الاثنين، 22 مارس 2010

happy mothers day


امبارح كان اجمل واحلى واعظم يوم فى حياتنا وهو يوم عيد الام ست الحبايب
وانا جيت علشان اقولها واقول لكل ام

كل سنة وانتى اجمل واعظم واحلى واحن ام فى الدنيا
بس تعرفوا انا مش عايزة اقول الكلام التقليدى بتاع الناس كلها
وهو ان الام مدرسة وعندها فصول وبتدى العيال دروس خصوصية
وانها سهرت وتعبت
وماكانتش بتنام

ده علشان كان فى ناموس فى البيت

وهى عملانا حجتها ايون امال ايه؟؟
ولا هقول انها هى الاصل والاساس والجذر والمنبت اللى احنا منه
فرع مايل بعيد عنكم
طبعا مش هقول كده لانها مش شجرة
لا ده كفاية انها جايبة عفاريت وقرود بتتنطط فى البيت
ولا انها بتحبنا اوى
وبتخاف علينا موت من نسمة الهواء الطايرة
لا
انا الام بالنسبة لى ليها منظور تانى متدهور
اقصد متطور

منظور مرحلة ما قبل الجواز
هى الست اللى كانت بتتحايل عليا انا واخواتى اننا نساعدها فى شغل البيت

وكنا بنطنش وساعتها كانت بتذلنا
وبنسمع جملة يا فاشلة ابقوا قابلونى لو فالحتوا
وعمرتوا فى بيت

وفى الاخر برضه كانت بتعمل هى
بس بعد ما بناخد علقة موت اى والنعمة موت
تشهد علينا الشباشب وعصاية المقشة
ربنا يخليكى لينا يا ست الحبايب
يا مدوبة الشباشب
والمقشات

هى الست اللى كنا بنكركبلها البيت
ونجيب عليه واطيه هدوم هنا وهدوم هناك
وفردة جزمة هنا وفردة هناك
وشربات لحد ما تتعمى من الريحة

لحد ما كانت بتحدفنا بيهم
وكل واحدة ونصيبها بقها من الحدف
بالجزم طبعا
وتفضل تصوت لحد ما صوتها يروح
وميفضلش الا اننا نتعامل مع بعض بالاشارة
وكل لبيب بالاشارة يفهم

هى الست اللى لما بعيأ بتاخد اجازة من شغلها
وتيجى تودينى للدكتور وتفضل سهرانة جنبى
لحد ما رقبتها تتدلدل من كتر النوم على نفسها
ولما تفوق من الغيبوبة بتاعتها
كانت بتدعيلى
انى اخف علشان ترجع الشغل بسرعة
وميخصموش كتير من المرتب

والا ساعتها مبيبقاش فيه مصروف
وبتعلن ساعة الصفر فى البيت
وتقعد تدعى عليا وعلى اليوم اللى جيت فيه
ربنا يخليكى ليا يا ست المديرة يا مدبرة الميزانية


هى الست اللى لما بابا بيناكف معايا واكون مش غلطانة
بتقعد تشد فى شعرها منه وتوريله العين الحمرا والصفراء
لحد ما الراجل يقول يا فكيك و يطفش ويسيب البيت

واقعد انا وهى نزقطط فى البيت براحتنا
ايون ست بتعرف ازاى تاخدلى حقى
ربنا يخليكى ليا يا ست الستات يا حمشة

هى الست اللى كل ما بعوز منها حاجة
وبقعد افرك شمال ويمين وادبدب فى الارض بتجيبهالى
بس بطلوع الروح
وبعد ما بتطلع عينى وتبظ لبره
وفى الاخر تخصم من المصروف
بس مش مهم المهم انها بتدينى
ربنا يخليكى ليا يا وزيرة المالية

هى الست اللى بتقعد تدعيلى وتكتر من الدعوة
علشان انجح واشتغل مش علشان ابقى مرموقة
لا علشان ابطل اقول كلمة هات
لان ساعتها بترد عليا رد منطقى وتقولى
هاتك الهيتهات

مش مهم معناها لان احنا الاتنين مش عارفين
مرحلة بعد الجواز
هى الست اللى بتلبسنى فستان الفرح وبتقعد تزغرط لحد ما قلبها يقف
مش من فرحة الجواز
لا
من الفرحة بانى غورت من ادامها
ولقيت راجل يشيل همى وهيتنقل القرف ليهوبتقعد تغنيلى واخيرا اتجوزتى
وهتحلى عن قفايا

والبيت هيفضى عليا
يا سعادتى يا هنايا
دى من تاليفها على فكرة
وساعتها ابقى حليت عن كل حاجة فى البيت
ربنا يخليكى ليا يا ست الستات
يا ست الكواكب والمجرات


هى الست اللى خلت احسان يدفع دم قلبه فى عيدها

وقعد يحوش يجى حدشتاشر شهر علشان يعرف يهاديها
وبعد كده هيداين

وهيدخل اللومان بسببها ربنا يفك سجنك يا سونة
ويخليكى يا امى وتسجنيه كمان وكمان
اهو السجن برضوا للجدعان
المهم الهدية ليكى ولطنط اى حاجة تانية مش مهم

هى الست اللى لما بطرد من البيت شر طردة
ببؤجتى وانا حافية
هى اللى انا بروح اقعد عندها واقعد أاوأ وانهقاقصد اعيط براحتى
وكمان هى اللى بتشتريلى الشبشب
بس مش علشان رحتلها حافية

لا علشان تدينى بيه وفين يوجعك
لانى سيبت البيت

صحيح هى بتدينى على دماغى
وبتفرتك كل شباشب البيت على نفوخى
وبتقعد تدعى على اليوم اللى رجعتلها فيه
وبتقف فى صف احسان
بس برضه فى الاخر
بسمع كلمة خليكى طابقة على نفسى ومرزوعة
لحد ما يصالحك
ربنا يخليكى ليا يا وزيرة الشئون الاجتماعية

هى الست اللى لما بغلط مع حد او مع جوزى بتقعد تفهمنى وتوعينى
مش علشان مصلحتى
ابسوليوتلى
لا علشان مرجعلهاش تانى
لانها مبقاش عندها مكان

وماصدقت زاحتنى من البيت
وبتدعى للباقى انهم تجيلهم زوحة
ويغوروا ويحصلونى
وتقعد هى والحاج يشربوا شاى فى الفرندا

هى الست الا لما مبعرفش اعمل اكل

او اى حاجة حلوة بتصل بيها تقولى الطريقة على اساس انها برنامج المطبخ
وفى خدمة ما يطلبه الطفسين
وبتقعد تملينى فى التليفون الطريقة

لحد ما تدفعنى فاتورة تودى احسان فى داهية
وفى الاخر برضه بيطلع عك
ربنا يخليكى ليا يا ست الشيفات يا مامتى

بصراحة مش عارفة اودى جمايلك فين ولا فين

بس بجد ربنا يخليكى ليا يا ست الحبايب يارب
لانك الحب والحنان والعطاء والدعوة الحلوة
يارب تفضلى معايا كل سنة وماتفارقنيش ابدأ ربنا يحفظك ليا يارب ويجعلى فيكى الخير والبركة

***تهنئة خاصة لاجمل امهات التدوين***
كل سنة وانتى طيبة يا فاتيما يا ام يوسف وربنا يرجعهولك بالسلامة
كل سنة وانتى طيبة يا اجمل ام ماما امولة ياترى ولادك جابولك ايه؟؟
اوعى يكونوا ضحكوا عليكى فى الهدية
كل سنة وانتى طيبة يا خيخة يا ترى الواد العفريت شريف جابلك ايه؟؟
كل سنة وانتى طيبة يا اجمل قوس قزح فى الدنيا ولو انى مش عارفة انتى مختفية ليه وفين؟
كل سنة وانتى طيبة يا سحورة يا ترى حماتك الملاك هدتيها بايه دى غنية وبتحب الهدية
كل سنة وانتى طيبة يا دكتورة ستيتة حسب الله الحمش
يا ترى ولادك جابولك ايه ؟؟
اوعى يكونوا ضحكوا عليكى بسبورة
كل سنة وانتى طيبة يا صيدلانية طالعة نازلة
انا عارفة ان ولادك هما اللى قطعوا نفسك من الطلوع بس معلش استحمليهم

كل سنة وامى وطنطى الغالية وكل الامهات بخير وطيبين
وسمعنى اغنية ست الحبايب يا حبيبة





شفقــــــــــــــــة

هناك 73 تعليقًا:

كيكى عوووووو يقول...

ياختى بركة انك غيرتى البوست النحس بتاع المرة الى فاتت
وانا فين انا عاااااااااااايزة افهم من الامهاااااااااااااات
لية كدة محدش عبرنى!!!!
انا عايزة الهدية دى الاهم عندى يعنى!!
ماعلينا
كل سنة ومامتك مامتى طيبين لانهم من نوع خاص زى بعض
وش بيغمز
عوووووووووووو

Kiara يقول...

هههههههههههههههه والله عثل

كل سنة وكل ام بخير

وكل سنة وانتي طيبة ياشفقتي

سواحة يقول...

:-)) اولا مينفعش
البوست ده باطل فين الصور؟؟؟
و عليه لازم الاستاذ احسان يكتب بوست عن حماته :-))) بالصور
علشان بتكم يعمر كده

و بعدين انتى اشتغلتى فى هيئة الاحصاء و التعبئة الهداياتية ؟؟ و حطلعى اسرار الامهات ديه كلها لمين ؟؟ وشوشينى حيدوكى كام فى الاخبارية ديه ؟؟

و كل سنة و انا و انت و كيكى طيبين
اشمعنا صحيح
مش ده عيد الربيع :-)))

غير معرف يقول...

هى واحده مفروسه حامل؟؟

عاشقه الرومانسيه يقول...
أزال المؤلف هذا التعليق.
عاشقه الرومانسيه يقول...

هههههههههههههه
والله انتى عسل
ربنا يكون فى عون ماما
واضح انها شافت منك كتير
هههههههههههههههههههه

ستيتة يقول...

اجمل وصف للمامات وعيالهم :)
ربنا يخلي مامتك وزير المالية والشئون الموجتماعية والله عثل عثل

كل سنة وانتي طيبة يا شفشوقة
وربنا يخلي لك سي احسان بيه يارب

Unknown يقول...

تصدقى البنى ادم دا 0000 طول عمرة
اية يا بت دا علنى كدة تقولى على الاسطوانة اليومية فى الاسر المصرية وتشردى لنا كلنا
كدة ينفع
كمان عاملة اهداء لكل الامهات ونسيتنى
هو انا مش ام ميشو ولا مش عاجبك ؟ يا ام مانكى؟؟
وانا اللى كان نفسى تجبى بنت واعمل عليكى حما
الحمد لله انه طلع واد
لكنتى الوقت بتدعى على انا كمان وتشردى وتقولى غرمتكم جهاز وهدايا
ماشى يا ست شفقة


كل عيد ام وانتى بالف خير انتى وطنطتينى

وبوسى لى مانكى
ربنا يخليه ليكم يارب
ويخلى لى ميشو

Unknown يقول...

ههههههههههه
كل سنة ومامتك طيبه
وربنا يخليهالك ويباركلك فيها يارب

مهموهة أحمد يقول...

شفقة هانـــم .......
حبيبة قلبي واحشاني موت موت موت موت و الله
و بوست جميل جميل جميل
و فعلا امهاتنا بيعملوا معانا كده علطول و كلنا بجد

بس رغم كده حلو و زي العسل على قلوبنا

كل سنة و انتي و مامتك و حماتك و مامتي و امهات الدنيا كلهم بخير و سلام و صحة دايمة يا رب

خالص حبي و تقديري

وحشتني موت بجد

Ms Venus يقول...

كل سنة وكل ام بخير وصحة دايما


تحية ليكى يا شفقة هانم

صيدلانيه طالعه نازله يقول...

من الاخر كده و بعد التسيييييح الجامد
للست الغلبانه دى
احب اقولها الله يكون فى عونك انك استحملتى العالم المفتريه دى و لسه صامده و صابره و محتسبه
ههههههههههههههههههه

كل سنه و كل المهمهاااااااااات طيبيييييين

ميرا ( وومن ) يقول...

ايييييييييييه هي دي الأم يا شفقة

ربنا يخلي كل الأمهات يارب ويبارك فيهم

بس تصدقي كل أم وليها أسلوب

يعني لو والدتك بتفضل الشبشب
في ناس بتعض وناس بتشد الشعر وفي ناس غاوية غاوية تحدف بالأطباق وتكسر الصيني علي دماغ

مش مهم الأسلوب المهم النتيجة
كل سنه وهما طيبين وبخير
كل سنه وكل أمهات التدوين طيبين

شفـقــة و إحســــان يقول...

كيكى
انا غيرت البوست النحاس وحطيت البوست الدهب يلا كلفت نفسى علشان خاطر عيونك
وبعدين تعالى هنا هو انتى اتجوزتى وخلفتى من ورايا وانا مش دريانة هو انا بقيت من اهل الكهف ولا ايه؟
وبعدين ايه عبرنى دى؟؟
احنا يا بنتى فى عيد الام مش عيد 6 اكتوبر
وش بيفتح بقه
ههههههههههههههههه

شفـقــة و إحســــان يقول...

كيارا
عثل وبالثاء كمان
حيث ان اذا لابد يبقى بعد كده تدخلى المدونة برغيفين عيش وشوية طحينة لزوم العثل
يا ترى المثاثة اخبارها ايه

شفـقــة و إحســــان يقول...

wanda
باطل جواز عتريس من فؤادة باطل احنا هنمثل
انا قلت اما اجيلكم مرة كده من غير صور اشوف هتاثر ولا ايه
بس واضح ان ليها تاثير كبير
اما عن احسان بيه فهو مش هيكتب بوست بالصور عن حماته لا ده هيكتب فيه شكوى للمدعى العام الاشتراكى
كمان انا مقلتلكيش انهم اتحايلوا عليا علشان اشتغل فى الاطباق المطبخية وانا مرضيتش او بمعنى اصح بفكر بس بختار المطبخ المناسب للنشرة الاخبارية المطبخية

شفـقــة و إحســــان يقول...

غير معرف
مفروسة حامل؟
ودى هتبقى حامل ازاى طول ما هى مفروسة
اكيد انا اللى اختلط على الامر
وعموةما هبقى اسالها وارد عليك او عليكى

شفـقــة و إحســــان يقول...

عاشقة الرومانسية
بصراحة شافت لحد ما اتعمت من كتر الشوفان وبقت تلبس نضارة كعب الغزال
ربنا يخلينى ليها قولى يارب

شفـقــة و إحســــان يقول...

ستيتة حسب الله الحمش
انتى غيرتى اللغة وخلتيها عبرى ولا ايه يا دكتورة ايه مامات دى؟؟
الا صحيح الدكتوراه بتاعتك فى ايه؟؟
اوعى تكون فى حتى
كل سنة وانتى طيبة يا اجمل ام

شفـقــة و إحســــان يقول...

نهر الحب
طيب ولو مشردتش هشرد لمين وهطلع التشرد الاطفالى فى مين؟؟
يعنى يرضيكى اطلع التشرد فى حد غريب؟؟
اما بمناسبة الاهداء فانتى ناسية انى اذاعية كبيرة وكنت بشتغل فى محطة المتشردين المتحدين
كمان تعالى هنا مين ميشو ده انتى خلفتى من ورايا؟؟
اما بخصوص مانكى فقالى سلمى على طنطى ام ميشو وقوليلها تبطل تقعد مع ميشو كتير
لحسن بعد كده هتنونو
ربنا يستر علينا

شفـقــة و إحســــان يقول...

esraa
كل سنة وانتى طيبة يا اسراء ومامتك طيبة وكل المهماهات طيبين ويقرفونا ونقرفهم كمان وكمان
قولى امين

شفـقــة و إحســــان يقول...

مهمومة
بقى بذمتك مهمومة ولا الوفية للابد ناس غريبة
هههههههههه
كمان ايه حكاية التوكيد اللفظى الفظيع ده
تلاتة موت وتلاتة جميل
انتى خريجة لغة عربية قسم جيب شروكى ولا ايه يا مها؟؟
وكمان حلو وزى العسل على قلوبنا لا
ده انتى شكلك فتحتى سرجة وعلشان كده مهمومة
كل سنة وانتى طيبة يا قمر

شفـقــة و إحســــان يقول...

Ms Venus
صحة؟؟
وهتيجة منين الصحة طول ما فى هدايا كسر الحيل
ربنا يقوينا بقى ويدينى الصحة
كل سنة وانتى طيبة

شفـقــة و إحســــان يقول...

صيدلانية طالعة نازلة
بذمتك متعبتيش من كتر الطلوع والنزول يا بنتى ده انا نفسى اتطعلك
وبعدين ايه الالفاظ المريبة دى صامدة وصابرة ومحتسبة
انا بتكلم عن امى يا بنتى ام شفقة مش ام المصريين

شفـقــة و إحســــان يقول...

ميرا
يا ساتر يارب تكسر صينى وتعض وتشد شعر دى امهات دى؟؟
بيجبوهم منين الناس دول
لا ربنا يخليلى مامتى واعرف قيمتها وقيمة الزعيق والشبشب دول كفاية
وبعدين انتى عندك حق المهم النتيجة
حاكم احنا نحب المصايب
واللى اكيد هتكون فتح نفوخ او غرزتين على الماشى
عموما برضوا كل سنة وهما طيبين
وسمعينى اغنية الصلح خير

فاتيما يقول...

يا لهوتينى يا شفشوقتى

دنتى شنيرتى عيد الام يا بنتى

مش كفاية البت كيكى

انتى كمان

بس تصدقى كلامك اغلبه صح
اصل دا اوبشن امومى برضو
اومال يحبونا بس
لازم يربونا برضو
مش كله مشاعير و عواتيف و شتيمة
لازم شوية ضرب


ربنا يخلى ماما و احسان افندى يا رب
و مينحرموش منك

ميرسى يا حبيبتى على المعايدة
يا رافعين معنوياتى للسما
و محسسنى بأنى ام عليها القيمة بجد

بوسات و حضونات
يا ست الشفشوقات

خواطر شابة يقول...

جميلة منك هذه التهنئة الخفيفة الدم والمختلفة بحيث لاتشبه ابدا ما سواها
كل سنة وانت وكل الامهات بخير وسلامة
دمت بكل الود

Enbee يقول...

أول مرة اشوف حد كتب عن عيد الأم بالشكل ده.. حقيقي مميز...
ربنا يخليهالك ويخلي كل الأمهات يا رب ويخلي شباشبهم الطايرة والحايرة والمطرقعة وأبو وردة والزنوبة...

هييييييييه فكرتينا بالذي مضىىىىى

تحياتي العطرة

ريمان يقول...

السلام عليكم

انا جيييييييييت

ازيك يا جميل

كل سنه وكل الامهات طيبين وبخير يا رب

تحياتى ليكى

بجد البوست توحفه كالعاده وظريف بجد وتعليقاتك على الصور دايما بتعجبنى

سواحة يقول...

مبروك عليكى عتريس يا فؤادة
خلاص الجوازة مش باطلة :-))))

ايوه كده بس و النبى عايز فى النقطة بتاعت الفرح نسخة من جواب المدى الاشتراكى :-))

ايه حكااية المطبخ ده ؟؟ انت حتقطعى على صبرنى يا ياسمين ؟؟

dreem يقول...

كل سنة وانتى ومامتك وكل الامهات طيبين يارب
ودايما ايامك تكون سعيدة
تحيتى

shimaa elkholy يقول...

ايه ده وانا مش من الامهات ولا ايه

ماليش دعوه ياعم

ده ام بالثلاثه يعنى

اه يا منسيه يانى مامايا

كل سنه وانتى طيبه يا جميل وكل الامهات طيبين وبخير يارب

شفـقــة و إحســــان يقول...

فاتيما
ايه البخل ده يا طمطم يا لهوتينى اتنين بس طيب قولى يا لهوتيتيييييى
وبعدين انا مجبتش شنبر فى عيد الام مامتى مش بتلبس نضارة دانا جبتلها دولاب بحاله
وبعدين ايه حكاية اوبشن دى وهى ماما غسالة فول اوتوماتيك
كل سنة وانتى طيبة يا اجمل واحلى ماما فى التدوين

شفـقــة و إحســــان يقول...

خواطر شابة
بقى كده تقولى على تهنئتى متخلفة
وبعدين طبعا لازم تكون ابدا ما سواها مش خريجة السرايا الصفراء
كمان المعايدة بما انها متخلفة يبقى تقولى
كل سنة وكل الامهات طيبين وولادهم مجانين ومتخلفين

شفـقــة و إحســــان يقول...

Barracuda
طبعا مميز لانه بطعم الخل والليمون امال ده انا محبشاه تحبيشة انما ايه عجب
وبعدين ايه حكاية الشباشب بكل انواعها دى ابو وردة والزنوبة واللى بيطرقع
والنبى ما تفكرنى لحسن كل ده انا اتضربت بيه

شفـقــة و إحســــان يقول...

ريمان
خضتينا يا بنتى مش تبقى تيجى بشويش
وبعدين اذا كان تعليقاتى على الصور بتعجبك يبقى اتفضلينى كلى على بعضى وحياتك ما انا راجعة واحسان ما هيصدق الاقى متواه

شفـقــة و إحســــان يقول...

Wanda
والنعمة الصور دى علشان خاطر عيونك انتى بس
اما بخصوص النقطة فانا مش هبعتلك نسخة من المدعى الاشتراكى لا انا هبعتلك القسم كله بظباطه وامناءه وعساكره وفوقيهم المدعى العام الاشتراكى
وربنا يستر عليكى
ما تخافيش هبقى اجيبلك عيش وحلاوة بمناسبة المطبخ

شفـقــة و إحســــان يقول...

dreem
كل سنة وهما واحنا طيبين بس على فكرة انا مامتى ما اسمهاش سعيدة
هى غيرت اسمها من ورايا ولا ايه؟؟

شفـقــة و إحســــان يقول...

ندى الياسمين
وانا اقدر برضوا انسى الروايح الحلوة طيب بالذمة لو نسيتك هفتكر مين
ندى الفجل مثلا
كل سنة وانتى طيبة بالتلاتة وتلاتين
بس هو مين العم ده ؟؟ ها انا مغيرتش جنسيتى والنعمة

الجواز و سنينه يقول...

الست
ميه ميه
عسليه
هههههههههههههههه
يالهوى على الست دى اللى هيه امى
ياما شالت و ياما ضحت
كان غباء اظاهر
ههههههههههههههههههههههههههههه
كل سنه و هيه طيبه و بلاش افترى على الست

أمل حمدي يقول...

كل سنة وانت طيب يا رب يا شفشوقة أنت وماما

micheal يقول...

كل سنة وكل أم بخير ومرحبا بعودتك لبوستات الساركيزم اللذيذة دي
وحفضل أقولك الصور اللي بتجبيها بتدي للموضوع شكل تاني خالص
:)
تحياتي

رحلتنا في الحياة يقول...

كل سنة وكل امهاتنا بخير يارب
ربنا يخليلك مامتك وكل سنة تتدفعى دم قلبك فى الهدية :))

احلام جوليا يقول...
أزال المؤلف هذا التعليق.
احلام جوليا يقول...

بجد موت على نفسي من الضحك والمصيبة اني كنت بقرأ البوست وانا في الشغل وقاعدة في مكتبي لوحدي زي المجانين عمالة اضحك واكتم الضحك وكل الي يجي يبص علي ،، منظري زبالة بصراحة قدام العالم
بجد ربنا يسامحك ايه ده كل ده عملتيه في ست الحبايب كل سنة وهي طيبة وكل ام في الدنيا طيبة وكل سنة وانت طيبة بجد بوست روعة خرجني من مود الضيق الي كنت فيه .

Asmaa mahaba يقول...

هههههههههههههههههه منك لله يا شفقه دا انتى مش حتوردى على جنه يا شيخه
ههههههههههههههههههه ايه الصور دى يا بنتى
كل سنه وانتى طيبه وكل الامهات طيبين يا رب وتكونوا انتى واحسان بخير حال يا رب

صدى الصمت - عاشقة الورد - يقول...

بوست جميل قوى موتنى من الضحك
هههههههه
كل سنة وكل الأمهات(بما فيهم أنا طبعاً)
بخير وصحة وسعادة
تحياتى

همس الاحباب يقول...

ههههههههههههه
ههههههههههههه
يا عينى عليك يا احسان يا خويا
وانا بقول كان مالك مش عوايدك وانت فى بور سعيد تبقى مكلضم كده اتراى من تاثير الهدية
ولا يهمك يا راجل كلنا ذلك الرجل
كله الا ست الكل
كل سنة وانتم طيبين
وكل الامهات بخير وسعادة
تحياتى

ALLELIO- موطنـــــــــــــــــــــــــــى(ma patrie) يقول...

ياةةة فات عليا والله ومقلتش لماما كل سنة وحضرتك طيبة لكن الموضوع تحفة تحفة والله

تشكرات افاندوم

طـائر الليــل الحـزين يقول...

كل سنة وكل ام طيبة
مش فى عيد الام بس فى كل يوم وفى كل لحظة
عشان لو هنتكلم عنهم مش هنكفى كلام
وبجد معاكى حق فى كل المراحل اللى اتكلمتى عنها

just waiting يقول...

ههههههههههههههههههههههههههههههههههههههههههههه
عادي يا شفشوقتي ليها حق تعمل فيكي اكتر من كدا كمان
احمدي ربنا انها لسه مستحملاكي لحد الناهردة
وكل سنة وهي طيبه :)

قلم رصاص يقول...

كل سنه ومامتك طيبه وكل امهاتنا يارب

بوست جميييييييييل جدا

تقبلي مروري

Maha Shahen يقول...

ربنا يباركلك فى والدتك وفى طنطك ويخليكى لينا دايما تكتبى من اجمل السطور اللي تسعد القلب
يمكن انتى مطلعه شوية الامهات زى عطيه المفتريه بس الحمدلله اننا عارفين ايه ورا الوش الشديد دا وهو الاصل دايما وابداً من الحنيه والطيبه والقلب اللي بيخاف علينا وبيعرف مصلحتنا
ربنا يباركلك ويبارك فى كل امهات المسلمين ويسعدهم الى يوم الدين
بجد موضوع روعه وانتى ما شاء الله كتبتيه بموهبتك الجميله خلتينى ضحكت من قلبى والله والحمدلله ان المود اتغير عندك يا رب دايما اشوفك مبسوطه وسعيده منغير اى سوء

حنين القلب يقول...

ايه ده ؟
انا علقت هنا يا جدعان
تعليقى راح فين
ولا ده تاثير قلة النوم

المهم
بركه ان المزاج العالى اتظبط يا شفقة
تصدقى
هى دى فعلا الام
صورة بالكربون من امى
كل سنه والامهات كلهم طيبين وانا كمان بما ان ده اول عيد ام يجى عليه وانا ام

دكـــــتور جدا يقول...

السلام عليكم
نرجو مشاركتنا في نشر الفن الهادف
بنشر (شبكة صوتنا للفن الهادف)
http://www.sawtona.blogspot.com/
ووضع البانر الخاص بالشبكة في مدونتكم الرائعة
http://img23.imageshack.us/img23/6886/91117988.jpg
جزاكم الله خيرا

اقصوصه يقول...

كل عام وامهات العالم

بالف الف خير :)

ahmed_k يقول...

ههههههههههه
كل سنه وأنتي طيبه يا شفقه
بس أنتي كده شركتي الأمهات خالص
بجد بوست تحفه وأول مره أقرأ بوست بخصوص عيد الأم بهذه الفكره

تحياتي لك ولأخي الغالي إحسان

شفـقــة و إحســــان يقول...

الجواز وسنينه
ايه يا بنتى ده هى امى بياعة خضار ولا ايه
قال ميه ميه عسلية

والله الستات دولا مجانين على راى ابو الليف
وبعدين خلى بالك من الميه لا تسيح العسلية وتلزقلنا المدونة وتبقى حكاية

شفـقــة و إحســــان يقول...

ماما امولة
ام الكل ربنا يخليكى يارب وكل سنة وانتى طيبة وام للمدونين

شفـقــة و إحســــان يقول...

micheal
ايه يا ابنى ده ايه الطفاسة دى؟؟
بقى انا بكتب بوستات كوكيزم ولذيذة كمان
اوعدك بعد كده ابقى اخليها بانيزم مخليزم بالبيض والبوقسماتيزم
وبالهنا والشفا
والصور برضوا بعينك

شفـقــة و إحســــان يقول...

احاسيس ايوشة
ايه يا بنتى دم دى وهو انا هتبرعلها
عموما انا مبدفعش انا باخد بس
اما اللى بيدفع دم قلبه ربنا يخرجهولنا بالسلامة ويفك حبسه
هههههههههههههههه

شفـقــة و إحســــان يقول...

احلام جوليا
ايه يا بنتى ده الناس تقول عليكى ايه قاعدة تضحكى فى مكتبك
الناس تقول ايه شغالة فى شباك حجز التذاكر بتاع السينما
عموما ولا يهمك ولا اترفدتى ابقى بلغينى علشان اروح اقدم للوظيفة بدالك واطلع عينهم

شفـقــة و إحســــان يقول...

سومة المجنونة
كده برضوا يا سومة تقوليلى مش حتوردى على جنة ماشى وهو علشان رحتى عملتى عمرة هينكشف عنك الحجاب
اوكيه براحتك
بس امانة تدعيلى متدعيش عليا دانا شفقة يا سومة
زميلة الكفاح والمرمطة البوستيه

شفـقــة و إحســــان يقول...

صدى الصمت
انتى بتعيدى علينا ولا على نفسك يا صدى
عموما هديتك عندك ابقى خديلك وردة وقولى لنفسك كل سة وانا طيبة

شفـقــة و إحســــان يقول...

همس الاحباب
ايون كده يا خالد واسى اخوك امال
مكانش انت تقف جنبه مين هيواسيه فى بلوته
ويا ترى بقى انت عملت ايه مع الحاجة وست الكل
شكلك كده خلعت

شفـقــة و إحســــان يقول...

بلياتشو
اكيد انت مقلتلهاش كل سنة وهى طيبة لان فى فرق فى توقيت تركيا عن مصر
ميرسى افنذم على المجاملات الرقيقات

شفـقــة و إحســــان يقول...

طائر الليل الحزين
كل سنة وهما طيبين فى كل وقت وفى كل لحظة يبقى هما طيبين واحنا اتخرب بيتنا
وعلى كده احسان مش هيطلع من اللومان ابدااااااااااااااا

شفـقــة و إحســــان يقول...

Just waiting
للاسف هى مش لسه مستحملانى لانى للاسف برضوا سيبتلها البيت وخلعت ويا فرحتها هى والحاج
ربنا يسهله بس برضه من وقت للتانى هطبق على نفسهم

شفـقــة و إحســــان يقول...

قلم رصاص
ربنا يخليك يارب والنعمة انت من ساعة ما بريت القلم وسنيته وانت بتنقط عسل

شفـقــة و إحســــان يقول...

nour shahen
ربنا يخليكى يا رافعة من معنوياتى ومعنويات قلمى
بقى انا كتيبه بحالها اللى عمرى ما رحت الجيش ولا شفته
عموما ميضرش بس اهم حاجة مكنش كتيبة اعدام

شفـقــة و إحســــان يقول...

حنين القلب
ايه يا حنين جدعان وكلام فاضى من ده انتى داخلة مزاد ولا ايه
وبعدين ايه يعنى حتة تعليق راح تلاقى احسان كان جعان وكله بالهنا والشفا
وبعدين المزاج اتظبط علشان احسان دفع دم قلبه واتحبس ايوا كده ما احلاها عيشة الحرية
وبعدين تعالى هنا انتى بقيتى ام مستجدة
كل سنة وانتى طيبة

شفـقــة و إحســــان يقول...

ضكتور جدا
ان شاء الله نشارك بس موعدكش انه بعد مشاركتنا هيبقى فن هادف
ربنا يستر

شفـقــة و إحســــان يقول...

اقصوصة
يا عم يا عم جاية عندنا تعيدى على كل العالم
على كده احنا مش هنخلص يا اقصوصة قبل السنة اللى بعد بعد بعد الجاى