الاثنين، 16 مارس 2009

بور سعيـــــــــــــد ..... إحنـــــــــا أســـعـد


إيه بورسعيد دي ؟؟؟

ومين سعيد ده إللي سماها على إسمه ؟؟؟

وإيه سر الجمال في البلد دي رغم صغر مساحتها ؟؟؟

وليه كل ما أروح هناك ألاقي البلد دي فيها خير مابينتهيش ؟؟؟

جايز يكون ده ليه علاقة بكفاح البلد دي أيام الإحتلال والعدوان الثلاثي ؟؟؟

يمكن يكون ده رزق أهالي الشهداء اللي ضحوا بأرواحهم علشان البلد دي تفضل حرة ؟؟؟

ولا جايز يكون ده بمجهود رجالة صورهم النهاردة بقت في كل مكان زي "الحاج/سيد متولي" الله يرحمه ؟؟؟


أيا كانت الأسباب
مش مهم
المهم إننا بنتكلم عن مدينة مصرية ساحلية صغيرة
جميـــــلة وكلهـــا بــــركــــة

وركزوا معايا على الكلمة دي
بــــركـــــة

أيوة كلها بركة
وهأقولكوا ليه



* في سابقة غريبة من نوعها .. ولأول مرة من حجشتاشر سنة .. خرجت أنا وقدري الأزلي (شفشوقة طبعا) في رحلة لمدة 3 أيام .. الخميس والجمعة والسبت .. ولسة راجعين أول إمبارح
إحنا كنا حاجزين شاليه غرفتين في إحدى القرى السياحية هناك .. ولما رحنا إتفاجئنا بإنهم بيسلمونا شاليه 3 غرف وبنفس السعر .. وده لإن الشاليهات الغرفتين فيها صيانة ( آدي أول بركة )
طبعا شفقة ماصدقت وراحت مخلصة كارتين موبايل على إخواتها وقرايبها وأصحابنا تعزمهم
يقضوا معانا يومين .. والجميل إن ماحدش عبرنا .. والأجمل إننا قضينا التلات ايام دول كل يوم في أوضة .. جنان بعيد عنكم.


* عند المغادرة وأنا بأسلم مفتاح الشاليه في الريسيبشن الموظفة بصت للمفتاح بإستغراب وكأنه مش بتاعهم وطلبت مننا نستنى دقيقة واحدة .. طبعا سمعت الكلام بدون تردد ( أصلها كانت حلوة أوي )
رغم تأفف شفشوقتي العزيزة .. اللي قعدت تسخن فيا وتقولي كده هنتأخر وأنا لسة هأمر على المحلات أشتري ماعرف إيه وأرجع مادرك إيه .. وأنا مش مديها ودني خالص .. مانا فاهمها .. هوا ده حالها كل ما أتكلم مع واحدة .. وبالذات لو حلوة يبقى يومنا هباب .
ماكملناش دقيقتين وخرجت الموظفة بتعتذر عن غلطة في الحساب هي إننا دفعنا إيجار شاليه مميز واللي نزلنا فيه كان عادي .. وقدمت ظرف فيه فرق الفلوس .. أحلفلكم بكل أيمانات الدنيا إني مالحقتش أفتح الظرف ولا ألمسه حتى .. يادوب بالكتير شفته وهوا بيتخطف بإيد نفس الشفشوقة اللي كانت معترضة على إنتظارنا لتلك الموظفة الجميلة والأمينة .


* البركة التالتة في الأكل
ساندوتش الشاورما كله لحمة ( مش بصل وطماطم ) .
رغيف الفينو طول بعرض وبـربع جنيه .
وجبة كنتاكي العائلية كلها قطع كبيرة ( مافيهاش ولا جناح ) .
علب الأرز باللبن والمهلبية والكاسترد قد علب الكشري عندنا .
والفظيعة بجد كانت علبة زبادي جهينة ، أظن كلنا عارفينها ، بس هناك جهينة واخدة هرمونات مش طبيعية .. عموما أنا نزلتلكوا صورهم وإنتوا أحكموا .
بصراحة أنا كنت خايف آكل منها لأعمل زي
"لهيطة" في الفيلم بتاع "أنكل زيزو" .. آه والواحد مش ناقص .


* البركة الرابعة في اللبس
غير إن فيها المصري والمستورد أسعاره معقولة بس مش ده اللي لفت نظري .. أنا اللي عجبني إني لقيت مقاسي بسهولة .. وأنا بأدوخ عليه هنا .
مش كده وبس لأ ده أنا لقيت هدوم تلبس هركليز بيه شخصيا .


* البركة الخامسة في المواصلات
البلد الوحيدة اللي ماشفتش فيها أوتوبيس نقل عام ولا حتى ميني باص شركات خاصة .. مافيش إ
ختيارات .. يا تاكسي يا ميكروباظ .
والبلد الوحيدة اللي تركب فيها تاكسي عربيات حديثة وشكلها يفرح .. يمشي بيك من أول البلد لآخرها وتدفع
إتنين جنيه ونص بس .
والبلد الوحيدة اللي تلاقي العربيات واقفة في الإشارة لو حمرا .. يعني ماعندهمش عمى ألوان ومن غير مايكون فيه عسكري واقف .
والبلد الوحيدة اللي فيها وسيلة مواصلات ببلاش .. أيوة ببلاش .. في زمن مابقاش فيه حاجة ببلاش .. بس هناك لقيتها .. المعدِية .


* البركة السادسة في الموقع الإستراتيجي
موقع البلد دي تحسدها عليه كل دول العالم .. يمثل أهمية تجارية إقتصادية عسكرية .. حيث
يتقاطع البحر مع أشهر مجرى مائي في العالم "قناة السويس" .. واللي منها صورتلكم الباخرة الروعة دي.


* البركة السابعة في الطبيعة
كمية طيور النورس اللي شفتها هناك مش ممكنة بجد .. منظر أكتر من رائع .



ده إيه الجمال اللي حوالينا ده وإحنا مش داريين ؟؟

تفتكروا بلدنا جميلة بس إحنا اللي شايفينها غير كده ؟؟
ولا إحنا مابقيناش عارفين ولا فاضيين نشوفها أساسا ؟؟
أصلي لاحظت وأنا بأصور إن الناس بتبصلي بصة مش تمام
وكإنهم بيقولوا إيه العبيط اللي بيصور السما ده

أظن إن الناس بقت رايحة جاية مهمومة وماحدش فينا بقى بيستمتع أو بيتذوق الجمال
مع إنه موجود حوالينا في أي بلد وفي كل مكان

يمكن يكون ده مش ذنبهم
والذنب ذنب اللي منكد عليهم وعلى أهلهم

بس برضو ماتبقاش الحكاية نكد وهم وغم من كله
ياريت كلنا نبص حوالينا ونشوف بلدنا بعين جديدة
علشان نقدر نشوف جمالها ونستمتع بيه



كان معكم من بورسعيد
مراسلكم/ إحســان أبو العربي






هناك 81 تعليقًا:

عاشقه الرومانسيه يقول...

اووووووووووول تعليق

عاشقه الرومانسيه يقول...

انت حببتنى فى البلد دى رغم انى ماحصلش انى زرتها ولا مره
اسكندريه كمان بلد جميله على فكره
بس جمالها بيزيد فى الشتا

تحيز بقى بلدى وباحب اجيب سيرتها باستمرار
ههههههههههه

حنين القلب يقول...

يا بختك

شوقتينى انى اشوفها بجد
طيب انتى خلصتى كارتين شحن ومش حد جه كنتى اتصلتى بيه وانا اجى

ههههههههههههههه
المهم انك انبسطى وربنا يجعل ايامك كلها جميله
على فكرة بلادنا كلها اماكن حلوة بس احنا اللى بقينا بنبص لكل حاجه بعين ساخطه رافضه تشوف اى حاجه غير عيوبها اللى بقت الصراحه مغطيه على اغلب مميزاتها

رحله سعيده يا ستى وابقى افتكرينى المرة الجايه باكله جمبرى وسبيط

تحياتى

Empress appy يقول...

طول عمرى من صغرى بروحها مع بابا
وبعشقها بجد وبحب الهدوء فيها
بس المشكله فى المواضيع اللى بيعملوها وقفل المنطقه الحره انا فعلا خايفه على البلد دى
يالا اهو انتم قضيتم يومين حلوين
وبعدين تعالا هنا كنتاكى ايه انتم مش مقاطعين عيب عليكم طيب فكرنى لما اقبلكم اعض شفشوقه هانم من مناخيرها

ahmed_k يقول...

كلماتك دي خلتني أحب البلد دي بجد
طيب لما كلمتك ليه مقلتش بس كنت جيت من القاهره أسهل ههههههه
بس ملحوقه في فترات تانيه
أنا روحت بور سعيد مره واحده بس كنت رايخ لغرض معين وهو أني أجيب قطع غيار للسياره فمحسيتش بالجمال اللي في المدينه لأني رحت على الوكاله مباشرة ملفتش ولا رحت المعديه ولا شفت القناه من أساسه
فعلا منظر طيور النورس بيسحر

رحله سعيده يا عم أحسان

تقبل خالص تحياتي

ahmed_k يقول...

آه بصحيييييييح تعليق آبي فكرني
تم قفشكم كنتاكي وكوكاكولااااا
كده كده أمال المقاطعه فيييييييين؟؟؟؟

اقصوصه يقول...

اهم شي انكم استمتعتوا بالرحله

انا للاسف ما سبق لي ان زرتها

ان شا الله في سفريتي القادمه لمصر

بعرج عليها اكيد :)

شوية قهوة يقول...

انا مرحتش ازور بور سعيد ده غير يوم واحد بالظبط
لكن رغم كدة شفت فيها حياة وناس سعيدة وجمال وفعلا فيها بركة
كل ده شفتو في يوم واحد
وفعلا انا نفسي اروح هناك تاني واتفسح واركب المعدية والباخرة الكبيرة

فاتيما يقول...

حمدلله على السلامة
و عقبال كل اجازة ما تبقى حلوة كدا إن شاء الله
و الله كلامكم آخر تمام
البلد دى مليانة سحر
و جمال مش عند حد
و لولا جبال الهموم كان المصريين عرفوا يستمتعوا بكل شب فيها
الصور جميلة و عيشتونا معاكم الرحلة كلها و شوقتونى أروحها تانى
اصلى زرتها زمااااااااااان فى التمانينات و كنا بنروحها كتير مع بابا من إسماعيلية
أصلها بلد أبويا و كمان لاتقل عنها جمالاً و بهجة و هدوء نفسى كدا متعرفوش جاييى منين
و أنا بقرى البوست إفتكرت ببابا أبو خالد الغالى و إيناس نهر الحب و نسمة اختها و داليا ÷و ده عيبة و طارق الغنام و كل اهل البلد الجميلة دى
و عرفت دلوقتى جمالهم الداخلى دا إنعكاس لأيه ...
ربنا يسعد كل أوقاتكم يا رب
و خالص حبى
و الرحلة الجاية يبقى معاكم ولى العهد
إحسان أبو العربى الثانى
إن شاء الله

غير معرف يقول...

السلام عليكم

بجد بجد شوقتوني أزور بورسعيد
هحاول أزورها قريب وأبقى أبعتلكوا صور السفن وطيور النورس الي هصورها من هناك :)

KHALED يقول...

سعيد دة يبقى الخديوى سعيد ..

زى بورفؤاد على أسم الخديوى فؤاد ..
طبعا انتا عارف بس بتختبر معلوماتنا ..
فكرتنى لما رحت بورسعيد من فترة كنت و حد من دمياط صاحبى
رحنا على محلات السمك على البحر و كلنا أشكال و ألوان من السمك و الجمبرى و السلطات و خلافة و كان الطلب وقتها بتلاتين جنية بس
عارف الأكل إللى كلناة يكفى خمسة بجد ماكناش عارفين نودى الأكل فين
خرجت من المطعم وانا حاسس إنى منور من كتر الفسفور
فعلا بورسعيد فيها بركة
أجازة سعيدة عقبال ماتتكرر
تحياتى

مهندس مصري بيحب مصر يقول...

موضوع جميل و صور أجمل و بلد أجمل و أجمل

بس ليا تعليق صغنن

حضرتك على ما لاحظت مرتاح مادياً شوية فقادر تنزل أجازة في شاليه
و إرتياحك ده هو اللي يخليك تتأمل حواليك و تشوف الجمال

لكن اللي شايلين هم لقمة العيش بتاعة بكره و عايشين تحت خط الفقر صعب يلاحظوا كل اللي حضرتك إتكلمت عليه ده

ربنا يكرمكم و يبارك لكم

mohamed يقول...

أحسان بيك
والاخت شفقه هانم
حمد لله على سلامتكم

Ahmed يقول...

إحســان بيك كعب الغزال
إحســان بيك خرج النجف
إحســان بيك بمزاجه العالي

حكاويك عن البلد ديه جميله جدااااااااا

انا شفت الجمال ده بس في مرسى مطروح

لكن اللي انت بتقوله ده يثبتلي أن الجمال في مصر موجود في أماكن تانيه

مقلتلناش, الظرف إياه مفيش أخبار عنه؟
هههه

شفـقــة و إحســــان يقول...

عاشقة الرومانسية
سيدى يا سيدى على الانتماء الاسكندرانى
عموما انا بهديلك اغنية " حبيتك فى الشتا "
بس بلاش البلدى ده لحسن الوقفة فى الافران بتهد الحيل .....خليكى فى الفينو استيل

شفـقــة و إحســــان يقول...

حنين القلب
من اولها نق كده ... وهو اللى يبقى مع شفقة يبقى ليه بخت بردوا؟؟
وبعدين حضرتك معاكى على الخط احسان بك ابو العربى مش شفقة ام العربى يا ناس ياهو ميزوا
قال وايه كنتى اتصلتى بيا وكمان جبتيلى جمبرى وسبيط يعنى يا خراب بيتك يا احسان
شكلك كده هتخليها تفضينى شحن ورصيد واخرتها هنتحر وارمى نفسى فى البحر

شفـقــة و إحســــان يقول...

appy
عيب عليكى انا بشتريها بس لكن شفشوقة هى اللى بتاكلها
يا شيخة دانا معاكى قلبا وقالبا مع المقاطعة
وكمان معاكى فى عض شفقة بس وحياتك اتوصى بالعض على اد وجبة كنتاكى العائلية " يعنى عضة كلابية " من ام واحد وعشرين حقنة انا عايزها تهوهو وتتسعر

شفـقــة و إحســــان يقول...

ahmed_k
انا مقلتلكش تعالى علشان اشفقت عليك منا
اصلنا بعيد عنك مجانين وعندنا هوبة ولو مش مصدق ابقى اسال نهر الحب وهى تقولك ولو انا انا اعتقد انها غيرت اسمها بعد ما قابلتنا هناك وهتبقى نهر العذاب والضنا
وبعدين ايه حكاية الوكالة والغرض المعين ده؟؟
انا شاكك فيك بما انك رحت البلد وماشفتش المعدية ولا النورس يبقى الغرض كان دائرى او مربع مش معين

موجة يقول...

ده كلة فى بور سعيد
ليا اكتر من تعليق بصراحة على الموضوع
اولا:
دى اول زيارة ليا فى المدونة بتاعت حضرتك وبجد عجبتنى اوى
ثانيا:
ايه كمية الار اللى انت بتؤرره على البلد دى بطلو الحقد ده بقى
البلد هتولع من كتر الحقد
ثالثا:
بجد اللى انت بتحكى فية موضوع السبع بركات دة؟؟؟؟؟؟؟؟
حقيقى؟؟؟؟؟؟؟؟
رابعا:
شكل الباخرة يجنن وشكل السما والبحر بجد تحفة
ويابختكوووووووووو
خامسا:
والنبى ماتضرب
عشان بس طولت عليك ودوشتك بالرغى بتاعى

شفـقــة و إحســــان يقول...

ahmed_k
اه صحيح لما اعرف عنوان المقاطعة هبقى اقولك هى فين .....بس شكلها كده مابتديش عنوانها لحد وبتخاف من الفضايح

شفـقــة و إحســــان يقول...

اقصوصة
من ناحية استمتعنا فاحنا استمتعنا
شفقة بخراب بيتى ودفعى للفلوس وانا بالفرحة بخيبتى وانا بيضحك عليا وراضى ومبسوط
بس صحيح انا اعرف ان اللى بيعرج ما بيخرجش من البيت ...مش يسافر ده كده هيبقى نط مش مشى

شفـقــة و إحســــان يقول...

مقتطفات من حياة فتاة
الله ايه الحلاوة دى .... سعيدة وحياة وبركةكل ده شفتيه فى يوم واحد امال انا قعدت تلاتة ايام ما شفتش غير شفقة ليه
بقولك ايه ...عرفينى عليهم وانا اوعدك انى اركبك المعدية والباخرة الكبيرة وكمان ليكى اكلة جمبرى فوق البيعة

شفـقــة و إحســــان يقول...

فاتيما
ممكن تقوليلى جبال الهموم دى فين ؟؟ اصلى انا معرفش اى جبال على الخريطة غير جبال سانت كاترين بس شكلك كده جغرافية قديمة
اما بخصوص ايناس ونسمة وبقية الناس الجميلة دى فبالله عليكى توصيهم علينا لحسن زمانهم قطعوا علاقتهم بينا لاننا قضينا على جمالهم الداخلى والخارجى وخاصة جمالهم الرجلينى اللى دوبناه من المشى
لدرجة انى حاسس انهم دلوقتى بيخرجوا بكرسى متحرك

شفـقــة و إحســــان يقول...

عمرو فهمى
انا قلت كده اول ما قريت اسمك مش حضرتك عمرو فهمى المخرج؟؟
لكن ايه حكاية الصور اللى هتبعتهلنا دى ... هو انت ناوى تغير النشاط و تشتغل مصور ومراسل لينا فى بورسعيد

شفـقــة و إحســــان يقول...

Khaled
لا بجد بجد الفسفور هيشع منك والجمبرى والسمك عمل معاك شغل وذكاء جامد جدا لانك الوحيد اللى جاوب على الاسئلة بركاتك يا بورسعيد
عموما انت كسبت معانا فى "من سيربح البربون" وياريت تيجى تستلم الجايزة كيلو سمك بربونى وسبيط وبالسلاطات

شفـقــة و إحســــان يقول...

مهندس مصرى
يا راجل انا اول ما قريت تعليقك حسيت انى عمارة بحالها وقعت على نفوخى
يعنى هو يا باشمهندس مابيسافرش الا المرتاحين ماديا ؟؟
طيب واللى بيبقوا محتاجين انهم يكونوا مرتاحين نفسيا يعملوا ايه؟؟
مش لازم ياخدوا هدنة ويغيروا هوا وانا بعيد عنك كنت محتاج الراحة دى بعيدة عن الهوا اللى هنا لكن للاسف معتقنيش وكبس على نفسى وجه معايا
كمان بخصوص اللى شايلين هم لقمة العيش فاحنا بردوا منهم ومش شايلين هم لقمة واحدة لا انا عن نفسى شايل هم الفرن بحاله رغيف رغيف
ولعلمك انا صحيح تاملت لكن زى كل الناس اللى فوق الخط واللى تحته
ماشفتش الا جمال واحد ربنا يجعله مبارك ... اظنك عارفه

شفـقــة و إحســــان يقول...

mohamed
الله يسلمك يا عم محمد بس مالك بتعاملنا رسمى كده ليه على فكرة احنا سافرنا بلد الخديوايه لكن مش من عيلتهم

شفـقــة و إحســــان يقول...

احمد ابو العلا
احسان خرج النجف وكعب الغزال ؟؟ هو محدش قالك ان الكعب قشف وشقق وبيحطوله كريمات دلوقتى
وكمان بتسال على الظرف يا ساتر....عموما لما يوصل هبعتهولك وانت حظك يمكن يطلع من الضرايب

شفـقــة و إحســــان يقول...

موجة
اولا : متشكرين على الاعجاب جدا جدا والله اخجلتيم تواضعنا
ثانيا: مش مهم احنا نقر ونولع فى البلد وبموجة منك تطفىء كل اللى ولع
ثالثا: لو مش مصدقة راجعى البوست السطور اللى قبل الصور مع الاستعانة بالصور كدليل للاثبات
رابعا : حلو النق ده وزمان الباخرة اتقلبت واصبحت فى خبر كان والسما اتمليت شبورة والبحر هاج وماج
خامسا: ولا يهمك ارغى ارغى وابقى قابلينا وشوفى مين هيديكى ودانه
واه منك بس لو مكنتيش تحلفى طااااااااااااااااخ طيييييييييييييييييييخ

Unknown يقول...

حمد الله عالسلامة يا شوبااااااااااااب نورتى بورسعيد شفشوقة هانم نورت بورسعيد احسان بيه.........وضلمتوها لما مشيتوا

شفـقــة و إحســــان يقول...

enjy
تعرفى يا انجى للوهلة الاولى قريت التعليق حمدالله على السلامة يا شرابات قلت ايه ده احنا ريحتنا فحفحت للدرجة دى
بعدين لقيتها يا شوباب قلت كده ماشى
وبعدين ايه حكاية نورتوها وضلمتوها هو حد قاللك اننا كابل كهرباء

مهندس مصري بيحب مصر يقول...

يا أستاذي
مش لدرجة عمارة
سلامة نافوخك ألف سلامة
حضرتك إنسان كويس و أنا مش بأسمع عنكم من المدونين غير كل خير
و أنا مش بأقر مثلاً و لا بأتهمك بالإنفصال عن هموم الغلابة

بس كنت بأرد على آخر فقرة في البوست

الناس في مصر حالياً بقت بتكلم نفسها و حضرتك عارف من اللي هما بيشوفوه كل يوم

فصعب يركزوا مع الجمال اللي حضرتك وصفته و صورته
أرجو إنك ما تزعلش مني و انا ما كانش قصدي أي حاجة وحشة

بس خلاص ... يقول...

اولا كل عام وانت وشفشوقه وكل البورسعديه بخير بمناسبة المولد النبوى الكريم
بور سعيد معروف عنها انها المدينة الباسلة وفعلا هى مدينه جميله جدا جدا انا شخصيا باعشقها وكمان انا خالى يعيش بها ويعشقها جدا وهذه هى سمة اهل هذه المدينه يعشقونها ويرونها سيدة البلدان

شمس النهار يقول...

فعلا بور سعيد بلد جميل ولها حظ ونصيب كبير من اسمها (سعيد )فاهي فعلا البلد السعيد حقا
حتي الناس هناك لطيفه وبيعرفوا يتعاملوا مع الضيوف
بجد انا بنبسط برضه لما بروح هناك
حمد الله علا السلااااامه بالبور سعيدي

شفـقــة و إحســــان يقول...

مهندس مصرى
يا راجل انا مزعلتش منك ولا حاجة ربنا ما يجيب زعل ابدا بس ابقى هندس فى الكلام يا باشمهندس

شفـقــة و إحســــان يقول...

مهندس مصرى
يا راجل انا مزعلتش منك ولا حاجة ربنا ما يجيب زعل ابدا بس ابقى هندس فى الكلام يا باشمهندس

شفـقــة و إحســــان يقول...

بس خلاص
هو فعلا بس خلاص... ايه الكلام المجعلص ده لا لا لا الكلام ده كبير علينا اوى سيدة البلدان والكلام الفظيع ده
لكن بينى وبينك كده انا اول مرة اعرف ان بورسعيد بلد البسلة اصلى ماكلتش هناك الا كنتاكى اما الباسلة دى فمدوقتهاش وحياتك

شفـقــة و إحســــان يقول...

شمس النهار
يا بختها بلد ليها حظ ونصيب امال الواحد نصيبه مايل ليه؟؟
لا لو كده بقى يبقى من بكرة انا مهاجر على بورسعيد بس لوحدى يمكن نصيبى يتعدل هناك
وسلاموزى بالبمبوطى

مـجـنـووون يقول...

بور سعيه فيها بكرة وسعيدة
علشان انتي نورتيها شفقة هانم


يا رب ديما سعيدة انتي واحسان باشا

تقلي مروري
مجنووون

مسدس صغير يقول...

ايه الروعة دى
انا بتكلم عن البراكات
بركاتك يا شيخ احسان
ههههههههه
شفشوقة كانت مستعجلة اوى وانت واقف مع المزة واما شافت الحكاية فيها فلوس قالت ان كان كده ماشى؟؟
جنس النساء فعلا ضعيف أدام الفلوس.
ههههههههه
ربنا يكرمكو ويسعدكو دايما

مواطن مصرى نايم يقول...

ههههههههههههههههههههههه
بص كده مسكت عليك حاجة
كان معكم من بورسعيد
مراسلكم/ إحســان أبو العربي

يعنى مفيش ولا كلمة فالبوست صدق
هو ده ابو العربى
هههههههههههههههههههه

بس مش حكدب عليك يا كبير
انا رحت بورسعيد مرة واحده
كرهت اليوم اللى خرجت فيه من اسكندرية
حتى يومها اتوبيس الرحلة كان حيقع فترعة فالسكة و ربنا ستر

والدتى و والدتى عاشوا فيها فترة كبيره
بس لو انا كنت معاهم ايامهما او كنت بفهم بمعنى اصح
كنت يا سبتهم و جيت اسكندرية يا انتحرت

مش تعصب انى اسكندرانى
و مع الاعتذار للبورسعيدية
اسكندرية دى ملكة جمال المحافطات
بما انكم فالقاهرة فمن الطبيعى ان بورسعيد تعجبكم

اهم حاجة الموظفة
(كانت بتجيب رجلك بحركة الفلوس دى)
اوعى شفقه تكون سمعانى
هههههههههههههههههههههههه

اما البركة فأسكندرية
فأحب اقولك عليها
البركة فيك

وين البركة يا اماى البركة خدها الوبا
قتلت البركة يا خال

تحياتى

دعاء الكروان
(اسلام سابقا)

Unknown يقول...

ازيكم يا شباب
عاملين اية انا لسة عندى برد
حمد لله على سلامتكم استعدوا للقدروم تانى بقى عشان يوم بورسعيد

احسان على فكرة لسة مختديش لقب ابو العربى لان ابو العربى بطل يشرب كوكاكولا
وانت مش بس بتشرب لا كمان بتجاهر بالشرب
وحاطط الصورة فى المدونة

الحقى جوزك يا شفقة ههههههههه
يارب تكونوا بخير ونورتوا
واسفة والله على انى كنت مقصرة معاكم بس فعلا انا كنت فاقدة الوعى

سلامى للاخل الفاضل سمبا

Unknown يقول...

خلاص بلاش زعل
انت ابو العربى
وشفقة هانم ام العربى
وسمبا هو 000000 العربى برضة

شفـقــة و إحســــان يقول...

مجنون
بقى ياراجل بتقول لشفقة نورتيها وهى فيها بكرة وسعيدة؟؟
امال دول يعملوا ايه لما هى تنورها لا بجد معندكش حق
وبكده انا مش هتقبل مرورك وهاخدك مخالفة علشان كسرت الاشارة

شفـقــة و إحســــان يقول...

مسدس صغير
وانا بردوا لو كنت بتاع بركاتك كنتى زمانى مكمل مع شفشوقة ده كلام يا ابنى ده انا كان زمانى سلطت عليها شمهورش وريحنى منها
اما بخصوص المزة فاحب ابلغك بانى شفقة طيرتها بس على مين ده انا بعد كده هطير على هناك لوحدى بس ربنا يستر وشفقة متقصقصش ريشى
وعمال تقول الجنس اللتيف وجنس النساء هو فين ده ؟؟
انا من ساعة ما شوفت التعليق وانا هتجنن عمال ادور عليه

شفـقــة و إحســــان يقول...

مواطن نايم ويبيبخ
بقى كده يا عم اسلام عموما انا حاططلك الصور دليل لصحة كلامى ... ومش عاجبك ابو العربى امال لو كنت قلت ابو الاجنبى ولا الهندى كنت مسكت عليا ايه الفيل
كمان احب اقولك بخصوص الاتوبيس فظاهر ان المشكلة مش فى بورسعيد لا ده فى الكائن اللى كان راكب الاتوبيس لبورسعيد
وكل لبيب بالاشارة يفهم
اما الموظفة فوالواحد مالاحقش يتهنا برجله قصدى بيها لانها يا دوبك جابتها من هنا وشفقة كسرتها من هنا ومن ساعتها وانا على عكازين
والبركة فيهم بسند عليهم

شفـقــة و إحســــان يقول...

نهر الحب
الحمد لله انك لسه عايشة وكمان بتكلمينا
يا ترى ايه اخبار رجليكى انتى والعزيزة نسمة؟؟
وياريت انتم اللى متزعلوش مش انتم اللى كنتم مقصرين ده احنا اللى كنا مطولين
اما عن الاخ الفاضل سمبا
فهو بيرسلك سلامه وهوهوته الحارة جدا

أمل حمدي يقول...

سا سلام على الحب ماشاء الله

دي بورسعيد اللي احلوت بوجودكم وتباركت بيكم

ويارب تتكرر الزيارة وأشوفكم المرة الجاية ان شاء الله

دمتم بكل الخير

شفـقــة و إحســــان يقول...

ماما امولة
ايه الكلام الحلو ده
لعلمك شفقة هناك كانت عملالى فيها شادية فى اغنية يا سلام على حبى وحبك وبينى وبينك انا تقمصت دور فريد الاطرش وقعدت اديها على نفوخها
بجد البلد كانت منورة باهلها وبيكى
ان شاء الله يسعدنا الحظ ونشوفك المرة اللى جاية

Amr Abodraiaa يقول...

الصراحة تغطية أكثر من رائعة

أنا كنت زرت بور سعيد قبل كدة مرة وهي فعلا جميلة

وأما التحية الأكبر مش لبورسعيد إنما ليكو إنتم إنكم قدرتم في وسط الحياة اللي إحنا فيها قدرتم تاخدو أجازة وكمان 3 أيام . علي فكرة دة مش حسد .

تحياتي .....

Shimaa Esmail يقول...

الأساتذة الأفاضل أصحاب مدونة/ شفقة وإحسان.
" تحية طيبة" وبعد..
اعتذر عن الخروج من موضوع التدوينة، ولكنني ليس لدي أي وسيلة لمراسلتكم فلم تشر لبريدكم الإلكتروني عبر المدونة،أرجو من سيادتك مراسلتي عبر بريدي الإلكتروني shimoo_771@yahoo.com توضح فيها بريدك الإلكتروني واسم المدونة حتى يمكنني مراسلتك ذلك لأنه وقع الاختيار على مدونتكم كأحد مفردات العينة المختارة من مجتمع المدونات المصرية والتي أسعى لجمع بيانات ومعلومات عنها واللازمة لرسالتي المسجلة بقسم المكتبات والمعلومات والوثائق، كلية الآداب، جامعة القاهرة تحت عنوان "المدونات المصرية على الشبكة العنكبوتية العالمية مصدراُ للمعلومات: دراسة تحليلية " من إعدادي "شيماء إسماعيل عباس" وتحت إشراف الأستاذة الدكتورة "يسرية عبد الحليم زايد" أستاذ المكتبات والمعلومات بالقسم.
أرجو الاهتمام والرد سريعا ومراسلتي لمعرفة مدي موافقتك أم لا على الإجابة عن استمارة استقصاء البيانات – استبيان- عن المدونات المصرية.
تحياتي وتقديري.
شيماء إسماعيل
باحثة بالماجستير- كلية الآداب جامعة القاهرة.

رئـــــيسـة حزب الأحلام يقول...

الله ايه الجمال دة
بجد الواحد اتشوق انه يروحها
يارب دايما فى رحلات سعيدة
تحياتى لك وللمدام

همس الاحباب يقول...

كده خيااااانة
بور سعيد لو حديكم
هههههههه
ربنا يسعدكم دايما
بورسعيد تجنن بصراحة
انا مش ممكن انسى اخر لقاء هناك
كان تحفة بجد
هى بلد جميلة جدا وناسها زى الفل وطيبين
وبرده شفقة هانم معاك
مفيش فايدة برده مش عايز تتعلم
هههههههههه
تحياتى اخى العزيز

MǿиY El-Shreef يقول...

بورسعيد .............

احم .. خليني اقووول اني عمري مارحتهاا بس للاسف هي واختها اسماعيليه .. مش بحبهم ابداااا بحس وعارفه ان احساسي غلط انهم منحصرين ف استاد اسماعيليه وبورسعيد وبما اني اهلاويه محضه فحضه :D ( ماعرفش فحضه دي يعني ايه ولا محضه بردوا) ههههه ايوة اكمل بما اني اهلاويه ف في عداء من زماااان بينا وبين بورسعيد واسماعيليه وللاسف مسيطر ع العلاقات يعني فلو مشيت ف اسماعيليه وانا لابسه احمر ممكن يعدموني على خازوق فانا عشان كده مش بحب بور سعيد ولا اسماعيليه ولا هفكر ازورهم الحمدلله :D

المهم الحمدلله ع انكم رجعتوا سالمين :D

مدونه عسل وانا متابعاها :D

mohra يقول...

يا سلام يا سلام على الرحلات السعيده الرومانسيه
فعلا بورسعيد بلد جميله جدا جدا بس اهلها خلقهم ضيق شويه ..شويتين
حمد الله على السلامه
الصور تحفه

صدى الصمت - عاشقة الورد - يقول...

والله بجد يا بختكم بالرحلة الرائعة دى
على فكرة السويس كمان بنفس الوصف وشاطىء قناة السويس شكلة يجنن والناس بتعوم والفرق بيبنها وبين السفن مترين بس
حمدالله على سلامتكم
على فكرة أنا عينى مش وحشة ومش بأحسد
تحياتى

عاشقة الورد

Asmaa mahaba يقول...

احسان
هههههههه حلوه احسان ابو العربى دى
فعلا رحله جميله ما شاء الله بس انت كدا مقيت فيها وقريت يعنى اخدتوا عين حلوه
عارف انا لو مطرح شفقه مش حتكلم لا حتلاقى صوابعينى الاتنين راشقين فى عينك وابصلك ببراءه واقولك سورى اصلى كنت بطير الدبانه

Asmaa mahaba يقول...

شفقه
تعالى هنا انتى ازاى تسكتيله على انه يقول على واحده حلوه قوى رجاله اخر زمن انتى وطيتى راسنا يا شفقه
لازم تتخذى موقف فى السريع والا حنطبق عليكى قانون العقوبت بتاع ام ريكا
على فكره انا نزلتلك البوست اللى كنتى طالباه:)) كنت بحضر فيه وكنت حنزله شكل قلبك كان حاسس انى حكتب سخريه تانى

أبو العريف يقول...

الللللوووووووووووووووووو
اليد احسان ابو العربي وصل
ايه الجمال ده
شوقتنا
والله انا نفسي اروح البلد دي
بس خايف انضرب
اصلي ولامؤاخذه اهلاوي

mahasen saber يقول...

الله البلد تحفه فعلا بورسعيد رائعه فعلا وفعلا زى ما كتبت اليىى يروحها اكيد يبقى اسعد فعلا

كل اجازه وانتوا بالف خير

وربنا يديم عليكوا السعاده دايما يا احسان بيه وشفقه هانم

بجد ربنا يسعدكوا دايما ويباركلكوا فى بعض
اللهم امين

mahasen saber يقول...

الله البلد تحفه فعلا بورسعيد رائعه فعلا وفعلا زى ما كتبت اليىى يروحها اكيد يبقى اسعد فعلا

كل اجازه وانتوا بالف خير

وربنا يديم عليكوا السعاده دايما يا احسان بيه وشفقه هانم

بجد ربنا يسعدكوا دايما ويباركلكوا فى بعض
اللهم امين

Unknown يقول...

مش عارف
انا مجاش فى بالى نهائى حكاية انها تطلع فى الاخر بور سعيد
انا كنت فاكرها حاجة تانية
بس ممكن ليه لا
اصل اللى اعرفه ان البلد دى الخير فيها فعلاً حلو
ههههههههههههههه اصلها قريبة منى مخدتش انتا بالك
المدونة اضافت عندى علشان نقدر نتواصل
دمت بكل ود

فشكووول يقول...

ايه الجمال ده يا احسان بك
بلد كلها فعلا بركه
مش زى المطاعم اللى فى وجه بحرى اللى بيعوصوا يا دوب السندوتش بالغموس
ولا تلاقى سندوتش ولا غموس
وتدفع فلوس علىالفاضى
ربنا يبارك فى بور سعيد
شفقه هانم بتخطف الفلوس منك
آدى حالناكلنا وعندى الحاجه ام اسامه اصلا ما بتسيبش فلوس معايا
والفلوس فى ايديها زى الحمام بيطير على طول
دا قدرنا نعمل ايه بقى؟
تحياتى لك ولشفقه هانم

بنت مصريه يقول...

الله يا احسان بوست جميل قوى
والصور اجمل والبلد كمان
مرسى يا احسان على خمسه سياحه دى ههههههه
اتمنى تنورنى

شمس النهار يقول...

كل سنه وانت طيبه
وكل سنه وكل ام سعيده ومتهنيه

r يقول...

انا رحت بورسعيد السنه اللى فاتت واللى قبلها فى رحلتين متتالييتن مع اصحابى تبع منظمات الشباب
الشاليهات فيها او حتى الشقق جميله فعلا بجانب الاسعار الممتازه بالرغم انى ما دفعتش مليم

منطقه المناخ من انضف المناطق فعلا
وهى اللى نزلنا فيها السنتين

بورسعيد بجانب بور فؤاد وشوارعها الجميله كفايه التمشيه فى طرح البحر

انت الصراحه فكرتنى بايام حلوه بجد
قضتها فى بورسعيد وشفت فيها القناه
الصور ممتازه على فكره

ابقى سلملى على شفيقه اللى ما قرتلهااى حاجه لغايه دلوقتى

Beram ElMasry يقول...

السلام عليكم ورحمة الله وبركاته
عزيزتى الغالية ،انت ام اليوم او غدا ، فكل عام وانت بخير فى عيد الام ، وان كنت تتمنين لطفلك ان يحيا امنا فلقنيه ان الاسرائيلى شر كله ، فلا يامنه برهة ، ولا يسالمه مدى الحياة

يهودى يعنى حنش احسن دوا تقطعوا راسه
كلام نقوله لنسلنا نطبعوا فى كتابه وكراسه
لك تحياتى والسلام عليكم ، ولا سلام مع اليهود
بيرم المصرى

""""" يقول...

اشششششششششطه
انا جيت فى وقتى والله
متتصورش انا فرحانه اد ايه وانا بقرا الموضوع الجمييييييل ده
حاكم انا بورسعيديه بقى
بس اوعى يكون نظام أر ؟؟؟؟
هههههههههههههههه
بجد الموضوع عجبنى مش بس عشانه من بورسعيد
طريقة حضرتك فى سرد الحكايه جميل جدا

aidy يقول...

بجد مدونة رائعة انا فعلا مبطلتش ضحك من اول ما فتحتها

وموضوع بورسعيد حلو جدا

فعلا الناس مبقوش يشوفوا الجمال من حواليهم جايز لأن عنيهم مبقتش تاخد بالها غير من البيوت المهدودة ومنظر الزبالة على اول الشارع

بس افتكر انهم بكده بيحرموا نفسهم من نعمة حواليهم

تحياتى .,,

ســـهــــر يقول...

اية الجمال دة
اصلا بورسعيد دى بلد تحفة
واضح من الصورة والله اعلم انكم كنتم نازلين فى الكروان مش كدة ؟
والله نورتوا بورسعيد يا جماعه
وكنتوا تقولوا عشان الواحد يوجب معاكم زعلانين منكم بقا :)

الجواز و سنينه يقول...

و الله يا احسان بيك انت جيت على الجرح
اصل معروض علينا اننا ناخد اسبوع اجازه هناك
بس انا بقول اسبوع كتير عليها
و ده كمان علشان انا بعشق اسكندريه
و يا انا يا خالتى
قصدى يا دى يا دى
و انا دلوقت فى حيره من امرى
بس سؤال كده لو فيه غلاسه
ال ايام دول كانوا بأد ايه
يمكن يبقى انا و خالتى
و ابقى ضربت عشر عصافير و شطبت على الباشمهندس
ههههههههههههههه
ضحكه شريره

mostafa rayan يقول...

صديقي العزيز احسان بك
اتفق معك في رأيك بلدنا جميلة بس احنا اللي مششايفينجمالها
يمكن من كتر الغلب ( بضم الغين ) اللي بقينا عايشين فيه
تحياتي لك ودمت بخير

ريهام العربي يقول...
أزال المؤلف هذا التعليق.
ريهام العربي يقول...

معلش مسحت التعليق لان كان فيه كلام متشبك في بعضه معرفش ليه

واهه بعد التعديل
هههههههههههههه طيب مفيش مشاااء الله تباارك الله ؟؟؟ اخاف انزل من السعوديه الاقي الاسعار غليت والبلد ازدحمت سعتها هاجي اعيط ليكو هنا كل يوم ههههههههههه


رغم اني ليا الفخر الشديد اني بورسعيديه ومن زمان بفخر بالموضوع ده و رغم ان في ناس كتير بيتريقو علي لكنه اهلها واللي انا نفسي بسبهل لما اسمعها هههههههههه لكن هي فعلا بلد تحفه

بس حضرتك مكلتش طعميه من العيوطي ؟؟؟ ده هناك علي طرح البحر والسندوتش المتعمر المكلبظ بجنيه

ولا مطعم باتروس البتزا هناك خطيره طبعا بيعمل اكل تاني بس انا مش اكلت غير البيتزا والهوا يسطل رغم انو مش علي البحر

ده حتي كنتاكي في وشه واظنه بيعمل اكل تاني غير البيتزا علي اعتبار انو مطعم افكيد كان عندو ماكولات بحريه واكيد الطعم مختلفففففففف لانو من ايدين سواحليه :D

طيب

مركبتوش الحنطور يفسحكو فيها ؟؟؟

مرحتوش حي العرب ؤجينا والتلاتيني ؟؟ الكورنيش ؟؟

مجربتوش المكسرات من عند محمصه الجمل اللي في بورفواد؟؟ رخيصه علي فكره

شربتو قصب مع الاسف مش فاكره اسم المحل بس عارفه مكانه ومن رايي هو الوحيد اللي مش بيضيف ميه وسكر للعصير في بورسعيد

الا بقي لو ذمتو سوست <_<

ههههههههههه

امال عملتو ايـــــــــــــه مش عاوزه احسركو بس كان نفسي اعرف تفاصيل اكتر عن اللي عملتوه احنا الستات بنهتم بالتفاصيل الدقيقه اما الرجال بيحبو الخلاص والاجمال
هههههههههه

بس بجد البلد رغم صغرها غير ان فيها كتير مش قوي يعني بس فيها ومش في 3 ايام تتلف لان منظر كل مكان فيها بليل غير بالنهار

بلدي بقي معلش القرد غزال في عين امه
غزال

انشااء الله تبقو تزوروها تاني واكون هناك وافسحكو الفسحه التمام

انا عن نفسي مكاني المفضل هو حي العرب لان بيت العيله هناك و بدايات طفولتي فيه


اما بقي بالنسبه للتصوير والناس كانو بيبصولك بستغراب ده لانهم اتعودو يشوفو المنظر كل ما يشتاقو ليه
صيف شتا ليل نهار مش فارقهالناس لحد الفجر قاعدين وعملو كمان كفتريات علي الشط بتلفزيونات كبيره وكراسي وقعدات و كل يوم فيلم يعني السهره صباحي معرفش شفتوه ولا لا

ولما بيحبو يصورو المنظر بينادو المصوراتي يصورهم مع المنظر.... يعني ذكري للمواقف واليوم




معلش طــــــــــــــــــولت في الكومنت انا كده مع الاسف مبعرفش اختصر وكمان البوست عن بلدي وزعلت انكو مش زرتو كل حته

و حبيت اوعيكو عشان المره الجايه تفصفصوها

واوعي شفقه كمان علي محلات البيع الرخيصه اللي هي حي العرب والتلاتيني واؤجينا :D احفظيهم ان شااء الله الرحله الجايه تفوتي عليهم بس ابقي عمري البوكت مني هههههههههه


تحياتي ليكو

Ophelia - cfd يقول...

^_^

مكنتش أعرف إن بورسعيد حلوه كدا

نفسى أروحها بعد ما قرأت البوست دا

الملاك الحزين يقول...

السلام عليكم
والله بجد يا بختكم بالرحلة الرائعة دى
حمدالله على سلامتكم
ويارب يسعدكم دائما

رحلتنا في الحياة يقول...

والله اشتقت ازورها واشوف البركة اللى فيها بجد

واحد من الناس يقول...

مكنت فاكر إن لسه فيه بلد في مصر فيها بركه كده

كويس والله إنك طمنتنا ربنا يطمنك

وبيتهيألي بلدنا حلوه أوي ، ده إحنا بناكل ونشرب ونقبض مرتباتنا من حلاوتها دي ، بس زي ما تقول كده الناس مش فاضيه وفي نفس ذات الوقت مش لاقيه عشان تشوف الحلاوه دي

بوست جميل

سلام

شاب كــ طخين ـــــا يقول...

والبركة العاشرة
فى الطــــــــــــــوب

ده انا واخد طوبة ملهاش حل من سنتين
فى ماتش الأهلى والمصرى
راجع من بورسعيد دمى سايح :D:D:

بس الصراحه القطن والشاش عندهم كبير بردو والقطن مش عادى ده طويل التيلة

______________

شكرا على الرحلة اللمتعة دى
وان شاء الله ازورها بس مش فى باص المشجعين اصل مش عارف بينضرب با الطوب ليه ..حدش يعرف :D:D:

اهو ده عيبه يقول...

ايه ده كله ياعم احسان انت بتار ولا بتحسد
احلى حاجه ان البلد عاجباك ومرتاح فيها وده اهم شئ
جايز علشان احنا اتعودنا مبقيناش ناخد بالنا من كل ده
بس صدقنى مع اول يوم بنقضيه برا بورسعيد بنبقى عايزين نروح باى شكل وهاين علينا اول ما نوصل نوطى نبوس الاسفلت
ان شاء الله تنوروها تانى قريب

واثقة بربها يقول...

ياااااااااااه كل كل فى مدينتى الجميلة
بورسعيد بلد صحيح هادئة و جميلة
و كلامكم عليها خلانى سعيدة
يمكن عشان احنا عايشين فيها اتعودنا عليها بجمالها
(( يا بلدى يا بلدى يا بورسعيد يا بلدى ))

بس كفاية كده قر عليها لحسن البركات بتاعتها تروح :)