الجمعة، 7 نوفمبر 2008

عـيــــــد "فــرخــــة" ... وعـيــــد "شـمـعـــــــة"


وحشتوني بجد
بقالي كتير ماقعدتش على الكي بورد ولا كتبت بوستات
وده بصراحة راجع لسببين
الأول
شوية انشغال في التحضير لمشروع جديد من مشاريعي الفاشلة
والثاني
هما الكلمتين الحلوين اللي قالتهم شفقة في حقي يوم عيد ميلادي

للسببين دول أخدنا هدنة من لعبة القط والفار
اللي بنلعبها أنا وشفقة هانم على المدونة دي


بس أنا إكتشفت أن الهدنة دي من طرف واحد
وإني اتضحك عليا وعملت هدنة مع نفسي
وإن شفقة هانم بتتبع معايا اسلوب "إضرب ولاقي"
خصوصا بعد البوست الأخير بتاع الأكل والطبيخ
واللي بيه مسحت كل الكلام الحلو اللي قالته في حقي في البوست اللي قبله
لذا أشهدكم جميعا بأني سأنتقم
وأني أحتفظ بحق الرد
وخليني أرد عليها هنا أحسن ما أرتكب جناية في الحقيقة
ولا أكتم في نفسي لحد ما أطق أموت
وعموما أنا مش هادوش دماغكم بالرد عليها دلوقتي
أنا بس هاحكيلكم حقيقة اللي حصل
يوم عيد ميلادي اللي فضحتني بيه ده
وبالمرة هاحكيلكم عن يوم عيد الحب كمان
وانتوا أحكموا بقى


إحم إحم
بصوا بقى
الحكاية بدأت من يوم 8 أكتوبر
اللي هوا المفروض يكون عيد جوازنا
بس في اليوم ده وبسبب آخر بوست كتبته بتاع العزوبية
كان هيتكرر معانا اللي حصل للسادات
زي مادخل التاريخ يوم 6 أكتوبر
خرج برضو من التاريخ والدنيا في نفس اليوم
والحدق يفهم !!

المهم
عدوا اليومين دول بسلام
والميه رجعت لمجاريها بعد ما كانت طافحة ع الآخر

وفي يوم 13 أكتوبر
الساعة اتنين بعد نص الليل
وانا لسة باخد وضعي على السرير واتغطى
فاجئتني بسؤال غبي وهيا مبتسمة
انت هتنام ؟؟
رديت وأنا مستغرب السؤال
ومستغرب أكتر الإبتسامة البلهاء
إنتي شايفة إيه ؟؟
قالتلي لأ إستنى .. قيس ده الأول
فتحت الدولاب طلعت منه قميص أبيض جميل
وهي عارفة ذوقي في الألوان
وقالتلي
القميص ده جايباهولك علشان عيد ميلادك .. بس شاكة في المقاس
قلتلها : يا ستي هدية مقبولة .. حتى لو طلع ضيق هأخسله مخصوص
كفاية انك فاكرة عيد ميلادي ونزلتي دورتي ونقيتي وإشتريتي
قالتلي : لأ ده علشان تلبسه يومها بس .. هديتك لسة حاجة تانية
قيست القميص وكان فعلا ضيق
ونزلنا تاني يوم نبدله
كل القمصان اللي في المحل مش جاية على مقاسي
بقت مش فارقة الألوان ولا الموديلات
أي حاجة المهم تيجي مقاسي
مافيش
لغاية ما صاحب المحل زهق مننا وإدانا فلوسنا
قلنا حلو خالص
ندور براحتنا في المول كله
ويبقى قدامنا تشكيلة أكبر والإختيار أوسع
بس كانت نفس المشكلة موجودة في كل المحلات
يا إما تكون الموديلات شبابي أوي
من أم ألوان عجيبة وترتر لميع وحاجات من دي
لفينا .. دوخنا .. تعبنا .. جعنا
دخلنا منطقة المطاعم
دفعنا ثمن القميص في
2 وجبة فروج من عند الطازج
ولما ماعجبهاش طعمه كملنا في كنتاكي
يعني من الآخر
هديتي اتبدلت ... بفرخة

نيجي ليوم 15 أكتوبر
اللي هوا المفروض يوم عيد ميلادي
وأنا راجع من بره وفي طريقي للبيت
لقيت شفقة ماشية في الشارع وفي ايدها علبة كبيرة
واضح انها التورتة
ميلت عليها ... إتخضت لما شافتني
وقالتلي : انت حرقتلي المفاجأة
ده أنا طالبة التورتة دي من يومين
ورايحة جاية على الحلواني وهوا بعيد
ومش راضية أقولك تعدي انت عليه وانت راجع
وفي الآخر ... تحرقلي المفاجأة ؟؟
وعزمت فلانة وفلان وعلانة وعلان
(ورصتلي لستة أسامي يادوب تكفيهم الصالة المغطاة)
وعمالة أأكد عليهم وانا باعزمهم ان ماحدش فيهم يكلمك ولا يقولك
وفي الآخر ... تحرقلي المفاجأة ؟؟؟
قعدت تكرر حريق المفاجأة دي لدرجة اني شكيت
لأكون أنا اللي حرقت مجلس الشورى ولا حاجة
وطبعا عدى عيد ميلادي ولا أذكر من التورتة غير اني نفخت في الشمع
وإختفت بعدها بدقايق كل ملامحها داخل أفواه المعزومين (بالهنا والشفا)
طبعا ده كان بسبب التكدس السكاني اللي كان في بيتنا يومها

نيجي بقى للهدية
حزروا فزروا كانت إيه ؟؟؟
شفقة هانم حبيبتي كانت جايبالي موبايل
آه والنعمة
ومن أبو تليفزيون وراديو وشاشة تاتش
وعلى الرغم من ان الأوبشنز اللي فيه عيالي حبتين
بس كان أحلى مافيه انه بخطين وهيوفر عليا شيل جهازين
قلتلها : أنا عارف الأجهزة الصيني دي .. إمكانياتها كتيرة وسعرها رخيص
قالتلي : صيني إيه بس هوا أنا معقولة هأجيبلك تليفون زي بتاع الولد اللي شغال معاك ؟؟
لا يا حبيبي .. التليفون ده كوري .. وده بقى اللي الصين بتقلده .. ده حتى نوكيا
قولتلها : نوكيــــا ؟؟؟
نعم ؟؟؟
وريني العلبة كده
لقيته فعلا مكنوب عليه نوكيا N99i
والجهاز نفسه مكتوب عليه انه صناعة كوري
بس لفت نظري إن في كوريا محو أمية زينا
لدرجة إنهم صنعوا موبايل زي ده
وفي الآخر ماعرفوش يكتبوا إسم بلدهم صح
كوريا مكتوبه كده"KORIA" مش"KOREA"
بسرعة كلمت واحد صاحبي عنده محل موبايلات
وعرفت منه إن الجهاز ده أساسا صيني وبيتباع بـ600 جنيه
وسين من التجار بيعمله علبة وبيطبع عليه من جوا صناعة كوريا أو اليابان
علشان يبيعه بضعف التمن
والهانم فعلا كانت جايباه بـ 950 جنيه
تاني يوم رحت رميته للمحل اللي شفقة هانم اشترته منه وأخدت ثمنه
وطبعا مالحقناش نروح البيت بالفلوس دي
الهانم إشترت كرسي كمبيوتر جديد
وغيرت مراية الحمام
وشوية حبشتكنات كده في البيت
وراحت فلوسك يا صابر


عدى عيد ميلادي بحلوه ومره
وجينا لعيد الحب
وما أدراك بعيد الحب
ده كان يوم مشهود السنادي
شفقة هانم قبلها بيوم كانت موريانا ليلة كوبيا
مانمناش فيها إحنا الإتنين بسبب ضرسها
وبعد فشل كل المسكنات والمضادات والمضمضة
ولغاية الولد بتاع الصيدليه مازهق طلوع ونزول بشنط الأدوية
توصلنا إلى مخدر موضعي (سبراي)
والحاله هديت بحلول ساعات الصبح الأولى
وكان ميعادنا مع الدكتور في نفس اليوم
وأنا من كتر الخروج للشارع ولباب الشقة بعد دفا اللحاف
جالي برد في المعدة بكل أعراضه اللي انتم عارفينها
لدرجة اني ماقدرتش أنزل أروح معاها للدكتور
راحت لوحدها لدكتور الأسنان
وبعدها كانت المفاجأة
تخيلوا بعد كل المعاناه دي الهانم ترجع وجايبة في ايديها إيه ؟؟
ولا برتقال ولا ليمون ولا أعشاب للمعدة ولا حتى علبة دوا
الهانم داخلة عليا بدستة جاتوه وشمع لزوم عيد الحب
آه والله
زي ما بأقولكم كده بالظبط
( تنهيـــــده )
طبعا قضينا الليلة على أضواء الشموع
وأنا بأتكتك من البرد بسبب حرارتي المرتفعة
وبأتوجع من ألمغص اللي في بطني
وهيا من وجع أسنانها على نفس واحد
آه ... آه ... آه
مش مهم كل ده
المهم اننا كنا بنتوجع على ضوء الشموع
بالذمة شوفتوا جنان كده قبل كده ؟؟
أما بالنسبة للجاتوه
فهو جاري تحنيطه في التلاجة
كما فعل أجدادنا قدماء المصريين



هيا دي كانت حكايتي بمنتهى البساطة
من عيد جوازنا لعيد ميلادي لعيد الحب
علشان تعرفوا انه مابيمنعنيش عنكم غير الشديد القوي
والقوي دايما فيه الأقوى منه
وخبرني بالله عليك
ماذا تفعل لو كنت مكاني ؟؟؟



ملحـوظــــة :
أخدتوا بالكم إن أنا ما طلعتش من عيد ميلادي غير بفرخة الطازج
؟؟؟
علشان كده سميته "عيد الفرخة"
وما إستفدتش يوم عيد الحب غير بالشموع الي كانت مدفيالي الأوضة وأنا عيان ؟؟؟
وعلشان كده سميته "عيد الشمعة"
الملحوظة التالتة ان عيد ميلادها قرب هي كمان ... وربنا يقدرني على رد جمايلها الفظيعة دي


ولكم تحيــاتي
قبل وفـــــاتي
على يد مراتي
إحســــــــــان

هناك 127 تعليقًا:

من غير عنـــوان يقول...

مدونة دمها لذيذ وخفيف

Tamer Alhosiny يقول...

ياه الرجل لجحق اول تعليق
لو مكنتش قرات الاول كنت لحقته
يلا بقي هنشر كدة لاطلع السابع والعرين وانا لسة بكتب التعليق

تامر الحسيني

Tamer Alhosiny يقول...

اخي العزيز احسان

لك الله
يمهل ولا يهمل
حسبي الله ونعم الوكيل

انا متضامن معاك يا احسان
بكل ما لدي من قوة وعايز اعمل جروب علي الفيس بوك
واسميه رجال احسان

علشان نراك في اي موقف
ونرحمك من عزابك مع الكائن الاي اسمه المراه

تخيل شفقة دخلت عندي مدونتي
لاقتني كاتب شعر في واحدة اسمها علياء
قالت لي
--------------
ولما انت حابيب اوى كده بتتضامن مع احسان ليه ولا كانه همك الستات وكانك زهقان منهم
مع انك عمال تكتب فيهم شعر
------------------------
انا طكبعا عايز اقولها حاجة
انا بحترم المراه جدا جدا
واكتر حد اثر فيه في حياتي
كان امراه
بس انا رجل

وبيعجبني قوي احسان كنموزج للرجل
بس عارفة ليه انا متحيز ليه لانك بتظلميه بكلامك
يعني لكما اتكلمتي عنه مش زكرتي غير الاكل والمشاكل مع انه انا لو طلبت من احسان انه يعمل بوست عن حياته معاكي
صدقيني هيبقي بوست كله حب
هو صحيح انسان عملي شوية وقدر هديتك بالفلوس
ورحتم رجعتوها
بس ظروف الحياة الاي احنا فيها
مش تسمع للاسف غير بكدة
وبرضه هو كدة مش اخد ولا هدية
انا بطلب من شفقة ان احسان يدخل في اي يوم البيت تكوني محضره اكل جميل
وجو حلو بس قبل ما يجي تتاكدي انه كويس ومش تعبان وتحسي بيه وهو اكيد هيقدر احساسك وحبك
ومش لازم هدية كفاية وردة وكلمة جميلة في المدونة
منغير لا كلام عن الاكل وعن الرجالة ومشاكلهم ومعدتهم

اما احسان فا انا بجد بحترمك قوي
ونفسي اتعرف عليك بجد
وان شاء الله لو جت اي فرصة او لقاء تدويني
ياريت تكتب لي في مدونتي
انك هتشترك لاني هبقي حريص اني اتعرف علي حضرتك

تحياتي
تامر الحسيني
كلنا رجال احسان

blue-wave يقول...

لالالالالالالا
كدا بجد ماينفعش
انت تجيبلها فى عيد ميلادها وجبة سمك مع السلطات:)))
وتحط الشمعتين فى بطن السمكه:))))
بجد انا عمرى مادخلت مدونتكم ومضحكتش
ربنا يكرمكم ويوفقك ويهديكم على بعض:)))

انا حره يقول...

يوووووو حيرتونا معاكو

ماتثبتو بقى على واحد فيكو هوا الغلطان

بصو احنا نحطكو فى مواجهه مع بعض قد تصل الى حد التراشق ب اى حاجه شباشب بقى طماطم فازات اى حاجه تيجى فى اديكو واحنا نقعد نتفرج خخخخخخخخخ

شريره انا من يومى

بص بقى يااحسان باشا العين بالعين والسن بالسن

فى عيد ميلادها انت تجيبلها فستان او بلوزه وتستهبل وتعمل من بنها وتجيبه مقاس عيله فثانوى وتانى يوم تروحو تغيروه وتتغدو بتمنه بس متنساش تاخد العيال فى ايدك اهم بردو يظئططو فى عيلاد ميلاد مامتهم

وبعدين تروحو تطلعو الجاتوه اللى زمانه حمض دا وتجيب شمعتين وتقولو يالا حالان بالان حيو ابو الفصاد خخخخخخخخ

وتاكلوه بالهنا والشفا

بس انا مش مسؤله عن اعراض التسمم بقى نتيجه الجاتوه البايظ

صابر وراضى يقول...

وعليكم السلااااااااااام


بصراحه انا عندى سوال
انت ليه عاوز تولع فى نفسك
يارااااااااجل
وتهون عليك شفقه؟
بس انت قبل عيد ميلادها تاخدها لدكتور اسنان

همس الاحباب يقول...

ههههههه
هههههههههه
معاك حق يا جدع
هى الستات كلها كده
تجيب الهدية وعينها فيها
وشغالة تقول شعر وكلام كبير
واحنا مش عارفين الحقيقة المرة
وفى الاخر ترسى على فرخة
ههههههههه
وجاتوه وضرسها واجعها وانت عندك برد
والله الست دى ناوية تخلص عليك
انا جااااااى اهدى النفوس مش اكتر
ههههههههه
ربنا يسعدكم دايما
وتفضلوا توم وجيرى كده
تقبل تحياتى

Unknown يقول...

السلام عليكم
ورحمة الله تعالى وبركاته
ربنا يخليكوا لبعض ياأحسان بيه
وما يحرمك من شفقة هانم ابدآ وتفضل
هى تحتفل بيك وانت تحتفل بها لما تحرموا معلش!! قصدى لما تشبعوا احتفالات وووو
مبروك عليك الفروج المشوى يابيه!

Mona Shereif يقول...

ولكم تحيــاتي
قبل وفـــــاتي
على يد مراتي
إحســــــــــان


هههههههههههههههههههههههه

لا والله دى شفقه طيبة
يعنى هى غلطانه يعنى انها افتكرت عيد ميلادك وعيد جوزاكم وعيد الحب

بس تعرف حركه جامده منك انك فاكر عيد ميلادها
ربنا يخليكم لبعض ويبارك لكم
اللهم امين

maiosha يقول...

ههههههههههههههه
يا إحسان ..شوشو رومانسية جدا
والله خسارة مش مقدر رومانسيتها دى

ههههههههههههههههههه
والله طيبة جدا بس الظروف
عاملالك مفاجأء وعازمة الناس .. يعنى هو إنت كان لازم تيجى فى الوقت ده بالذات وتبوظ المفاجأة

وبعدين فى حد يتعب يوم عيد الحب يعنى.. ينفع كده

ولو مش عارفين تاكلو الجاتوه .. عندكم واحدة منقوعة فى الإمتحانات والمذاكرة على طول وهفتانة يا عينى
إبعتولى حتة جاتوة ولا ورك فرخة حتى

هههههههههههههه

ربنا يخليكم لبعض
وميحرمكوش منى

نيهاهاهاهاهاها

Unknown يقول...

لا بجد حرام عليك يا عم احسان
كفايه انها افتكرتك في كل المناسبات
انت بقى افتكرتها بايه
طيب هي افتكرتك بقميص طلع فرخه
وتورتايه طلعت شموع
انت بقى افتكرتها ببؤ ميه حتى
هي الرجاله كده ميعجبهاش العجب
هههههههههه
انا متضامنه معاكي يا شفقة يا ختشي
لما نشوف المفاجعه بتاعة احسن بيه هتكون ايه
بوست لذيذ بجد موتني من الضحك
اصل المواقف دي نصها عملتها ونصها اتعمل فيا
هههههههه

كـــيــــــــارا يقول...

يعني افتكرتك في عيد الجواز وعيد الميلاد وعيد الحب وهي ياعيني وقت تعبها وانها مش قارده من سنانها

وجابت الشمع والجاتوه ياعيني وفي الاخر مش تقولها ميرسي ياحياتي كل سنه وانتي طيبه ياقمري

شفقه هجوووووووووووووووووووووووووم

ههههههههههههههههههههههه(انا بهدي النفوس اهو )

لالالا بجد انت جاي عليها اوي اوي

المفروض يوم عيد ميلادها

هديه شيك وقبلها كلمتين حلوين كده من قلبك لقلبها

وكمان تعزمها برا

ايون لن نقبل باقل من كده ولا ايه ياشفقتي ياقمريتي

******

ربنا يسعدكم يارب
ويهدي سركم وابقوا دايما اقروا المعوذتين :)

أمل حمدي يقول...

هههههههههههههههههههههههههههههههه

ههههههههههههههههههههه

من اجمل البوستات واخفها

ربنا يدخل على قلوبكم الفرحة

بس خلاص ... يقول...

شفقه هانم واحسان بك
السلام عليكم
مدونتكم جميله بجد بجد ينفع تدخلوا التاريخ زى كل الثنائيات الجميله فى الحب وازاى هما اتعذبوا بسبب حبهم دا بس انتم بقا تتميزوا عنهم بكتيييييييييييير لانكم اتجوزتم وده العذاب الاكبر .. انتم بجد الاثنين ابطال كبار قوى .
وبعدين حلوة قوى الزكريات دى وجع الاسنان وجع البطن نزلة البردالشمعة اللى من غير تورته والفرخة اللى من غير لحمة ايه الهنا ده.
بجد بجد الدمعة فرت من عينى وانا باتفرج على الفيلم ده.
ربنا يديمها عليكم نعمة وهى نعمة الجهاد فى سبيل الزواج .
وكل سنه وانتم طيبين يااحلى مدونين

الكحيان يقول...

والله ضحكت من أعماق أعماق مصارين قلبي يارجل.. يخرب بيتكم...هههههههههه بس ياعم انا أحسدك على الولية شفقة هانم ... ربنا يرزقني عروسة حلوة وظريفةزيها، وتبقى أيامي كلها أعياد في أعياد وأقول على طول : آه آه آه عيد ميلاد شفقة حان وكمان العيد الكبير في الطريق إليك ربنا يكون في عونك.... شكرا على مروركما بمدونتي وقد سعدت بكما جدا واستمتعت بجولتي في مدونتكما .

بنوتة يقول...

لالالالالالالالا
ملكيش حق يا شفقة
كدة وحشتي صورة الراجل في عنينا
وطلعتي انتي المجرمة في الآخر
المهم يا احسان تردها لها في عيد ميلادها

mohra يقول...

و لا كده عاجب و لا كده عاجب
على فكره انت راجل مفترى

soulmate يقول...

عارف انا دايما اقول ان الرومانسيه شىء جميل ويا سلام لو احتفلنا بعيد الحب سوا بس الى هيا عملته شىء لا يصدقه عقل على راى واحده مش فاكره اسمها بس من الاخر هيا حاولت برده تسعدك فى عيد الشمعه وعيد الفرخه عشان مش يبقى ليك حجه بصراحه كل مره اقعد اقرالكو ببقى مش قادره امسك نفسى من الضحك ربنا يجعلكو دايما سبب لريم الضحكه على وجوه الناس

زهرة الجنة يقول...

انت مش بيعجبك شيء يا أحسان
يعني لو شفقة مفتكرتش عيد ميلادك ولا عيد الحب كنت طلعتها غلطانة

ولما افتكرته وعملت الواجب معاك برضه غلطانة

وهي كمان عيانه بسبب ضرسها برضه فكراك
شوفت حب اكتر من كده

صحيح الرجالة دي زي القطط ههههه

كل سنة وانتم طيبين ودايما فرحانين

مواطن مصرى نايم يقول...

ههههههههههههههههه
حبيب قلبى حمدالله بالسلامة يا ريس
بس فغيابك انا كنت بحاول اخد حقك على اد ما اقدر
بس كنت بفشل
ههههههههههههه
اه و الله
حتى كنت حجوزك بس من خوفى من شفقة قلت عيشه الكيلانى

و بما انى اول المتضامنين معاك من زمااااااان
فأنا بعلن انى بفكر اعمل حملة على الفيس بوك ضد قهر الرجال

هههههههههههههههههههه
على فكره فى حملة كده بجد

كل سنة و انت طيب يا كبير
عيد فرخة سعيد
و كل شمعة و انت طيب

Mony يقول...

ههههههههههه



بس ماتظلمهاش يا احسان

المهم النية

و ربنا بيعامل بالنيات

ايه يعني حدية عيد ميلادك فرخة
هههههه
ما القمصان كلها ماجتش مقاسك
تعمل ايه يعني:)

ولا عيد ميلادك
ولا عيد الحب


المهم النية الكويسة مبيته
بس الظروف هي اللي ماساعدتهاش


ربنا يرضيكم ببعض و يقر اعينكم ببعض

kochia يقول...

بصراحة هي عملت واجب جامد اوي
وانت لو مرديتوش كويس تبقي بخيل
يمعني خير بقي يوم عيد الميلاد الجاي

تحياتي

mohamed ghalia يقول...

ايه كل البعزقه دى
ياعم ولا يهمك لازم تستحمل
اتأخرت علينا كتير فعلا
تحياتى

صدى الصمت - عاشقة الورد - يقول...

والله الواحد مش عارف يعمل معاكو ايه بالظبط ؟ لما انت تحكى نحس انك مظلوم و لما هيه تحكى تصعب برضة علينا قوى
مش عارفة أتصرف ازاى؟؟؟؟

شفـقــة و إحســــان يقول...

من غير عنوان
متشكرين يا سيدى واتفضل حبة لذاذة

شفـقــة و إحســــان يقول...

tamer
ايه يا عم انت بتحجز تذكرة طيران
وربنا يخليك ليا يا تامر وتتضامن معايا ضد الاعداء
ايوا كده يا راجل اخيرا لقيت حد ينصرنى لا وايه كمان هيعملى جروب
ده احنا هنعمل عمايل ونسوى الهوايل واستنى عليا يا شفقة
بس بينى وبينك كده مين علياء دى ؟
عموما انا كمان نفسى اتعرف عليك بجد وان شاء الله فى اول لقاء تدوينى هقولك
وعموما احنا ان شاء الله هنروح لقاء المدونين يوم الجمعة اللى جاية فى بورسعيد واتمنى نشوفك

شفـقــة و إحســــان يقول...

لblue wave
يا راجل ده هيبقى عيد ميلاد ولا حفلى سى فود؟؟
عموما هى فكرة كويسة واختراع جديد الواحد يشترى هدية من حلقة سمك

شفـقــة و إحســــان يقول...

انا حرة
بقى كده ده انتى طلعتى بتحبينا اوى
عايزة تخلصى منا ولا ايه؟؟
وبرضوا ماتستعجليش الشباشب جاية جاية
بس خلى بالك من نفسك لينوبك من الحب جانب

شفـقــة و إحســــان يقول...

صابر وراضى
والنعمة وانا زيك صابر من زمان
بس انا خلاص راجعت نفسى وقررت ما اولعش فى نفسى علشان شفقة مش هتهون عليا
لكن قررت اولع فيها هى علشن انا مش ههون عليها

شفـقــة و إحســــان يقول...

همس الاحباب
منور شفت ادينى وضحتلكم الحقيقة احكموا انتم بقى
بس ياريت حكم مش مخفف علشان نخلص
وبعدين مين توم وجيرى دول؟؟
انا ما اعرفش الا توم وبصل

شفـقــة و إحســــان يقول...

norhaty
ماشى يا ستى ادعيلنا كمان وكمان
ولو انك شكلك بتدعى علشان نديكى حتة من الفروج بس بعينك

شفـقــة و إحســــان يقول...

sometimes
يعنى كل اللى عجبك فى الموضوع انى فاكر عيد ميلادها
طيب عموما انا هنسى قبلها بيومين واحتمال يجيلى زهيمر

شفـقــة و إحســــان يقول...

maiosha
بقى شفقة رومانسية؟
احتمال بس يمكن انا مش واخد بالى
وبرضوا شكلك كده عمالة تمدحيها علشان تاخدى حتة جاتوه بس عينك وخليكى فى مذاكرتك بلاش طفاسه

شفـقــة و إحســــان يقول...

لماضة
كده يا لماضة خلاص عملتى معاها حزب ماشى يا ستى
وبعدين مين اللى قال انى ما بيعجبنيش العجب
لا بيعجبنى جدا بس عجب شفقة حاجة تانية خالص عجب العجاب
اما بالنسبة للمفاجعة فخليكى مستنية

شفـقــة و إحســــان يقول...

د الحسينى لزومى
علم وينفذ يا فندم

شفـقــة و إحســــان يقول...

كيارا
ما انتى اصلك مش فاهمة الحكاية هى بتقدم السبت علشان تلاقى الاحد بس على مين
وما تخافيش احنا كل يوم بنقرا المعوذتين ونبخر الشقة بالحنجل والمنجل والشبشب والصندل
واهم حاجة هى الشبشب والصندل

شفـقــة و إحســــان يقول...

ماما امولة
ربنا يخليكى بس انت كان قصدك يدخل على قلوبكم الفرخة
دى طعمها الذ

شفـقــة و إحســــان يقول...

بس خلاص
انتى فعلا عندك نظرة مستقبلية
احنا فعلا دخلنا التاريخ انتى ما اتفرجتيش على حسن ونعيمة وشفيقة ومتولى
يا بنتى احنا اتعرض علينا نكون ابطال الافلام دى واحنا اللى رفضنا
بس اوعدك اننا نعمل فيلم يكسر الدنيا بس مش هيكون رومانسى
لا هيكون اكشن على رعب
علشان الدمعة تفر من عينيك بجد

شفـقــة و إحســــان يقول...

الكحيان
شكلك كده بتمتهن نفس مهنتنا
واللهى فكرتنى بيونس شلبى فى مسرحية العيال كبرت
لما كان بيقول هو انتى الولية
اه لو شفقة خدت خبر باللقب ده هتقلب المدونة راسا على عقب
وساعتها اعتقد انك مش هتحسدنى ولا هتتمنى عروسة زيها
ده ان ما دعيتش عليا يبقى كويس

شفـقــة و إحســــان يقول...

بنوتة
علشان بس تعرفى اد ايه هى ظالمانى
يا بنتى ده هى منتجة فيلم جعلونى مجرما

شفـقــة و إحســــان يقول...

mohra
ليه بس الرفس ده؟؟
ده انا راجل مسالم على الاخر
واحب اصلحللك هنا حاجب وهناك حاجب
مش لا كده عاجب ولا كده عاجب

شفـقــة و إحســــان يقول...

مشمشة
فعلا انتى معاكى حق الرومانسية شىء جميل بس هى فين؟؟
وهى فعلا بتحاول تسعدنى وتسعد نفسها معايا مش قاسمتنى فى الفرخة
وبعدين احنا مش بنرسم الضحكة احنا بنرسم الفرخة

شفـقــة و إحســــان يقول...

زهرة الجنة
هى فعلا عملت الواجب بس حلته معايا غلط
والابلة فى المدرسة ضربتنى
وبعدين انا مش زى القطط لان القطط بتاكل وتنكر
اما انا باكل وباكلها معايا

شفـقــة و إحســــان يقول...

مواطن مصرى نايم
منور اخبارك انت ايه؟؟
عرفت يا باشا انك كنت بتاخد حقى المهم حوشتلى كام لحد دلوقتى ولا هننصب؟؟
وبعدين يا عم لما انت خايف من شفقة امال انا اعمل ايه الا وشها فى قفايا عدل
عموما انا موافق عايشة الكيلانى عايشة الكيلانى
زى بعضة اهو تغير يا راجل
وياريت تضمنى للرجال المقهورين اللى عندك
تاخد فيا ثواب

شفـقــة و إحســــان يقول...

mony
انتى قلتى كلمة حق النية
فعلا ولا كان فى النية ابقى......
كمليها بقى

شفـقــة و إحســــان يقول...

kochia
من ناحية الواجب بصراحة فهى خدومة ووجبت معايا اوى بقالها 4 سنين بتوجب
ويارب يقدرنى واردلها الواجب ده اضعاف مضاعفة
بس استنى عليا يا شفقة

شفـقــة و إحســــان يقول...

mohamed
بعزقة على رايك واهو كله من جيبى وهو يعنى على حسابها
اوعدك بانى متاخرش تانى بس خلى شفقة تحل عنى وتسيبنى فى حالى وهتلاقى كل يوم بوست

Unknown يقول...

هههههههههههههه

يعني ده بدل ماتقول للست كتر خيرك يعني

هي ذنبها ايه ان الناس اكلت التورته مش كفايه انها عملتلك المفجأه

وبعدين هي غلطانه يعني انها رومانسيه واحتفلت بعيد الحب

ولو مكنتش احتفلت كانت هتبقي ماعندهاش احساس

والله الستات مش عارفين يعملو ايه عشان يرضوكم

رجاله مابيعجبهومش حاجه

شفـقــة و إحســــان يقول...

صدى الصمت

فعلا انا مظلوم
بس هيا مش مظلومة خالص
ممكن تكون "زلومة" معلش
هههههههههه

شفـقــة و إحســــان يقول...

esraa
شكلك كده متضامنة معاها اتى صعبان عليكى التورتة ولا ايه شكلك دفعتى حقها معاها
وعايزة تعرفى الستات يعملوا ايه علشان يرضونا...... يسيبونا ويرحلوا
ويحلوا عن قفانا
قصدى عن جيبونا

كيكى عوووووو يقول...

كل دة حصل فى مصر وانا مش موجودة
يالهوووووووى يالهووووووووى
عيد ميلاد فى الاخر يتحول لفرخة
على فكرة القميص هى قاصدة تجيبوا ضيق
وعيد حب وحاجات ومحاتجات دى مخططة كويس ودارسة هى بتعمل اية كويس
احترس منها بقى
دى بقت خطرة
..................
جبلها هدية محترمة بقى وخطط ورتب كدة زيها
وش بيغمز
**************
وحشتونى مووووووووووووووووووووت
عووووووووووووووووووووووووووووو

mostafa rayan يقول...

عزيزي احسان لا تحزن فكلنا هذا الرجل يا صديقي
قلبي معك وان كنت مازلت غير متزوج
ربنا يسترها عليا وعليك يا احسان يا خويا

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

Teawater يقول...

ممكن يا عمو احسان اعلق هنا
انا مشمشه وبصراحه البوست ده عثووول اوووووي ونفسي احسدكم على الحياة الجميلة اللذيذه ديه انتم دمكم خفيف اوي وكابل هايل اللهم لا حسد
بس يا عمو انتم ليه كده مش خليتم الموبيل ده هيبقى ذكرى حلوة لليوم العثول ده وبعدين يا عمو اجمل حاجه في عيد الحب شموعه يارب عقبالي كده ما ابقا عروسه واعزمك انتا وطنط يا عمو ميرسيه كتير

Mafrousa يقول...

ههههههههههههههههههههههههه
المفروض انك تضحى يا احسان بيك
الست متمرمطة رايحه جايه علشان التورتة
تقوم تحرقلها المفاجأه
انا لو منها ارمي العبه فى الارض و اتإمص
هههههههههههههههههههه
بوست لذيذ

PrInCeSS BeRy يقول...

هاى احلى زوجين فى الدنيا واخف دم فى الدنيا وحشتونى كتير دمكوا زى العثل كالعادة ومغامرتكم لا تنتهى ربنا يسعدكوا يارب

عالم ماريونت يقول...

عزيزي احسان:
بعد التحية والعتاب اللطيف عشان بقالك فترة انت وشفقة مش بتيجو عندي
انا شايفة ان الست عداها العيب
يعني هي غلطتها انها كانت عايزة تفرحك؟
الواحد ميقولش الحمد لله ابدا؟
صنف نمرود صحيح والواحدة مهما عملت لكو تفضلو فاكرين الوحش دايما
هههههههههههههههه
عموما كل سنة وانتو طيبين وان شاء الله العيد الجاي تكونوا كويسين وتكون شفقة عرفت ازاي تجيب هدايا من غير مشاكل
وادعيلي بقى يكون عندي عيد حب انا كمان
هههههههههههههههههههههههههههههه
وابقو اسألو
رنا

شفـقــة و إحســــان يقول...

كيكى
انتى كده خوفتينى عمالة تقولى خطرة وكده
حسستينى انى عايش مع الخط
ربنا يستر
المهم انك برضوا فى الاخر متحيزلها يا ليئمة وعايزانى اجبلها هدية محترمة وعمالة تقولى خطط ورتب
طيب ايه رايك هجبلها كراسة رسم مش بتقولى خطط
ليئمة لئيمة

شفـقــة و إحســــان يقول...

MOSTAFA
ايه يا درش انت هتلبسنى تهمة وتوقعنى مع شفقة ولا ايه ؟؟
قلبك ايه اللى معايا يا عم احنا فينا من الحاجات دى؟؟
عموما ربنا سترها معانا جميعا بس انت فى نعمة يا راجل اوعى تتخلى عنها
ودايما قول اللهم زيدها نعمة واحفظها من الزوال

شفـقــة و إحســــان يقول...

TEAWATER
اهلا بيكى بس ربنا يستر وماتدلقيش علينا لحسن نتحرق احنا مش ناقصين
وبعدين خفى علينا قر ارحمونا يا عالم يا هوو
وتعالى هنا ايه حكاية عمو وطنط دى يا خرابى لو شفقة سمعتك
كان اليوم يبقى كوبيه
دا احنا لسه بنروح المدرسة وممكن تلاقينا زمايل كمان

شفـقــة و إحســــان يقول...

واحدة مفروسة
ومين قالك انى ما بضحيش مش كفاية جوازى منها ده لوحده اكبر تضحية فى الدنيا
وبعدين احمدى ربنا انى حرقت المفاجاه مش حاجة تانية بس اوعى تفتكرى انى اقصد شفقة
دى حبيبتى

شفـقــة و إحســــان يقول...

PRINCESS
هاى وهاين وتلاتة كمان
ايه يا بنتى انتى جاية تعلقى فى الاسكيمو
عموما مهايهايا اقصد منورة
ومتشكرين يا ستى على الكلمتين الحلوين دول

شفـقــة و إحســــان يقول...

يوميات نائمة فى الارياف
بالنسبة للعتاب احنا بنزورك علطول وكنا بنبعت تعليق بس للاسف ماكانش بيوصل
اما بالنسبة للست عداها العيب فلو كان عداها كانت زمانها اتفعصت وماتت وياريته عداها اقصد الحمد لله انه معدهاش
وبعدين احنا صنف قرود مش نمرود
وفعلا مهما عملتوا بنفضل فاكرين الوحش
بس ابو بق كبير اللى بياكل الناس
وانتى اللى قلتى مش انا

Asmaa mahaba يقول...

شوف يا احسان يا ولدى انا حقولك كلمه حطها حلقه فى ودانك
البطران نهايته قطران والبنيه مش غلطانه غيرش بس هى طيبه شويه وبعدين انت مش واكلك هوبر فرخه مشويه ولا معرف متحمره قطط تاكل وتنكر

Asmaa mahaba يقول...

انتى يا شفقه انتى يا كسفانا فى الاوساط العليا والسفلى والمتوسطه
فضحتينا وسط الخلق يا شفقه ضمرتى مجتمع النساء يا حبيبتى يا بنتى حعلم فيكى لامتى الست وشطارتها فى السريع المريع على اول عيد ميلاد لجوزها تجيبله قميص لبنى بيتلبس بالشقلوب وعلى مستشفى المجانين
اما عيد ميلاده متجيبيلوش تورته تكفى انك تهديه فتوره التليفون يا خيبه
وفى عيد الحب اللى فشلتى تعمليه فى العيدين اللى فاتوا تعمليه فى عيد الحب استهبلى ووقعى الشمعه عليه وولعى فى البيت وتبقى قضاء وقدر بس قبله لازم تامنى على البيت وتقبضى التامين بعد وفاته
جتك خيبه كسفتينا فى اوساط النساء جايباله هديه ومشخلعاه وادى اخرتك اهو كسفك وشتمك
اخر خدمه شفقه علقه
احسن تستاهلى
حماه احسان سومه_87
اسالونى انا مدوباهم بطيخ

كيكى عوووووو يقول...

اة طبعاااااااا لازم نتحيز ليها
!1111!
عموما لو مجبتلهش هدية محترمة احنا هنفجر المدونة وعلى المقيمين خارج القاهرة مراعى اختلاف فروق التوقيت
عووووووووووووووووووووووووووووو

Asmaa mahaba يقول...

خدى بالك من كلمه ضمرتى دى ههههههههه يبدو من انفعالى الحروف تضخمت وبقيت بدل دمرتى ضمرتى
منك لله لخبطينى يا شيخه

Asmaa mahaba يقول...

على فكره يا احسان منى ليك البنزين هديه:))

اقصوصه يقول...

ههههههههههههههههههههههه

ماذا تفعل لو كنت مكاني ؟؟؟

سؤال محرج بصراحه

اولع بنفسي اكيد!!

طلعت فعلا متهني!!

لووووووووووووووووول

والمدام تنشر بوستات

وتحسسنا ان هي الزوجه المثاليه

وانته يا حبة عيني مظلوم!

يعني حتى فلوس الموبايل راحت ع البيت؟

يعني طلعت اخر شي خالي الوفاض من الموضوع

منفض يعني!!

ههههههههههههههه

الحمدلله اللي مد بعمرك وقدرت تكشف لنا الحقيقه :)

شفـقــة و إحســــان يقول...

سومة
ايه يا بنتى انا على فكرة مابلبسش حلقان خدى بالك كويس
كمان البطران بيبقى فرحان مش قطران ده النيولوك الجديد
وبعدين انتى هتبصلنا فى اللقمة ما صاحبتك كلت نصها
كمان احنا قطط تاكل وتخربش
نو نو نو نو

شفـقــة و إحســــان يقول...

سومة
ومين قالك انى ما بعملش كده ده انا نحلا وبره
ههههههههههههه
حلوة دى وهو دلوقتى ماشى من غير وبر
عيب يا سومتى ده انا تلميذتك يا ابلتى
شفقة

شفـقــة و إحســــان يقول...

كيكى
انتى بقيتى عطية الارهابية ولا ايه؟
وبعدين بمناسبه التفجيرات ومراعاة فروق التوقيت ما تنسيش تضربى المدفع

شفـقــة و إحســــان يقول...

سومة
حلوة اوى الحروف تضخمت بس مش لو كنتى زودتى نقطة كان يبقى طعمه احلى والذ
ماء ماء

سندس وأمل يقول...

هههههههههههههههههههههههههههههههه

ههههههههههههههههههههههههههههههههه

أنا من الأول قلت لك ياأستاذ إحسان

إن شفقه هتوريك النجوم فى عز الضهر

ههههههههههههههههههههههههههههههه

بس والله إنتوا الإتنين زى العسل

ماشاء الله عليكم ربنا يحميكم

"سندس".................

على فكره إنتوا لىكم تاج عندنا

روحوا حلوه بسرررررررررررررررررعه

غير معرف يقول...

السلام عليكم شفقة هانم واحسان بك
بص حضرتك انا بطنى وجعتنى من الضحك هههههههههههههههههههه بجد مش قادر اكمل
بص حضرتك انا وقفت عند عيد الحب ان شائ الله ابقى ارجع اكمل بقى
بجد دمكم خفيف اوى ربنا يديم المودة والمحبة بينكما وتبقوا اسعد زوجين يارب ويلا سلام

سمكه واحده يقول...

ايه ياعم الحج انت
شوف ياجدع افتري الرجاله كتر خيرها الست قامت بالواجب هتعمل ايه اكتر من كده
اما نشوف بقي في الاعياد التانيه هتعملوا انتوا ايه
ياساتر عليكوا يا اخي ديما كده مش بيعجبكوا العجب
هههههه لا بجد بوست لذيذ ربنا يسعد ايامكوا
تحياتي وانا مش هكئبكوا ياسيدي خالص اهو
سلام
سمكمك

Unknown يقول...

ازيكم يارب تكونوا بخير
ومفيش خناق ولا احتلال للكى بورد

معليش انا لى سؤال
ياترى جايين بورسعيد ولا ظروفكم مش هتسمح ارجوا الرد

اشوفكم بخير ان شاء الله

ضــى القمــر يقول...

هههههههههههههههههه

ههههههههههههههههه

ربنا يهنيكم مع بعض بجد .. والله بدعى من قلبى ..

وخاصه اننا على ابواب عيد ميلادها .. يعنى يوم تاريخى .. هههههههههه

ومنتظرة بشوق رهييييييييب اللى هيحصل فيها ..

بس هى الحق عليها أنها افتكرت عيد ميلادك .. أى نعم هى اللى استفادت بالفلوس .. بس مش مشكله ..
المهم النيه .. وده كفايه جدااا عليكم يا معشر الرجاله ..ههههههههه

وكل السلام للجميله شفقه :)

بس حاولى ما تحرقيش مفاجأته ليكى يوم عيد ميلادك يا قمر .. وانسى اصلا تاريخ ميلادك وانتظرى علشان تشوفى هيعمل ايه .. ههههههههه

منتظرة بوست الرد بتاعك

هههههههههههههه

ميرا ( وومن ) يقول...

ههههههههههههههههههههههههههههههههههه

بجد انتم الإتنين والله تجننوا ولايقين علي بعض قوي

علي رأي خيرية احمد في ساكن قصادي حلة وغطاها

كل ده يحصل من عيد جوازكم لعيد ميلادك لعيد الحب

إية الأعياد المنظور فيها دي

عموما ربنا يخليكوا لبعض

صيدلانيه طالعه نازله يقول...

طب و الله يا رجاله انتوا مفتريين على الاخر كل اللى شفقه عملاه ده و مش عاجبك و مالها فرخه الطازج و لا الجاتوه و التورته مش كفايه انها فاكراك و مش بتنسى مناسباتك السعيده
صحيح انتهت كلها بمأساه بس النيه كانت بيضا و سليمه
شد حيلك بقى و رد لها جمايلها فى مناسباتها الجايه و اهو يبقى عندك فرصه للانتقام يوووووووه قصدى الاحتفال
كل سنه و انتوا مبسوطين

ghorBty يقول...

السلام عليكم والرحمه

ربنا يصلح لكم الحال دائما يا رب

مدونه لذيذه جدا

تقبلوا مروري

إيمان قنديل يقول...

والله الست طيبه وكل تصرفاتها حلوه

بنت الغربة يقول...

احمد ربنا يااحسان بيه انها فاكراك يوم عيد ميلادك ويوم عيد الحب - انا الباشا جوزى مابيفتكرش حاااااجه خالص - اما بالنسبه للهدايا والى جرى لها فده سوء حظك مش اكتر وهى كتر الف خيرها انها فاكرااك - ياعم مش الى يهمك ان مراتك تكون بتحبك - خلاص عايز ايه تانى - ليه الطمع ؟ تحياتى ليكم انتم الاتنين-

أية عفيفي يقول...

هههههههههههههههههههههههههه

اسلوبك فى السرد بجد تحفه

بس كويس جدا انها افتكرتك عملت الى عليها

بس انت افتكرتها بايه ؟؟؟؟؟؟؟؟؟

نسيت تقولنا:D

3ala asm masr يقول...

المهم انك كويس والحمد لله
كل سنه وانتوا طيبين بمناسبة كل المناسبات الحلوه دى وربنا يخليكوا لبعض وتقدر ترد جمايلها

الجواز و سنينه يقول...

هههههههههههههههه
و الله يابنتى انتى زى العسل
بس صراحه احسان كده اتظلم آخر ظلم
ما نابه غير فرخه و يارتها حلوه كمان و شمعه و يارتها دفته كمان
بس اكيد اكيد اكيد و بما انى من حزب المرأه
شفيقه بتخلص منه اللى ياما عمله فيها
تسلم اديكى و الف مبروك على الكتاب مقدما

wanna b a physician يقول...

طيب يعنى ماهو برضوة طلعت بحاجة فرخة ترم العضم مش احسن من اللى بيطلعوا بوليشى ايه اللغة اللى باتكلم بيها دى
واهو كمان جبت كرسى كمبيوتر وحاجات للبيت يعنى تمام مش مهم تبقى شخصيه المهم النفع هههههههههههههههههههه
وكل سنة وانت طيب

حواء يقول...
أزال المؤلف هذا التعليق.
حواء يقول...

مدون جميله ولذيذه جدا
سمعت عنها كتير من كل صحابي
واخيرا زرتها
دمتم بضحك وسعاده هههههههههههههه

محمد فاروق الشاذلى يقول...

لا يا إحسان إنت اللى غلطان إزاى مش مقدر كل اللى بتعمله شفقة هانم علشان تحتفل معاك بالمناسبات السعيدة دى؟؟؟؟
على كل حال انت قولت بنفسك ان عيد ميلادها قرب والمفروض ترد الجميل وبدل ما يبقى عيد فرخة وعيد شمعة ممكن يبقى عيد ترمس السعة 2 الضهر على كوبرى قصر النيل وسيب الشمس تاخد لك حقك بقى
تحياتى

دعاء مواجهات يقول...

ههههههههههههههههههه

والله انتوا الاتنين ملكوش حل

بجد

مفيش تعليق ينفع

بجد بنموت فيكم

تحياتى ليكوا انتوا الاتنين

ايام العمر يقول...

هههههههههههههههههه

لا مش معقول

حمد لله على سلامتك

emey يقول...

جيلة قوى المدونة دى وأنتم دمكو لذيذ كويس أنكو بتحكو حياتكم بالتهريج بدل متخدوها بجد فكرة حلوة مش كنتو عزمتونى فى عيد الفرخة أنتظر زيارتكم قريبا

رحــــيـل يقول...

ههههههه

كل سنه وانتو بخير دايما
ربنا يهنيكوا يارب
ومستنين نشوف هتعمل معاها ايه فى عيد ميلادها

بجد سعيده جدا انى اتعرفت عليكم

ahmed_k يقول...

هههههههههههه
بصراحه أعياد دمها زي الشربات
واجمل ما في البوست انك اديتني معلومه عن تليفون النوكيا ابو خطين
وعرفتني سعره الحقيقي اصلي محتار أجيب أيه بعد اما تليفوني خرب

وكل أيامكم أعياد إن شاء الله

حاجات جوايا يقول...

ههههههههههههههههه
والله انتوا زى العسل
ربنا يخليكوا لبعض

سالى

هبة النيــل يقول...

حلوووووووووووووة

ومدونة دمها خفيف جدا فعلا

Mahdi Mahdi يقول...

الاخوة ، شفقة هانم واحسان بك
سلام الله عليك و رحمته و بركاته
وما يتعرض له الاسم من وقاحة ماذا نفعل تجاهه ، فقط اتعرض لاسم يسوع الاسرائيلى وهو المعبود كما يقال فى الكنائس صبيحة كل يوم احد " نعبد الاه واحد واسمه الوحيد يسوع المسيح"،

emey يقول...

أشكرك على زيارتكم على مدونتى المتواضعة وأنتظر مواضيعكم القادمة بلهفة وتشويق

Unknown يقول...

والله انتوا حياتكوا فاصل كوميدى ظريف فى وسط الدنيا الهباب اللى احنا عايشينها دى انا شخصيا بستمتع بالحكاوى بتاعتكوا قوى بس والله من غير قر ولا حسد ولا اى حاجة وحشة وكل سنة وانت طيب ولو ان واضح انك مقاسك صعب وعشان كدة شفقة مكانتش غلطانة البوست اللى فات (وش بيغمز) ربنا يقويكى يا احسان يا اوختشى وكل سنة وانت طيبة عشان عيد ميلادك قرب

شفـقــة و إحســــان يقول...

سندس وامل
ايه ده انتى بتقولى عز...يبقى انت اللى قتلت بابايا على راى شويكار
اظاهر ان كلامك طلع صح...... ده انا شفت النجوم فى عز الضهر والليل والفجر وكل الاوقات وعدتها كمان

شفـقــة و إحســــان يقول...

جمعاوى صاحب عيادة اسنان
ايه يا عم ده بطنى وجعتنى والامراض دى هو باب النجار مخلع ولا ايه؟
وبعدين ايه حكاية وقفت عند الحتة دى
هى رجليك كمان تعبت ولا مالقتش مواصلات؟؟

شفـقــة و إحســــان يقول...

سمكة واحدة
نورتى عالم البحار يا سمكمك
بس ماشى برضوا منضمة لحزب المراه مع انك فصيلة تاية خالص بس برضوا مؤنثة
عموما يا ستى هى تشكر على الواجب واحنا بقى مش بيطمر فينا

شفـقــة و إحســــان يقول...

نهر الحب
الحمد لله لحد دلوقتى مفيش الا الاحتلال مش فى الكيبورد لا فى كل حاجة
وان شاء الله نيجى اهو كمان الواحد يفك من الخنقة

شفـقــة و إحســــان يقول...

ضى القمر
وحياتك عيد ميلادها هيدخل التاريخ وهيبقى ولا عيد 6 اكتوبر بس ربنا يستر ويعدى العيد على خير من غير حرب بسبب الهدية

شفـقــة و إحســــان يقول...

وومن
انا شامم ريحة طبيخ
حلة اية وغطا ايه شكلك ما بتخرجيش من المطبخ
بس يا ترى طبخين ايه النهاردة؟؟
الواحد جاع

شفـقــة و إحســــان يقول...

صيدللانية طالعة نازلة
والله انتى قطعتى نفسنا بالطلوع والنزول
ويا ستى انا مش معترض لا على فرخة الطازج ولا الجاتوه ولا التورتة انا معترضة على ناس تانية خالص
وبعدين انا بحب النية البلدى الامهات
مش البيضا
اما بخصوص الانتقام فربنا يستر وماتشمتيش فيا

شفـقــة و إحســــان يقول...

ghorbty
ايوا كده هو ده الكلام المظبوط ادعى يا عم ادعى
وكمان دعاء على الظالم والمفترى

شفـقــة و إحســــان يقول...

كبارية
الست دى امى

شفـقــة و إحســــان يقول...

بنت الغربة
انا شاكك كده ان جوزك عنده زهيمر وعقبالنا زيه
لما يجلنا زهيمر بس فى الاعياد والمناسبات
وبعدين انا بحمد ربنا وبشكرك على النعم كلها وخصوصا على نعمة قصدى على شفقة
واللى يهمنى مش انها تكون بتحبنى ده هى دى المصيبة
ههههههههههههه

شفـقــة و إحســــان يقول...

ebtesama
اشكرك بس عايز اعرفك انى علطول فاكرها وبكل خير حتى ده واضح فى بوستاتى ولا ايه؟؟

شفـقــة و إحســــان يقول...

3ala asm masr
الحمد لله لحد ما كتبت البوست ده وانا كويس محدش يعرف بكره فيه ايه مع شفقة
بس ابقى اطمن عليا

شفـقــة و إحســــان يقول...

الجواز وسنينه
احم احم ايه يا ستى هو الجواز عملك حول ولا ايه
انا احسان اللى كاتب البوست
عموما انا عذرك مهو كله من الجواز وسنينه
بس انا فعلا مظلوم يا ريت بما انك من حزب المراه تبقى توصليلهم صوتى

شفـقــة و إحســــان يقول...

wanna b
ايه يا عم النقا ده ؟؟ قال ترم العضم قال ده هى نص فرخة يتيمة فروج كمان يعنى حاجة قلة
وايه بوليشى ده انتى بتتكلم صينى؟؟

شفـقــة و إحســــان يقول...

زوجة
ايه ده احنا بقينا مهروشين للدرجة دى؟؟
اقصد مشهورين كده....والله وشكلها هتلعب معانا وهنقع فى قعر الحلة
قصدى نقب على قفا الدنيا

شفـقــة و إحســــان يقول...

قلب مصرى
انت فعلا قلبك كبير وكمان صاحب افكار جنان بس للاسف مش هينفع معاها فى عيد ميلادها ده....لاننا للاسف ولسوء حظى فى الشتاء يعنى مفيش شمس بس ممكن نخليها قمر وفى عز البرد مع دور انفلونزا ونبقى ارتحنا
ولا اقولك بلاش لحسن اول واحد بتعدى

شفـقــة و إحســــان يقول...

دعاء مواجهات
معقولة مالناش حل كده برضوا يا دعاء غلب حمارك ومش عارفة تحلى المسالة
عموما ممكن تستعينى بصديق بس يكون مدرس رياضية

شفـقــة و إحســــان يقول...

ايام العمر
يا ريتها ترجع ايام العمر وانا كنت عملت وسويت بس يلا
عموما معقول وانا هو حى ارزق

شفـقــة و إحســــان يقول...

emey
احنا مقلنالكيش احنا بنخدها بتهريج لاننا اصلا شغالين فى سيرك
وما الحياة الا سيرك كبير به مهرجين

شفـقــة و إحســــان يقول...

رحيل
احنا اسعد بس ياريت ما تستنيش لان انتظارك هيطول وممنك يمتد للسنة اللى جاية لان اخوكى مفلس

شفـقــة و إحســــان يقول...

ahmed
احنا فينا من كده بتدخل المدونة تاخد معلومات وتسربها
اذن انت جاسوس
انطق بتسرب المعلومات لمين ؟؟ ومين اللى كل الفرخة؟؟
ومين اللى بص فيها وعينه تندب فيها رصاصة
مش عايز تنطق
ماشى يا شفقة تعالى شوفى واتصرفى انتى بقى
ابسط يا عم جالك من لا يرحم

شفـقــة و إحســــان يقول...

حاجات جوايا
ربنا يخليكى انتى وادعيلنا
مع انى انا كمان فى حاجات جوايا

شفـقــة و إحســــان يقول...

هبة النيل
هى حلوة بس تفتكرى ان دمها خفيف؟
هو انتى وزنتيه ؟؟
طيب طلع كام نقطة؟
اكيد كتير لان انا من ساعة ما تجوزت وانا منقوط

شفـقــة و إحســــان يقول...

mahdi
منور عالم التدوين

شفـقــة و إحســــان يقول...

enjy
فاصل ونواصل
بقى عجباكى حكاوى القهاوى دى ماشى يا ستى علشان بتستفيدى وتحاولى ما توقعيش فى اللى احنا ادبسنا فيه
وبعدين كده برضوا تشردى اخوكى الغلبان
انا يا بنتى بلا فخر مقاسى مقاسات فراعنة يعنى حاجة كلها شموخ وعلو

emey يقول...

أنتو زى العسل ربنا يهديكو على بعض ويسعدكم علطول ان شاء الله

كيكى عوووووو يقول...

بيب بيب بيب بيب
هااااااااااااااااابى برث داى
هاااااااااااااابى براث داى شفقة
كل سنة وانتى طيبة يا جميلة
هيييييييييييييييييييييييييية
اول واحدة اقولك كل سنة وانتى طيبة
يارب احسان بك ياجبيلك
هدية التوك توك الى نفسك فى يارب يارب
هابى برث داى
عوووووووووووووووووووووو