الاثنين، 20 أبريل 2009

عــــــــــــرســــــــان اخـــــــــــر زمــــــــــــــــن

انا طبعا مش هقولكم انتم وحشتونى اد ايه لا بجد واحشة وحشة اوى

بصوا بقى بناء على طلب الجماهير العريضة

والطويلة والقصيرة والرفيعة

النهاردة هقولكم على الخطوات اللى لازم العريس

يتبعها وهو رايح يخطب بعد الشر عنكم

يعنى

طبعا زى ما كلنا عارفين الشاب منكم اد ايه ما بيحبش يقدم على الخطوة دى

اللى بتجيبله قشعريرة فى جسمه

وسكر وضغط وفقر دم وفقر جيوب

لكن فى ناس بتبقى مضطرة تعمل الخطوة دى

واللى يحصل يحصل

وده بيبقى نتيجة لسبب واحد

وهو انه يلاقى والدته طول النهار قاعدة نايمة رايحة جاية

عمالة تعيط وتنهنه وترزعه كلمتين فى العضم من اللى يجيبوا هشاشة عظام

وتقوله" نفسى افرح بيك قبل ما اموت يا ابنى

" نفسى اشوف عيالك بيجروا حواليا واشيلهم على كتفى

" او انها تكون محتاجة واحدة تشيل وتحط وتنضف وتطبخ ببلاش

وتقوله" نفسى تجيبلى عروسة بنت حلال وتشيل عنى بقى

وتريحنى من قرفك

" فى الحالة دى بس بيضطر الابن يتنازل عن حريته

ويضحى علشان الام تعيش

وبينتحر وامره الى الله

ويقول لامه من غير نفس

شوفلنا واحدة تعيش

وابقى اعملى فيها اللى انتى عايزاه

وربنا يقدرنا على فعل الخير

النهاردة بقى اليوم اللى هتروح فيه مع ماما علشان تتخطب

اقصد تخطب

حاول تعتمد على نفسك وتطلع هدومك بنفسك وتوفق الالوان مع بعض

من غير كل شوية ما تنادى على ماما وتعلها اكتر ما هى معلولة منك

وحاول انك تبعد عن لبس البدل والقمصان والكرفتات

والبس الهدوم النيو لوك اللى بنات اليومين دول بتتهوس بيها

يعنى مثلا شورت وفانلة مقطعة

او فانلة عليها رسومات ميكى ماوس وقطط وكلاب

يعنى ده دليل على انك شخصية ليفة

" اقصد اليفة" وابعد خالص مالص

عن الشرابات والجزم الحاجات دى

بقت موضة بريحة

بتطلع روايح مش مستحبة

حاول تلبس صندل بتاع الناس اللى بيبيعوا عرقسوس

او سليبر وده اسم الدلع

واياك وان تحذير هام انتبه

" السليبر يرجع الى الخلف" يا سلام لو كان بينور تبقى ايه

منتهى الشياكة

وكده هتبقى راجل شيك بس من غير رصيد

كمان ما ننساش الشعر يضرب فى الخلاط

شوية جلة على حبة صابون غسيل

على كيسين كلور الوان وشوف النتيجة

هتلاقيه زلبطة ناصعة البياض

ايون الزلبطة اليومين دول موضة الشعر موضة قديمة واللى عنده شعر

يا ياخده موس زيرو

يا يحط شوية جاز على حبة اوكسجين ويولع

خلصنا من الشعر وبقينا تمام نلبس حظاظة

ولو معندناش نجيب حتة قماش من بتوع المطبخ

ناخد منها حتة ونربطها على ايدينا تبقى حظاظة

نحط بقى كولونيا خمس خمسات

وكده نبقى بقينا عال العال

وتخرج تاخد ست الحبايب انججيه

وعلى بيت العروسة عدل


اول ما تلاقى ابو العروسة تسلم

وكلك ثقة واستعمل الفاظ اليومين دول

اللى بتخلى البنات تقول ان الشاب ده ....استايل وابن ناس

يعنى" هالو اونكل" ...."هالو تنت"

"هاو... ار ... يوووووه عليكم وعلى ريحتكم"

كده يعنى وبلاش سلام المعلم طربقها

وشغل الجزراين ده

ساء الخير يا مودام

ساء الخير يا عمى

" دستور يا اهل الدار"

لحسن يتصدموا ويفتكروا انك عليك عفريت ولا حاجة

ادخل برجلك الشمال

لان اليمين بطلت وبقت" اولد فاشون "

الشمال بتاعة السليبر... اما اليمين بتاعة البولغ والبنص

اول ما تقعد تحاول تقعد قعدة جديدة بلاش ام رجل على رجل

دى لحسن العروسة تقول عليك من ايام عبد الوهاب

والابيض واسود

غير.... احنا بقينا فى عصر ال" L C D" ابو سبعة وتلاتين بوصة

تجنب الوشوشة كل شوية مع الست مامتك

علشان ما يقولوش ابن امه

وبلاش فى كل حاجة يقولها ابو العروسة

تبص لمامتك وتغمزلها

اتكلم انت وخليك جرىء

حتى لو مامتك معجبهاش الكلام

براحتك ...وابقى اترزع فى البيت

عادى دى ماما

المهم يبان ان عندك شخصية ....معملية مستفزة اقصد "فزة"

واول ما تلاقى العروسة خارجة بصينية المشروبات

بلاش تبحلقلها وبص فى

الارض عارفين انك بجح

وعينك يدب فيها 60000 رصاصة

بس معلش تعالى على نفسك

ولم عينك وبحلق فى السقف

واعمل خجول بدل ما العروسة .....تتلخم وتوقع الصينية عليك

وتبوظلك الطقم او يقوم ابوها يلكملك

كمان مش عايزين طفاسة

ولا عايزين طقم الاسنان يبان خالص

يعنى هما شفطتين عصير وبس

ولو كان فيه جاتوه او اى حاجة حلوة

سيب الطبق مكانه واكبح مشاعرك الطفسية والمطبخية دلوقت

وبلاش تمسح الاطباق مسح

علشان ميقولوش عليك مفجوع ومشفتش الحاجات دى فى بيتكم

لازم تبين ان عينك مليانة

اول ما ابو العروسة يبت

دى كلامه بنيجى للمهم

تعرف علطول انه هيبتدى الامتحان

ولازم تركز وتجاوب بتقدير جيد مع مرتبة وملل الشرف

ومش اى مرتبة مرتبة اسفنج مش تنجيد

الشبكة..... اول ما تسمع الكلمة دى

ما تفتكرش شبكة الصيد

لا هو يقصد شبكة للقرش اللى هيجوزهالك

يعنى الدبل والمحبس والحنفية اللى هتفضل تنقط وتخر على نفوخك

ومش هتلاقى جلدة تسد بقها بيها

ابعد عن الاجابة بتاعة

انا تحت امركم

لحسن ساعتها هتسمع انواع من المعادن غريبة

وعمرها ما مرت على ودنك

زى الالماظ .......والسولتير

ساعتها

ما توافقش وافتكر زمان ايام الشبكة اللى كانت طقم حلل نحاس

وقلهم مفيش داعى للمصاريف

الشبكة دى هدية من العريس للعروسة بقيمتها

وطبعا انت عارف قيمتها

عندك اد ايه

وكل واحد وتقديره

نيجى للشقة تسمع ابراج ....فيلل ....شقة بجنينه

اعمل فيها عبيط وطنش

وقلهم عندى شقة بمنافعها..... اوضتين...... وصالة..... وعفشة ميه

يعنى هما هينهبوا

اهو على الاقل انت هتبقى طورت" نظرية" عش العصفورة

العربية..... اول ما يسالوك على العربية

قلهم ناوى ادخل جمعية بنفرين واقبض الاخر

واشترى واحدة بالقسط 27 او سيات

ولو مش عاجبهم

يبقوا يركبوها تاكسى على حسابهم

واتحجج ان البلد بقت زحمة ومفيش اكتر من المواصلات والعربيات الكارو

الفرح هنعمله فين ؟؟

قلهم السطوح عندنا كبير ويساع بدل من الواحد الف

حاسسهم انهم هيعملوا فرح بنتهم فى "الاستاد"

ولو ام العروسة اتحشرت وقالتلك.... بنتى لازم يتعملها فرح

فى دار ....او فندق .....او نادى ولا كانها الاميرة دايانا

قلها بس طلبك عندى

" مركز الشباب اللى جنب بيتكم " وكام لمبة على كام كرسى بقى فرح

ولو اتكلمت قلها ان المنظرة ملهاش داعى

واول ما تلاقى ابو العروسة بيرفع ايده وبيقول سمعونا زغروطة

تعرف انك عريس لقطة


وقعتلهم من السماء وساعتها بص للعروسة واعمل فيها توم كروز

توم........ مش بصل كروز

ولو انها يا حسرة عليها بصل........ توم

هتعيط .......هتعيط وابقوا اعزمونى فى الفرح انا بس احسان لا



شــــــــــــــــــفقة

هناك 82 تعليقًا:

عاشقه الرومانسيه يقول...

بصراحه ياشفقه يااختشى
نصائح ذهبيه
هههههههههههههه
وليه احسان لأ يا اختشى
يعنى هو مالوش نفس؟

Ahmed يقول...

فرح ايه بأه كده؟
كده يادوبك نعزمك على حفلة طلاق
هههههه

ايه ده كله ايه ده كله

أوعي تقولي أن احسان عمل كده؟
مش هصدق

الله يكون في عونك يااحسان

MaNoOoSh يقول...

طب انا عايزة اخلص من اخويا يا شفقة يا اوختشى.. تفتكرى انصحة النصائح الذوهبية دى وللا ايه؟
كل شم نسيم وانتوا طيبين.. ياترى ايه اخبار الرنجة والفسيخ؟

شفـقــة و إحســــان يقول...

عاشقة الرومانسية
لا بلاش ذهبية دى خالص خليها الماظية او سوليترية علشان تمشى مع البوست
وبعدين احسان لا علشان هو معزوم فى فرح تانى

شفـقــة و إحســــان يقول...

احمد ابو العلا
اول مرة اعرف ان فيه طلاق بارتى بس تصدق فكرة تجنن
ولعلمك احسان عمل كده وابو كده وعائلة كده كلها

شفـقــة و إحســــان يقول...

manosh
انا من رائى لو عايزة تخلصى من اخوكى تحطيله سم فيران فى الاكل علشان مفعوله سريع
اما النصايح دى مفعولها يودى القسم بس شوفى انتى بقى عايزة اى تخليصة فيهم
والرنجة والفسيخ بيسلموا عليكى وبيقولولك انهم ما زاروش بيتنا السنة دى اصلنا ما شمناش النسيم

عندما تكون ميمى وحاجات كتير مع بعضها كده يقول...

ليه بس تنصحيهم النصايح الذهبيه دى انا لو واحد جالى وشوفت منظره الروش ده من قبل ما يدخل اصلا هيكون متزحلق على بيت مامته الى عاوزه تجوزه هههههههههههههههههههههههههه

شفـقــة و إحســــان يقول...

عندما تكون ميمى وحاجات كتير مع بعضها
فكرتينى بفيلم جواز بقرار جمهورى وهى الحياة ايه غير حبة حاجات صغيرة فوق بعضها
بس ايه حكاية تزحلقيه دى هو انتى بتبيعى تلج ... خلى بالك الزحلقة دى بتسبب كسور وتمزق فى الاربطة انا نصحتك وانتى حرة
عموما نورتينا

Lady E يقول...

هههههههههههههههههههه توم كروز مرة واحدة

نصائح فوق الفظيعة يا اوختشي

انا كده مش هتجوز افضل في بيتنا احسن

غير معرف يقول...

كويس أنك قلتي لي اصلي كنت ناوي( تاني) لأ تالت
عندكيش عروسة كويسة ورخيصة وبنت ناس؟

البوست حلو جدا ودمك زي الشربات

يوسفيات..محمد يوسف يقول...

تصدقي كنت فاكر إن إحسان هوا اللي كاتب?

دا حتى أنا استعجبت إنو بيكتب عن الزيارة الثقيلة دي

مين دول عشان يقعدوا يفصفصوا فيا?

دا لولا الأصول كنت قلبت بنتهم عرفي ويبقوا يسلموا عليا بعد المولود الأولاني
‏:)

‎‏

Hanan Elshafey يقول...

نصائح تحفسسسسسسس

طـائر الليــل الحـزين يقول...

تحفة
البوست تحفة ودمه شربات
ياخررررررربى لو العرسان تعمل كده
ههههههههههههههه
هتكون النتيجة كارثة طبعا
تعرفى البوست ده واللى قبله
يجننوا
فعلا تسلم ايدك
والصور مكملة للكلام جداااا
تحياااااااااتى

Bondoka يقول...

ههههههههههههههههه
ضحكتينى خاااااااالص

ياربى ده انا لو شفت الروشنه دى كلها كنت اقلعت عن الزواج من بدرى

سليبرز يا مفتريه
هههههههههه
ربنا يكون فى عون البنات اللى بيتقدملها ناس بالشكل ده

شمس النهار يقول...

ايه النصائح المغرضه دي
ده كده الجوازه والحمد لله باظت وعوضنا علي الله :)

صدى الصمت - عاشقة الورد - يقول...

انتى كدة لو جمعتى نصائح العروسة فى البوست القديم على نصائح العريس هتلاقى النتيجة إن الجوازة باظت
ربنا يستر
تحياتى

نعكشة يقول...

يخربيت كدة

انا لو جالي عريس بالمواصفات الرهيبة اللي انتي قايلاها دية
لأ و بابا وافق عليه
دنا كنت انتحرت

مش هوه اللي هينتحر

الله يسامحك يا شفقة

فرح إيه بقة انتي خليتي فيها افراح

سلام عليكِ

dreem يقول...

عواف
هو انتى ياختشى يعنى شايفة ان فيه رجالة من اصله .. عايزين يتجوزوا؟
بلا خيبة
ههههههههههههههههههههههههههههه
اسكت يالسانى اسكت يالسانى لحسن هلخبط وهيعملولى محاكمة
بس دمك شربات

hasona يقول...

السلام عليكم

ايه النصائح الغالية التي لا تقدر بذهب
لأنه بمجرد أن يذهب سيعود سريعا
واكيد هيضيع ويتوه في الطريق
ومش هيكررها تاني

سارة نجاتى يقول...

بالهوى ده ئانتى كده اوزاه ياعينى يتكرش وش ههههههه
أهو أنا لو جالى واحد عامل شعره زى الصلعة أم علامات سوده ى و الله ما أدخله من الشارع بتاعنا هههههه
متقوليليش أن احسان عمل كده ؟؟

تحياتى

بنت الغربة يقول...

لالالالالالالالا ياشفقه ياختى لالالالالا
انا كنت منوقعه ان احسان هو الللى بيكتب مش انتى...
وبعدين دى نصايح تنصحى بيها ابنك مش بنتك ابدا ابدا ...
مركز شباب ايه اللى يتعمل فيه الفرح ..؟؟
وحلل نحاس ايه اللى بدل الشبكه ..
المعقووول كويس..
لان العريس لو راح كده وقال الكلام ده ...اخره هينضرب بالشلوووط من ابو العروووسه ...
يعنى لو جالك عريس كده لبنتك ..هتعملى فيه ايه ..؟؟؟
انا كنت دلقت العصيير فى وشه ...
اوعى يكون احسان عمل كده ..؟؟؟؟
تحياتى ليكى

MǿиY El-Shreef يقول...

ههههههههههههه

والله نصايح جامده وعجبتني اوي نصيحه ماتبحلقش عشان ماتوقعش الحاجه عليك :D

بتحصل كتير فعلا

وبعدين ايه ده طقم حلل نحاس لالالالا لن اتنازل :D

ههههههههه

بس اوعدك لو الفرح ف السطوح فعلا هعزمك ياشفقه

:D

حمدلله عالسلامه

شفـقــة و إحســــان يقول...

lady e
لعلمك هى مش فوق الفظيعة لانها ممكن تقع هى تحت المريعة

شفـقــة و إحســــان يقول...

مصرى جدا
تانى لا تالت ايه يا ابنى انت كده خلصت على بيوت العرايس كلهم اجبلك انا بقى منين؟؟
وكمان الرخيصة والكويسة وبنت الناس دى تلاقيها فى السوبر ماركت اما فى الحقيقة ما تلاقيش

شفـقــة و إحســــان يقول...

يوسفيات
احسان يا ابنى مش كاتب ده المخرج
وبعدين ايه يفصصوا والمولد والكلام ده انت بتشتغل بتاع زار ولا ايه يا عم يوسفيات
كمان حكاية العرفى دى بتاعة الديوك بس مش بتوع المولد

شفـقــة و إحســــان يقول...

حنان الشافعى
نصائح تحفس!
يبقى اهلا ومرحبا بك فى متحفنا الفظيع المريع ابو نصايح تودى على البلاليع

شفـقــة و إحســــان يقول...

طائر الليل الحزين
تعرف هما بس لو ذاكروا كويس النتيجة هتبقى جيد مع كارثة الشرف بس هما يركزوا والنتيجة مضمونة
اما بالنسبة للصور فهى ملكمة للكلام جدا مش مكملة

شفـقــة و إحســــان يقول...

Bondoka
ايه يا بندقة كسرتى سنانى ايه انتى بتشتغلى دكتورة ولا ايه عمالة تقولى روشتة وبامبرز عيتينا

شفـقــة و إحســــان يقول...

شمس النهار
مغرضة والجوازة باظت هو انا بقولك اشاعات او وصفة اكلة؟؟
يا بنتى دى جوازة ربنا يكفيكى الشر

شفـقــة و إحســــان يقول...

صدى الصمت
قصدك لو ضربت نصايح العروسة على نصايح العريس كلنا هنروح اللومان لا محال

شفـقــة و إحســــان يقول...

نعكشة
كده من اولها هنتامر هو حد لاقى عرسان فى الزمن المهبب ده لا وايه هتنتحرى كمان
لا خلاص خليكى قاعدة فى بيت بابا واوعى تفتحى بقك

Kiara يقول...

يالهوووووووووووووووووووووووووووي


ايه النصايح دي موش ممكن

انا هولع فيه وفي اهله نفر نفر

ولا اقولك

انا هولع في اصحابه كمان

يلاا ان شاالله ماحد حوش

ال عريس لقطه ال

دا لتر بنزين وعود كبريت وانهي المساله

هههههههههههههههههههههههههههه

شاب كــ طخين ـــــا يقول...

ههههههههههههههههههههههه
والله نصايح من الاخر
هههههههه
واجمل حاجه الالبس هههههههه
ربنا يخليكى لنا فيه كده :D

Remas يقول...

انتى متأكدة ان دى نصائح ؟

وتفتكرى بعد كل دا ممكن يكون في زعرودة اصلا ؟

بوست عسول بجد اوي وجه في وقته للتخفيف من موجة الاكتئاب اللى ماشية في المدونات الايام دى

maiosha يقول...

هههههههههههههههه

حمد لله على السلامة يا شفقة
إيه الغيبة الطويلة دى

ههههههههههههههههههه

معلشى يا شفقة إنتى لازم تعملى بوست تانى لينا بقى
قصدى البنات يعنى لما يتقدملهم واحد بصندل يعملوا أيه بالظبط

يعنى هو لما يجى بصندل اطلعله انا بقى بإيه شبشب زنوبة

هههههههههههههههههه

تسلملنا نصايحك يا جمييييييييل

أمل حمدي يقول...

ازيك يا شفشوقة حبيبة قلبي وحشتييييني قوي

يارب تكوني بخير

وتكون الامتحانات عدت على خير

ايه النصايح الخطيرة دي

الحمد لله ان ابني مالوش في التدوين ولا بناتي

سلام يا حبيبة قلبي

بـِصَمتـِـ أميرة ــــى يقول...

شفشوووقة حبيبتشى
ايه التشعامة دى
ده انا لو العروسة بتاعة العريس التشحفة ده
يبقى ياسعدى ياهنايا
فرحى هيتعمل فى مركز شباب وكرسى فى الكلوب وهيييييييييييييه
ههههههههههههه
عمة هنعزموكى انتى وبعلولتلك عشان بس ابص فى عنيكى واتحسبن واقولك هذا ماجنيتيه علياااا
عاااااااااااااا


هههههههههه
تقبلى مرورى يا شفشف
ملكة بحجابى

شوية قهوة يقول...

هوة رايح يخطب عروسة ولا قردة
ههههههه
انا عن نفسي اذا عرفت انو بروشنة ده مش هخليه يعدي عتبة الباب
انا اذا كان الفرح فوق السطوح فاكيد هعزمك لكن هسيب انا الفرح
ههههههههه

غير معرف يقول...

ههههههههههههههههههه
هههههههههههههه
هههههههههههههههه

لا عنجد ياهيك النصائح يلا بلاش

البوووووووست يجنن

تسلم ايدك ياقمر

شفـقــة و إحســــان يقول...

dreem
عواف ورحمة الله وبركاته ايه يا بنتى شايفانا قاعدين على الترعة
وكمان لسانك مش عايز يسكت طيب اديله بزازة ولعلمك لو مسكتش العقوبة هتبقى 3 سنين امتناع عن الكلام وانتى حرة

شفـقــة و إحســــان يقول...

dreem
عواف ورحمة الله وبركاته ايه يا بنتى شايفانا قاعدين على الترعة وكمان اهبطى شوية متشمتيش فينا العوازل مالك ملهوفة على الجواز كده ليه؟؟
هو فيه اكتر منه بس النفس ... اوعى يا خيبة تقولى كده تانى لحسن يشمتوا فينا ويتعززوا وشوية شوية يطالبوا باننا نديهم مهر
وكمان لسانك مش عايز يسكت طيب اديله بزازة ولعلمك لو مسكتش العقوبة هتبقى 3 سنين امتناع عن الكلام وانتى حرة

شفـقــة و إحســــان يقول...

hasona
بذمتك لا تقدر بذهب؟؟
يبقى اكيد تقدر بالماس ايدك عليه بقى انت اللى قلت
وبعدين ما يتوه هو كان قريبنا عموما سواء اتجوز او متجوزش هو كده كده تايه
على الاقل قبل الجواز ممكن لو تاه حد يدله
لكن اعتقد بعد الجواز هو اللى هيبقى توه نفسه ومحدش هيستجرى يدله وهو ومصيره بقى

شفـقــة و إحســــان يقول...

سارة نجاتى
اوازه ويتكرش ايه الفرانكو ارب ده؟؟ انتى بتتكلمى لغة جديدة ولا ايه يا سرسر؟؟
وقال ايه لو جالك ابو صلعة مش هتدخلى الشارع طيب عينى فى عينك كده
ده ان معملتيش فرح من اول الشارع لاخر دقنى اهى
وهو حد طايل صلعة وكمان عليها علامات هدية

اقصوصه يقول...

هههههههههههههههههه

وليش انتي واحسن لا يا انانيه؟

عقبال البكارى يا رب

وسموعنا زلغوطه بالصلا ع النبي

كلولولولوليييييييييش

ذكرى رحيل قلم يقول...

والله عسل يا قمر بس هو ابو العريس فين ماتذكرش في القصة يعني
علي فكرة رغم انه الموضوع ساخر بس الحدق يفهم
عندك حق ملهاش لازمة النمظرة ياختي ولا الشكليات وممكن يعملوا بالفلوس مشروع او يروحوا بيها عمرة وبلاش شبكة وكلام فارغ
بجد موضوع هايل
ارجو تقبل مروري دمتي بالف خير

غير معرف يقول...

ههههههههههههههههههههههه

و الله ضحكتينى و أنا ماليش نفس
هههههههههههههههههههههه

نصائح ذهبية بجد تخلى العريس يخرج ينتحر فعلا

بس حلوة فكرة السليبر دى يالهوى عليكى


بس بصراحة أنا كنت فاكرة إن إحسان هو اللى كاتب الموضوع ده :))


البوست اللى قبل ده كان تحفة أوى على فكرة :)

شفـقــة و إحســــان يقول...

بنت الغربة
يا ناس احسان ده مخرج مش كاتب مش عايزين لخبطة
وبعدين موضوع الحلل النحاس ده موضة واهو احسن ما الواحدة تعنس انا عندى تحنس ولا تعنس
ولو جه لبنتى عريس زى ده انا هستناه من اول الشارع بالطبل هو حد لاقى " بركاتك يا حوسين" ده عريس يا بنتى مش اى كلام
اما بخصوص احسان فهو عمل كده وابو كده وعائلة كده بس على مين اهو كله قعدله وربنا بيخلص ذنوبه من ناس اقوى منه والحدق يفهم

شفـقــة و إحســــان يقول...

MǿиY El-Shreef
حكاية البحلقة دى اصلها مهمة جدا وكل العرسان تموت فى البحلقة بينى وبينك انا قلت الحقهم قبل ما يتشلفطوا وخدهم يورم من لوكمايات ابو العروسة
وكمان ايه حكاية طقم الحلل النحاس ده سيبتى كل حاجة وممسكتيش الا فى الحلل ؟
اما بخصوص الفرح فالسطوح اجمل مكان فى مصر حاجة تشرح القلب والروح وكله هواء

شفـقــة و إحســــان يقول...

كيارا
ايه الصويت ده يا كيارا انتى اشتغلتى ندابة ولا ايه ؟؟
وكمان ايه شغل ريا وسكينة ده نفر نفر يا بت عايزين رقة ونعومة وجاذبية مش مجنينو ومهلبية العريس كده هيطير منك وابقى قابلينى لو عثرتى على واحد غيره

شفـقــة و إحســــان يقول...

كيارا
يا مصيبتى انا مكنتش خدت بالى من بقية التعليق كمان هتحرقيه هو واهله ؟؟
ايه الشر ده انتى عايزة تبقى رد سجون ولا ايه؟؟
ولعلمك كده مش هيبقى عريس لقــــــــــطة.... لا هيبقى عريس لاسد او فك مفترس

شفـقــة و إحســــان يقول...

امبارح كان عمرى عشرين
لعلمك ده مش من الاخر فى من الاول بس اكيد انت قريت اخر البوست بس اطلع بالماوس لفوق شوية وانت تلاقى اوله مش عايزين حول

شفـقــة و إحســــان يقول...

reem
بص انا مش متاكده بس هروح اراجع واقولك علشان مجاوبش غلط ويتخصملى درجات
وكده مش هيبقى فيه زغروطة هيبقى فيه عروطة
وايه حكاية موجة وبحر دى اوعى تقلبى علينا وتبقى زعابيب

شفـقــة و إحســــان يقول...

maiosha
الله يسلمك بس انتى كنتى قيستى الغيبة ولا ايه؟؟
هو انتى جاية المدونة معاك متر يا ميوشة؟؟
وبعدين ايه لينا دى ؟؟
انا معرفش الا لينااللى كانت بتجيب من اللى تحت الحوض
وردا على سؤالك لما عروسة تلاقى عريس بصندل مفيش الا حل واحد تساله هو جايبه منين وتروح تشترى واحد زيه ليها مش تقوليلى شبشب زنوبة طيب ماشيها سعاد تبقى مبلوعة

شفـقــة و إحســــان يقول...

ماما امولة
انتى وحشتينى موووووووووووووووووووووت بجد
اما بخصوص الامتحانات فهى من ناحية عدت فهى عدت اما على خير فلا اظن دعواتك معانا
والحمد لله الف مرة ان ولادك مالهومش فى التدوين ولا فى قراءة بوستاتى والا زمان الشقة عندك كان اتملت سليبرات وزنوبة والشعر بقى الموضة

شفـقــة و إحســــان يقول...

ملكة بحجابى
ايون كده اخيرا لقيت واحدة تسد قصدى تفتح النفس وتفرحنى وتكون راضية على العريس اهو كده العرايس والا فلا
بس بينى وبينك العريس لو سمع اللغة التاء التشحفة بتاعتك دى
انا مش مسئولة وساعتها انا اللى هقولك هذا ما جنيتيه انتى ... بس ابقى خلى بالك من الجنينة

شفـقــة و إحســــان يقول...

مقتطفات من حياة فتاة
يا بنتى القردة مش بتتخطب بتخبط وتتنطط بس
ولعلمك هو بس لو جه او شميتى خبر انه على وصول انتى مش هتخليه يعدى عتبة الباب وبس لا وموسكى الباب وباب الشعرية الباب وكل البلدان المجاورة والشقيقة

شفـقــة و إحســــان يقول...

نوارة
بس بلاش سيرة الجنان والتخلف العقلى ده لحسن تلزقوها فيا وفى البوست لان ده هيحصل هيحصل بعد ما يتقدملكم العريس اللقطة ده
فمش عايزين رمى بلى

شفـقــة و إحســــان يقول...

اقصوصة
يا بنتى حرام عليكى ثلاث كلمات مش فى القاموس فى الراس توجع
انتى ليه اللغة عندك فيه مطب ؟؟
ارحمينى يا اقصوصة بقى بكارى...وزلغوطة...وكلووووليش دول بذمتك يركبوا على بعض
انا راضية ذمتك

شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

ذكرى رحيل قلم
تصدقى انا زعلت على القلم عموما عموما طالما رحل ابقى بدليها بمسطرة هى ممكن تعمر اكتر
اما عن ابو العريس فجارى البحث عنه بس هو ساعتها كان على القهوة بيشرب شيشة
اما ان الحدق يفهم دى فمظنش وهو بقى فيه حدق ؟؟ بقى في حادق مش حدق
وكمان زودتى البلة طينة عايزهم يعملوا مشروع ؟
طيب افرضى خسر العريس يعمل ايه يدبح العروسة واهلها ولا ايه
وبعدين مكفكيش الجناية دى رايحة تنصيحهم يعملوا عمرة بقى بذمتك يا شيخة دى اشكال عمرة " دى اشكال عمرةوعفشة" يعنى عايزيت تصليح من مجاميعوا لانهم لا يصلحوا للاستعمال الادمى

شفـقــة و إحســــان يقول...

انا ودماغى
ايه حكاية ماليش نفس دى هو انا بعزم عليك بكشرى ... ده بوست ....بوست بيتقرى مش بيتاكل
وطبعا النصائح ذهبية وماسية والماظية لان غلو تمنها فى فكرة انتحار العريس وهو ده المقصود
اما بخصوص احسان فهو اليومين دول مش فاضى يكتب لانه بيدور على حبل تخين شويتن علشان يشنق نفسه ويرتاح

yoyo يقول...

صباحك سكر يا أطعم وأجمل شفقة
هههههههههههههههههه
حرام عليكى و الله
دى نصايح تودى فى داهية
ههههههههههههه
كدا الراجل ممكن يتقطع بقى دا منظر يعنى هو رايح يخطب ولا رايح يقرف الناس
هو ايه الشباب السيس دول
يا سيتى انا عن نفسى عاوزة النوع التانى بتاع رجله اليمين دا ان شالله حتى لو كان لابس بلغة ههههههههههههه
قال صندل قال وضرب ليا شعره فى الخلاط
وشوية شوية يقولى ماماى وبابى
عند امه يا ادهم هههههههههههههههههههههه
هههههههههههههههههههههههههههه

قال عريس قال بلا خيبة يا اختى

و الله وحشتنى جدا جدا انت واحسان
يارب دايما كدا منورين
تحياتى
يويو

لجين أبو الدهب يقول...

ههههههههههه

بجد انتى مش ممكن ..

عسل بطريقة رهيبة ..انا طول البوست وانا بضحك ..

لا بجد نصايح جامدة اخر حاجة ..

هو بس يعملها وينسى انه يجوز طول حياته ههههه..

ياريت بقى تدخل على نصايح فى فترة الخطوبة لان فى اكيد كتير محتاجنها ..

دمتِ بخير ..

مامة مازن يقول...

عسسسسسسسل جدا والله
هههههههههه
ضحكتينى يا شفيقة يا اختى فى زمن عز فيه الضحك

kochia يقول...

كل دي نصايح
ادي العرسان ولا بلاش

تحياتي

مهندس مصري بيحب مصر يقول...

لا لا لا لا لا لا
انتي لازم تقرأي آخر بوست عندي و تعليقاته
نفس الموضوع تقريباً بس من ناحية تانية خالص

قوس قزح يقول...

هههههههههههه
ده انا لو جيه لبنتى عريس كده باللبس ده هرميه من الشباك

ده انتى حماه هااايلة

شفـقــة و إحســــان يقول...

yoyo
مهو ده المطلوب انها تودى فى داهية او تودى القسم امال يعنى عايزاهم يروحوا فين هو ده مكانهم الطبيعى
وبالتاكيد انه رايح يقرف الناس وشلهم ويجيب العلة لبنتهم
بس على فكرة هو مش سيس هو شيش بيش
وبعدين ايه الكلام ده ياى وماى كمان قال بلغة قال وابو ادهم انتى منين يا يويو؟؟
شكلك من نزلة السمان كده

شفـقــة و إحســــان يقول...

لجين ابو الدهب
يا بنتى انا عسل بطريقة طحينة مش رهيبة
وبعدين كفاية ضحك ولم شفايفك شوية خلى حبة للبوست اللى جاى

شفـقــة و إحســــان يقول...

مامة مازن
انتى بتقولى عـــــــــــز؟؟
تبقى انتى اللى قتلتى بابايااعترفى بسرعة
انتى ولا مازن؟؟

شفـقــة و إحســــان يقول...

kochia
انتى تقصدى بلاش ولا عرسان ببلاش تفرق وضحى
لان مبقاش فى حاجة ببلاش كله بقى بفلوس

Unknown يقول...

اهلا اهلا
انا سمعت الزغايد قلت ازغرط معاكم
اية النصايح الجميلة دى ربنا ميحرميش احسان منها ابدا ابدا
عاملة اية يا شفق فق ياختى والله وحشانى جدا

موضوع جميل بجد

بنوتة انا جاية ان شاء الله البؤجة عايزة اشوفك
واتصلى متستخسريش
خخخخخخخخخخخخخخ
سلامى لسمبا

كيكى عوووووو يقول...

هههههههههههههههههه
لا اية اية نصائح مش اى اى ولا زى زى
يعنى!!
الا قوليلى هو احسان بك عمل كدة؟؟؟
هااا قولى زرك فى بير
************************
والله والله والله
وحشتينىىىىىىىىىى جداااااااااااا
والله العظيم مشغولة فى زفت الطين الاكاديمية العالية للقطن
ادعيلى لا مش بالنجاح انى الاقى عريس زى دولة
عوووووووووووووووووو

micheal يقول...

ههههههههههههههههههههههه..مالكيش حل بجد..بس ايه حكاية الزيرو وهدوم الميكي ماوس اليومين دول مع البنات
:))
وبعدين بتجيبي الصور دي منين
تحياتي

ذكرى رحيل قلم يقول...

السلام عليكم
ازيك يا شوشو عاملة ايه
فين الجديد
ادعوكي لزيارة بريد الجمعة
تحياتي

تأثير الفراشة يقول...

D: D: D: D:
(دى وصفة سهلة...دى وصفة هايلة)

ما شاء الله، أسلوبك جميل و الصور تحفففة ، بالتوفيق لكم دايما
تقبلى مرورى
http://a-butterflyeffect.blogspot.com/

أحمد عاطف يقول...

الله يسامحك والله خلتيني اتخيل نفسي وانا رايح اخطب ولو كان شكلي فعلا كده هاتبقى مصيبة

بس الحمد لله في اول مرة خطبت اول زيارة مخدتش حد معايا انا بطولي

وكنت لابس كوتشي وبنطلون جينز مشرشب وعامل شعري سبايكي

akeed يقول...

ههههههههههههه

فعلاً الحاجات ديه بتحصل فى المواقف اللى زى ديه ده الواقع

تحياتى على البوست الرائع والمدونة الجميلة

الست فرويد يقول...

لذيذ قوى

:)

تحياتى

شوية قهوة يقول...

انتي هتوحشينا اكتر كلنا عندنا امتحانات بس ربنا يستر احنا كمان محتجين دعائك ويا رب يجي بفيدة ان الله مع الصابرين

Maryama Qandil يقول...

هههههههه
نصائح ذهبية مدهونة بالتغير برووف

اول مرة زور البلوجة...حلووة ما شاء الله

العاب فلاش يقول...

فرح ايه بأه كده؟