عن احسان

smilyrose

روح الحب الصادق

طالبه مقهوره يقول...

كرهت الاكل وكرهت الزراج
ههههههههههههههههههههههه

شفقة هانم واحسان بك يقول...

sons egypt
قصدك قبل الجواز بيكون ملتهم مش ملتزم
وبعده بيكون حاجة تانية وخامسة وسادسة

شفقة هانم واحسان بك يقول...

goe amr
قصد شكرا على قهرتنا صح؟

شفقة هانم واحسان بك يقول...

رحيق الحياة
انتى كمان وحشانى اوى
وخدى بالك انا حاطة عليكى امل كبير فى الموضوع ده
ايون انا عايزاكى تتمسكى بمبداكى
وشكلك كده انتى اللى هتخليهم يدخلوا المطبخ

شفقة هانم واحسان بك يقول...

smilyrose
شكلك كده عايزانى اعزمك على طبيخى وعمال تشكر فيا بس بعينك
مش لما اطبخ لاحسان الاول ابقى اعزم

شفقة هانم واحسان بك يقول...

طالبة مقهورة
ليه بس كده ...كل ده كره
عموما وهو المطلوب اثباته

اقصوصه يقول...

ههههههههههههههههه

روحي ردي ع الجيران

بصراحه التدوينه روعه :)

بنت مصريه يقول...

ههههههههههههههههههههه
حرام عليكى يا شفقه انتى طلعتى الرجاله كلها عاهات
هو فيه جواز دلوقتى اساسا هنتقمر على ايه يا حسره هههههههههههه

احييكى يا شفقه
وهقول لاحسان انك بتشتكى منه هههههه

نهر الحب يقول...

هههههههههه
يعنى طلع بكرش واكول وبيصرخ فيكى ليل ونهار
انا اقولك انت املى البيت اكياس يعنى حطى ادام عينة فى اكت من حتة فى البيت اكياس سودة
وتحت المخدة حطى ساطور
لو سألك قولى شاكة ان فى حرامى فى البيت وهو هيفهم وساعتها مش هيعرف ينطق
هههههههههههههه
وممكن هو اللى يطبخ من بالليل قبل ما يروح الشغل

نهر الحب يقول...

فرحت جدا لما عرفت ان انتم جايين بجد تنورينا
والله اسعدتو قلبى ربنا سعدكم
*********
التفاصيل بالكامل فى مدونتى


يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير

شفقة هانم واحسان بك يقول...

اقصوصة
ارد ازاى يا بنتى انا عندى طرش مزمن
سيبك منهم

صدى الصمت يقول...

يا خبر ههههه
كل دى نماذج و طرق هايلة لإكتشاف زوج المستقبل أو طرد زوج المستقبل!!!
بالشكل دة إن شاء الله هتخلى كل البنات تعنس
ربنا يكرمك و يارب بكون إحسان ما قرأش البوست
تحياتى

غير معرف يقول...

هه هه ولا حرج
ليه كده هه هه هه ياما

هه هه هه ياليل عين

شفقة هانم واحسان بك يقول...

بنت مصرية
بقلى كده هتفتنى يعنى ماشى براحتك
وبعدين خدى بالك احنا مش هنتقمر لان اللى بيتقمر هو العيش البايت يا هبلة

شفقة هانم واحسان بك يقول...

نهر الحب
ايه الافكار الجهنمية دى تسلملى دماغك يا قمر
ده انتى طلعتى عفريتة ايوا كده عايزين من الافكار دى كتير
وعلم وسينفذ يا فندم
وان شاء الله هنحاول بجد نيجى بورسعيد علشان نتعرف عليكى واحنا نطول

شفقة هانم واحسان بك يقول...

صدى الصمت
برضوا هتلزقولى موضوع البنات اللى عنست
ايه مالقتوش غيرى ؟؟
عموما ما تخافيش احسان ماقراش البوست لانه لسه عند الجيران

شفقة هانم واحسان بك يقول...

غير معرف
ايه كمية الضحك الفظيع ده ؟؟
عموما ميرسى على التعليق .....وشكل حضرتك كده بتشتغل مطرب
تشرفنا وسعدنا بتعليقك

SemSem يقول...

هههههههههههههه
بجد انا كل جملة بقراها بتضحكنى اكتر
السرد بتاعك جميييييييييييل جدااا
والحمد لله دلوقتى عرفت ليه بيعزموا العريس قبل الجواز
باذن الله مش هاكل غير فى بيت الزوجية

تسلم ايديكى على الوجبة الدسمة الموجوده فى البوست
تقبلى تحياتى

mostafa rayan يقول...

شفقة تفتكري بعد كل دة في نوع رجالة واحد ممكن اي ست ترتبط بيه ؟... متهيألي لاء
وبعدين يا ستي هو الراجل لو ماكالش في بيته هياكل فين يا اما في الشارع او عند امه وفي الحالتين الست مش هتكون مبسوطة فخليه ياكل في بيته احسن
على رأيي ستي لما كنا بنتجمع في بيت العائلة القديم كانت بتقول لأمي و وبقية الأخوات البنات حطو طبق اللحمة الكبير وصينية (الفتة) الكبيرة قدام الرجالة خلى الرجالة تاكل
الله يمسيها بالخير كانت احلى ايام والله
سلاموز وتحياتي للكبير احسان

شفقة هانم واحسان بك يقول...

semsem
مش عارفة ليه وانا بقرا التعليق حسستنى انك دخلت كنتاكى مش مدونة
بس يارب الوجبة تكون عجبتك

شفقة هانم واحسان بك يقول...

mostafa
مين قالك انه لا مفيش حد هيرتبط يا ابنى دى البنات ما بتصدق تلاقى خيال راجل
هههههههههه
وبعدين بما ان ست الحاجة كريمة اوى كده ممكن تبقى تعزمنى انا واحسان على الفتة واللحمة؟؟
احسان بيوصلك السلام المخصوص للحمة

Miss. Sosa يقول...

ايه ده انا فاتني كتير اويىىىىىىى

سامحيني ع التأخير

بس ايه البوست التخفة ده تسلم ايدك بجد

بس كلهم كدا مش نافعين وانا اضم صوتي لصوتك طبعا ان البعد عنهم غنيمة


انا اللي اتخطبتلهم كانوا من الصنف التالت اكون انا لسه بقول باسم الله ويكون هو مسح الاطباق وبعدين يقولي انتي بطيئة .. ابصله باسبهلال واقول جايز .. بس عملتي بنصحتك وفسخت خطوباتي كلها مش ناقصين علل ههههههههههههه

تحياتي يا قمر

كـــيــــــــارا يقول...

حبيبتي اا بس اخلص من اللي بعمله وهرجع وانتي وحشاني اوي اوي ياقمرايا مقدرش اتاخر عنك ياعثل انتي

والاجازه ان شاء الله مش هتطول اخلص البحث اللي بعمله وهرجع ياقمرايا

وحشاني ياثكره انتي

enjy يقول...

يا سااااااااااااااتر دة الجواز دة صعب قوى قوى يا شيخة بلا وجع دماغ

Lady E يقول...

هههههههه والله انتي عسولة يا شفقة

مسبتيش نوع من العرسان الا واتكلمتي عليه

طب نعمل ايه دلوقتي نطلب عرسان متفصلين في الصين ولا ايه :)

بجد وحشتيني جدا ووحشتني بوستاتك الجميلة
ومنتظرة كتابك

طوبة ذهب وطوبة فضة يقول...

يا بنتى انتى كده بهدلتى الرجاله كلها وعلى كلامك يبقى مافيش ولا نوع ينفع فى الجواز بس ممكن يكون فى شويه تنازل لو فى شويه حب بس خفى انتى شويه على الرجاله لحسن انتى مقطعه فروتهم خالص الموضوع جميل اوى وكويس انك لسه بتتمتعى بروح الدعابه بعد الجواز

صابر وراضى يقول...

وعليكم السلااااااااام
انا اول مره ادخل عندكم هنا
بصراحه اجمل مدونه دخلت بجد
بس انتى نصحتى البنات
مع ان الاكتر هو الشباب اللى تعبان
وطالع عينهم
فاذا سمحتى تقولى كام نصيحه للشباب

تانى حاجه
هو انتو طابخين ايه النهاردا؟؟؟؟؟

The Führer يقول...

هههههههههههه
برغم إن البوست عبارة عن نصائح للبنات ، بس كويس أهو احنا الشباب ناخد بالنا ، بس نفسي أعرف سبب كرش الرجاله بعد الجواز؟ متهيألي الزوجات ليهم يد في الموضوع دة والحكاية فيها تعمد مع سبق الأرصاد والترصدة ، علشان كدة أنا ناوي م أكلش حاجة من إيد مراتي مستقبلا!!
مش قادر أتخيل نفسي بكرش وبمشي زي الحوامل!!
استر يا رب

أسجل أعجابي الشديد بمدونة حضراتكم برجاء تقبل مروري المتواضع
دمتم بكل خير

المـــفـــــــقــــــــوعـــــة مــرارتـهــا يقول...

حرام عليكي
باصة للراجل في الاكل
وايه يعني لما يربرب
ماتعرفيش ان ربربة الراجل دليل علي شطارة مراته في المطبخ
خليكي ناصحة

سومه...مجنونه فى بلد عاقل يقول...

انتى يا ماما قوليله وابور الجاز شطب البمبه خلصت
روح كل عن ماما يا عنيا
مش الشغاله اللى اشتريتها بفلوسك
............
انا كدا ولعتها ميه ميه صوح عاد
ههههههههه
حجرى لحسن شايفه مقشه فى ايد احسان

ابو على يقول...

ههههههههههههههههههه


ههههههههههههههه
اللى قبلنا قالو
بكره نقعد جمب الحيطه ونسمع الظيطه

اتمنى تنورينى

وومن يقول...

هههههههههههههههههههههههههههههههه

بجد يخر عقلك كل الي بتقوليه صح وبشوفة فعلا وبيحصل مفيش مثل ضربتية مش موجود

بس كدة مش هانلاقي نتجوز واحنا مش لاقيين خلقة

تحياتي علي بوستك الجميل وكان الله في عونا

شفقة هانم واحسان بك يقول...

miss sosa
انتى اللى وحشتينى موت موت
وعلى فكرة طالما بتضمى صوتى لصوتك يبقى نعمل حزب انا وانتى وعلينا وعلى اعدائنا

شفقة هانم واحسان بك يقول...

كيارا
ربنا معاكى يا قلبى وترجعلنا بالسلامة بعد عمل البحث بس ركزى كويس

شفقة هانم واحسان بك يقول...

enjy
وحشتينى اوى
وعندك حق طلعتى عاقلة
بلا وجع دماغ وبطن كمان

dreem يقول...

هههههههههههه
رديتى عالجيران لولا لسة ؟

مزيكا يقول...

حلوة نصائح قبل الزواج