الخميس، 21 أكتوبر 2010

يــــــــــــــلا حـــــــالا بالا ....حـيوا ابو الفصـاد

سونة : ايه يا شفقة الشمع و البلالين دى كلها

انتى ناويه تلمى عيال الشارع وتلعبى معاهم؟؟
ولا عندك سبوع؟؟ ولا انتى اتهطلطى يا روحى ولا ايه؟؟ شفقة: بقى كده برضوا يا سونة ...بقى انا مهطولة ؟
شايفنى باكل كمامى وبعض فى الحاف.... قال وايه انا اللى كنت عملالك مفاجعة
سونة: لا العفو ده انا اللى باكل مشابك الغسيل
وحياتك بلاش انتى ومفاجعاتك اللى تودى فى داهية دى
الواحد مش ناقص مصايب
مش كفاية انتى يا شفقة عليا
مصيبتين فى الراس توجع... وانا راسى اتفتحت مش اتوجعت


شفقة: يا سيدى مش انا اللى عملالك المفاجاة

دى ماموه .....مامتى حبيبتى ....قرة عينى
سونة:خير اللهم اجعله خير

انتى بقيتى بنت ابو لهب ولا ايه ؟؟

ربنا يجعل كلامنا خفيف على حماتى قنبلة حياتى

يا ترى الحاج طردها من البيت.... وجاية تقضى معانا الويك اند
ما انتم اصلكم عيلة تغم وتسد النفس
شفقة: ايه ده اتطردت ايه وبتاع ايه !
وهو حد يقدر دى اليدر يا ابنى اللى مزبط ومربط البيت
وبعدين لما احنا نسد النفس ...امال مين يفتحها ؟؟
سونة: ده على اساس انكم مخلل صح
شفقة: بطل بقى تهريج ....يا ابنى انت ناسى ولا ايه عيد ميلادك بكرة
كل سنة وانت طيب


وانا بقى بالمناسبة دى عزمت كل العيلة علشان يحتفلوا بيك

ونهف التورتة سوا
ونقول يلا حالا بالا بالا حيوا ابو الفساد ......ها
سونة:كنت زمان ابو الفصاد اما على ايدك بقيت فساد
وبعدين يحتفلوا بيا ولا يقضوا عليا
دول تتار يا امى وهيجوا يعملوا هجوم على البيت




شفقة: بقولك ايه كفاية هزار بقى

ويلا استعد علشان بعت اشتريت شوية حاجات صغننة كده وزمانها هتوصل
سونة: يـــــــــــا خراب بيتى المستعجل

جبتى ايه يا جلابة الهنا ......يا وش السعد

شفقة: ابدا تورتة 3 ادوار.... ويجى عشرة كيلو حلويات شرقية
و6 دسة جاتوه و5 كيلو ساليزون
على كام كيلو كرواسون ....على 3 كراتين بيبسى كانز
يعنى مش كتير بس تفتكر يقضوا ولا نطلب تانى؟؟
سونة: نطلب الاسعاف او بوليس المطافى
قال يقضوا قال دول مش هيقضوا دول هيقضوا عليا يا شفقة
ومش هيبقى عيد ميلادى
لا دى هيبقى يوم الذكرى السنوى بتاعتى
حرام عليكى يا شيخة كل دى حاجات
وكمان تورتة 3 ادوار
ليه يا امى وهو فرح ؟؟
ده انا لو فكرت اتجوز تانى ......مش هدفع المصاريف دى كلها!
خربتى بيتى يا شفقة ....... اشوف فيكى يوم يا مفترية
شفقة: يا شيخ بدل ما تقولى كتر خيرك انك بتهتمى بيا
وبتفتكرى عيد ميلادى ....حاجة تعل
سونة: الهى يجيلك زهيمر يا شفقة ليوم القيامة
اذا كانت الذاكرة هتعمل فى جيبى كده وهتخرب بيتىاما الحق اروح بقى الشغل ااقدم على سلفة لعشر سنين قدام
وجاء اليوم التالى والتتار ......وصلوا وعملوا هجوم على البيت
ماما :كل سنة وانت طيب يا حبيبى عقبال مليون سنة
سونة: وانتى طيبة يا حماتى .....بس بلاش حكاية مليون دى لتستجاب
وهو انا عارف اعمر سنة مع بنتك.... لما تدعيلى بمليون
دانا كبيرى كام شهر وشوية كسور
ماما:" ههههههههههههه ....يوه جتك ايه دمك خفيف
ده انا بنتى تخلى العجوز..... يرجع صبى
سونة: صبى قهوجى وانتى الصادقة
امال الواحد شعره ابيض وطقطق من ايه؟؟
دانا قربت اصلع يا حماتى وازرع شعر .......دى توكسفين كله دمار شامل شفقة: بقى كده ...طيب مش هوريك هديتى
ده انا جايبالك ترننج وكوتشى بعينك
خلاص يا ماموه ....اوعى تقوليله على المفاجاة اللى انتى كمان محضراها
ده ما يستاهلش
سونة: مفاجأت تانى ؟؟
ابوس ايدك...... ده الشركة اعلنت افلاسها.... هروح لمين تانى
ماما: هههههههههههه عموما كل سنة وانت طيب
وانا بقى بالمناسبة دى حجزتلكم يومين فى اسكندرية
ده كادو عيد ميلادك ....روحوا اتفسحوا وقضوا يومين
واعملوا شهر عسل من تانى
سونة:عسل!! وهو ما بيخلصش فى العيلة دى ولا ايه؟؟
ده انتم على كده ......عايزين بلاليص مش اجواز
عموما متشكر يا حماتى ......وكل سنة وانتى طيبة
وتانى يوم لمينا البؤج وشدينا الرحيل وسافرنا اسكندرية
ويا على هواء اسكندرية.... وبحر اسكندرية ...وشط اسكندرية
شفقة: يلا يا سونة عايزة انزل البحر احنا هنفضل قاعدين كده؟؟


انا جاية استجم......... واشم هواء ... والعب بالودع
سونة: جاية تستحمى طيب..... ما الحمام قدامك اهو

خشى خدى دش لحسن ريحتك ...قلبت البحر يا شفقة والودع استخبىء
شفقة: يلا بقى بطل رخامة ........انا عايزة انزل البحر
سونة: وانا حايشك ما تنزلى............"فى سره" الهى ياخدك البحر وما يرجعك تانى
شفقة: يلا بقى ماليش دعوة عايزة انزل البحر ...اها اها

سونة:امرى الى الله بس يارب دعوتى تستجاب المرة دى
شفقة:ايه يا سونة احنا جايين على البحرعلشان تنام مش مكفيك النوم فى مصر

كمان جاية تنام فى اسكندرية

احنا مش فى البيت هنا..... احنا على البحر...... يعنى شوية شعر....شوية هيام....شوية رومانسية
سونة: شعرية........ وملوخية انتى جوعتى ؟؟
شفقة: يووووووووووووووه بقولك ايه انت زهقتنى... هات لى ايس كريم
علشان حرانة ....وسودانى ....وكاجو ....ولب..... وام الخولول علشان تحرم تتريق
سونة: ما اجبلك خولول شخصيا تطلعى عينه حبة زى ما طلعتى عينى
حاضر يا ستى هجبلك بس يارب نخلصويا ام الخلول
الهى تقف فى زورك
كمان انا جوعت وعايزة اتغدى سمك مشوى وجمبرى
وبكلاويظ وشوربة سى فود اه مش احنا فى اسكندرية يبقى سمك
سونة:ما تيجى تاكلينى اوفر
شفقة:" فى سرى"يا عينى يا سونة هتدفع دم قلبك
عموما مش مهم فدايا وهو انا بتفسح كل يوم
بقولك ايه بعد الغدا عايز اخرج اتفسح وعايزة اروح سان استفانو
عايز اتفرج على شوية حاجات
سونة: سان استيفانو ومالها زنقة الستات يا خراب بيتك يا احسان
شفقة: شايف الحاجة حلوة ازاى وبتبرق وبتلمع وجميلة اد ايه؟؟
سونة: اه من ناحية شايف فانا شايف ايه الجمال ده ... ايه الحلاوة دى كلها؟؟
سيدى يا سيدى على الستات ايه الحلاوة دى ايه الطعامة دى
ليت التلاتينات تعودوا يوما ...علشان ارمى القديمة اللى جنبى
واغير بقى بحاجة تفتح النفس ...اخ
الواحد اظاهر بقاله كتير مش متابع اخبار المزز
وخاصة المزز البحرى.... حاجة تفتح النفس
وترجع الشباب مش زى القبلى اللى جنبى
هى دى هدايا عيد الميلاد والا فلا
شفقة: ايه يا سى احسان مال راسك ملوحة ليه؟؟
خليك معايا هنا بدل ما تروح من غيرها
وترجع من غير رقبة ولا عين. ايوا كده شاطر يا روحى
بقولك ايه.... ايه رايك فى الفستان الجميل ده؟؟
انا ماليش دعوة انا عايزاه يا سونة
سونة: ها .....الفستان ولا صاحبة الفستان؟؟
شفقة: ها بتقول ايه ؟؟
انت مركز فى ايه بالظبط؟؟
يلا عايزة الفستان
سونة: حاضر....... حاضر
شفقة: ياخرابى على الجمال ......ايه الشوز الفظيع ده؟؟
انا ماليش دعوة انا عايزة من ده ده يهبل...انا عايزة من ده يا حزومبل انا عايزة من ده
سونة: طيب خلى حزومبل يشتريهولك ...اما زومبل فخلاص اعلن افلاسه
شفقة: يا لهوى... يا هوسى.... ايه الشميز والترننج الخطير ده ؟
انا اتهوست....واتجننت ماليش دعوة عايزاهم
سونة: ده انا اللى ماليش دعوة .....اتخرب بيتى يا شفقة.... خفى
شفقة: اففففففففففففففففففففف ايه الكوتشى الرائع ده لا ....لا
انا مش قادرة انا عايزة من ده
سونة: ياخرابى يا خراب جيبى ....هنشحت يا شفقة
وهنرجع من اسكندرية للقاهرة مشى وزحفا على الاقدام
يا مفترية بقى تجبيلى هدية ب200 جنية تاخديها بعدها بيوم 1200 ده ولا البنوك تعمل كده
ربنا يسامحك يا حماتى .....انتى وبنتك هتكونوا سبب هلاكى
شفقة: سونة ايه يا روحى .....مش هنسافر بقى ولا ايه ؟؟
سونة:اه طبعا امال لازم هنسافر بس لما تقولى لامك تبعتلنا حق تذاكر السفر

وحسبى الله ونعم الوكيل فيكى يا شفقة
اشوف فيكى يوم ..... ما تطلعلوش شمس
شفقـــــــــــــــة

هناك 20 تعليقًا:

شمس النهار يقول...

سمعت حد بيقول يوم ماطلعتلوش شمس قلت ماانا هو طالعه
:)))

كل سنه وانتم طيبين وفرحنين
وعيد ميلاد سعيد دايما

:)

ستيتة يقول...

ههههههههههههههههههههههههه
كل سنة واحسان طيب يا شفشوقة
انا واخدة بالي من نظرية قصقصي ريشه
بس بذمتك مش زيادة شوية
ده إنتي نتفتي ريشه ريشة ريشة:)
يعيش احسان ويجيب لك يا اوختشي
وتعيشي وتعملي له اعياد ميلاد

فتــافيت (رحاب الخضري) يقول...

كل سنة واحسان طيب .. وكل سنة وسفقة نتفة ريشه

ربنا يسعدكم.. دايما

وتعيش يا استاذ احسان وتفسح شفقة
عشان تشتري اللي نفسها فيه :)

همس الاحباب يقول...

هههههههههه
كل سنة وانت طيب يا سونه وتعيش وتجيب يا عمنا
وبتقولى ما بتجيبش المودام معاك ليه
اشرب يا باشا ادى اخرة اللى يخرج مع المدام
كل سنة وانتم طيبين وعقبال مليون سنة
تحياتى

عاشقة القمر يقول...

كل سنه هو طيب وأنتي الطيبة
ربنا يسعدكم

momken يقول...

كل سنه والبشنهدس طيبه
وكل لحظه وانتوا فى منتهى السعاده

بوست طبعا يهلك من الضحك

انتى خليتى عيد ميلاد الراجل مرسحيه


عقبال ميه سنه وكل سنه يزيد ارتباطكم وحبكم وعيالكم كمان


انا ماشى من غير ولا كانز ولا جاتوة
اعياد ميلاد اخر زمن


تحياتى

sony2000 يقول...

ههههههههههه
ههههههههههههههههه
حرااام عليكي بججد
دا كان شويه وهيشد فشعروا
بالرااااااحه عليه حبه
ولا اقولك
كملي
هما كولهم يستالهوووا
ههههههههه
بهدي النفوس:)

Soma يقول...

موهوووووووووووووووووووووووبه
انتي موهوبه

عيد ميلاد سعيد ياستي ولا تزعلي

وحشتوني قوي

basma bahaa يقول...

هههههههههههههههههههههههههههههههههههههههه يخرب بيت عسلكوا!

Ramy يقول...

كل سنة و انتوا طيبين (:


عيد أضحى سعيد (:

حد من الناس يقول...

يسعدنى تشريفك لى فى مدونتى الجديده

http://3alamakshoof.blogspot.com/

فيها سنتكلم عن مواضيع جريئه وموجوده فى المجتمع

ارجوا ان اتشرف بزيارتكم لى

شكرا

momken يقول...

كل سنه وانت طيب يابو حميد

نصيحه سيب ريشك على باب البيت
واعتقد مش هتحتاج تطير جوة

وكل سنه وانتى طيبه كمان يا شفقه
حفلاتك فعلاً جميله

كل عام وانتم فى منتهى السعاده

تحياتى

ahmed_k يقول...

هههههههههههههه
مش عارف أكتب أيه من كتر الضحك
تصوير لذيذ فعلا لحالة سونه وجيبه الفاضي
سلامي لسونه ومدام سونه وحماة سونه وكل من تسبب في معاناة سونه

مدونات من اجل التغيير يقول...

كل عام وانتو بالف خير و ربنا يديم المحبه على طول :)

_________________


نتمنى تواجدك معنا في تجمعنا الجديد مدونات من اجل التغيير

model يقول...

ايه الكلام الفاضي ده ، بقه غدوة سمك و شوية نقل و ايس كريم تنتف ريش سي حسبه بتاعك ده
مين العبيط اللي فهمك كده يا شوشو
لا يا حبيبتي
عاية تنتفي ريش جوك على اصوله اليك التالي
بدل ما تطلبي غدوة سمك عشان انت في اسكندرية
تطلبي شاليه في اسكندرية باسمك
بدل ما تطلبي شوية نقل و غدوة تطلبي دادة سريلانكية او الفلبينية انضف و بياخدو 200 دولار في الشهر
و اصلا بدل ما تطلبي تروحي اسكندرية ن احب اسمعكان في حاجة اسمها باريس و اختراع جديد اسمه لوندون و الليستست
و اسبانيا و اذا حبيتي تباني بتدبقى و قلبك عليه مشيها تركيا و ربنتا يكتبهالك في ميان حساناتك و اعمليها بجميلة
لكن اسكندرية دي بطلت يا شوشو
ال اسكندرية ال
و عملالي ناصحة و بتقصقصي

سيبك من القصقصة و اعملي فورمة جديدة تماما
ربنا ينصرك على حسبو جوك ده الايحة

موديل

model يقول...

مش مهقول
دمك شربات
حلو جدا ان الواحد بيجد فنانين ساخرين بهذا المستوي
الواحد ما ضحكش كده من فترة

مل سنة و انتم طيبيم

موديل

momken يقول...

عيد ميلاد البشمهندس قرب يا شفقه يالا حضرى البوست بتاع ( السنه دى )

غير معرف يقول...

السلام عليكم

انا عارفه اني مقصره معاك في التعليق والمتابعه الفتره اللي فاتت ولكن ده كان لظروف :)

عندي بوست وطلب مهم ارجو المساعده فيه :)

http://mal2atlhash3noan.blogspot.com/2011/03/blog-post_24.html

Asmaa mahaba يقول...

ربنا يديمها عليكم نعمه خدى بالك يا شفقه الثوره قامت والرجاله بدات تتمرد

نيللي علي يقول...

اول مره ادخل المدونه السكر دى ..انا فطست على روحى من الضحك

انا خلاص كدا هضيفك على مدونتى عشان اتابع يومياتك الرائعه دى

بجد مدونه رائعه