الثلاثاء، 19 يوليو 2011

أحســــــــان أفندى فى المصيـــــــف

الجو حر الجو نار والصيف مولع الواحد مبقاش يستحمل

شفقة: سونسون الجو نار الدنيا هتولع

احسان:نار هتولع

انتى عندك طفاية حريق

طفى بيها وسيبينى اتفرج على الماتش يا مؤذيه

شفقة:ماتش ايه يا عم انت ؟؟

وطفاية حريق ايه بقولك الجو حر

مش العربية بتولع

احسان: طيب يا شفقة ما تقعدى فى التلاجة

ولاافتحى التكييف تتكيفى

ولا انا اجيب تكييفات وادفع دم قلبى وانتى تقولى الدنيا حر

او ادخلى الحارة اللى جاية على ايدك الشمال هتلاقى

طشتك وبانيوهك وميتك

اقعدى فى الطشت هتلاقى طراوة

شفقة: انا اقصد ان الصيف جاى السنة دى غير كل سنة

احسان:غير كل سنة ازاى يعنى؟؟

مش لابس بربطوص ولا

مركب زلومة

شفقة: ياه على تقل دمك وهزارك يا سونة

انا عايزة اطلع اصيف اروح اتفسح

احسان: تصيفى فين بقى ان شاء الله ما الهواء هنا

فى البلكونة يشرح القلب

ولا انتى غاوية شحططة ومرمطة؟؟

شفقة: بلكونة ايه وبانيو ايه؟؟

انا عايزة اروح بورتو مارينا او بورتو السخنة

او ممكن لندن..... باغى

يعنى حاجة كده تليق بمقامقى

احسان: مقامك؟؟ لا اذا كان على المقام فعندك الحسين

او السيدة

قال بورتو...... قال ....ولندن

يا خالتى ومالها بلطيم وافغانستان وحشين؟؟

تروحى هناك تتجندى وترجعيلى تايبة

والنبى يا شيخة ابعدى عنى وشوفيلك حتة تتهوى فيها

شفقة:والنبى يا سونة نفسى

اصيف وابلبط فى البحر

تعالى نروح بورتو مش هتندم البت سفاقس بنت خالتى راحت

بورتو وبتقولى جنان تهوس

احسان:بذمتك فى حد يبقى اسم بنت خالته

سفاقس!

ويروح بورتو؟؟ ده كبيرها الملاحات

عموما اذا كانت تجنن يبقى مفيش مانع

اهو نرجع من هناك بفايدة

وندخلك سرايا المجانين

وارتاح من الزن واللت والعجن

شفقة: اه بس فى حاجة كمان صغننة رفيعة عريضة

احسان: ها يا واجعة معدتى ادينى تقلصات ادينى

شفقة:عايزة اجيب مايوه بيقولوا هناك المايوه هو الزى الرسمى

يرضيك ابقى عره وسط اهل بورتو؟؟

احسان: نعم ياختى....... مايوه وزى رسمى

طيب ومالها البدلة والبابيون دول عليكى يليقوا اوى

مع شنب كمان تبقى زى الفل وسيبك من مارينا وروحى اقعدى على القهوة

شفقة:يوووووووووووووووه .....بطل بقى

احسان:بقولك ايه نسافر اه...... مايوه..... لالالالالا

انا بس اللى البس مايوه

ستات دماغها مليانة كلام فاضى

بطلى تتفرجى على كليبات بوسى سمير

شفقة: وفيها ايه يا سونة انا اقصد مايوه شرعى

احسان:اه..... اذا كان كده ماشى

اصلى كنت بحسبه عرفى

وسافرنا صبرتوا ونولتوا المدينة الغناء بورتو مارينا

واحنا قاعدين على البلاج

شفقة: احسان بتبص على ايه شايفة عينك رايحة وجاية

لما جتلها ميه بيضاء

طيب حتى وقفها فى الاشارات

احسان يا شيخة طيب زمرى قبل ما تتكلمى

خضتينى انا ببص على الايس كريم بالشيكولاته

شفقة: بييييييييييييييييييييييييييييييييييييييييب ادينى زمرت اهو

بقى بتبص على الايس كريم ولا الايس كريمـــــــــــــــة؟؟

احسان: كريمة مين وبتاع مين يا شيخة

انا بس بتأمل بشوف ايه الجديد

"فى سره"والنعمة البت سفاقس بنت خالتك دى تستاهل هدية

اول مرة تدلنا على حاجة عدلة

تلاقى جوزها ابن المحظوظة هو اللى عرفها المكان

شفقة :حاجة عدلة اللى هى ايه ؟؟

المايصين المدلعين اللى رايحين جايين على البلاج يتاصعوا

بالمايوهات الفسفورى ولا ليهم ظابط ....ولا رابط

احسان: جرى ايه يا ست انتى

هو انتى من الحكومة ولا ايه؟؟

بقى ما صدقنا خلصنا منهم تطلعلنا انتى يا ساتر عليكى

ست من الحزب الوطنى المقرفاتى النابراتى

مين جاب سيرة الظباط والعساكر دلوقتى؟؟

انتى هتخليها امن دوله ولا ايه

خلينى امتع نظرى شوية بالحاجات الحلوة

قبل ما يروح عليا وامسك عكاز

وقعد يغنى انا بعشق البحر وبعشق موززه كمان

وحاسس انى تايه وحيران

ومبسوط ومش نعسان

وحاسس انى ندمان... وكنت كمان غلطان لما اتجوزت زمان

من شفقة اللى شبه ابو قردان

ويا عينى يا عينى يا سيدى على النسوان

شفقة: نعم بتقول ايه يا سى احسان

حاجات ايه اللى حلوة؟؟

احسان: ها... مابقولش انا اقصد الحاجات الحلوة الكتير اللى قاعدة مرزوعة جنب قفايا

انتى يا بسبوسة قلبى ......يا قطايف عقلى

شفقة: طيب حاسب يا سى رمضان لتلزقنى

بياميشك..... ااقصد بكلامك

احسان:بس تصدقى يا شفشوقتى كان عندك حق

لما قلتى نيجى بورتو

اهو تغيير برضوا بدل المناظر بنت الكئيبة اللى بتعمينا هناك

وبنصتبح بيها كل يوم فى مصر

والنعمة الواحد يطلب نقله فى الشغل هنا

تفتكرى يوافقوا يا روحى ويقدروا ظروفى

شفقة: وان شاء الله هتشتغل ايه ...... مبصبصاتى .... ولا معكساتى

ولا هتشيلهم الشنط؟؟؟

احسان:وانا اطول بس قولى يارب

احم احم يا ستى ده انا سبعة صنايع والبخت ضايع جنبك

ده انا علشانهم وعلشان مايوهاتهم

اشتغل روم سيرفيس

ارص شماسى وكراسى على البلاج

اشتغل دليفرى بيتزا

اى حاجة تخلينى لازق فى المزز اللى ترد النظر دى

شفقة: مزز وترد النظر هو انا مش مالية عينك ولا ايه؟؟

احسان:ماليه؟؟؟ ده انتى تملى تلاجة بحالها

مش عينى بس

يابــــــــــــاى الواحد مش عارف يتنفس

ارحمينى بقى وسيبينى اتمتع شوية

واشم ريحة نضيفة بدل ريحة المحشى وبابا غنوج وام اربعة وتمانين

شفقة: تتمتع شوية..... وبابا غنوج

شكلك جوعت يا سونة وشكلى هاكلك طرب

بس من اللى هو

عارفه؟؟ الطرب بالبونيه والبوكس والروسيات

احسان: روسيات ما تخليها طاليانات احسن والطف

يا روحى عليهم امــــــــــــوه

عاملين زى السمك بيلعلطوا فى الميه

اه يا اوحــــــى...... يا اوحــــــــى

شفقة: جتك وجع اوحــــــــــــــك يا حياتى

وفات يوم والتانى وسونة مش مركز معايا قاعد لازق على البلاج

ولا اللى قاعد جوه كرتونة مش عارف يخرج منها

عينه بتشرق وتغرب وراء المزز لحد ما فرسنى ولا كانى هنا

قعدت افكر واقول جبتيه لنفسك يا بت يا شفشق

استنى عليا يا مقصوفة الرقبة يا سفاقس لما ارجعلك

انا توقعينى الوقعة دى

وكان مالها بلطيم ولا القنطرة وحشين ولا وحشين؟؟

ده كان هناك الهواء مفيهوش نسمةبس على الاقل بيقعد زى الألف

ويشوفنى هناك ولا مارلين مونورو

اعمل ايه قعدت اقول اصيف اصيف لما الراجل هيروح منى

وهتنشله بت بلطية ولا طاليانيه ولا روسيه

لابقى ما بدهاش لازم امخمخ وامشى من مارينا بلا رجعة

ومالها كوم الدكة

اهى حلوة والمزز هناك بالجلاليب ام سفره وحفى وبالعمه

وحاجة تشرح القلب وزى الفل

هناك يا دوبك يلحق

يرجع

مش يبص

واحس هناك انى ملكة جمال انطاكيا

لكن بـــــــــــــــــــــورتو

خلت البنات هناك تبورتو ....وتعنسوا..... وتشيخوا كمان

وبقيت كل يوم اروح افصل الكهرباء من العمومى

لما خلتها عتمة وضلمة

لحد ما سونة ما بقاش عارف يفرق بين الشورت والجلابية

ولا البانيو من البحر

شفقة :سونة بقولك ايه يا حبيبى فى الظلام الدامس ده

احنا شكلنا مش هينفعلنا قعاد هنا

لا شايفين حاجة ولا عارفين حاجة

الدنيا كحل واحنا جايين نصيف ولا نتعمى؟؟

يلا بينا نرجع

احسان:شامم ريحتك فى الموضوع ده يا شفقة

اخ يانى اخ ....... يا فرحة ما تمت اصل هو كده فى ناس فقرين

عارفاهم يا حبيبتى؟؟

شفقة: ولا تزعل نفسك يا نور عينى انا حجزتلك اسبوع فى جمصة

وحضرتلك برجرام انما ايه يهوس

وهتنبسط اوى

احسان:برجرام فى جمصة وعمالة تقولى لندن وباغى

قدامى..... قدامى ياختى

شفقة: يا خويا بلا بورتو بلا فورتو

وقال على رأى المثل من خرج من داره يتقل مقداره

شفقـــــــــــــــــــــــــــــة


هناك 27 تعليقًا:

Ramy يقول...

هههههههههههههههههههههههههههههههههههههههههههه


جمصة أيه بقى بعد ايه ما اللى حصل حصل

مش جمصة من الأول كانت أحسن (:

لا تسألونى من أنا يقول...

هى دى اخره مارينا وعمايلها ماله البانيو فى البيت وشويه ميه وصابونه وجردلين وجروف عشره على عشره كل مصيف وانتم بخير

شفـقــة و إحســــان يقول...

رامى
والنعمة كانت احسن بس لو يغيروا اسمها كانت تبقى مارينا التانية

شفـقــة و إحســــان يقول...

لا تسالونى من انا
طيب لو سالنا من انت هيحصل ايه؟؟
والنعمة معاك حق وماله البانيو خمسين على عشرة وياسلام بقى لو بدلة غطس كمان يبقى جنان وبالمرة نملاه سمك يبقى محصلش

ابراهيم رزق يقول...

رجاله عينهم زايغة
هما الرجالة كده
ههههههههههههههه

فكرتينى كنت فى مارينا و اشمسية اللى جانبى الراجل بيشد زوجته عشان تنزل البحر با لفستان و بيقول لها عشان متنسيش المايوه تانى
ناس ليها بورتو مارينا و ناس ليها موتو جمصة

تحياتى

شفـقــة و إحســــان يقول...

ابراهيم رزق
ده راجل هايل وبعدين رجالة مارينا متخلفة ااقصد مختلفة تماما وبعدين تلاقيه عايز ينزلها بالفستان علشان يغرقها
بجد بجد ربنا يباركله ويا بختها هههههههههه

نيللي علي يقول...

طيب هتمشيه من مارينا هتلاقيهم فى التلفاز ..لو قفلتى التلفاز تلاقيهم فى الستريت ...المفروض شيفقه تقطع النور العمومى اللى منور القاهره كلها

اتشرفت انى زوزت مدونتك

مدونه رائعه

ahmed_k يقول...

بورتوا!!! بتروحوا بورتوا !!!
وكمان بتاعة مارينا
لالالا بصراحه أخويا سنسن كتر خيره
أنا عارف مارينا دي تأثيرها في الحر بيكون مؤذي جدا على الرجال
بس من أيه مش عارف بالضبط ؟؟ يمكن من الطقس البحر أبيض المتوسط ؟؟ جااااايز

شفـقــة و إحســــان يقول...

نيللى عايزانى اقطع النور العمومى من القاهرة شكلك حبتينى اوى ونفسك تخلصى احسان منى
ميرسى على تشريفك

شفـقــة و إحســــان يقول...

الغردقاوى
هو من جهة مؤذى فهو مؤذى بس مش على الرجالة بس وعلينا كمان
وبعدين عمال تقول بحر ومتوسط وابيض انت بتدور على عروسة ولا ايه يا احمد

Remas يقول...

ههههههههههههههه
ادي اخرة طلباتك يا شفقة
100 مرة اقولك بلاش تطلبي تصيفي بلاش بلاش بلاش

بس حرام دا احسان طيوووووووووب خالص ومش بيبص على البنوتات يا شفقة ودايما مش عنده اغلى منك انت ياقمر

بصي احنا نعمل اعتصام لالغاء بورتو مارينا
او الغاء المايوهات

او الغاء البنوتات العسولات الحلوات

ايه رأيك ؟؟

بوست عسووووووووووول يا حبيبة قلبي
وايوا كدا ارجعى نورتى المدونة تاني بكلامك العسول

momken يقول...

مررت بواحتكم
ولى عوده للتعليق

عوداً حميداً

سؤال برىء

هو ده البوست بتاع السنه دى؟؟؟؟


تحياتى

Reem jalal يقول...

هههههههههههههه

يا عيني ع البورتو اللي مبقاش بورتو

Unknown يقول...

ههههههههههههههه

بعد إيه جمصة بس ياشفقة هانم

فتحتي عين سونة على اللي في بورتو ده بعد كده كل صيف حايذلك ويقول لك تعالي بورتو ولا حاجة تانية


تحياتي مدونتك رائعة للغاية

شفـقــة و إحســــان يقول...

ريمتى حبيبتى
انتى لو طالبتى بالغاء البنوتات العسولات يبقى كده صحبيتنا انتهت وبكده تبقى بتطالبى بالغاء نفسك
اما امر المايوهات فسينظر فى امره فيما بعد علشان يا حرام هما غلابه برضوا

شفـقــة و إحســــان يقول...

ممكن
مررت بواحتكم بصراحة يا ممكن حسستنى انى قاعدة فى الصحراء جوا خيمة بدوية والناقة واقفة بره
وبعدين اذا كنت مش مقتنع انه بتاع السنة دى ومعتبرها كبيسة يبقى خليه بتاع السنة اللى قبل قبل قبل الميلاد
حلو كده

شفـقــة و إحســــان يقول...

راما
مهى بورتو خلاص راحت عليها وبقت خرابورتو يعنى خرابة

شفـقــة و إحســــان يقول...

هووووووووووبا
مهو يقول زى ما هو عايز بس اللى يروح بقى

Maha Shahen يقول...

خدينى معاكى وانا هقعد اراقبهولك من بعيد هههههههههههههه
يا بنتى مخططه عظيمه سيبك انتى ممكن يطلعلكم مايوهات فى جمصه برضو الفقرى فقرى
شوفى انتى تقوليله خايفه عليك من الشمس وتلبسيه نضارة مدهونه اسود احمر اهى حاجه تخليه مش شايف من الاخر
حمدالله علي سلامتكم وان شاء الله المصيف الجاى تكونى مخططه ليه احسن ولو معرفتيش تخططى قوليله انا عايزه اعمل فيك خدمه وادفنك فى الرمل علشان تطلع من جسمك الرطوبه وكل يوم ادفنيه هههههههههه وحطى فوق راسه علم علشان تبقى عينه للسما عدل

Maha Shahen يقول...

قرب رمضان فكرنى بناس يهمونى قلت اهنيهم قبل ما يسبقونى .. رمضان كريم

شفـقــة و إحســــان يقول...

نور
شكلك فقرية موت وعموما انا هبقى اعملك بنصايحك بس ربنا يستر وما يدنيش هو بالعلم فى نفوخى

شفـقــة و إحســــان يقول...

نور
خليكى انتى الكبيرة كل سنة وانتى طيبة يا قمر والسنة اللى جاية تكونى لقيتى شغلانة بدل ما انتى عطلانة ههههههههههه

blue-wave يقول...

هههههههههههههههههههههههههه
مهما اغيب الضحك هنا حصرىىىىىىى

Unknown يقول...

هى بلطيم والعب
فى الطين أحسن حاجة:)
دمك لسه زى الشربات
ياشفشفشفشفشففشفشفقة:)

Unknown يقول...

شفقشقققققة
بعد اذنك ممكن
تغيرى رابط المدونة
بتاعتى اللى عندك أحنا
عزلنا من زمااااااااان
رحنا بورتو مارينا صعبان":)
لأ قصدى رحنا صعبان على حالنا 2

ريري كربكه يقول...

هههههههههههه
فعلا الحل في مارينا الجو هناك تحفه

حسن ارابيسك يقول...

الحقيقة من زماااان
لم أقرأ هذا الكم الرهيب من الكوميديا
انها موجات من الكوميديا ما أن تخرجي من واحدة منها حتى تقابلك الأخرى
لكن الحقيقة المقتطفات والمواقف كلها كانت زي سلسال جميل
الحقيقة منذ فترة لم أضحك هكذا
مشكلة لو فين اتنين فعلاً بالشكل ده
تحياتي
حسن أرابيسك