الثلاثاء، 17 نوفمبر 2009

انتى جاية اشتغلى ايه؟؟؟



انا بصراحة طقهت وزهقت ومليت وحطيت صوابعى العشرة فى الشق

أى.... والنعمة لحد ما صوابعى اتزنقت ومعرفتش اطلعها تانى

كل ده بسبب الراجل اللى انا متجوزاه

واه.... يا باباتى .....مورينى الويل والعويل

قال ايه لابس ومتامع واخر شوياكة علشان ميعاد الانترفيو

والانتريوووووووه بتاع السكورتورة اياها

وجاء موعد الانتريووووووووه

وبعدين يا شفشق تعملى ايه يا شفشوقة؟؟

ازاى بافكارك الجهنمية ممكن تطفشى السكرتورة ديه؟؟

اه.... لازمن.... وحتما ولابد انك تكبسى على انفاسه لحد ما تطلعى السر الالهى

مش احسن ما تيجى واحدة تورة تلهف الراجل منك؟؟

وتكوش على 275 ج .... وانتى قاعدة فى البيت مش لاقيه نصهم

ولا حتى هتلاقى حد يعبرك

مهو بعد ما هتشرف الهانم بطلعتها البهية

مش هشوف وش المحروس تانى

ومن هنا ورايح هيعملها حجة ويقول اصلى عندى شغل

حاكم زيادة الشغل عند احسان مرتبطة بالكثافة السكرتيرية

الله يعينه ويهد حيله

المهم قلت لا ....ودى تيجى ....امال تبقى شفقة ازاى؟؟

لازم رجلى على رجله

لحد ما اكعبله واشنكله ....ولا يمكن اكسرهاله خالص ويقعد فى الجبس ميروحش الانترفيو

لازم اروح معاه اشوف الماصوعة اللى هيختارها

وادخلها لجنة مختصة بالفحص والمحص

والتمحيص الدقيق والبقسماط وانخلها كده شمال ويمين

واسويها على الجانبين وفى الاخر ادخلها الفرن احرقها ونخلص

و رحت مع سونة المكتب بلرغم من كل المحاولات الفاشلة منه باقناعى بانى مروحش معاه

علشان ده شغل مش فسحة ..... لكن على مين ؟؟

وده يصح برضه ؟؟ده برضوا شغل سونة وانا احبله الخير

وجاء موعد وجع البطن... وكركبة المسارين ...والصداع المزمن المصاحب لرشح

بصيت لاقيت خير اللهم اجعله كوابيس

لقيت حاجة هلت علينا طول بعرض بارتفاع ولا كأنها هضبة

قلت فى عقل بالى" ايه ده هو فى بلدنا المقاسات دى؟؟

امال الواحد ماله طالع كده ليه ؟؟

ده انا بالنسبة لها لسه مولودة امبارح وعندى شهرين يا دى النولة

يا اختى الواحدة كده كانها مش سوتات خالص

لا تمنيات فى اربعات تلاجة ايديال يعنى بالنوسبلها

و لقيتها حلوة كده الحق يتقال تتاكل بعد الاكل

على انها حاجة حلوة

وكمان نغنوشة وفرفوشة ودلوعة ورقيقة من النوعيات اللى ما بتاكلش الا رقاق وبسكوت

ورقاق ايه.... من غير لحمة علشان التخن والريجيم والذى منه

المهم كلها انوثة طاغية ... طاغية... طاغية " تخلى الواحد من كتر الطغيان يستعمرها"

طبعا اختكم والحمد لله قمة فى الجمال والرقة والشوياكة

احم احم قصدكم ايه؟؟

سمعاكم ...هس ولا حد يفتح بقه

ولا يقول حاجة خليها فى سركم ....اياك وان

المهم انا تنحت وبحلقت وعينى من كتر البص جالها جحوظ

وكادت ان تخرج من وجهى

ايه يا بت التشطيب الفول اوبشن ده؟؟

شفتوا فول اوبشن مش طعمية اوبشن

هتقولولى تفرق ايه يا شفقة اهو كله فول ؟؟اقولكم لا تفرق فى القلى

وبقيت زى المجانين وبعدين ....وبعدين ..... الراجل كده هيروح منى

المطافى .......الاسعاف اى جهة اونقاذ

شوية وقعدت ابحلق فى لبسها

لقيت المحزق... والملزق ...واللى هيتفرتك

والمطرقع... والعالى وكله كوم ...والعالى كوم

لابسة كعب 20 سم الواحد علشان يكلمها لازم يطلعلها باسانسير

المصيبة ان الرجالة وخاصة سونة من ذوات القلوب الضعيفة والرهيفة من الكعب العالى

اول ما يسمعوا ... رنة كعب الغزال يا متحنى ....تك ....تك .....بينسوا نفسهم

ويتلحس مخهم ...بس على مين

والنبى لو اتلحست يا احسان لاوديك مستشفى المجانين بنفسى وده عز الطلب

وبقيت اكلم نفسى

وانا جايباها من فوق لتحت

يا دى النولة امال فين الجلاليب والملايات اللف ؟؟

ولا الفئة دى انقرضت ولا ما بتقرأش اعلانات؟؟

جتكم خيبة .....كده مش هتلاقوا فرص للشغل والبلاوى دى هتعملكم بطالة

ولا الميكب سيدى يا سيدى

ولا اللى رايحة فرح ....فوشة هنا وفوشة هنا شوية سايبس على تريكس

انما ايه عاملين شغل جامد بالالوان

والضحكة اد كده... والضب باين والاسنان صف لولى من بتاع عبد الوهاب

اللى بياكل جلاس وتدوب قلوب الناس

والشعر مفرود عند مكوجى رجل" ليس" علشان التيس

وكل شوية تطوحه يمين وشمال

قال يعنى احنا ناقصين

قلبت عليا المواجع و خلت الواحد افتكر انه كان زمان عنده شعر

بس على مين خليها تفرحلها بيه يومين

علشان باذن الله هيتحلق بموس على الزيرو وهيتحط بداله مرهم كبريت زى المسحراتى

وحاطة اصنص شادية وريحتها جايبة اخر الشارع

تخلى الواحد يغمن عليه ودى اكتر حاجة بهدلت مشاعرى واحوساساتى

خلتنى اقعدت اشمشم فى نفسى ولا اللى عندها انفلونزا الحمير

وفكرتنى بريحة البصارة والسردين المخلل والبصل وكل ما لذ وطاب

بس والنبى ......صبرها عليها....الصبر جميل

اما خليت ريحتها بكابورت

وانضمت لفريق بكـــــــــــا...بور....تات....بتاع عادل امام

مبقـــــــــــــــــــاش انا شفقة

شوية بصيت لقيت الراجل اعصابه باظت.... وركبه خبطت فى بعض ....وايده رخرخت

تقريبا جهازه العصبى كله فك او اتدمر

وساعتها بصيتله و قلت اما الحقه وافوقه لحسن ما يحصلش طيب

واخرته تكون 55 اسعاف

هو والمزغودة ورحت مشمرة الكمام ورافعة الحواجب تمانيتين

وقاعدالهم وبصوت جهورى رجرج المكتب باللى فيه

احسان..... ايه ده ولا كانك شفت الاميرة ديانا

دى كبيرها الاميرة دبــــــــانة

ساعتها الباشا تقمص الدور وعمل فيها الكونت دى مونت فرستو

لحد ما اتفرستو وقعد يسألها

"وكان الانترفيو كالاتى"

سونة: حضرتك نورتينا وشرفتينا

المزغودة:" بدلع" ميرسى لذوق حضرتك

انا: "فى سرى" يقطعك يا احسان اللى عمرك ما قلتهالى

مع انى من غير حلفان

شمعة حياتك.....لمبة 500 وات

بت مضيئة كده..... كلى نور.... ومن غيرى حياتك تعمل قافله

سونة: ممكن اعرف حضرتك اشتغلتى فين قبل كده وخبراتك السابقة؟؟

المزغودة: " بمياعة" انا خريجة مدارس لغات ...وجامعة امريكية

واشتغلت فى شركات تصدير واستيراد

طبعا ماكنش يقصد خبراتها فى العمل وعلى مين ده

انا فهماه وعجناه وخبزاه

طبعا يقصد خبرتها فى المياعة والمياصة والمشى على الحبل

والهروب من باب المطبخ وندغ اللبان وخطف الرجالة من الستات

وقال المزغودة

هتعميلهم عليا والنبى ايه

قال امريكانية قال ....ده انتى كبيرك كفر ابو تشت مركز حمص

ومالهم خريجين معهد البوستة كفروا

دول زى الفل

وتصدير واستيراد ...طبعا مهو كل اللى مالوش شغلة يقول تصدير واستيراد

بنصدر اللى بيصدروه ونستورد اللى بيستوردوه

تصدير المياصة ....واستيراد المياعة والمسخرة

يا مزغودة ....ده انتى كبيرك صينى تقفيل مصرى


سونة: طيب حضرتك عنوانك ايه.... يعنى علشان نشوف قريبة من المكتب ولا لا؟؟

انا فى سرى: اعملهم عليا فاكرانى مختومة على قفايا

لا انا مصحصحالك اوى يا سونسون

الباشا بيتأكد قريبة ولا ...لا

علشان لما يسحب بالشبشب الزنوبة اللى انا شاريهوله فاكرينه؟؟

ويروحلها بالليل ميتوهش

بس على مين

والنبى اروح اطرقع الشبشب فوق نفوخها

لحد ما يجيلها ترجرج فى المخيخ

واطلع على جسمه البلى الازرق


المزغودة: انا حضرتك ساكنة فى الزمالك

يا ختى كميلة ...وماله الاهلى كوخة ولا كوخة؟

ولا باب الشعرية ....والعتبة؟

هتستعرى من اهلك ..و هنستعبط من اولها

ده انتى كبيرك زقاق المدق اوضة وصالة وعفشة مية شرك مع الجيران


سونة: طيب حضرتك معاكى اى كورسات تانية غير اللغة؟؟

المزغودة: افكورس....اخدت كورسات كتير فى السكرتارية وادارة الاعمال

وبعرف اتكلم 3 لغات

انا: اه يانى منك..... ومن كدبك قال كورس قال

اللى ما شايفة خبطة كده ولا بشلة هنا من اثار كورسى واحد هتكدبى وتقولى كورسات

طيب الهى كورس من الكورسات اللى خدتيها يفلقلك نفوخك نصين

قال كورسات قال.... وطرابيزات

انتى فاكرة نفسك جاية تشتغلى عند منجد؟؟

واذا كان على اللغات

انا بعرف بورسعيدى ودمياطى واسكندرانى

يعنى محدش احسن من حد


سونة: حضرتك كام سنة .... والحالة الاجتماعية؟؟

انا: والنبى ده سؤال مهو باين كام سنة

تابيدة ... والحالة الاجتماعية بايرة ومش لاقية حد يلمها

المزغودة: برقة" 45 سنة ...وانسة


بصراحة وقتها انفجرت وكأنى كان جوايا فيضان وحمم بركانية ومتغاظية

ورحت قايلالها وانا متغاظة

يا خلاصى ومالك فرحانة كده ليه يا نوغة؟؟

امال لو عشرين كنتى عملتى فينا ايه يا سنيورة ؟؟

انا لو منك مشحططش نفسى

وادور على راجل اوقعه بالرموش الصناعى الحلوين دول

اللى عاملين زى التندة

وشوية البوية اللى مهببه بيهم خلقتك

واتجوز واتستت بدل المرمطة وشغل البيوت والدلاله


المزغودة: ايه شغل البيوت!


انا :طبعا يا حلوة امال انتى فاكرة نفسك جاية تشتغلى ايه؟؟

مودمزيل.... ولا مديرة ....ولا تحطلنا رجل على رجل علشان نشم الاف

وكأنى ساعتها بقيت قطر ...ومحدش عارف يفرملنى

امال انتى كنتى فاكرة ال275 جنية دول هندفعهملك ليه؟؟

علشان جمال عنيكى ....ولا خطوة رجليكى

بصى يا قمر انا هعلمك شغلة للزمن اهو حاجة تنفعك لما تروحى بيت العدل

اللى ابقى قابلينى ان شفتيه

احنا عايزين سكرتيرة تيجى الصبح الساعة 6

يعنى تصلى الفجر وتنزل علطول

و تيجى تفتح المكتب وترش ادام الباب

علشان دى ساعة صبحية والرزق يحب الخفية

وبعد كده تجيبى خيشة وتمسحى المكتب ...وتنفضى التراب

الهى يجيلك حساسية

وتكنسى ...وتروقى كويس

وبعدين يا كميلة تشمرى وتدخلى على المطبخ تغسلى المواعين

وتحضرى الشاى والقهوة علشان الضيوف اقصد العملاء

واياك ....اياك ....شوفى انا بقولك اهو... حذارى تقولى مبعرفش

اعمل شاى ولا قهوة ....انتى حرة

ولا لو كنتى بتعملى القهوة من غير وش

يبقى نهارك كحلى

وعموما هبعتك عند الواد منص اللى عنده نصبة شاى على اول الشارع

تاخدى كورس بدل الكورسات والطرابيزات اللى انتى واخداهم

اللى لا بيودوا... ولا بيجيبوا وبكرة تدعيلى

انا بعلمك حاجة تنفعك فى الفيوتشر

وبعد ما تخلصى اعمالك المكتبية تطلعيلى البيت خطوتين من المكتب

اهو تساعدينى فى البيت

شوية غسيل على حبة تنضيف وترويق

ومايمنعش من طبيخ

تقشريلى كوسة.... تامعيلى بامية

بدل ما تامعيلى نفسك

المهم هكسر وسطك... وافك رجلك من بعضها

ها قلتى ايه؟؟

طبعا الشغل عندنا مريح ....وعدد ساعاته مناسبة ....والمرتب ملائم

بصيت لقيت المزغودة بتضحك زى الهبل وفاتحة بقها على اخره

وبتهزلى فى الخصل اللى باذن الله هخليها قرعة

بتقول انها موافقة

يا دى النوصيبة ....يا خراب بيتك يا شفقة ....شكلها لازقة بغره ... وامير

احسان :"باستغراب" طيب حضرتك موافقة على السيلارى؟؟

المزغودة: اكيد افكورس والا مكنتش وافقت على الشغل عموما 2075 جنية مش بطال

ساعتها احسان بصلى وبرق واحنا الاتنين فى نفس واحد

ايه كام قلتى كام.....؟؟

المزغودة: 2075ج ....واكيد طبعا لما تشوفوا شغلى هتزودونى

احسان بصلى وطبطب على كتفى وسابلى الساحة علشان اتصرف براحتى

شفقة ..... ادخلى يا حبيبتى ووريها .... اشتغلى يا شفقة

انا: هااااااااااااااااااااااااااااااااا وهاتك يا عض وضرب وشد فى شعرها لحد ما نفدت بجلدها وقالت يا فكيك

وساعتها احسان بصلى ورفع الراية البيضاء وقالى وهو بيعيط.... حسبى الله ونعم الوكيل خلاص

سلمت امرى لله وهتبقى انتى التورة

باركولــــــــــــــــــــــــــــــــــى


شفقــــــــــــــــــة

هناك 49 تعليقًا:

micheal يقول...

ههههههههههههههههههههههههههههههههههههههه..ده أنتي حقنة
:)))
إيه ده كله وبعدين الصور دي أموت وأعرف بتجيبيها منين
:)))
يلا عموما مبروك الإنتصار على عدوتك اللدودة
كده ارتحتي طبعا
ابقى قوليلي شركة إحسان عشان مروحش أعمل إنترفيوهات هناك
:))
تحياتي

micheal يقول...

هيييييييييييييييييييييه..ده أنا طلعت أول كومنت

blue-wave يقول...

هههههههههههههههههههههههههههههههههه
يخرب بيت اللسعان:))
والله والله وحشتونى جدا
وبتأسف على غيابى الفترة اللى فاتت
وحياة ربنا ضحكت من قلبى

اقصوصه يقول...

looooooooooool

كيـــدهن :)

Mafrousa يقول...

هههههههههههههه
انتى مشكلة انتى و احسان بيه بتاعك
هههههههههه
ان كيدهن عظيم
و النبي تطلعى مواهبك بكرة فى تطفيش الفريق الجزائري من السودان
هههههههههههه
زي ما طفشتى البت السوكورتيرة
و ليكي الحلاوة يا شفقة

خواطر شابة يقول...

ههههههه شاطرة والله كده حيحرم يطلب سكرتيرة تاني
كتاباتك ممتعة فيها كوميديا راقية
تحياتي لك

طوبه فضه وطوبه دهب يقول...

برافو عليكى كسبتى الجوله ومبروووووووووووووووووووك عليكى البطوله هتبقى سكرتوررررررررررررررررره اتعلمى بقى وغيرى ريحه البصل عشان الراجل ما يغيرش رئيه المهم ان ما حدش خد منك حسونه هو فى حد لاقى رجاله يابنتى ههههههههههههههههههههه

صمت المشاعر يقول...

ههههههههههههههههههههههههههه
هههههههههههههههههههههههههههههههه

بجد مش قادره من كتر الضحك
دا انتي حكايه

هههههههههههههههههه

كنت مضايقه والله بس البوست بتاعك فك عني

ربنا يحمكي يارب ويحفظ ويسعدك دايما في حياتك

شفـقــة و إحســــان يقول...

micheal
طبعا تقصد حقنة فيتامين ولا ايه؟؟
لكن ايه شغل المستشفيات والعيانين ده... انت اخيرا لقيت شغل فى مستشفى؟؟
وتانى هتسال على الصور برضوا مش هقولك ده سر الطبخة يا ابنى اقصد المهنة
وكمان ايه حكاية الانتريهات دى؟؟
هو انت ناوى تتجوز؟؟

شفـقــة و إحســــان يقول...

micheal
وسع بقى خلينا نستفتح وسيب مكان للناس تعلق يا باى عايزين هواء

شفـقــة و إحســــان يقول...

blue-wave
لا ... لا يا دكتور انسى احنا خلاص اعلنا الحرب عليك كل ده علشان علبة شيكولاتة واتنين كيلو قشر برتقال هتيجى تزورنا بيهم؟
بطل بخل بقى
كمان مين اللى فتن وقالك انى اتلسعت؟؟
عموما الحمد لله انها جت على لسعة فرن خفيفة يعنى
لكن ادعى بالحرق بس على ناس تانية "التوووووووووووووووورة"

شفـقــة و إحســــان يقول...

اقصوصة
انتى كل مرة تيجى تطلعلنا لسانك وتمشى ايه حكاية لول معاكى دى يا اقصوصة
بطلى تاكلى مصاصات ولول دى باذن الله هتروح

شفـقــة و إحســــان يقول...

واحدة مفروسة
كان نفسى احسان يبقى بتاعى انا لوحدى لكن بعد البوست اللى فات بقى بتاع الجميع
انا مستعدة اطلع مواهبى المدفونة بس شوفيلنا حاجة تانية غير الحلاوة وبلاش شغل السجون والزنزانات ده

شفـقــة و إحســــان يقول...

خواطر شابة
قصدك شطة وحراقة كمان انا اصلى ماسيبش حقى ابدا
بس هى مين راقية دى؟؟
اوعى تكون سكرتورة عايزة تقدم عندنا
لحسن ازعل منك

شفـقــة و إحســــان يقول...

طوبة فضة وطوبة دهب
يا ساتر على الدبش
بس ايه موضوع جولة وبطولة واللهى حسستينى انى عضوة فى فريق الكشافة
وعموما ريحة البصل دى من اهم مميزاتى واللى مش عاجبه ما يشمش

شفـقــة و إحســــان يقول...

صمت المشاعر
يا بنتى انا قصة ورواية مش حكاية بس ولو تحبى حدوتة كمان
بس ليه بس زعلانة مفيش حاجة تستاهل ارمى وراء ضهرك
وبعدين ملحوظة انا البوست بتاعى مفكش ..... اه كله صحيح ومجمد

غير معرف يقول...

هههههههههههههههههههههه

هههههههههههههههههههههههههههههههههههههههه

ههههههههههههههههههههههه

ارتحتى ولا لسه

سكرتيرات اخر زمن

هههههههههههههههه

هموت من الضحك

بجد تحفففففففففففففففففففففه

ليس فقيرا من يحب يقول...

هههههههههههههههههههههههههههه

والله انتى مشكله يا شفشق يا اختى

يابت ارحمى نفسك وبتطلى تهرى وتنكتى كده

ههههههههههههههههههههه

وربنا انتى عسل

شفـقــة و إحســــان يقول...

7annen
بعد الشر عنك ... بس والنبى لو متى ما تموتيش عندنا اه احنا مش ناقصين س وحاء

شفـقــة و إحســــان يقول...

ليس فقيرا من يحب
تنكتى؟؟
ايه يا فقيرا شايفانى بقول منولوجات ولا قلبت على حمادة سلطان

سواحة يقول...

نفسى اشوف لو جالكوم سكرتير حليوة و انت الى كنت تعملى انترفيو ،احسان بيه حيعمل ايه ساعتها فيكى :-)
بس بجد البوستو الصورر جامده و معبرة
الا صورة الكعب ده:-)

Asmaa mahaba يقول...

طخيه وادينى رنه

Cute Kitty **sookra يقول...

ههههههههههه
وربنا انا كمان زى مايكل اموت واعرف بتجيبى الصور دى منين
بس بجد برافوا عليكى
ايون كدا لازم نوريهم العين الحمرا
مايجيبها الا ستتها طبعا
نحن وراكى ياشفقه
ياخراشى عليكى وعلى خفه دمك
وربنا بقيت بقرا وانا ميته من الضحك
سلامووووووززز

Cute Kitty **sookra يقول...

ههههههههههه
وربنا انا كمان زى مايكل اموت واعرف بتجيبى الصور دى منين
بس بجد برافوا عليكى
ايون كدا لازم نوريهم العين الحمرا
مايجيبها الا ستتها طبعا
نحن وراكى ياشفقه
ياخراشى عليكى وعلى خفه دمك
وربنا بقيت بقرا وانا ميته من الضحك
سلامووووووززز

Cute Kitty **sookra يقول...
أزال المؤلف هذا التعليق.
donya يقول...

صباح الخيررررررررررر
وياتري الشابه فين دلوقتي برضه واجب نزورها بكيس قشر برتقال
هههههههههه

تحياتي

حنين القلب يقول...

هههههههههههههههههههههههههههههههههه

طفشتى السكرتيرة وربنا عندك حق
اصلا الرجاله مش ليهم امان
وواحدة زى دى مش جايه تشتغل دى جايه توقع عريس يتجوزها

خييييييييييير ما عملتى يا شفقه

تسلم ايديكى

غير معرف يقول...

هههههههههههههههه

جدعه :))

تحياتي

شفـقــة و إحســــان يقول...

wanda
عارفة كان هيعمل ايه؟؟
عينك ما تشوف الا الضلمة.... هبقى بره البيت
وفاضلك زلطة وتطلع بره

شفـقــة و إحســــان يقول...

سومة
انتى جاية تودينى فى داهية؟؟
دانتى بتحبينى اوى
عموما لما اطخه هديكى رنة بس اوعى تفتحى عليا اموتك

شفـقــة و إحســــان يقول...

sookra
بالنوسبة للصور مش هاقولك ده سر الطبخة
وبعدين انا هوريله الحمرا والصفراء والوان الطيف كلها
لكن قوليلى هما فين السوتات دول؟؟

شفـقــة و إحســــان يقول...

donya
انتى جاية تمثلى ريا وسكينة
شابة مين يا شابة اللى هنزورها اوعى يكون قصدك المزغودة والنبى ما اروحلها الا بكياس بكابورت ده حتى قشر البرتقال غالى وخسارة فيها

شفـقــة و إحســــان يقول...

حنين القلب
ايه يا بنتى انتى بتشتغلى حرامية ولا ايه ؟
ايه طفشتى دى؟؟ دى لغة لصوص
بس علشان تعرفى اختك بتعمل ايه.... بس بينى وبينك شر ما عملت لانى عملت بلاوى بس خليها فى سرك

شوكولاتة يقول...

هههههههههههههههههه
حلو قوي البوست ده
وألف مبروك عليكي شنكلتي سونة وقطعتي البت ونفدتي أنتي
روحي ياشيخة وتعالي بسرعة
ههههههههههههههههههههههههههه

تسلم إيدك

morgana يقول...

ههههههههههههههههههههههه
مبروك عليكي الانتصار:)
ايوه كده
ما يجبها الا شفقة

سجود يقول...

السلام عليكم
لا بجد مبروووووووك
تهانينا
هههههههههههههههههههه

Hanan Elshafey يقول...

ههههههههههههههه

والله جدعه

كده احسن برده عالاقل اللي نعرفه

ريمان يقول...

ههههههههههههههههه

هههههههههههههههههههههه



الف مبرووووووووووووووووووك


بس دى كانت لازقه بغيره والله


الصور عجبانى اوى

بجد دمك سكر

ومبروك عليكى يا قمر


هههههههههههههه


بجد بوست يجنن

-_- يقول...

انتى عايشة ازاي ؟!!!
ربنا يكون في عونك يا احسان

شفـقــة و إحســــان يقول...

شوكولاتة
لحوستينى وبقعتينا.... هنعمل ايه دلوقتى فى المدونة الشيكولاتة لزقتها ومش عايزة تطلع
عاجبك كده؟؟
وبعدين ايه شنكلتيه ده كافيتى الراجل على وشه يا شيخة وقعتيله صف اسنانه
بقى بذمتك انا اعمل كده؟
ده انا كلى رقة

شفـقــة و إحســــان يقول...

morgana
منورانا وبالدهب واللولى مكترانا
يا ترى يا مرجانه هتدينى شوية من الكنز حلاوة الانتصار ولا هيبقى انتصار من غير حلاوة؟؟
وبعدين ايه انتصار دى حسستينى انى شايلة كلاشنكوف وواقفة على الجبهة

شفـقــة و إحســــان يقول...

سجود
ربنا يخليكى يا قمر ايوا كده عايزة اسمع مبروك دى كتير لحسن اليومين دول بالذات الناس بطلت تقولها

شفـقــة و إحســــان يقول...

حنان الشافعى
مش بذمتك صح على الاقل اللى نعرفه...لكن هو مين ده اللى نعرفه؟؟
انا عن نفسى معرفوش مشفتوش مقلتلوش

شفـقــة و إحســــان يقول...

ريمان
لا بس على مين يا ريرى ده انا جبت ميه مغلية 360 درجة فرنهايت وغليتها لحد ما الغرة ساح وانح وهى كمان معاه بقت هى والغرة متفرقهمش من بعض ودلقتهم بعيد ادام باب البيت
اما بخصوص الصور فمش معقول تتجننى مرة واحدة علشان حاجة تافهة زى دى

شفـقــة و إحســــان يقول...

Sharm
سؤال غريب جدااااااااااااااااااا
عايشة زى كل الناس كائن ياكل ويشرب ويتنفس من مناخيره

miroooo يقول...

انا اول مره ازور مدونتك بس بجد تحفه والبوست تحفتين بجد ضحكت من كل قلبى بالرغم من انى فى حاله مش ولابد على العموم ميرسى انك ضحكتينى واتمنى انى اكون ضيفه خفيفه عليك واتمنى ايضا دوام التواصل دمتى بالف خير

شفـقــة و إحســــان يقول...

miroooo
ايه حكاية التحف الكتير دى؟؟
انتى دخلتى مدونتى ولا بزار بتاع انتيكات فى خان الخليلى؟؟
عموما ولو عجبتك وضحكتى ابقى تعالى زورينا كل يوم بس ما تجيش وايدك فاضية

عاشقة القمر يقول...

كل سنه وانتي طيبه ربنا يحقق امنياتك

Mina يقول...

عاجبني قووووووي بصراحة اخلاصك وضميييرك في كتابة البوستات بتاعتك كلها
يانهار ابيض
بتجيبي الصبر ده مني
لا واييييييه كل حاجة مدعومة بالصور
ده انا بانزل البوست من دول وعلي مابالاقيله صورة واحدة بيطلع عيني وساعات كتيرة باتخنق وانزله من غير صور خالص
يانهار ابيض يانهار ابيض
ايه اللي بيحصل ده
ربنا يجازيك ياشيخة
ههههههههههههههههه